رابطة عشاق مصر (أليكس لوفر)

[أبو محمد]

كل عام وأنتم بخير

انتقى مسجدا يكبر فيه المصلون تكبيرة العيد كما عرفتها وأنا صغير فى مسجد الحى .. كنت أذهب إلى هذا المسجد ممسكا بيد أبى (يرحمه الله) ذهابا وإيابا .. يرفعنى إلى مكان مرتفع ليفك لى رباط الحذاء ونحن داخلون .. ويرفعنى إلى نفس المكان ليلبسنى حذائى ونحن خارجون ... كنت دائما ألاحظ أنه يمر على بيت عمتى (كانت أكبر منه ، يرحمها الله) فى طريق العودة .. نشرب عندها شاى بلبن .. ثم نتوجه إلى منزلنا ننتظر الجزار ليذبح الخروف .. سمعت قصة سيدنا إسماعيل .. ولا أدرى لماذا كنت وأنا طفل صغير أتخيل أن سيدنا إبراهيم له شكل والدى ..

حفظت التكبيرات كاملة .. كان كل المصريون يكبرون بها .. إلى أن ظهر من يخبرنا بأننا مبتدعون أو نتبع المبتدعين بتلك التكبيرات .. من يومها وأنا أبتعد عن هؤلاء الذين يتهمون أبى وجدى وأعمامى وأخوالى بأنهم لم يكونوا يعرفون دينهم .. فى الوقت الذى لا يستطيع هؤلاء الرد عليهم لأنهم قد انتقلوا إلى الرفيق الأعلى

هدانا الله جميعا إلى ما يحبه ويرضاه

[amrhoras]

صباح الخير.....

كل عام وأنتم جميعا بخير...

الساعه الأن تشير إلي السادسه والربع...يوم غريب الحقيقه...منتهي البهجه والسعاده ( كذابه )

أفتقد كثيرا من أحبهم....أفكر هل يتذكرونني ام نائمين ( يبيعوني) في أقرب فرصه...وبقلب بارد...

الصديقات جميعم نائمين...( أحقد عليهم ) سيذهبون اليوم إلي الملاهي....ياااااااااابختهم...( مش حسد )...ولكنه حسد فقط...

تخيلت منظري وانا داخله علي الملاهي ومعايا أتنين طولي ماشاء الله وبدفعلهم الكوينز علشان يركبوا الفنجان اللي بيلف ويدور....حقيقي هاتبأة فكرة هايله وخصوصا لما ننطرد أحنا التلاته..علي اساس أن زوجي سيبقي خارجا..أصول ( البرستيج )

الجميع أخذ المواعيد وأتفق علي الخروج إلا مافي حد فيهم..قالي تعالي يا ماما افسحك ..ولا ماتشرفينا يا ست الكل في السهرة.....

زوجي الكريم ( الله يكرمه ) أشتري سكوتي وحنقي وضيقي وكل مفردات الغضب التي تعتمل في داخلي بكميات مهوله من الأيس كريم ( عشقي ) الحقيقي في هذه الدنيا الفانيه...

وكل ما أسكب شويه ( كذابه ) يقولي علي رابع يوم العيد هاتتحولي لكائن هلامي...

كل سنه وانتم طيبين..وباللحمه متهنيين...ورمضان كريم

وانتى طيبه يامدام ناش بس متسكوتيش خالص على الحكايه دى :wub: ربنا يعينك يارب على أكل الايس كريم :blush2: وبدال ما اسمك ناش نسميكي هاش :ninja:

كل عام وانتى بخير واطباق لحوم لذيذه وبالهنا والشفا اعاده الله عليكى واهل بيتك بكل صحه ووسعاده

تحياتى عمرو

[amrhoras]

صباح الفل عليكم جميعا من مصر ومن اسكندريه الساعة دلوقتى عندنا السادسة والربع بتوقيت الاسكندريه

قاعدة امام الكمبيوتر وصوت التكبيرات من جميع الجوامع حولى الله اكبر الله اكبر الله اكبر0 الله اكبر ولله الحمد

