رحله اتوبيس المحاورات..

[Seafood]

المشهد الثالث عشر

الهروب الكبير ....الجري نص الجدعنة

" مش يمكن إحنا جوة إسرائيل دلوقتي ؟" . ...

جملة قالها سي فود .. و بعدها .. شاع الخبر في كل الوادي... الذي بدأت تغيب الشمس عنه ... و قد شاع الخبر فيه كالنار في الهشيم ... و أقبل باقي الأعضاء يتساءلون ...

صحيح إحنا في أسرائيل ؟ ...

إعترى الأعضاء شعور بالقلق مصحوب بالقرف من مجرد فكرة أن أرجلهم فوق أرض إسرائيلية حتى و إن كانت في الاصل فلسطينية ... فإسرائيل بالنسبة للمصريين هي العدو الأول .. و مجرد تخيل صورة الجندي الإسرائيلي تثير في نفس كل مصري ذكريات العداء الدامي مع اليهود و الحروب التي طال أمدها ...و منظر الأسرى المصريين في الهزائم التي أبتلينا بها لا تنساه العين أبداً ....

صاح أحد الأعضاء الذي كان يبدو عليه أنه عضو جديد فلم يكن يعرف أحد من الأعضاء له إسماً : هوا إنتو تطولوا تبقوا في إسرائيل ؟

نظر الأعضاء إليه و على وجوههم علامات تعجب غاضبة من جرأة هذا العضو ..

إيه ده ؟ ... بيقول إيه دا ؟

نظر إليه سيد مرزوق بشك , و كأنه تذكر شيئاً ما ...

العضو الجديد : مش إسرائيل أحسن من التخلف إللي إنتو عايشين فيه من ألف و ربعمائة سنة بعد قبائل العرب ما غزت مصر.. إنتو المفروض تبوسوا أيديكوا وش و ضهر إن الظروف جابتكوا هنا

سيد مرزوق و قد حدثته نفسه بأنه سمع هذا الكلام من قبل في المنتدى ...بعدها إنطلق كمن رجعت إليه الذاكرة فجأة

و قال : بس إفتكرتك ... إنت الزولو ... أنا برضه كنت شاكك فيك من الأول من ساعة ما دخلت المنتدى ... أكيد إنت ظابط مخابرات في الموساد ... و إنت اللي رتبت كل البلاوي اللي بتحصل دي ... أنا مش ها سيبك ...

العضو الجديد : برافو برافو بتهكم (و مصفقاً ) ... إيه الذكاء ده ... أنا كنت فاكر إن المصريين بطلوا يفكروا خلاص ... يا سيد سيد أنا مصري و بأشتغل في السعودية وأنا من أدنى طبقات المجتمع المصري ... أنا مصري أكثر منك ...

سيد مرزوق : و الله ؟... يا راجل قول كلام غير ده ... أنا فاكرك كويس ... حتى فاكر كل الكلام اللي دار بينك و بين أسامة الكباريتي ....

و هنا إنطلق ما لا يقل عن خمسة أعضاء في نفس واحد ... أسامة ... فين أسامة ...؟

ع . أبو زيد : إزاي ما خدناش بالنا إن أسامة مش معانا ؟

مين آخر واحد شافه ؟

محبط : آخر مرة شفته كان واقف في طابور أمام دورة المياه في آخر إستراحة وقفنا فيها قبل اللجنة... اللجنة إللي كانت واقفة على أول الطريق المشؤم إللي مشينا فيه لمدة أربع ساعات...

سي فود : هوا كان في لجنة على أول الطريق ده .. يا عم مدبولي ؟.. قوللي ما تخفش ...

مدبولي : مش فاكر يا سيفود. ....

فري فريير : طبعاً.. إنت فاكر حاجة ...؟

مدبولي: الله يسامحك ... ثم قال مستدركاً : ... أيو أيوه أفتكرت.. كان في لجنة و كان في حواجز كتير وراها ...و هي اللجنة دي إللي شاورتلي أدخل الطريق ده ....

فري فريير : و طبعاً إنت دخلت زي الشاطر.. من غير ما تسأل إحنا رايحين فين ؟

مدبولي : و كنت هاعمل إيه ... ها أقول للحكومة يعني .. لأ مش داخل ... ديه دي ؟

سي فود : و كان شكلهم إيه الناس دول ... لابسين جيش و لا شرطة ... ها.. قولي !

مدبولي : مش فاكر يا سيفود ... و بعدين إنت بتسأل كتير كدة ليه يا جدع إنت ...تكونش مخبر و لا حاجة ...؟

ع. أبو زيد : يا جماعة بلاش نخرج برة الموضوع ... حد شاف أسامة بعد كدة ؟

لأ ...

ع. أبو زيد :طيب مين كان قاعد جنبه في الاتوبيس ؟

ماحدش رد

ع. أبو زيد : يعني كان قاعد لوحده ؟

الكل ساكت

سبايدر : أكيد كان قاعد جنب البيه الزولو : و طبعاً أسامة بيشم الناس دول من على بعد أميال ... و لما إكتشف أسامة حقيقته ... إتخلص منه في الأستراحة الأخيرة ؟

مسلمة مصرية : يا ماما (و قد وضعت يديها على وجهها)... إتخلص منه إزاي ؟... زي ما بنشوف العصابات الوحشين في الأفلام؟ مسكين يا أخ أسامة.. يا ترى إنت فين دلوقتي ...؟

قال سبايدر ذلك .. و نظر إلى سي فود و كأنه يقول له إيه رأيك يا استاذ عجبتك في كشف غموض المؤامرة دي ؟ يعني مش إنت بس إللي بتعرف تفصل مؤامرات ....

سيفود محدثاً نفسه ... سبايدر ده شكله ييجي منه .. في أقل من 10 ثواني وصل للتفسير ده ... هايل و الله ....

فأراد سي فود أن يختبر قدراته أكثر ... فسأله في نبرة تحدي ...

سي فود : إذاً ... كيف كان عدد الأعضاء صحيحاً عندما تم العد بعد أن هبط الأتوبيس إلى أرض الوادي ؟

فرد سبايدر في ثقة : ممكن يكون الزولو بعد أن خرج من الأتوبيس رجع إلى داخله من خلال النافذة ... و بهذه الطريقة ... حسب في العدد الكلي مرتين ...

