رابطة عشاق مصر (أليكس لوفر)

[ahmedarab]

ماشاء الله

تخيلوا يا جماعة من النهاردة الساعة 12 منتصف الليل بتوقت الامارات لغاية دلوقتى الساعة 17:30

دى المداخلة رقم 63 فى الموضوع دة بس

افتكر احنا النهاردة حققنا رقم قياسى فى عدد المداخلات فى اقل من 16 ساعة

ولســـــــــــــــــــــــــــــــــــــــــــة

[مسالم]

عمرو .. باشا .. الله يصلحلك الحال .. ويرزقك ببنت مصريه اصيله .. تجعل حياتك نعيم في نعيم ..

أما عن موضوع الحصان الاسود .. فهذا هو الحصان الجوكر يا عزيزي .. ولا تلتفت الى الالوان الخارجيه .. المهم الالوان الداخليه .. اللي في القلب .. لحسن تفهمني غلط .. :D

شكراً على المعلومات الجميله دي .. انا بفكر اشتري نصف نقل احسن .. ها .. الاسعار عندكم ايه ...

[nash]

أخي الكريم مسالم...

الحمدلله جت في الحديد ..يا الله حتي في لحظات الشده نختار أنفسنا بدلا من نور عنينا أولادنا ..الملائكه....

انا ذكرياتي مع الحوادث لا تتعدي خبطه شمال أو يمين ...اللهم لك الحمد...

فقط مرة في الطريق الصحراوي...وكنت أنا اللي ماسكه زمام الأمور من مصر الجديده وبالأمر والله..يعني انا بتمتع بجبن شديد وخاصه في القياده ليلا..وخاصه في طرق مصر الجميله...

المهم كان لازم نلحق السحور مع الأهل في مدينه فايد...

ومش فاهمه للأن كيف أمرني ابو ياسر بأن أقود أنا....قلبه جامد...

وبعد ملاهي السيندباد..أقوله كل شويه أيه الميه اللي علي الأرض دي...يقولي ده لون أسفلت مغاير للون الطبيعي..اسكت شويه وأقوله بذمتك شوفت الحفرة الرهيبه دي؟؟ يقولي لأ ده سراب..يوة سراب ايه بس؟؟

يقولي يابنتي أنتي مش كنتي أدبي اقوله أة ..يقولي طب سوقي وأذكري الله...

والله العظيم في منتصف المسافه علي الطريق إلا والعند ركبني وركنت عند أول محطه خدمه..وقولتله نو واي سوق أنت ...

بس لما وجدني مصممه قال مافيش فايده..وأخدت ياسر في حضني..لإنه كان بيبي...وبدأنا المسيرة...

فجأة لقيت أبو ياسر بيغني بصوت عالي جدا ( أغنيه من بتاعه الناس الأي كلام ) وحقيقي دي مش عادته بالعكس دائما الكاسيت شغال علي القرآن الكريم او في أضعف الأيمان أم كلثوم..

وعلي فكرة أنا قليل لما أخرج معاه..إلا إذا حلف علي كل أيمانات رب العالمين أنه سيقود قياده كبار الزوار...كنايه عن الرأفه والرحمه بأعصابي..لإنه دائما ما يأخذ الشباب ويقعد يفحط بهم..في الأماكن الغير مأهوله...هوايه ...أعمل ايه بس...

المهم ونحن علي سرعه 140 زي حضرتك اسمع فرمله بشعه الصوت ..ونحن منتصف نهر الطريق..يقوم يطلع أيه؟؟

عربيات التراك المحمله بأسياخ الحديد وكل سيخ طالع منه حوالي 3 متر خارج السيارة..والأخ الكابتن القائد بيلف شمال علي طريق العوده..والمؤمن مش مركب في عربيته نور واحد يوحد بيه ربنا..ولا حتي نور الفرامل..والله حاجه كانت بشعه...وطبعا العربيه كانت بمقطورتين فمقطورة عدت علي الناحيه التانيه والأخر بإنتظارنا..المهم سائق التراك..حس علي المصيبه فداس بنزين قليلا وتقدم بعيد عنا ببضع سنتيمترات..ولحسن الحظ ايامتها كانت العربيه مازدا أسبور..وكان أبو ياسر ياوب مظبط الكفرات وحاطط كفرات عريضه علي اساس الشياكه وكده..ووقفنا تحت الأسياخ وعلي بعد سنتيمترات من جسم التراك ...

