هنيدى وعادل امام لا يضحكونى

[ragab2]

لا أضحك

عند مشاهدة أفلام أو مسرحيات محمد هنيدى وعادل امام

وأشعر أنهم يبتزوا الضحكات من المشاهدين بطريقة رخيصة

وبحركات مكررة ومعادة وتعتمد على التصنع بالبراءة ولا تستفز ضحكات المشاهدين

ولذا كان من السهل سقوطهم بالضربة القاضية أمام أول اجتياح لمحمد سعد الكوميدى الناشئ فى فيلم اللينبى بالرغم من هيافة الفيلم وسطحيته ولكنه كان الفيلم الوحيد المتاح وبه لون جديد من الكوميديا الغير مكررة

ومع ذلك لم أرى فيلم اللينبى ولكنى شاهدت منه بعض اللقطات

[بنت شعنونة]

عادل امام في حد ذاته غير ضحك

هو مجرد مؤدي للضحك

عشان كدا زمااااااااان ايام الأبيض و الأسود كان بيضحكني قوي

عشان الكلام الي مكتوبله كان كويس جدا

دلوقتي ومن بعد ما عمل افلامه وبقى شجيع السيما و المضحكاتي

بقى ممل جداااااااااا

ولما بيتغصب عليا اني ادخل اي فلم ليه ببقى عارفا تقريبا ها اشوف ايه

حركة عين وحواجب مميزة ليه+ مليون بوسة ومشهد اباحي+ كام لقطة ضرب واللذي منه+ لقطتين وطنية وخلالالاويص

خلص الفبلم :? :?

اما هنيدي فلما طلع كان بيتكلم بلغة الشباب (الروشة على راي الناس)

يعني حسينا انه واحد من الناس العادية وقف في الشاشة وبيتكلم عشان كدا احنا امتصناه بسررررعة جدا لأنه ضحكنا ببساطة

واستعمل كوميدية الموقف + الفظ دا غير وشه البيبي فيس :lol:

لكن للأسف دخل برضه دايرة التكرار في اخر فيلمين ليه وبقى برضه معروف ايه اللي ها يعمله..

اما اللمبي فكان لون جديد وبرضه من الشارع وطبيعي جدا عشان كدا عجبنا قوي وربنا يستر بقى :lol:

[elbana]

أنا بابقى مستمتع جاً كل ما باشوف العبقرية في كتابة المشهد الشهير في فيلم (غزل البنات) لما حمام أفندي بيقابل السفرجي ومربي الكلي وبعدين يقابل الباشا في النهاية ويفتكره جنايني ، ترتيب رائع وحوار رائع ، مافيهوش أي كلمة مالهاش لازمة ، وماحدش من اللي بيمثلوا قاصد يصحكنا إنما مع ذلك بنموت من الضحك على البخت الهباب لبطل الفيلم وعلى الباشا اللي كرامته عمالة تتبعزق على إيدين واحد ما يسواش بصلة بالنسبة له .

الكوميديا دلوقتي بقت تعتمد على كلام الفهلوة والفتاكة من الممثلين ، والحركات الرخمة ، مافيش موقف مبني بأسلوب صحيح ، ولاحبكة معنية تفضي في النهاية إلى ما يضحك ، هي دي الكوميديا الصعبة اللي تعيش ، أما كوميديا التعليقات فممكن تسمعها في الأتوبيس من غير ما تحتاج لا فيلم ولا مسرحية ولا يحزنون ، الكوميديا عايزة ناس بتفهم علشان تكتبها ، وناس بتعرف تمثل كويس علشان توصلها ، مش أي واحد دمه خفيف يمثل كوميديا ، خفة الدم حاجة والكوميديا حاجة ، يعني ممكم قوي توصل لنتيجة مذهلة بممثل لا يتمتع بنص خفة دم محمد هنيدي لو كتبت نص متقن وأخرجته بأسلوب سليم .

آدي الحكاية من وجهة نظري .

[وسام]

عادل امام ..... اشفق عليه

هنيدى .....لا يضحكنى لسبب بسيط ان طريقة الكلام و الافشات اللى بيعملها هيا العادى بتاع كل الشباب اتفضلوا معايا على اى قهوة و نشوف اى شلة قاعدة بتتسامر حتلاقوا الكوميديا بعينها

[elbana]

صح يا أخ وسام ، وهو ده الفرق بين الإضحاك من خلال نص كوميدي ، والإضحاك من خلال قفشات هايفة ممكن نسمعها في أي مكان .

