Folana بتاريخ: 17 سبتمبر 2007 تقديم بلاغ مشاركة بتاريخ: 17 سبتمبر 2007 السلام عليكم ورحمة الله.... كل سنة وانتم طيبين....أنا فكرت أفتح ركن للشوربة....حيث ان ماحدش عايز يهدينا اى وصفة للاكلات ....فقلت نمشيها شوربة.... واتمنى انكم تشاركونى بوصفات مختلفة لها...وخصوصا الاخوات المقيمات فى الخارج...تيتة شهد...مصرية يعنى مصرية...اظن فيه اخت جديدة من الجزائر "نور اليقين"...يعنى برضه نتعرف على انواع الشوربات فى البلاد الاخرى.... نقول بسم الله ونبدأ.... شوربة الافوكادو... بداية مبشرة أنا عارفة .... المكونات:.... 2 وحدة افوكادو كبير ....من غير بذر ومتقشرة ومقطعة قشر وعصير ليمونة كوبيتن ونص شوربة تكون موجودة.... وحدتين طماطم 1 خيارة مقطعة قطع صغيرة فلفل رومى اصفر واحمر..من غير بذر ومقطع صغير جدا ..يعنى ثمرة وثمرة فصين ثوم مهروسين ملح وفلفل ....وروز مارى او اى عشب اخضر للتزيين... الطريقة............ نمزج الافوكاتو مع الليمون (قشر وعصير) والشوربة فى وعاء لحد ما يتجانسوا ويبقى سميك شوية ونسيبها على جنب حنقشر الطماطم عن طريق وضعها فى ماء مغلى لمده نص دقيقة وبعد كده نقشرها ..ونشيل البذر ونقطع الباقى قطع صغيرة جدا نضيف الخيار والطماطم والثوم والفلفل والتوابل فى اناء ونمزجهم ونضيفهم على الخليط السابق اعداده ونمزجهم مع بعض ..لحد مايبقوا بورييه كده ..وممكن نخففهم بشوية شوربة كمان ونظبط الطعم...وعند التقديم نجمل السطح بشوية طماطم وخيار وروز مارى مقطعين قطع صغيرة... شوربة البصل المقادير 4 حبات بصل , مقطع شرائح رفيعة - زبدة لتحمير البصل - شوربة معدة سابقا ...اى شوربة عندنا يعنى لحمام او بط او فراخ...لكن شوربة البط حتكون دسمة جدا..بلاش بط :blink: 4/1 خبز باجيت ..او ممكن بقسماط شرائح من الفرن 4/1 1 كوب جبنة شيدر ,مبشورة او اى نوع جبن .. الطريقة .... يضاف البصل مع الزبد فى إناء عميق على حرارة منخفضة. يغطى الإناء مع التقليب من حين لآخر لمدة 20-25 دقيقة. لحد مايصفر او يبقى بنى فاتح نضيف الشوربة . يغطى و يترك لمدة 15 دقيقة. حنقطع خبز الباجيت إلى شرائح . تشعل شواية الفرن وتوضع شرائح الخبز على صينية تحت الشواية لمدة دقيقتين حتى يصبح سطح الخبز بنى ذهبى. أو يمكن وضع الخبز في التوستر. ..ولو حتستخدمى الشرائح المحمصة يبقى مافيش داعى من الخطوة دى ... يوضع الخبزالمحمص في أوعية تقديم تصلح للفرن . تصب الشوربة فوق الخبز ثم ينثر الجبن بالتساوي فوق السطح. توضع الأوعية على رف الفرن تحت الشواية حتى يذوب الجبن و يصبح لونه بنى ذهبي . تقدم فورا. طبعا لو مافيش شوربة ممكن نستخدم ماء ومعاه مكعب مرقة دجاج وملح وفلفل وورق لورا ممكن كمان تحمرى ملعقتين دقيق للشوربة علشان تديها سماكة .... شوربة الجزر المقادير... نصف كيلو جزر ..مقشر ومقطع باى طريقة بصلة عودين كرفس مخرط ممكن بطاطس او طماطم حسب الرغبة.... مرقة خضار....