المسكوت عليه أحياناً في صحافة الحوادث الحكومية

[Sherief AbdelWahab]

مقدمة :

تهتم صحف الحزبوطني بالحوادث أكثر من صحف المعارضة والصحف المستقلة.. ففي الصحافة المعارضة والمستقلة صفحة الحوادث "يادوب" صفحة روتينية لا يلتفت إليها أي أحد .. أما حبايبنا الحلوين عملوها صفحات وملاحق ويمكن صحف كاملة كمان بالتحبيش والبهارات..

ليه باتكلم في الموضوع دة؟

في قضية رأي عام -المسلسل- حصل ببساطة إن شخص ما في النيابة سرب حادثة لصحفي .. قام الصحفي الشطورة نشره بكل أسمائه "كاملةً".. وحطوا تحت كاملة ستين خط!

دة نظير إن اسم البيه بتاع النيابة وكل البشرية اللي معاه يتكتب بالبنط العريض ويتبروز في الحادثة لما تتنشر..

ليه بقى ما حدِّش انتفض للبلاوي اللي بتحصل دي في الواقع قد ما التفت لمولد شائعة صحة الرئيس؟ مش يفترض إن فيه قرارات وتعليمات من النائب العام بمنع النشر في الحوادث لحين استكمال التحقيقات؟

خلص الكلام

[أبو مروان]

الاستاذ شريف

انا طبعا متفق معاك ... لكن برضه اللى يلفت النظر هو ان المسلسل (مع احترامى للمخرج و المؤلف والممثليين) بيتعامل مع المشاهد و كانه مواطن من نيوزيلنده او هولندا او اى دولة من اللى فيها حريات و سيادة قانون لا يفرق بين الوزير و الغفير (اللى اخذ الرشوة) ... يعنى ازاى نحن المصريين نرى وزززززززززززززززير يقوم ظابط مباحث (مهما كانت رتبته) يزقه كده من كتفه .... وازاى نصدق ان وزززززير يروح لحد الدكتورة بنفسه و هى تطلعه قفاه يقمر عيش و تمسح بيه الارض و تديله درس فى الاخلاق ... و غيره .... ياجماعة حرام عليكم كده الاستهذاء بعقلية المشاهد .... ارحمونا نحن مصريين و نعرف ما يمكن عمله الوزير ... وعلى رأى الاستاذ وحيد سيف فى احدى مسلسلاته عندما حذر سكرتيرته من المساس بواح مستشار و قال لها " ده يحبسك و يحبس ابوكى" فردت عليه و قالت " بس باب مات " فقال لها " يحكم عليه غيابى " .....

فالرجاء من القائمين على هذا العمل احترام عقلية المشاهد و خاصة المصرى .... وعلى فكرة و قبل ان نشاهد النهاية احب اقول ان لو الدكتورة عبلة انتصرت فى النهايه سوف يكون المسلسل ده من الخيال الهبلى (عفوا اقصد العلمى)

اخوكم

أبو مروان

[Sherief AbdelWahab]

المسلسل يمكن الكلام عليه كمسلسل في موضوع آخر في تبويب الفنون.. أنا اللي يهمني اللي المسلسل دة كشف عنه..

نشر حوادث واتهامات بلا ضابط ولا رابط..

الصحافة الحكومية اللي عاملة فيها "خضرة الشريفة" واللي بتعتمد في تسويقها على الحوادث زي الجمهورية وأخواتها وبتدي دروس ومواعظ في قوانين وقواعد النشر مابتثيرش ولا بتلتزم بالقواعد المرعية في الظروف دي..

المفروض مافيش نشر قبل ما القضية تخلص.. وبإذن من النائب العام..

دلوقت ممكن النائب العام يدي أمر عدم نشر وتلاقي كل البشرية ناشرة الخبر فوق السطوح!

ليه ما سمعتش "بربوشتي" ولا "كوكو" ولا "كرملة" اتكلموا في المواضيع دي في التليفزيون؟ وليه الموضوع دة ما اتناقشش حتى على هامش المسلسل؟

الله أعلم..

خلص الكلام