رابطة عشاق مصر (أليكس لوفر)

[amrhoras]

صباح الخير الى كل المصريين

بيقولوا ان النهارده الكريسماس

قولت اما البس الشراب الصوف واحط الطقيه والكوفيه وانام يمكن بابا نويل يجبلى حاجه عقبال التلج ماينزل بره

صحيت الصبح لقيت التلج موجود لكن مش ابيض اصفر وطبعا بابا نويل اته فى العنوان اظاهر كدى او الجمال اللى بيسوقوا الزلاجه (كل واحد حسب طبية المكان)البوصلة بتعتها خانتها ونسيتني اظاهر كدى

اليكم السؤال الصعب ده بما اننا كنا اطفال

اذكر/ى اقيم هدايا بابا نويل وتحتفظ بها الى الان

انا كل اللعب طبعا كسرتها ومعنديش اى هدايا الصراحه بس احب اسمع اراء الساده القارئين

*********

سمعت الندا جيت ولبيت يا اليكس اهوه معندكمش حجه ود/شامى موجود بيقيت الربطه اظاهر وقعت فى المظاهره بس هنلاقيهم انشا الله

ا/مسالم اين انت . واحمد عرب . مونتى . مدام ناش . موجلى معندتش بشوفه خالص . انتو فين نداء عاجل

صباحكم الخير ( حلو النظام الجديد ده )

[امانى]

HAPPY BIRTHDAY AMANI

الاخ الفاضل الشامى

الف شكر لتهنئتك لى بعيد ميلادى وكل سنة وحضرتك طيب بمناسبة قرب حلول العام الجديد داعية الله

تحقيق كل امنياتك فيه

امانى

[ELSHAMY]

صباح الفل يا ألكس و يا عمرو

احنا يا أخوانى لازم نقر بأن السادة أعضاء الرابطة باين عليهم انقرضوا ويبقى علينا مهمة قومية وهى الصمود والتحدى لأن (ربطتنا هتتقدم بينا).

صباح الصباح مع السلامو عليكو

[امانى]

صباح الفل على الاخوة والاخوات

انا جيت اهو البى النداء رغم انك مندهتش عليا يا عمرو بس جيت

وانت طيبة يا اليكس والله انا ما حسيت بعيدميلادى السنة دى ولا احتفلت بيه الا عن طريقكم بسبب انهيار عمارة لوران

والضحايا المساكين وزويهم فى هذه الايام الفضيلة انا لله وانا اليه راجعون

بالنسبة للعب يا عمرو كلها راحت فى خبركان الا عروسة واحدة كبيرة اشتراها ابى لى من القاهرة فى احدى زيارته لصديق له

بالقاهرة وهى ما ذالت على قيد الحياة بس عند والدتى فوق دولاب الفضيات زى ما بيقولو عليه زمان وما ذالت محتفظة به

بمناسبة ابن اختك يا استاذ شامى حصلت نفس الواقعة تقريبا لابنى وهو فى سن الثالثة

اخذه زوجى معه فى صلاة الجمعة وهو كان حافظ اسماء الله الحسنى كلها قعد بجواره ولما قام الخطيب علشان خطبة الجمعة

قام ابنى من جوار ابيه وجرى من بين صفوف المصلين الى الخطيب ومسك الميكرفون وقعد يقول اسماء الله الحسنى

واحد من المصلين حب يأخذ الميكرفون من ايد ابنى لكن الخطيب رفض الى ان اكمل ابنى الاسماء كلها بعد ذلك قبله الخطيب

وقال له احسنت اجلس بجوارى وخطب الخطيب خطبته وبعد الصلاه شاله واعطى له عشرة جنيهات هديه لحفظه اسماء الله

الحسنى طبعا ابوه فى الاول كان فى غايه الحرج بس بعد كدة بقى مبسوط جدا به

الولد بعدها قعد فترة عايز يروح المسجد كل جمعة طبعا انتم عارفين ليه؟ من اجل العشرة جنيهات لكن والده قاله توبه

صباحكم فل وورد ولكم منى دول

[amrhoras]

مدام امانى اعتذر منك لانى ذاكرتى فيها زهايمر بس همسة عتاب بقى

قولت يواد ياعمرو هتتصل متصلتش!