بنقل لكم الصورة حيه من مصر ومعاكم بقلبى كلكم يارب يجعلها

سنة سعيدة عليكم كلكم والدنيا بتمطر خفيف هنا قاعدة بفتكر زكريات العيد لما كنت صغيرة بفتكر لما كنت اطلب

من ماما تحط فستانى وشنطتى والشوز والشراب والشريط اللى هتعمله فيونكا فى شعرى والتوك كل الحاجات دى

بجوارى على السرير 0 ولما اتاكد انها نامت اقوم والبس الشراب والشوز وامسك الشنطة وافضل رايحة جايه فى الحجرة

فرحانه بنفسى كدة وارجع انام ولما اقوم الصبح البس الفستان واستنى بابا لما يجى من صلاة العيد علشان العيديه

رحمة الله على والدى توفى منذ عام ونصف ومنذ وفاته لم اعد احس بجمال العيد بحس انه ناقصنا اشياء كتيرةكنا نحسها

فى وجوده حتى بعد زواجى كان ياتى لى يوم الوقفة يعيد عليا ويطلب منى ومن زوجى ان ناتى عنده فى الصباح الباكر

لقضاء اول ايام العيد طرفهم وبالفعل نذهب اليهم ونبقى كلنا موجودين اقصد اخواتى وابى وامى وزوجى واولادى

والان وبعد وفاته اذهب قبل العيد كى اعيد على امى لاننى لا استطع على تحمل وجودى بالعيد طرفهم من دونه0 معلش

طولت عليكم بس حبيت اعبر لكم انى برغم انى مش فى غربه وانى فى بلدى بس فيا شجون برضه بحس بيها زيكم

المهم كنت بتعمد وانا صغيرة اخرج مع والدى دائما علشان لما كنا بنزور حد من الاقارب كان هو بيدى اولادهم عديه وانا

كمان كانو بيدونى عديه يعنى كنت بستفيد من الزيارات بس ميمنعش انى كنت كل يوم برضه اخد عديه من والدى

دلوقت بدفع التمن واولادى هما اللى مخلصين على كل ما ياتينى من عديه

زكريات جميلة كل سنة وانتم طيبين وعيد سعيد عليكم

امانى

مدام امانى كنتى فين والذكريات الحلوه دى فكرتيني بالشياكه( كان طقم بنى ) كنت مسميه شياكه واكن عمرى 5 سنين ياماما هاتيلى الشياكه تقولى ايه القلاطه دى بس قمر ياخواتى :blush2: طبعا فى عين امى غزال :happy: وبعدين بقى اقوم اصلى العيد مع بابا الله يرحمه ونسلم على امة لا اله الا الله :blink: مين دول يابابا يقولى سلم وانت ساكت :ninja: مفتكرش حد دب ايده فى جيبه وطلع حتى ربع جنيه مخروم اده بس كان اياميها ورق :unsure:

نرجع نلاقى طاجن الحوائج معمول والعبد لله ضعيف ادام الحاجات دى وافتكر انى كنت بقوم بالتخزين وابدأ اخد من بابا وماما انا كنت رخم واللهى wst:: واختى بقى كانت بتخدمنى متحبش الحاجات دى استولى انا على كل مالديها من تحت التربيزه . وفى الاخر اضطر اسفا انى اسيب اللى جمعته لانى شبعت وانا مكولش حاجه بارده حتى ولو سخنوها ليا .

بعد كدى يجي قبيله اسمها عيلة بابا وعيلة ماما ودى اجمل اللحظات بقى عشان نلم العيديه ونسترزق وعمى الله يرحمه كان يجي من القاهره معاه عيلته ونروح البيت الكبير كلنا ونتجمع نهزر ونضحك

حاجات كتييير اوى رجعتيني لها يامدام امانى بجد

بالنسبه للوالد الله يرحمه ويرحم والدي وكل اموات المسلمين . صدقيني احنا عوضا عن اباهتنا لامهاتنا المفروض نخليهم او نخفف عنهم الاحساس بالفراغ اللى حصل .