او اى شوربة ملح وفلفل بقدونس مفروم وزبادى (او كريمة لبانى ) للتزيين زبدة وملعقة زيت الطريقة.... نذيب الزبدة مع الزيت ونقلب فيهم الجزر والبصل والكرفس حوالى 5 دقائق الى يذبل ويبقى دهبى فاتح جدا نضيف البطاطس او الطماطم ونضيف المرقة ( او الماء طبعا فى حالة عدم وجود مرقة ) ونسيب الخليط يغلى لحد المكونات ماتستوى بعد مايبرد نضربه فى الخلاط لحد ما يبقى ناعم جدا وبعد كده نضيف باقى المرق ونرفعه على النار ونتبل ...وعند التقديم نجمل الوش بعمل دوائر زى الدوامة كده بالزبادى او الكريمة اللبانى وفى المنتصف نزين بشوية بقدونس صغيرة .. { لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ } رابط هذا التعليق شارك المزيد من خيارات المشاركة
Alex Lover بتاريخ: 17 سبتمبر 2007 تقديم بلاغ مشاركة بتاريخ: 17 سبتمبر 2007 بعد اذنك ا جميل اضيف حاجة سريعة شوربة لسان العصفور معلقة سمنة على النار كوب لسان عصفور تتحمر فيها لغاية ما تصفر جامد نضيف 3 اكواب شوربة ونسيبهم يغلو لغاية ما تنضج المكرونة نحط ملح وفلفل ... وبالهنا والشفا رابط هذا التعليق شارك المزيد من خيارات المشاركة
نبض الابداع بتاريخ: 17 سبتمبر 2007 تقديم بلاغ مشاركة بتاريخ: 17 سبتمبر 2007 بس انا مش بحب الشوربه بحبكو انتو اكثر رمضان كريم الله يرحمك يا أمي رابط هذا التعليق شارك المزيد من خيارات المشاركة
لخبطه بتاريخ: 17 سبتمبر 2007 تقديم بلاغ مشاركة بتاريخ: 17 سبتمبر 2007 اتابع أنا الصائم الجائع بكل شغف :lol: مجهود رائع مدام فولانه جزاكي الله خير أنا لا أكتب الأشـــعار فالأشعـــــــــار تكتبني أريد الصمت كي أحيا ولكن الذي ألقاه ُينطقني رابط هذا التعليق شارك المزيد من خيارات المشاركة
nash بتاريخ: 17 سبتمبر 2007 تقديم بلاغ مشاركة بتاريخ: 17 سبتمبر 2007 تسلمي يا فولانه يارب علي موضوع الشوربات بس عندي مشكله من غير ماحد يضحك... :lol: دائما ما أسمع كلمه نضيف..علبه من الكريمه..أو كلمه مقدار نصف كوب من الكريمه.....( كريمه ) المقصود بيها ايه؟؟ هه من غير تريقه.. :wub: قصدهم مثلا القشدة؟؟ wst:: وياسلام بس لو حد ينزل بطريقه الشوربه بالكريمه والمشروم والذرة بس يكون مجربها وعلي ضمانته وتسلم أيدك مرة تانيه ورمضان كريم wst:: صن ضحكة الأطفال يارب فإن هي غردت في ظمأ الرمال أعشوشبت لكن إن زودوها وبكيوا ..ونكدوا ..... هايتلطشوا رابط هذا التعليق شارك المزيد من خيارات المشاركة
Folana بتاريخ: 17 سبتمبر 2007 كاتب الموضوع تقديم بلاغ مشاركة بتاريخ: 17 سبتمبر 2007 السلام عليكم ورحمة الله ... اختى الغالية alex lover ...تسلم ايديك ... ممكن تبشرى جزرة كمان بعد تحمير لسان العصفور ..ويفضل انه مايبقاش غامق قوى علشان ما يديش طعم مر..وتقلبى الجزر مع لسان العصفور وتضيفى الشوربة...بتدى طعم جميل... اختى العزيزة نبض الابداع...احنا كمان كلنااااااااااااا بنحبك...