فبرم سي فود شفتيه لأسفل معبراً عن موافقته على الفكرة و إعجابه بها في آن واحد ...

العضو الجديد : ما فيش فايدة هاتعيشوا طول عمروكوا في الخزعبلات و التخيلات و المؤامرات ... يا أمة ضحكت من ...

سيد مرزوق : أووووعى تكمل.... أنا بقولك أهه .....إنت هاتقول أسامة فين و لا لأ ...؟

العضو الجديد :سيب قميصي يا سيد ... دلوقتي بس إفتكرتوا أسامة ؟ ... و هو مختفي زي ما بتقولوا من أكثر من 6 ساعات !... طبعاً... ما نتوا بعتوا القضية ... و ما بتفتكروش الفلسطنيين غير لما تزنقوا ....

إبن الوطن : و الله الفلسطينيين دول محظوظين بشكل يا أخي... يعملوها و يسيبوا أرضهم.. و المصريين يتعكوا فيها .. زي حالتنا هنا بالملي ... أدينا إحنا معكوكين هنا. و سي أسامة زمانه قاعد في البيت بياكل خبز بالزعتر و زيت الزتون , وبيشرب شاي بالمرمرية .... و سلملي عل الجظية ( الجظية = القضية)

باسر باي: أحب أفكر الأعضاء إن مصر مادخلتش أي حرب من حروبها من أجل فلسطين أو العرب ... و في 48 ما كناش بنحارب لوحدنا كان كل العرب معانا ... يعني موضوع إن " كفاية على مصر الحروب إللي دخلتها عشان العرب " دي أكذوبة ... علشان تبرر تقاعس الحكام ...و للأسف الشعوب صدقتها ... و بنرددها زي الببغاوات .....

متسائل : الأخ أسامة من أفضل أعضاء المنتدى ...و عيب الكلام ده يا إبن الوطن ... بس حلوة "الجظية" دي ... إنت بتشتغل في الرياظ ... ؟

بايت : فعلاً الأخ أسامة من أنشط الأعضاء في المنتدى ..و بيحب مصر و المصريين ... و بيعتبر نفسه واحد مننا ...و إحنا بنعتبره واحد مننا ....

سي فود : يا أساتذة مش عايزين نختزل الموضوع في شخصية أسامة ... فلسطين دي أرض إسلامية قبل ماتكون فلسطينية ...و المصريين عمرهم ما نسيوا فلسطين ولا القدس ... و لو القدس ارتبطت بأشخاص أو بشعب.. لن ترجع لنا يوماً..... و بلاش يا سيد إبن الوطن ترديد الأسطوانة اللي زهقنا منها دي ..." إن الفلسطينيين باعوا قضيتهم "... دا كلام بدأه اليهود ثم نشره الحكام العرب من أجل أن يبرروا تقاعسهم ...تمام زي ما بيعملوا مع قناة الجزيرة الآن... عندما فضحتهم.. قالوا عنها إنها تتعامل مع إسرائيل .. .و حتى لو كان في فلسطينيين عايشين في رفاهية خارج فلسطين فهؤلاء قلة ... و أمام كل واحد من هؤلاء هناك عشرة داخل فلسطين مستنيين يضحوا بأنفسهم ... بلاش الكلام الخايب اللي بنردده .. إحنا حافظين مش فاهمين ....

الطفشان : يمكن الموضوع مجرد إن أسامة إتأحر شوية في دورة المياه ...و إحنا طلعنا من غير ما نتأكد إنه معانا ...و الموضوع بسيط ... بلاش نديله أكثر من حجمه ...و لا أعتقد إن إسرائيل ليها دخل خالص في الموضوع ... بلاش تخيلات ...و أوهام ....زي ما بيقول العضو الجديد

سي فود : كل ما أقوله هو أن هذا إحتمال لازم نفكر فيه ..

م. أبو زيد: يا أخ سي فود صعب إن إسرائيل يكون ليها دخل في إللي بيحصل لينا ده ..

سي فود :طب سؤال ..و إحنا في الطريق ده إللي مشينا فيه 4 ساعات لوحدنا ... كانت الشمس فين ...

أحد الأعضاء : كانت فوقنا و بعدين كانت ورانا ...

سي فود : يعني كنا متجهين شرق ... و لو كنا متجهين ناحية شرم الشيخ كان المفروض تبقى الشمس عن يميننا مش ورانا ... يا ترى مين إللي على حدودنا الشرقية ؟

مانمن : إسرائيل ...

م. أبو زيد : مش معقول ... و بعدين إحنا بينا و بينهم

إتفاقية سلام ...

براود مسلم : اليهود لا عهد لهم

سيفود : ما هوا لأننا بينا و بينهم إتفاقية سلام

م أبو زيد : إزاي يعني

سيفود : هناك بنود سرية كثير في الأتفاقية لا نعلم عنها شيئ و قد يكون من بينها تسليم المعارضين للحكومة أو للسلام من المصريين إلى إسرائيل للتخلص منهم... مقابل أن تفرج مصر عن جواسيس إسرائيليين مثلاً ..

م أبو زيد : مش معقول الحكومة تعمل كدة يا أخ سي فود

سي فود : الحكومة التي تعذب المواطنين في السجون دون مبرر .. لا يستبعد عليها أن تفعل أي شئ ...

م أبو زيد : بس مش لدرجة يبادلونا بجواسيس ... صعبة دي شوية ..

سي فود : .و ربما قالوا أننا نتبع تنظيم القاعدة و حاولنا التسلل عبر الحدود إلى إسرائيل ...و أن السلطات الإسرائيلية إكتشفت أننا نتبع القاعدة فقامت بتصفيتنا ... خاصة و أنهم عندما يعثرون علينا ستكون" دقن الواحد فينا قد كدة "... و إذا كان على "العمم " ... إحنا لبسناها خلاص من ساعة ما دخلنا الطريق الشؤم ده ... و المحجبات معانا ما شاء الله و لا كأننا في " داون تاون " قندهار .......

براود : فرصة .. أهو نلتزم بالسنة ... و نطيل اللحية ... رب ضارة نافعة ....

رجب : الإسلام ليس مظاهر ...هذا ما يريده لنا أنصاف المتعلمين ... أن نربي اللحية , و نلبس الجلباب القصير ...

سي فود : و مش بعيد يبعتوا طيارة تصفينا كلنا ... أو ترش علينا بنزين و يولعوا في الوادي كله ...

