رابطة عشاق مصر (أليكس لوفر)

[salemhegazy]

و يا أ خى ان كنا يأسنا من المجتمع الكبير خلينا فى المجتمع الصغير كل و احد فى محيطه ابدأ انظر فى الاقربين هل يوجد من يحتاج مساعدة فى مجال معين تعينه؟ موش لازم كل حاجه الفلوس

هل ممكن تبدأ مع احدهم مشروع صغير تتعاونوا سويا ؟

السيدات السيدات هل هناك من فتاه مقبلة على الزواج تقدرى تساعديها و لو بالنصيحة ؟

و هل و هل و هل كل واحد يبدأ بمجتمعه الاصغر و هكذا و منكان فى حاجة اخيه كان الله فى حاجته

ياللا يا شباب كل واحد و واحدة يجيب و رقه و قلم و مرايه و يعمل قائمة الاولويات هايييييهههههههههه شدى حيلك يا بلد

[salemhegazy]

اصحوا يا قوممممممممممممممممممممم

فين الزعيم ؟ قصدى الزعيمة ؟؟؟؟

[ahmedarab]

صباح الخير والفل والياسمين

انا جيت اهوة ومش اتاخرت الساعة لسة مجتش 9 ونص عندنا .

يبقى مفيش عندى تاخير النهاردة

صباحكم جميل يا مصريين

[amrhoras]

صباح الخير يامصريين

أ/سالم ماسك الاذاعه الربطاويه اليوم وانا بقول مين اللى فاتح المحل بدرى

اعتذر انى كنت مكتأب شويتين الامس . وانت معاك حق فى كل كلمه . بس برده الماضي جميل جدا كلنا شيفينه كدى مش معناه اننا نتوقف عنده المعنى اننا نحاول نحييه ديما فى ذاكرتنا

واشكرك بجد بشده على كلماتك ربنا يسلمك من كل شر وكل سوء ودمتم فى رعاية الله وتكون ديما فى احسن صحه واحسن حال انشا الله

**************

اهدافى بقى والورقه والقلم والعام المقبل

1-الرحيل الى قاهرة المعز

2-كورسات طبعا مكثفه

3-البحث مره اخرى عن الحياه

تحياتى اليكم جميعا

[salemhegazy]

كل التوفيق و دعاء الى الله بتحقيق اهدافك انشاء الله

من فات قديمه تاه و من توقف عنده ضاع

[Alex Lover]

عارفين احنا اكتأبنا ليه

بسبب موضوع انهيار عمارة لوران

لاننا وفي موضوعنا ده بالذات مركزين كل التركيز على جمال الاسكندرية ... وتراثها وروعتها

وفي وسط جهودما لأثبات ان مصر وبالتحديد محافظة الاسكندرية هي الملجأ الآمن لنا

طلع لنا خبر انهيار عماره بسبب ((الاهمااااااااااااااااال )) وموتى من اهل بلدنا .. كانت مكن انفاسهم تكون موجوده لما نرجع مصر

كان ممكن واحد من دول يقابلك صدفه ويشيل معاك شنطك لو صادفك في الشارع

كككان ممكن طفل من اللي ماتو دول يكون قدامك في نادي وتلاعبه وتبوسه وتساله اسمك ايه

اختنقوا جميعا وماتوا وكان عنهم الأمل في بكره

تخيلت .. قبل انهيار العقار بساعه ياترى كانو بيفكروا في ايه

الطفل ده كان بيطلب من امه انها تجيبله اللعبه اللي وعده بيها

وده كان بيوعد زوجته واولاده بخروجه حلوة اخر الاسبوع

ودول معزومين يوم راس السنه وبيفكروا يلبسوا ايه

وده رايح لخطيبته وكله امل بتحديد موعد الزواج

وده ودي ودووووول كلهم امل وفجأه انهار عليهم سقف الموت المحتم

والسبب مين

الاهمااااااااااال .. الاهماااااااااال يا شعب

بنحب الاسكندرية ولكن وبعدين ... هنفضل سبينها تتبهدل كده في ايد من لا يتحمل المسئوليه

=======================================================

عرفتوا ايه اللي احنا فيه .. عرفتوا ايه اللي حصل واصابنا بالكآبه

كلنا مش في المود ومش حاسين ايه السبب الحقيقي

هو ده السبب يا شباب هو ده السبب

=======================================================

[ELSHAMY]

صباح الخير جميعا

عندك حق يا ألكس.....هو الأهمال...بس ما تنسيش ان ده أصبح (طوعا أو كرها) صفة عند ناس كتير.... ونجح المسئولين فى جعله طبع غالب عند شريحة كبيرة من الناس نظرا لغياب القدوة اللى بتخاف ربنا..

