رابطة عشاق مصر (أليكس لوفر)

[mogly]

مساء الخير يا جماعة

الويك إند و التجهيز للعيد أخدنى، ايه أخباركم؟ هوه احنا يا استاذة ناش كده يبقى أخدنا إنذار؟ يعنى ماشفناش كارت أصفر و لا طلع اسم اللعيب على الشاشة و لا حاجة

....إتت متأكده؟

طيب انتى عاوزة تفتحى موضوع ذكريات الطفولة، انا قريت الموضوع من الأول و شفت الجميع حكى فيه كويس قبل ما أجى انا، هوه لسه فيه حاجات تانية؟ و بعدين اللى عاش طفولة مشردة او ماعداش على المرحلة دى خالص يعمل ايه؟ :h!!!h:

على فكرة انا مش عاوز أدخل فى موضوع الرد على سؤالى رغم موافقة أغلبيه ساحقة (ناش و عمرو و أحمد) لأن مش عاوز أبقى ممل و أكتب فى حاجة ماتهمش الباقيين فده مش تجاهل و الله لكنه احترام لرغبة المجموع.

و الأن فيه موضوع خطير مش عارف ده مكانه ووقته و ألا لأ؟ و هو فى ايامنا دى و مع التكنولوجيا اللى موجوده بدأنا بالبزنس بقى سايبر و على فكرة دى كلمة جديدة على اللغة و معناها انه هوا يعنى مش حقيقى يعنى مش فيزيكال و أعتقد انهم اخترعوها علشان ما يستعملوش كلمة تانية قاسية زى فيك مثلا.

المهم بدأنا بالبزنس و بعدين غرف الشات و بعدين منتديات و انا مش متخصص لكن حاجات كتير دلوقتى بقت موجودة على النت سايبر و منها طبعا الصداقة، ياترى ايه السبب فى وجود النوع ده من الصداقات و هل يا ترى مكتوب له البقاء و هل أصدقاء السايبر ممكن يكونوا أصدقاء فى الحقيقة و ألا الأمور على الأرض لها مقاييس تانية و ايه تانى ممكن يتنقل للنت و يبقى سايبر؟؟؟؟؟؟؟؟؟

كل سنة و انتم طيبيين و ما تنسوش العيدية

الى لقاء،،،،

[Heliopolis]

مساء الخير

بالنسبه لموضوع الانذار ده بصراحه انا مش فاهمه؟.

انا اعتبر جديد هنا وفرحت اني وجدتكم لتشابه وضعنا .

هل مش مسموح هنا ان نتعرف او نسال عن بعض؟

اخي موجلي موضوع انت مين ده بصراحه مش عارف صح ام لا هنا .

صعب ان الواحد يكتب عن نفسه.وليه الشرف لو حد عايز يتعرف عليا ان اكتب له الايميل بتاعي بس هل ده مسموح به هنا؟؟

كل سنه وانتم وعائلاتكم بخير. اخوكم احمد

[kokomen]

:h!!!h: ترحيب خاص محمل ببوكيه ورد خاص جاى من مزارع الورد مخصوص ترحيبا باستاذى الاسكندرانى جدا ا/ كوكومين

واقولك اجدع سلام اسكندرانى شرقاوى مصراوى واصبح عليك

صباح الخير ياللى معانا الكروان غنى وصحانا

توصل وترجعلنا بالف سلامه هتنور اسكندريه ومصر كلهها

صباح الورد والفل والياسمين

تحياتى عمرو

الأخ الحبيب : عمرو

شكرا علي ترحيبك الجميل وهذا لا يصدر إلا من شخص ذو أصل كريم

فكرتني بالأغاني الصباحية الجميلة التي تنعشنا قبل الذهاب الي المدرسة

في الزمن الجميل السلس الغير معقد .. تقبل أجمل تحياتي

الأخت الفاضلة : أليكس لوفر

KoKemen يا بختك ياللي رايح الاسكندرية ... مش كنت تقول علشان ابعث للاهل معاك 3 كيلو جمبري ... اصل الجمبري في الكويت رخيص

