هل تشعر بالامان فى الغربة ؟

[قاهرى]

الى كل مغترب مصرى يعيش بعيد عن بلدة انا عايز اتكلم معاكم عن موضوع الامان فى العمل

لية كل واحد فينا تقريبا مش بيحس بالامان فى المكان الى بيشتغل فية . بيحس ان ممكن يطلع قانون يلغى وظيفتوا ويقتصرها على المواطنين اولاد البلاد ويمكن براتب اكبر منوا وعدم توفر الخبرة ... بس كدة وخلاص علشان ميكونش عندهم بطالة

ولو مش هيطلع قانون لية بيكون فى كفيل مخليك حاسس ديما انك على كف عفريت زى مبنقول عندنا فى مصر بتكون حاسس انوا فى لحظة واحدة او بغلطة واحدة منك فى العمل او بتلكيكة ممكن منوا ... ممكن يقولك برة ارجع بلدك ....

ولو ان بعض الشركات فيها امان .. هنفضل كام سنة فى الغربة ... 10 سنين . 20 . 30 ....... ولا لحد لما ربنا يفتكرنا

ولا نمشى بمبدأ مكانى هو مكان اكل عيشى بغض النظر على انا حاسس بامان ولا لا ومدام اليوم بيمشى بيوموا يبقى الحمد الله

وهل مشكلة الامان دى بردوا بيعانى منها الى بيشتغلوا فى مصر .. بس اكيد مش زى هنا

الحياة هنا صعبة اوى بسبب الموضوع دة والمشكلة تكون اصعب واصعب لو معاك اسرتك ومش حاسس بالامان وحاسس انك ممكن بكل سهولة تاخد اسرتك واولادك وترجع مصر ومتلقيش حتى تاكلهم ......

ارجو الرد من كل مغترب على هذا السوال... (هل تشعر بالامان فى الغربة انت واسرتك؟)

تحياتى لجميع من يعانون من مشاكل الغربة المريرة

اخوكم قاهرى

[badroora]

انا بصراحة مش جربت ان تكون كفالتى على شخص ويمكن دا الاحساس بالامان نفسه فعلا احساس صعب انك تحس ان واحد ممكن يكون هو المتحكم فيك بعد رينا طبعا عشان كدا فى مصر كانوا دايما يقولونا اشتغلوا فى اماكن حكومية مش خاصه عشان يتكون امان اكتر

بس ارجع واقول مش تحمل نفسك فوق طاقتها وتفكر لو طلع قانون مين اللى هياخد مكانك حتى ولو مش يستحقك

لا اوعى تفكر كدا ابدا ابدا لان الارزاق بيد الله وربنا لما بيقطعك من مكان اكيد هيوصلك فى مكان تانى هو قدره لك

محدش بياخد مكان حد ولا نصيب ولا رزق حد ودا الامان نفسه ان الرزق بايد اكبر واكبر من اى بشر

انا هاديك مثال

ممكن يكون واحد شغال فى شركة كبيرة ولا جهة حكومية وكفالته على الجهة مش

على شخص معين وبعدين تلاقي رائيسك فى الشغل مزهققك ومكرهك فى الدنيا مع انه مش كفيلك اذن مشرط الكفيل هو اللى يكون متحكم وموضوع القوانين دا برده طالما مافيش اساس ليه يبقي لا تقدر البلاء قبل وقوعة وتحمل نفسك هم ومشقة فوق هم الغربة

سلمها لله واعلم ان رزقك اللى ربنا مقدرهولك هتلاقيه فى اى مكان ربنا يختارهولك

انت كل اللى عليك انك تسعى وتشتغل وتراعى الله وضميرك فى كل شيء والتوفيق من عندالله مش من عندنا

وبنا يوفقك ويسدد خطاك

[قاهرى]

شكرا نجفة بردك الجميل دة بجد

بس انا مش على كفالة شخص اساسا .. انا على كفالة شركة بردوا بس بحس ان الكفيل بيتحكم فى كل حاجة يعنى انا الى خلانى احكى الكلام دة بسبب موضوع حصل عندى فى الشغل

انا اساسا مهندس وماسك موقع ومعايا فى الموقع مهندسين نانين كتير غيرى وفى مهندس تكيفات معانا فى الموقع .. المهم جية تلفون من صاحب الشركة لمهندس التكيفات زملنا طلب منوا صاحب الشغل انوا يبعتلو حد يشوف اية المشكلة فى التكيف الموجود فى اللبيت بتاع صاحب الشغل

المهندس دة صحبى قلوا طيب وبعدها نسى للاسف من زحمه الشغل .. لية ولية انوا نسى .. اتصل بية تانى يوم وقلوا مترحش الموقع تانى .. الراجل بيقى يجى الشركة ويقعد فيها وخلاص ومش بيعمل اى حاجة .. مع انوا راجل مشاءا لله محترم جدا وشاطر اوى وانجز شغل غير طبيعى فى فترة كويسة جدا ووفرلوا فلوس كتير جدا .. المهم 3 ايام بالحال دة الراجل قاعد فى الشركة مش بيروح الموقع ومرة واحنا كلنا فى الشركة لقيت دة دخل علينا المكتب بيقول للمهندس صحبى دة انت اية الى مقعدك هنا ... رد علية قلو حضرتك مش قلتلى متجيش الموقع .. فنا مستنى لما حضرتك تامرنى انى ارجع الموقع .. قلو لا متجيش الموقع ولا الشركة

الراجل لم حاجتة ومشى من الشركة .. طبعا احساس وحش جدا وهو صحبى جدا .. وانا لما رحت لصاحب الشركة وحبيت ادافع عنوا واقولوا هو نسى غصب عنوا بسبب ضغط الشغل وهو انسان محترم جدا .. قلى لو هدافع عنوا حصلو

حسيت احساس انوا معندوش عزيز مهما نعمل او مهما نجتهد فى الشغل

الراجل دة دلوقتى عندوا اسرتوا هنا وبقالوا اكتر من 5 شهور مش لاقى شغل ... احساس صعب جدا علية وعلى اسرتوا .. الله يكون فى عونوا وعون الجميع يا رب

انا عارف ان الارزاق بايد ربنا بس بحس ان الاسلوب القاسى دة فى الشغل بيخلى الانسان حتى لو هو بيشتغل وكويس والحمد الله بيحس ان ممكن فى لحظة واحدة يحصلوا كدة زى الى حصل لصاحبى دة

للاسف كثرة سوق العمل من مهندسين وجميع الفئات خلى صاحب العمل يستغنى عن اى حد بسهولة ويجيب مكانوا حد تانى بسهولة مع تجاهل الرحمة وكلمة (قطع الرزق)

ربنا يوفقنا جميعا وفعلا زى منتى قولتى يا نجفة .. الموضوع مش مقصور على كفيل ممكن يكون مدير ويزهق الانسان فى عيشتوا لحد لما يسيب الدنيا كلها

بس لية بيكون فى كدة شخصيات لا رحمه عندها واحساسها بالتعالى بالشكل دة ...

ارجوا ان تكونى تفهمتى الموقف ....

تحياتى ليكى نجفة وللجميع

[afreet]

عزيزى القاهرى

انا طبعا هاتكلم على المغتربين فى دول الخليج فقط اما المغتربين فى جهات اخرى فالوضع يختلف تماما

سؤالك غريب جدا وادهشنى الحقيقة " ليه مش حاسين بالامان فى الغربة طبعا الخليج فقط من ناحية الشغل واننا ممكن نمشى فى اى لحظة"

طبعا لازم نحس بعدم الامان لانه فعلا احنا ممكن نمشى فى اى لحظة والاسباب

اولا : قرارات وانظمة تصدر من الدولة نفسها

وطبعا ده معلن بصراحة فى جميع دول الخليج وعلى صفحات الجرائد وشاشات التليفزيون وملموس بالقرارات التى يتم اتخاذها بتوطين الوظائف وله جدول زمنى محدد يتسارع او يتباطأ حسب نتائج كل مرحله

ثانيا : مساله عقلية منطقية بحته

دول الخليج لم تعد كالسابق كما تعلم ونعلم جميعا وتمر بمشاكل متعددة اهمها المشكله الامنية والتى يمثل العرب عبء ثقيل عليها وخصوصا المصريين لانهم يتحدثون فى السياسة سواء سياسة بلدهم او دولة الاقامة والاثنين مرفوض لدى الجهات وبالتالى اصبح وجودهم ثقيل امنيا والمحافظة على الامن يفوق التطور والتقدم المطلوب والذى يمكن الحصول علية من اى جهة اخرى ويرفض المصريين الاقتناع بانه هنا للحصول على المال فقط وليس مواطن تحت اى درجة وليس له اى نوع من انواع الحقوق ويريد ان يحسن ويطور البلد وفقا لمفهومه وبيئته

ثالثا : قرارات وانظمة تصدر من الكفيل او المسئول المباشر عنك

ايا كان وضعك سواء كنت تحت كفيل مباشر او مدير يمثل الملاك او مدير فنى او رئيس عمال فهو قادر على قطع عيشك فى ظرف 30 دقيقة بفاكس واحد ويعى ذلك تماما ويعى حاجتك للبقاء لان مرتبك فى مصر لن يتجاوز 30 جنيه او 20 ريال كما يرى فى افلام ومسلسلات مصر فى التليفزيون وايا كان موقعك ولو كنت مخترع او عالم ذرة فيمكنه استبدالك بعشر اشخاص بفلوسه

رابعا : الرحمه والتعاطف

اغلب المواطنين الخليجيين وليس الجميع بالقطع قساة القلب وليس لديهم ملكة التفكير فى الاخرين فهم من بيئة صحراوية قاسية تختلف عن بيئتنا كل الاختلاف فلا كل مناحى حياتهم وبالتالى فهو لن ياخذه شفقة او رحمة فى موظف لديه لديه اولاد فى مدارس او عليه اقساط فكل هذا لايعنيه ويمكن ترحيله ضمن نطاق ال 30 دقيقة وهو لايخالف قانونا او شرعا فى ذلك فهو مطمئن البال مرتاح الضمير

خامسا : " التار البايت "

بنظرة تاريخية سريعه للخمسين عاما الماضيه وهى ثانية فى عمر الشعوب ستجد افضال مصر على كل الدول العربية وهو مايذكره وجودنا هنا باستمرار به وانا لا اعرف عمرك ولكن اذا رجعت للاكبر سنا منى ومنك ستسمع الاهوال عن مساعدات مصر من الملبس والماكل وكسوة الكعبة والتكية المصرية وحملات الرعاية الصحية وماشابه

هذا فى القديم اما الحديث فكل خليجى تقريبا درس له مدرس مصرى او عالجة طبيب مصرى وفى مثل هذا العمر تتكون كراهية لاشعورية لهم وقد حان الوقت للرد لم لا ومصر تنزل درجات السلم باسرع من البرق و ليس الخليج من يصعدها

سادسا : احلام اليقظة للمصريين

فجميع المصريين اتى الى الخليج محاولا تكوين مدخرات وترك الغالى والنفيس فى مصر وعند قدومة اكتشف انه يلزمة سنة او اثنين لدفع فاتورة الاستقدام وتكوين حياة فى دولة الخليج ثم بدأ فى اقساط بعض الكماليات فى مصر او تكاليف زوراج او ماشابه فخروجة من عمله فى هذا التوقيت هو اعدام له وبعد ذلك اذا احضر ارته وادخل اولاده المدارس فخروجة من عمله ضياع سنوات دراسية للاولاد وهو اكثر من الاعدام

المصرى لايفكر فى ذلك الا بعد الواقعه او رؤية حاله مماثله وكان يظن انه فى وطنه الثانى ويرتب حياته لقضاء فتره طويله من العمر فى الخليج كما لو كانت بلد اهله

سابعا : اهالى الخليج نفسهم

انت فى احد دول الخليج كفيلك كل مواطن يمشى فى الشارع وليس من اتى بك للعمل ويمكنك ان تلاحظ ذلك فى محضر حادثه تصادم سيارات او خناقة بكل وضوح ويمكن لاى مواطن ترحيلك بسبب او بدون دون الحاجه الى واسطه حتى فانت تعمل لدى الجميع

كما ان لدى كل مواطن خليجى لا يريد ان يعمل اعتقاد راسخ بان الاجنبى اخذ وظيفته وهو من جعلة بلا عائل فلولا وجود الاجانب كان يمكن ان يكون مدير المشروع الذى تمسكه انت رغم انه لم يستطع الحصول على الاعدادية الا ان لديه اعتقاد بان عمل المهندس هو ادارة بعض الافراد وهو مايسهل عليه عمله والمصرى اول من يقابله بصفته المدرس والمحاسب والمهندس فهو لاينظر للاعمال الدنيا التى تناسب مؤهلاته بالطبع

هذه هى الاسباب الرئيسية فى عجاله

اعلم انك تعلم والجميع يعلم كل ماقلته ولكنى اندهشت فعلا من سؤال اجابته واضحه للعيان

الا ان لم اكن افهم مقصدك و تكلمت فى شىء اخر

اما موضوع زميلك فهذا طبيعى فمكيف الكفيل اهم من اى عمل لسببين

الاول حتى يكون زميلك عبره لمن تسول له نفسه ان يرد صباح الخير اذا ماقيلت

ثانيا الاعتقاد الراسخ لدى مديرك او كفيلك بان الارباح المحققه ناتجة عن وجود الشركة واسماء اصحابها وليس مجهود وتفانى من فيها واذا مشى كل الموظفين يجى غيرهم وستستمر الشركة وتحقق نفس الارباح

وكفايه كده وتقبل تحياتى وتحيا مصر

[MZohairy]

الغربه هي غربتك عن جيبك

[amrhoras]

السلام عليكم ورحمة الله وبركاته

حبيبي قاهرى عاوز اقولك حاجة او قصة صغيرة حصلت معايا

انا الحمد لله اشتغلت اكتر من 12 شغلانة فى 3 سنين اخرها قعدت سنه فى شركة تلاجات.

لما رحت الشركة دى كنت من اول الرواد فيها بمعنى انى كنت مع واحد صحبي بس اتينن محاسبين ماسكين مجموعة بحالها رأس مالها 50مليون جنيه. المهم تعبنا جدا عشان تنظيم الشغل فيها واننا نعمل المتأخرات والضرايب وعمل ميزانيات الضرايب والميزانية العامة للشركة الكل عارف ان ميزانية الضرايب غير ميزانية الشركة الحقيقية .

تعبنا جامد وصل بينا الحال اننا نشتغل اكتر من 16 ساعة يوميا نبدأ شغل 9 الصبح ونخلص 3 الفجر ونرجع هلكانين طبعا عشان نلحق ننام ونقوم وهلم جره

المهم المدير المالى ومدير الحسابات كانو ديما انتو وانتو واعملو وحتلاقوا وتخيل كان المرتب كام 250 جنيه اضضريت اوافق نظرا لانعدام العمل داخل بلدي عارف 250 يعملو ايه الايام دى بالعكس مكنوش بيكفوني مواصلات حتى اضطريت انى اعيش لوحدى بعيد عن اهلى مع انى فى نفس المحافظة بس كان البيت بعيد . المهم ياسيدى الفاضل اشتغلت واجتهدت لدرجة انى مسكت حاجات كتير اوى ومع ذلك كنت الحمد لله بخلص فى الوقت مع توقعات اصحاب الشركة نفسهم اننا مش حنلحق وكنت انا ماشي بالعكس واخدها تحدى انه مفيش مستحيل معايا فى الشغل .

ومرت الايام والشغل بدأ يخف بعد تعب اكتر من 5 شهور 16 ساعة يوميا . بدأت اتعب نفسيا عشان طبعا بعيد عن الناس اخرج الصبح وارجع مقابلش حد اهلى واصحابي نفسهم بعدو كتيير عنى .

وجابو 7 محاسبين وطلبوا منى انى اعلمهم واعطيهم جزء من شغلى وعليه تم والحمد لله على اكمل وجه لانى بعامل ضميرى وماشي بمبدأ ان ربنا هو مقسم الارزاق وطلبنا زياده زودونا 100 جنيه بقيت 350 مره واحده. ههههه

على وعود طبعا اننا حنزودكم وحيحصل طفرة فى رواتبكم عشان انتو تعبتوا معانا .

لما طالبت بحقى وانى ارتاح بقى وانظم مواعيدى بداو يرفضوا ليه انت المفروض زودناك يعنى المفروض الانتاجية تكتر اكتر واكتر ياعم هو انا فرخة بتعلفوها عشان تبيض الصبح وبالليل.

طبعا نظمت وقتى مع نفسي وبصراحة كنت بدور على شغل تانى لانى تعبت وحسيت بعدم الامان نظرا للتقارير السرية غيرلا الحقيقية من المدير المالى والله بجد الراجل ده وقفت جنبه فعلا وبعدين لما الانظار اتجهت ليا انى امسك مكانه بس والله والله والله مكنش ف بالى لانها مجرد القاب اهم حاجة شغلى والعائد منه ميهمنيش لقب او مكتب عليه اسمي بس اكون فى مكان محترم يحترمنى .

المهم بدأت انظم مواعيدي فبدأو يقرفونى اجى اخر كل شهر الاقى خصومات نص يوم نظرا لنك جيت متأخر تلت دقايق .

الكلمة عادت تحسب عليا. بدأ الاستفزاز من قبل المدير المالى ومدير الحسابات ليه بقى .وصلت لدرجة انى كنت متاخر شهر شغل لانى كنت ماسك شغلانه تانية تبع الضرايب فتفرغت لها وكان بأمرهم وفى اسبوع واحد كنت مظبط اليوميه العامة الامريكيه وقيود اليوميه ودفاتر الاستاذ فى حين ان الاخوه الجداد ممسكنهم اكتبلي بيان على الكنبيوتر بالشيكات او سجل فواتير حاجات هايفه يعنى .

المهم خلصت شغل شهر فى اسبوع جالى مدير الحسابات وفى لحظه استفزاز راح مقطع كل شغلى قال عشان انى ايه مش مظبطة ودى كانت قمة الغضب بالنسبة ليا اتقى شر الحليم اذا غضب اتخانقت معاهم ودلخلت لصحاب الشركة وقدمت استقالتى اللى رفضوها لانى تعبت معاهم .

وطلب المدير العام للشئون الماليه والادارية انه يقابلنى وقابلته فى اجتماع مغلق لمده 4ساعات طبعا شفت كل التقارير فبيقولى انا تخيلت انك بلطجى من كتر الحكاوي دى انت من بكره ترجع الشغل واللى يكلمك اتصل عليا شخصيا

المه رجعت وانا اقوى من الاول بس ف نفس الوقت كنت كرهت المكان مع انى اثبت وجودى .

