رابطة عشاق مصر (أليكس لوفر)

[Alex Lover]

السلام عليكم ورحمة الله وبركاته

في لحظة اشتياق عظيمة لمصر

وشوق لنسيم البحر في الاسكندرية .. في هذه الايام الممطره

على كورنيش البحر والامطار تعانق الامواج

وجاكت صوف تقيل مدفيني وايدي متلجه وبانفخ فيها علشان تدفى

وحشتني اسكندرية

وحشتني مصر

وحشتني الرابطة بتاعتنا واهلها

قلت خليني اجي اشوف مين هيرحب ويشارك تاني

هل من مرحب

[newcomer]

السلام عليكم ورحمة الله وبركاته

وحشتني اسكندرية

وحشتني مصر

وحشتني الرابطة بتاعتنا واهلها

قلت خليني اجي اشوف مين هيرحب ويشارك تاني

هل من مرحب

مرحبه و خليتنى اعيط بالكلمتين دول!!

[Alex Lover]

مرحبا بيكي انتي

انا مش قصدي تعيطي

[ssmaly]

دى اول مرة اعرف ان رابطة لعشاق اسكندرية

يسعدنى ان انضم الى الرابطة

حينما قرأت اسم السك لفر شممت رائحة البحر

وتذكرت شواطىء اسكندرية

و المشى على الكورنيش فى عز الشتا والهواء يدفعنى دفعا

تذكرت الريتسا و الفريسكا

تذكرت الكولكولو

تذكرت كباين كامب شيزار و الابرهمية

تذكرت طفولتى وصباى

يمر شريط الذكريات فى لخظة

اتذكر اسكندرية بتاعتى

التى لا اراها الان

الأن فى الأجازة ارى بيوتا للاقارب و الانساب

يعنى من باب الى باب

والله فكرتونى بكل شىء جميل

بحبك يا أسكندريتى

[Mohamed Fayek]

رابطة عشاق إسكندرية ... ياسلام إسمحولى أكون ضمن العاشقين

[ELSHAMY]

Sorry I don't have arabic keyboard in Canada

Welcome back Alexanfdria Lover

Nice to be here again.....with agd3 nas

Elshamy from Toronto

[newcomer]

مرحبا بيكي انتي

انا مش قصدي تعيطي

لأ ده عياط حنين و اشتياق

مش بسببك.....و الله

لكن بصراحه بقى ...الصورة اللى الدموع هاتنزل منها مع الكلام

لازم تخلى اى حد يعيط.......يعنى ده سبق اصرار و ترصد

[الجدار]

والله يا أليكس لافر انتي ميه ميه

والله موضوع جميل انا ملاحظ ان معظم اللي بيردوا اسكندرانيه زيي

بجد اسكندريه دي احلى محافظه في مصر (طبعاً في نظري هاهاهاهاهاهاهاها)

بحبها قوي قوي

يعني انا قضيت جيشي في بحري - راس التين كانت اسوأ ايامي بالرغم من كده كل ما اعدي هناك احس بحنيه كبيره للأيام دي

بعشق بحري بكل حته فيها عزه، الشيخ وفيق، جيلاتي مكرم، حسني و و و و و اقول ايه ولا ايه

طيب فاكرين مولد ابو العباس وسيدي جابر يااااااااااااااااااه ولا المنشيه

انا بجد مفتقد كل حته في بلدي

ذكريات جميله

القهوة مع اصحابي اللي بنقول كل يوم نفس الكلام ونفس المواضيع ونبقى مخنوقين من البلد والدنيا ومن نفسنا

يا ريت نرجع تاني زي زمان

التمشيه على الكورنيش والدره والترمس والحلبسه

كوبري استانلي

سبحان الله والله ساعات كتير مكانش يبقى في جيبي جنيه واتفسح احلى فسحه مع صحابي كفايه تقعد ادام البحر وتبص للأفق وتفكر في لاشئ

دلوقتي ...

