أرغب فى ترك هولندا لمصر أو بلد عربى

[wael elsherif]

السلام عليكم الي جميع الاخوه كل عام وانتم بخير رمضان كريم اريد مساعدتكم انا اريد العوده الي مصر لاسباب عائليه فانا مسافر الي هولندا من حوالي 8 سنوات ولا استطيع البقاء في هولندا اكثر بدون زوجتي وبنتي وهي لا استطيع ان احضرها الي هنا نظرا للقوانين الجديده المهمه هي ترفض من ناحيه والقوانين الجديده من ناحيه اخري...ففكرنا في بلد عربي واسلامي فوقع الاختيار علي الامارات وبالصدفه طلع لي جار في بلدنا كان في دبي وكان شغال مع خاله المهندس المعماري ولكن تم ابعاده من دبي لمدة عام بسبب مشاجره بينه وبين خاله ..المهم انه عرض علي فكرة انشاء مؤسسه صغيره تعمل في المعمار وقال لي سوف يتكلف الموضوع حوالي 25 الف درهم اماراتي وهو يقول سنبدء في عجمان او الشارقه لانها رخيصه في الاجراءات والتصاريح..انا مش قادر اخد قرار مع العلم اني املك محل يساوي تقريبا حوالي 250 الف مصري وانا اعمل في هولندا طباخ وبيتزايولي فانا اعمل في البيتزا والشاورما من 7 سنوات فهل لو فكرت اعمل حاجه كده في مصر تمشي وفين؟؟؟؟وكام تتكلف ؟؟؟ولو عايز اروح للامارات علي اساس اني اعمل حاجه كده مسموح اقصد القوانين والاقامه تبقي برده علي كفيل ولا ينفع اروح علي اساس مستثمر مع ان مستثمر دي كلمه كبيره شويه انا مش عارف القوانين في الامارات لكن لو سالت عن اي حاجه في هولندا طبعا اعرف القوانين هنا كويس..لو انت في مكاني تعمل ايه يا تري تنزل وتستقر في مصر وتحط القرشين الي معاك في البنك ولا تعمل مشروع اليتزا والشاورما ده ولا تروح الامارات وتشارك الراجل اللي قالي علي موضوع المؤسسه ده ولا تعمل ايه ؟؟؟؟مع العلم اني ابلغ من العمر 32 عام ومتزوج وعندي بنت 9 اشهر وعندي شقه كويسه ومعليش اي ديون وعندي خبره كويسه في موضوع محلات الاكل ... وهل صحيح لو انا روحت للامارات ممكن الاقي شغل في احدي المطاعم؟؟؟؟انا اسف جدا لكل التفاصيل الكثيره دي ولكن فعلا انا محتار ...ارجو المشوره ولمن يريد معرفة المزيد انا صاحب موضوع هنا هولندا استحلفكم بالله ان تشاركوني بالنصيحه ..واي حد عنده فكره لمشروع في مصر او الامارات انا مستعد للمشاركه بعد دراسة جدوي كويسه ..ما خاب من استشار...وائل الشريف من هولندا

[nash]

أخي الكريم

طبعا وبصراحه أنا ليس لدي أي خبرة حقيقيه في هذا الموضوع ..ولكن من واقع تجارب ناس أخرين..أري أن مشروع الطعام بوجه عام له سوق في مصر..يعني بيمشي إن شاء الله..طالما خبرتك أيضا في هذا المجال فإن شاء الله ستستطيع السيطرة علي الأمر..

الإمارات بوجه عام مستوي المعيشه فيها مرتفعة وتكاليف الحياة عاليه

وخاصه للسكن..ولا أعرف بصراحه هل مثل هذا المشروع سواء المعمار أو فتح مطعم للشاورما له سوق أم أنها متشبعه بهكذا مشاريع..

.................................................................

أخي الكريم قمت بالرد لإرفع الموضوع وبالمرة أخبرك بوجهه نظري...

دمت في رعاية الله وحفظه..

وإن شاء الله أحد من الإخوة يدلي بدلوة في الموضوع...

أختك ناش

[amrhoras]

على حد علمى أن أى مشروع غذائي فى مصر له سوق كبييييير جدا أكثر من أى بلد اخرى واعتقد النصيحة اللى اقدر اقولهالك ان بلدك احسن من غيرها واللى تعرفه احسن مش اللى تعرفه بدال متروح بلد اخرى غريب واى حد يتحكم فى لقمة عيشك بالبلدى فخليك فى بلدك احسن واكيد المشروع ده مش حيكلفك كتير سوي الاجراءات والمكان يكون متميز بس مش قولت انت فين مكانك فى مصر عشان نحدد مستوى التكلفه

طبعا احسن من الغربة تكون وسط بلدك واهلك وناسك واتمنالك التوفيق

مشروع المقاولات دلوقتى فى مصر ميجبش همه نظرا للارتفاع الحاد فى الاسعار فى مواد البناء ومعلش جارك اختلف مع خاله فما بالك الغريب اللى هو انت بدون التطرق لاى تفاصيل بس الشراكة بتكون صعبة اليومين دول الاخ مش بتحمل اخوه عندى كفيلى هنا فى مشاكل مع اخوانه بسبب الشراكة والديون .

الامارات بلد جميل ولكنها باهظة التكاليف من ناحية المعيشة والسكن وانت عاوز تبدأ بس بحذرك من الشراكة كأخ صغير لك

عموما ربنا يوفقنا جميعا ونسأل الله ان ينير بصيرتك ويخترلك اللى فيه الخير أخوك عمرو

شكرا

[afreet]

اخى العزيز

ارجع مصر فورا وهذا رايى

موضوع العمل بالمقاولات فى مصر كما قال لك الاخوه اصبح من الماضى السحيق لارتفاع مواد البناء من جهة وكل واحد فى مصر حاليا بقى مقاول اغلب الصنايعيه الان اصبحوا مقاولين و يمتلكون كافة معدات المقاول مع مقدرتهم بالقطع على التنفيذ ورخص الاسعار بالاضافة لعدم لجوء الملاك الى مقاولين حاليا لانه يتفق مع الصنايعى مباشرة لجلوسهم على القهاوى بدون عمل

اما عن موضوع المطاعم فى مصر فلاشك انها مربحه للغايه ولكن الطريق ليس مفروش بالورود فنظرا لبعدك عن مصر فترة طويله نسبيا اصبحت فى حاجه الى اعادة تاهيل لتعود مصريا مقيما يجب ان تتعلم كيفية التعامل مع الصحة و الطرق والامن الوقائى وكافة الجهات الحكومية الاخرى بالاضافة الى التعامل مع الصنايعيه و الزباين

ابتعادك عن مصر سبع سنوات له ضريبه يجب ان تدفعها لا تقل عن سنتين لاعادة تاهيلك واعلم ان المبلغ المتوفر معك يحققه اى مطعم صغير ناجح فى موسم الصيف

لا زالت الامارات دولة بالخليج رغم انها افضلها على الاطلاق الا انك ستخرج من غربة الى غربة ومن هولندا الى الامارات وهى ايضا مرحله مؤقته فلماذا لاتختصر المسافات

نصيحه لله

1 حاول ان تترك هولندا فى اسرع وقت كنزول مؤقت وترجع الى مصر

2 انسى ما انت عليه وكم تمتلك والبس بنطلون وقميص قديم وتوجه لاى مطعم واطلب عملا لديه باى مرتب

3 ادرس الموقف من خلال العمل لا من رؤيتك من الخارج ولا من كلام لاطمى الخدود بان مصر فى حاله يرثى لها وهم يركبون احدث السيارات

4 بناءا على دراستك واحتكاكك بالعمل اليومى حدد موقع مشروعك ونوعيته وتفاصيله حسب امكانياتك

5 لاتهدر سنوات خبرتك بالبحث عن مشروع اخر فبدلا ان تكون جاهلا بالمشروع وفنياته والسوق المصرى اكتفى بان تكون جاهلا بالسوق المصرى فقط

6 لا تترك مصر لاسباب مادية ابدا الا ان تكون مضطرا فى مخمصة

هذا رايى فستجد اغلب الناس يعددون لك مشاكل مصر و انها منهاره وانا اراها غير ذلك فاجعل نفسك الحكم ولا تستمع لى ولا لغيرى

اذا لم يكن متاحا لك السفر من هولندا بصفة مؤقته والعودة فلا تدرس اى مشروع بناءا على ملاحظات وافكار الاخرين ووجهة نظرهم وانتظر ظروفا افضل

[mesryforever]

أخي الكريم

أنا مع كلام الأخوه الأعضاء

حاول تجرب إنك تعمل كما قال الأخ العزيز / afreet ،

إنك تنزل مصر وتروح تشتغل في أي مطعم فترة علشان تاخد خبره وإنسى لفترة ما كنت فيه في هولندا من العيشة الهنية والرفاهية هناك وطبعاً متقلوش في المطعم إنك كنت في هولندا - المهم أعمل بكل جد وإجتهاد علشان تاخد الخبرة وتعرف المطاعم ماشيه إزاي وساعتها تبقى تقرر إنك كنت هتفتح مثل هذا المشروع

وبصراحة إنسى كلام صاحبك إللي كان عايش في دبي لأن الحياة هنا غالية جدا بدون دخول في التفاصيل

وربنا يوفقك

[wael elsherif]

شكرا للاخت ناش والاخوه عمرو وشكر خاص جدا للاخ عفريت بس ليه الاسم ده وعايز لو سمحت اتعرف عليك اكتر وشكرا للاخ مصري فور افر والله يا جماعه الخير في وفي امتي كما قال سيدنا رسول الله لم اتوقع الاستجابه السريعه لندائي بالنسبه لرجوعي لمصر لم اكن بصراحه اود النزول الان ولكن انا مضطر للنزول علشان زوجتي و بنتي والله يا جماعه لا استطيع وصف احساسي عندما نزلت عام 2006 لقد فقدت حتي اللغه لم استطع ان افهم حتي لغة الشباب ولا حتي اهلي والله العظيم حسات بغربه رهيبه جدا الناس اللي اعرفها كبرت قوي في السن وواضح عليهم الهم والحزن كل الناس بتشتكي من كل حاجه ما فيش حد راضي وقنوع بعشته الكل عايز مساعده واول لما يعرف انك جاي من بره تشوف في عينه نظرة الحسد الندامه الحسد منك والندامه علي وضعه وليه ما سفرش هو كمان انا طبعا نسيت الحاجات دي خالص ليه لاني وللاسف الشديد اندمجت جدا في الحياه في هولنده اللغه اتعلمتها اهتمات اسمع دايما الاخبار حتي المسلسلات الهولنديه كنت اتابعها حسات اد ايه الفرق الرهيب جدا بينهم وبينا اتعودت ابقي انسان يحترمه الجميع لو ضابط بوليس قابلك في الشارع ليسالك عن هويتك يبدء يعرفك بنفسه ويقولك لو سمحت حضرتك ممكن ....ولكن علي رايكم انا لازم انسي اللي كنت فيه واحاول اندمج مره اخري في الحياه المصريه بكل ما فيها من تناقضات مضحكه احيانا ومبكيه احيانا اخري لازم انزل ان شاء الله واخوض التجربه الصعبه دي وربنا يسترها ولكن ما زلت انتظر المزيد من مشاركاتكم في انتظار مشاركتك يا اخت ناش والاخ عفريت ويا ريت تغير اسم عفريت ده والاخ عمرو والاخ مصري للابد في انتظاركم وائل من جنوب هولنده السلام عليكم

[لخبطه]

سوق مصر انا مش عارفه أوي وإن كان واضح اتجاه الناس للوجبات السريعة وتقليدهم للنمط الأوربي في البيزا وخلافه يعني مشروعك ان شاء الله ناجح وانا بشدة أؤيد رأي الفاضل afreet بخصوص انك لازم تشتغل في نفس المجال الاول بصفة عامل علشان تعرف كل التفاصيل لأن واحد صاحبي عمل مشروع الكشري - وبعيد عنك وعن السامعين - فشل بسبب عدم المعرفه بالسوق وبسبب لعب الصنايعية بيه فكان تفسيره هو للفشل أنه نزل من الامارات عمل المشروع علطول وقال انه من الافضل كان اشتغل في المجال نفسه الاول حتى لو كان اشتغل كام شهر ببلاش كان هيستفيد ..

وبخصوصا موضوع 25 الف في الامارات تعمل مشروع أو مؤسسة فدا كلام فاضي أقل محل ف السعودية - اللى هيا ارخص من الامارات كتير - 150 الف ريال والعملة تقريبا نفس القيمة

[afreet]

الاخ وائل الشريف

ارجوا ان يكون موضوع رجوعك جديا وليس مجرد احلام وتمنيات وتنفيس عن غضب من الغربة وانما يكون متبوعا باجراءات نزول

اما عن اسم عفريت فانا اول من يرحب بتغييرة بشرطين

الاول افادتى بمقترحات سيادتكم بالاسم الجديد

ثانيا ان تكون مثلا اعلى لى وتبدأ بتغيير الشريف

مع خالص تمنياتى بالنجاح

[se_ Elsyed]

أقترح عليك لو نزلت مصر إنك تدور لك على مول ( مركز تجاري ) كويس وشغال في مصر وتأجر عندهم مكان وتطبق فيه الأفكار اللي تعلمتها في الخارج وتتخصص في البيتزا والشاورما ويا سلام لو في مدينة من المدن الجديدة هاتلاقي تسهيلات مكا حصلتش وإعفاء من الضرايب لمدة 10 سنوات وكمان مش هاتلاقي منافسة شرسة زي الأماكن اللي فيها محلات كتيرة .. وكمان هاتلاقي أسعار المحلات هناك حنينه وفي أستطاعتك .. وحيث إنك متمرس وعندك خبرة فلو جبت صنايعيه يبقى مش هاياكلوك لإنك راجل فاهم في شغلك كويس ... ولو بدأت صح يبقى هاتستمر صح .. يعني :

1- تعمل دراسة جدوى للمشروع طبقاً لميزانيتك .

2- تختار إسم جذاب للمحل .

3- تشوف مين طبقة المستهلكين اللي نت بتستهدفها .

4- تحاول على قدر الامكان تفهم السوق المصري كويس علشان فترة غربتك دي فيها أمور تغيرت كثيراً .

5- حاول دائماً الإستعانة بأهل الخبرة وليس أهل الثقة ... مش عشان الثقة مش مطلوبة .. ولكن الثقة يخلقها النظام الجيد للعمل .

6- حاول دائماً ألا تكون صاحب عمل بيترسم على موظفينه أو عماله ... ولكن حسس العامل إنه صاحب مكان وإن المكان ده فيه نظام بيُطبق على الكل فيثعاقب من يُخطيء ويُكافأ من يصيب وغنت تخلق نوع من الثقة والإنتماء لمشروعك .

7- وأخيراً حاول إنك تبتكر شيء مش موجود في المحلات المصرية والشيء ده يكون نابع من خبرات تعلمتها في الخارج .. وما شاء الله على الهولنديين حريفت أكل واكيلة درجة أولى .... يعني حاول تبتكر أنواع جديدة من البيتزا .... حاول غنك تبقى متميز شويه في الشاورما ... على فكرة لاحظت إن شاورما الدجاج قليلة قوي في مصر في حين إن شاورما اللحم منتشرة بشكل أكبر .. بعكس دول الخليج .. مش عارف ليه ... كمان أسعار الشاورما في مصر ناررررررررررررررررررر .. يعني هنا بالسعودية في اجدعها محل بتضرب الساندوتش المفتخر بـ 2 ريال سعودي ( نقول 3 جنية مصري ) لكن في مصر عشان تمسح زورك بساندوتش محترم مش بيقل عن 12 جنيه ... يعني لو نفسك مفتوحة ممكن تكل لك بخمسن جنيه شاورما :blush2:

تصدق بالله ؟ .. أنا لو موجود في مصر حالياً كنت شاركتك برأس المال .. وبخبرتي في مجال محلات الطعام بعد ما ندرس الموضوع كويس ... أصل بعيد عنك إحنا عائلة متخصصة اساساً في محلات الأطعمة في مصر وخارجها ... ولو عايز أي إستشارة أنا تحت امرك وياريت يكون الموضوع ده فيه معلومات كافية حتى لأي حد عايز معلومات عشان يستفيد منها ...

أعرف شخصياً واحد قعد فترة في إيطاليا ونزل فتح محل فول وطعمية ووجبات سريعة وأستعان باحد أقرباءنا في تدبير الصنايعية .. والمحل أشتغل زي الفُل في الفترة الأولانية لكن كان صاحبنا كل شغلانته إنه يصحى من النوم متأخر ويروح مرتين تلاتة يلم الغله ويمشي .. فما فيش شهور قليلة إلا والمحل إتخرب والصنايعية اكلوه لإن هو نفسه متسيب وما كانش له في الصنعة أساساً ....

[wael elsherif]

[size="5"]الي الاخ العزيز عفريت لقد غيرت اسمي الي معتمد كده كويس ولكن الشريف ده فعلا لقبي ..........الي الاخ العزيز سي السيد شكرا جدا جدا علي نصيحتك الجميله وجزاك الله خير ........كلامك علمي ينم عن خبره ودراسه وسوف اكون سعيدا للتواصل معك ...ولكن نفسي لو يكون عندك فكره عن الاسعار في مصر عامله ايه اقصد اسعار الايجار في المدن الجديده مثلا واي المدن الجديده تقصد؟؟وايه رايك في المدن الساحليه والسياحيه الغردقه شرم الشيخ ؟؟ولو عندك اسم مكتب كويس لدراسات الجدوي تعرفه في مصر يا ريت تبعتي لي لو سمحت عنوانه واسمه....ويا ريت اقدر اكلمك علي الياهو لو سمح وقتك وده عنواني waelhotline@yahoo.co.uk انا منتظر ردك يا سي السيد انا دايما اجازه الثلاثاء ..السلام عليكم وائل الشهير بمعتمد[/size]

[se_ Elsyed]

بص الأسعار متفاوته ومختلفة من مكان إلى أخر ولازم تنزل بنفسك وتشوف ولازم هاتلاقي بإذن الله ما يناسبك ...

مش عارف حتة الغردقة وشرم الشيخ لا أحبذها إذا كانت عائلتك مستقرة في القاهرة .. يعني إنت سايب أوروبا والسمنة الهولندي :rolleyes: كلها عشان زوجتك وبنتك ونفسك تستقر جنبهم .. تروح تتغرب تاني بس المرة دي داخل بلدك .. يعني لو بتتكلم في مدن زي دي يبقى على الأقل هاتقضي هناك شهر متواصل وتنزل لك إسبوع ولا حاجه تقضية مع أولادك وده شيء غير مريح على الأقل بالنسبة لي يعني .. في حين إن القاهرة مليانة فرص جميلة .. وزي ما بنقول القرش صياد .. يعني معاك رأس مال كويس يبقى هاتبدأ بداية كويسة ...

وخلي بالك من حاجه مهمة جداً في مجال محلات الأطعمة إن الـ first impression is the last impression

يعني إنت محل هاتبدأ جديد لا إنت بيتزا هت ولا كنتاكي وال إسم معروف والناس بتروح له مخصوص .. يعني اللي هايجربك في الأول ويلاقيك مش قد كده يبقى هايروح مش هاييجي ..

للأسف لا أعرف مكاتب دراسات جدوى .. ومع إني مع مبدأ التخصص إلا إن المجال ده بالذات أحب أنا اللي اعمل دراسة الجدوى بنفسي وأجرب بنفسي وأشتغل بنفسي وأستعين بأصحاب الخبرة والتجارب واتمهل قليلاً أفضل من أندم كثيراً ... يعني مش عشان أنا معايا فلوس أقوم نازل مدبوب وفاتح مشروع هيلا بيلا بحجة إن الفلوس ممكن تخلص .. بالعكس .. أفضل ان أصل متأخراً على ألا أصل أساساً ...

[wael elsherif]

الي الاخ العزيز سي السيد كلامك جميل ومنطقي جدا وربنا يكرمك علي النصيحه الغاليه ده..يا ريت دايما نتواصل ولو عايز اي مساعده او اي حاجه من هولندا لا تتردد انا ممكن اساعدك انا عارف البلد كويس....بس لو ممكن سؤال انت قولت انك والعائله متخصصين مطاعم اي نوع من المطاعم تقصد؟؟ون\ان شاء الله دايما هتلاقين بكتب في المنتدي مع اني نفسي اكلمك شخصيا .انا ما سمعتش ردك؟سوف ادرس ما قولته بعنايه .وعلي فكره ستكون اول دعوه للافتتاح موجه ليك ان شاء الله.السلام عليكم .وائل من هولنده

[afreet]

الاخ وائل

اسمح لى افيدك فى موضوع دراسات الجدوى الاقتصادية فى مصر للمشروعات الصغيرة بانه لاتوجد دراسات جدوى حقيقية لمثل هذه المشاريع

دراسات الجدوى الموجوده للمشروعات الصغيرة فى مصر هى اوراق تقدم لاخذ قروض فقط لاغير فاول سطر فى دراسة الجدوى هو حجم المبيعات المتوقع ولا يستطيع انسان فى مصر مهما بلغت خبرته ان يضع هذا الرقم او حتى رقم قريب منه حتى وان حددت النشاط والمنتجات والمكان باقى الارقام من اصول وتكاليف تاسيس قد تكون ارقام قريبه ويسهل الحصول عليها بعد تحديد المكان ونوعية النشاط وبالتالى فان النسب التى ستخرج بها من الدراسه لن تؤدى الى شىء لوجود عنصر الايراد المتوقع مجهولا فلن تستطيع تحديد نسب الربح المتوقعه ولا العائد على راس مالك

قد يسهل ذلك فى افرع سلاسل المطاعم المشهورة كما ذكر الاخ سيد وان كانت عادة تخرج بنتائج غير متوقعة عند التطبيق الفعلى فلاتوجد فى مصر دراسات اساسية لاحتياجات السوق واماكن الاحتياج لتحديد المبيعات

وعليه فان دراسة الجدوى فى مثل حالتك لن تقودك لشىء

اما عن المدن الجديدة فيجب الاخذ فى الاعتبار رخص الايجارات ولكن يقابله قلة المبيعات نظرا لقلة عدد السكان عن المناطق المزدحمة وان كان قوة المنافسة فى الاماكن المزدحمه يعوضها كم البشر فان نجاح مشروعك فى اماكن اقل كثافة يعجل من وجود منافسين لك بنفس النسبه

وبالنسبة لمحلات الفاست فود كما ذكر اخونا سى السيد فان افتتاح المطاعم به حرفه ولها ناسها فى مصر وهناك اشياء يجب تحديدها بنفسك سلفا قبل الذهاب للمختصين

اولا تحديد زبونك ونوعيته وبناءا على ذلك يتم تحديد المكان ونوع المنتج والخامات والاثاث والديكور ومعدات التشغيل اللازمه

وهذه النقطه وان كانت تبدو سلسه الا انها فى غاية الاهميه وهى اغلب دراستك لان الزبون الثرى سيحتاج الى مقومات مشروع باهظه وبالتالى اسعار عاليه مع بيع اقل والعكس بالعكس

ثانيا السوق به مطاعم ومحلات من كل لون وفى كل مكان حتى الطرق الصحراويه بمعنى ان البلد ليست بانتظار مشروعك او مشروعى او مشروع اى احد ولكنك تقاتل لاخذ حصه من السوق وان كانت طفيفة وبالتالى فان منافسيك بما لهم من خبره وقوه مادية وطول باع فى السوق المصرى لن يقفوا مكتوفى الايدى بطرق شريفه او غير شريفه ومهما كان مشروعك صغير فانك منافس قوى للمشاريع الكبيره لامكانك اخذ حصة من مبيعاتهم لعدم وجود اوفر هيد بالنسبه لك كما ان منافسك ليس مطعم بنفس نشاطك وانما كل المطاعم بالمنطقة

ما اريد الوصول اليه كما قلت سابقا الطريق ليس مفروش بالورود فستجد الكثير من العمل والاستفزازات وقد يوجد بعض التحرشات ولكن هذه بلدك و يجب ان تعود وسوف تعود بلاجدال ولو بعد عشرين سنه فاجعل قتالك يبدا الان وانت بصحتك ومالك وعند القدرة على التحمل

وانا لازلت اكرر ماقلت سابقا انا الان اكتب وجهة نظرى وتجاربى الشخصيه وخبراتى مع الاخرين والتى قد تكون مختلفة مع ظروفك او لاتوافق وجهة نظر غيرى فكل مايكتب لا يخرج عن كونه كلام يوضع كخلفيه عند التنفيذ حتى المتخصصين فى هذا المجال فان عمله ينحصر فى ابداء بعض الاقتراحات ويدلك على ارخص الاماكن لشراء المعدات وما انت بحاجه ملحه اليه وما يمكن ان ينتظر اما الدراسة الفعليه فلايمكن لاحد ان يقوم بها غيرك ولايمكن ان تكون صحيحة الا بالاحتكاك المباشر وعلى قدر الاحتكاك المباشر تقترب الدراسه من صحتها

امامك احد طريقين لا ثالث لهم

النزول وفتح مطعم حسب رؤيتك ونصائح الاخرين وما تراه ظاهريا لمحلات تعمل ولا تدرى خباياها هل تكسب ام تخسر وانت وظروفك اما ان يفتحها الله عليك وترزق من وسع او العكس

او النزول والاحتكاك المباشر لفتره معقولة باحد المطاعم بحيث تتعلم طريقة العمل بالسوق المصرى واماكن الخامات والمعدات وارخص الاسعار والتعامل مع الجهات الحكومية باقل التكاليف والزبائن وما شابه وبالتالى تحدد عن يقين ماذا تريد والى اين تذهب ثم تتوكل على الله وتبدأ ولا تجعل احد يحبطك او يثنيك عن عزمك او العكس بان يصور لك الحياة وردية

بالمختصر المفيد ياتتعلم بفلوسك ياتتعلم فى فلوس غيرك

اما عن الاسم فافريت وليس عفريت

مع كل تمنياتى بالنجاح فى الواقع والا يتحول الموضوع كالعادة الى احلام مغترب يرغب فى ان يكون مع اولاده فتتحول حياته الى كلام واحلام ويظل الوضع على ماهو عليه وعلى المتضرر اللجوء الى حكومتنا الرشيده

[wael elsherif]

والله مش عارف قولك ايه ولكن عموما شكرا يا استاد افريت وواضح من كلامك مدي خبرتك ولدلك فقد قررت الاتي بعد الاعتماد علي الله النزول الي مصر في فبراير .هيخد اجازه شهر ان شاء الله وبعدين هيبحث عن عمل بحثا جادا في القاهره في اي مطعم متميز وسوف ابدء من الصفر ناسيا تماما ما كنت فيه في هولندا .مطبقا نصيحتك بان اتعلم من فلوس غيري .ولن ادكر اي شئ عن هولندا لاني انا نسيت اساسا اني كنت في هولنده .sloly but surlyوبعد ان افهم السوق كويس بعدها تصبح الصوره واضحه.احب ان اعطيك فكره عن طبيعة المطعم الصغير اللي انا شغال فيه..هو بيقول عليه بالهولنديpizeria en girllroomيعني بيتزرايا ومشويات وشاورما وبعض الاصناف الايطاليه ...لازانيا ومكرونه واسباجتي بانواع سوس مختلفه وبعض الشوربات وبعض انواع اللحوم بسوس او صلصه مختلفه حوالي 30 الي 40 صنف اكل بس خلاص الموضوع بالنسيه لي مش صعب لاني اتعلمت كل حاجه في المحل ..وساعدني اخ خير ما يقال عنه انه انسان نادر الوجود في الغربه محمد... اسكندراني جميل صورة وخلقا ...فهل يا اخ افريت ساجد انسان مثل محمد يساعدني ويعلمني لوجه الله في مصر بدون مقابل اشك في كده؟؟؟؟او اجد انسان مثللك ومثل سي السيد لا اعرف اسمهما وينصحاني بدون مقابل اشك ؟؟؟؟ولكن انا متوقع الخير والشر والشر والخير...المهم الموضوع بتاع المحل ده اصبح عباره عن هوايه اكثر منه عمل ..حتي يوم الاجازه بيعدي صعب بدون عمل احيانا اروح لاخي فهو مقيم من 93 تقريبا...وما اصدق اني يوم الاجازه يخلص علشان ارجع الشغل تاني ...وهنا تكمن المشكله وهي انك ليس عليك اي مسئوليه مباشره كل ما عليك تعمل شغللك اللي انت خلاص حفظته وعارف ازاي تشتغل وازاي حتي تتكلم مع الزبايين وعارف كل زبون وايه اللي هيكله وايه اللي هيشربه مش محتاج انك حتي تساله وده هو سر نجاح المطعم الصغير ده اللي انا شغال فيه وحاجه مهمه جدا اخري وهي مدي الحب اللي بيجمعنا كاسره فعلا واحده..كلنا بنخاف علي بعض....اسف لو فيه غلطات املائيه مش عندي كي بورد عربي...جزاكم الله خيرا...ارجو دوام التواصل..السلام عليكم...وائل

[ayman74]

أخي الكريم وائل الشهير بمعتمد

حاول أن تدرس السوق جيدا و ترى أي ستايل محبب لك و يكون محبب للسوق

مثلا هل المطاهم السريعة؟ أم المطعم الذي تجلس فسه فترة مع أصدقائك؟ أم الذي تجلس فيه مع خطيبتك أو زوجتك؟

هل سيكون ذو طابع شرقي مثلا؟ أم إيطالي أم ياباني؟...إلخ

ما رأيك في موضوع الفرنشايز؟

franchising

بمعنى أنك تدور على محلات أو مطاعم مشهورة في هولندا و تحاول تقنعهم بفتح فرع أول كخطوة مبدئية في مصر

طبقا لمعلوماتي المحدودة يمكنهم أن يقدموا لك بعض الدعم كتصميمات الديكور مثلا

عذرا على قصر المعلومات و لكني لست متخصصا و لكن من واقع إمتلاكي لمشروع صغير في فترة سابقة فكلما زادت فترة دراسة الجدوى و الإهتمام الكبييييييييييير بأدق و أصغر التفاصيل كلما زادت فرصة النجاح بإذن الله

و ربنا يوفقك

بس متنسناش في عزومة كده أنا و المدام و الأولاد بعد الإفتتاح إن شاء الله

ههههههههههههههههههههههههه :blink: :blink: :blink: :) :)

[mrashour]

وائل باشا قرات رسالتك و ردود الاخوة الاعزاء و نصحيتى لك ان ان تبدا بمحل فى المدن الجديدة و تعمل توصيل للمنازل لان الناس بقت كسولة جدا فى مصر و يتحب الحاجة توصل ليهم و مشكلتك الوحيدة ان المحلات بقت اسعارها غالية جدا و ايجار المحلات برضة غالية فارحو ان تسال فى هذة الاسعار و على فكرة انا عايش فى هولندا برضة بس من 1989 و انا نازل مصر قريب لمدة اسبوعين و لو حبيت اسالك على حاجة انا تحت امرك و ربما يوفق باذن اللة

[wael elsherif]

الي الاخ العزيز مستر عاشو كم كنت سعيدا بمشاركتك .انت تعرف مدي صعوبة ان تترك حياه قد تعودت عليها والفتها وتعرف مدي صعوبة القرار بالنزول والاستقرار في مصر في ظل الظزوف الحاليه التي تعيشها مصر وعندما اقارن احوال هولندا باحوال مصر لاني اتمني واعتقد اننا نستحق ان نعيش نحن المصريون حياه كريمه مثل التي يعيشها الهولنديون فاقارن بيننا وبينهم واحوال ان اعرف لما وصلنا الي تللك الحاله ولما وصلوا هم الي تللك الحياه الكريمه وليست السهله فانت تعرف اكثر مني كم يتعب الهولنديون في العمل .المهم قرار النزول ليس سهلا .اشكرك جدا علي عرضك الجميل بالخدمه وربنا يبارك فيك.انا نفسي بس لو عندك وقت وانت في مصر تبقي تسال علي الاسعار .ولبه انت فكرتك في المدن الجديده ؟؟ولو عندك اقتراح محدد اقصد فكره محدده يا رايت تقولها لي .المهم انا ان شاء الله هيسمع منك.علي فكره انا ساكن في denbosch.noord brabantواانت ساكن فين؟؟كل سنه وانت طيب ورمضان كريم. ik zal op jou reactie wachten dan u wel alslam alukom wael

[زعلان]

قرأت رسالتك فقط نصيحة انك تبحث عن عمل في احد المطاعم الكبيرة او الفنادق في دبي كمدير مطعم او شيف (مرتبات الشيف كبيرة) حتى تكون فكرة عن البلد و امكانية فتح عمل مستقل و العمل في المطاعم والاكل في دبي مربح جدا و مفيش اكثر من المطاعم في البلد و الناس ما بتبطلش اكل ............. لا انصحك في مشاركة الشخص الذي ذكرته وخاصة انه ملكش خبرة في هذا المجال

[se_ Elsyed]

بالمناسبة بقى

عشان تبقى مرتاح البال وتضمن جزء او سبب من نجاح مشروعك ... لازم تحرق المركب اللي هاتيجي بها من هولناد ... يعني لا تترك شيئاً ورائك يجعلك تُقارن بين ما ات فيه الأن وبين ما كنت عليه ...

ده إذا كنت عايز تستثمر وتصرف فلوس في بدلك ...

لإن ترك خط راجعه وراءك لهولندا سيجعلك بين نارين ..

نار الإستمرار في مصر

ونار الرجوع إلى هولندا

وهذا فيه خسائر كبيرة لأي إستثمارات هاتعملها ..

[mrashour]

وائل باشا

شكرا لردك ورمضان كريم على فكرة انا من امستلفين amstelveenو نحب شوفك بازن اللة اما عن المدن الجديدة فيمكنك ان تعمل فيها اسم و المنافسة مش كبيرة قوى زى القاهرة و اذا المحل اشتغل بيبقى احسن من القاهرة و ياريت لو جنب جامعة او معهد يبقى الشغل 100% و ربنا يوفقك علشان تقدر تعيش حياة مستقرة و اول شى تعملها لما توصل مصر ان تحرق السفينة زى ما قال الزميل العزيز

و الايميل بتاعى ashour99@yahoo.comو تحت امرك فى اى سوال