رابطة عشاق مصر (أليكس لوفر)

[مسالم]

وبعدين .. قعدت أفكر في الكلام اللي احنا بنقوله .. وفي سلوكياتنا الداخله والخارجه .. وبعدين .. لن ينتهي الموضوع .. قلت في في عقل بالي هو أصل الموضوع ايه .. ورجعت لأول صفحه .. علشان اعرف مين أول واحد طرح الموضوع .. مين زعيم الرابطه .. والحقيقه فوجئت أن اصل الموضوع يرمي لعكس ما وصلت انا اليه .. والله اعلم .. فالبدايه كانت من الاخت Alex-Lover .. تحث كل منمنا الى سرد الذكريات الجميله التي عشناها وتفاعلنا معها وفرحنا بها ونحزن على فراقها الحين كما اننا نعيش على امل اللقاء .. لقاء الذكريات .. مره أخرى .. لعل وعسى أن نجد من الماضي ما يهّون علينا الحاضر..... الغائب ...

وأنا الآخر لي ذكريات جميله لا أنساها .. وكل أملي أن أرجع يوماً الى الحضن الدافي .. الى مدينتي التي أحتضنتي منذ أن أُختِرت أن أكون من نسل بني آدم .. إسكندريه ماريه وترابها زعفران .. اسكندريه صبيه مهما يطول الزمان .. ياااااه ذكرياتي مع اسكندريه كتيره جدا منذ ان كنت المسئول عن المشتريات بطبيعة الحال فقد كنت الاصغر سناً بين أخوتي .. أتذكر كل المحلات والافران التي كنت أمر عليها كل يوم :bro: .. عرفان وبوالينو .. وعم عبده البقال .. تحس ان البقاله دي أول بقاله في التاريخ ... وكان راجل يشبه كتير الله يرحمه عبد الرحيم الزرقاني .. كان هّو الوحيد اللي بيبيع الزيت الحار .. وانا مكنتش باحبه ابداً .. لكن الوالد من محبيه ..

يااااه .. ياما وقفت في طوابير العيش بالساعات yaw: .. العيش الافرنجي .. والعيش الشامي .. وللناس المخضرمه شويه كان فيه عيش اسمه .. نص دندينه .. ليه معرفش .. بس كان كبير شويه وكان ثمنه 3 تعريفه أو قرشين صاغ .. كان غالي طبعا .. وكنت بحب العسليه جداً ويا سلام بقى لما تكون السيده الوالده دعيالي .. واروح اشتري عسليه والاقي الراجل لسه بيعملها .. متعه تانيه وهو بيقصها بمقص الترزي ... كنت متخصص شرا التموين انا والوالده الله يديها الصحه .. حد فاكر شاي التموين كان اسمه ايه .. الكلام ده كان في اوائل السبعينات .. وياسلام لمّا كان عم خليل البقال يفتح برميل الزيت علشان يدينا حصة الزيت :aslam: .. والريحه اللي مش قادر انساها لحد دلوقتي .. ايااااام ..

كان لمّا ييجي رمضان تلاقي شباب الحي قاعدين يصنعوا الفوانيس الكبيره بالخشب والسيلوفان ثم تتطور الحال الى الفوانيس الحديد العملاقه .. وتبدأ ماتشات الكوره لحد الفجر .. وخصوصا ليلة العيد ده كان فيلم تاني خالص .. انا افتكر اني لعبت مع أربع فرق من الاتناشر اللي طبعا فزنا بالكاس في اخر الدوره التي انتهت قبل صلاة العيد .. كان فيه جماهير عريضه بتحضر المباريات .. وكان بيلعب معانا عادل عبد المقصود من الاولمبي والثعلبي بتاع الاتحاد .. كان طول شهر رمضان وانا مشترك في دورات كوره ومع اكتر من فريق وفي اكثر من منطقه .. ارض السكس (رقم 6) بقناة السويس .. وفي العلوايه .. وفي محرم بك ورا جامع طاهر الشيخ ..

الذكريات كتير ولو كملّت .. حاتزهقوا .. علشان كده انا حروح انام .. واشوفكم بكره ..