أنا تحت أمرك ... جمبري أو كابوريا .. أو جندوفلي ممكن أنزل حلقة السمك في بحري

أو في أبو قير ..... على فكرة مطعم قدورة للأسماك فتح فرع عندنا في المندرة بشارع

عبد الناصر بعد مطعم حسني للمشويات بحوالي 200 متر وعنده كل أصناف الأسماك

بالمناسبة جو أسكندرية الآن شتوي رائع بالرغم من أن مصاب بنزلة برد ولكني نزلت

شاطئ المندرة وتجولت على الكورنيش الجميل في الجو البارد الجميل مع هطول المطر

ورزازه الممتع وهو ينساب على المدينة ليغسلها وينقيها ونستمتع به نحن البشر

تم توسعة الكورنيش عند منطقة المحروسة وسيدي بشر وأصبحت حركة السيارات سلسة

المدينة رائعة وجوها البارد جميل ... تحية لكم من وسط الأمطار الجميلة ومنظر البحر الرائع

مراسلكم من الأسكندرية .. أبوأحمد الأسكندراني

:blink: :lol:

[ahmedarab]

صباح الخير على الحلوييناللى لسة نايمين ....اصحوا يا مصريين

يا صباح الخير يالى معانا ..الكروان غنى وصحنا

اية يا جماعة ...انتوا فين ؟؟؟

تم تعديل 16 ديسمبر 2007 بواسطة ahmedarab

[amrhoras]

صباح الخير يا مصريين

تم تم تم تم تم تم تم تم تم تش دقات التاسعه والتش عشان نص :blink: التاسعه والنصف ولم يسجل احدا حضوره

احنا عوزين نعمل حضور وانصراف وغياب عشان يبقى فى جزاءات بعد كدى

=========

استاذ كوكومن حمد الله على سلامتك

بيقولوا امبارح لقيو ظاهره غريبه اوى كلنا عارفين المحطة الدوليه الفضائيه وجدوا هاله من الضوء واتصلوا عليا من كام يوم كدى ونسيت اقولكم واليكم الاتصال:-

العالم الفلكى :- جود مورنينك سير كان اى سبيك تو مستر امر (عمرو)

العبد لله :- الامر لله وحده يابني يس عمرو ويز يو

العالم الفلكي :- مستر امر و فوند سومثينك سترينج يستر داى اند وى دونت نو وات اذ ايت

العبد لله :- وات ديد يو فايند؟ تيل مى اند سيند مي بيكتشرز بليز

العالم الفلكى :- اوه ماى جود ايم سورى ايت واز اون يور كونترى

العبد لله :- كان يو تيل مي ذا هول استورى اى دونت نو وات يو توك ابوت؟

العالم الفكي:- ايتس سترينج لايت كوفر يور كونترى سبيشيالى الكساندريا

العبد لله:- يو درينك اور وات مستر ابولو يو فورجيت؟ اى كانت بليف ذات

العالم الفلكى :- بليز تيل اص سير وى ار فيرى افريد

العبد لله :- دونت يو ريميبر مستر كوكومين اي تولد يو ابوت هيم بيى فور

العالم الفلكى :- سير يو دونت نو مستر بوش واز فيرى نيرفز

العبد لله :- اى دونت كير ابوت بوش شصت ايف يو كان سيند ماستج تو ايجيبت تو تيل مستر كوكمن يو ار ويلكم ان يور هوم

العالم الفلكى :- هوى يامعلم بس كدى واجدعها سلام فروم ناسا الى ناس اسكندريه واهل اسكندريه واللى حولين اسكندريه والناس القاهريه واديني :unsure: انفجارين ارض جو وتحيه كبيره اوى اوى اوى لاحلى عيون مصريه واهل مصر وعمنا الكبير اوى بوش :yahoo: نازل بيمسى وبيدحرج التماسي وزغروده :110: حلوه اوى من الست رايس وعمنا جيتس :oldman: طرقع فيروسين فى الاجهزه ترحيب بعمنا كوكومن . :waving:

وننزل بتتر بين شاطين وميه عشقتهم عنيه ....

