رابطة عشاق مصر (أليكس لوفر)

[Folana]

السلام عليكم ورحمة الله....

زقزق العصفور صحانى... والعصفور هنا او العصفورة بقى هى alex lover شممتنى بصلة وفسيخة خلتنى افوق وادخل جرى...

وبالرغم من انى مش مغتربة..الا ان ذكريات شم النسيم كتر..وكنا لازم نقيم له الطقوس الفرعونية المعتادة..يعنى نصحى بدرى انا واختى..ونلون البيض..بس صراحة يعنى هى كانت فونانة..يعنى بترسم حلو جدا..وكنت دايما اخليها ترسم لى لوحات المدرسة..فكانت بقى تقعد تفنن فى البيض اشكال والوان..وتعمل شكل بلياتشو وحاجات كده تغيظ..وانا افضل اشخبط واشخبط لما البيضة تستجير منى..

لكن أمى الله يرحمها كانت بتشجعنى وتقولى حلو ..حلو..

وطبعا وجبة الفسيخ والسردين المعتادة...

لكن من يوم ما تزوجت وخلالالاص كل ده انتهى...لان زوجى العزيز أورجانيك..يعنى ممنوع نلون البيض علشان الالوان مضرة...وطبعا لا يمكن المح فسيخة لا انا ولا ولادى خالص...ويفضل يوصف لى الفسيخ بيبقى فسيخ ازاى .. :lol: ..ولو عرف ان اخته وكانت جارتى فيما مضى بتوزنى اكل معاها فسيخ ..يبقى يوم مش فايت...

حتقولى لى امال بتعيشى ازاى يوم شم الفسيخ..اقولك بيجيب لى البديل...سيمون بقى على كافيار على حاجات من دى....(ايوه ييعع فعلا )..:phar:

ابقوا ابعتوا لى سردينة نونو كده حتى على الخاص وانا مش حاقوله... (وش واحدة بتقعد على كرسى الاعتراف 3 مرات يوميا )

صباحكم جميل............ :ninja:

[salemhegazy]

شكرا اليكس على دعوتك و الليمون جاهز اهه ةةةةةةةةةة

لكن يا جماعة ليه بتسبقوا الاحداث مستعجلين الايام ليه شم النسيم لسه بدرى عليه فين شهر ابريل

انتم موش سمعين مأمأة الخرفان و لا ايه و صوانى الرقاق و افواج الحجاج وووووووووو

و الاولاد الصغار يلعبوا مع الخروف و يغنوا بكرة العيد و نعيد و نذبحك يا شيخ سيد

بكرة الوقفة وبعده العيد و نذبحك يا شيخ سعيد

ايههههههه

[nash]

صباااااااااااااح الخير ... :ninja: :lol: .

صباح الورد والياسمين علي عيون الحلوين.....

والله يا جماعه انا قاعده بقرا الموضوع الجميل ووقعت من الضحك...نو ممكن...

ايه الجمال ده..أليكس وعمرو واخي الكريم مسالم...بجد بجد عندكم موهبه خياليه في السرد...الظاهر فيه مواهب مدفونه واحنا مش واخدين بالنا....

تكمله لسرد الذكريات....ماليش دعوة أنا هبتدي من الأول...

بصراحه أحنا بدأنا حياتنا في مصر الجديده...وكان بابا الله يرحمه...زيك باباك يا عمرو أتوفي واحنا صغيرين...بيشتغل في الإسماعيليه..(مباحث ) يا عمرو..أة والله...بس أكيد مش مخبر يعني...

المهم أنتقلنا إلي المدينه الساحرة...يادوب سنتين والوالد أتوفي....تركنا الإسماعيليه..وأنتقلنا إلي بيت جدي بالمنصورة...بالرغم من حبنا للمنصورة..إلا أنه في هذه السنه وحتي الأن ..سوري يا جماعه..أكرهها...ونو وااااااي أدخلها إلا في المناسبات السعيده والتعيسه...ثم عدنا مرة ثانيه بعد حوالي عام إلي مصر الجديده...