وبنحب الشوربة برضه..جربيها بس مش حتندمى .. اخى الفاضل لخبطة...ربنا يبارك فيك...نورت الموضوع... اختى الحبيبة ناش....ماحدش حيضحك wst:: :wub: :) ......شفتى مش قلت لك الكريمة دى بتبقى كريمة لبانى..بتتباع فى السوبر ماركت وعلشان تعملى شوربة بالكريمة...دى بقى بتحمرى ملعقتين دقيق فى السمن لحد مايبقى دهبى وتضيفى عليه الشوربة...بيديها سماكة وممكن طريقة تانية...انك تقلبى ملعقتين دقيق فى كوب زبادى وتسيبهم شوية يخمروا ..وبعدين تضيفها للشوربة وتقلبى كويس علشان ماتعملش كتل... ومن عنيه شوربة المشروم بالكريمة حتوصلك الصبح بالدى اتش ال...بس اكون مركزة شوية لانى بأنام دلوقت wst:: هاف آ نيس سحور.......... :lol: { لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ } رابط هذا التعليق شارك المزيد من خيارات المشاركة
ام البنات بتاريخ: 18 سبتمبر 2007 تقديم بلاغ مشاركة بتاريخ: 18 سبتمبر 2007 السلام عليكم ورحمة الله وبركاته يا سلام يا فولانه يا حبيبتى..شوربه بس حرام عليك قلت ادخل اخد كام وصفه علشان ارم بدن البنات...تقولى شوربه طيب انا عموما..هاخد وصفة شوربة الجزر اجربها...بس موعدكيش اجيب وصفه شوربه بس اخبار مائدة الرحمن ايه مش ده أوانها برضه طيب هاروح احط فيها وصفه كبسه عملتها امبارح كانت والله جميله فولانه...متنسيش وانت بتحطى وصفات الشوربه وخلافه تدعى لى معاك....هابعت لك صيغة الدعاء..علشان بس التركيز منوره يا ست الكل اليكس لافر...الله يكرمك يا بنتى تخليها تعيط وتنزل الدمعه اللى فى عنيها قهرتنى الصورة اللى تحت اسمك بس الشوربه اللى انت حطاها صعب قوىىىى...بس ممكن نجربها طنطك ام البنات ...اللطاف جدا" يرضينى الهواء الذى تتنفساه يحيينى يسعدنى الكون الذى يحتويكما يحتوينى انتما كل شئ وانا من دونكما لا شئ رابط هذا التعليق شارك المزيد من خيارات المشاركة
Folana بتاريخ: 18 سبتمبر 2007 كاتب الموضوع تقديم بلاغ مشاركة بتاريخ: 18 سبتمبر 2007 السلام عليكم ورحمة الله.... الحبايب كلهم موجودين اهو الحمدلله....اما لو كنت فتحت ملف اللحوم..ولا فتحت ملف سرى..ولا فتحت عكا..كان ايه اللى حيحصل...:D منورة يا ام البنات ....وحشتنى ايامك...انا قلت امشيها شوربة على ما تفرج ...حتى تلاحظى انى بأشجع استخدام الماء فى حالة عدم توافر الشوربة اللى على الزفر يعنى ... فين الدعاء..؟ وفين الكبسة؟....وفين التركيز؟....ماتتأخريش على بالتركيز يخليهم لك...:) ننوشة ..اوعى تكونى عملتى الشوربة من غيرى انا جيت اهو.... شوربة الكريمة بالمشروم والذرة يفضل استخدام المشروم الطازج لو امكن يعنى وتقطعية شرائح..او معلبات وده مقطع جاهز طبعا.... المقادير مشروم طازح او معلب زبدة اوسمن 3 -4 ملاعق دقيق كريمة لبانى كوبيتن لبن شوربة ..او ماء ومعاه مكعبات مرقة دجاج ملح وفلفل لو الشوربة ماعليهاش ملح الطريقة... ندوب الزبدة او السمن على النار ونضيف المشروم ونقلب لحد ما يصفر ...