رابطة عشاق مصر (أليكس لوفر)

[مجهول]

برده يا أخت اليكس ولادك هيفتقدوا "الجرجيعان" ، اعتقد هم لم يشعروا بشهر رمضان الكريم ليوم واحد في مصر .

ده الواحد لولا البرامج والمسلسلات المصريه مكنش حتي شعر إن الجو رمضاني... وهذا سر مصر طوال السنه مشاعرها وأحساسها مختلفه كل يوم في مناسبه وكل يوم في جو جديد.. انا بقالي 12 يوم في الصيام الواحد يجي عليه ساعة الفطار كده ميحسش ببهجه او بطعم للأكل رغم إني بقالي تلات سنين بره مصر وده مش أول رمضان.. بس هي احاسيس.

ولكن في الأسكندرية وقبل ساعه من الإفطار نتجمع انا والأصدقاء علي شاطيء ميامي وفي بروده الجو الأروبي ونقوم بالمشي مسافات طويله ، ونرجع علي ساعة الإفطار لنري الأخوة والأهل يسرعون بتجهيز الصواني والعصائر والكل مشغول ، ويضرب المدفع ونقوم بالأكل ونستمتع به ، ونستعد لنزول بعد الفطار للذهاب إلي بحري والجلوس علي أقدم مقاهي بحري " قهوة فاروق " تشرب واحد شاي مش موجود في الجمهوريه كلها!!!

المال اصبح هو كل ما نسعي اليه غصبن علينا ولكن الغربه وضعتنا في هذا الشكل ، كلنا نفكر بمنطق واحد الجنيه يساوي كام ، اقدري اشتري اية في خلال اد ايه..ولكن في ربنا يقدرني واتخلص من الغربه بأسرع وقت ممكن.

وتحياتي لكم ،،،

[Alex Lover]

طبعا اولادي ماذاقوش طعم رمضان في مصر وبالتالي مش هيحسوا انهم افتقدوه بالمرة ....

أنا فاكرة اول يوم رمضان كان لازم كل الأسر تتجمع في البيت الكبير اللي هو بيت الجدة الله يرحمها ومفيش مرة كنا ناكل وقت المدفع ما يضرب دايما يبقى فيه حاجة لسه مخلصتش والكل بيجري ومحدش سامع الثاني والاطفال بيجروا وبيلعبو وبيتفرجو على بوجي وطمطم ... ونتلم على السفرة وناكل ونحلي ونصلي التراويح في المسجد وتاني يوم نتجمع تاني في نفس البيت علشان طبعا الاكل كان كتير ولازم نخلص عليه

وكل اسرة من الاسر بتقوم بعزومة الباقيين وهكذا ... حتى ينتهي شهر رمضان تلاقي ان نص الشهر قضيناه في تجمعات اسريه ولكن دلوقتي .. وفي الغربة محصلش اننا اتقابلنا على الفطار مع حد ..... برغم وجود الاصحاب والاقارب ولكن المبدا نفسه اصبح مالوش قيمة ...

شكرا على مرورك واشتراكك معنا يا المجهول :blink:

[المكافح]

اخوانى الاحباء والاحباء جدا جدا لانكم احباء لمصر جدا جدا

وكل من يحب مصر فهة حبيبى لان من يحب حبيبى يصبح حبيبى ايضا

ان حبنا لبلدنا الجميلة ليس لة سبب معين

يعنى لما حد يسألك بتحب مصر لية ممكن تجاوب بعشرات الاجابات واللى كلها ممزوجة مع بعضها فى انك بتحبها لانها مصر وممكن ما تعرفش تحدد سبب واحد لحبك لمصر غير انك بتحب مصر

عمر اللى ماشافش جمال مصر ومحسش بالطعم الحلو اللى فى مصر ما هايقدر يحس باللى احنا فية دلوقتى

انا متربى فى الجيزة وما ادراكم ما جمال الجيزة وحلاوتها وقعدة النيل ساعة العصارى مع الشلة والاصحاب والتمشية الجميلة على شط النيل