كان ما سبق ترحيبا باستاذ كوكومن بجد حمد الله على سلامتك وعيدكم مبارك انشا الله

السيناريو اخد منى ساعه كل شويه اضيف وامسح :blush2:

يارب بس يكون الترجمه واضحه :lol:

======

ألف سلامة بالنسبه للبرد وتمنياتنا بالشفاء العاجل

معلش بقى مقصرين انما حضرتك عارف زحمة المواصلات طبع ومفيش تاكسيات

تحياتى

عمرو

تم تعديل 16 ديسمبر 2007 بواسطة amrhoras

[Alex Lover]

انا مش عارفه ليه بتتوجه لنا انذارات وايه السبب

الموضوع ده واي موضوع في الدنيا لازم هيكون فيه اخد وعطا والفاضل داروين شخصيا ابدى اعجابه بالموضوع

بس انا مش عارفه يعني ايه تحول لشاتينج ؟؟؟ طيب ماهو لازم الاعضاء يردوا على بعض

عموما سنراعي عدم التطرق لحوارات جانبية

يوم الخميس بالليل الساعة 2 بعد نص الليل قلت ادخل انا وجوزي نتصفح المنتدى ... وحبيت اخليه يتطلع على موضوع الرابطه

اول ما فتحت الموضوع لقيت داروين موجود لوحده في الموضوع :oldman:

قمت قفلت الموضوع بسرعة وقلت ربنا يستر ربنا يستر

جوزي بيسالني فيه ايه قلتله عندنا تفتيش :blush2:

واللي حسبته لقيته :unsure:

ناش الطيب احسن :waving:

[Alex Lover]

صباح الخير اعزائنا المستمعين

بعد هذه الفقرة الرائعة التي قدمت من الزميل عمرو حورس وهذه التغطية الاعلامية الغير مسبوقه

يسعدني ان انقل لكم على الهواء مباشرة برنامج على الناصية

صباح الخير

صباح النور

ممكن نتعرف عليك

انا احمد

عندك كام سنة يا احمد

12 سنة

انت رايح فين يا احمد

انا رايح عند ستي

ليه

عشان اخد منها فلوس

:unsure: ليه

علشان اشتري جزمة

ومش بتاخد من بابا ليه

بابا قالي روح قول لماما

وماما فين

ماما في بيت تاني

وبعدين

روحت لماما قام جوز ماما ضربني

وقالي روح قول لابوك ميبعتكش هنا تاني

وماما كانت فين وهو بيضربك

ماما كانت بتعيط

وروحت لبابا تاني ؟؟؟!!!

روحت له بس مرات بابا قالتلي غور من هنا

وبعدين

قلت اروح لستي اتغدى عندها تعالى اتغدي معانا يا ابله بيتها اهو هناك عند عربية الاسعاف اللي واقفه دي

لا شكرا بس حبيت اسالك تحب تسمع ايه

(((( دقيقه واحده ... ثواني بس نشوف اللي جاي يجري ده عايز يقول ايه لأحمد ))))

(((( احمد .. احمد .... الحق ستك ماتت ))))

....................................... لا تعليق .....................................................