اتمنى تكونى دلوقتى مع والدتك بتشيلى عنها او تخففى ولو بقدر بسيط وانا متأكد انك فعلا انتى او اخواتك قايمين بالواجب وزياده

يارب يفرح ايامكم وعيد سعيد عليكم

تحياتى

عمرو حورس

[amrhoras]

كل عام وأنتم بخير

انتقى مسجدا يكبر فيه المصلون تكبيرة العيد كما عرفتها وأنا صغير فى مسجد الحى .. كنت أذهب إلى هذا المسجد ممسكا بيد أبى (يرحمه الله) ذهابا وإيابا .. يرفعنى إلى مكان مرتفع ليفك لى رباط الحذاء ونحن داخلون .. ويرفعنى إلى نفس المكان ليلبسنى حذائى ونحن خارجون ... كنت دائما ألاحظ أنه يمر على بيت عمتى (كانت أكبر منه ، يرحمها الله) فى طريق العودة .. نشرب عندها شاى بلبن .. ثم نتوجه إلى منزلنا ننتظر الجزار ليذبح الخروف .. سمعت قصة سيدنا إسماعيل .. ولا أدرى لماذا كنت وأنا طفل صغير أتخيل أن سيدنا إبراهيم له شكل والدى ..

حفظت التكبيرات كاملة .. كان كل المصريون يكبرون بها .. إلى أن ظهر من يخبرنا بأننا مبتدعون أو نتبع المبتدعين بتلك التكبيرات .. من يومها وأنا أبتعد عن هؤلاء الذين يتهمون أبى وجدى وأعمامى وأخوالى بأنهم لم يكونوا يعرفون دينهم .. فى الوقت الذى لا يستطيع هؤلاء الرد عليهم لأنهم قد انتقلوا إلى الرفيق الأعلى

هدانا الله جميعا إلى ما يحبه ويرضاه

صدقنى يا ابو محمد كل الناس اللى بتتهم اجدادنا و اباءنا بالجهل لا يستحقون حتى الاستماع والانصات لهم لانهم هم الجهله ذاتهم فمن يريد النصيحه ينصح لكن لا يتعدى بالقول على اصولنا . ومن يهتدى فلنفسه ومن يعصى فعليها.

كل سنه وانت طيب يا اجمل ابو محمد ياريت الذكريات الحلوه دى متنقططعش والا نبعتلكم انذار ارض جو من الغربه الى اهل اسكندريه

اجمل الامنيات والتهانى القلبيه

تحياتى

عمرو

[amrhoras]

اليكس زمانها غرقانه فى المطبخ دلوقتى شامم ريحة الطواجن من مكانى هذا هههههه الف هنا وشفا

ربنا يديم عليكي السعاده فلكى كل الفضل ف استرجاع كل هذه الذكريات كل سنه وانتى طيبه وكل اهلك وبخير وسعاده يارب

اما الاخوان احمد عرب ومونتي اختفو فى ظروف غامضه كل سنه وانتو طيبين

ا/مسالم ربنا يديم عليك السعاده والابتسامات وراحة البال وعيدك مبارك انت واهل بيتك يارب

تحياتى

عمرو

[amrhoras]

صباح الخير عليكم جميعا :blush2:

ثانى ايام العيد واصبح لا يوجد الكثير من الوقت لتنتهى ايام الاجازه ونرجع للعمل :happy:

حد يشوفلنا كدى فى اعياد مستخبيه

جيت بس اصبح عليكم جميعا واقولكم اجازه سعيده :unsure:

مستني كل واحد يقولى عمل ايه فى الاجازه ......!