[Cleo]

ألا زلت عند رأيك يا دكتور رجب؟؟؟

أنا شخصيا أوافق على الكلام أعلاه

[ragab2]

ألا زلت عند رأيك

أنا شخصيا أوافق على الكلام أعلاه

ياه

لسة فاكرة

دة الموضوع دة من حوالى سنتين

ومازلت عند رأيى

ومازلت أضحك لمحمد سعد وسمير غانم وسيد زيان ومحمد نجم أحيانا

ماعدا عادل امام والهنيدى الصغير

تحياتى

[homer]

يضحكنى عبد السلام النابلسى واسماعيل ياسين وعبد الفتاح القصرى واستفان روستى حتى فى أدواره الجادة.

أما عادل امام فلا يعجبنى على الاطلاق وخاصة بعد أن تقمص شخصية الزعيم أو الممثل صاحب الرسالة والهدف والكلام الفاضى اياه.

[yasovinas]

كل وقت وله ظروفه وكل جديد وله بهجتة ورونقه فقط لانه جديد

عادل امام في بداية شهرته كان اسلوب جديد علينا بعد المهندس ومدبولي اللي برضه كانو في فترة اسلوب جديد بعد اسماعيل ياسين واللي قبله وهكذا

عادل امام حاول انه يتغير او يغير اسلوبه لكن للاسف غير الى الاسوء

محمد هنيدي اسلوب جديد وبصراحه الكلام اللي اتكتب له كان جميل في صعيدى او همام لكن بدء يخيب بليه وعسكر

محمد سعد كان ماساه لانه احنا مش ناقصين صياعه واستهبال نعلمهم لابنائنا اللي متعلمين جاهزين

وربنا يستر على اللي جاي

[فــيــروز]

موضوع ظريف اوى :)

وشكرا لكليو على رفعه ;)

وعسى ان يعود الاخ البنا ليشارك معنا .. :D

عادل امام لا يضحكنى كذلك .. ربما لانه يبدو متفق مع العصر او الزمن الذى ظهر فيه وخير معبر عنه !! يعنى فترة الثمانينات و نهاية السبعينات على ما اظن هى الفتره التى اصبح عادل فيها نجم شباك و ربما لا غرابه فى هذا بعد ان تغيرت قيم المجتمع بصوره كبيره و لان عادل كان يعبر عن طريقة و احلام كثيرين ممن أثروا خلال هذه الفتره كان طبيعى ينتشر و يصبح نجم الشباك الذى ينتصر على الجميع رغم تواضع امكاناته و قدراته

وبعد ان كان هو "كوتوموتو" و الشخص الضعيف الخائف فى ادواره الثانويه مع فؤاد المهندس .. اصبح اللعيب و الحريف و الأبهه الذى يضرب عشره بكفه بدون اى مبررات منطقيه .. :D فلازال هو نفس الشخص ضعيف البنيه و الشخصيه !!

وبعد ان كان يظهر فى دور الدوبلير "اللى عايز يبوس" :D فى الافلام القديمه فلا يتلقى سوى الصفعات lck:: اصبح معشوق الفنانات و النجمات و هو الذى يترفع عليهن !! فما الذى تغير حتى يتغير مكانه فى الادوار السينمائيه؟ هو شخصيا لم يتغير لكن اغلب الظن انه بدا يقدم ما يتفق مع ذوق الجماهير فى فترة نجوميته الاولى بل وربما عبرعن قفزه اجتماعيه حدثت للكثيرين بسبب الانفتاح الاقتصادى فلا عجب اذن ان ينجح و يصبح نجم .. فى رايى عادل امام يتقارب وضعه بشده مع وضع .... ولا بلاش عشان مانزعلش الاهلاويه ;) .. لكنه يمثل نجومية البلطجه و الفهلوه و التلات ورقات lck::

[فــيــروز]