شويه وبصلي أبو ياسر وقالي يا نهار أبيض..( ناش ) كنا هانموت ...وأنا يا ناش كنت هاطلع لربنا وانا بغني الأغنيه الهابطه دي؟؟؟

بصتله بهدوء وقولتله... الحمدلله جت سليمه..وطبعا كنت بغلي منه....

وطول الطريق كل ما يضرب فرمله احس بتنميل في أصابعي واقدامي..والحمدلله وصلنا علي ميعاد السحور ..وطبعا كانت سر بينا حتي لا يتعرض للدوشه من الحبايب...

الحمدلله يارب تكون أخر الحوادث لنا ولمن نحبهم...

أخي مسالم ربي يحفظلك احمد وتفرح بيه وبكل تفوقه ونجاحه

[mogly]

ايه يا جماعة قلبتوها ادارة مرور ليه كده؟ ألف سلامة عليكم جميعا و ربنا يسلم الجميع يا رب

انا بقى حصل معايا موقف مشابه بس ما كنتش انا اللى سايق

كنت مرة جاى من كندا و رايح على مصر ووقفنا فى مطار فرانكفورت و غيرنا الطيارة و بدأنا نتحرك فى الميعاد و الطيار أخد وضع التيك أوف و بدأ يتسارع و فجأة و قبل الرن واى بأمتار و تقريبا كان رفع العجلة اللى قدام فجاة راح ماسك فرامل شديدة مخيفة رهيبة لدرجة ان الطيارة لفت منه على حافة الرن واى

انا كنت قاعد و جنبى ابنى و بأحاول أفتعل الإتزان و عدم الأكتراث علشان خاطره لكنى كنت من جوه بايظ تقريبا و مافيش دقيقتين و لقينا المطار كله محاوط الطيارة ، المطافى و البوليس و الأسعاف و الأمن و كله و أكتر من كده أخرجوا خراطيم المياه ووجهوها على المحركات انا شفت كده قلت لأبنى (جست ريبيت افتر مى ، اشهد أن لا إله إلا الله و أشهد أن محمد رسول الله) و بعد 10 دقايق تقريبا مروا كأنهم 18 سنة أتكلم الكابتن بصوت بيترعش و قال انه فيه طائر دخل المحرك، هوه كان قاصد يطمنا لكن اللى حصل ان صوته قلقنا زيادة و فضلنا على كده يمكن نص ساعة مش قادر أوصف كنا عاملين فيهم ايه لحد ما بدأت الطيارة تتحرك على الهنجر من تانى للصيانة و أتضح ان كان فيه عطل فى اجهزة الهبوط تقريبا و ما اكتشفهوش غير لما بدأ يطلع و طبعا غيرنا الطيارة

انا رغم ان بقالى أكتر من عشرين سنة بأركب طيارات لكن الحادثة دى بالذات أثرت في جدا و من ساعتها و انا بأعمل حساب أى سفر قبلها بشهر و أتوب من ذنوبى و أدفع ديونى و أكتب الوصية و حاجات كده و بصراحة بأبقى فى منتهى القلق طول الرحلة ، بس ربنا يسترها معانا و معاكم و مع الجميع

بمناسبة السرعة يا مدام ناش انا من خبرتى بأقول ان مافيش طريق فى مصر يتحمل أكتر من 100 كم فى الساعة سرعة لأن أخطاء الغير هناك كثيرة جدا زى ما حكيتى عن اللى حصل معاكم و ربنا يستر طريقنا كلنا يارب

الى لقاء قريب

[Heliopolis]

صباح الخير عليكم جميعا.وسلامتكم كلكم من اي حوادث وربنا هوه اللي بيستر.انتوا طبعا عندكم ويك اند دلوقتي وانا الويك اند عندي سبت وحد.للاسف انا لا استطيع الدخول علي النت من الشغل.اتمني لكم هابي ويك اند

[amrhoras]

صباح الخير يا ا/هوليوبلس

الكل فى الويك اند ونتمنالهم ويك اند لذيذ انشا الله انا بقى اجازتى يوم عرفات وكل سنه وانتم كلكم بخير

مش عارف قلبت امبارح حوادث معاهم هههههه حمد الله على سلامة الجميع

عمرو

[Heliopolis]

صباح الخير يا عمرو.وكل سنه وانت بخير يارب.