نضيف الذرة ونقلب شوية صغيرة كمان وننشلهم من السمن فى طبق على جنب حنضيف قطعة زبدة كمان ونضيف الدقيق نحمره لحد مالونه يبقى دهبى.. نضيف اللبن ونقلب كويس علشان مايتكونش كتل لحد الخليط مايبقى سميك وناعم نضيف الشوربة ونقلب كويس ..لحد الغليان بس على نار هادية نضيف المشروم والذرة نقلب..لمده دقيقة كده ولا اتنين .... وبعد كده الكريمة اللبانى.. وممكن نستغنى عن الذرة. وممكن نضيف قطع دجاج مسلوق ودى طريقة تانية حاكتبها حالا.... و هاف آ نيس شوربة .... :D { لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ } رابط هذا التعليق شارك المزيد من خيارات المشاركة
Folana بتاريخ: 18 سبتمبر 2007 كاتب الموضوع تقديم بلاغ مشاركة بتاريخ: 18 سبتمبر 2007 السلام عليكم ورحمة الله.... شوربة كريمة الدجاج ( شوربة الدجاج بالتربية ) ممكن تتعمل باكتر من طريقة...يعنى ممكن نضيف مشروم وممكن لأ.... المقادير:... نصف كوب دقيق كوب زبادى ..............( ده فى حالة اذا حنهمل الكريمة بالزبادى والدقيق...او نحمر الدقيق فى السمن عادى ) شوربة فراخ تكون جاهزة عندنا لبن كامل الدسم زبدة او سمن بصلة صغيرة مفرومة جزرة مبشورة حزمة كرفس مغسولة كويس ومخرطة ورق لورا ملح وفلفل..حسب الاحتياج لان الشوربة مفروض متبلة جاهزة فرخة مسلوقة ومقطعة قطع صغيرة... مشروم ( اختيارى ) فصين توم (اختيارى) كريمة لبانى الطريقة.... لو حنستخدم الزبادى...نقلب فيه الدقيق كويس جدا لمنع حدوث كتل ونتركه على جنب لوحده كده شوية نرفع السمن او الزبد على النار ونقلب فيها البصل الاول لحد ما يلين وبعدين نضيف والجزر والمشروم والتوم ...لحد ما يلينوا... نضيف الفراخ واللورا..والكرفس ونقلب على نار هادية ونسيبها 10 دقايق تقريبا.. نضيف اللبن على الشوربة...ونضيف لهم الزبادى ونقلب كويس جدا...او ..نحمر الدقيق ونضيف عليه اللبن والشوربة ونقلب برضه كويس جدا علشان نمنع تكوين الكتل... ونضيف الشوربة دى للخليط اللى فيه الفراخ والمشروم..ونقلب كويس جدا... نراعى عند التسخين اننا نقلب كويس علشان الكتل برضه :D فيه ناس ممكن تحمر بصل زى التقلية وتزين به الشوربة...يعنى بتكون اذواق مختلفة... ممكن نعمل شوربة التربية من غير الدوشة دى كلها...يعنى بالفراخ بس.... كمان نلاحظ اننا ممكن نعملها باضافات اخرى زى الخضار او القرنبيط المسلوق او اللحمة... الاساس فى شوربة التربية اننا بنستخدم اللبن مع الشوربة علشان لونها يبقى فاتح يميل للبياض ..... والكريمة اللبانى تضاف فى الاخر على الوش ممكن او نقلبها مع الشوربة ....نونكن برضه............. :D { لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ } رابط هذا التعليق شارك المزيد من خيارات المشاركة
