رابطة عشاق مصر (أليكس لوفر)

[Alex Lover]

ناش ربنا يرحم والدك ووالدي ووالدتي

بالفعل ... وفائ شخص عزيز عليكي بياخد معاه الفرحة كلها

اذكر امي وصينية الفتة بالخل والثوم

شئ اساسي اول يوم العيد على الغداء

وكمان صينية الرقاق باللحمة المفرومة

وافتكر الكبده المشوية

ولا الكفته المشوية

انا باقول كفايه ذكريات عن الأكل احسن انا هاموووووووت من الجوع

[amrhoras]

ويرحم بابا كمان نسيتوه ولا ايه :sad:

على فكره مش عاوز انكد عليكوا بس بصراحه وده محبش اقوله لاحسن انكد على حد

العيد الاضحى بكل افراحه ولونه الخاص مع اللحمه الا انى بتذكر ساعه وفاة بابا الله يرحمه اتوفى قبل العيد بومان اتنين .........

===================================

الى الاخت اليكس :-

اعملى حساب ان فى ناس غلابه عايشين وحدانين اللى مدام ناش اتكلمت عنهم نفسهم فى الفته مع انى لما كنت فى مصر مكولهاش :blink: مش عارف انا اعمل ايه كان عقلى فين مش عارف :lol: مكنتش عامل حساب اليوم ده باينه كده wst::

حد يبعتلنا طبق رقاق باللحمه ولا ريش ضانى مشويه وهنيالك يافاعل الخير والثواب :lol: هشحت على باب السيده ولا ايه :ninja:

صباحكوا شربات مكرر وورده لكل مصرى :lol: وكل عروسه وردتينين :lol: :P

عمرو

[Alex Lover]

الله يرحم الجميع تعيش وتفتكر يا عمرو

صعب اوي الحادث ده قبل العيد مباشرة ... ربنا يرحمه يارب ويرحم جميع موتى المسلمين

[ELSHAMY]

أخوانى ...أخواتى

نأسف غلى التأخير لأنشغالى فى العمل و أشياء أخرى

مال شكل الصفحة متغير ليه.....هل ده يعنى ان الرابطة واحدة انذار......حد يفهمنى ..... وامتى شكل الصفجة يرجع كما كان ؟

تحياتى لكم .....وحشتونى

[Alex Lover]

هل تذكرون يوم ذهاب احد من الأقارب الى الحج ... وكيف كانت الفرحة وكانه يوم فرح

وكل الأهالي تروح تسلم عليه قبل ما يسافر .. ويباركولوه .. ونقعد احنا يا صغيرين ننتظر رجوعه مش علشان واحشنا لا سمح الله

لا بنقعد نستناه علشان ناخد منه الهدايا اللي جايبها من السعودية .. ساعات و مياه زمزم و بيجامات صنع الصين وعرايس لعب وسبح وسجاجيد صلاه ..

[مسالم]

السلام عليكم ...

نظراً لأهمية هذا اليوم العظيم الذي أنعم الله علينا به وبما يصحبه من خير كثير للمسلمين .. إن هم إستثمروه ..

ونظراً للذكريات الجميله التي قد صاحبت هذا اليوم ..

ونظراً للظروف التي نعيشها في الغربه ..

ونظراً لأني كتبت نظراً أكثر من مره ...

أعود بالماضي لأتذكر عندما كنا نعيش في كنف محيط العائله انا واخوتي .. وكانت الحاجه .. امي .. لها طقوسها الخاصه في التحضيير لهذه المناسبه العظيمه .. ولكل مقام مقال كما تعرفون .. ولهذا فالتحضيرات كانت مرهقه تماماً .. وكانت امي تستعين بواحده من الذين يحترفون مهنة التنظيف والتنفيض .. يالا يا مسالم عندنا شغل كتير يا حبيبي إنهارده .. العيد الكبير بقى .. ايوه ياماما يعني انتي عايزه مني ايه دلوقتي .. روح يا حبيبي ساعد البنت اللي جايه تشتغل معانا .. طب واساعدها ليه هي مش جايه تشتغل بفلوس .. انا مالي بقى .. يا حبيبي هي مش هتعرف تشيل السجاجيد لوحدها .. طيب هتديني كام .. ياواد اخلص !! .. خلاص .. حاضر بس سيبي ودني .. يوه اشمعنى انا .. طب ما طارق موجود واخواتي كمان .. هو الطيب في الزمان ده لازم يتبهدل ..