و ما إن إنتهى من كلامه حتى سمعوا صوت أزيز طائرة آت من بعيد... فأنطلق جميع الأعضاء دون تفكير ... يرقضون في كل إتجاه .. بحثاً عن ملجأ يختبؤن فيه من الطائرة ...و كأنهم فئران صغيرة تفر من قطة شرسة جائعة ...

فهذا سيفود قد إختبأ وراء شجرة ...

و هذا م. أبو زيد و أبو حلاوة و قد تسابقا على تسلق الشجرة و الإختباء بين فروعها ...

بينما كان على الشجرة الأخري يجري نفس السباق على تسلق الشجرة بالصدفة بين الرفاعي و براود مسلم ... فوجدا بايت و الصاوي قد سبقاهما و وصلا إلى القمة قبلهما ...

و هذه مجموعة كبيرة من الأعضاء قد زحفوا على بطونهم و إختبئوا تحت الأتوبيس ....

و هؤلاء أعضاء الإدارة و السواق و بعض الأعضاء الآخرين قد إنطلقوا إلى داخل الأتوبيس فدخلوه و أوصدوا الباب خلفهم ...

و هذا إبن الوطن لم يلحق الباب قبل أن يغلق فظل يطرق عليه بكلتا يديه بحركة هستيرية ... دون أن يفتح له من بالداخل ...

و هذا متسائل و قد جاء جريا من الناحية الأخرى من الوادي في إتجاه الأتوبيس ... فطار قافزاً إلى داخل الأتوبيس بيديه الممتدتين أمامه .. من خلال النافذة ذات الزجاج المكسور بعد أن رأى باب الأتوبيس و هو يغلق ... غير عابئاً بقطع الزجاج المتناثرة على حواف النافذة ...

و هذا سيد مرزوق قد إحتمى بإطار عجلة الأتوبيس المنفجرة فكاد يدخل بجسده كله داخل الإطار ...

و هذا شرقية قد أسرع إلى داخل كابينة العفش يختبئ فيها وقد أغلق بابها عليه و نسي أن أرضيتها مغطاة بالملوخية ....

و هؤلاء شباب و فتيان المنتدى الأقوياء الأشداء مانمن و عمرو و لانسلوت ... و غيرهم ... و قد تسلقوا التلال المحيطة بالوادي من كل إتجاه .. فإنطلقوا يعلوها بسرعة البرق رغم إنحدارها الغير بسيط ... و دون النظر خلفهم و لو مرة واحدة حتى وصلوا إلى القمة ...

و هذا فري فري و رجب و ورائهما الطفشان ...لم يجدا شيئاً يختبئان وراءه أو داخله ... فظلا يدوران جرياً حول الوادي كالمكوك دون توقف .. و هما يقفزان فوق الصخور التي كانت تقابلهما ... و كأنهما في سباق المائة متر حواجز ...

بينما إنطلقت جميع النساء و الفتيات دفعة واحدة إلى داخل الخيمة التي لم يكن بعد قد تم الإنتهاء من نصبها ...و لم ينتبهن إلا و الخيمة تنهار فوق رؤوسهن ... فإنطلقت صيحاتهن عالية مدوية في أرجاء الوادي حتى غطى صوتهن على صوت أزيز الطائرة ...و أصبح أملهن الآن الخروج من الخيمة بعد أن كانت ملاذهن ...و كدن أن يختنفن ...و تمنين أن لو قامت الطائرة بتصفيتهن جسدياً .... فهذا أرحم بمائة مرة من شعورهن بالإختناق ....

[ســيد مرزوق]

فشر أسامة أنور عماشة .....

برافو عليك يا سي فود .... دا إنت عملت مسلسل رهيب ومثير ولذيذ

وعندك بالتأكيد موهبة تصويرية فذة ولغة سيناريو حية .... وخيال سينمائي فريد ..... مش ممكن الشفافية دي ... ولا السلاسة دي .... ماشاء الله ... ماشاء الله .

لأ وفاكر الزولو كمان .... موتني من الضحك ياراجل :lol: :lol: :lol: :lol: :lol:

[mnman]

مانمن : إسرائيل ...

:lol: :lol:

منمان : عمل إيه ؟ أكل الطورطة ؟

:lol: :lol: :lol:

هو كان في طورطة وأنا معرفش....

مانمان : غلط يا أستاذ أمون ... إنت طلعت الورقة الغلط ... دي الورقة بتاعت باب السياسة لما إتقفل .... 

أمون : إخص الله يكسفك ...و سايبني أتكلم كل ده ....

:lol: :lol: :lol:

الله ينور يا أستاد سي فود...... بصراحة تنفع مسرحية كوميدية ....

[Sherief AbdelWahab]

سي فوود مؤلف مالوش حل...فين الكلام دا من زمان؟ :lol:

خلص الكلام

[Sharkiah]

نظر باقي الأعضاء إلى شرقية الذي جاب وجهه كل الألوان ما عدا الأخضر ... ثم نطق بلهجة المدمن أو المحب العاشق الولهان ... أعمل إيه ما قدرش أتصور إن يعدي عليا أربع أيام ما كلش فيهم ملوخية 

إلهام : تقوم تجيب حلة يا أستاذ شرقية ؟ 

شرقية : ما أنا كنت قافلها كويس .. و زيادة في الإحتياط كنت عامللها صندوق خشب ... بس لما حصل إللي حصل .. الصندوق باين عليه ماستحملش الصدمة ... 

كليو : طب كنت جبت ملوخية ناشفة ...و طبخناها هنا 

شرقية : لأ ... ما ينفعش ... لازم تكون خضرة .. و لازم الست الوالدة , الله يمسيها بالخير , هيا إللي تكون عاملاها ...