إبن مصر بتاريخ: 18 سبتمبر 2007 تقديم بلاغ مشاركة بتاريخ: 18 سبتمبر 2007 :D :) يا رب يا ساتتتتتتتتتتتتتتتتتتر!!!!!!! :blink: :blink: شوربة الخيار بالروب( الروب ده الى هو اللبن الرايب مش روب الحمام!!!! )(والنعناع . المقـــادير: اربعة اكواب شوربة دجاج + نصف كوب ارز + خياره مفرومه ممكن يبقوا خيارتين لو العدد اكبر + كوب رايب + بيضه+ معلقه زبده + ملعقتان اكل بابريكا :D ثلث كوب نعناع مفروم. اه والله ... والنيعمه... الطريقه: نضع الشوربة في قدر و نغليها و بعد ذلك يضاف الأرز و يترك يطبخ لمدة 15 دقيقة في هذه الاثناء يوضع الخيار و يرش بالملح و يترك 15 دقيقة و بعد ذلك يغسل بالماء البارد و ينشف بالورق ورق النشاف يعنى .... نضرب الرابب مع البيضة في وعاء الى ان يتجانس الخليط. ثم يضاف اليه كوب من الشوربة الحارة بالارز و يخلط ثم يضاف خليط الروب الى الشوربة بالارز الباقية في وعاء و يحرك بدون غليه الى ان تثخن الشوربة و تترك و عند الغداء تسخن مرة ثانية الى ان تغلظ زيادة. في هذه الاثناء تذوب الزبدة و تضاف البابريكا أه والله و تقلب لمدة دقيقتين و تضاف ملعقة اكل نعناع.. قبل التقديم يضاف النعناع المفروم الى الشوربة و يوضع على كل كوب شوربة خليط من الشطة بالنعناع ويزين بالخيار المفروم ويقدم. وبالهنا والشفا .. أستر يا رب .. أستر يا رب .................................................. ............. إن ربا كفاك بالأمس ما كان.... يكفيك فى الغد ما سوف يكون رابط هذا التعليق شارك المزيد من خيارات المشاركة
Folana بتاريخ: 18 سبتمبر 2007 كاتب الموضوع تقديم بلاغ مشاركة بتاريخ: 18 سبتمبر 2007 السلام عليكم ورحمة الله.... :D f((: الاستاذ أحمد محمود عندنا؟؟....يا مرحبا يامرحبا.....والله انا ما عارفة أكتب من الخضة...قصدى من الفرحة....الشوربة نورت يا استاذ احمد والله... انا لقيت اسم حضرتك منور فى الموضوع قلت استرررررررررررر ياررررررررررب ......مش حنفطر شوربة النهاردة.. :blink: :) أنا باشكر حضرتك على التشجيع الابوى للاشبال اللى زى حالاتى كده ... وبخصوص وصفة الشوربة ...هايلة صراحة...هايلة... :blink: بس فيه مشكلة صغيرة...احنا مش بنشرب الشوربة فى كوباية....احنا بنشربها ف سلطانية....ينفع ولا ايه؟؟؟ :D { لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ } رابط هذا التعليق شارك المزيد من خيارات المشاركة
إبن مصر بتاريخ: 18 سبتمبر 2007 تقديم بلاغ مشاركة بتاريخ: 18 سبتمبر 2007 يا مدام فولانه الله يكرمك وانت بترفعى كده من روحى المعنويه.... :D بس حضرتك بتستبقى الاحداث...!! ده على اساس ان الشوربه اتعملت ونجحت .. فانتقلت الى موضوع الكوب والسلطانيه علطول.. انا عموما معنديش مانع اشربها فى طبق الفنجان بس ربنا يستر وتعدى على خير :D إن ربا كفاك بالأمس ما كان.... يكفيك فى الغد ما سوف يكون رابط هذا التعليق شارك المزيد من خيارات المشاركة