محمد هنيدى

فى رايى محمد هنيدى هو الآخر لم ينجح سوى بسبب ظروف اجتماعيه جعلته هو و اقرانه الشباب سلعه فنيه مطلوبه .. مع الاعتراف ان له ادوار تضحكنى او لنقل "مشاهد من ادوار" له تضحكنى

وقرات لاحد النقاد رايا في هنيدى يقول له لا تخرج عن عباءتك التى سببت نجاحك و التى تتفق مع تكوينك الجسمانى الذى لا تستطيع ان تخرج عنه والذى لا تستطيع ان تنسيه للجمهور .. فنجاح هنيدى الساحق كان فى ادوار قام فيها باداء صخيه تشبه شخصية الفأر "جيرى" فى الكارتون الشهير .. ضعيف خائف يجرى طول الفيلم تقريبا لكنه يجرى وراء اهداف نبيله او يجرى من اشرار يضطهدونه .. وكانت النصيحه التى قدمت اليه ان يقدم ما يتسق مع هذه الشخصيه ولا ينجرف وراء كونه اصبح بطل و نجم شباك ليؤدى ما لا يعقل او ان يصبح حبّيب او دونجوان عصره و اوانه !!

واعتقد كذلك ان مشكلة هنيدى و كثيرين من ابناء جيله انهم يفضلون ال one man show وهم غير مؤهلين له .. يعنى الفيلم من الاول للآخر لحساب البطل ومن حوله مجرد ادوات لملء الفراغ وحتى يجد البطل من يستخف دمه على قفاه !! :D

والمثير للغيظ ان ال one man show امتد ليشمل حتى اسم الفيلم الذى لابد ان يتم تفصيله و تقييفه حتى يصبح متسق مع اسم البطل داخل العمل !!! واصبح العمل الفنى اذا نجح ينسب نجاحه للممثل ولو فشل نجد الممثل يلقى باللوم على "الكاست" و المخرج و السيناريو وكل الناس فيما عدا هو شخصيا رغم ان كل شئ يتم تفصيله خصيصا من اجله هو !! حاجه تعل lck::

[Cleo]

فيروز...

تسلم إيديكى...

مداخلتك عن عادل إمام شافبة ووافية...

يعنى عادل إمام ظهر فى فترة الانفتاح كنجم... ونجح نجاح تجار الشنطة و الأونطجية بتوع الانفتاح...

مثلا... (من أمثال فيروز المذكورة فى مداخلتها)... نجد أن العديد ممكن كونوا ثروات فى فترة الانفتاح كانوا من المحرومين من الثروة، ومن النفوذ، ومن كل مظاهر التيه، وفجأة بشوية أونطة أصبحوا يمتلكون كل شىء، فنجدهم يسرفون فى تعويض مظاهر النقص تلك وهم من نطلق عليهم "نوفو ريش" أو الأثرياء الجدد..

نفس الشىء ينطبق على عادل إمام، الكومبارس... دسوقى أفندى أو الكومبارس اللى عاوز يبوس :D يعوض هذه الصورة المهزأة بأن يكون شجيع السيما أول ما يقول على هوب و يصرخله صرخة السبع يتكهرب و يبقى فرخة.... و الستات تطلع بتجرى كلها وراه و هو واد تقيل ولا على باله ولا عاوز يبوس ولا حاجة lck::

[Cleo]

أنا شخصيا محمد هنيدى بيضحكنى... على الأقل فى أفلامه الأولى...

وأعتقد أن سبب نجاح هنيدى فى بساطته و بعده عن الافتعال، وإنه لم يكن قد لبس قناع النجم و الزعيم بعد... فأحبه الناس لتلقائيته....

المشكلة إن هنيدى بدأ يشعر بنجوميته... وبدأنا نلمس قناع النجم على وجهه.. فابتعدنا عنه سريعا...

[ابو يوسف]

عادل امام ده حدوتة محيرة جداً ...

فنان له جماهيرية عالية ...

نجم شباك من الدرجة الاولى ..

بداياته كانت صعبة بلا شك .. و هو يشق طريقه وسط فطاحل الكوميديا مثل المهندس و مدبولى و محمد عوض و غيرهم ..

و بعد أن تحقق من أنه حقق الارضية المطلوبة ... انجرف وراء هوجة أفلام المقاولات .. فخرج علينا بأتفه أفلام عرفتها السينما المصرية .. مثل الهلفوت و عنتر شايل سيفه و رجب فوق صفيح ساخن و شعبان فوق البركات و المتسول و غيرها !!