ولا بلاش

انا برضو قاعد في الكويت واكيد انتي عارفه كمية الأماكن والفسح اللي الواحد ممكن يروحها في الكويت (طبعاً بألس)

الحاجه هنا عامله زي حجر الصوان جامده مالهاش لا طعم ولا ريحة

لا الناس ولا الأماكن

بالإضافه لكده مدى حب العرب للمصريين وده بيزود غربتنا غربه

يا رب ارجعلك يا اسكندريه يا حبيبتي يا كل ما ليا

حضن كبير قوي لمصر واسكندرية واللي عايشين فيها

[Alex Lover]

يا سلاااااااااااام على الحنين اللي طالع منكم

انا سعيده جدا جدا جدا بكل من رحب واضاف مشاعر جديدة الى مشاعرفنا الفياضة الى مصر واسكندرية

بجد ارحب بكل من انضم الينا واتمنى ان الرابطة دي تستمر وتحيي داخل كل مواطن حب وحنين

ssmaly

فكرتني بالكلوكلو اللي مش هتلاقي حد اسكندراني مايعرفهوش :)

دكتور شامي :) حمد الله على السلامة

newcomer ماهو ده لزوم التراجيديا :rolleyes:

الجدار ... انا قضيت ايام حلوة في بحري قليله جدا مع اصحابي قبل ما اتجوز كنت باروح هناك عند محل اسمه ابو شعره في شهر رمضان واركب معاهم الترام الصفرا وكانت ضحكتنا من القلب ، بحري ليها ذكرى في قلوب كل الاسكندرانية

جيو محمود .... اهلا بيك معانا ويارب ترجع مصر وانت في افضل حال

اهلا بيكم جميعا ويارب تستمروا معانا وكل واحد يحكي ذكرى حلوة مرت ليه في مصر :)

[ahmedarab]

أليكس لوفر

حمد لله على السلامة ..وانا اقول الرابطة منورة لية ....

يا ستى رجعين ومرحبين طبعا ...بس والنبي قولى لجماعة الاسكندرية دى ان الرابطة اسمها عشاق مصر ...وانتى اسمك اليكس لوفر ..عشان الكلام يبقى واضح

ولا يعنى الرابطة دى للاسكندرنين بس ؟؟؟

اينعم انا بحب وبعشق اسكندرية ...لكن برضة بحب القاهرة اوىى وبحب كل شبر فى مصر ..ومشتاق اوىىىىىىىىىىىىىىىى لمصر ولكل حاجة وحتة فيها ... مع انى لسة راجع منها من حوالى اسبوعبن ..بس مفيش فايدة ...يلا بقى ربنا يصبرنا لحد ما نرجع ونتجمع هناك بإذن الله

تحياتى ليكى وانا بجد سعيد جدا بعودتك وعودة الربطة بعد ما كلنا فقدنا الحماسة للكتابة فى ظروف انتى عارفها كويس طبعا

[Alex Lover]

اهلا يا احمد اهلا بيك واهلا باعضائنا القدامى والمؤسسين :rolleyes:

يا جماعة الرابطة في حب مصر كلها من شرقها لغربها من فوقها لتحتها مش بس اسكندرية

بس انت حظك كده بقى ان اغلب الاعضاء سكندريين :)

فين عمرو حورس محدش شافه

فين قرنفله وفين اماني واسكندرانية انا منتظراكم جميعا

[ssmaly]

شوية صور لحبيبتى الاسكندرية

http://photos.azyya.com/store/up2/081128225649UaGr.jpg

الصور دى فكرتنى بالايام الحلوة

تم تعديل 1 يناير 2009 بواسطة ssmaly

[Alex Lover]

فعلا الصور جميلة جدا بترجع بينا لايام زمان والشتا والشوارع اللى بتلمع ، جميلة الصور دي اوي اوي

شكرا :blush2:

[ssmaly]

لا شكر على واجب

الشكر للتوبك الممتاز ده

ارجو ان يستمر وبقوة

ويحدث فيه اضافات

يعنى مثلا يكون فيه مثلا باب اخر اخبار اسكندرية

احياء اسكندريه القديمة تاريخها و صورها و ذكريات البعض عنها

المستجدات التى تهمنا مثلا انا عرفت ان طيران الجزيرة من بداية السنة الجديدة دى 2009 حيكون فى مطار برج العرب