أرجو تعديل جزء الإحراج فى السيناريو والحوار ياأستاذ سيفود

أنا إيه إللى هايخلينى أحرج لاسمح الله ، أيوه عمرى مادقت ولاهادوق ولاهاستطعم الملوخيه بالتقليه بالدمعه بالأرانب إلا من إيد أمى

[متسائل]

سيفود.. ما تطول الحلقات شوية و تخليها 3 ساعات بدل 45 دقيقة :cry:

[Spider]

أيه يا عم الحبكة الفنية العالية دى

بس حلوة حتت لما بصتلك من فوق لتحت دى بمنتهى الثقة

وده عشان تعرف بس ان وراك عباقرة ومش أى حد

:D

[freefreer]

مجهود طيب اخى سى فوود .. انا بس مش قادر اجاريكم و الأخوة و الأخوات فى خف الدم

[الطفشان]

الموضوع كان بادي ظريف و لطيف و دمه خفيف

و ضحكت لما قلت يا بس

و بعدين في اخر مشهدين، تحول الموضوع الى ما يشبه المحاضرة او الاعلام الموجه، ليرسي بعض الافكار التي تناقشنا فيها من وجهة نظر المؤلف!

[Seafood]

عزيزي عادل أبو زبد

شكرا على كلمات التشجيع .. و الإسم سيظهر في النهاية ....

أعزائي ... سيد , و منمان , و شريف , و سبايدر , و مسلمة مصرية, و شرقية , ومتسائل , و فري .. شكرا

متسائل ...

لا أريد أن أمط الموضوع ... وهناك الكثير مما أكتبه ثم ألغيه لهذا السبب .. لأنني أخاف أن أمطه زيادة عن اللزوم .. فأشده ... فينقطع ... ثم ينفلت ... فيلسع ناس كتير ....و لا أقصد من في المنتدى طبعا و لكن من أنت أدرى بهم

[Mohammad Abouzied]

تصدق بالله يا سيفود انت لوقاعد في مصر ونشرت قصتك دي كان زمانك من الكتاب المشهورين وكنا بنشوف تمثليات تلفزيونية على الاقل في موضوع وقصة

[متسائل]

متسائل ...

لا أريد أن أمط الموضوع ... وهناك الكثير مما أكتبه ثم  ألغيه لهذا السبب .. لأنني أخاف أن أمطه زيادة عن اللزوم .. فأشده ... فينقطع ... ثم ينفلت ... فيلسع ناس كتير ....و لا أقصد من في المنتدى طبعا و لكن من أنت أدرى بهم

هو انت لسه ملسعتش؟ :D :D :D :D :D :D

[Seafood]

 

أرجو تعديل جزء الإحراج فى السيناريو والحوار ياأستاذ سيفود

أنا إيه إللى هايخلينى أحرج لاسمح الله ، أيوه عمرى مادقت ولاهادوق ولاهاستطعم الملوخيه بالتقليه بالدمعه بالأرانب إلا من إيد أمى

تم التعديل يا أخي العزيز شرقية ... لا أستطيع أن أرفض لك طلب ....

بس ده هايكون التعديل الوحيد .... :wink:

شكراً على التعليق يا عزيزي محمد .... و لو إن الموضوع بسيط ... و الأعضاء هم فعلاً الأبطال فيه و الذين يضيفون عليه البسمة لا أنا ....

هو انت لسه ملسعتش؟  :D  :D  :D  :D  :D  :D

:D :D :D

ماشي يا متسائل ... أنا لاسع ؟ .... مش كدة ؟

إن ما فرمتك تحت عجل الأتوبيس في الحلقة الجاية .... مابقاش أنا سي فوود

:D

[متسائل]

ماشي يا متسائل ... أنا لاسع ؟ .... مش كدة ؟

إن ما فرمتك تحت عجل الأتوبيس في الحلقة الجاية .... مابقاش أنا سي فوود

:lol:

معلش يا سيفود.. القافية تحكم :lol: :lol: :lol: :lol: :o

[Seafood]

المشهد الرابع عشر

جراوند زيرو ...Ground zero

مرت الطائرة.. و يبدوا أنها كانت طائرة عسكرية ثنائية المروحة من التي نراها في المناورات العسكرية ...و كانت تطير على إرتفاع ليس بالقريب .... فأختفت في الأفق ...و إنقطع أزيزها .. .و حل محله الصمت .. يطبق من جديد على المكان ... و لكن ظل كل عضو في مكانه لا يتحرك ... و ظل من يركض على حالته يركض أيضاً و لم يتوقف ... و كأنه غير مقتنع بأن الخطر قد زال ...

و جاء صوت مكتوم من داخل كابينة العفش صائحاً : خلاص

صوت من خلف الشجرة : لسة

- خلاص

- لســــــــــــــــــــــة

- خــــــــــــــــــــلاص

- أيوة

و هنا إنتبه الأعضاء ....فخرج كل من مخبئه ... ينفضون عن أنفسهم التراب وقد إرتمى بعضهم على ظهورهم على الأرض من الإعياء .. و دقات قلب كل واحد منهم تسابق الزمن .. و أنفاسه يجري كل نفس وراء الآخر يسابقه .. و توقف عن العدو من كان يجري ... و إنطلق بعض الأعضاء ناحية الخيمة يخلصون النساء و الفتيات من القماش و أحبال الخيمة ... وكانت النساء و الفتيات في حالة يرثى لها .. .و قد حدث هرج و مرج أثناء الهروب أدى إلى تناثر الشنط و الأمتعة و بعض الأطعمة في أرجاء الوادي بالإضافة إلى الغبار الذي تناثر نتيجة مرور الطائرة ... فأصبح منظر الوادي أشبه بمنظر ما بعد إنتهاء المعركة أو" جراوند زيرو "... .و نزل الشباب الذين كانوا قد إعتلوا التلال إلى الوادي .. .و كأنهم الرماة في الحرب .. و قد نزلوا بعد إنتهاء المعركة من مواقعهم على التلال ... ليتفقدوا الجرحى و الأسرى في الأسفل ...و يحصلوا على الغنائم من الأطعمة المتناثرة في أرجاء الوادي ....

و إنطلق الطفشان ناحية سيفود ثائراً على غير عادته .... و قال ....

الطفشان :الأخ سي فوود أنا كنت ناوي أن لا أعلق على ما تقوله في هذه الرحلة .. لكن ... إللي إنت بتقوله ده كتير و لا أستطيع السكوت عليه ... ما هو دخل إسرائيل في إللي بيحصل الآن ... ؟

كان هذا الطفشان...و لمن لا يعرف الطفشان فهو إنسان متزن و هادئ إلى حد كبير... و هو شخصية أبوية ... فهو يصبر على من يخالفه الرأي ...و بذلك نال إحترام أغلب من في المنتدى حتى من يعارضه الرأي لا يملك إلا أن يحترمه ... و قد كان له دور كبير في التقليل من حدة المناقشات في المنتدى ...و إن كان في بعض الأحيان يفلت الزمام منه ... خاصة عند وصول أعضاء جدد إلى المنتدى ... و هم غالباً ما يكونوا في غاية الحماس ... خاصة الشباب منهم ..

و للحق فإن الشباب على حق في ثورته تلك إلى حد ما... خاصة و هم يشعرون أن لديهم الكثير من الطاقة و الجهد الذي يستطيعوا أن يستخدموه في خدمة البلد و الدين ... بينما يرون أن هذه الطاقة معطلة و لا تستخدم ... و لا ينتفع بها و لا يجدون من يوجهها الوجهة الصحيحة .. .لذلك فهي تخرج منهم بشكل عشوائي و في غير موضعه .. و في صورة كلام لا أفعال .. فتبدو أقرب إلى الهمجية منها إلى الحماس ... و تظهر هؤلاء الشباب على أنهم متهورون بينما هم متعطشون إلى أن يكون لهم دور فيما يحدث حولهم ...

و الطفشان يدرك ذلك ... بما لديه من شعور أبوي ... و هو حس لا يتوفر لكثير من الأباء الذين يبدون أقل نضوجاً من أبنائهم في بعض الأحيان ...و يبدو أن هذه الصفة كان يتمتع بها الطفشان منذ الصغر حتى أن أصحابه الذين هم في عمره كانوا يطلقون عليه أيام الشباب " بابا الطفشان " .. و يأخذون برأيه رغم أنه ليس لديه صفات قيادية .. فهو لا يستطيع تحريك الجموع ... لكنه يملك القدرة على تنظيم الجموع إذا ما هي تحركت ...و هو في ذلك أقرب إلى المنسق منه إلى المدير .. و هو يفضل أن يكون صانع ألعاب في الخفاء عن أن يكون كابتن الفريق ...و هذا ما دعاه إلى رفض أن يصبح واحداً من فريق التنسيق في المنتدى .. لأنه أولا لا يحب القيادة ... و ثانياً لأن مهنة التنسيق هذه الأيام ككل مهنة في بلادنا لم يعد لها دور محدد ... حيث لا فصل بين السلطات في بلادنا ... و أصبح المنسق في معظم المنتديات يقفل المواضيع و يفتحها على مزاجه الشخصي ...

و هو شخصية ناهمة للقراءة و الإطلاع ... و كان أمله قبل الزواج أن يجد الزوجة التي تساعده على ممارسة هذه الهواية عنده ... و هي القراءة ... و رغم مشاعر الأبوة التي يتحلى بها ... إلا أنه لا يستطيع أن يستحمل شقاوة الأطفال حوله خاصة إذا صادف أن الأطفال تتشاقى حوله و هو يقرأ في كتاب... وهو يحّكِم العقل في تفسير الأشياء حوله ... و هو أمر من الصعب بمكان على من هو متدين .. أن يوازن بينه و بين أمور في الدين لا تؤخذ بالعقل ... و لكنه إستطاع أن يصل إلى حالة من التوازن النسبي ... و شخصية كهذه تكون حريصة على هندامها و مظهرها أمام الناس و ربما هذا يفسر أنه كان يعدو ببطئ رغم ما حدث و ذلك حتى لا يخرج عن وقاره .. .و رغم أنه يبدو لمن حوله هادئ إلى درجة البرود في بعض الأحيان ... إلا أنه في داخله يكون هناك بركان ثائر و لكنه لا يظهره إلى السطح و هي علامة من علامات النضوج ... و تتميز شخصية كهذه بالكرم الشديد إلى حد البذخ .... فقد يدفع بقشيشاً أكبر من ثمن ما يشتريه ... و يعتبر أن ذلك واجب عليه ... بل و يدفعه على إستحياء...بإختصار هي شخصية تعيش من أجل الغير ... و هي كفصيلة الدم( O ) في جسم الإنسان تعطي لجميع الفصائل و لا تأخذ إلا من فصيلتها ..لأنها لا تحمل أجسام غريبة ... فلا تثير الآخرين لتكوين أجسام مضادة لها ...فيقبلها أي جسم و لا ينفر منها...

ديماج :أتفق مع الأخ الطفشان ..

أبو حلاوة : و أنا أيضا أتفق مع الأخ الطفشان و أديك شايف نتيجة الأفكار دي ؟ ... عمرك شفت ناس في ورطة زي إللي إحنا فيها دي ... يهربوا لما يسمعوا صوت طيارة ... بدل ما يجروا عليها و يشاورلها عشان تنقذهم .. شفت أفكارك ... ممكن تعمل إيه ... ؟

سي فوود : أولاً لا داعي للثورة ... الطيارة دي أمريكية .. أنا شفت علم أمريكا عليها ...

إبن الوطن :... طيارة أمريكية ؟ ... أنا مش قولتلوكوا " بوش " مش هايسيبني ... يا حبيبي يا بوش .... أنا قلت برضه مش ها هون عليك ... ليك عليا ... و وعد الحر دين عليه .. أنتخب الجمهوريين أنا و ولادي .. و ولاد ولادي لغاية ماموت ...يا سلام يا ولاد .... مافيش أحسن من إن يكون ليك بلد تحمي ضهرك ... وتجيبك من إي مكان و لو كنت ورا الشمس ... آه أمال إيه ... يو إس إيه ...

أبو حشيش : و إحنا يعني إللي ولاد الغسالة ؟ ... مش فاهم و الله ...

إبن الوطن :بكرة لما الطيارة تيجي تاني هاتتحايلو عليا عشان أركبكم معايا ...

مصري : قبل أن نتكلم في هذا الموضوع عايزين نعرف من هى الغسالة ... لأن باين علينا لازم نعَرّف البديهيات الأول في كل موضوع ...

فارو : الغسالة هى التي تغسل أسرار الناس الداخلية ولذا أعتبرت من أحقر الوظائف ... ومنهم من تقمص وظيفة الغسالة للتستر على وظيفة أخرى ....

بن نيل : أمال فين رابسو ؟... هوا إللي ممكن يعرف يعني إيه غسالة ؟

مصري : إبن الغسالة .. وصف يطلق على الشخص المسئول الذى يستمتع بالسلطة .. أو يتعمد إذلال المواطنين أو أصحاب الحاجات ..