قضيت فيها مرحله الإعدادي...وياسلام علي مدرسه مصر الجديدة النموذجية أحلي أيام...والاجمل باص المدرسه..كان باص مصر الجديده غير بتاع المطريه والأماكن التانيه..حاجه كده فايف ستارز..كنت أحب أزوغ منه واركب المترو ...أحيانا يعني علشان أعيش معاناة الشعب....وكانت ماما تنقهر..يابنتي أرحميني مشتركين في الباص بستين جنيه في الشهر علشان ماتتبهدليش ..لكن أبدا...بحب أكون مع صاحباتي....

الحمدلله تركنا فترة الإعدادي علي خير..ورجعنا للإسماعيليه تاني...ياربي بعشقها..

مدينه خياليه..واهلها اطيب ناس....والأحلي ان الكل بيعرف الكل...

لكن للأسف كانت علاقتنا محدوده بسبب ظروف وفاة بابا ولإن ماما كانت صغيرة في السن وعارفين طبعا كلام الناس....

خلصت مرحله الثانوي في الإسماعيليه ..ودخلت علي الجامعه....

وكانت جامعه الزقازيق...ياربي كانت أحلي أيام بجد...قعدت فيها سنه واحده...وقلقت من موضوع العنوسه ..كملت بعد كده العشرين سنه بتوع الجامعه وانا في الرياض...يادوب أتخرجت بعد معاناة وياسر الشاب الوسيم أبني متخرج من سنه تانيه ابتدائي....أيام ماتتنسيش....

بس الحقيقه أحلي حاجه واروع ذكريات مع أخواتي البنتين التانيين...كنا قتله...مافيش ورانا غير نعمل مقالب في بعض...ويمكن لسه العاده المتأصله فينا شغاله لغايه دلوقتي...ربي يخليهوملي....يووووووووووووة ...كفايه بأة لحسن والله دموعي قريبه....

وحشتني مصر والأهل والصحاب وكل الدنيا ...

من النهارده إن شاء الله مسجله متابعه يا جماعه....

تسلمي يا أليكس..موضوع راااااااائع

[Alex Lover]

انتي اللي هتعيطي يا ناش .. والله انا اللي عيطت خلاص وانا باقرأ كلامك . افتكرت اختي ربنا يديها يارب الصحة ويبارك لي فيها .

[amrhoras]

ايه ديه ايه الساسون والبفيار ديه مش هو بفرة السجاير برده:ph34r:

ياستي لكل عصر وله اوان الفسيخ حتى معدش فيه لذه من بتوع زمان

انا خايف ارجع مصر الاقى كلمة فسيخ دي اندثرت زى الديناصورات بتوع زمان

الله معانا مدام فولانه نبعتلك سردينه كبييرررره عشان تكفي ع كذا مره بس حسبي ريحه الايميل تطلع واوعى تقفلى الجهاز علشان الكهربه والسمك يخسر :blink:

صباح الورد :phar:

:ninja: :lol:

[nash]

لا يا أليكس مش عايزين نزعل..خلينا نفتكر الذكريات الجميله ونعمل ذكريات جديده....

ربنا يخليلنا كل أحبابنا...

بالك انتي لو ليكي أختين زي اللي عندي..كان زمانك أتجننتي وجريتي علي الكورنيش وانتي منكوشه....وماشاء الله أنضملنا اولادنا..نفس الجنان ...كربونه والله.... :roseop:

أضحكي بأة وروقي محدش واخد منها حاجه ....

صباحك جميل :ninja: :lol:

[Alex Lover]

الاخ العزيز سالم ... انا كتبت حاجه افتكرتها بدون ترتيب مواعيد تقريبا تقدر تقول اننا كل اللي يجي على باله حاجه بيكتبها مش مهم علاقتها ايه بالموضوع ولا ملهاش علاقه حاجه.. يعني ناش مثلا دخلت ردت علينا بذكريات تانيه خالص وخلتني اعيط على الصبح هههههههههه