تحياتى لكم جميعا

عمرو حورس

[amrhoras]

السلام عليكم ورحمة الله وبركاته

تحية كبيره اوى الى صاحبه الموضوع اليكس لوفر ونقولها كل سنه وانتى طيبه جدا جدا جدا وزوجك وكل عائلتك شايفها هتقول حاجه اهوه

يارب بس مناخدش انذارات فى التحية دى بس يكفيني شرف القاء السلام والتحيه

تحياتى عمرو

[Alex Lover]

كل عام وانتم بخير

الكل اجاااااااازة :)

النهاردة ثالث يوم العيد والأمطار غزيرة بالكويت منعتنا من الخروج

في مصر مهما هطل المطر الكل بيخرج والاماكن كتييييييير اللي الناس تقدر تروح لها في العيد

ودي ميزة جميله في مصر حبيت اضبفها اول ما حسيت اني افتقدتها

كل عام وانتم جميعا بخير

wst::

[امانى]

حبيبتى اليكس مش الكويت بس اللى فيها مطر غزير مصر كمان وبالذات الاسكندريه امبارح من اول النهار الى فجر اليوم لم تبطل

شتاء والمطر متواصل دون انقطاع لكن النهاردة الحمد لله مفيش مطر خالص

قلبى معاكم وكل سنة وانتم طيبين وبخير امين يا رب العالمينودول منى بمناسبة العيد :) wst:: :sad:

امانى

[amrhoras]

;) صباح الخير م اول يوم شغل

قمت اتصدمت بصراحه صدمتين

صدمة التلج ده ودرجه الحراره 8

والصدمه التانيه كفيلى جه كبسه سلام

[amrhoras]

اين انتم يا قوم

مفيش حتى حد قال كلمه توحد الله تسجيل تأخيررررررر وهكلم المديرين المعنين يخصموا اربع حتت لحمه من كل واحد فيكوا

طيب هبدأ انا بذكرى العيد بس الفطر اللى فات

طبعا انتقلت الى مكه لاداء فريضة العمره والحمد لله تانى عمره ليا انما ما اتذكره فعلا هو شاب فلسطيني اسمه انس واهله يعيشون فى الطائف تعرفنا على بعضنا البعض طيلة الطريق نتحدث خمسة عشر ساعة نتحدث انا وهو بصراحه كنت كونت قبلها رأى عن الاخوه الفلسطينين المقيمين هنا فى السعوديه لكنى اكتشفت ان هناك السيء والجيد

اتممنا العمره والحمد لله بعد الطواف والسعى والحلاقه طبعا افتقد روح هذا الشاب الذى حكي لى عن المخيمات وطبيعة الحال فى غزه والقدس وجدت نفسي اقول الحمد لله اننى مصري .

لا اعلم لماذا تذكرته لكنه بمجرد ركوبه المواصلات الى الطائف انقطعت اخباره لا اعلم لماذا لم اخذ رقم جواله مع العلم انه مقيم بالدمام الا اننى فضلت ان تلعب الصدفه دورها ان التقينا نلتقى على خير وعلى غير ميعاد . تعرفت من خلال سفرياتى طيلة حياتى على اشخاص كثيره جدا ولعبت الصدفه معى دورها فى ان اقابل بعضهم .

فسؤالى اليكم هل تتذكرون شخص قابلتموه لمجرد سويعات ولازلتم تتذكروه ؟وما تذكرونه من هذا الشخص وهل لعبت الصدفه دورها وقابلتموه مره اخرى كى تولد صداقه بريئه بين بعضكم البعض

اما ذكريات هذا العيد لم تكن بالكثير ولا حتى اللحمه ههههه قضيت الاوقات معظمها اما فى سكنى او هنا بينكم وطبعا لم ارى سوى المقابر والسيارات القادمه والذاهبه معتقل جوانتنامو فيه راحه وحريه على ما اعتقد اكثصر فهؤلاء معتقلون بالغصب وانا اعتقال مقنع هههههه

منتظر ردودكم فيها شفاء لروحى اعيش بذكرياتكم وارى بأعينكم مالا اراه بمقلة عيني

وصباحكم ورد انشاء الله

تحياتى

المعتقل عمرو بن حورس

[salemhegazy]

كل عام و انتم بخير

[امانى]