سيد مرزوق : و لما البلد فيها كل ولاد الغسالات دول ... ما نضفتش ليه من زمان ؟

عمرو 2003 و كأنه تذكر شيئاً : أيوة فعلا .. الطائرة اللعينة كانت أمريكية .. و كان مرسوم على ذيلها الصليب ... و يقودها خنزيران أمريكيان ( أمريكيان مثنى فاعل مرفوع بالألف )... و قد رأيتها و أنا فوق التل و هي تسقط شيئا ... أو ربما سقط منها شئ عن غير عمد (لست متأكداً ).. بالقرب من الطريق الذي كنا نسير فيه بالأتوبيس ... أروح أشوف إيه الشئ ده ... و اجي بسرعة...؟

مودي oox : ما حدش يقرب من الشئ ده دلوقتي .. بعدين .. بعدين ... مش يمكن يكون لغم تاني ...

لينكس :و يمكن تكون مساعدات على هيئة معونة .. في صورة وجبات غذائية سابقة التجهيز ...

سي فود: إذا كان في حد لسة بيراهن على أمريكا , و فاكر إن طيارة أمريكية هى التى ستنقذنا مما نحن فيه .. يبقى بصراحة بيهرج ... أمريكا يهمها إن إحنا نبقى في الحفرة دي على طول ... و إذا كانت هاتساعدنا ... فها تدينا إللي يخلينا عايشين عيشة الكلاب جوة الحفرة دي ...و لو حست إننا هانطلع من الحفرة في يوم من الأيام هاتردمها على دماغنا ...

زولو : آدي إللي إنتو فالحين فيه ... جعجعة و كلام كتير ...و شعارات ... و في الآخر عايشين عيشة الكلاب ... بأمريكا أو من غير أمريكا ....

سي فوود متجاهلاً كلام الزولو : لا بد أن يأتي الحل من عندنا ... نحن أدرى بما يصلحنا ... لا يجب أن نقلد غيرنا ... المقلد يظل تابعاً ... و لا يبدع أبداً و لا يقود ... بل ينقاد ... و أمريكا لا تريد لنا الخير ...و تحارب الإسلام ...

فري فريير : Posted: Thu Jan 30, 2003 1:07 pm Post subject

بوش ينذر 50 شمعة لمولد سيدي البدوي "

بوش يركب المراجيح و يضرب بمب و يطير بلالين

يوم العيد .. مع أطفال المسلمين في السنترال بارك."

الوصلة

فري فريير :Posted: Thu Jan 30, 2003 1:08 pm Post subject

بوش يقيم مائدة افطار رمضانية

الوصلة

فري فريير :Posted: Thu Jan 30, 2003 1:09 pm Post subject

هيئة البريد الأمريكية تصدر طابع بريدي لتهنئة المسلمين بعيد الفطر

الوصلة

كليو : و قد صرح مصدر مسئول بهيئة البريد الأمريكية أن العائد المادى من هذا الطابع سوف يخصص لتمويل الضربة الأمريكية ضد العراق ....

مسلمة مصرية : و سيتم أيضاً تخصيص جزء من العائد لشراء تذاكر طائرات .. لترحيل المسلمين المخالفين لشروط الإقامة ...

فري فريير : برافو .. أدى التحليل السليم للأمور ولا بلاش ..

الطفشان : أمريكا مش شيطان .. و مش عيب أن إحنا ناخد منها ما يفيدنا و نترك ما لا يناسبنا ...

رجب : و ما نسوقش عربيات .. و لا نركب أتوبيسات و لا طيارات عشان أمريكا هي إللي إخترعتهم ....

مانمان مداعباً : و الله فكرة .. ماهو إللي إحنا فيه دة بسبب الأتوبيس ... و لو كنا جايين على جمال كنا إتأخرنا شوية ...بس كنا ها نعيش ...

براود مسلم يعني لماذا الخلط دائما بين البدع الدنيوية و الدينية ..السيارة و الطائرة يطلق عليها بدع دنيوية تندرج تحت أنتم أدرى بأمور دنياكم , حديث الأخ كان بخصوص ابتداعات في دين الله , فلماذا دائما هذا المثال الذي عفا عليه الزمن ؟؟ ... دائما يضرب نفس المثال .. يعني العربية و الطيارة بدعة و بلاش نركبها !!! ... اسمح لي أخي الحبيب رجب أن أقول أن هذا الكلام ليس منطقيا . ..و الله من وراء االقصد

د.م.صابر:Posted: Thu Jan 30, 2003 1:10 pm Post subject

أمريكا تطالب رعايا دول إسلامية بالإضافة إلى كوريا

الشمالية للإسراع بتسجيل في إدارة الهجرة و أخذ بصماتهم ..

د.م.صابر:Posted: Thu Jan 30, 2003 1:11 pm Post subject

مطالبة أمريكا للمسلمين للتسجيل في إدارة الهجرة

كان كميناً لترحيل المسلمين إلى خارج أمريكا و القبض على

بعضهم دون إتهامات محددة..

سي فوود : ثانيا : كل إللي معترضين جروا و إستخبوا زي باقي الأعضاء بالظبط ... ممكن حد يفسر لي التناقض ده ؟ ...لو المعترضين مش مقتنعين بإن إسرائيل ممكن يكون لها دخل في إللى حصل لنا ...جروا و إستخبوا ليه ؟

الطفشان : الموضوع بسيط ...و هناك نظرية تفسره و هي سلوك القطيع ...Herd Behavior

سي فوود : عال .... أصبحنا قطيع ...

الطفشان : أنا ماقلتش كدة ....

براود مسلم : ياللا يا جماعة .. لو ها نتناقش في المواضيع دي مش ها نخلص .. ياللا نصلي الضهر و العصر جمع إن شاء الله .. خلي ربنا يكرمنا ..قبل ما الشمس تغيب ...

عضو غاضب كان مستمتع بالنقاش .. ينظر إلى براود مسلم و كأنه سيأكله أكلاً .. ثم يقول : أنا مش متوضي ... صلوا إنتو ...

براود مسلم : كلنا مش متوضيين ... هانتيمم إن شاء الله ...ياللا يا أخونا عشان ربنا يفك زنقتنا ...

عضو غاضب : ما بعرفش أتيمم ...صلوا إنتو ...