nash بتاريخ: 18 سبتمبر 2007 تقديم بلاغ مشاركة بتاريخ: 18 سبتمبر 2007 فووووووووفووووووو......تسلمي يارب... الطريقه أخدتها ..وجاري التنفيذ ...والنتيجه غدا بعد الإفطار.... :blink: أقول....أفتحي بسرعه ملف اللحوم..هاموت وأقولكم علي طريقه لحمه جميله... :D تسلمي ياقمر :D ......................................................................... أخي الكريم أحمد...أنت جربت الشوربه دي؟؟؟ لأ بجد أحلف جربتها؟؟ :) صن ضحكة الأطفال يارب فإن هي غردت في ظمأ الرمال أعشوشبت لكن إن زودوها وبكيوا ..ونكدوا ..... هايتلطشوا رابط هذا التعليق شارك المزيد من خيارات المشاركة
إبن مصر بتاريخ: 18 سبتمبر 2007 تقديم بلاغ مشاركة بتاريخ: 18 سبتمبر 2007 اختى العزيزه ناش أصدقك قولا انا دوقتها قثبل كده .,. بس الكدب عيبه.. :D لو انا كنت عملتها كنت جربتها فيكم .. :D إن ربا كفاك بالأمس ما كان.... يكفيك فى الغد ما سوف يكون رابط هذا التعليق شارك المزيد من خيارات المشاركة
ام البنات بتاريخ: 20 سبتمبر 2007 تقديم بلاغ مشاركة بتاريخ: 20 سبتمبر 2007 الفاضل احمد محمود الشوربه دى مريبه ومش مريحه... مش مستريحه للخيار اللى هينشف ده والارز اللى بيتسلق لاء مش هاعملها إلا اذا ذقتها انت وقلت والنيعمه حلوة غير كده لاء فولانتى الجميله...ساختار شوربه اليوم من ملفك اصنعها بيدى بقولك ايه جربى شوربة لسان العصور العاديه...وحطى عليها وهى طالعه الكريمه اللبانى بتاعة جهينه ولا انجوى الصنف اللى يعجبك وادعى لى ..بس اظن دكتور الرجيم لو عرف يكسر الميزان ناش ..جيبى وش اللبن..القشطه وحطى عليه شوية لبن صغيرين وقلبيهم بالمعلقه لغاية ما يسيلوا هيبقوى بيدوا نفس الطعم وأحلى يرضينى الهواء الذى تتنفساه يحيينى يسعدنى الكون الذى يحتويكما يحتوينى انتما كل شئ وانا من دونكما لا شئ رابط هذا التعليق شارك المزيد من خيارات المشاركة
nash بتاريخ: 21 سبتمبر 2007 تقديم بلاغ مشاركة بتاريخ: 21 سبتمبر 2007 وللولولولولويييييييي :lol: سوري يا جماعه...أحم أحم.... :egyflag: عملت شوربه الكريمه بالذرة ...الأولانيه يا فوفو....مش هاقولكم...جربوها.....بس جربوها وعلي ضمانتي >>>>أيدك علي عشرة جنيه لزوم الدعايه ... :lol: بطريقه كريمة أم البنات( ربنا يحفظ البنات ويبارك فيهم يارب) بجد بجد وربي روعه...وأستعملت مشروم معلب وذرة اكيد معلبه...وفكيت القشده بالحليب...ياربنا طعمها بجد روعه...الحقيقه نادرا ماتظبط حاجه باخدها من النت...يعني الشوربه تقريبا الحاجه رقم 7 اللي تظبط بجد ربي يحفظك يا فولانه :blush2: ده أيه الهنا ده....ربي يخليكوا ليه ... صن ضحكة الأطفال يارب فإن هي غردت في ظمأ الرمال أعشوشبت لكن إن زودوها وبكيوا ..ونكدوا ..... هايتلطشوا رابط هذا التعليق شارك المزيد من خيارات المشاركة