ما تنسيش كمان ان دى ناس مقهورة....ما عندهمش البديل...

كمان فكرى على الجانب الأخر لو ان واحد من سكان العمارة كان قريبك...أو قريبى....أو حتى احنا شخصيا...كان ايه البديل عنده...حتى وهو يعلم ان العمارة قابلة للسقوط.....حيقول ..(العمر واحد والرب واحد)....(لو كانت عايزة تقع كانت وقعت من 25 سنة)

الله يرحمهم جميعا...ويرحمنا معاهم

واللى شاغلنى فعلا هو ماذا كان يفعل كل واحد ساعة الوفاة....المصيبة حيقابل ربنا ازاى؟ ...الله يحسن ختامنا جميعا

[ELSHAMY]

احبائى جميعا

جاءنى حاطر غريب بمناسبة موضوع العمارة.....و حسن....أو سوء الخاتمة...حد أخد باله ان الرسول (ص) كان دائم التنبيه على المسلمين على الدعاء بحسن الخاتمة (اللهم اجعل خير اعمالنا خواتيمها)....(اختم لنا بخاتمة السعادة أجمعين)...(ان أحدكم ليعمل بعمل أهل النار حتى ما يكون بينه وبينها الا ذراعا فيعمل بعمل أهل الجنة فيدخلها وان أحدكم ليعمل بعمل أهل الجنة حتى ما يكون بينه وبينها الا ذراعا فيعمل بعمل أهل النار فيدخلها).....أو كما قال

وكلنا يعلم و الرسول (ص) أولنا أن لا أحد يعلم أبدا متى تكون لحظة وفاته..... وبالتالى فمنطق الأشياء يقول ان الواحد لازم يمشى عدل على طول الخط....ما حدش عارف يمكن تقع عليه بلكونة ...أو عمارة من أياهم وهو رايح يعمل معصية....أو قاعد يبحلق فى شاشة الكمبيوتر فى صور مش ولا بد....أو يكون عاق لوالديه....أو قاطع رحم....أو.......أو ظالم لشخص أخر...أو غير مواظب على صلاته...و كل واحد أدرى باللى هو فيه....

ملحوظة: (هذا الكلام موجه لى شخصيا قبل أى حد تانى)

[Alex Lover]

بالفعل من هنا نوجه نداء بضرورة اتباع الحق والضمير مع كل تصرف

انا اسمع اذاعة القرآن الكريم صباحا في السيارة طول الطريق ومطمئنه لذلك

لكن احيانا افكر اسمع بعض الاغاني واشغل الكاسيت وافكر لو حدث لا قدر الله حاجه وانا سايقه هيكون هو ده السبب ويفضل ضميري يأنبني

اللهم اجعل خير اعمالنا خواتيمها

اللهم اجعل خير اعمالنا خواتيمها

اللهم اجعل خير اعمالنا خواتيمها

[amrhoras]

تخيلوا المخالفات المبانى فى اسكندريه بس كام؟؟؟

رقم بجد خيالى مابالكم مصر كلها كام؟ الرقم 50000 مخالفة ازاله!!!!!!! 50000 يبت بيضم كام لو قولنا البيت او العماره متوسط وجود 10 اشخاص يعنى 500000

حتى لو فى كل منزل شخص واحد يعنى 50000شخص حياته فى خطر طيب وانتوا يامسؤولين ساكتين ليه! بتاخدوا رواتبكم ليه؟

ليه تعريف الفلوس اللى تخلى النفوس كدى؟ مش هى برده ورقه ! مجرد ورقه عاوز تشترى عربيه مجرد حديد خرده! عاوز تشترى فيللا شوية تراب! وتفرشها بحبة كماليات وديكورات مجرد خشب !! طيب كل ده ممكن فى ثوانى وبحبة ورق تانيين نجيبهم انما الروح والدم واللحم يتعوضوا ازاى قولولى حد يفهمنى .

ده لو كلب بنزعل عليه انما دول بنى آدمين بني آدمين يعنى حياه

خفت اوى على يارا طفله ملهاش ذنب فى اى حاجه شيفه الدنيا ضحكة وابتسامه عالمها لعبه وشكولاته افكارها حب بابا وماما احتياجتها المم وامبو البراءه دى كلها ازاى تهون على حيوانات واقفه على قائمين بيسموا بشر كل همهم الفلوس والسلطه وهى فعلا سلطه بس خضار وطماطم

لما يقابلوا رب كريم هيقولو ايه او السطله هتعملهم ايه ؟؟؟

هل هيلاقوا حد يدخلهم الجنه مبارك لما يموت ماكلنا هنموت هيقول انا الرئيس ولا العبد ؟

كلهم نسيوا ربنا واحنا نسينا ربنا برده لان ربنا رب العباد مبيرضاش بالظلم فى حين احنا رضينا بيه يبقى يا بنى آدمين هتعملوا ايه اذا كنا بنخالف رضا خالقنا!

انا مش هسكتولا هقعد فى البيت الطم واقول حسبي الله ونعم الوكيل يمكن لو رجعت هنتظر الفرصه واقول لا انما هل هقولها انا لوحدى !

احنا عوزين الم منفعش كل البهدله دى يبقى عوزين ايه تانى ؟

مش عارف انا كلى غضب ومش طايق حتى هدومى ولا طايق بشر ايه الحل اعمل ايه او هنعمل ايه؟

شكرا

[Alex Lover]

يا عمرو ... انا نفسي اصرخ ذيك واقول لأ

بس فيه غيرنا قالوا كفايه وبرضه صوتهم محبوس

[ELSHAMY]

اتفق معاكم.... وأعتقد ان كتير منا ينطبق عليه الحديث الشريف (.....فان لم يستطع فبقلبه وذلك أضعف الأيمان)...

التغيير ممكن يبدأ من كل واحد فينا على قد مسئولياته حتى لو كانت فى نظره أشياء تافهة....أذا قدر عليها حيكون على غيرها أقدر....ما تقولش أنا حأغير الكون...بس ما تنساش انك حتتسأل أمام ربك لوحدك....(ان الله لا يغير ما بقوم حتى يغيروا ما بأنفسهم)

وهناك مقولة بتعجبنى جدا لأحد الصالحين : (ان الرجل الواحد باستطاعته أن يحى أمة.....ان صحت رجولته)

ربنا يبعث لنا على رأس العام من المخلصين من يجمع حوله شمل المصلحين ...وساعتها يخرج المارد المصرى من غفوته... وحتشوفه منه العجب

[amrhoras]

ياترى لو حد جه هيصلح!

لا اعتقد مدامت مفيش رقابة شعبيه مثلا صوتنا بيوصل عن طريق مجلس الامه مصطبه وبيقعد فيها كبارات البلد اللى احنا معيننهم وواحد نجار يقعد يدق بالشاكوش وف الاخر موافقه حتى ده انا لا اثق فيه

الثقة منعدمه فى اى مسؤول حالى

عارفين احنا عيبنا ايه؟ اننا لما بنيجي نحط مسؤول على كرسي معين بنشيل اللى قبله ونحط اللى بعده بما انه كبير القعده ولا اهتمام بالكفاءه اهم حاجه السن !!وطبع سيادة المرشح الجديد بيكون شرب الصنعه من اللى قبله ان مكنش بيقاسمه فى الاتاوات والغنايم!

شوفوا بقى هل هنقدر نقلب الهرم . عوزين معجزه طبعا

[Alex Lover]

عوده لذكريات الاسكندرية علشان البلد نفسها ملهاش ذنب في اللي بيعملوه حكامها

امبارح اشترينا فيلم عجميستا .. وانا شارياه مخصوص لاني عشت في العجمي 14 سنه كانوا من اجمل سنين عمري ... وكنت ساكنه في البيطاش

وكانت المفاجأه الحلوة ان التصوير كان في الجزارة اللي جنب بيتي مباشرة

وطول الفيلم وانا استرجع الذكريات الجميله .. ايام الشتا وايام الصيف والمشاعر الجميله ولون البحر ونعومة الرمل واصحاب والتمشية بالليل بعد العشا مع اخواتي والشوارع واللون الازرق للسما والناس اللي بتمثل موفق جدا المخرج في اختيارهم وبغض النظر عن ذكرياتي الرائعة في العجمي

كنت باقول لجوزي بالليل عايزه انط جوا الشاشه امشي في شوارع البيطاش

ادخل زهران واروح كافيتريا ليايلنا

اخبط على ابواب صحباتي بتوع المدرسه ياترى هيكونو موجودين .. طبعا لا كل واحده هتكون في بيتها بيت جوزها يعني

عايزه امشي على البحر مع اختي الحبيبة كنا حاسين ان الشاطئ بتاعنا ملكنا احنا بس بعد ما الصيف يخلص نروح نستلمه من المصيفين ونطبطب عليه

عايزه اروح اشتري ذره مشوي وغزل البنات

عايزة اروح اشتري مع اخويا سندوتش مؤمن .. (ياما نفعناه مؤمن ده )

كانت ايام بجد جميله

وفيلم رجعني بصورة حيه لمكان عشت فيه اجمل ايام عمري

[amrhoras]

عايزة اروح اشتري مع اخويا سندوتش مؤمن .. (ياما نفعناه مؤمن ده )

وانا عمال اسال نفسي مؤمن جاب منين الثروه دى كلها وفتح عندنا فرع ماشا الله :blink:

رجعت بذاكرتى الى العام الماضى لما كنت ارجع من الشغل الساعة 4 الفجر من الشغل ويكون الناس البسيطة لسه بتصحى والجرايد بتتوزع مكنتش احب اخد تاكسي مع انى بكون هلكان بالعكس كنت اتمشي مع صديقى الصدوق عمرو لاننا بنشتغل فى شركة واحده نتمشي فى عز يناير والتلج بس دفء الكلام مغطينا

واحنا ماشين على الكورنيس نتكلم ونتكلم ونتكلم وبعدين اروح اوصله يرجع يقولى طب انت هترجع كل ده لوحدك لا هاجي اوصلك ونرجع تانى ونقعد نمشي فى حلقات رايح جاى علشان نحب نتكلم كتييير اوى مع بعض

بس نيجي عند نقطه وننفصل عن بعض كل واحد يمشي مشوار مع نفسه كل واحد يبحر فى ذكرياته تانى

اقعد اتمشي والاقى فرن مخبوزات جميله اشترى اى حاجه لان طبعا مفيش محلات اكل او انى اروح اطبخ فى البيت خصوصا وانا عايش هوم الون

واسمع زقزة العصافير واطلع الشقه اقف فى البلكونه ساعة لما انهار يشقشق ودقات السادسة نشرة الاخبار اذاعة القاهره

بعدها برنامج على اذاعة القرآن الكريم الساعة 6:50ص بريد الاسلام كان اغلب الايام يجي الشيخ عطيه صقر

واروووح فى نوم عميق الى العاشره ابدأ افوق علشان اروح الشغل تانى

ايوووه ياعمرو خلصت يله يابني انت بتعمل ايه كل ده

وانزل استناه تيجي نتمشي وطبعا ماشيين :wub: مكببببرين ايه يابني الناس دى كنت ساعات اعدى ع والدتى وغالبا يكون اخر الشهر انتو طبعا عارفين ليه

اسلم ع كل زمايلها صباح الخير يادكتور فولان ازيك يا ا/علان ازيك ياطنط كذا ماما اخيرا اهيه ف المكتب الحمد لله

فطرت ياعمرو مانتى عارفه ابنك اندهى ع ام سعيد بس تعملى كباية شاى

يجي عم عمرو يتصل انت فين

ايوه يابني انا هقابلك ع الباب ونمشي نروح الشركه مع بعض

مش عارف ليه انا افتكرت الحاجات دى

بس ايام متتعوضش

شكرا

[amrhoras]

مش عارف اجيب ازاى اليوتوب هنا بس

اللينك كله اهوه حسيت انى عاوز اسمع الاغنيه دى ونرجع تانى للذكريات من جديد بعد غياب سنين قصدى يومين :closedeyes:

http://www.youtube.com/watch?v=nZJrdf0uMyE

غمضوا عنيكوا وانتوا تشعروا بيها وكل واحد يرجع الى الخلف والذكريات الحلوه ودفء الوطن وجمال التواجد وسط الاهل والاصحاب

تحياتى

تم تعديل 29 ديسمبر 2007 بواسطة amrhoras

[عم الطيب]

اسكندرية ياجدع ناس من سيدي بشر لابو العباس . ايوه ياعالم عالمنظر

طبعا اتمني ارجع اعيش في اسكندرية امبارح قبل النهاردة

[amrhoras]

صباح الخير على كل المصريين..............