تم تعديل 10 نوفمبر 2007 بواسطة مسالم

[Alex Lover]

بسم الله الرحمن الرحيم

احبابي واعزائي واخواتي وولاد بلدي الغاليين ،، بدايه احب ان انوه عن شكري وتقديري للعضو الجديد ( في رابطتنا ) وهو الأخ (مسالم) فقد اضاف حركة غير عادية وكنت سئية الحظ انني لم اكن موجوده اليومين الماضيين فكما تعلمون يوم الجمعة والسبت عطلة ونادرا ما اجد وقت لمتابعة المنتدى

اشكرك اخ مسالم على مداخلتك الساخنة واعتقد ان اختى الحبيبة ناش كفت ووفت كما يقولون وتقريبا نقلت لك وجهة نظري .... ولكنني احب ان اضيف شئ بالنسبة لسؤالك عن هدف الموضوع وهو عشق مصر وتعجبك كيف اعيب او اعدد بعض مساوئ المصريين .... اليس من العشق ما يسمى بالغيره ؟؟؟؟؟

انا اعشق بلدي واغير عليها من تصرفات غريبة صادفتني ذلك اليوم .... بالصدفة قابلت ما عكر دمي وطرحته في هذا الموضوع حتى انبه كل عاشق ان هذا التصرف يسئ الى معشوقتنا مصر .... نحن لا نقف لهم على الساقطه واللاقطة ولكن هناك بعض العيوب التي يمكن ان ننبه لها من خلال مداخلات خفيفة مثل موضوعي هذا .. الذي هو في الاساس يحاول الابتعاد عن اي مساوئ ،، بوجه عام اعجبتني مشاركتك الاخيرة (ايضا) وحديثك عن ذكرياتك .. فعلا شممت رائحة زيت التموين هههههههههه والله .. وركزت التفكير علشان افتكر اسم شاء التموين ولو اني من مواليد اخر السبعينات ولكن اعتقد اني فاكراه هو ( الشيخ الشريب ) مش كده ههههههههه

بجد سعيدة بانضمامك لينا اوي اوي اوي واتمنى انك تجد بيننا بيت تاني .. وصدقني حتى لو اتضايقت من حاجة عكرتك او كدرتك تعالى احكيهالنا ..

عمرو ..... كيف حالك وحال الغربة والمصريين معاك .. صدقني لو قلتلك اني انخرطت في البكاء عند قراءة خناقتك مع اللي مشغل عنده 100 من المصريين .. حسبنا الله ونعم الوكيل في كل من يهين مصري ,, وتصرفك ده هو اللي هيفكرهم انهم يفكروا الف مرة قبل ما يحكمو على حد .. بجد انا سعيده بمشاركاتك يا عمرو لانها تحتوي على امثله حية وقوية وجريئة باستمتع وانا باقراها .. ربنا يديم علينا العزة والكرامة

ناش النشنوشه

نورتيني وحاسه انك سديتي غيبتي والله بجد

فولانه .. تصوري اني كنت فكراكي معايا في الكويت ... شكرا على ردك واهتمامك

kokomen بجد حلوة قوي القصيدة تحس بصوت الام بيرن في كلماتها ياتري مين هي اللي كتبتها وياترى هي فين دلوقتى وابنها فين تصدق بجد الموضوع شغلني جدا وحاسه بيها جامد جدا

مونتي ... ليه لا تعليق يا مونتي .. عموما كفايه مرورك واعجابك بالصور

تم تعديل 11 نوفمبر 2007 بواسطة Alex Lover

[Folana]

حد يعرف الاغنيه بتاعة مدحت صالح وحبة مغنينين جداد كده

اسمها كل الطيور بتهاجر وبترجع ارضها سمعت مقطوعه منها على الاف ام بس معرفش اسمها كنت بدور عليها لانى بحبها ومتهيألى انها مناسبه للموضوع جدا كمان

بس ياريت اى حد موجوده عنده يرفعهالى عشان اعملها دون لود او يقولى بس على الاسم وانا ادخل اجيبها من اى موقع

شكرا عمرو

السلام عليكم ورحمة الله ..

اخى الكريم عمرو حورس...الصدفة وحدها قادتنى لسماع الاغنية اللى بتطلبها حضرتك ..

هنـــــــــــــــــــــــــــــــــا

أو ممكن تزور موضوع "شكر وتقدير لبدرية "فى الاجتماعيات..حتسمعها ....دى لو كانت هى نفسها اللى حضرتك بتدور عليها

صباحك جميل ...........

[Alex Lover]

يا فلانة

الرابط ده مش موجوده فيه الاغنية

[مسالم]

:السلام عليكم .. صدقوني اني بكون سعيد جداً لمّا باحس ان فيه حد بيرد علىّ .. حيث اعتقد ان كل مداخلاتي التي اطرحها هنا وهناك تكون تقيله على السامعين .. ولهذا وجب الاعتذار ...

حبيت ارد على من اهتم بمداخلاتي كل ٍ حسب مكانته في قلوبنا .. وكل ٍ حسب منزلته وقيمته إذا نزل بيننا .. وارجو ان لا يكون هناك حساسيه وان شاء الله لن يكون .. حيث انني استشعر ما في قلوبكم وعقولكم من بصيره وتؤده ..