هتبعت مش بعتتي

قولت اكيد اكيد مشغوله فى الهدايا ونسيت تبعتلى النص طب خارطة جاتوهايه

بصراحه الاسم سقط سهوا بس انتى الغلطانه طبعا هتسأليني ليه ؟

اقولك انا ليه . لانك صرفتلك 4 حتت لحمه حافز عشان انتظام الحضور بس للأسف بتيجي كل فين وفين .فانتى لازم تجددى العضويه وتعملى طبعا بطاقة عضويه جديده.

واترك اليكي المايكرفون كى تلقى الينا بفكره جديده من افكار امانى الزكيه

*********

نداء الى جميع اعضاء الرابطة انتوا ليه توقفتوا عن الكتابه؟ او لم تطرحوا بافكار جديده كدا لييييه؟

[Alex Lover]

ساناااااااااضل سانااااااااااضل لاخر نفس

حتى لو مفيش في الرابطة غيري :sad: ساكتب واكتب حتى يزرف القب دما والدموع تنهااااااااااار كاطول الانهاااااااااااار

مسالم / احمد عرب / نااااش / مونتي / موجلي / قاخري / سكندريه / محسن سمك / سالم حجازي / داركر / انتو فيييييييييييييين

وكل من لم تسعفني ذاكرتي انت فين

وكل واحد بيحب مصر فييييييييييين

عموما انا هاتواصل معاكم وسانااااااااااااضل واناااااااااااضل

[Alex Lover]

هدايا الكريسماس لا لا لا لا

لم نكن نحتفل بالكريسماس في بيتنا

في مدرستي لانها كانت مدرسة اجنبيه كان يوم الكريسماس الداده تلبس لبس بابا نويل وتيجي الفصول توزع شوكولا وحلويات وطبعا كانت تتاكل في ساعتها .. هتقولولي عرفتي منين انها الداده .. اقولكم

دخلت الحمام مره لقيتها واقفه بتلبس الهدوم بتاعه بابا نويل وطللبت مني اساعدها ومقولش لحد انها هي وطبعا انا مقولتش لحد لغاية دلوقتي ولا حاقول

كانت كل مدرسة فصل بتشتري شجرة كريسماس للفصل والاولاد كل واحد يشتري حاجه تتعلق في الشجرة وكنت انا غاويه اشتري الكور الملونه وكلنا نشترك في تزيين الشجرة

كانت ايام جميله

[amrhoras]

جمال عبد الناصر ياخواتى

حلو اوى الدور الشعبي ده . مش عارف لازم اخد من كل واحد كلمه احط عليها فكره (الصراحه بستغلكم) هههههه

وبما انكم اكبر منى بقرون عده

عاوز اعرف بقى زمن المظاهرات انتو كنتوا فين بقى بما انى اكتر مظاهره شفتها كانت فى الجامعه لما كنت عابر سبيل علشان اسلم على اصدقاء الدراسه واخر اخبار الكليه والامتحانات

المهم انا عمرى ماشاركت فى مظاهره ولا اعترفت بيها بس مظاهرات زامن لها طابع خاص زى

الاستقلال التام او الموت الزوؤام طاخ طيخ طوخ وصلاح قبيل يتقتل وامينه وسي السيد كانو فى السبوع بتاع خديجه ماعلينا مش هحكى الفيلم بس عاوز اعرف انتو كنتوا فين ايام المظاهرات بتاعة عبد الناصر والسادات ان كان اب او جد او اخ او اخت او ام شاركوا فى نشاط وطنى

حرب - مظاهره - حركه فى الجامعه - انشا الله نشاط فنى فى المدرسه بس اى حاجه

[ELSHAMY]

أخى عمرو

مظاهرات ايه يا بنى انت فاكرنا من أيام هوجة عرابى ولا أيه......احنا نفرق عنك شهور بسيطة....بس احنا أجدع منك وأخدنا قرار الزواج بدرى شوية (أموت و أعرف مين اللى زقنى )..... والعيال والحاجات دى كلها من توابع الزواج و ما حدش مننا حس بيهم ..... ومش عارف جم امتى......حتى أسال مدام أليكس