صباح الفل على كل الاخوة المغتربين وكل سنة وانتم بخير وسعادة

صباح الفل يا عمرو والله انت دائما تنعش زكرياتنا بمواضيعك الجميلة دى وبما انك طالب مننا زكرى من الزكريات دى هقولك يا سيدى

سنة 1998 كانت اول عمرة لى وذوجى فى رمضان وكانت الرحلة على باخرة السلام المتجهة من السويس لجدة وفى الباخرة

تعرفنا على دكتور وذوجته من محافظة المنوفية وكنا مع بعضنا لمدة يومين لا نفترق على الباخرة وعند نزولنا ميناء جدة سلمنا

عليهم وراحو هما تبع شركتهم السياحية واحنا طبعا تبع مرشدنا بتاع شركتنا السياحية وافترقنا واتجهت السيارة بنا الى المدينة

وقضينا بها خمسة ايام ولا نعلم شيئا عن الدكتور وزوجته 0 بعد ذلك توجهنا الى مكة وفى مكان الأحرام ببيار على دخلت اتوضأ

وهنا وجدت الصدفة والمفاجأة وجدت ذ وجة الدكتور تتوضأ كانت احلى صدفة لم نكن نصدق انفسنا اننا سنلتقى ثانيه وخرجنا

بعد الوضوء والصلاة الى الخارج كى نبشر اذواجنا بهذه الصدفة الجميلة وقررنا الا نفترق ثانيه وعلينا بعد الوصول لمكة ان نلتقى

ثانيه وبالفعل اتفقنا على ان نتقابل عند بير زمزم بعد صلاة التراويح وكان ايامها تنزل الى زمزم بسلالم تحت الارض وبالفعل

وجدتها بانتظارى ونسقنا مقابلتنا يوميا مع بعض فى كل صلاة حتى فى وقت المشتريات كنا نحن الاربعة مع بعض 0 هذه العمرة

كانت بداية لصداقة قوية بيننا 0 طبعا اعطيناهم ارقام تليفوناتنا واخذنا ارقامهم ودعوناهم لقضاء شم النسيم طرفنا وبالفعل تم

زيارتهم لنا وزرناهم ببلدتهم واصبحنا أكثر من اهل وتكررت عمراتنا بعد ذلك مع بعض ثلاثة مرات ولكن كل مرة كنا تبع شركة

سياحية واحدة وفندق واحد واكل مع بعض واداء المناسك مع بعض 0

فكرتنى يا عمر بهذه الصدفة الجميلة التى جعلتنى اكسب صداقة ناس محترمة وطيبة مثل الدكتور وذوجته

اظن انا كدة مش مخصوم منى لحمة ولا حاجة نفذت طلبك اهو وحكيت عن صدفتى ناقص نسمع باقى اعضاء الرابطة 0

صباحك فل

امانى

تم تعديل 23 ديسمبر 2007 بواسطة امانى

[ELSHAMY]

أخوانى و أحبائى

كل عام و أنتم بخير

عمورة الحبيب, مدام أليكس, مسالم, تاش, أمانى....أنا موجود والله وبأدخل أقرا كل المداخلات يوميا....بس مش عايز أضايقكم بالمود اللى مسيطر عليا بقاله كام يوم وهو الرغبة الشديدة بالرجوع لمصر و حبيبتى اسكندرية وصحابى و أهلى و جيرانى .... اللى عايز أخدهم فى أحضانى (أو على الأقل من بقى منهم على قيد الحياة).

ويمكن كان لهذا المنتدى تأثير مباشر عليا فى هذا الأمر.... يعنى أنتو السبب.

عايز أفعد مع نفسى قعدة رجالة علشان أرتب الموضوع....على فكرة صعب جدا جدا

بس بصراحة وحشتونى كلكم.