أولاً : مدام فلانه ... أشكرك سيدتي على ما تفضلتي به من رد بسيط واضح .. مبني على واقع .. واتضح لي ان حضرتك من النوع اللي مابيتكلمش كتير .. وصوته هادئ لكن واضح... وكما اسلفت الكريمه Alex-lover كنت فاكرك من رابطة العاملين بالخارج ..

ُثانياً: الأخت العزيزه ناش .. أعتذ برأيك جداً وسوف اكمل معك الحوار إن لم تريدي انت ان تنهيه .. واشكرك على اعترافك بأنك من النوع المحب للجدل .. ولكن لم أرى في هذا عيباً .. فالجدل مطلوب لتقريب وجهات النظر او لطرح فكره ما .. المهم الكيفيه التي يجب ان يكون عليها هذا الجدل .. هل هو صراخ .. هل هي سفسطائيه .. هل هو جدل من اجل استنزاف الجهد بدون هدف .. هي دي المشكله .. وطبعا حضرتك فوق مستوى الشبهات تماما ...

اّما بالنسبه لسلبيات المصريين بالداخل والخارج .. ولماذا نركز دائماً على سلبيات المصريين بالخارج (إنها المقارنات).. ارجو ان يكون في هذا المثال توضيحا لي من قَبلكم ..

لو فرضنا ان حضرتك قمتي بزيارة مزرعه للدواجن ودخلتي عنبر "1" الكتاكيت الشركسي" .. ايه اللي ممكن تلاقيه :wub: .. حتلاقي مثلاً 500 كتكوت لونهم اسود أو ما شابه .. شعرهم منكوش .. قفاهم اتنحل من كتر الشغل أو اشياء اخرى .. ونازلين رغي وجدل .. صوصوصوصوصوصو .. سياسة الفضيحه.. تقدري حضرتك تفّرقي بينهم .. .. لأ .. لأنهم من نفس السلاله .. صح.

طيب إذا حضرتك زرتي عنبر "2"كتاكيت مشكل" .. ايه اللي حتلاقيه .. مثلاً برضه 500 كتكوت .. بس الوانهم متفرقه .. احمر على اصفر على بني .. لكن حتلاقي مجموعه منهم مميزه .. بلونهم الاسود وشعرهم المنكوش .. وصوتهم العالي ودايماً هجوميين .. واذا اي كتكوت قربلهم ينقروه .. طبعاً عرفتيهم .. طبعاً .. هؤلاء هم الشركسيون ..

لكن برضه عايز اقول ان فيه كتير منهم غيروا شكلهم .. يعني مش كلهم وحشين ..

ياترى المثل واضح .. عرفتي ليه احنا مميزون بالخارج .. لأن فيه الوان تانيه .. لكن لو رجعنا الى الوطن ختلاقينا كلنا لون واحد .. اللهم ان كان فيه كتكوت جايب على غامق او فاتح .. يعني مختلف شويه ..

المشكله يا ناس .. قصدي يا ناش.. ان احنا .. فقدنا حاسه مهمه جدا .. اللي هي السمع .. احنا لمّا ابتدينا نتكلم واطلقنا العنان للكلام .. نسينا نسمع اللي بنقوله واللي بيقوله الاخرون وركزنا فقط على الكلام وحّورنا فيه .. وجملناه .. وادخلنا عليه .. وحرفناه .. امتى بقى ممكن نسمع اللي بنقوله ونصنفه الى كلام مقبول واخر غير مقبول على اقل تقدير .. ناهيك على اننا لا نطبق ما نقوله أيضاً .. ياريت تديني أمل .. وياريت نسمع منك بعض الذكريات .. التي تعيدك الى زمن الالوان الواضحه والخطوط المستقيمه ..

ثالثاً: ألاخت الكريمه Alex-Lover ...

والله اني اول مره اتحاور معك فيها .. ولكن حسيت بريح الاسكندريه عندما اسمع كلماتك واشاهد الصور التي وضعتيها .. واحب اطمنك انه لم يفت الوقت للرد .. ولم تكوني سيئة الحظ ولكننا نحن الذين حظينا بالانضمام الى الرابطه .. والتفاعل معها .. يازعيمة الرابطه.. :D

المشكله بتزيد كل يوم .. رغم أن:

- عدد الشباب الذين دخلوا في الاسلام (اقصد الذين يصّلون في المساجد) تضاعف مرات ومرات .

- عدد المحطات الفضائيه الداعيه الى الدين والاخلاق الحميده كثرت وكثرت.