شكر لردك الكريم

[ssmaly]

صورتين كدة على الماشى

يارب يعجبكوا

[Alex Lover]

اهو موضوع طيران الجزيره ده خبر مهم جداجداجدا واحلى خبر لأن شقتي انا ببرج العرب

[ssmaly]

للدرجة دى عندك واسطة جامدة

عموما مصائب قوم عند قوم فوائد

والناس الغلابة اللى زى يعملوا ايه ؟ :lol:

طيب معلش الارض كروية و بكرة تلف والطيارة تنزل على سطح بيتى :lol:

برضه انا طيب ومش حأحقد على أحد

واحب اضيف الموقع دة

ده موقع الاسكندرية الرسمى

وفيه ممكن نرسل للمحافظ رسائل :lol: تكون بأسمنا اى باسم الرابطة للصالح العام يمكن يسمعنا وبيطل فتح بطن اسكندرية jdw:: علشان القرش اللى وقع منه ممكن نعوضه عنه

تم تعديل 7 يناير 2009 بواسطة ssmaly

[ssmaly]

دى معلومات اول مرة اعرفها عن جمال عبد الناصر

عبد الناصر اسكندرانى

ولد جمال عبد الناصر في ١٥ يناير ١٩١٨ في ١٨ شارع قنوات في حي باكوس الشعبي بالإسكندرية .

كان جمال عبد الناصر الابن الأكبر لعبد الناصر حسين الذي ولد في عام ١٨٨٨ في قرية بني مر في صعيد مصر في أسره من الفلاحين، ولكنه حصل على قدر من التعليم سمح له بأن يلتحق بوظيفة في مصلحة البريد بالإسكندرية، وكان مرتبه يكفى بصعوبة لسداد ضرورات الحياة .

جمال عبد الناصر فى المرحلة الابتدائية:

التحق جمال عبد الناصر بروضة الأطفال بمحرم بك بالإسكندرية، ثم التحق بالمدرسة الابتدائية بالخطاطبه في عامي ١٩٢٣ ، ١٩٢٤ .

وفى عام ١٩٢٥ دخل جمال مدرسة النحاسين الابتدائية بالجمالية بالقاهرة وأقام عند عمه خليل حسين في حي شعبي .

وبعد أن أتم جمال السنة الثالثة في مدرسة النحاسين بالقاهرة، أرسله والده في صيف ١٩٢٨ عند جده لوالدته فقضى السنة الرابعة الابتدائية في مدرسة العطارين بالإسكندرية .

جمال عبد الناصر فى المرحلة الثانوية:

عبد الناصر اثناء دراسته فى مدرسة حلوان الثانوية

التحق جمال عبد الناصر في عام ١٩٢٩ بالقسم الداخلي في مدرسة حلوان الثانوية وقضى بها عاماً واحداً، ثم نقل في العام التالي – ١٩٣٠ – إلى مدرسة رأس التين الثانوية بالإسكندرية بعد أن انتقل والده إلى العمل بمصلحة البوسطة هناك .

وفى تلك المدرسة تكون وجدان جمال عبد الناصر القومي؛ ففي عام ١٩٣٠ استصدرت وزارة إسماعيل صدقي مرسوماً ملكياً بإلغاء دستور ١٩٢٣ فثارت مظاهرات الطلبة تهتف بسقوط الاستعمار وبعودة الدستور.

ويحكى جمال عبد الناصر عن أول مظاهرة اشترك فيها: "كنت أعبر ميدان المنشية في الإسكندرية حين وجدت اشتباكاً بين مظاهرة لبعض التلاميذ وبين قوات من البوليس، ولم أتردد في تقرير موقفي؛ فلقد انضممت على الفور إلى المتظاهرين، دون أن أعرف أي شئ عن السبب الذي كانوا يتظاهرون من أجله، ولقد شعرت أنني في غير حاجة إلى سؤال؛ لقد رأيت أفراداً من الجماهير في صدام مع السلطة، واتخذت موقفي دون تردد في الجانب المعادى للسلطة.

.