أعزائي المشاهدين ونستمع الان الى هذه الاغنية من اختيار ادارة الاذاعة

يا عيني يا عيني يا عيني عالولد

يا عيني يا عيني يا عيني عالولد

تم تعديل 16 ديسمبر 2007 بواسطة Alex Lover

[ahmedarab]

صباح الخير يا اليكس

والله يا عزيزتى انا متفق معاكى تماما

الموضوع مفتوح للذكريات ولمحبى مصر ...يبقى لازم يكون فيه حوار متبادل

ولازم الناس تتكلم وترد على بعض ؟؟؟

عموما معلش يا ادارة و"سنغاعى" عدم التطرق الى موضيع جانيبة (قدر الاماكن)

الطيب احسن ...ماشى

تحياتى

تم تعديل 16 ديسمبر 2007 بواسطة ahmedarab

[amrhoras]

أ/ داروين

صباح الخير

حضرتك تفضلت وقرأت الموضوع كاملا ووجدت ان هناك لون خاص مايميز هذا الموضوع وما جعلنا جميعا بلا استثناء الى الاهتمام بالسفر بعيدا الى ذكريات الماضى والتطرق الى كافة موضوعات الماضى بجماله وآلامه.

بالنسبه لموضوع الشاتينج اى نقاش فى أى مكان يعتبر محادثات اشخاص يلقون مجموعة من النقاط واشخاص تقوم بتحليل وسرد وجهات النظر من منظورهم الشخصى والرد ثم معاودة الرد والتعقيب فى محاوله لتوضيح نقطه ما او ذكر شيىء ما جديد وبهذا يستمر النقاش.

ردودنا كلها اعتقد انها لا تخرج عن مستوى النصيه وليس هناك محادثات كمواقع الشاتينج بالعكس نتواصل على مدار اليوم شخص يلقى بموضوعه ويتركه ليقوم اشخاص اخرون وفى وقت لاحق بالتعقيب عن ما ذكره . اما ردودنا السلام والصباح هذا لمجرد اننا موجودون فى مكان واحد فى نفس اللحظه وهى مصادفه ليس اكثر او اقل ومن الواجب القاء التحيه واعتقد هذا ما يشبهنا بالشات لكنه ليس بشات وانما مجرد تحيه

وسيادتكم تفضلتم انك معجب بهذا الموضوع وقررت المشاركه معنا ومازلنا ننتظر لكن حضرتك شاركت بصوره رسميه كلفت نظر الى اننا نقع تحت دائرة الشات فارجو بصفتى عضوا ان اعرف ما تراه انه شاتينج ونتناقش جميعا بعيدا عن الانذارات حضرتك اخ عزيز جدا واشكر سعة صدرك

ولك وافر التحية والتقدير

تحياتى

عمرو

[أبو محمد]

صباحكم زى الفُل يا عشاق مصر

أنا متابع الموضوع من فترة .. وبعدين انقطعت عن متابعته لفترة أخرى لما لقيت الشباب ما شاء الله ماليين التوبك وحسيت إن مشاركاتى حيكون دمها تقيل .. فيه Gap بين ذكرياتى القديمة وذكريات الشباب .. بس والله كنت سعيد جدا بالمتابعة .. مش التفتيش :blush2:

واليوم عندما فتحت الموضوع ، وكتصميم البرمجيات ، ظهرت أمامى أول مشاركة من المشاركات التى لم أقرأها .. فقرأت وقرأت .. ومن ضمن ما قرأت (تنبيه) الزميل العزيز DARWEEN .. واخدين بالكم ؟ (تنبيه وليس إنذار) .. وبصراحة لقيت عنده حق .. الموضوع جميل جدا (أشكر عليه بلدياتى مدام Alex Lover .. تعصب اسكندرانى :yahoo: ) .. ولكن حسيت فعلا إن الموضوع بدأ يختلف عما فهمت أنه المقصود منه ..