ثم انتهت الهوجة ..

و لكنه لم ينتهى !!!

رأى أن جمهوره بيحب الهيافة ...فتمادى فيها .. و بين كل خمس افلام يطلع بفيلم واحد بيقول حاجة أو بيقدم فكر أو قضية ..

الغريب أن معظم أفلامه المحترمة – و التى لاقت نجاحاُ – سواءً على مستوى الجماهير و النقاد .. كلها أفلام ليست كوميدية !!

مثلا ..... المشبوه .... حب فى الزنزانة ..... الانس و الجن .. اللعب مع الكبار ... الارهابى ... الارهاب و الكباب ... طيور الظلام ...

و يا ليت الأمر اقتصر مع عادل امام على الهيافة ...

بل تماشياً مع العصر تحولت افلامة من الهيافة الى الاباحية مستغلاً أنه الزعيم ...

(و الزعماء فى بلادنا لا يراجعون ولا يتراجعون و لكنهم الى ربهم راجعون !! )

فظهر بخيت و عديلة .... (الله يحرقهم)

وظهر النوم فى العسل .... (صاحب أقوى و أهم قضية تشغل بال الشعب المصرى – من وجهة نظر أخونا عادل امام - وهى الجنس و الضعف الجنسى ال>ى أصيبت مصر به !!! )

وفيلم (التجربة الدماركية) و يا لها من تجربة !!! قمة فى الاسفاف و السفالة و الانحطاط ... لا تخرج من الفيلم الا و كلمة (يا ولاد الكلب) التى ترددت على لسانه أكقر من 20 مرة خلال الفيلم !!!

[ragab2]

يوجد

نجوم كوميدى يطلق عليهم درجة ثانية

ولكنهم فرسانا للكوميدى مثل الممثل الذى يظهر فى شكل فلاح ساذج ويقول لازمة .. ياحلاوة

مش متذكر اسمه الآن

آه افتكرت أبو النجا

وممثل آخر اسمه أحمد فؤاد دائما يتعصب ويبرق ويستعبط ولكنه خفيف الظل ومضحك جدا لو دخل فى نوبة تشنج وغضب ونرفزة

أحب مشاهدتهم كثيرا

[فــيــروز]

شكرا يا كليو ربنا يخليكى smk: :lol:

هناك نقطه اريد ان اضيفها بخصوص محمد هنيدى و جيل الممثلين الشباب عموما

فكما كان عادل امام خير تعبير عن العصر الذى اشتهر فيه اعتقد ان ممثلى الجيل الحالى ينطبق عليهم نفس الوصف .. فهم يعبرون عن عصر ال low quality الذى نعيشه "اعتذر لاستخدام كلمات اجنبيه كثيره اليوم لكنى اشعر انها معبره جدا" ..احد زملائى حين كنا نناقش بعض الكتابات يقول لى العصر الذى ينتج ثقافه قويه سيكون هكذا على كل المستويات .. أم كلثوم و عبد الوهاب قمم فنيه عاصرتها قمم ادبيه مثل العقّاد و طه حسين .. بل وحتى فى الدين كان هناك قمم مثل الشيخ عبد الحليم محمود وفى الصحافه وفى غيرها من المجالات ..

الآن نحن نعيش عصر اشياء كثيره به رديئه .. فما الذى سيمنع الفن من ان يصاب هو الآخر بالرداءه .. وكما تراجع مستوى الخدمات التى نحصل عليها فى كل مكان تراجع كذلك مستوى الفن المقدّم وأصبح حتى أقل فى المستوى من الشوربه المسلوقه او الخضار اللى نص سوا

[هشام الجنيدى]

انا شخصيا بحس ان عادل امام وسلسله افلامه الاخيره الى كلها هيافه واباحيه ومالهاش اى لزمه

تعتبر شتيمه للناس لانه زى ميكون بيقول للناس انتو لا تهتمون سوى بالمشاهد الاباحيه والهيافه وانا بقدمها لكم وبستغفلكم