بنت الشاطئ1 بتاريخ: 22 سبتمبر 2007 تقديم بلاغ مشاركة بتاريخ: 22 سبتمبر 2007 السلام عليكم اعزائى فى المحاورات عندى لكم شوربة تجنن مجرباها طبعا المكونات لحمة صلصة حمص منقوع فى الماء من الليل كوسة فلفل اخضر حار كزبرة نعناع ناشف شعرية ملح فلفل اسود الطريقة نشوح البصل مع اللحمة مع الحمص المنقوع ..ثم نضيف الصلصة ثم نضع الماء نراقب نضج الحمص من وقت لاخر عندما ينضج الحمص واللحم نضع الكوسة المقطعة صغير جدا بعد النضج نضيف الكزبرة الخضراء ثم نضيف النعناع الناشف وقليل من الشعرية ملحوظة الأفضل ان الحمص ينضج مع اللحم يعطى نكهة طيبة عند وضع الشعرية ..غلوة واحدة ونطفى النار ونغطى القدر وهى هتستوى بالبخار لا تكثروا من الكوسة لأنها فى النهاية شوربة مش طاجن ممكن اضافة الفلفل الحار بعد الشعرية لكن اتركوا الفلفل مغلق حتى تكون حارة جدا لكنه يعطى نكهة مميزه وبالهناء والشفاء ان شاء الله هحاول اعملها عن قريب واجيبلكم الصور حاجة مهمة لو الحمص مستواش عادى .. ممكن تنشلوا اللحمة فى هذه الحالة وتتركوا الحمص ينضج براحته رابط هذا التعليق شارك المزيد من خيارات المشاركة
amrhoras بتاريخ: 22 سبتمبر 2007 تقديم بلاغ مشاركة بتاريخ: 22 سبتمبر 2007 كوسة فلفل اخضر حار السلام عليكم ورحمة الله وبركاته اولا نشكرك على الشوربة اللى تجوع دى شكلها رائع يابنت الشاطىء سلمت يداكى بس ف استفسار صغير لازم الكوسة دى مفيش أى خيار تانى؟؟؟؟؟ اصلها مش بتحبني خالص خالص انا بصراحة عاوز اكله خاصة مفيهاش بصل او كوسة او خضار ( بسله فاصوليا بامية ) وياريت الحاجات الخفيفة قليلة الكوليسترول والحاجات دى تكون اكله بسيطة وسريعة بس تكون جامده اه معلش فى وصفة اكله اخترعتها مش عارف هى موجوده اصلا ولا لا مكرونة بالتونة المكونات :- مكرونة اى نوع متوفر صلصة علبه تونه ( الحجم الكبير) فلفل أسمر توم بودره لو بتحبو البصل ممكن تحطو بصله صغيرة بس تقدح فى الزيت مفرومة شطه (حسب الحاجة) ليمونه خل طريقة العمل - نسلق المكرونه حسب حجم العائلة طبعا انا عن نفسي فرد باكل نص كيس على وجبتين ( طبعا اقل من العادى لانى مش باكل طبيعي) اثناء سلق المكرونه نجيب التونه ونضعها فى الزيت قليلا حتى تنضج بس حسبوا تتحرق ونعمل الصلصة ونضع فيها ملعة صغيرة توم وفلفل اسمر والشطة ومتنسوش الملح بعد غليان الصلصة نضع عليها التونه ونسيبها شويه لغاية لما يكون مزيج شبه متجانس ونضع نص ليمونه و معلقة بسيطة خل ممكن مش نحط خل على فكره بعد كدى نجيب المكرونه وحطها ونبدأ نقلب لغاية لما الصلصة تمتزج مع الكل ونسيهم على نار هادىء حتى تنضج المكرونة وبالهنا والشفا ارجو انها تكون عجبتكم ممكن نستبدل التونه بالفراخ واللحمة من باب التغيير رمضان كريم الدنيا يومان يوم لك ويوم علبك فافعل ماشئت لكن تذكر كما تدين تدان رابط هذا التعليق شارك المزيد من خيارات المشاركة