ومش هاقولكم على ايام الجامعة واللحظات الجميلة اللى شوفناها داخل الحرم الجامعى

وتمشية شارع جامعة الدول العربية وميدان الجيزة وقعدة حلوة على قهوة بلدى فى بولاق ولا بين السرايات وغيرة الكتير والكتير

ولما الواحد اتجوز استقريت فى القاهرة ويا جمالك ياقاهرة المعز لدين اللة فى التمشية فى شوارعك يا مصر الجدية بالليل فى عز الشتا ولا شوارعك يا وسط البلد فى ليالى رمضان واكلة سحور حلوة من عند ( الجحش ) اشهر بتاع فول فى القاهرة ولا قهوة الفيشاوى وجمال قعدتها ولياليك ميدان سيدنا الحسين والازهر والقلعة ومسجد الرفاعى وغيرة كتيييير

يا اخوانا اللى ما شافش جمال مصر ماشافش جمال فى حياتة

واللى مقضاش رمضان فى مصر مقضاش رمضان حلو فى حياتة

تحياتى وحبى لكل احبائك يامصر

واحد بيحب مصر قوى

[kokomen]

معقول كده ....؟؟؟؟؟؟؟ ده أنا فاتني القطار ولا أيه يا جماعة ؟؟؟؟؟

أعلن إنضمامي وبكامل قواى العقلية والعاطفية لرابطة عشاق مصر الحبيبة

الغالية على قلوبنا مصر الكنانة ... حفظها الله من كل سوء وحفظ أبنائها الكرام البررة

أجمل ذكريات في مصر العزيزة ... وأسكندرية تاني ... وأسكندرية كمان وكمان ...؟؟؟

لسه ... حا نحكي كثيير .. حكاوي جميلة وذكريات عطرة من اسكندرية ومصر المحروسة

وللحديث بقية أن شاء الله

عضو رابطة مصر المحروسة وأسكندرية الجميلة

:rolleyes:

[هتشكوك]

بجد يا اليكس موضوع جميل جدا جدا جدا

انا بجد ماقدرتش اخرج من المنتدى من غير ما اكمله

مشاعركم حلوه اوى

بس انتوا بتحسوا بالغربه لانكم بعيد عن بلدكم واهلكم وناسكم وهواء وتراب بلدكم

لكن لما تحس بالغربه وانت فيها

لما تحس ان خيرها لناس تانيه مش ليك

لما تحس ان الهنود والبنجلاديش والسريلانكيين ليهم سعر فيها وانت لا

ولما تعرف انك ارخص حاجه فيها بيبقى صعب

بتلاقى نفسك بتحس بوجع ان خيرها لغيرها وانت لا

بتلاقى نفسك عاوز تبعد علشان تحس بالغربه وانت بعيد يمكن ساعتها يكون الشعور غير كده على الاقل انت فى بلاد الغربه غريب

مش جوه بلدك وغريب

انا بصراحه عايشه فى مصر لكن خلاص بفكر فى السفر بنسبة 90%

وبحاول فعلا فيه

ومش عارفه ياترى ساعتها هكون صح ولا غلط

بس على الاقل هكون غريبه فى بلاد غير بلدى

[مونتى]

اعتقد وكما يعتقد كل مصرى انه لايوجد رمضان فى اى مكان خارج مصر الفرحة الجميله الاخت الفاضله اليكس

عند نزول اولادك الى مصر سيشعرون انهم ولدوا من جديد مصر هى الحياة ولن ولم يفتقدوا هذا

القرقيعان

حلو يا حلو رمضان كريم يا حلو

عاشق بلدى :rolleyes:

[badroora]

لما تحس ان الهنود والبنجلاديش والسريلانكيين ليهم سعر فيها وانت لا

دول فين فى مصر ؟ وبيعملوا ايه ؟

!!!!