براود مسلم : هانعلمك إن شاء الله ... و أنا شخصياً هاصلي في الجزمة ... إللي عايز يقلع الجزمة و تيجي عقربة تعضه في رجله و هو ساجد ... هو حر ... و أهو يموت شهيد ... أعاننا الله و إياكم على إحياء السنن المهجورة ...

عضو غاضب : أنا مش لابس جزمة ... صلوا إنتو ...

براود مسلم : ياللا يا إخونا ... أذن يا أخ إبن أبي الشيبة ...

عضو غاضب : أنا جعان ما كلتش من الصبح ... صلوا إنتوا...

هشام و هو يحاول أن يخفي الضحك : ياللا يا جماعة و هاناكل إن شاء الله بعد ما نصلي ... و يا ريت نبدأ بالأكل إللي ممكن يفسد في الأول ... و نحاول نقتصد .. إحنا مش عارفين ها نعقد هنا قد إيه .... و لازم نحافظ على كل نقطة ماية ... و الشباب يبدأوا ينصبوا الخيام ...

صاوي: بارك الله فيك يا أخ هشام ؛ قال رسول الله صلى الله عليه و سلم : ‏ما ملأ آدمي وعاء شرا من بطن .. بحسب ابن ‏ ‏آدم ‏ ‏أكلات يقمن ‏‏ صلبه ..‏ ‏فإن كان لا محالة فثلث لطعامه وثلث لشرابه وثلث لنفسه

قام الأعضاء متثاقلون للإستعداد للصلاة ...

في تلك الأثناء كان يدور حوار آخر بين محبط و شرقية و الليمبي و متسائل... الذين شاهدوا زولو و هو يحمل حقيبة بصورة دائمة و لا يفارقها ...

فمال محبط على "شرقية" و هو يشير له بعينيه ناحية الزولو ... تفتكر الشنطة إللي معاه دي فيها إيه ؟....الراجل ده باين عليه مش سهل ... و جايز ما يكنش لوحده ... في أعضاء تانية معاه ... أنا فعلاً دلوقتي قلقان جداً على أسامة ...

شرقية: إنت أصلك إبن حلال يا دكتور ... و دي صفات الدكتور إللي بحق و حقيق ... يبقى هو نفسه بيعاني و في ورطة و يفكر في مشاكل غيره ...و يتعاطف مع مرضاه رغم إن ممكن هوا نفسه يكون عيان أكتر منهم ... أحييك يا عزيزي ... و أتمنى إن أطباء مصر ترجعلهم الأخلاق التي إفتقدناها في أطباء اليوم ... إللي همهم الأول جيب المريض مش صحته ... إنت فعلاً عملة نادرة في الزمن ده ...ما تقلقشى على أسامة ... أسامة بسبعة إرواح ...و يا جبل ما يهزك ريح

محبط : مش قادر أنسى حالته و هو مستني في الطابور قدام دورة المياه في الإستراحة ...

الليمبي: مالو ؟... كان عامل إزاي ؟

محبط : كان باين عليه مضطرب .. و مش واقف على بعضه .. و قاعد يبص لفوق و حواليه .. و العرق بيشر منه ...

متسائل:عادي يا محبط الأعراض دي طبيعي إنه يعاني منها أي واحد واقف في مكان زي ده ... و خاصة لو الطابور طويل قدامه ...إنت دكتور و عارف ...

محبط : هوا فعلاً الطابور كان طويل ... بس أنا قربت منه و سألته ... مالك يا أسامة ؟ .. في حاجة ؟... باين عليك قلقان !

الليمبي: و قالك إيه ؟

محبط : قال ... خليك بعيد دلوقتي يا محبط ... فيه حاجة عايز أخلص منها ... و ها حصلكو ...

متسائل: برضه عادي إنه يقول كلام زي ده ... و لو إن الحاجة دي ما تفرقش عن الزولو ... طب ما فكرتش تستناه ؟

محبط : أنا قلتلوه أستنا معاك ؟ ... قالي.. لأ ... الموضوع ده بالذات يخصني أنا .... لازم أخلص منه لوحدي .. و من غير ما حد ياخد باله ...

الليمبي: إنت كده قالقتني ... إحنا لازم نكلم الإدارة عشان تعين واحد يراقب زولو طول الوقت ماحدش يضمن ممكن يعمل إيه ..؟ و جايز فعلاً يكون زي ما قال سيد ... ظابط مخابرات إسرائيلي ...مش كدة يا متسائل ...؟

متسائل: عندك حق ...

كان بالقرب منهم يستمع إليهم ..عم مدبولي... فإنتبه عند سماعه لكلمة ظابط مخابرات إسرائيلي ... و تدخل في الحوار ...

مدبولي: مين ده إللي إسرائيلي ؟ ...في حد إسرائيلي معانا ؟ ....

متسائل ضاحكاً : إنت مش عايش معانا ولا إيه يا عم مدبولي ...أمال إحنا من الصبح بنتكلم في إيه... و الجري و الأستغماية دي كلها كانت عشان إيه ؟

مدبولي : و الله ماعرف يا بيه ... أنا لقيت الكل بيجري و يستخبى قلت أجري أنا كمان ...زي لما الناس بتجري على الجمعية كنت باجري معاهم ... يعني هايكون فيها إيه ... أكيد في فراخ في الجمعية ...

متسائل : أيوا بس يا عم مدبولي ... دا مش صح ... إفرض الناس دي كانت رايحة ترمي نفسها في البحر ... هاتروح معاها ؟

مدبولي : آه .. لو هايرموا نفسهم في البحر ورا إسرائيل .. هارمي نفسي معاهم ... أصل إنت ما تعرفش أنا بكره إسرائيل أد أيه ... أصل مش كفاية إن إحنا نرمي إسرائيل في البحر لازم نتأكد إنها غرقت كمان... قولي بقى يا بيه ... بقى هوا الموضوع كان عشان إسرائيل ؟...

إلليمبي : أيوا يا سيدي في إشاعة إن إحنا دلوقتي في إسرائيل ....و إن إسرائيل هيا إللي ورا إللي بيحصلنا ده ...

مدبولي : إسرائيل! ... أنا في إسرائيل دلوقتي ؟... و إيه اللي جابنا إسرائيل ؟ و إيه دخل إسرائيل ؟... أنا كنت فاكر إن البلوى إللي إحنا فيها دي الحكومة هي اللي وراها ... ما ترسيلكو على بر .. الحكومة و لا إسرائيل ... و لا أكونش أنا السبب ...

متسائل : ماحدش يعرف يا مدبولي لسة أدينا بنحلل و نتناقش ...يمكن نوصل لحل ... بس مش عارف إمتى ....

مدبولي : و مين الظابط الإسرائيلي إللي سمعتكوا بتتكلموا عليه؟

الليمبي دون أن ينتبه أن زولو قد ترك المكان الذي يجلس فيه و جاء مكانه عضو آخر فجلس على نفس الحجر الذي كان يجلس عليه زولو :

الليمبي : الظابط الإسرائيلي يبقى الراجل إللي هناك إللي قاعد على الحجر و جنبه شنطة ..

مدبولي : طيب متشكرين ...

الليمبي : يا عم مدبولي رايح فين ؟ ... ما خلصناش كلامنا ...

مدبولي : لأ ... خلص الكلام ... و باقي الفعل إنشاء الله ... يا مسهل يا رب ... إستعنا على الشقى بالله ......

[mnman]

أية الحلاوة دي يا سي فود.... أكتب الباقي بسرعة .... كلنا متشوقين لمعرفة باقي الاحداث.....

:inlove: :inlove:

[متسائل]

ماشي يا عم سيفود..

خلاص قلت رأيك في فريق التنسيق.. إرتحت؟ :wink: :wink: :wink: على العموم.. بالعند فيك.. الطفشان أصبح عضو فريق التنسيق من اليوم... و اسمح لي أطلع لك لساني :lol: :D :D :D

بس على فكرة..بخصوص الأتوبيس، في المواقف اللي زي دي.. متسائل بيكون له دور محوري و قيادي. :cool: :cool: :cool:

طيب كمل يا سيدي أما نشوف أخرتها إيه معاك... :D :D :D

[freefreer]

أنا شايف ان الأخ سى فوو .. بدأ "يألف" مواقف و كلام و يعرض افكارة من وجهة نظرة التى اراها قاصرة ..

و هو اسلوب غير مقبول ..

و أرجوة من الآن فصاعدا .. أن يستثنى اسم "العبد لله(فرىفرير)" من هذه القصة .. و حواراتها .. سواء كان هذا الذكر تصريحا أم تلميحا .. و شكرا ..

[متسائل]

شكل طحالب البحر في الطبق يجنن.. لكن بعض الناس يتسممون بها و يموتون كل عام في اليابان.

بصراحة.. الموضوع مشوق.. و لكن.. المباديء و قواعد الحوار تعلوا فوق كل شيء.

أنا كنت كنت عارف إن ده هايحصل من ساعة مدبولي ما طلع راجل جاهل و ماينفعش يستفيد من الديموقراطية لأنها كبيرة عليه. و حكم الفرد هو الصح.. بل و قبل ذلك من أول تعليق لي حينما قلت أن الأوتوبيس هو المنتدى.

ياسلام عليك يا واد يا متسائل بيه... و انت دائماً الفوركاست بتاعك بعيد المدى :cool:

ما زلت أحب أسمع باقي الحدوتة :wink:

[Seafood]

عزيزي متسائل

تخمينك صح و خطأ فى نفس الوقت ... ما أردت أن أقوله هو أن الشعب ليس مؤهل للديموقراطية بعد ... و لم أقل إنه " ماينفعش يستفيد من الديموقراطية لأنها كبيرة عليه "... و الفرق كبير بين التعبيرين...

الرسالة التي أردت إيصالها هي أن معظم الشعب لا يعلم و لا يفقه كثيرا مما يتحدث عنه المثقفون .. لأنهم يتحدثون لغة لا يفهمها ...و في نفس الوقت يقولون أنهم يتحدثون بإسمه و أنهم يريدونه أن يشارك في الحكم ... كيف و هو أصلا لا يعرف عماذا يتحدثون ... و المشكلة أن المثقفين بما فيهم رجال الأحزاب يعتقدون أنهم عندما يتكلمون عن الديموقراطية و الأحزاب و تداول السلطة والإنتخابات ... يعتقدون أن رجل الشارع يفهم كل ذلك ...

و لذلك عندما تحدثت شعنونة إليه بلغة يفهمها ... إقتنع بالديموقراطية بعد أن كان يعتقد أنها كفر ...و قال أنا معاكم ... أما موضوع حكم الفرد المطلق فلم أتطرق إليه من قريب أو بعيد ... خسارة أنا كنت فاهم إن الكلام واضح و مش محتاج أفسره ...

و أدعوك كتجربة عملية أن تذهب إلى الناس في الأرياف و القرى و إلى أصحاب المهن البسيطة التى لا تتطلب تعليم ...ثم كلمهم عن الديموقراطية بالطريقة التى نتكلم بها هنا فى المنتدى (وهي بالمناسبة نفس الطريقة التي يتكلم بها المثقفون بما فيهم رجال الأحزاب) ... ثم قل لي كم واحد أحسست أنه يفهمك ... و كم واحد ممن فهمك تجاوب معك .. و كم واحد ممن تجاوب معك على إستعداد لأن يطالب بالديموقراطية ...

عندما يتحدث الغرب عن الديموقراطية فهم يتحدثون إلى أناس يفهمون مفرداتها .. و يدركون معنى حرية الرأي و قيمته ... لأنهم هكذا تعلموا و هكذا تربوا في بيوتهم ...

أما نحن فمعظم الشعب قبل بأن يكون مسلوب الحرية و الإرادة ... و رضي بذلك .. عن طيب خاطر أو لا مبالاة أو قهرا ... لذلك فمن الأهمية بمكان أن نزرع هذه القيم من جديد في نفوس الشعب .. و هذه مهمة المثقفين ... و لكنهم للأسف لم يفعلوا و إكتفوا بالحديث عن الديموقراطية فيما بينهم داخل الصالونات أو على الفضائيات .. بينما صاحب الشأن و الذي أشتقت من إسمه كلمة الديموقراطية ... فهو غائب عن النقاش أو مغيب ...

إذا فالحل هو فى أن

1- ننتظر حتى تصبح نسبة الأمية 5 إلى 10 في المائة حتى يعرف الشعب عما نتحدث ...

2- أو أننا نخاطبهم بلغة يفهمونها ... أما طبيعة هذه اللغة فهنا مربط الفرس ....