كل اللى انا فاكره ايام انتفاضة سنة 78 اللى سماها السادات انتفاضة الحرامية كنت طفل صغير بابص من شباك الحمام على ناس كتير بتزعق مش عارف ليه

قال مظاهرات قال

[Alex Lover]

مظاهرات ايه يا عمرو انت بتكلم صفيه زغلول

انت اللي شكلك هتتعمل عليك مظاهره لطردك من الرابطه

انا محضرتش اللام ده انا مواليد 74

يوم ما اكان الشامي بيبص من شباك الحمام كان عندي 4 سنين

قال مظاهرات قال

[mogly]

السلام عليكــم ورحمـة الله وبركاتــة ،،

أزيكم يا جماعة ، أرجو ان تكونوا قضيتم عيد سعيد و محترم

أنا بس كنت مشغول حبتييييين الفترة الماضية

أيوه أنا كنت على الكوبرى يا عمرو لما فتحوه الإنجليزضربوا علينا النار و جت لى رصاصة و مت ....... بتسأل ليه فيه حاجة؟

موضوع العمارة بتاعة أسكندرية ده ضايقنى جدا و الله ..... حسبنا الله و نعم الوكيل

أراكم قريبا بإذن الله

[ahmedarab]

والله يا جماعة انا اسف جدا على الغياب الطويل دة

وشكرا لكل اللى سال عليا واللى مش سال برضة

يا اليكس يا عمووور انا لسة عايش اهوة وجيت

بس بصراحة كانت ولا زالت حالتى النفسية مش تمام

واول ما العملية بدات تتعدل شوية ....جية موضوع عمارة الاسكندرية دة اثر فيا قــــــــــــــــــــــوى

ربنا يرحمهم ويغفر لهم ويرحم امواتنا جميعا ...ويرحمنا احنا كمان ......

قولوا امين

[Alex Lover]

موجلي على طول مشغووووووووووول

ومع ذلك سلامات سا موجلي حمد الله على السلامة بس احنا طماعين وعايزينك تدخل تشارك بذكرياتك الحلوة

احمد عرب شكرا على مرورك وربنا يفرج همك وهمنا جميعا يارب

عمرو شكله زعل ولا ايه يا عمرو روحت فين انا باهزر والله والحقيقة ان انا ابنه عم صفيه زغلول

[nash]

والله أنا متابعه معاكم بس مودي مش مظبوط خالص....

إن شاء الله أرجع تاني وأشارك ...

كل سنه وأنتم طيبين :roseop:

[amrhoras]

واضح اننا كلنا اصبح فينا شرخ

بصراحه انا نفسي بحاول اطلع من المود ده اينعم افكارى جهنميه وملهاش لزمه بس بجد حسيت بشرخ كبير اوى

انا مش عاوز اتكلم فى الموضوع بس اعملوا اى حاجه وعوزين دكتور نفسانى للمحاورات .

ارجوكم حد بقى ياخد المايك مني اليومين دول وعاوز دعوات من ابناء الرابطه

على فكره انا كنت اعرف مرضعه حتشبسوت انما مش عاوز اقولكم السن الحقيقي لاحسن تخافوا منى كان نفسي تشووفوا الهكسوس وعمنا الكبير اسكندر الاكبر واخوه تحتمس

******

اليكس انا مزعلتش اصلى اقولكم على سر بس اوعوا حد يفتن بما انى قررت ادلع نفسي رحت جبت تلفزيون قولت مش بدها بقى فيقعد فى الراحه اتفرج على الام بي سي اكشن لذلك متأثر جدا ونفسي اقلدهم فى عمنا الكبير طبعا هتقولوا مين هقولكم معرفش عشان الرقابه

بدأت دوام اهوه ومنتظركم على البريد .