- الارشادات والتوجيهات والحث على طاعة الله والوالدين التي يذيعها الوالدين على الابناء تضاعفت وبشكل يومي.

- الانترنت وسهولة الحصول على المعلومه الجيده اصبح في متناول الجميع.

- اقول كمان ولا كفايه كده ..... ومع ذلك ..فنحن الى الاسفل سائرون ..

كنت أعتقد ان والدي من أشد الناس وأقساهم علىّ عندما كنت أكذب عليه من خوفي الشديد منه .. عندما كان يسألني عن شئ في المنهج ولا أعرفه .. عندما كان يزور ناظر المدرسه الابتدائيه ويوصيه عليّ .. ويا سعده يا هناه ناظر المدرسه .. بس كده .. انت تأمر ياستاذ ابو مسالم .. وكان يمر على الفصول كل يوم .. ناظر المدرسه .. وهات يا اسئله .. ومُنى عينه ان احنا منعرفش نجاوب .. تعا ياحبيبي .. ده انت ابوك صاحبي وموصيك علي .. تعرف تقول آه طويله شويه .. m8:

الله يمسيك بالخير ياوالدي .. لو شفت اللي باعمله مع الواد احمد كان صعب عليك ..

وبمناسبة الذكريات .. كان الناظر ده .. مرعب .. معاه خرزانه أطول منه .. وكان بيجمع الموعودين بعشر عصيان على رجليهم في طابور الفسحه .. وماخبيش عليكم الطابور كان طويل زي طابور العيش بالضبط .. وعلشان نيتكم ما ترميش بعيد انا كنت شاطر جداً .. وعمري ما وقفت في أول الطابور .. كنت بقف في نصفه تقريباً ..

المهم ان العذاب كله ماكانش في الضرب .. لكن كان في انتظاره .. وكنت لمّا ابص لزميلي في الجهاد اللي انضرب الاقيه في عالم تاني .. وياويله تاني واحد في الصف wst:: .. موقف رهيب والله .. انا كنت لمّا باشوف كده كنت باتمنى .. لكن العنايه الآلهيه نزلت على استاد باليرمو .. قصدي نزلت على المدرسه .. ايه اللي حصل .. كان سور المدرسه ملاصق للجانب الخلفي من عماره سكنيه .. وكان الله يمسيها برضه بكل خير واحده من سكان العماره واقفه في المطبخ وشايفه اللي بيحصل.. ومقدرتش بقى تتفرج على باقي المسلسل .. وبدأت .. smk: حرام عليك ياناظر .. انت ماعندكش رحمه ... اسكتي ياست انتي .. مالكيش دعوه ... مليش دعوه ازاي .. سيب العيال يامفتري ... اسكتي ياست انتي ... اصرف الطابور يااستاذ حافظ .. :angry: طبعاً ده انا.. مش قلتلكم العنايه الآلهيه .. ربنا يكرمك يا ست وينجي اولادك من أي وقفة في طابور .. بغض النظر عن ايه اللي موجود في آخر الطابور ده .... ودي كانت آخر مره اقف الوقفه دي ..!!! اه والله .. فيه حاجه ..

مش قلتلكم اني لو فتحت في الذكريات .. مش حعرف اسكت .. اديني طولت عليكم تاني ..

رابعاً: الاخ عمرو .. ياأخي انا سعيد بمعرفتك والله .. أمّا عن السلبيات .. من اخوانك المصريين .. فلا تلتفت اليها ودعها تمر .. ولكن حلل الموقف وفكر .. ليه هوّ عمل كده .. يمكن تلاقيله عذر ..

أمّا عن السلبيات مع اخوانك الاشقاء .. فقد اعطيتهم درساً في الفعل ورد الفعل ... وفقك الله .. ربنا يكرمك بعروسه تكون مصريه أصيله .. اتربت على الغالي .. على الاقل تعرف يعني ايه الزبده البلدي (الفلاحي) .. والبيض البلدي .. مش زي اولادي .. متربيين على الاندومي والشيتوس والفرينش فرايز...