حلقة الوصل الجميله دى لازم نهتم بيها شويه حتى لو فتحنا لها جزء تانى وتالت ورابع انما لايمكن ان تتوقف ....!

اجد ان الغالبية قد تفرقوا .... وانا ارى اننا مهما بعدنا هنقرب ونرجع تانى ..

لذا استدعاء الى كل محبي بلدى .... الى كل من شرب من نهرنا الغالى ..... الى كل من يعشق تراب بلده حتى ولو جارت عليه الظروف

شكرا

[ahmedarab]

انا سمعت النداء ...قومت جيت جرىى

مقدرش اتاخر عن حبتيبى ابدا

وخصوصا لما يكون فيها كلمة السر ....مصــــــــــر

انا معاك يا عموور فعلا الموضوع مش ممكن يتقفل ابدا

وانا بدعوا معاك كل اللى كانوا معانا ...ا/ مسالم - سالم حجازى - الشامى - موجلى - و طبعا صاحبتة البيت اليكس وكل اللى شاركوا ....يا جماعة مش عايزين الموضوع دة يتنسى ويتقفل

ارجعوا يا حبايب مصر ...لتكلموا عن حلاوة مصر

تحياتى وصباح الفل للجميع

تم تعديل 30 ديسمبر 2007 بواسطة ahmedarab

[Alex Lover]

عم الطيب اهلا بيك معانا وهتافك الجميل اشجانا

عمرو الرابط مش عايز يفتح معايا ... هاجربه من البيت عايزه اسمع الأغنيه

احمد احنا موجودين ونتمنى الاعضاء كلهم يكونوا موجودين معانا

وعيزاكم كلكم تقولولي رايكم في الموضوع ده

خلال تصفحي لجريدة الوطن الكويتية لفت نظري صفحة كامله للحديث عن الاسكندرية عروس البحر الابيض المتوسط .. بحلوها ومرها وحلوها اكتر طبعا

المهم ان فيه عنوان فرعي بيقول ان اهل الاسكندريه مفتقدين محافظها عبد السلام المحجوب . الذي احبوه جدا ، بالصدفة البحته كنت اتحدث مع زوجي بالامس ان مرة ركبت تاكسي في الاسكندرية وسواق التاكس قعد يحكيلي عن ان المحجوب ركب معاه واتكلم معاه وعرف اللي عايز يعرفه وماكتشفش انه المحافظ الا بعد ما نزل من التاكسي

النهاردة بالصدفة البحته ان كاتب الموضوع في الجريدة عرف مدى حب الشعب السكندري للمحجوب برضه من سواق تاكسي

اكيد ما هما دول اللي بيقضوا اطول وقت وسط الناس بالشوارع وبيحتكوا بكل الطبقات الغني والفقير والطالب والموظف وكل كل حد

عجبني كلام صاحبنا بتاع جريدة الوطن .. ورجعت بذكرياتي لايام عبد السلام المحجوب .. واد ايه بالفعل البلد نظفت اوي وقتها ونورت واخدت جائزة عالمية .. والشغل كان سريع وقلت ياترى لو كان هو المحافظ كان حصل اللي حصل في لوران ولا غربال ولا ولا ولا ... انتو عارفين انه كان بينزل بنفسه بدون حراسه بملابس عارديه يمشي في الشوارع يحتك بالناس يتكلم ويشوف الحقيقة على اصلها من غير ما الناس تعرفه ولو حد عرفه يقعد يضحك ويقوله متقولش لحد .. كان واخد الموضوع جد ... ودي غلطته اللي اتحاسب عليها ...

اقسم بالله تعالى اني وانا ارايحه الكليه مره لقيت شوارع الكورنيش بتتغسل الصابون والله العظيم فيه اكتر من كده ...

بجد المفروض الشعب السكندري يقوم بثوره علشان يرجع لها المحجوب .. بس رايكم لو ده حصل ورجع هل هيرجع زي ما كان ولا هيكون اتعلم من الدرس وحرم اصلاحات

وحشتني بلدي وحشتني جدا

وحشتني ايام المحجوب

تم تعديل 30 ديسمبر 2007 بواسطة Alex Lover