وبكسب من ورا هيافتكم قله ادبكم الملاين من الجنيهات

فانا بصراحه بشعر بالاستفزاز ومقدار السخريه من البشر لما بتفرج على فيلم مثلا زى التجربه الدنماركيه

وتخيل لما فيلم زى ده يشوفو الغرب مثلا مش هيقولو غير ان اتلشعب ده شعب تافه هايف لا يجرى الا خلف نزواته وشهواته

وانا محبش يبقا ده راى حد علينا

وبعتبر ان كل جنيه بيندفع فى مثل هذه الافلام هو مقياس لمدى التفاهه الى وصلها الناس

[Farida]

انا كمان مش باضحك على افلام عادل امام و هنيدى بس باضحك جدا فى مسرحياتهم ...يمكن علشان ما حدش بيكتب كوميدى كويس للأفلام

و باحب ادواره فى الأفلام الجاده زى المشبوه و حب فى الزنزانه و الغول و الأرهاب و الكباب و ان كنت لا احبه فى الحياة العاديه لأراؤه و ادواره الأخرى الهايفه اما بخصوص فيلم النوم فى العسل انا أعتقد ان الفيلم مش قصده خالص الناحيه الجنسيه (كما هو معتاد للأشاره فى جميع افلامه) كان المقصود رمزيا العجز و عجز الرجال عن فعل شئ و اتذكر جمله قالتها زوجته فى الفيلم "هو فيه ايه؟" رد عليها "فيه كلام كلام كتير و مافيش فعل " وان للخروج مما نحن فيه لن يكون الا بثورة نقول فيها و نخرج المكبوت داخلنا

[Cleo]

اما بخصوص فيلم النوم فى العسل انا أعتقد ان الفيلم مش قصده خالص الناحيه الجنسيه (كما هو معتاد للأشاره فى جميع افلامه) كان المقصود رمزيا العجز و عجز الرجال عن فعل شئ و اتذكر جمله قالتها زوجته فى الفيلم "هو فيه ايه؟" رد عليها "فيه كلام كلام كتير و مافيش فعل " وان للخروج مما نحن فيه لن يكون الا بثورة نقول فيها و نخرج المكبوت داخلنا

أتذكر أنه فى عز هوجة هذا الفيلم، سألت إحدى البرامج الفنان السورى دريد لحام عن رأيه فى الفيلم، فأجاب نفس الإجابة التى علقت بها فريدة على الفيلم، ولكنه عقب بما معناه أنه كان ممكن يعبر عن هذه الفكرة بشكل أخر أقل إثارة للجدل.

وأنا شخصيا أرى أن عادل إمام اختار هذا الفيلم خصيصا لمعانه الظاهر وليس لمعناه الباطن... أنا لم أدخل فى نيته، لكن من الواضح إنه إنسان خاوى فكريا وشديد الإباحية... مما يرجح هذا الاحتمال.

ناس كتير عبروا فى أعمالهم الفنية عن تقاعس العرب أو المصريين و الكلام الكتير اللى بدون فعل بدون هذه السفالات ومنهم مثلا يوسف شاهين فى فيلم "الأرض"، ومنهم مسرحية الملك هو الملك و غيرهم كتير، وكارمن لمحمد صبحى

[egyptforever]

يمكن في الافلام الاخيره لعادل امام كان فيه كام فيلم الواحد محتار يصنفهم ازاي

يعني فيلم عادل امام حتى لا يطير الدخان باحس ان الفيلم ده مختلف تماما عن باقي افلام عادل امام مع انه فيه نفس التوليفه بتاعه الفقير اللي بقى غني و البنات بتجري وراءه

و برضه فيلم طيور الظلام الفيلم ده مع انه مليان ببهارات السينما و اللي بتقدمها يسرا بس قصته روعه و كان هادف جدا و يمكن اللي رفع مستوى الفيلم وجود اتنين باعتبرهم من افضل ممثلي مصر احمد راتب و رياض الخولي

الفيلم التالت هو فيلم النوم في العسل بس مشكلتي مع الفيلم ده هي نفس مشكله كليو مافيش سابقه لعادل امام تخلي الواحد يفتكر انه قصده المعنى الباطني و ليس الظاهري

متهيألي هم دول الافلام اللي الواحد يحسبهم لصالح عادل امام و طبعا الارهاب و الكباب يجي بعدهم