[mogly]

صباح الخير جميعا و هابى ويك إند عليكم ان شاء الله

و كل سنة و انتم طيبين بمناسبة العيد ، يا ترى فيه حد من جماعة السعودية رايح الحج؟ بس لو ما ينساناش من صالح الدعاء الله يخليكم

باى دلوقتى

[DARWEEN]

الأخوة الأفاضل جميعا ...

منذ فترة وأنا أتابع هذا الموضوع وحقيقة إستمتعت بالكثير مما جاء فيه من طروحات ...

ولكن ألا ترون معي أن الأمر بدأ يتحول من محاورات إلى حوارات ... ومن مداخلات إلى شات !!!

رجاء الأنتباه لذلك

[مونتى]

مساء الخير على الجميع .....

اليكس لوفر اسف على التاخير ولكننى احب ان اخبرك اننى والحمد انهيت المشروع وقمت بتسليمه للادارة ومنتظر تسليمه للوزارة وهناك خبر جميل جدا لك ولكل الاسكندريه

انا نازل اسكندريه كمان شهر حد عايز حاجه

شويه ميه من بحرها

سندوتش من عند محمد احمد او ابو ربيع

جيلاتى من سلطانه

او حته من فيلم يعرض فى مترو او امير او فريال.....

جزء من تمشيه على البحر فى عز الشتاء

اكله سمك من عند ابو اشرف او قدوره

على العموم كل عام وانتم بخير بمناسبه عيد الاضحى وان شاء الله انا طالع الحج وادعو للجميع ان يكتبها له الله ويتقبل من الجميع

وعقبال عندكم جميعا

عـــــــــ :D ــــــاشق بلدى

[amrhoras]

ماشا الله انتو لسه نايمين ولا ايه

قوموا صلوا الفجر يله يامصريين قصدى يامسلمين

حد عنده صلينا الفجر فين صلينا فى الحسين (على الحجار) :waf:

اجمل ايام واحلى الاوقات هى ساعة الفجر بجد

اراكم صباحا اخوانى المحاوريته

========

ا/ داروين حمد الله على سلامتك ان شا الله مفيش شاتينج بس بنحاول نتفاعل اكثر فأكثر المهم منتظرين من سادتك ادلاء ما فاتك وفاتنا من ذكريات بجد لان حضرتك وعدت انك تقول ووعد الحر دين عليه

نورت الرابطه من جديد صباح الخير

========

أ/ مونتى الف مليون حمد الله على سلامتك ومبروك ع تسليم المشروع نروجو بقى الانتظام ثم الانتظام ثم الانتظام فى اعترافات الذكريات

=========

أ/موجلى اين ردك ع السؤال من انت

تحياتى وصباحكم ورد وكل سنه وانتم طيبين

عمرو داخل انام اشوفكم بعد ساعتين من الزمن :lol:

[amrhoras]

صباح الكسل ماهذا النشاط محدش جه لسه

ولا انهارده السبت اجازه عموما احسن برده الدنيا برد وهتمطر باين كدى والجو مش مساعد لانه برد قارس

عموما صباح الجمال والابتسامه

تحياتى

عمرو

[ahmedarab]

صباح الحب والجمال

صباح الكسل والوخم ....صباح اول الاسبوع

صباح الخير على كل حبيبنا المصريين

انا جيت اهوة يا عمور عشان تعرف انى نشيط وبصحى بدرى .ههههههههههههه

انا بس بثبت حضور واروح اضؤب كوبية شاى ولا نسكافية عشان افوق وارجع تكون صاحيت الباقى

سلام مؤقت

[ahmedarab]

اية يا جماعة خير ؟؟؟

انتوا هربتوا ولا اية

يعنى هى الاجازة بتغير الناس كدة ؟ ههههه

يظهر كدة محدش بيشتغل السبت غيرى انا وانت يا عمور ....صباح الفل يا جميل

تحياتى

[amrhoras]

أيو الله .