[هتشكوك]

دول فعلا موجودين فى مصر وتمركزهم الرئيسى فى بلدى

الاسماعيليه

وعاوزه اقولك ان عددهم كبير وبيكبر كمان يا اخت نجفه

وبياخدوا اجور اعلى من المصريين وبيستوردوهم من بلدهم

وبيعطوهم المناصب العليا وما بيعينوش المصريين

يعنى بجد شئ محزن للغايه

[مونتى]

لما تحس ان الهنود والبنجلاديش والسريلانكيين ليهم سعر فيها وانت لا

هكون غريبه فى بلاد غير بلدى

اخى هتشكوك كفايه عليك انك لسه حاسس انها بلدك مش بتحس انك اجنبى فى اى وقت يقولولك مع السلامه طريقك صحراوى

تسمحلى اسالك سؤال صغير انت لسه بتحبها ولا ايه

عاشق بلدى :rolleyes:

[miramar]

أنا أناااااااااااااااااااااااااااااااااااااااا أنا كمان عايزة أسجل معاكو

أنا زرت اسكندرية مرة واحدة ولكن وقعت في غرامها من أول نظرة

اسكندرية ساحرة بكل حاجة فيها من ميامي للعجمي

من المندرة للمنتزه

كلها على بعضها تجنن

الي يحب مصر بجد لازم يحبها كلها على بعضها مش ياخدها قطاعي

الكيس شكرا على الفكرة دي وانا كمان مغتربة و لما بارجع مصر الناس بيستغربوا انا ليه بحبها و بحنلها

بحبها عشان ناسها

عشان الذكريات الجميلة

تاريخها العريق

حضارتها الي بيغار منها بقية العرب

لو كملت هأكتب قصائد حب كفاية كدة

مرمر

تم تعديل 29 سبتمبر 2007 بواسطة miramar

[seeem]

اهداء الى: أمي

خدني الحنين

خدني الحنين بعد السنين جبني هنا

هنا للمكان اللي أتولد فيه حلمنا

وبكينا فيه وضحكنا فيه من قلبنا

هنا بلقى نفسي وروحي....هنا بابقى أنا

......................................................

عديت على البيت اللي كان فيه الحبايب

راجع ماليني الشوق ولهفة قلب دايب

أجمل صبا ...وناس طيبة

هنا أجدع جيران....هنا صحاب زمان

هنا حب عدى وفات عليه عشرة خمستاشر سنة

................................................................

تعب السنين بنساه هنا......هنا حضن دافي

لو حتى حمل الدنيا كله فوق كتافي

هنا إيد بتمسح دمعتي تهون عليا

فين ألاقي حنيه كده والله مافي

........................................

رجعني ليها الشوق وبعشقها أنا

إحساس وخدني لفوق خلاني أنا

عديت على البيت اللي كان فيه الحبايب

راجع ماليني الشوق ولهفة قلب دايب

أجمل صبا ...وناس طيبة

هنا أجدع جيران....هنا صحاب زمان

هنا حب عدى وفات عليه عشرة خمستاشر سنة

كلمات : ايمن بهجت قمر

[ايمان بالله]

السلام عليكم

الله كلامكم حلو قوى فكرنى باحلى ايام عمرى وايام الايس كريم والفشار من محطه الرمل صدقونى لسه فاكره الاوقات الجميله دى وفكره ضحكت امى الصافيه و ولمتنا كلنا حولين بعض فى البيت وبيت العيله الكبير .مصر فى دمنا وفى نفسنا وفى روحنا ويظهر مش بيحس الواحد اقد ايه بيعشق اسكندريه وكل حته فيها الا لما بينحرم منها

[seeem]

ضحكت امى الصافيه و لمتنا كلنا حولين بعض فى البيت وبيت العيله الكبير

اه من كلامك....... علشان كده ماقدرش ابعد عن اسكندرية كتير............فيها أغلى ناس عندي.....

من وقت لتاني باحس امي تنتدهلي...... ما قدرش استنى اجازة او اخر سنة .........

بنط على طول فأول طيارة وانزلها جري.....واعزمها على اكلة سمك وتذكرتين سنيما وتمشية على البحر....

وفلافل سخنة يوم الجمعة الصبح ..........