[amrhoras]

والله يامدام امانى مش عارف ايه الجمال ده عشان كدى امرنا نحن حلاوه العنتبلى ملوك اللحمه (فيلم ع باب الوزير) بصرف 4 حتت لحمه بتلو لامنية المحاورات امانى

شكرا على ذكرياتك الجميله ويارب يديم المعروف ديما ويجعل كل ايامك سعاده وهنا وابتسامه جميله

على فكره صديق السفر بيكون اقوى انواع الصداقه

هنا مثلا فى الحياه البدويه صديق السفر هو الخليل ويكون من الواجب عليه حمايتك من كل شر وسوء ويطلقون عليه خوى او خويك وجايه من اخ تقولش مخاوى جن

بقالى 3 ساعات بكتب السطرين دول ماشا الله عليا اتحسد طبعا هتقولولى رحت وين

هقولكم وفى عجاله انى اخدت سياره حلوه صغيوره ورحت نازل اشم هوا ايو الله واكتشفت انى نسيت الاقامه وطبعا مش معايا رخص لقيت الطريق ملبش قولت اعمل زى الحرامى اللى بيستخبي فى القسم وقعدت ماشي ورا سيارات الدوريه ههههه احب اكون شارلوك هولمز ساعات كتير

ده بقى يحفزنى انى اسأل ايه اكتر مغامرات قد قومتوا بها وكنتوا ابطالها

من باب التشويق بس ممنوع الحوادث لوسمحتوا سامع يا أ/مسالم عشان محبش الحوادث :P

منتظركم

[مسالم]

السلام عليكم ...

كل عام وانتم بخير .. وإن شاء الله تكونوا قضيتم عيد سعيد عليكم وعلى أولادكم .. وإن شاء الله ربنا يتقبل أعمالكم ويتقبل حج الحجاج ويغفرلهم ولينا إن شاء الله ...

حبيت أعيد ع السريع .. واقول اني معاكم قلباً فقط .. لإن الظروف مش مواتيه الحين لأن تكون قالباً .. ..

أنا معاك ياعمرو ومع ذكرياتك الجميله .. وكمان أماني ابتدت تتفاعل مع الذكريات ,, وربنا يجعل المطر اللي عندكم رزق ليكم .. أي نعمه وليس نقمه ..

وبمناسبة المطر .. أفتكر لمّا كنت بسم الله ماشاء الله مشروع شاب كده وكان عندي حوالي عشرتاشر سنه .. وطبعاً اسكندريه الجميله .. والمطر الشتوي اللي كان بيغسل القلوب قبل الشوارع ... كان الوالد ربنا يديله الصحه .. ياخدنا أو بمعنى أصح ياخدني انا والوالده ويمكن اختي اللي اكبر مني .. ونروح نتعشى عند جاد اللي عند سينما امير .. ياسلام .. كباب وكفته .. وكنا ننزل من الترام في محطة مصر ونكمل مشي من ورا المطافي الى سينما أمير .. المسافه كانت بالنسبه للزمن المستعجل اللي احنا عايشين فيه ده تعتبر كبيره .. لكن بالنسبه لزمن الهدوء والانسجام .. لا تعد .. يعني قريبه .. وكانت زخات المطر تتساقط علينا أثناء الطريق .. والحاجه الله يمسيها بكل خير .. كانت عامله احتياطاتها .. وف حركتين اتفتحت الشمسيه السوداء ودخل الوالد والولده بقدر المستطاع تحتها .. تعالى يا مسالم .. لأ انا كده مبسوط .. كنت فعلاً مبسوط وقطرات الامطار تتساقط على رأسي وشعري .. أيام ما كان عندي شعر .. وكنت اسير مزهواً بنفسي .. واتخيل الناس تقول .. ايه الواد الجامد ده .. مش همه المطرة اللي نازله فوق دماغه .. واوو .. لا زحيح فزيع ...

لكنني أدركت ان الذي كنت افعله .. من التهور بمكان .. وذلك بعدما يحكي لي إخوتي ما كنت اهزي به اثناء ارتفاع درجة حرارتي في الايام الثلاثه السابقه لإفاقتي ..!!

على جنب:

مش ملاحظين ان فيه أعضاء في المحاورات غاروا مننا وكل واحد راح يكتب ذكرياته في باب جديد ..!!

