رابطة عشاق مصر (أليكس لوفر)

[amrhoras]

مكركر سوري

تم تعديل 12 ديسمبر 2007 بواسطة amrhoras

[mogly]

أحباطات،،،،،،، لأ دى كلمة كبيرة حبتين إلا كنتى تقصدى صعوبات؟

طبعا احنا حياتنا كلها صعوبات و لكن لكن الضربة اللى ما تموتنيش تقوينى، تجربة السفر فى حد ذاتها صعوبة انا مثلا ايام الكليه كنت باسافر أوروبا شهرين تلاتة فى الصيف ورغم انى كنت بابقى سعيد للتجربة و خصوصا فى السن الصغير لكن برضه كانت صعبة و البعد عن الأهل صعب و البعد عن الأصحاب و التأقلم مع مجتمع جديد بعادات جديدة و لغة جديدة و شكل جديد و فكرة الذهاب الى المجهول فى حد ذاته مش حاجة هينة و دى يمكن مايحسهاش اللى جاى بلد عربى لأنه غالبا جاى و عقده فى جيبه لكن الهجرة مافيهاش ضمان و التحديات ضخمة و كتيرة و انتى بيرن فى ودانك كلمة واحدة "تو بى أور نوت تو بى" أو بالعربى العدو امامكم و البحر من وراءكم

التوليفة دى بتخلق جواكى نوع من التوتر لو انتى محظوظة بيبقى توتر محمود و بيساعدك انك توصلى للى انت عاوزاه لكن فى أخر اليوم تبقى حقيقة هى انك بتدفعى تمن التوتر ده لو مش النهارده يبقى بكرة ......... أكمل و ألا زهقتوا؟ انا بس حريص انى ما أطولش عليكم بدل ما ألاقى نفسى بأكلم نفسى و المدامات و الأساتذة فى سابع نومة

تو بى كونتينيود

موجلى

[mogly]

عووود

[mogly]

أسف دى كانت محاولة فاشلة لإدخال اغنية عود

[ELSHAMY]

موحلى العزيز

بمناسبة كندا......انا حصلت اخبرا على تأشيرة الهحرة......عايزين قعدة زجالة عشان تشرحلى أعمل ايه فى ال landing واتفسح ازاى انا والاولاد خلال اسبوعين..... الكلام ده حيكون فى مارس القادم ان شاء الله....وكيف بيكون الجو فى الوقت ده ؟

[ELSHAMY]

موحلى العزيز

بمناسبة كندا......انا حصلت اخبرا على تأشيرة الهحرة......عايزين قعدة زجالة عشان تشرحلى أعمل ايه فى ال landing واتفسح ازاى انا والاولاد خلال اسبوعين..... الكلام ده حيكون فى مارس القادم ان شاء الله....وكيف بيكون الجو فى الوقت ده ؟

[Heliopolis]

[مش عارف اقول صباح الخير او مساء الخير الساعه عندنا دلوقتي 1225 بعد منتصف اليل وانا لسه راجع من الشغل من نص ساعه.انا بقي لي دلوقتي اكتر من 30 سنه في المانيا ولكن مازالت حاسس بالغربه وشعوري ده بيزيد كل يوم وبالذات في الوقت الاخير ده لاني بقيت بزور مصر كتير كل مره اسبوع او اسبوعينالمشكله الموجوده عندي دلوقتي هيه اني لما باكون في مصر بشتاق لالمانيا علشان اولادي وانا هنا يبقي نفسي اروح مصر علشان والدي واخواتي. يعني احساس غريب جدا.علي فكره لما سافرت من مصر كان عندي 18سنه يعني بعد الثانويه العامه علي طول.انا سعيد اني وجدت المنتدي الجميل ده لانه بيهون عليا كتير وبحسسني بالحنين مصر .تصبحوا علي خير

[amrhoras]

دكتور الشامى ربنا يوفقك يارب

ربنا يعطيك الف صحه وعافيه

تصبح على خير وكل مصر والمصريين بالف خييير

واحلام سعيده بس تحكوهالى

انا صاحى اهوه مين هناك :blink:

عمرو

تم تعديل 13 ديسمبر 2007 بواسطة amrhoras

[amrhoras]

صباح شريف حظرتكم

طاب صباحكم وصباح كل أزواجكم وزوجاتكم, ابائكم وابنائكم ،اصدقائكم وزملائكم وفى النهاية مديركم ومديراتكم أيها المصريون والمصريات

علكم جميعكم قد صادفتوا احلام سعيده هنيئة ليلة أمس

منتظر تعليقاتكم ومشاركاتكم

اخوكم

عمرو :blink:

[mogly]

صباح الخير يا عميرة و صباح الخير جميعا

ايه أخباركم يا سادة؟ و الله وحشتونا

أبو حميد حمد الله على السلامة من الشغل ، انت بتسوق كل يوم 140 كم رايح جاى لشتوتجارت؟ و الله دى مشكله، انا أكبر مشوار كنت بأعمله لشغلى و انا فى كندا كان 45 كم وان واى و كان متعب يا أخى رغم انه فرى واى بس اعتقد الأوتوبان الألمانى أسهل بكتير، ربنا يسترها معاك على أى حال

و بالنسبة لشوقك لبلدك التانى ألمانيا، دى واردة جدا انا قبل ماأجى على هنا كنت فاهم انى عمرى ما ح أشتاق لأكندا بس اللى حصل غير كده حيث انى بأشتاق لها جدا و بأحب أنزلها بإنتظام و ده بعد إنسانى أخر فينا إحنا المصريين، اننا عشريين جدا و دايما دايما بنحفظ الجميل بمعنى انك لما بتحس بجميل من شخص او مؤسسة او بلد فالطبيعى انك تحفظ الجميل ده طول عمرك

د/ الشامى ، إيه حكاية المصريين ز كندا اليومين دول؟ انا كل ما أقابل حد يقو لى انه يا مقدم على هجرة، يا بيفكر، يا عامل لاندنج فعلا و مخطط يرجع فى خلال سنة ، ايه الحكاية انتو كنتم منتظرينى أرجع علشان تروحوا و ألا ايه؟ بس كده انا ممكن أفكر أرجع تانى

بس أسمح لى أسألك انت عاوز تهاجر ليه؟ انت دكتور مفترض انك ناجح و ماشى الحال و ألا انت بتفكر زى ناس كتير فى الجنسية للولاد؟

انا بالنسبة لى يا عمرو بإختصار شديد كنت سافرت كندا أثناء دراسة الجامعة و كان فاضل لى سنة و أخلص و هناك أتعرفت على إنسانة و إرتبطنا بقصة حب جميلة و اتفقنا انى أرجع مصر أخلص دراستى و فى نفس الوقت نختبر قوة مشاعرنا إحنا الأتنين، بعد سنتين و كنا على اتصال جت لى على مصر و اتفقنا على الجواز و كان لازم انتهى من خدمة الجيش الأول و بعدها أتجوزنا و سافرت يعنى انا ماكنتش مخطط للسفر من الأصل بس حد زقنى

الى لقاء

موجلى

[ahmedarab]

صباح الورد والفل والياسمين على كل المصرييات والمصريين

اية دة ماشاء الله ....

اسيبكم شوية ارجع الاقى التوبيك كبر صفحتين .... اية الحلاوة دى ....

بس بجد برافوا عليكم ....ايوة كدة عايزين تواجد وحكايات وذكريات وكل حاجة

صباح الخير على الجميع ....عمور و الشامى و موجلى وابو حميد ومسالم وسالم حجازى ......

ومدام ناش صباح مخصوص عشان الكلام الجميل اللى فى الصميم اللى قالتة عن ارتباط المصريين وعشقهم لبلدهم مهما كانت وقد اية دة مش موجود فى جنسيات كتير غيرنا.

الا بالحق محدش شاف اليكس ..... يا اليكـــــــــــــــــــــس

[التونسى]

ياااااااااااااااه شكرا جدا على الموضوع ده ....رغم ما يحمله الوجدان من شجون منذ اخر زياره لى لمصر

وعلى كل ورغم كل السلبيات اللى عانيت منها ..واول السلبيات دى للاسف مش الحكومه او السيستم...لكن تغير سلوك الناس فى مصر للاسوء ... الاانى اقدر اقول بكل حنين وشوق وصدق

وحشنى فيكى يا مصر .. طابا .. والطيابه .. والناس الغلابه .. غير كده من كلام ليس هنا مقامه

شكرا مره تانيه على دفعى للكتابه ثانية بعد صيام طويل!!! .. وربنا يحنن قلوبنا جميعا على مصر دايما .. ويحنن قلبها علينا

[madzoro]

السلام عليكم ....... يا ناس يا عسل

انا اول مرة اشارك معاكم في الموضوع ده ..... بصراحة موضوع جميل جدا

بالصدفة النهاردة اقبل مادخل على المنتدى ده .. زميل ليه في الشغل سألني سؤال

انت بتعتز بمصريتك؟ قولتلو طبعا من غير ما افكر في السؤال

وبعدين سألتوه اشمعنا

قاللي اصلك عايش طول عمرك بره .... على فكرة انا مولود في السعودية وعشت فيها لحد ما خلصت الثانوي سنة 96 وبعدين رجعت مصر دخلت الجامعة واتخرجت

سنة 2002 وسافرت السعودية تاني قعدت سنتين وبعدين جيت الامارات من سنتين ..... تقريبا لو جمعت الفترة اللي قعدتها في مصر ماتجيش 8 سنين

بس كلها اجمل سنين عمري

كنت عايش في القاهرة - منيل الروضة ... الله على منيل الروضة من اجمل مناطق القاهرة

انا فاكر لما كنت بانزل في الاجازات وانا صغير .. ابو سمرة بتاع الكشرى و عجيبة كبدة و جمبري

ولا حمص الشام من العربية اللي امام لارين .... ياااااااااااااااه

والصحبة لما نقف شلة نجمع عشان نتمشى على كبري عباس ونرجع من على كبري الجامعة

وللا نتمشى في شارع القصر العيني لحد التحرير ........ كانت ايام حلوة

نرجع لموضعنا انا معرفش ليه بعتز بمصر بس في شئ مخليني افتخر اني مصري

رغم اني ما بحبش الوضع الراهن ولا الساسة بس مش عارف ...... بحب مصر

طولت عليكم مش كدة اسف .... وللحديث بقية

انشاء الله هحاول اناقش الاسباب اللي خلتني احب مصر

[ahmedarab]

صبا الخيرات على الجميع

لكل حبايبنا اللى عايزين او بيحاولوا او بيدوروا على الاغنية الجميلة عود لاحمد الحجار

دة لينك للاغنية يا رب تشتغل و تعجبكم :blink:

http://www.BLOCKED77/file/18148287...___online.html

سلام وتحياتى للجميع

[ahmedarab]

عزيزى التونسى اهلا وسهلا بيك معانا

اتمنى ان المداخلة دى تكون الاولى وليست الاخيرة لك فى هذا الموضوع

وجودك هنا يضيف للمكان الكثير

نورتنا

[ahmedarab]

عزيزى madzoro

اهلا وسهلا بيك فى رابطة عشاق مصر

احساس جميل قوى منك بالانتماء و الافتخار بمصرييتك

وخصوصا انة من واحد مش عاش فى مصر كتير وعاش فى اماكن تانية واتعرف على ناس مختلفة

وقد اية بتمنى ان احساسك دة يكون موجود عند ناس تانية كتير اتولدت واتربيت وعاشت فى مصر وخدت من خير البلد اضعاف ما حضرتك خدت وبالرغم من كدة للاسف تلاقية نسى كل دة ومش فاكر غير السلبيات والمساوء بس ....

اهلا بيك يا عزيزى مرة اخرة بينا ويا ريت نشوف مشاركات كتيرة منك تحكيلنا فيها عن ذكريات 8 سنوات اللى عشتهم فى مصر

[amrhoras]

يصباح الورد على احلى اعضاء جدد

أ/Madzoro,أ/التونسي انتو نورتونا واهلا بكم ومرحبا وان شاء الله تمتعونا بأحلى ذكريات

اسمحولى اعطيكم نبذه عن الموضوع

الموضوع قامت به اختنا الفاضله اليكس هى شكلها يا إما نايمه لسه او بتعمل كوفى وهى صاحبة المبارده الجميله دى والفضل بطرح الموضوع وبما انها اسكندرانيه اجدع ناس يعنى لقينا كل الاسكندرانيه هجموا على الموضوع