طبعا مفيش أى مانع من الكلام عن مصر من خلال التجارب الشخصية وسؤال هنا وآخر هناك .. وطبعا مفيش مانع من تعريف الأعضاء الجدد لرابطة عشاق مصر بنفسهم والترحيب بيهم .. أما الديالوجات بين عضوين فى أشياء بعيدة عن الهدف الأساسى من الموضوع فإنها على الأقل تجعل من الصعب على من يريد المشاركة ، فى لب الموضوع ، أن يدخل ليقطع الحوار بين الأثنين .. وريما تأجيل المشاركة يجعلها لا تتم (نسيان أو دخول الحوار فى مواضيع أخرى أو .. أو .. )

إسمحوا لى أن أذكركم بالمداخلة الافتتاحية لأختنا الفاضلة .. فهى تحتوى على الفكرة الأساسية للموضوع الجميل .. لو التزمنا بيها متهيألى الموضوع يحقق الهدف منه ..

مرة تانية مفيش إنذارات والحمد لله .. أخونا DARWEEN كان فقط ينبه العشاق ألا ينصرفوا عن معشوقتهم .. وانا كمان بانبه إن معشوقتنا لسه يتقال فيها كلام كتير قوى ...

:unsure: انا جيت يا جماعة :oldman:

السلام عليكم ورحمة الله وبركاته

سكندرية - مونتي - اسكندرية تاني - قاخري

انا وفيت بوعدي واستعديت لبناء اقوى رابطة تصف كل ما هو جميل في مصر .... علشان نثبت لكل من يتبرأ من وطنيته بعد ما يسافر للغربة ومش عارفين ليه ... بداية احب اوضح ان ظلم الحكومة شئ ومصر وترابها وذكرياتنا وعشقنا لها شئ تاني ولا ايه ؟؟؟

مش معنى اننا مش لاقيين حريتنا الكافية في البلد اننا نلعن البلد واللي فيها ... (سامحوني) بس انا كنت فاكرة اني انا لوحدى اللي اتمنى ارجع اعيش في مصر هو الواحد هيعيش كام مرة ... وكل ما اقول كده لحد يقولك بلاش هم يا شيخة انتي غاوية فقر ؟؟؟

بس اكتشفت ان لسه فيه ناس زيي ومش بس عاشقين تراب مصر دول دابين في ذكرياتها بحلوها ومرها

ومن هنا نناشد ان يكون هذا الباب مخصص لعشاق مصر فقط والى كل من لديه شئ جميل يذكره ... اللي في القلب في القلب يا جماعة يعني مش معنى كده ان مافيش سلبيات في البلد لأ فيه بس العيب في سياسة الدولة .... عمركم سمعتم عن مناضل وطني شتم في البلد علشان حالها مش عاجبه ....؟؟ احنا لو استمرينا بالشكل ده يبقى كلنا هنهرب وهنسيبهالهم مخضرة

فيه حد فاهمنى ؟؟؟؟؟

مين هينضم لينا ....؟؟؟؟

في انتظاركم :waving:

[Alex Lover]

الاخ الفاضل ابو محمد ..

اشكر تدخلك الراقي واتمنى ان اوضح اننا لم نخرج عن نطاق الذكريات الجميلة والأماكن الحلوة ببلادنا الا اذا كان ترحيب بشخص جديد او مصادفة صغيرة ,., وعلى كل اتمنى ان لا يكون هذا التنبية سببا في اغلاق الموضوع انا حاسه انه كانه مغلق بالشمع الأحمر محدش دخل بمشاركات خالص النهاردة ....

[أبو محمد]

الاخ الفاضل ابو محمد ..

اشكر تدخلك الراقي واتمنى ان اوضح اننا لم نخرج عن نطاق الذكريات الجميلة والأماكن الحلوة ببلادنا الا اذا كان ترحيب بشخص جديد او مصادفة صغيرة ,., وعلى كل اتمنى ان لا يكون هذا التنبية سببا في اغلاق الموضوع انا حاسه انه كانه مغلق بالشمع الأحمر محدش دخل بمشاركات خالص النهاردة ....

لا يا بلديات .. بقولك

وانا كمان بانبه إن معشوقتنا لسه يتقال فيها كلام كتير قوى ...