تم تعديل 11 نوفمبر 2007 بواسطة مسالم

[مونتى]

اليكس لوفر بعد التحيه لك ولكل الاخوة بالمحاورات

ارد على سؤالك

تعرفين لماذا لاتعليق

لان هذا السلوك اراه كل يوم بام عينى واتحسر على ما وصل اليه المصريون ( بعضهم ) ليس الجميع ولكنه

( اصبح سلوك الغالبيه ولاادرى له سبب فانا اراه يوميا بين فئه من المفروض انه من الصفوه المصريه ( مهندسيين

للاسف كفايه لااستطيع ان اكمل لان فى اكمالى وسردى لما يحدث من بعض الزملاء من اجل ان يكون له كما يقولون عند الراجل دخله ضد زميل له مصرى مثله

عـــــ ــــــاشق بلدى

[amrhoras]

:رابعاً: الاخ عمرو .. ياأخي انا سعيد بمعرفتك والله .. أمّا عن السلبيات .. من اخوانك المصريين .. فلا تلتفت اليها ودعها تمر .. ولكن حلل الموقف وفكر .. ليه هوّ عمل كده .. يمكن تلاقيله عذر ..

أمّا عن السلبيات مع اخوانك الاشقاء .. فقد اعطيتهم درساً في الفعل ورد الفعل ... وفقك الله .. ربنا يكرمك بعروسه تكون مصريه أصيله .. اتربت على الغالي .. على الاقل تعرف يعني ايه الزبده البلدي (الفلاحي) .. والبيض البلدي .. مش زي اولادي .. متربيين على الاندومي والشيتوس والفرينش فرايز...

...

كل اللى يجيبه ربنا كويس بس هى تيجي بس وانا اجيبلها كلبظ كارتيه كمان

بالنسبه للسلبيات انا مش ببصلها لا تهمنى اوى بس بتزعل بيني وبين نفسي بزعل على حال الناس دي

عموما سررت جدا يا استاذ مسالم لمداخلاتك واعتز جدا بما تفضلت بقوله

شكرا لك اخى الكريم ادام الله عليك نعمة الصحة والعافيه

اخوك عمرو طب كرانشي ينفع :angry:

[badroora]

حد يعرف الاغنيه بتاعة مدحت صالح وحبة مغنينين جداد كده

اسمها كل الطيور بتهاجر وبترجع ارضها سمعت مقطوعه منها على الاف ام بس معرفش اسمها كنت بدور عليها لانى بحبها ومتهيألى انها مناسبه للموضوع جدا كمان

بس ياريت اى حد موجوده عنده يرفعهالى عشان اعملها دون لود او يقولى بس على الاسم وانا ادخل اجيبها من اى موقع

شكرا عمرو

كل الطيور بتهاجر

[nash]

أخي الكريم مسالم

حقيقة سعدت كثيرا بالحوار معك...واردت ايضا أن أسجل أعجابي بطريقتك المميزة في الحوار والسرد...

قليلا مانجد من يتمتع بهذه الموهبه الجميله في السرد والتشويق....

أيضا أحيانا كثيرة نجد من قوة الرد ما لانستطيع معه إضافه اي جديد يحسب له...

فقط أحببت التوضيح

دمت في رعايه الله وحفظه

[Alex Lover]

يا صياح الخير ياللي معانا ياللي معانا

الكروان غنى وصحانا وصحانا ,,,,

انا بحب الاغنية دي قوي قوي وخصوصا لما كنت باسمعها الصبح بدرى من اذاعة الشرق الاوسط وصوت الاطباق والكوبايات في المطبخ استعدادا للفطور السريع قبل ما نروح المدرسة وبطني توجعني علشان مش عايزة اروح المدرسة وبسرعة تيجي اغنيه فانتاستيكا ... فاكرينها

ايام جميله ودفئ الاسرة جميل جدا ربنا مايحرمناش من اولادنا ولا يحرمهم مننا .... زي ما انا اتحرمت من امي بدري ... علشان كده الذكريات دي غاليه عليا جدا ومش ممكن تتعوض بالمرة ....

كان فيه محل هانو في الاسكندرية في وسط البلد ،، كانت امي الله يرحمها تاخدني معاها علشان نشتري طلبات ولما ندخل هانو كان فيه كافيتريا في الداخل كراسيها جلد برتقالي وفيه بار هناك بيعمل عصاير مافتكرش ان كان فيه حاجة غير عصير الليمون وكنت بامووووووووت فيه وافضل دايمات مستنية ان ماما تقولي خارجين واقعد اقول يارب اروح هانو علشان اشرب الليمون ...

بعد كده كنا لازم نطلع على السوق الشعبي الللي هناك ونشتري فاكهة وخضار وام الخلول يا اسكندرانية فاكرينها ؟؟؟

يوم الجمعة بقى يوم الاجازة كنت اقوم من النوم الساعة 10 الاقي طبق الفول بالزيت والليمون والكرات والمخلل والعيش الاسكندراني السخن والبدنجان الاسود الطويل المخلل وانا واخواتي نديها اكل ونرجع نقعد نتفرج على سينما الاطفال

سيما الاطفال سينما

سينما الاطفال سينما

فيها الحقيقة وفيها الخيااااااااااال

بجد ايام دافئة جدا جدا

اخي الفاضل مسالم انا ضحكت باعلى صوتي من سردك لموقف الجارة اللي اتخانقت مع الناظر بجد تجنن .. واتمنى ان تظل متواصل معنا بلا انقطاع .