ويعود جمال عبد الناصر إلى هذه الفترة من حياته في خطاب له بميدان المنشية بالإسكندرية في ٢٦/١٠/١٩٥٤ ليصف أحاسيسه في تلك المظاهرة وما تركته من آثار في نفسه: "حينما بدأت في الكلام اليوم في ميدان المنشية. سرح بي الخاطر إلى الماضي البعيد ... وتذكرت كفاح الإسكندرية وأنا شاب صغير وتذكرت في هذا الوقت وأنا اشترك مع أبناء الإسكندرية، وأنا أهتف لأول مرة في حياتي باسم الحرية وباسم الكرامة، وباسم مصر... أطلقت علينا طلقات الاستعمار وأعوان الاستعمار فمات من مات وجرح من جرح، ولكن خرج من بين هؤلاء الناس شاب صغير شعر بالحرية وأحس بطعم الحرية، وآلي على نفسه أن يجاهد وأن يكافح وأن يقاتل في سبيل الحرية التي كان يهتف بها ولا يعلم معناها؛ لأنه كان يشعر بها في نفسه، وكان يشعر بها في روحه وكان يشعر بها في دمه". لقد كانت تلك الفترة بالإسكندرية مرحلة تحول في حياة الطالب جمال من متظاهر إلى ثائر تأثر بحالة الغليان التي كانت تعانى منها مصر بسبب

تحكم الاستعمار وإلغاء الدستور. وقد ضاق المسئولون بالمدرسة بنشاطه ونبهوا والده فأرسله إلى القاهرة.

ووصف جمال عبد الناصر شعوره في كتاب "فلسفة الثورة" فقال: "وفى تلك الأيام قدت مظاهرة في مدرسة النهضة، وصرخت من أعماقي بطلب الاستقلال التام، وصرخ ورائي كثيرون، ولكن صراخنا ضاع هباء وبددته الرياح أصداء واهية لا تحرك الجبال ولا تحطم الصخور".

وكان من نتيجة النشاط السياسي المكثف لجمال عبد الناصر في هذه الفترة الذي رصدته تقارير البوليس أن قررت مدرسة النهضة فصله بتهمة تحريضه الطلبة على الثورة، إلا أن زملائه ثاروا وأعلنوا الإضراب العام وهددوا بحرق المدرسة فتراجع ناظر المدرسة في قراره.

ومنذ المظاهرة الأولى التي اشترك فيها جمال عبد الناصر بالإسكندرية شغلت السياسة كل وقته، وتجول بين التيارات السياسية التي كانت موجودة في هذا الوقت فانضم إلى مصر الفتاة لمدى عامين، ثم انصرف عنها بعد أن اكتشف أنها لا تحقق شيئاً، كما كانت له اتصالات متعددة بالإخوان المسلمين إلا أنه قد عزف عن الانضمام لأي من الجماعات أو الأحزاب القائمة لأنه لم يقتنع بجدوى أياً منها ،"فلم يكن هناك حزب مثالي يضم جميع العناصر لتحقيق الأهداف الوطنية".

ك

ذلك فإنه وهو طالب في المرحلة الثانوية بدأ الوعي العربي يتسلل إلى تفكيره، فكان يخرج مع زملائه كل عام في الثاني من شهر نوفمبر احتجاجاً على وعد "بلفور" الذي منحت به بريطانيا لليهود وطناً في فلسطين على حساب أصحابه الشرعيين.

مقتبس من الموقع الرسمى لمحافظة الاسكندرية

تم تعديل 8 يناير 2009 بواسطة ssmaly

[ssmaly]

ودى صوره تحفة اقصد انها قديمة وجميلة

محطة الرمل قديما

عاوزين صور قديمة تانية؟

[الجدار]

صورة جميلة جداً يااااااااااااااااه اسكندرية كانت فاضيه كده ؟؟ ياريت يا ssmaly تحطلنا شوية صور تانيه

انا فرحان ان معظم اللي هنا اسكندرانيه الواحد في الغربه بيتمنى يشوف حد من ريحة اسكندرية

الواحد بجد واحشاه اسكندرية قوي :rolleyes:

عايزين نرجع بقى !!