[Alex Lover]

نعود مرة أخرى مع اجمل الذكريات الحلوة اللي كتير بنفتقدها في بلاد الغربة خاصة البلاد الغربية

الجيراااااااااااااااااااااااااان

علاقة الجيران ببعضهم ... ماشوفتش ومش هاشوف علاقة جيرة زي علاقة المصريين في مصر بجيرانهم ....

علاقة ارتباط قوي في كل شئ .. وخصوصا في الاعياد

والأفراح

والصداقة مع اولادهم

واحيانا الحب :unsure:

تشعر ان جارتك هي اخت امك

وتشعر ان اولاد جيرانك هم اولاد خالتك

هل شعرتم بهذا مثلي ؟؟؟

وهل افتقدتوه في الغربة ؟؟؟ مثلي ؟؟؟

وما الفرق بين علاقة الجيرة في مصر وفي الغربة

في انتظاركم قبل ان احكي تجربتي

[DARWEEN]

انا مش عارفه ليه بتتوجه لنا انذارات وايه السبب

الموضوع ده واي موضوع في الدنيا لازم هيكون فيه اخد وعطا والفاضل داروين شخصيا ابدى اعجابه بالموضوع

بس انا مش عارفه يعني ايه تحول لشاتينج ؟؟؟ طيب ماهو لازم الاعضاء يردوا على بعض

عموما سنراعي عدم التطرق لحوارات جانبية

يوم الخميس بالليل الساعة 2 بعد نص الليل قلت ادخل انا وجوزي نتصفح المنتدى ... وحبيت اخليه يتطلع على موضوع الرابطه

اول ما فتحت الموضوع لقيت داروين موجود لوحده في الموضوع :oldman:

قمت قفلت الموضوع بسرعة وقلت ربنا يستر ربنا يستر

جوزي بيسالني فيه ايه قلتله عندنا تفتيش :blush2:

واللي حسبته لقيته :unsure:

ناش الطيب احسن :waving:

أولا .. لم يتم توجيه إنذارات للموضوع ولا لأي من المشتركين فيه

ثانيا .. توجيه ملاحظة أو لفت إنتباه هو أمر يختلف كلية عن توجيه الإنذارات

ثالثا .. إبدائي لأعجابي بفكرة الموضوع كونه يناقش شجون وذكريات الأخوة المحاورين في مصر لا يعني إعجابي بطرية تناولة .. علما بأن ما أوردته سابقا كان بصفتي عضو .. فكوني مشرف لا ينفي عني صفة العضوية ولا يمنعني من الإشتراك في الموضوعات

رابعا .. الفرق بين التحاور والشات ... أن التحاور يتناول أراء حول موضوع وتبادل لوجهات نظر وأراءء فيه ... أما حين يتحول الموضوع لسلامات وتحيات وأخبارك وكيف الحال فهذا ما لن يتم قبوله

ملاحظه أخيره ... هذه المداخلة أيضا من باب إبداء ملاحظة

تحياتي لسيادتك وزوجكم الكريم وكافة المشاركين في الموضوع

[Alex Lover]

صباح الخير

روحتوا فين يا جماعة ...

داروين شكرا على ردك وتوضيحك واعترف اني أسات الفهم

ولكني حزينة ان مر يوم بطوله لم يدخل احد لماشركتنا الذكريات

الناس راحو فين

يا بشر

يا عمرو

يا مسالم

يا سالم

يا احمد

يا ناش

يا دكتور شامي

روحتو فيييييييييين :lol:

[amrhoras]

صحيت متأخر ساعه بحالها

جالى هاتف فى المنام بيقولى جالك استدعاء على الرابطه جيت ألبي بس على الله السوارس تسيبني فى حالى متعملش زى المره اللى فاتت وأمينه تزعل منى على اساس انى السيد بقى هههههههههههه