بالمناسبة بالنسبة لموضوع السمن البلدي .. انا من انصار السمن البلدي والتقليه والاكل اللي يفتح النفس ده ولو اني بتهدد من الناس كلها ان ده هيكون السبب وراء امراض العيله كلها ولكن بصراحة اولادي بيحبو الاكلات التقيله دي ولو انهم لسه صغيرين ... بس برضه النودلز افطارهم المميز :D

اتساءل اين أبو محمد لماذا ابتعدت عن الساحة ؟؟؟ لعل المانع خير يارب

عمرو عروستك عندي يا سيدي بس انت ابعثلي السي في بتاعك

يا اعضاء الرابطه

عندكم استعداد تسمعوا اخر كتاباتي الشعرية ... يارب تعجبكم ياااااااااارب

كلموني عن بلادي

رجعوني ليوم ميلادي

لسه فاكرة ايوه فاكره

وهى دي مش تبقى ذكرى ؟

ذكرى احلى ايام حياتي

فكروني بعم جابر ..

ولا بوظة عم صابر

فكروني بمحشي امي

فكروني بفول حارتنا

ولا بصارة نور جارتنا

فكروني بالشوارع

باللي رايح واللي راجع

بابتسامة واد صغير .. ولا صوت مقرئ في جامع

فاكرة اول يوم في شغلي

فاكره يوم السبت بدري

فاكره دعوة ام حلوة تشدني وتاخد بخاطري

فكروني بالحسين

واحنا لسه صغيرين

فكروني بالفيشاوي والاهالي الطيبين

فكروني بيوم خطوبتي ...

فكروني بفرحة اختي

فكروني بلمة اهلى يوم خطوبتي ودخلتي

كنت طايره بفرحتي

لسه فاكرة ايوه فاكرة

وهي دي مش تبقى ذكرى؟

ذكرى احلى ايام حياتي

تم تعديل 12 نوفمبر 2007 بواسطة Alex Lover

[amrhoras]

جاني هاتف فى المنام وقالى تعالى على المحاورات

روحت ألبي يا سيى السيد (اقتباس من بين القصرين)

أليكس انتى بجد رجعتيني ورا خالص فكرتيني بأيم الطفوله وخصوصا يوم الجمعه لما كنا نجتمع احنا الاربعه بابا وماما واختى

الخميس بالليل كانت ماما تعملنا العشا واى حاجة حلوه خفيفه جنبها ونقعد احنا الأربعه نتفرج على فيلم السهره فى التلفيزيون اللى كان 3 قنوات اولى وتانيه وتالته

ولما نزهق عشان طبعا الارسال فى الشتا نفتح الدفايه أم شمعتين ونقعد مع بعض نهزر كلنا كنا ساعات حتى نلعب الشايب ونتقسم فرق وياويله اللى يبقى معاه الشايب هههههه

نيجي يوم الجمعه الصبح أصحى على إلى ربات البيوت صفيه المهندس وبابا يصحى من بدري ينزل يجيب الجرايد والفطار طعميه على فول وماما تجهزهم فى المطبخ وانا اكون مستني الحدوته بتاعة ابله فضيله

ياولاد ياولاد ايه تعالو معايا علشان نسمع ابله فضيله هاتحكيلنا حكايه جميله ده اللى فاكره من الاعنيه

بعد كدى سينما الاطفال وابتهالات الجمعه وماما بتكويلى الجلبيه بتاعة الجمعه هههه يــــــــاه يا أليكس انتى رجعتيني بجد لزمان

قول يازمان ارجع يازمان على فكره انا كنت بكح بالعافيه عشان مرحش المدرسه كنت بقى استني بابا الله يرحمه يدخل يصحيني كان عارف انى نايم يروح يقعد يزغزغني لغاية لما اضحك ويحضنى ونقعد نجرى بقى حنتأخر الساندويشات يووه فين الشراب ياماما الزرار اتقطع هههه حالة من الهيستريا الجميله

أيام الاجازات بقى نتجمع كلنا فى البيت الكبير وعمامى يجو من القاهره والاطفال الصغيره يتجمعو يلعبو طول الليل والكبار يهزروا والستات مع بعضيهم كله مع بعضه ضحك ومناقشات وكلام وتيته الله يرحمها كانت ساعات تجمعنا وتحكيلنا الحدوته من بتووع زمــــــــــــــــان