شكرا لرجعوكم تانى . وانا قولتها هناك وهقولها تانى احنا مبنخدش عزاء دلوقتى لان الحكاية كبرت بقت عمله زى المسلسل الماسخ واحنا بنتفرج وسكتين ,كل واحد بيقولى تصريحات وفاهم اننا فاهمين وعارفين اننا بنغلى ودمنا فاير بس بيضحكوا على نفسهم

مش موضوعنا خلونا نضحك على نفسنا يمكن ننسى

[salemhegazy]

احنا هنا يا جماعة هنا اهه يا اليكس ما دمتى ناديتى علينا بالغالية مصر و قلت يا محبيين مصر لازم نلبى النداء

و ما نقدر على دموع اكثر من كدة منك كفايه الدمعه الحائرة فى عينيك ( نفسى الاقى لها حل و امسحها ) موش عارف ليه كل ما اشوفها تحضر فى اذنى اغنية الست اراك عصى الدمع شيمتك الصبر

كان فيه زمان اغنية يحفظها لنا مدرس الموسيقى فى مدرسة السعيدية اغنية و طنية بتقول

يا بلادى لك عندى ما افتديت من دماء او شباب ما اردت

يا بلادى هذة روحى فداك لست انسى ان روحى من نداك

و ذكرنى موقف القائدة اليكس بقول ابو القاسم الشابى

ساظل رغم الداء و الاعداء كالنسر فوق القمة الشماء

و لكن لى عليكم عتاب يا اهل الرابطة و يمكن هو ده اللى عمل نوع من الفتور ايه هو ؟؟

[ahmedarab]

قول يا عم سالم انا معاك

اية هو السبب يا ترى فى الفتور دة ؟؟؟؟

اللهم اجعلة خير

اهلا بيك وتحياتى

[salemhegazy]

ايوة يا اخى احمد الشباب سيبين الحاضر و هربانين للعيش فى ذكريات الماضى ايه اللى حصل لكم يا جماعه فين الامل و التطلع لبكرة و العزيمة انه يكون احلى من النهاردة و فين ارادة تغيير الواقع بدل الهروب منه فين الامل فين احلام المستقبل

موش ملاحظين كدة و لا ايييييييه؟؟؟

كلكم فى مقتبل العمر و اولادكم صغيرين لما انتم فقدين الامل فى بكرة كده اولادكم يعملوا ايه

و كما يقول اهل الاختصاص لكى تضمن مستقبل جيد حاول تعيش يومك بصورة جيدة و بلاش الهروب الى الماضى و ذكرياته

موش كده و لا اييييييييييييييييييييييييييييييييييييييييييييييييييييييه؟

[amrhoras]

حمد الله على سلامتك يا أ/سالم

بس اسمحلى اسجل اختلافى فى وجهات النظر .

عارف بنهرب ليه للماضى لانه اجمل من حاضرنا ومستقبلنا .اكيد انت اكبر منى وتقدر تعرف زمان اجمل من دلوقتى فى كل حاجه .

هاتلى سبب واحد يجعلك متفائل ......!

بالنسبه لللشباب فأقولك الشباب اصبحوا عجائز لانهم عرفوا يدمرونا عرفوا يكتمونا عرفوا يهلكونا دون ادنى مقابل

الاحلام طارت ........ مش عاوز اتكلم اسف بس كنت عاوز اقول الكلمه دى وخلاص

واسف مره اخرى للاكتئاب المفاجىء ده

سلام

[salemhegazy]

الاخ العزيز عمر كله الا انت يا أخى لقد كنا نشعر بك شعلة متقدة شعلة نشاط

هل معنى ذلك انن نستسلم لهم و لما يريدون ان يوصلونا اليه ؟؟ لا و الف لا الماضى خلاص راح بحلوة و مره و خلينا فى اللى جاى و دى فرصة مع بداية السنه الجديدة كل واحد يمسك و رقة و قلم و يجلس جنب زوجته على السرير تحت البطانيه فى الدفء ( الجو بارد صحيح اليومين دول ) المهم ورقة و قلم و مرايه و خلو بالكم معاى

و رقة و قلم و يكتب كدة اناا عايز احقق ايه السنه الجاية انشاء الله ؟ و ايه اللى ححقته هذا العام ؟ و اللى ما حققتوش ايه سبب عدم تحقيقه؟

و قسم اهدافك يا أخىى خليها هدف على المدى الطويل و هدف مرحلى يعنى مثلا فى خلال السنه عايز احوش الف جنيه يبقى المفروض كل شهر احوش كام و اقسم الهدف الى اهداف مرحلية و اعمل على تحقيقها