كلنا لها يابني

المايك معايا دلوقتى واكلمك بصفه رسميه

تعالى بقى وقولى هنا ذكرياتك مع عيد الاضحى واجمل عيد قضيته فين وازاى تصدق حكينا على العيدين بس سيادتك كنت لسه لم تنضم الينا

فاتكلم ياحلو وقولى ولا تخبيش يازين اعترف احسنلك الانكار مش هيفيدك

اخوك عمرو

[ahmedarab]

اية دة ؟.... ولية الاسئلة المحرجة دى ؟؟؟

شوف يا سيدى انا عيد الاضحى عندى زى اى عيد مش بيختلف بين اضحى او فطر ....

وبالنسبة لحكاية الدبح واللحمة والكلام دة ... مليش دعوة احنا اللحمة كانت بتيجلنا جاهزة لان جدى هو اللى كان بيدبح (من الشرقية راساً الينا :lol: )

شوف لم كنت طفل ..كنت لازم اخرج على طول كل ايام العيد ...يعنى اقوم الصبح كدة زى الشاطر افضل احوم فى البيت لحد اما اقلق كل اللى فية عشان اخد العيدية wst:: وبعدين اخلع انا بقى ...سينما ...الحديقة الدولية (دى كانت اساسى كل عيد ) لف على العائلة (عشان العيديات طبعا :lol: )

لما كبرت شوية نقول مثلا فى الجامعة بطلت اخرج فى العيد خالص :sad:

مش عايز اقولك الاماكن بتكون زحمة قد اية فى الاعياد لدرجة انى ساعات كنت بستغرب انا كنت بخرج ازاى وانا صغير ؟؟؟؟

لما كبرت كمان شوية نقول لما اتخرجت ..بقيت بخرج فى العيد بس خروجى كان بيبداء من الساعة 9 او 10 بالليل وحتى الساعات الاولى من الفجر

وعموما كان احسن يوم ليا فى العيد هو يوم الوقفة لاننا بنكون متجمعين كلنا (الاصدقاء) ونسهر مع بعض لغاية صلاة العيد ويعدين نطلع نفطر وننزل تانى من غير نوم حتى ........... :lol:

اةةة كانت ايام .................. طولت عليك ورغيت كتير اوىى

بس مليش دعوة انت اللى سالت

تحياتى وكل سنة وانت طيب

[nash]

صباح الخير... :roseop:

كل سنه وانتم طيبين...وإن شاء الله علي عرفات العام القادم مجتمعين....

يعني أسيبكم شويه اجي ألاقي إنذار إداري؟؟ لأ ده ظلم....كان نفسي أتفرج...دايما أنا كده الكوارث تفوتني.... :lol:

الحقيقه كل أيام الأعياد لها طعم مختلف عن الايام العاديه..حتي لو مافيش خروج..لكن نشعر بداخلنا أن الايام مختلفه عن الأيام العايه...

أذكر في احد الأعياد ...قبل وفاة ابي ...أننا أشترينا خروف العيد.....وأذكر جيدا أننا وضعناة علي سطح العمارة...ويوميا كنا نصعد إلي السطح ونركب فوقه ..حتي الشغاله ..عاشت حياتها....( طبقيه ) صح؟؟ والله كنا عادلين أحنا مرة وهي مرة...

اللي فكراة ان الخروف كان شكله غريب بعد كده...كل قدم من أقدامه كانت في إتجاة...انا فاكرة منظر وجه ماما وهي مذهوله من الهيكل العام للخروف...كان اي كائن حي غير أنه خروف بفرو....أييييه ايام...

طبعا أول يوم العيد لازم الإفطار يكون حوواوشي معتبر...والغدا لحم مشوي علي الفحم....لم نكن نحضر عمليه الشوي لإننا نكون محطوطين في النادي...ونحضر إلي البيت فقط لتناول الطعام...ونعود مرة أخري إلي النادي...

طبعا ياتي الأهل والأحباب لتقضيه اليوم معنا..مع أن المفروض نذهب نحن إليهم ..ونجتمع في بيت العيله..ولكن العكس دائما ما كان يتم....

لازلت أذكر العديه واجتماعنا كلنا علي طاوله الطعام...وخناقتنا مين يقعد في النص بجوار الجده...ربي يحفظهالنا....أحن إنسانه واطيب إنسانه في الوجود....

وفي الليل..ننام بعد أن يحل التعب بنا وكأننا ملائكه..ونحلم باليوم التالي..كأننا بنخلص ثأرنا من الايام العاديه ....بالجري والتنطيط....