عوده الى الذكريات

ويوم عرفه كل عام وانتم بخير ياترى بقى جبتوا اللحمه :lol:

لبيك اللهم لبيك . كلمه كلما سمعتها خاصة فى هذا اليوم اقشعر لها بدنى واحسست بالرهبه والفرح فى نفس الوقت

ايه رأيكم كل واحد يقول امنياته ترتيبا تنازلى

اذكر اهم امنياتك ؟؟؟

صباح الخير يا مصريين وصباح الخير الى صاحبة الموضوع ياترى اين انتى يا اليكس

تحياتى

عمرو

[Alex Lover]

يوم عرفه في مصر يكون صوت الاغنام اعلى من صوت البشر و لكن يغلبها عند صلاة الظهر صوت المساجد واستعدادها لصلاة العيد

يوم وقفة عرفه كنا بنقوم من النوم الصبح نتفرج لازم عى الأفلام العربية الدينية وكم كان يؤلمني مشاهد التعذيب اللي بيعذبها الكفار للمسلمين

فيلم الشيماء ورابعة العدوية وكنت احس اليوم ده له طابع غريب والجو نفسه كان بيبقى غريب جدا

بكره يوم الوقفه والبيت عندي في الكويت عادي مفيش تغيير في مصر كنا بيبقى فيه حالة طوارئ قبل العيد بيومين

والناس كلها في حالة نشاط وتنظيف للبيوت وحركة دائمة

ماجبناش خروف ومش هندبح تفتكروا اولادي هيحسوا بطعن العيد زي ما حسيناه احنا زمان :lol:

[amrhoras]

ماجبناش خروف ومش هندبح تفتكروا اولادي هيحسوا بطعن العيد زي ما حسيناه احنا زمان :lol:

طب ادبحوا فرخه طيب اى حاجه تنفع تتدبح :lol:

على فكره مش لازم تكونى فى مصر عشان الاولاد يحسوا بطعم العيد

ربنا يخليكي انتى وزوجك العزيز(سلامى له ابقى عرفيه علينا ونعمله استجواب ذكرياتى مكثف ) :lol:

بس فعلا مش لازم تكونوا فى مصر انتى .....

سلام ناو كبسه

[amrhoras]

استكمالا لردى السابق

الطلب ده ليس موجه لاليكس وحدها وانما لكل المغتربين ومعهم اسرهم

الاب والام اشعر ان عليهم دور وعاتيق اكبر مما لو كانو فى مصر

ليه؟

على كل اب وام داخلهم عادات وتقاليد وزكريات وخير بلدهم ان يصبوا كل ذلك داخل ابنائهم ان كان حكايات او اسلوب تربيهاو حتى لو امكن ان تنقلوا قطعة من الوطن داخل منازلكم فى الخارج بلد الغربه والداخل مصر

يعنى مثلا اعرف ان القاهره يوم العيد لازم يفطرو فته باللحم الضانى والخل والثوم . ليه مش ننقل العادات اللى اتعلمناها الى اولادنا؟ (طبعا مش الفته دى مثال بس)

لعلمكم دى اجمل طريقه لينا احنا الكبار

هنشعر اننا لسه فى بلدنا ومعانا اولادنا واولادنا نفسهم لما ينزلوا مصر ينمحى عندهم شعور الاستغراب لانهم بالفعل عيشين داخل مصر بس فى الجانب الاخر

سامع معى احمد عرب لسه صاحي وبيقولى ياعم وحد الله انت عندك اولاد الاول وكمان الكلام ده خيالى حبتين.انت فاكر ان ده سهل؟

سؤال وجيه جدا :lol: ممكن تقعد مكانك وانت ساكت

اعلم تماما صعوبة الحياه لكن ما يصعبها اكثر اننا نرى اولادنا يكبروا بعادات وتقاليد البلد المضيف :lol: ده حتى بيكونوا اغراب علينا احنا لكن داخلنا قيم وعادات وتقاليد بلدنا متأصله فينا والبرهان ذكرياتكم الجميله تشعروا كأنها جذور قويه لا يمكن انتزاعها لذلك صبوا هذه العادات داخل ابنائكم وان لم يكن عندى اولاد مش مهم بس ده الغد اللى بحلم بيه :lol:

تحياتى

عمرو

[nash]

صباحكم جميل....أيها المغتربين المساكين..واللي بيقضوا العيد ( وحدانيين ) علشان السجع بس... :lol:

لا عيد إلا في مصر....صدقوني كل مغترب يفتقد العيد في بلده...حتي الجنسيات الأخري....تتصورا مثلا أنني من زمان لم أسمع تكبيرات العيد....والعيد عندي لا يكون عيد إلا ببهذه التكبيرات الجميله...هنا التكبير يختلف عن مصر تماما..ويقولون اننا نزيد عليه بما لم يكن موجود...ولكني افتقد التكبيرات والله بدونها لا طعم للعيد ...نهائي...

أتمني لو اسمعها ...لكن عندنا خبر جميل..وهو سنقضي رمضان هذا العام بمصر..لإن المدارس ستبدأ بعد عيد الفطر القادم...أي ان هناك فرصه نقضي رمضان والعيد...مشتاقه جدا لهذا الحدث..

الوقفه تعني لي وضع اللمسات الأخيرة في البيت الذي يكون مثل خليه النحل....

طبعا نحن الأطفال لا نهدأ وننتظر اليوم التالي لأخذ العديات وإرتداء الملابس الجديده...

وطبعا قبل العيد بيوم نرتدي ملابس النوم الجديده..حتي مفارس الأسرة تكون جديده ومكويه..وألوانها زاهيه ..

في الصباح الباكر كان اخي يذهب مع والدي لصلاة العيد وننتظر حتي يأتي لنقبل يديه ونأخذ العيديات مع قبله جميله يطبعها علي رؤسنا مع ضمه حنونه في صدرة ( ربي يرحمه ويغفر له )..ثم يأتي السائق الخاص لوالدي...فيأخذ هو الأخر عيديته ويذهب بنا إلي الحدائق اولا لنري بهجه العيد ثم نذهب إلي النادي ونعود علي موعد الغدا والذي يكون من أروع مايكون....ونظرا لإن عمل والدي كان في الإسماعيليه..نجد الأهل جميعا وقد أجتمعوا عندنا في المساء والسهرة..وياسلام علي أنواع الضحك والسعاده ...

بعد وفاة والدي أختفت بعض المظاهر وحلت أخري مكانها..كانت مظاهر جميله..ولكن حتي الأن أشعر بغصه في القلب حين يأتي العيد لإنني أتذكر أحب إنسان لدي في الوجود....وبالرغم من محاولات أمي المستميته لتبعد عنا شبح الحزن إلا ان الذكري لا تأبي أن تتلاشي ولو قليلا....

هذا العيد سيكون مثل سابقيه..ساظل مستيقظه حتي ميعاد الصلاة وسيذهب الشباب مع والدهم ثم يعرجون علي مطعم للإفطار...وسأنام أنا حتي آذان العصر...ويمكن حتي للمغرب ..فقط استيقظ لصلاة الظهر والعصر...وبعد ذلك سنذهب ليلا للعشاء في اي مطعم...وقد يجتمع الشباب مع أصدقاءهم ويقضون السهرة بالخارج...

ثاني ايام العيد سنحضر اللب ونشاهد العشروميت فيلم اللي نزلهم زوجي من علي النت..وكلها أفلام جديده ...ونحول البيت إلي سينما بدرجه ( ترسو )...

وهكذا ستتوزع الايام مابين مشاهده الأفلام ومابين خروج الشباب....وانا ساجري بعض تليفونات المعايده لصديقاتي ....

كل سنه وأنتوا طيبين.....