انت برضه اتكلمت عن عيد الاضحى .. احنا هنا كلنا براحتنا اللي عايز يتكلم في حاجه يتكلم عنها ، بس على رايك بما ان الخروف قرب اقصد العيد قرب ده قصه تانية .. اول حاجه قبل العيد بيومين تبتدي تشم ريحة الخرفان في الجو كله ,,, ويوم العيد الفجر نلحق نقوم علشان نشوف الخروف وهو بيتدبح (يععععععععععععع ) وماما تبقى حريصه تحتفظ بفرو الخروف ويتحط في الشمس فوق السطح لغايه ما ينشف ويعالج معرفش ازاي المهم بيبقى مشاية صوف جميله توضع على باب اي غرفه (فيه حد بيعمل كده دلوقتي) ؟.؟؟؟

المهم اننا كنا نفطر الصبح (العليقة ) بتاعة الخروف ... يعني البدة والكلاوي والقلب وكل ده ماما تقطعه ويتعمل بالتوم والكمون كله زي الكبده الاسكندراني وناكله على السريع فطار متين لغايه ما يجي وقت الغدا وماما تطون سلقت اللحمة وعملت عليها الفته ام خل وثوم يا سلاااااااااام ( على فكرة انا طابخه النهاردة فته بخل وتوم ) تعالو كلو معايا

ناكل بقى ونديها ونستنى العيدية ... ونتفرج على مسرحية المتزوجون والعيال كبرت ولما كبرنا شويه بقت مسرحية ريا وسكينة ... بجد ذكريات لا تنسى

عمرو .... ربنا يخليك ماما ومايحرمكش منها ومن ضحكتا ابدا .. بس ما قولتلناش بتحب الفسيخ ولا خلاص ؟؟؟

فولانه ... يا بتي انتي فنانه بس مش واخده بالك لوني انتي بس وملكيش دعوة ههههههههههه

شكرا يا جماعة على مشاركتكم الجميييييييييييييله والممتعة

[Alex Lover]

لا يا أليكس مش عايزين نزعل..خلينا نفتكر الذكريات الجميله ونعمل ذكريات جديده....

ربنا يخليلنا كل أحبابنا...

بالك انتي لو ليكي أختين زي اللي عندي..كان زمانك أتجننتي وجريتي علي الكورنيش وانتي منكوشه....وماشاء الله أنضملنا اولادنا..نفس الجنان ...كربونه والله.... :phar:

أضحكي بأة وروقي محدش واخد منها حاجه ....

صباحك جميل :ninja: :lol:

ناش لا يا قمر انا مش زعلانه الحمد لله انتي كتر خيرك هتخليني اتصل بيها انهارده وهابلغها ان انتي السبب

ربنا يخليهم ليكي يارب يا جميله

فولانه انا هابعثلك فسيخه بحالها واللي يحصل يحصل اعصري عليها الليمون والبصل الأخضر واديها وادعيلي

تم تعديل 20 نوفمبر 2007 بواسطة Alex Lover

[nash]

لا تأخذي الفسيخه يا فولانه ...الفسيخه وراءها سم قاتل....

وبعدين سي الأفندي ..هايغربك معانا مظبوط...يابنتي أنتي الأمل الوحيد الباقي لنا من ريحه مصر....

ماتسمعيش كلامها أحنا لسه محتاجينك.... :ninja:

..................................................................................

تصدقوا بالله...أنا كنت بعشق الفسيخ....عارفين...لما قولت بالصدفه كده لابو ياسر....

بجد بجد بصلي بصه غريبه....لدرجه أنا فكرت أني جبت سيرة حاجه بطاله من والعياذ بالله مسكرات أو مخدرات....

وبأة مع مرور الأيام ..اصبحت مثله ...كبيري رنجه وعند صاحباتي كمان ....

اييييييييه أيام.....

..........................................

أنا عملت تحرير سريع علشان أفكرك يا اليكس تتصلي بأختك الليله...امانه عليكي بأة وانا كمان هاتصل بيهم..رغم أنهم مرميين قدامي علي الماسينجر...ولا حد فيهم بيدخل يعبرني...

اصلهم بيقولوا أنهم مشغولين....

قال يعني أنا اللي فاضيه.......

تم تعديل 20 نوفمبر 2007 بواسطة nash

[amrhoras]

اده اده اده

ايه يا اليكس وحدى الله تعيطي ايه بقي استني ده فى مفاجأت

جامعة الزقازيق ونيجي هنا خطين ونقطه من اول السطر.