DARWEEN بتاريخ: 22 سبتمبر 2007 تقديم بلاغ مشاركة بتاريخ: 22 سبتمبر 2007 أنا شفت اموضوع دخلت أجري ... قلت يا واد يا داروين أتعلم الشوربه أقوم كل ما أقرا وصفه ألاقي المقادير أصلا فيها شوربه .. :blush2: طيب حد يقولنا أزاي نعمل الشوربه اللي نعمل بها الشوربه القسوة أن ألقاك غريبا ... في وطن ناء عن وطنك والأقسى غربة أنفاس ... بين الخلان وفي أهلك رابط هذا التعليق شارك المزيد من خيارات المشاركة
Folana بتاريخ: 22 سبتمبر 2007 كاتب الموضوع تقديم بلاغ مشاركة بتاريخ: 22 سبتمبر 2007 السلام عليكم ورحمة الله ..... يادى النور....منورنا يا استاذ داروين......غالى والطلب غالى...والغالى لا يطلب الا كل غالى ونفيس - على رأى المثل- يقول الراوى يا سادة يا كرام فى كتاب " لقاء الأحبة فى فنون الشوربة "....ان هناك ما يسمى بالمرق...والبهريز ..والحساء ..والشوربة المرق: ده السائل الناتج عن سلق الطيور او اللحوم لمدة لا تقل عن ساعة ويضاف له ورق لورا وحبهان وممكن كرفس وجزر .. ناخد مثال للتوضيح ... مرق الخضار بصلة - حزمة كرفس مقطعة بعد الغسيل -حزمة بقدونس - نص حزمة كرات جزرة مقشرة ومقطعة - 2 حبة طماطم - 2 فص ثوم - ورق لورا - حبيتين قرنفل - ملح وفلفل .. حنسخن شوية زيت ونقلب فيهم الخضار لحد مايدبل وبعد كده نضيف اللورا والقرنفل ونغطى الكلام ده بالماء ...ونسيبه على النار لحد مايستوى يعنى نقول ساعة مثلا وطبعا ماننساش نشيل الريم اللى بيظهر فوق الوش لما يبرد نصفيه ونتبل بالملح والفلفل وتبقى عندنا شوربة خضروات نستخدمها لانواع الشوربات المختلفة . طبعا ممكن نستخدم اى انواع خضروات حسب النكهة المفضلة...وممكن نستخدم قشر البصل والثوم والفلفل الاخضر بعد نزع بذره. مرق الدجاج ممكن نستخدم فراخ سليمة...وممكن نستخدم عضم الفرخة لو حتتخلى نغسل الفراخ كويس جدا بالدقيق وشوية خل ونحطها فى ماء بارد لو عايزين الشوربة مركزة ..او نغلى الماء وبعد كده نضع الفرخة لو عايزين الفرخة تحتفظ ببهريزها ... لما الماء يغلى تانى وتظهر الريم نبدأ نشيله ..وبعد كده نضيف بصلة مبشورة حبهان ومستكة (اختيارى ) ورق لورا لحد ماتستوى دى ابسط طريقة ....لكن لو عايزين نحضر مرق دجاج للاحتفاظ به ...يبقى يفضل استخدام عضم الدجاج ممكن بقى نضيف جزر وكرفس وحبات فلفل اسود صحيح وعودين بقدونس ..ونسيبها ساعة على النار تقريبا .....ونصفى الشوربة بعد كده او المرق يعنى ونحتفظ به فى الثلاجة لاستخدامه كأساس لانواع الشوربات الاخرى مرق اللحم لحم بالعضم ..او عضم بس من غيرلحم او رقبة بالعظم بصلة كرفس - كرات - جزر ..والمجموعة دى على فكرة بتسمى خضار بهريز حبهان ومستكة وورق لورا نسلق اللحم فى الماء وننزع الريم اللى بيظهر اولا باول ...وبعدين نضيف البصل وخضار البهويز ويفضل لو وضعنا خضار البهريز ده فى قطعة شاش نظيفة نضيف المستكة والحبهان واللورا ... ونسيبهم على النار لحد النضج... وممكن نستخدم المرق على طول او نصفيه ونحفظه لحين الحاجة... اظن واضح { لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ } رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان