رابطة عشاق مصر (أليكس لوفر)

[Heliopolis]

صباح الخير عليكم كلكم. الاخت ناش حمدالله علي سلامه اختك.اخي موجلي فعلا تفسيرك لاحساسي مظبوط للاسف اني مش قوي في التعبير باللغه العربيه انا المدام عندي المانيه ومحيطي كله الماني حتي اصدقاءي و لذلك بتكلم عربي قليل جدا يعني لما بكلم مصر في التليفون او صديق مصري لي في شمال المانيا.اتمني ليكم كلكم يوم جميل وسعيد .انتو كلكم اصدقاءي

[مسالم]

السلام عليكم .. ت

ماشاء الله .. ماشاء الله ... ايه النشاط ده .. ربنا يزيد ..

اعتذر ليكم .. كوني انشغلت عنكم الفتره الماضيه نظراً لضغط العمل .. ولكنني اختلس بعض اللحظات التي اجدها بين الدقائق ..لكي استأثر بجرعة حنان وحب للوطن واصحاب الوطن وذلك بمتابعة ما تكتبونه وما تشعرون به كل يوم ..

اسعدني جداً تواصلكم كما اسعدني اكثر .. وجود اصدقاء جدد .. اعطوا دفعة قويه للموضوع ... وإن كانوا من خارج الاسكندريه ولكننا نرحب بهم .. ضيوف اعزاء على الاسكندريه .. بشتائها الدافئ .. ونسيمها العليل...

دائماً ابداً ستظل الاسكندرية ملتقى الاحبه وملتقى الباحثين عن دفئ الذكريات ..

وستظل دائماً Alex-Lover هي صاحبة الفضل في لم شمل الباحثين عن حب الوطن .. وعن فتح باب الذكريات التي بين الصدور ..

وسيظل عمرو .. الحصان الاسود لهذه المحاورات ..

اتمنى ان اعود اليكم قريبا في ذكريات اخرى مليئة بحب الوطن ..

[amrhoras]

وسيظل عمرو .. الحصان الاسود لهذه المحاورات ..

ليه كدى بس يابشمهندز مسالم حصان اسود ليه بس wst:: هو اسمرانى شويه :blink: بس مش محروق اوى يعنى نص سوا

عمالين نظبط عرايس يقولوا ايه دوقتى لو وقف قطارى هقول انك السبب :lol:

ربنا يكرمك ياباشا وشكرا لزوقك بجد

ومرحبا مره اخرى بيك وحشتنا يراجل والله كباية شاى ازوزه ولا قهوه اقعد معانا اتغدى

الف الف شكرا وربنا يديم العمروف يا اجمل مسلم واخف دم :wub:

تحياتى عمرو

تم تعديل 13 ديسمبر 2007 بواسطة amrhoras

[amrhoras]

اخت امانى اثرتى فعلا فينا كلنا بكلماتك الجميله والمليئه بالرقه والمشاعر

====

بس ده ميمنعش انى كنت اتمنى تكونى شرقاويه

يارب حد شرقاوى يارب يارب يارب :blink:

بس مرحبا بيكي اهم حاجه تحملى جنسية بلدى يعنى اخت ليا الاسكندرانيه احتلو المحاورات يارداله.

======

بالنسبه للانتخابات والدايره خير من يمثلكم وجمعكم اختنا اليكس لوفر

[nash]

عدت والعود أحمد

أهلا يا باشمهندس موجلي....

التلوث السمعي أصبح معجون بدمنا هنا في البيت....والكل بيصرخ علي الكل لما يكون عايز حاجه من التاني...

.....................................................

عمرو...طلباتك بسيطه خالص..ممكن لو كالقيتهاش في مجمع الراشد تلاقيها في السيفواي....

جبتلي احباط....وانا ماليش نفس عليه....

أماني ...يعني الرقه والجمال....بجد مش عارفه ليه ده احساسي بيكي...

يعني أنتي كمان طلعتي من الغسكندريه؟؟ طب ليه ده حرام ...كل مانكسب واحد من القاهرة يطلع واحد من الإسكندريه....برضه في الأخر غلبتونا...معلش بأة ..يا أحلي مدينه وأحلي ناس...

ربي يحفظلك اولادك يااااارب ويباركلك فيهم..ويسعد قلبك بنجاحهم وتفوقهم وقبل كل شيء بطاعتهم لرب العالمين....

بس بلاش الجيتار...نصيحه من أم متشحتفه....

تسلمي يا عيوني علي دعوتك لرشروشه...ويارب أنتي كمان ماتشوفي شر أبدا أبدا...

ولك مثل هذه الدعوات الجميله وأكثر....

الله يكرمك طبق بليله بالايس كريم من عند صابر وابعتي الفاتورة علي أليكس..أصلها صاحبه البيت الحقيقه ...وتحب تخدم...

أخي الكريم دكتور الشامي....

انتبه..البدايه أورج....أو بيانوا...وبعدين جيتار عادي خشبي وبس....وفي الاخر بيكشفوا عن انيابهم ويقولوا بكل جرأة ويطلبوا جيتار بالكهربا....

وعيش حياتك بأة مع الدوشه.....

بالمناسبه جربت أنتحر وعلي أخر لحظه جاتني فكرة...طيب ما اجرب أبوس أيديهم يقفلوا عليهم باب أوضتهم؟؟ هاشوف وارد لكم خبر...

بالفعل ...أحساسي أننا جميعا هنا أخوة...وبرغم المسافات البعيده إلا أننا قريبين من بعض كثيرا...

ربي يديم الموده والحب والمعروف بيننا جميعا...

[mogly]

[b

==========================================================

موجلي اعتقد انك واخد القرار من الناحية الاخلاقية والنفسية .... يعني حتى لو كان فيه راتب مغري

ينتظرك في مصر برضه مش هتروح ؟؟؟؟؟؟؟؟

==========================================================

بصى يا أليكس

هوه موضوع الرجوع لمصر ده مافيش فيه كلام إذا الواحد فضل عايش، الحسبة بس فى التوقيت المناسب، و التوقيت المناسب ده محكوم بعدة عوامل منها عرض مغرى زى ما قلتى، بس لازم فى الوقت الحالى يكون مغرى جداااااااااا

صباح الخير عليكم كلكم. الاخت ناش حمدالله علي سلامه اختك.اخي موجلي فعلا تفسيرك لاحساسي مظبوط للاسف اني مش قوي في التعبير باللغه العربيه انا المدام عندي المانيه ومحيطي كله الماني حتي اصدقاءي و لذلك بتكلم عربي قليل جدا يعني لما بكلم مصر في التليفون او صديق مصري لي في شمال المانيا.اتمني ليكم كلكم يوم جميل وسعيد .انتو كلكم اصدقاءي

ابو حميد، بصرة، ظروفنا كانت متشابهة لوقت قريب مع فارق انى مشيت من مصر أكبر منك و ده له تأثير كبير ، انت بتقول مشيت عندك 18 سنة يعنى كويس قوى انك لسه فاكر عربى :blink: المشكلة ان حنينك مش بيبتدى يبقى شئ ملح إلا لما بيتقدم بيك السن لأن قبل كده زى مابيقولوا السكينة بتبقى سارقاك، على أى حال انت وضعك كويس لأنك أقل من 5 ساعات ممكن تبقى فى مصر انما فى كندا و أمريكا مش أقل من 20 ساعة سفر

أمانى أهلا بيكى معانا و ياريتك تستمرى علشان نشم ريحة مصر و بحر إسكندرية معاكى

عندى إقتراح للجميع ح أجى أقوله حالا بس أعمل شغله سريعة

[amrhoras]

ياجماعه تصدقوا

كلنا موجوديييييييييين

====

مدام ناش مش عاوز حاجه شكرا يخسارة السيراميك اللى كنت بشيله ع ضهرى واجيبه ساده مخصوص عشان تحطى عليه الورد اللى وقثع تانى يوم بس :blink:

nash salemhegazy ahmedarab mogly Alex Lover Amrhoras الله انا اسمى مكتوب كمان

تم تعديل 13 ديسمبر 2007 بواسطة amrhoras

[Alex Lover]

استأذنكم يا جماعة انا هأَروح دلوقتي وهتحرم منكم بدري اوي كده اصلي استأذنت اروح بدي (ويك إند بقه :blink: )

وعلى فكره انا اجازه جمعة وسبت بس على قد ما اقدر هاحاول افتح النت من البيت لو سيف واياد ناموا وسابوني اقعد على النت شويه

مش عايزة شقاوه وانا مش موجوده

[mogly]

شوفوا بقى ايها السيدات و السادة

إحنا فعلا واضح غن غحساسنا ببعض عالى و زى مابيقول دكتورنا هو مضوع أرواح

طيب ماتيجوا نجاوب على سؤال واحد بس يعرفنا ببعض أكتر

السؤال هو إنته مين؟

و الشرط الوحيد هوه الصدق و الشفافية المطلقين و يساعدنا فى كده اننا مافيش أى مصالح بتربطنا ببعض يعنى علاقاتنا مجردة من أى شئ الا الصداقة

و إحنا كمان مانعرفش بعض شخصيا و ده عامل مساعد تانى

يعنى ناخد راحتنا و كل واحد يقول عن نفسه اللى هوه عاوزه و اللى ممكن مايقدرش يقوله لأقرب الناس إليه حتى لأم العيال ( أخد بالك يا عمرو)

أى حاجة بعد كده مش مهمة الأسم و العنوان و تاريخ الميلاد (يمكن البرج....مش عارف؟ ممكن)

إيه رأيكم ؟ لو موافقين انا ممكن أبتدى :blink:

[ahmedarab]

مع السلامة يا اليكس ونشوف وشك بخير بعد ما يناموا الاولاد.

فعلا يا عمرو النهاردة ما شاء اللة ..كلنا تقريبا متجمعين

وعلى فكرة مش تحاول تهرب انا مستنى منك اجابة سؤال اليكس ..تاخد كام وتبطل كتابة فى المحاورات .... لالالا قصدى ترجع مصر ...

هابى ويك اند للجميع

[amrhoras]

سلام يا أليكس فى رعاية الله

المايك معايا الان

===========

انا ارجع مصر لو لقيت مرتب اقدر اعيش عيشه كريمه وسط اهلى وناسي

اقدر اوفر بيه كل متطلبات بيتي ومتطلبات اسرتى وبما اننا داخلين على جواز طلباتها اوامر( كدى وكدى)

اللى ميخلنيش احتاج لحد فى يوم من الايام ولا افتح ايدي اخر الشهر واقول سلفيه

واللى اقدر اعمل منه حاجه تأمن مستقبل عيالى

اعتقد انه احتمال بعيد شويه تلاقيه دلوقتى فى مصر لانى كنت بشتغل وعارف

============

سؤالك يا أ/موجلى صعب جدا وكان فى بالى من زمان

بس ياترى لو حد مدح فى نفسه ده هتقوله عليه ايه او حد كان قاسي شويتين على نفسه برده هتقولو ايه ؟

صعب ان حد يقيم نفسه بنفسه

============

ومع ذلك نبدأ بيك الاول ممكن؟

صدقنى انا من بعدك علطول وهكون صريح لدرجه الذهول لكم

تحياتى عمرو

========

ينهار ابيض انا هنا من زمان اوى اده شكلى عايش هنا والله لذلك صعب انى انسي المكان الجميل ده (المحاورات)الا اذا زهقوا منى وطلعت معاش

تم تعديل 13 ديسمبر 2007 بواسطة amrhoras

[nash]

سؤالك غلط يا أحمد...

عمرو منتظر إشارة بس وهاتلاقيه جري علي المطار ولو مالحقتش الطيارة ..هاتلاقيه واخدهاا مشي لغايه الزقازيق...عارفاة الحقيقه..شاب نشيط ومثابر...

عمرو استني علي السيراميك..أنا هانزل بشويه صور راااائعه...بعنوان ..عمايل أيديا وبص للمدفوع عليا...

أخي الكريم هوليوبليس...يعني جنب مصر الجديده..يعني برضه أبن الحته بتاعتي...( متأثرة بجو الإنتخابات ) وشعارات سي السيد....يعني برضه احسن ناس...

اياكش تكون حضرتك مش من مصر الجديده ..والله أزعل...

أخي العزيز مسالم...أنت فين الدنيا هنا مستنياك....أتفضل القهوة سخنه وريحتها جميله...

نورتنا ...

الأخت هاميس....

أتفضلي أنصراف..وياريت ماتطوليش الغيبه عن كام ساعه..لاعبي الجبابرة وغديهم ونيميهم وتعالي....ها أقول أوك؟؟

الباش مهندس موجلي..أتفضل علي بركه الله ...كلنا آذان صاغيه...

[mogly]

طيب فى نفس خط الإنتخابات أنا عاوز أغلبية موافقة على طرح السؤال و لحد دلوقتى مافيش غير ناش و عمرو بس

من هنا لحد ده مايحصل ح أستأذنكم لأن النهارده انا ربع يوم و أشوفكم بالليل إن شاء الله جميعا ......... العواف دلوقتى

آه ..... عمرو ، المفترض يا عزيزى فى الجميع الصدق لأنه زى ماقلت مافيش حاجة تخوفك أو تضطرك انك تألف أو تنافى الحقيقة و قيم زى ما انت عاوز

الكويس يبقى كويس و الوحش يبقى وحش زى ماهما ..... الحجيجة و لا شئ سوى الحجيجة.

اسمحوا لى بقى علشان ألحق أألف لكم حاجة أقولها

مـــــــــــوجلى

[ahmedarab]

موافقة يا موجلى

ابتـــــــــــــدى بقى ..(على راى فطوطة )

افتكر كدة بقى اجماع ...متاثر بجو الديمقراطية برضة

فى الانتظار

[Heliopolis]

الاخت ناش انا من حتتك ومولود في روكسي.للاسف لازم اروح الشغل دلوقتي الي القاء

[مسالم]

الاخت العزيزه ... نااااااش ..

حمدلله على سلامة اختك العزيزه .. عسى الله ان تكون آخر الحوادث ...

(لي ذكرى بهذه المناسبه .. مش عارف اذا كنت حكيتلكم الموضوع ده قبل كده ولا لأ) .. المهم حقولهالكم وخلاص ..

وقد ذكرتيني بالحادث الاليم الذي شاهدته مع أحمد إبني منذ سبعة شهور .. حينما أخذته يوم الخميس للمدرسة حتى يمضي اليوم كله في كتابة الواجبات .. وكان هذا عقاباً على شقاوته التي لم تنقطع طوال هذا الاسبوع .. وطبعاً عقاب الاخ احمد هوعقاب لي ايضاً .. فمن الذي سوف يقوم بتوصيله الى المدرسه في هذا اليوم .. أنا .. ونزلت أنا واحمد من البيت صباحاً .. وانا متنرفز طبعاً علشان حتأخر على الشغل .. وانا بركب السياره .. شفت واحد زميلي في العمل .. بصلي وبص للسياره بصه.. ماعجبتنيش .. المهم انطلقت بالسياره (تويوتا-برادو 4x4) الى الطريق السريع ... وعادة انا غير مسرع يعني من 140كم في الساعة الى 180كم في الساعه .. مش اكتر من كده علشان باخاف .. واحنا ماشيين على الطريق .. قلت لأحمد فين يابني علبة المناديل اللي كانت هنا .. هوّ انا كل ماحط حاجة في حته الاقيكم اختوها .. والتفت الى الكنبة الخلفيه واذا بعلبة المناديل في اخر الكنبه .. طب وبعدين .. مش عارف ايه اللي حصل .. جالي هاتف مش كويس وقاللي ..ماترمي يابني بجثتك على المقعد الخلفي وامسك الدريكسيون بأييدك الشمال .. مافيهاش حاجه .. وقد كان .. وكان ايضاً فيها حاجه .. وانا بحاول اجيب المناديل ومش باصص للطريق .. لقيت احمد بيقوللي بكل ألاته .. انت رايح فين يابابا .. ببص على الطريق لقيت السياره رايحه ناحية الجدار الاسمنتي اللي بين الطريقين .. وبسرعه لفيت الدريكسيون يمين .. وعندها رقصت السياره حبه يمين وحبه شمال .. وانا على 140كم في الساعه .. وفقدت السيطره عليها ومش قادر ادوس فرامل علشان ماتتقلبش .. وربنا الهمني بذكره .. فما كان مني إلا ترديد .. ياساتر يارب .. ياساتر يارب .. ولماّ أدركت انه لا محاله من السيطره على السياره .. وانها سوف تنقلب في نهاية الامر . وشايف امامي كوبري .. قلت لا مفر .. لابد من ايقاف السياره قبل الصعود الى الكوبري .. وعندها سوف تنقلب السياره من فوق الكوبري .. (كل هذا جال بخاطري في اقل من فانيه .. اللي هي اصغر من الثانيه) ...

خلاص اخذت قرار بتوقيف السياره .. ولكن .. كيف يمكن لي تقليل الخسائر وتقليل الاخطار .. احمد على يميني بدون حزام امان وكذلك أنا ... القرار التالي .. من اي جهه سوف يكون الارتطام أو الانقلاب ... اختار احمد ولا اختار نفسي .. قررررار صعب جداً ...

وكان القرار .. اخترت نفسي بدون تفكير .. فأحمد وإن كان مطّلع روحي كل يوم .. لكن أمامه مستقبل باهر إن شاء الله .. وقد وصلت انا من العمر الى مرحله لم يصل اليها هو.. فكيف لي أن احرمه من أن يعيش مثلها .. (إن كان لي الخيره في ذلك .. ولكن الامر لصاحب الأمر أولاً وأخيراً) ..

ثم كان .. ضربت على الفرامل وتمسكت بالدريكسيون مع حدفه جهة اليسار ... ولم أدري بعدها ماذا حصل .. غير أنني شاهدت الدنيا باللون الاخضر .. ولم يكن هذا احلاماً بل كان لون الاكياس الهوائية التي انفتحت بكل قوه في وجهي وصدري .. وكان لونها مغايراً عند أحمد .. فقد بدت له باللون الابيض .. ارتطمت السياره بكامل مقدمة السياره بقوه من الامام بالحاجز الاسمنتي المسلح الفاصل بين الطريقين .. ورجلي مازالت تدوس على الفرامل بقوه عسى الله ان يوقف السياره .. ولكن شدة الارتطام من الامام جعلت السيارة تندفع في الاتجاه العكسي مسافة اكثر من عشرة امتار ... ومن ستر المولى ان يكون هناك مخرج ورائي (لطريق الخدمه) فإذا بالسياره وقد استقرت في هذا المخرج .. وإلا كنا ارتطمنا ايضا من الخلف في الحاجز الاسمنتي الاخر... (كان هذا تحديداً امام مبنى اسمنت الشرقيه على طريق الكباري)

وبدون ان ادري نظرت الى احمد .. حصلك حاجه .. لأ .. أنزل من السياره بسرعه .. حيث كانت هناك سحابه من الدخان داخل السياره .. وخفت أن اشاهد فيلم هندي مصري .. واعتقدت ان السياره سوف تنفجر .. ولكن لم يحدث ولله الحمد ..

نزلت انا واحمد .. من السياره في منتهى القوه والايمان بما قدّر الله .. ولم اشاهد احمد كهكذا موقف من قبل .. لم يزرف اي دمعه .. بل كان ثابتاً تماماً (عنده 13 سنه) .. وفي لحظه وجدت جميع السيارات التي كانت خلفي تصطف على جانب الطريق .. وتجمع الناس وكل منهم يريد ان يقدم خدمه .. سلامات .. خذ ميه .. فين مفاتيح السياره حتى اركنها لك .. الحمد لله .. لقد انجانا الله .. برحمته .. لم يصبنا شئ .. لم ينجينا من هذه الحادثه المميته سوى كلمتين .. ياساتر يارب .. يقيناً وايماناً بمعناهما .. وقد كان والله .. قد وضع الله بيننا وبين الموت ساتر لا يمكن ردعه .. وأخرجنا منها كما بدئناها اول مره .. الحمد لله .. الحمد لله ..

كلما خرجت مع احمد في أي مشوار .. فاكر يابابا لمّا عملنا الحادثه .. كانت في المكان ده بالظبط .. يابني اهدا شويه وافتكرلنا حاجه حلوه .. الله يهديك خلتني اكلبش في الدريكسيون ومش عارف اسوق ..

في النهايه .. لسه مكتوبلي عمر .. علشان اتعرف عليكم واسعد بصحبتكم ..

الله يهديكي يا مدام ناااااش .. كان لازم تفكريني ... :blink:

تم تعديل 13 ديسمبر 2007 بواسطة مسالم

[ahmedarab]

حكايات الحوداث دى يا استاذ مسالم خطيرة جدا

انا مش عارف انت ازاى بتحكيها بكل الكم الجميل دة من السخرية

فعلا يا عزيزى لقد انجاكم منها الايمان بالله وكلمة يا ساتر يا رب ..وفعلا فقد سترها الله من الساتر الحديدى

لا اراك الله فى احمد مكروها ولا فى اى فرد من عائلتك الكريمة

تحياتى

[amrhoras]

ا/ مسالم

الف الف الف مليون حمد الله على سلامتك وعلى سلامة حماده ده كل اللى اقدر اقوله لانى عشت معاكم لحظه بلحظه من خلال حديثك بجد الف حمد الله على سلامتك وارجو منك تاخد بالك مره واتنين وتلاته وابقى هدى السرعه شويه بلاش توصل لل 200 الله يكرمك زى ناس اعرفها مجانين سرعه والمصيبه ان مش معاهم رخصه وساعات اقامه كمان

ومع ذلك خد بالك وتيك كير احمد واخواته ربنا يخليهوملك بس هم برده محتاجين بابا مسالم

تحياتى لك والف حمد الله على سلامتك وفداك مليون سياره برادو تويوتا فول اوبشن اتوماتيك قير صالون فايف ستارز والسعر 120000 ريال يس ونعملك خصم يبقى 119000 يبلاش

على فكره انا مفهمش ف السيارات مع انها اختصاصى شغلى بس السيارات الكبيره والتريلات والمعدات التقيله اوى

لك كل تحيه وسلام عمرو

====================

[مسالم]

عزيزي احمد باشا عرب ..

اشكرك جزيل الشكر على ما تفضلت به من دعاء .. لي وللأسره ..

ولكني قد حباني الله بنعمة النسيان وعدم والتركيز فيما إن تمسكت به .. لن يفيدني بل سيضرني .. ودائماً اجد نفسي خارج الصوره عندما اسرد محتواها .. ولهذا السبب مازلت ابتسم وانعم بما منحني الله .. وقد منحني الكثير .. أسأله سبحانه وتعالى أن لا يحاسبني بمدى حبي له .. لكن أن يحاسبني بمدى حبه لي...

وفقك الله في حياتك ومستقبلك ..

[amrhoras]

عيني عليكو بارده :blink: ربع يوم اومال لو حد بيشتغل 78 سااعه ف الاسبوع 72 ساعه +6ساعات يعنى312ساعه كل 26 يوم + 24 ساعه جمعه يعنى 3744 ساعه سنويا +288 ساعه جمعه

ده الحساب تقيل اوى يبلاش

=========

مش عارف لسانى اعمل فيه ايه لازم ارد على انت مين دى اهو ادتبست فيها

فكرتنى بطنط سعاد وعمو حسين فى فيلم خلى بالك من زوزو مع انقلاب الادوار تماما يعنى من حسين فهمى لاحمد زكى على اساس انى الحصان الاسود قصدى النمر حلو والله الاسم ده يا أ/مسالم شكرا ياسيدى

========

هقول انا اول اجابه مين هو عمرو

....... للاسف مسحت بعد تفكير عميق

مش هقدر اجاوب

عمرو