ومسكانى تريقه فى كل حته وانتى بلدياتى با مدام ناش برده ماشي ماشي ماهو بدال قعدى فى الزقازيق يبقى خلاص بقيتي مننا

كنتى كليه ايه بقي اوعى تقوليلي تجاره :lol:

ربنا يرحم بباكى وببابي وكل اموات المسلمين يارب

اتخضيت لما قولتيلي مباحث خلتيني ارمى السجاير اللى فى جيبي ياشيخه هى دى اخرى :phar:

وكمان من المنصوره وقعدتى فى الاسماعيليه انا ليا فى الاسماعيليه صولات وجولات حاكم كنت بشتغل فى السمعليه 4 شهور

ولها زكرى حلوه برده كفاية الحب الاولي (بكسر الياء) كان هناك اول لقاء بيننا :ninja:

مصر الجديده يعنى الكوليه الحربويه عامان من الخدمه ههههه

لا لا لا لا احنا طلعنا معرفه بقى سيبك من السيراميك بقى وعوزين غديوه اكلة اسموكى مشويه كده منصورى على سمعلاوى على حتتين داتوه من مصر الديده

ربنا يسعدكم يارب ويباركلكم فى اولادكم جميعا

اليكس اليكس زكريات حلوه اه انما دموع لا لا نو نو كان فى اغنيه لحليم الله يرحمه كان فيها مقطع اسمه افرح ياقلبي وسيبك من دموع لحماده هلال دى الكمبيوتر بتاعى هنا بيقولى انا طهقت منك الصبح مشغلى دموع وبالليل الست ربنا يكرمنى واغير اليوزر بتاعى (قصده انا)

اه نيجي لسؤالك يا اليكس ياختى انا اقولك على حاجة

انا احب كل المأكولات الخفيفه الفسيخ اكله بس يعنى حته بس كده زوق منى وخلاص

بس طالما الاكل بعيد عن البصل والسمنه انا اكل اكل اكل لغايه لما اقول بس عشان كدى انا خسيت :ph34r:

تم تعديل 20 نوفمبر 2007 بواسطة amrhoras

[amrhoras]

اده كله حيتصل يعنى باخواته

طب والله لاتصل بالبت بتعاتى (بنت اختى سنتين) هههههه نلوك اى كلام بقى

الوووووووووووووووووو

عمور حبيبي

حالو ممش(صديق الحضانه) اسمه محمود ودلعه ممش ضلبني سوف اوفا

عمووووور حبيبي

شويه كلام بقى مش فاهمه اكب جيحه سوفت السيكل تاعى يقول تيت تيت

بس ضحكتها عندى بالدنيا كلها

اما بقى عن العيله المصونه مبنعرفش نتكلم خالص من الانسه المبجله بسبوسه

نقلتلكم مكالمه هوائيه مباشره من ارض النيل والخير

عمرو

اليكس روقي كلمتى اختك ربنا يارب يطمنك عليها يارب

[nash]

عمرو...كنت بتقول أيه.....فجأة مش سامعاك...الخط بيغلوش...

لأ مش تجارة ...انا كبيري في الرياضيات لمستوي رابعه ابتدائي الحقيقه..وكتير كمان...

أنا أداب يا باشا...وياسلام لو تسألني عن التخصص..أصلي بزعل أوي لما حد يقولي أنتي كليه ايه واقوله اداب ...يبصلي ويسكت..طيب ماتكمل السؤال...حاجه غريبه الحقيقه.................................................................................................................................

[amrhoras]

من سأل فيما لا يعنيه سمع مالا يرضيه :blush2: عشان كدى مش بسأل :unsure:

طب وين العزومه طيب :blink:

شكلك كدى تخصص اما فلسفه او علم نفس ومش تقوليلي لغه عربويه سبب فشل مسيرتي التعليميه :P

وبيقولو ماغريب الا الشيطان

وكمان اده يعنى سيبتي كل ده ومسكتى فى الكلمه دى عجبت لك يازمن :lol:

تحياتى وسلام خاص الى مدام ناش :wub: يارب يكون الخط رجع تانى توت توت توت اده ده مشغول

من فضلك حاول الاتصال فى وقت اخر الرقم الذى ضربته غير موجود مؤقتا بالخدعه قصدى الخدمه

تم تعديل 20 نوفمبر 2007 بواسطة amrhoras

[nash]

شكلنا هاناخد أنذار علي الشات اللي أحنا عاملينه.....