اليكس انتى حترجعيني صغير تانى اه والله صباحك ورد بجد والابتسامه الصافيه والبال الرايق مع قليل من زقزقة العصافير على حبة هواء صافيين وريحة البحر فيهم

اده انا معنديش بحر فى بلدى انا من أهل الشرقيه على فكره عشت طول حياتى فيها :D هو انتو مين انا فين اده طب انا ايه اللى جابني هنا اكيد اكيد كنت بحلم :D مفيش حد هنا من الشرقيه خالص بس سيبك بحب اسكندريه واهل اسكندريه

بين شطين وميه

على فكره هايل أبيات الشعر اللى كتباها بجد ترجعك لذكريات كتييير اسلوبك بجد معبروكلماتك بسيطه ورقيقه جدا اوى والله بجد بس هو المحشي :D ورايا ورايا ههه

اده هو العرايس اللى أيام دى لازم سي في ينهار ابيض وواسطه بقي وعدي علينا بكره ياسيد انا داخل اتجوز ولا رايح مصلحه حكوميه :wub: لا ياختي اذا كانت كدى مش متجوز بقى و هن الخسرانين :D

اه شكر خاص لمدام فولانه وبدريه على الاغنيه اللى طلبتها بس عاوز بين شطين وميه بقى المره دى اما اشوف شطارتكم rs:

شكرا اخوكم عمرو

[badroora]

اه شكر خاص لمدام فولانه وبدريه على الاغنيه اللى طلبتها بس عاوز بين شطين وميه بقى المره دى اما اشوف شطارتكم :P

شكرا اخوكم عمرو

حمل من هنا

كل اغانى محمد قنديل

smk: اى خدمة يا اسكلانس

وايضا الاغنية موجودة فى موضوع ذات صلة

عشاق اليكس

نجفة مش تتعجز واااااااااااااصل :lol: B)

:P با ي باي

[amrhoras]

:lol: ماشا الله والله يابدريه يابنت بلدى انت زي السكر

عموما شكرا شكرا شكرا من هنا لبكره الصبح :P بس اليكي من عهد انى حدورلك على اغنيه بقى مش حتلاقيها انتظرينيsmk:

بجد شاكر ليكي اهتمامك وربنا يوصلك مصر بالسلامه وامانه عليكي يا بدردر تسلميلي على اهل مصر

مصر امانه فى ايديكى يا بدريه (ربنا يستر)B):P:P

اخوكى عمرو نديم

بس عشاق اسكندريه هم عشاق مصر كلها اللى يحب جزء يحب الكل وكمان احنا جيران يعنى انا( ش ر ق ا و ى )

بس اعشق اسكندريه بصراحه حقيقه لا انكرها وياريت تذورونا والله البيت بيتكم

تم تعديل 12 نوفمبر 2007 بواسطة amrhoras

[Alex Lover]

Good morning

:lol: :lol:

صباح الخير .... اخباركم ايه يا جماعة ... عاملين ايه ... يارب تكونو بخير

انهادرة حبيت افكركم بحاجة جميلة اكيد كلنا مرينا بيها وهى الاستعداد للمصيف واحنا صغيرين وطبعا مفيش حد فينا ينكر اننا كنا بنستنى اليوم ده بفارغ الصبر .. ونجهز الشنط حتى احنا بتوع اسكندرية برضه بنعتبره سفر ونروح مكان تاني نصيف فيه ،، الكبار طبعا كانو بيبقو متوترين وبيجهزوا وخايفين ننسى حاجة لكن احنا الاطفال واطفال العيله ملمومين لابسين المايوهات تحت الهدوم وقاعدين نستعجلهم ... فيه سندوتشات مميزة كان لازم ناخدها يوم زي ده زي سندوتشات الكبدة الاسكندراني المشطشطة والفول ابو صلصه حمرا ,,,

افضل الشواطئ كان شاطئ البيطاش ، احنا كنا بنحبه لأنه رملته بيضاء وناعمه والمياة لونها ازرق والشاطئ بصفه عامه هادي ، كنا ناخد مضارب الراكت وكنت انا واخويا لعيبة راكت ... فاكره ان اول ما نوصل على اول الشاطئ ، احنا الصغيرين نجري ومالناش دعوة بحاجه ونخلع الهدوم وننط في المياه ولما يخلصوا ويركبو الشمسية ينادو علينا

كنا نقضى اليوم كله في المياه كلللللللللله ونرجع اسود من الفحم وكل واحد يتنافس مين اللي جلده هيقشر الأول ... بجد كانت ايام جميله