هيّ فين راحت البنت دي .. انتي يا "بخاطرهم " .. رحتي فين ...

وهكذا يمر اليوم في مسح وتنفيض وغسيل وفرش وتلميع .. حقيقي الله يكون في عون الستات .. بتوع زمان .. لحسن تفهموني غلط .. المهم كان والدي .. الله يصبحه بكل خير .. لا يتواجد في مثل هذا اليوم العصيب وكان ييجي من بره بعد كل الفيلم ده مايخلص .. وقد حضر الوالد .. واخذ جوله تفقديه على انحاء البيت ليطمئن على ان كل شئ تمام ... ايه ده .. لالالا .. مش معقول .. طب إزاي .. كيف استكانت ..وفي صوت يملؤه الحيره والغضب .. نده بابا .... يا ام مسالم .. نعم يا حاج .. رجلين مين اللي على الحيطه دي ..

يانهار ابيض .. صحيح تلاقيها البت بخاطرهم .. انتي يابت .. ايه اللي عملتيه ده .. سبيهالي انا ياحاجه (ده ابويا طبعاً) .. شوفي يابنتي انا مش هعملك حاجه .. انا عايز اعرف بس إذاي مشيتي على الحيطه .. وبعد تحقيقات من جانب ابويا وتدخل الFBI في الموضوع .. اتضح ان بخاطرهم كانت مريحه على المراتب اللي كانت بتنفضها .. وكانت بتسند رجلها على الحيطه ....

ثم يأتي يوم العيد .. ومافتكرش ان ابويا كان بيدبح الخروف امامنا .. لكن كان بيجيب اللحم بعد ذلك وتأتي أمي الحبيبه .. ها يامسالم حتاكل لحمه الخروف .. والفته .. لالالا انا مبحبش الفته .. والنبي ياماما إعمليلي حاجه تانيه .. يابني ماينفعش .. الفته دي شئ رئيسي في الموضوع .. فتة ايه اللي انتوا بتحبوها دي .. شوية عيش مكسر غرقان في الدِمعه وبعدين تخبوه بالرز علشان ماحدش يعرف.. ايه المتعه في كده بقى .. بصي الله يخليكي إعمليلي انا كسكسي .. ومفيش مانع ارش عليه شوية دمعه (صوص) .. وياسلام لو شوية سكر بودره على طبق تاني .. هو ده الكلام .. طب حتاكل اللحمه الضاني .. لالالا ولا دي كمان بحبها ... مش عاوز لحمة خالص .. اناكويس كده ..

وفعلاً كانت الحاجه تعملي أكلي المخصوص .. ونستمتع جميعاً بالعيد السعيد .. لكن برضه .. شهاده للتاريخ .. لم يكن ابويا الحاج يأخذنا في نزهه أو ما شابه الى الجناين والمنتزهات .. فهذه الاشياء من المحظورات بالنسبه للحاج .. قال يخرج معانا .. ايه اكلام الفارغ ده ... لكن الشهاده لله .. كان بيدينا عيديه محترمه .. لنذهب بها الى لتأجير العجل (الدراجات) من عند مأمأ العجلاتي .. وده كان حكايه تانيه .. كان وقعته سوده اللي يقف امامه ومكتف ايديه .. كان يتنرفز ويلسعه الم .. وقوله يأخي افرجها شويه .. انت عايز ربنا يسدها في وشنا .. وطبعاً كان شكله يخوف من منظر السنتين الفضه اللي مركبهم في الصف الامامي ...

كانت ايام .. وكانت ذكريات ..

وكل عام وانت بألف خير عليكم وعلى محبيكم .. وعلى أمة المسلمين أجمعين ..

بالهنا والشفا .. الخروف والفته .. واللحمه .. والذي منه .. بس على مهلكم شويه .. علشان السمين مش كويس على المعده ..

على فكره انا لحد دلوقتي لا آكل الخروف ولا الفته ..