لغاية لما جينا وخطفنا منهم الموضوع وعشان اسكت عينتني مندوب من مندوبين الرابطه ومرتبي طبعا عمال يعد ولسه مشوفتش حاجه خالص وانا مش مشتغل بقى وادى المايك

بس بجد اجمل واحلى موضوع بأصحابه كلهم ستجدون ذكريات واحلام واعترافات وفكاهات تعيش داخل طيات صفحات هذا الموضوع ومازال مستمر وان شاء الله يستمر لاننا مصريين كل ذره داخلنا تشهد بمصريتنا ولذلك مهما بعدنا بنرجع مهما طال الزمان وجدنا بعضنا بعض داخل هذا المنتدى الرائع وافكارنا تلاقت كما لو كنا على سابق معرفه يجمعنا الود والاحترام

لذلك اهلا بكما ومنتظرين كافه ذكرياتكم ( اعزائي هتعترفوا هتعترفوا والانكار مش هيفدكم)

تحياتى

عمرو حورس :wub: :blink:

[ELSHAMY]

أخوانى الأعضاء الجدد....مرحبا بالجميع

عمورة...شكرا يا حبيب

موجلى...ياعم مين جاب سيرة الهجرة...أنا حأعمل landing وأرجع تانى....هيا ناقصة غربة... أنا عاوز أعمل landing فى اسكندرية لأنى زهقت.

ما قلتليش أتفسح فين ؟ أنا رايح مونتريال و تورونتو و لندن وكينجستون...بس مش عارف أروح فين فى المدن دى ؟

عندى سؤال لأختبار الذاكرة عندكم....حد فاكر واحدة كانت معانا أسمها ألكس ؟

صباح الفل

[nash]

أستنوا يا جماعه...أخونا التونسي معانا.....

حمدلله علي السلامه أخي العزيز...طولت الغيبه عن المحاورات...إن شاء الله المانع خير....

طبعا منور المحاورات ..باب باب وصفحه صفحه....ياريت ما تغيبش عنا تاني....

أخي العزيز أحمد عرب...تسلم يارب علي التحيه الخاصه...ده الطبيعي بتاعنا أحنا المصريين ..جنسيه مالهاش حل...ربنا يحفظنا لبعض وإن شاء الله في يوم قريب مصر هاتكون أروع بلد في الدنيا...طبعا مع دعاء الوالدين هانتقدم....

أخي العزيز الشامي.....أممممممممم

الإسم المذكور ..حضرتك مش غريب عليه....سمعته قبل كده ياتري فين فين فين.....؟؟؟

تقريبا ده أسم لأجمل مدينه في مصر؟؟؟

أنا هاغير أسم أليكس لإسم ( هاميس ) ونقعد ننده عليها ونقول أرجعي يا هاميس ...نحن في أنتظارك....

.......................................................................................

بالأمس سمعت خبر وقوع حادثه لشقيقتي الصغري...وكانت هي اللي سايقه عربيتها...الحمدلله خرجت سليمه هي وأبنها ...اللهم لك الحمد..العربيه أتخرشمت علي الأخر..والعربيه المقابله كمان....أتصلت عليها,,,ةسألتها بالأمانه تقول مين اللي غلطان..ردت ووشها لونه احمر( شوفتها علي التليفون ) ودولي كمان..محدش يسألني إزاي...

وقالتلي بصوت خااااااافت...( أنا ) وقعت من الضحك...وقولتلها فداكي العربيه واللي أشترهالك...

كسري أنتي ومالكيش دعوة....

ا

الخبر الأخر...أننا وبكامل قوانا العقليه أشترينا جيتار بالكهربا للفتي الوسيم الصغير....

ومن امس وأنا جايبه قطنتين وحطاهم في أذني...علشان ما أقمش أدور فيه الضرب....طبعا العكس صحيح....

الخبر المؤلم بأة أن الفتي الوسيم التاني عايز يجيب ( بيز جيتار) ...عن أذنكم هاقوم أنتحر وارجع علي طول....

صباحكم جميل :blink:

[salemhegazy]

صباح الخير عليكم جميعا

الاخ م/موجلى معلهش انا اكسب موش بكتير

ثانوية السعيدية 80

بككالوريوس هندسة حلوان 85

كان عندى صور للسافتى فى الكونستراكشن جميلة جدا ها احاول اعثر عليها و ارسلها لك