تم تعديل 23 ديسمبر 2007 بواسطة مسالم

[Alex Lover]

اول يوم شغل النهاردة ..

كل عام وانتم بخير ويارب تكون اللحمة ما قفلتش على الحجاب الحاجز وكتمت الأنفاس

ولو ان الموضوع مبقاش زي زمان .. كنت زمان افتكر ان اول يوم العيد الفطار فته باللحمة والغداء رقاق باللحمة وكفته ولحمة بالبصل

بالليل العشاء برضه لحمه

العيد ده كل الاكل بره البيت .. اريح برضه

عمرو عجبني اوي موضوع رفيق الصدفه ده ... انا عرفت ناس كتيييييييييير ومقعدتش معاهم اكتر من ساعه .. وباكون نفسي اكلمهم تاني بس الدنيا تلاهي بجد

اماني انا لازم اشوفك لما انزل اسكندريه في الصيف ناليش دعوة اتصرفي ... انتي عارفه ان جوزي من المنوفيه برضه ،،، فكرتيني بالصيف الماضي كنا في مرسى مطروح واتعرفنا على اسره بدون ما نتكلم مع بعض بالمرة مقضينها ابتسامات :) كانوا قاعدين في الشمسية اللي جنبنا وعندهم ولد وبنت اسمهم مي واحمد وهما اكبر من اولادي يكتير اولادي 5 سنين و3 سنين المهم انهم بدأو يلعبوا مع الاولاد وارتبطوا بيهم وانا ومامتهم مقضينها ابتسامات من بعيد لبعيد ... وتاني يوم لقيناهم واحنا رايحين بيشاورولنا علشان نقعد في الشمسية اللي جنبهم وبرضه بنبتسم من بعيد لبعيد ... ثالث يوم قعدنا بعيد عنهم ولقيت الاولاد جايين مع جدتهم علشان يقعدوا معانا تحت الشمسية بتاعتنا :wub: الاولاد ارتبطوا بيهم جدا ومازلنا انا والأم ممشينها ابتسامات حتى جاء يوم الوداع bnd5:: ده اليوم اللي اتكلمنا فيه وجها لوجه وكانت اول مرة تعرف اني عايشه في الكويت واتكلمنا تقريبا 5 دقايق واخدنا تليفونات بعض على ا ساس اننا نتكلم ونتفق نتقابل قبل ما اسافر :( ولم نتصل ببعض وبرغم اني لم اتعرف عليهم جيدا الا اني اتمنى اشوفهم مرة تانية ,,, هاروح ادور على رقم التليفون واحاول اتصل بيهم

مسالم ... كل عام وانت بخير .. عندك حق فيه ناس غارت مننا مش بس في المحاورات ... فيه منتديات تانيه اخدت الفكرة وبتنفذها مع تغيير الاسم .. عموما خير بس اهم حاجة انهم ما يسحبوش مننا الزباين pps:

سالم كل سنة وانت طيب

ناش وحشتيني

دكتور شامي ... مين سمعك انا لسه كنت في خلاف مع شخص اول ما سمعني باقول نفسي ارجع مصر قام قالي ليه ؟؟؟ brth) قلتله لان دي بلدي قالي بس هنا احسن من مصر وبيرد عليا بحده كأني اهنته قلتله لأ مصر احسن بس لو ظروفن الماديه كويسه ، مصر فيها كل حاجه موجوده هنا وزياده بس الماااااااده هي اللي حكمانا هنا عايشين كويس نتيجة للمرتبات الكويسه بس في مصر هتلاقي كل الملات والكافيهات والمنتجات والمتنزهات بالاضافه الى لمه الأهل والصحبة والذكريات والاصحاب والتقاليد والأمان

نظر لي كاني مجنونه .... هو ده حال بعض الناس اللي هربت من مصر وباعت نفسها للغربه (((كليا)))

كل عام وانتم بالف صحة وخير

[amrhoras]

على جنب:

مش ملاحظين ان فيه أعضاء في المحاورات غاروا مننا وكل واحد راح يكتب ذكرياته في باب جديد ..!!