فاكرين الحذاء الفرنيه؟؟؟ ده كان أحلي موضه..كل الأولاد والبنات لابسينه ..وكله بيلمع وجديد...والشراب أبو كورتين علي الجنب؟؟؟ ومن فوق فيه خطوط ملونه؟؟؟

أحلي ايام والله...

ربي يعيد هذه الايام علينا بالخير والبركه....

أنتبهوا بأة لحسن المرة الجايه هانلاقي نفسنا في الشارع قاعدين مستنيين حد يفتح لنا الباب....والدنيا برد يا جماعه :lol:

[Heliopolis]

صباح الخير. وكل سنه وانتم طيبين.

بالنسبه لي انا لم احس بالعيد من ساعه ماسافرت من مصر.اينعم بدي اولادي العيديه واقول لهم النهارده العيد لكن بنكون هما عندهم مدرسه وانا عندي شغل وبيكون يوم كالمعتاد للاسف.كانت ايام جميله ايام العيد في مصر وانا مره وانا طفل اتعورت بسبب الخروف كان في البلكونه عندنا وقعدت اضايقه وجه يجري بقرونه عليا وانا خفت وجريت واتكعبلت وقعت علي سن الترابيزه واتعورت وامي رحمها الله جريت بيا علي الدكتور واخدت غرزتين جنب عيني وجت سليمه الحمد لله.

كل سنه وانتم طيبيين

[amrhoras]

اين انتم ايها المغتربون

اخى احمد :-

كيفك يا باشا تصدق انى عملت زي سيادتك واشتري القضيه وقعدت فى البيت لقيت متعه يا اخى انك تريح فى البيت وتقضى احلى خمس ايام مع الاسره وان لم اكن مخطيىء فهذا من حوالى ثلاث او اربع سنوات كان اخر عيد اضحى اقضيه مع الاسره الكريمه

==========

مدام ناش :-

ازيك ؟ انا دلوقتى عرفت ليه الخاروف انتحر دى كانت قصه شهيره اوى انتحار خروف من فوق السطوح والسبب مجهول

والخبر يقول : خروف فى مقتبل العمر ينتظر يوم الاضحيه بفارغ الصبر على درجه عاليه من الوسامه ويشغل مكانه موقره بين الخرفان نظرا لجمال فروه وجمال صوته وانفراده بهيكل خاروفى منفرد وجمال اعوجاج الارجل اضاف اليه جمال . وفى ساة مبكره من يوم ... لعام .... قام الخاروف بالانتحار برمى نفسه من فوق سطوح احد المنازل . وعند انتقال السيد اللواء سيد عنتر لواء قسم السلخانه ومساعديه الرائد ابو سنجه والملازم ابو فشه وعند سؤال الشهود اقر الجيران والساكنين حول المنزل مكان الجريمه قالو ان هناك اطفال ومن ضمنهم طفبه غايه فى الشقاوه تسمي ن..ش وهى من وجه اليها الاتهام الوحيد وقد حكمنا عليها نحن قاضى الطفوله عمرو بن حورس على المتهمه ناش بالادلاء باجمل ذكرياتها اللى فاتها ان تدلى بها للجمهور وعليه سيتم التنفيذ فى الحال .

==========

استاذ هوليوبلس العيد ملوش طعم الا فى مصر ربنا يقويك على ايام الغربه دى دعواتك معانا الله يكرمك

تحياتى اخوكم

عمرو

[nash]

مساء الخير ...

عمرو في موضوع هنا من أحب المواضيع إلي قلبي :giveheart: وهو موضوع ذكريات الطفوله للأخت الغاليه فولانه...حقيقي موضوع خفيف وجميل....

نستطيع أن نكتب فيه عن ذكريات الطفوله بشكل عام..حتي لا تتداخل المواضيع في بعضها....ونتهف إنذار تاني...وأحنا مش ناقصين..أنا أعرف أنهم تلاته والرابعه بررررررررة...ربنا يجعل كلامي خفيف ياااارب... :h!!!h:

لكن انا كتبت عن ذكريات العيد لإنه يتناسب مع هذه الأيام المباركه....

حقيقي أتمني أن يعود هذا الموضوع ثانيه فهو عن جد من أحب المواضيع إلي قلبي...