وبصراحه بأة شايفاها فرصه أني اقولك .....

قل( كدا ) ولا تقل ( كدي ) اصلها مش ياء مقصورة ...بصراحه أنا مش عارفه السبب بس متأكده أن أسمها كدا....

.........................................................................................

شم النسيم في الإسماعيليه....بما أن الأخ محسن طلع بلدياتنا ومن نفس النادي يعني....نقول

طبعا الجناين بتتزحم من الصبح ..منظر الناس في الشارع بيكون جميل وطبعا بيكون زحمه جدا وكل المحافظات حتي سكان حي الزقازيق بيقضوا شم النسيم في الإسماعيليه...

كنا نقضي هذا اليوم في نادي الشرطه..وبيكون يوم من احلي الايام...اسوأ حاجه فيه أنه ممكن يكون صابح اليوم التالي أمتحان الجامعه....

طبعا كان لازم البيض الملون...نفسي أعرف أيه الكميات المجنونه اللي كنا بنعملها دي؟؟ طبعا لازم نزود علشان الالوان كلها تتحط علي البيض...

طيب فاكرين الملانه؟؟ والحلبه المزروعه والترمس؟؟؟

أنا أتذكر أن ماما كانت تزرع الحلبه قبلها في قصاري مثل قصاري الزرع..أو حاجه زي كدا...

أخر مرة قضيت شم النسيم في مصر كان من زمان جدا...وهنا في الغربه بنعرف أنه كان شم النسيم في اليوم التالي...ولذلك مش متذكرة بالضبط غير هذه الذكريات ...

بس بأة الروعه بجد ..أخر اليوم..لما الإسماعيلاويه يجيبوا مجسم لواحد أسمه ( الليمبي) ويحرقوة ويقعدوا يهيصوا ..والبلد تبأة كلها ريحتها دخان ...ومنظر عوده الناس لبيوتهم أخر اليوم وهما متجمعين بيكون منظر خيالي ...منتهي الحميميه والطيبه..

أيام جميله.....

[salemhegazy]

و بعد العيد الكبير فيه اعياد الاخوة المسحيين و بيعملوا كعك و بسكويت ايضا و ريحة السمن تملأ الشوارع

و يجىء الشتا يا طول لياليه و صحن الكشرى من عند جحا بعماد الدين بعد حفلة من 6 الى 9

و طبق البليلة بالكنافة من عند عم فرج اللى واقف عند موقف الاتوبيس و انت واقف لابس قميص و بلوفر و فقيهم جاكت و تفرك ايديك و البرد يلسع فى ودانك

اييييههه

[سكندريه]

يااااااااااااااااااااااه فكرتوني بأحلى أيام حياتي أجل أيام فعلا مصر حاجه تانيه يا جماعه ريحه تانيه لون تاني أنتم عرفين أنا لما بنزل من الطياره في بلدي بكون فرحااااااااااااانه أوي وبحس لو بلدي دي حد كنت حضنتها أوي وقلتلها يااااااااااااااااااااااه وحشتيني أوي

[مسالم]

سامحوني يا جماعه .. مش قادر ارد عليكم دلوقتي ..

انا يادوب فتحت الموضوع .. لقيت زمايلي اللي جنبي في الشغل .. بيقولوا أيه الريحه الغريبه دي .. ايه ياباشمهندس الريحه اللي طالعه من الكمبيوتر بتاعك ده ...

رحت قافل الموضوع بسرعه .. ورشيت اسبراي ...