pps: ملاحظ

بس تقصد مين بالكلام ده يامسالم بيه اوعى تقول يوم غربه من الضمن :wub: لأ دى بس مذكراتى غير كدى :) ملاحظ جدا

انت بس ربنا يحرسك من العين خليك فى الرابطه وملناش دعوه بحد brth) كل عيش احنا ورانا عيال

*********

عموما صاحبة الرابطه اهيه موجوده بس

اليكس طبعا صاحبة الافكار والملهمه وبما اننا فى الاذاعة المحاورتيه وانا كشاب بقى واخوكم الصغير عاوز اسألكم سؤال شخصى جداااااااااااااااااااااااا bnd5::

انا اعرف ان اليكس اسكندرانيه وسيادتها تفضلت وقالت ان جوزها من المنوفيه فاسمحولى بقى اسأل هذا طبعا بعد اذنكم جميعا كل واحد يحكيلى او يحكيلنا قصة جوازه على السريع طبعا فى حدود المتاح ومن حق الساده الاعضاء الامتناع عن الاجابه

**********

على فكره احنا نسينا الاذاعه المحاورتيه الصامته :sad:

صباح الخير يامصريين

[Alex Lover]

ايه يا عمرو .... سؤالك اسكت الجميع ومفيش حد حاول يرد لييييييييييييييه bnd5::

اكيد الكل مكسوف ...

خلااااااااااص بلاششششش ولو اني افتخر دايما بقصة حبي انا وزوجي اللي لمت الشامي على المغربي :)

هو ايوه من المنوفيه وانا من الاسكندرية ولكننا كنا نعمل في شركة واحده pps: والباقي انتو عارفينه :wub:

اتمنى للجميع حياة زوجيه سعيده

ارجو من الجميع ان يتفضل ويحكي زكرى مؤلمه متستغربوش

ساعات الذكرى المؤلمة بتكون دواء لحاله من الملل والاكتئاب لانها بتوكد لنا ان الحياة لا تقف عند حدث معين بل تمشي وتلهينا وتنسينا

ابدأ يا عمرو

brth)

[salemhegazy]

سلم يا رب سلم

نسأل الله السلامه

يا اسكندرانية اطمأنوت و طمأننونا على الاسكندرية

سقوط قتلى وجرحى في انهيار بناية من 12 طابقا في مصر

أخبار أخرى

مقتل عضوين من حماس في غارة اسرائيلية على غزة

سقوط قتلى وجرحى في انهيار بناية من 12 طابقا في مصر

خطة امريكية لدمج "مجالس الصحوة" في المجتمع العراقي

| ما هي خدمة RSS؟

انهارت بناية من 12 طابقا في مدينة الاسكندرية في مصر الاثنين، مما اسفر عن سقوط عدد من القتلى والجرحى.

وقال خيري حسين، الصحفي المقيم بالاسكندرية في مقابلة مع بي بي سي ان الحادث وقع في منطقة لوران في حي الرمل بالاسكندرية، وان قوات الشرطة والدفاع المدني تبذل جهودا كبيرة لانقاذ الاحياء من بين ركام المبنى.

واضاف انه تأكد العثور على جثث لضحايا الانهيار لكن لم يعرف عددها.

وذكرت وكالة الانباء الفرنسية نقلا عن مصدر في قوات الدفاع المدني انه ينتظر العثور على عدد كبير من الجثث تحت الانقاض.

كما افادت وكالة رويترز للانباء بانه تم استخراج خمس جثث بالفعل من بين انقاض البناية.

وتتكرر حوادث انهيار المباني في مصر لاسباب كثيرة، من بينها قيام البعض بالبناء بدون ترخيص حكومي، واستخدام مواد بناء غير مطابقة لمواصفات الجودة لتحقيق ارباح كبيرة، وغياب الصيانة.

وفي اكتوبر/تشرين الاول 2006 قتل سبعة افراد في مدينة المنصورة في شمال مصر عندما انهارت بناية من 4 طوابق كانوا يعيشون فيها.

MA-F,C