تم تعديل 17 ديسمبر 2007 بواسطة مسالم

[amrhoras]

أ/ مسالم ايه الجمال ده ذكريات جميله ياريت الايام الحلوه دى كانت دامت كنتوا تحسوا بدفء غريب ومتعه لا حدود لها...بس قولى حد ينكر انهن ميقدروش يعملوا حاجه من غيرنا ولا لا بالعكس كمان احنا بنشتغل ببلاش هههههه

هى بس حبة سياسة واحنا بنعمل كل حاجه امر الله كدى ماذا نفعل

وفعلا الخروج فى العيد صعب جدا نظرا لتكدس الشعب فى المنتزهات متقدرش حتى تلتفت خلفك

حد بقي يقولى بالنسبه للعيديات اكبر مبلغ جمعتوه كام ؟؟

========

بالنسبه لايام الحج وزى ما مدام اليكس ذكرت افتكر في سنة 89 كان جدو ومراته اللى هى جدتي راحو يحجوا .......

كبسه مش عارف الواحد مبيلحقش

[Alex Lover]

انت مشبعتش من الكبسة يا عمرو .. سيبها وخليك في الفته

استاذ مسالم ... الف شكر على السرد الجميل ده وانا باشكرك لاني عارفه انك مش فاضي ومع ذلك استقطعت من وقتك لتساهم بذكرياتك الجميلة

والله انا عشت معاها وكاني باشوف بيتي واهلي

بالنسبة للعيديات ... الحمد لله كان عندنا ناس كريمة وبرضه في ناس لأ

بس من الناس اللي بتعطي عديات كويسه كان ابن عم ماما .. كنا طبعا نتكسف نقف نعد الفلوس هههههههه وكان هو يدينا العيديه قبل ما يمشي بشوية وانا اخدها واحطها في جيبي واسيب ايدي في جيبي علشان اقعد اعد الورق على بال ماهو يمشي وانه يمشي أبدا زكأنه عارف اني مستنياه يمشي

وكانت عباره عن 20 جنيه خمسات خمسات جديدة بتدبح .. وكان بعض الاخوال يدوني 10 جنيه كانت وقتها ثروة لما تيجي اخر اليوم تلاقي معاك حوالي 90 جنيه وقتها كانوا ايه .......

بعد الجواز وقبل الجواز بشوية تضاعف الخير وكان خالي بيعطيني 250 جنيه وساعات 200

كانت ايام جميله وكنا ابرياء (براءة الاطفال في عيوننا )

تم تعديل 17 ديسمبر 2007 بواسطة Alex Lover

[مسالم]

السلام عليكم ..

أما بالنسبه لكيفية وماهية ونظرية العيد وما له وما عليه في بلاد الغربه .. فهي كالآتي ..

بغض النظر عن التنفيض والذي منه .. وإن كان الاكتفاء بالقليل واجب .. وبعد شراء ملابس العيد والذي منه برضه .. نقضي بقية يوم الوقفه عاااادي جداً .. يعني شوية فرجه على الافلام والمسلسلات وهكذا ... وانا طول النهار ارسل في مسجات لأهلي واصحابي وزملائي في العمل .. تهنئه بالعيد ... وبقية اليوم استقبل مسجات من اهلي واصحابي وزملائي في العمل ... ثم اجلس بين ابنائي لكي نتناقش في كيفية قضاء ايام العيد المبارك .. هل سنذهب الى الاسواق والملاهي المغلقه .. ام سنذهب الى الكورنيش .. ام سنذهب الى السينيما والمسرح وحديقة الحيوان ... طبعاً انا بهزر من اول موضوع السينيما ..

نسهر بالليل اماا التلفاز (الله يلعنه) .. ثم ننام متأخر .. ونقوم الصبح علشان صلاة العيد بالعافيه ... وأذهب الى صلاة العيد وكلي حب وكلي اقتناع بأن المسلمين لابد وان يهللوا ويكبرروا وهم سائرون الى ساحة الصلاة .. ولكن ما رأيته هنا شئ مختلف البته .. فكلٌ يهمس .. أي والله .. يهمس .. الله اكبر الله اكبر لااله الا الله..ششششش .. حد سمعني ياكابتن ّ!!.. لأ انت كنت بتقول حاجه .. ابداً !!.. كل سنه وانت طيب .. شكراً... ونذهب الى صلاة العيد بأحد المساجد الكبرى .. طبعاً هنا بقى كل الناس لازم تهلل وتكبر .. احنا دلوقتي جوه الجامع .. يمكن بره كانوا مكسوفين .. ششششش .. همممممس .. انت بتقول حاجه ياكابتن .. لا والله .. انت سمعت حاجه .. لأ .. طب كل سنه وانت طيب .. شكراً ...

طب فين العيال والملابس الملونه .. والذي منه ... ششش .. نايمين .. لكن فيه تلاته اربعه هناك اهم .. صحيوا غلط .. وبيلعبوا في الشارع ..

بعد الرجوع الى البيت .. الله عليكم انتوا لسه نايمين .. ماشاء الله .. ما تصحوا بقى ايه الكسل ده .. ترد عليّ مراتي وصوتها هيقع من النوم .. يعني لو صحينا بدري والعيال لبسوا هدوم العيد ..حنعمل ايه .. لا فيه أهل ولا يقدروا ينزلوا لوحدهم في الشارع .. يعني مفيش حافز للصحيان بدري .. اقول في بالي عندك حق .. طب يعني اعمل ايه دلوقتي .. تعالى ناملك شويه .. :roseop: .. والله فكره .. خخخخخخخخ .. تصبحوا على خير

تم تعديل 18 ديسمبر 2007 بواسطة مسالم

[Alex Lover]

بكره الوقفة وبعده العيد وندبحوك يا شيخ سعيد

=============================

بكره العيد ونعيد وندبحك يا شيخ سيد

=============================

اغاني العيد التي كان يغضب منها الأهل الذين يحملون نفس الأسماء وفي الاخر يقولوا اهم عيال مش فاهمين حاجة

[مسالم]

شكراً على تواصلكم وعلى حبكم للمحاورات ... وشكراً على ردودكم التي تدفعني للامام دائما ..

بخصوص اني مشغول .. فعلاً انا مشغول جداً هذه الايام .. ونفسي الاقي كام مهندس مصري كويسين في مجال الاتصالات يساعدوني في المشاريع اللي معايا..

لكن عايز اقول للعزيزه .. Alex-lover .. انه لا صوت يعلو على صوت المعركه .. إن احسنت التعبير .. فلا شئ يمكن ان يشغلني عن المحاورات وما ورائها من مواضيع ... ومايحتويها من محاورين ومحاورات .. اعتز بهم واحبهم في الله وفي الوطن ..

تحيا جمهورية مصر العربيه ....

[امانى]

الاخوة والاخوات الاعزاء جميع اعضاء الرابطة

ابعث اليكم من مصر الحبيبة من هنا من الاسكندريه ارق تحيه واعذب سلام وبقول لكم كل سنة وانتم طيبين كلكم

بمناسبة عيد الاضحى المبارك اعاده الله عليكم جميعا باليمن والبركات

الاخت اليكس كل سنة وانت طيبة وجميع اسرتك بخير ويارب العيد القادم تقضيه فى اسكندرية عندنا سالتينى عن المدرسة

الاعدادى عند مؤسسة عبد الرازق طبعا عرفاها يا حبيبتى والله افتكرتك وانا فى العربيه بقرب المؤسسة 0 زكريات جميلة

ربنا يوفقكم وترجعوا مصر يا رب سالمين 0

حبيبتى نوشة كل سنة وانت طيبة وجميع اسرتك بخير ورمضان القادم ان شاء الله معانا بمصر قلوبنا معاكم بالغربه وكلنا

بندعى لكم بالتوفيق والرجوع بالسلامة للوطن امين يا رب العالمين

الاخ ابو احمد الاسكندرانى رجع اسكندرية وانا بقول ايه النور ده جاى منين حمدا لله على سلامة رجوعك للوطن وكل سنة وانت

والاسرة الكريمة بخير

باقى الاعضاء على سبيل الزكر لا الحصر الاخ عمرو والاخ مسالم والاخ الشامى وقاهرىوالباقى الذى لا يحضرنى زكر اسماؤهم

الان الكل له منى ارق تحيه وكل عام وجميعكم بخير وسعادة امين يا رب العالمين

امانى

[amrhoras]

أ/ مسالم ربنا يعينك .ويوفقك صباح الخير الاول هههههه انت بجد ملكش حل شخصية لذيذه اوى تخلى الواحد يطمع انه يعرف اكتر ويسمع منك اكتر فاكتر وخصوصا ذكرياتك مفكرتش تكون كاتب؟ يراجل الهنسه الايام دى مش بتأكل عيش

كل ماقول لنفسي ياواد ادخل نام قصدى اشتغل الاقى نفسي افتح الايميل استقبل ردودكم وبعدين ارد وشايف مدام امانى وعم احمد ابو عرب هيهرونا ذكريات . يارب يارب ينشروها الان قبل ما الفته تيجي زى ما اختى اليكس وضحت باين عليها مصره تجرى ريقى لاكل عمرى ما بصتله بس بضعف ادام صنيه الرقاق باللحمه المفرومه والمكرونه بالشاميل و البوفتيك يله بقى انا مش طماع مين قال ليك عزومه .....؟

ينهار ابيض اكتشفت حاجه الاسكندرانيه والقاهريين شكلهم كدى كرماء جدا محدش رفع صباعه وقال انا بقى منظرى وحش اوى طيب انا عازمكم كلكم بما انى شرقاوى واحنا اللى عزمنا القطار خلاص عازمكم كلكم بس بشرط تكون العزومه اول الشهر عشان اخر الشهر بكون والحمد لله منفض

يله منتظركم مع الذكريات معاكم هنا بقلبي وروحى انما عقلى مع البنوك والعملاء والكفيل وحتة فص صغير بيفكر فى ذكرياتكم

تحياتى لكم جميعا وكل سنه وانتو طيبين (ان كان فيها رخامه كل واحد يقولنا اغنيه من بتوع العيد بتاعة زمان واللى كانت من الفلكور الشعبي الجميل ) يوابور يامولع حط الفحم اده ايه الاغنيه يله مستنيكم

تحياتى عمرو

[samytel]

دى حتة ل(صلاح جاهين) كنت سمعتها فى فيلم (ولاد الإيه) بس باعشقها.. أنا عارف إنها مش فى صلب موضوعكو معلش

على اسم مصر

على اسم مصر التاريخ يقدر يقول ما شاء

أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب

على اسم مصر

[nash]

مساء الخير..علي أعضاء الرابطه الجميله...

سلام خاص ل samytel

أهلا ومرحبا بك معنا...

أماني الرقيقه....تسلمي ياقلبي علي مشاعرك الجميله...بالضبط كما توقعت أنك بالفعل إنسانه رقيقه وأكيد تشعري بما نعانيه جميعا من مشاعر غربه قاسيه...الحمدلله علي كل شيء....

أخي سالم....بجد كل مرة أقرأ لك فيها أضحك من قلبي....ربي يحفظك واسرتك الكريمه...بس معرفناش برضه العيد فين هاتقضوة؟؟؟ أقترح مكان جديد لانج بقاله بتاع عشرين سنه بس ...( مجمع الراشد ) جميل...هششش الناس لسه نايمين...

عمرو...مش واخده بالي...هوة حد جاب سيرة عزومه لا سمح الله؟؟؟؟

أليكس....الله يخليكي ماتفكرنيش بأغنيه بكرة العيد...يانهاري وقعتيني من الضحك....الظاهر التراث واحد....

...................................................................

إلا علي ذكر الوقفه والتواريخ...أنا ...كنت متخيله ان وقفه العيد بتختلف من عام لإخر مثل رمضان يعني...قال واقول هي الوقفه للعيد القام هاتكون برضه 9 ذو الحجه...؟؟ التواريخ الهجري ضايعه معايا...

[nash]

:roseop: تم تعديل 17 ديسمبر 2007 بواسطة nash

[مسالم]

السلام عليكم ..

شكراً جزيلاً على كل ماتفضلتم به من ردود .. شكراً لأماني على ذكرها إسمي على البورد في آخر لحظه .. الحمد لله ربنا ستر .. :closedeyes:

أما حبيبنا عمرو .. فانا فعلاً .. يا ابو الاعمار .. فكرت في نشر ذكرياتي .. لكن للأسف مالقيتش سطوح كويس أنشر عليه ..

ويأخي لو عايز تتعرف عليّ اكتر .. مفيش مانع دعوه على غذاء أو عشاء عمل .. ميريديان .. شيراتون .. يعني انت راجل باشمحاسب قد الدنيا والفلوس عمرها ما بتفارق ايديك .. :rolleyes:

أختنا العزيزه ناش .. ألحمد لله .. عقدنا اتفاق مع بعض الاصدقاء على تمضية العيد في المزرعه ... لالا .. مش سوبر ماركت المزرعه .. لكن كما تعلمين ان هناك شاليهات واستراحات مجهزة من كل شئ .. ملاعب كرة قدم وطائرة .. وحمام سباحه (طبعاً الدنيا سقعه) ومجلس للنساء وآخر يشبهه للرجال .. تلفزيون .. والذي يميزها انها تقع على البحر (قصدي على الخليج) مباشرة .. وهكذا .. اتفقت أنا وبعض الزملاء العوائل مثلي ان نأجر هذه المزرعه لمدة يوم .. وطبعاً يحلى الشوي على البحر في هذه المناسبه .. وربنا يستر والجو يكون جميل ..

عموماً ياجماعة .. مرحباً بكم تعيّدوا معانا .. الدعوه دي للعوائل فقط .. بالنسبه لك ياعمرو فيه مزرعة عزاب على بعد 250كم من المزرعه دي .. ممكن تقضي فيها العيد .. بس مافيهاش حاجه خالص .. لا بحر ولا مجلس ولا ملاعب ولا مزرعه اساساً .. ده علشان تحرّم تقعد عازب لحد دلوقتي .. انت فاكر العمليه سايبه ولا ايه ...

شكر وتقدير لزعيمة الرابطه .. Alex-lover .. فهي صاحبة الفضل بعد الله سبحانه وتعالى في ربط هذه المجموعه المميزه بهذا الموضوع المميز .. وربنا يجعله ربط محمود .. مش من اللي بعيد عن السامعيين ... حابس حابس .. استغفر الله العظيم .. ربنا يجعل كلامنا خفيف عليهم ..

كل سنة وانتم طيبين جميعاً بمناسبة عيد الاضحى .. محاورين ومحاورات .. العيد القادم وفي مثل ذلك الوقت .. نشوفكم في مصر ..

أدعوا الله العلي القدير .. السميع المجيب .. أن يديم عليّ نعمته وأن يعطي والدي ّ الصحه والعافيه .. وأن يرحم أموات المسلمين ..وأن يجعلني مقيم الصلاة ومن ذّريتي.. وأن يغفر لي ولكم سائر الاعمال .. آمين

تم تعديل 18 ديسمبر 2007 بواسطة مسالم

[amrhoras]

صباح الابتسامه . والاعياد

مين بيصحيني من مزرعتى الخاصة الهواء عليل وبحار الرمال تحيطني وجنينة الزهور اقصد السيارات من كل الجوانب اشم عبيرها من عادم وثاني اكسيد الكربون . مزرعتى جميله ومميزه على يسارى بوابة الدنيا وعلى يميني بوابة الاخره .

اجمل مافى العيد انه الاجازه الوحيده اللى باخدها هههههه بس للاسف مفيش الا اتنين بس . كل سنه وانتو طيبيبن طبعا

اما عن العزومه يا أ/مسالم ياخويا دونت وورى احنا ادها وقدود من جنيه لجنيه ونص :closedeyes: ايه اسماء الفنادق الغريبة دى شرايط و بردايان انا اسمع انه فيه فندق سعيداميس او كونتاننتن. فى مسمط ناكل عجاوى وكلاوى ههههههههههههههه .

ربنا يسعد ايامكم واتمنى لكم اجازه سعيده جدا انشا الله وتحية طيبة الى كل ابناء الربطه .

وانشا الله العام القادم نتجمع كلنا على عرفات انشا الله تعالى ونكون فى احسن حال .

يله اقولكم بقى بار بي كيو سعيد عنوانى ميتوهش اول ماتنزلوا الدماما سيدا سيدا سيدا يمين ف شمال اسألو عن عمرو بس واربعه مليون من يدلكم :rolleyes:

تحياتى

عمرو

[nash]

صباح الخير.....

كل عام وأنتم جميعا بخير...

الساعه الأن تشير إلي السادسه والربع...يوم غريب الحقيقه...منتهي البهجه والسعاده ( كذابه )

أفتقد كثيرا من أحبهم....أفكر هل يتذكرونني ام نائمين ( يبيعوني) في أقرب فرصه...وبقلب بارد...

الصديقات جميعم نائمين...( أحقد عليهم ) سيذهبون اليوم إلي الملاهي....ياااااااااابختهم...( مش حسد )...ولكنه حسد فقط...

تخيلت منظري وانا داخله علي الملاهي ومعايا أتنين طولي ماشاء الله وبدفعلهم الكوينز علشان يركبوا الفنجان اللي بيلف ويدور....حقيقي هاتبأة فكرة هايله وخصوصا لما ننطرد أحنا التلاته..علي اساس أن زوجي سيبقي خارجا..أصول ( البرستيج )

الجميع أخذ المواعيد وأتفق علي الخروج إلا مافي حد فيهم..قالي تعالي يا ماما افسحك ..ولا ماتشرفينا يا ست الكل في السهرة.....

زوجي الكريم ( الله يكرمه ) أشتري سكوتي وحنقي وضيقي وكل مفردات الغضب التي تعتمل في داخلي بكميات مهوله من الأيس كريم ( عشقي ) الحقيقي في هذه الدنيا الفانيه...

وكل ما أسكب شويه ( كذابه ) يقولي علي رابع يوم العيد هاتتحولي لكائن هلامي...

كل سنه وانتم طيبين..وباللحمه متهنيين...ورمضان كريم

[امانى]

صباح الفل عليكم جميعا من مصر ومن اسكندريه الساعة دلوقتى عندنا السادسة والربع بتوقيت الاسكندريه

قاعدة امام الكمبيوتر وصوت التكبيرات من جميع الجوامع حولى الله اكبر الله اكبر الله اكبر0 الله اكبر ولله الحمد

بنقل لكم الصورة حيه من مصر ومعاكم بقلبى كلكم يارب يجعلها

سنة سعيدة عليكم كلكم والدنيا بتمطر خفيف هنا قاعدة بفتكر زكريات العيد لما كنت صغيرة بفتكر لما كنت اطلب

من ماما تحط فستانى وشنطتى والشوز والشراب والشريط اللى هتعمله فيونكا فى شعرى والتوك كل الحاجات دى

بجوارى على السرير 0 ولما اتاكد انها نامت اقوم والبس الشراب والشوز وامسك الشنطة وافضل رايحة جايه فى الحجرة

فرحانه بنفسى كدة وارجع انام ولما اقوم الصبح البس الفستان واستنى بابا لما يجى من صلاة العيد علشان العيديه

رحمة الله على والدى توفى منذ عام ونصف ومنذ وفاته لم اعد احس بجمال العيد بحس انه ناقصنا اشياء كتيرةكنا نحسها

فى وجوده حتى بعد زواجى كان ياتى لى يوم الوقفة يعيد عليا ويطلب منى ومن زوجى ان ناتى عنده فى الصباح الباكر

لقضاء اول ايام العيد طرفهم وبالفعل نذهب اليهم ونبقى كلنا موجودين اقصد اخواتى وابى وامى وزوجى واولادى

والان وبعد وفاته اذهب قبل العيد كى اعيد على امى لاننى لا استطع على تحمل وجودى بالعيد طرفهم من دونه0 معلش

طولت عليكم بس حبيت اعبر لكم انى برغم انى مش فى غربه وانى فى بلدى بس فيا شجون برضه بحس بيها زيكم

المهم كنت بتعمد وانا صغيرة اخرج مع والدى دائما علشان لما كنا بنزور حد من الاقارب كان هو بيدى اولادهم عديه وانا

كمان كانو بيدونى عديه يعنى كنت بستفيد من الزيارات بس ميمنعش انى كنت كل يوم برضه اخد عديه من والدى

دلوقت بدفع التمن واولادى هما اللى مخلصين على كل ما ياتينى من عديه

زكريات جميلة كل سنة وانتم طيبين وعيد سعيد عليكم :blush2: :ninja: :wub: :lol: :lol:

امانى