لكن لي الحق في الرد اول ما الاقي فرصه .. في الهواء الطلق ... :blush2:

[salemhegazy]

الاخت اليكس افضل الموضوعات اللى بتكون و ليدة الصدفة بتكون فيها ( براءة الاطفال فى عينيه)

المهم ليه بتقولى ( يععععععع) على الخروف و هو بيندبح؟؟؟!!!!1

دى كانت لحظات شيقة بالنسبة لينا جدا جدا و نتفرج على الجزار و هو بينفخ الخروف و يسلخ و يبتدى يفتح بطنة و هنا تدور المجادلات فىن الجهز الهضمى اللى قالا لنا عليه فى سنة ستة؟ يا ابنى دى اسمها الكرش و دة الزمارة تقصد يعنى المعدة و المرىء ؟حد جاب سيرة العدوة و اللى بيمء من هنا و ده ايه دة يا عم يا جزار ده يا ابنى الوردة وردة ايه؟ الفشة الفشة اللى بيدخل فيها الهوا. قصدك الرأتين دى ببتاكل دى ؟ ياسلام عليها مع التخديعة بالبصل و التوم

ايييهه جعنا دة و قت الغداء

[mohsensamak]

يا جماعة بقى لى ساعة بأكتب رد لأنى بطئ جدا فى العربى و فجأة اتمسح :blush2:

عموما أنا كنت باحكى عن موضوع اللمبى اللى الأخت ناش ذكرته بسرعة كده

اللمبى ده على حد علمى كان قائد انجليزى مفترى على منطقة القناة و من كتر ظلمه الناس أتفقوا يحرفوه و فى يوم و هو طالع على بورسعيد من اسماعيلية طلعةا عليه فى الطريق وولعوا فيه هوه و عربيته

و دى كانت ليلة شم النسيم و من يومها و بيتم الإحتفال بالليلة دى فى اسماعيلية و بورسعيد كل سنة

الشباب بييجى قبل شم النسيم بشهر تقريبا و يتباروا فى عمل العرائس القماش و كل ما العروسة كبرت كل ما اللحى او البيت بقى أجدع و أول ما تكمل العروسة تتعلق على البيت للإستعراض فى انتظار يوم الحرق

و ليلة شم النسيم على نص الليل يبدأ الشباب يزفوا الرايس دى بالعربيات و تىقى البلد كلها زمامير لحد الفجر هب يقوموا مولعين فيهم كل شلة فى الحى بتاعهم و تصحى البلد الصبح على أحلى دخان و أحلى ولعة

و على أيام عبد المنعم عمارة ربنا يصبحه بالخير (أحسن محافظ مسك أسماعيلية) قنن عملية اللمبى و وجه الشباب انهم يحرقوا فى أماكن معينة و عمل جائزة لأحسن لمبى و هكذا و الله كان فكره سابق عصره

لكن بعد كده مش عارف ايه اللى حصل بس سمعت انه المحافظين اللى بعده كان اتجهاهم القضاء على مظهر الإحتفال ده بالمرة

ايه رأيكم بقى حد غير مدام ناش كان عنده فكرة عن الموضوع ده

أشكرك يا الكس انك فكرتينا بالحكايات دى لأن كانت على وشك تروح الريسيكل بن

وعلى ذكر الموضوع ده يا جماعة أنا بافكر جديا أديها رنجة النهارده و ده السقف بتاعى حيث ان الفسيخ به سم قاتل على رأى الأخت ناش

سلام

محسن

[salemhegazy]

سترالي يزور مجازر السويس للتأكد من عدم تعذيب .. الخراف 11/20/2007 9:49:00 AM

القاهرة - استمرت أزمة استيراد الحيوانات من إستراليا حيث وصل الاثنين وفد حكومي من وزارة الزراعة الاسترالية لتفقد أوضاع الحيوان في مصر.

ويزور الوفد مجزر السويس الآلي والحجر البيطري بميناء الأدبية بالسويس للتأكد من حسن معاملة الحيوانات وكيفية ذبحها آليا دون استخدام القسوة معها قبل وأثناء الذبح وسيرفع الوفد تقريرا للحكومة الإسترالية لتحدد موقفها من تصدير الخراف إلي مصر من عدمه.

وكانت الحكومة الاسترالية قد رفضت تصدير خراف الأضاحي إلي مصر هذا العام رغم اقتراب عيد الأضحي بحجة تدني حقوق الحيوان في مصر وتعذيب الخراف الاسترالية أثناء الذبح، حسبما ذكرت جريدة الوفد