وحشتنيني يأمي

[Alex Lover]

ازيكم يا جماعة وحشتوني اوي اوي اوي ... وحشني احساس الاترتباط بمبدأ واحد هو حب الوطن ،، ياااااااااااه على جمالكم يا شباب وعلى نبض الحب للبلد اللي بينبض على صفحات المنتدى ،،، انا كنت فاكرة ان بغيابي عن المنتدى هتغيبوا عم الموضوع وهيتنسى بس لقيته انه نبضه شغال لسه وحب مصر عايش جوانا وبيتدفق

اللي عجبني ان حتى اللي زعلان من مصر في حاجة اشار اليها بمنتهى الاحترام زي

هتشكوك

وعجبني رد (مونتي ) انه كفاية انك تحس انها بلدك ومن حقك مش اجنبي في اي لحظة يقولولك مع السلامة

seeem كلامك فكرني بامي اله يرحمها وقد ايه كنت اتمنى تبقى عايشه كنت مسبتهاش ولا سافرت و الشعر جميل اعتقد انه اغنية لهشام عباس شوقتني اسمعها

ايمان بالله ربنا ميحرمكيش من اهلك ولمتهم ابدا ولا يحرم اسكندرية منك

miramar اهلا بيكي معانا منورانا

نجفة انا كنت عايزة اسال نفس سؤالك برضه بس غريبه فعلا اول مرة اعرف ان ليهم وجود في مصر

kokomen لا مافاتكش القطر ولا حاجة اهلا بيك معانا نورتنا

يارب نفضل كده على طول متواصلين معبرين عن حبنا لمصر واستنونس علشان عايزة اضيف لكم شوية صور حلوة للاسكندرية

[seeem]

ازيكم يا جماعة وحشتوني اوي اوي اوي ... وحشني احساس الاترتباط بمبدأ واحد هو حب الوطن ،، ياااااااااااه على جمالكم يا شباب وعلى نبض الحب للبلد اللي بينبض على صفحات المنتدى ،،، انا كنت فاكرة ان بغيابي عن المنتدى هتغيبوا عم الموضوع وهيتنسى بس لقيته انه نبضه شغال لسه وحب مصر عايش جوانا وبيتدفق

ننسى ازاى لا الموضوع ممكن يتنسى ولا حضرتك......... طولتي الغيبة كتير قوي

عسى المانع خير

[Alex Lover]

والله يا seeeem غصب عني بس باذن الله مش هاغيب تاني وحتى لو غبت انا واثقه انكم موجودين ومتواصلين شكرا على كلامك الجميل

[seeem]

واستنونس علشان عايزة اضيف لكم شوية صور حلوة للاسكندرية

طيب فين الصور مستنين على نار ....... :closedeyes:

[Alex Lover]

محطة الرمل

ميدان سعد زغلول

المنشية

محلات هانو

تم تعديل 6 نوفمبر 2007 بواسطة Alex Lover

[Alex Lover]

الكورنيش

سينما راديو

سينما مترو

اتينيوس

[Alex Lover]

يا صبح الخير ياللي معانا ياللي معانا

الكروان غنى وصحانا وصحانا

ايه يا جماعة انتو فين في اجازة ولا ايه

تعالو انا عايزاكم في موضوع مهم جدا ولازم تقولو رايكم

النهاردة كنت باسال نفسي الصبح وانا جايه ليه برغم اننا مشهورين بالكرامة وعزة النفس بيجي بعض المصريين في الغربة ويهزو الصورة الحلوة دي بل بيهدوها

ليه البعض من المصريين بيتسول في طلب حقه ... فاهمني يعني حقه وراتبه ولما يروح يطلبه يبقى كانه بيشحت

ليه تلاقي الصبح موظف مصري راح فتح لمديره الباب وبيقوله اتفضل اتفضل طال عمرك ويبقى شويه ويبوس ايده في حين انه لو معمكلش كده محدش هيلومه ولما عمل كده ماستفادش اي حاجة

ومن ده كثير

ده اللي بيخليهم حاسين ان المصريين بتتلزق علشان ايه مش عارفه ليه بيعملو كده .. اكيد كلكم مريتوا بالنماذج دي ومتاكدين ان دول اللي بيشوهوا صورة المصريين

ارجو ان كل واحد يقول تجربه مما مر به ونوجه دعوه من رابطة عشاق مصر الى كل مصري لينضم الينا بدون تلزيق

في انتظاركم