الاجمل بجد انك تحاول تترجم ذكرياتك الى كتابه ... بجد حاجة جميلة جدا وباحس وانا باكتب اني رجعت للايام دي وعايشاها وحتى سامعه اصوات ناسها ,,,

صباحكم سكر

تم تعديل 13 نوفمبر 2007 بواسطة Alex Lover

[zizetta]

لجميع أعضاء رابطة عشاق مصر .. ولكل المصريين أهديكم هذا المقطع :

حلوة يا بلدي

تحياتي

زيزيتا

[قاهرى]

اهلا بيكى اليكس لوفر .. صاحبة من اجمل مواضيع المحاوارات

اسف للتاخير عنكم .. اصل مشاء الله التعليقات على الموضوع كتيرررررر اوى وانا مقدرتش اقرى كل المواضيع بس انا حبيت اكون معاهم واقول ام مصر اجمل بلد فى الدنيا صحيح . واسكندرية عروسة مصر بجد

وكمان حلوة اوى الاغنية الى انتى حطاها فى الرابطة دى

بجد اجمل رابطة على المحاورات .. تسلم ايديك اليكس لوفررررررر بجدددد

فكرة اسمى الى انتى مسميهاولى

اخوكى .. قاهـــــــــــــــــرى

وحشتنى مصر اوى اوى

[Alex Lover]

اهلا بيكى اليكس لوفر .. صاحبة من اجمل مواضيع المحاوارات

اسف للتاخير عنكم .. اصل مشاء الله التعليقات على الموضوع كتيرررررر اوى وانا مقدرتش اقرى كل المواضيع بس انا حبيت اكون معاهم واقول ام مصر اجمل بلد فى الدنيا صحيح . واسكندرية عروسة مصر بجد

وكمان حلوة اوى الاغنية الى انتى حطاها فى الرابطة دى

بجد اجمل رابطة على المحاورات .. تسلم ايديك اليكس لوفررررررر بجدددد

فكرة اسمى الى انتى مسميهاولى

اخوكى .. قاهـــــــــــــــــرى

وحشتنى مصر اوى اوى

اهلاااااااااااااااااااااان يا قاخري .... اخبارك ايه .. انت كونت فين روخت فين وسيبتنا في المخاورات لوخدنا :lol:

لا بجد نورت الموضوع يا قاخري

بس ما تبخلش علينا بالذكريات الحلوة ... انهاردة مفيش غيرك حد دخل ولا اضاف اي تعليقات الظاهر الساقعة عامله عمايلها معاكم الا صحيح الجو في مصر اخباره ايه اليومين دول

هنا في الكويت بدأ يبرد شويه

[Alex Lover]

لجميع أعضاء رابطة عشاق مصر .. ولكل المصريين أهديكم هذا المقطع :

حلوة يا بلدي

تحياتي

زيزيتا

شكرا يا zizetta على الاغنية الحلوة ... بجد مساهمة رقيقة منك ... يارب متحرمنياش من وجودك واهلا بيكي بيننا الى الابد

:lol: :lol: :lol:

[amrhoras]

اتهام خطير منك ان محدش جه زار الموضوع انهارده

بس والله تلت مرات اكتب وبعدين تجيلى شغلانه امسح او اقفل وامشي

سأعود بعد الفاصل الغنائي اللى شغال فى الصفحه ده

حبيت بس اسجل انى حضرت والله يا أبله بس انتو اخدتونى غياب أروح بس اعمل حاجة اخلص شغل البنوك وارجع تانى ثانيه واحده (قيمة ساعه ساعتين يوم يومين شهر شهرين ) بس راجع انشا الله :lol:

[Folana]

لجميع أعضاء رابطة عشاق مصر .. ولكل المصريين أهديكم هذا المقطع :

حلوة يا بلدي

تحياتي

زيزيتا

السلام عليكم ورحمة الله...

الأخت الغالية زيزيتا...أغنية "حلوة يا بلدى " من الاغانى المحببة لى جدا...لكن لما سمعتها دلوقت من أصالة شعرت انى مغتربة...وبلدى وحشتنى جدا... :lol: ..املى كان يابلدى انى ارجع لك يا بلدى وافضل جنبك على طول.. :lol:

قد كده معبرة وبتقولها باحساس عالى....

شعور مؤلم ان احساسنا الغربة يتملكنا واحنا فى بلدنا....ربنا مع كل المغتربين ويردهم لنا بالسلامة....

واستعير هنا توقيع الفاضل داروين :

القسوة أن ألقاك غريبا ... في وطن ناء عن وطنك

والأقسى غربة أنفاس ... بين الخلان وفي أهلك