فبقولك ممكن الغدر يجي من اى حد وفى اى مكان فى الدنيا حتى فى بلدك اخوك وابن بلدك بيحسب انك حتاكل رزقته صاحب رأس المال ديما بيفكر فى رصيده البنكي والموظف ده اخر حاجة عنده مهما كان راجل طيبب الا انه مصلحته ومصلحة شغلة وكل اللى شغالين عبيد

الحمد لله انا على كفالة شخص وكل الصفات فيه الغدر والطمع والجشع بس مش بيهمني لانى مبفكرش كتير فى بكره وحقى باخده اول بأول حتى لو حرجع فيها مصر ميهمنيش كل صحابي هنا بيحسدونى على الحكاية دى انى جرىء اوى خصوصا فى كلامى معاه ناشف ومحدش بيقدر عليا واللى فى دماغى بعمله هو نفسه قالى انا بكره المصريين بس احب شغلهم ولو عاوز حد عندى مليون مكتب يجيبلى الاف الموظفين قولتله بس عمرك ماحتعوض اللى معاك . هى الدنيا كدى يوم لكويوما عليك ولو ظلمت انهارده خلى بالك ربما حيردهالك مش لازم فى الشغل فى اقرب الناس ليك راح باصيصلى وسكت ومشي.

مش عارف انا بحكى ليه كدى بس بصراحة نفسي كل الناس تكون جريئة مع اصحاب العمل بالذات لانه لو حس بضعف حيقلبك وفى كلتا الحالتين مقلوب مع اول غلطه فانت اتكل على الله وجمد قلبك وكان نفسي صاحبك يكون اجمد من كدى اصلها بايظة بايظة مكنش فى داعى ان حضرتك عملت وسويت كان من باب اولى يروحله مكتبه ويقوله ويواجهه انت ليه عملت كدى مش مستني اوامر سعادتك او حضرتك قولت مش اروح الموقع .

ولما يقوله تعالى اعملى تكييف البيت اعتقد انه مش العامل بتاع اهله فى الشركة وفى البيت كمان لا الشغل شغل خليك جرىء وحددله وخليله حدود معاك

ساعة العمل عمل وساعة الراجة راحة لو الدنيا حتتهد ملكش دعوه وخلى همومك على الله ديما وربنا مبينساش الدودة فى بطن الصخر حينساك انت يا بني ادم ياللى وقرك وسط كافة مخلوقاته.

معلش طولت عليكم انا برده كان نفسي اتكلم مع حد لانى متعودتش اكلم حد فى الامور دى.

شكرا اخى القاهرى وربنا معاك ومع صحبك.

اخوك فى الله عمرو

[قاهرى]

الاخ العزيز afreet الاخ العزيز عمرو حورس

بجد تسلمو كلمكم صح مليون فى المية والله

[afreet]

الاستاذ عمرو

اتفق معك فى كل ماقلته جملة وتفصيلا فرجل الاعمال هو رجل الاعمال فى كل دولنا العربية وظيفته ادارة شركته لتحقيق اقصى ربح حالى ممكن وليس تكوين شركة لها صفة الاستمرارية وقدرتها على تحقيق ارباح مستقبلية وبالتالى فان كوادر الموظفين يتم التعامل معهم من نفس المنطلق على اساس الوضع والحاجه الحالية وليس المستقبلية اما عن مديرك المباشر فوضع طبيعى انه يحاول ان يقلبك فى اول فرصه فانت بنفسك قلت انهم فكروا فى ترشيحك مكانه او مكان هو يرغب فيه فوضع طبيعى ان يقاتل لهذا المكان وان لم ترده انت كما انك ستظل شوكة فى ظهره وان بقيت فى مكانك لمعرفة اصحاب الشركة بالمجهود الذى بذلته فيجعل موقعه دائما مهدد

اما عن اصحاب الشركة فلو كنت طلبت احد اصابعهم وقت الزنقة كانوا اعطوه عن طيب خاطر اما بعدما فرجت فالمتوقع منك مزيد من التضحيات فانت رجل مضحى وفى حالة عدم تقديمك تضحيات فانت بالنسبه لهم اصبحت مهمل لعملك

يبدوا انك وعيت الدرس من التجربة الاولى فغيرك لم يعيه الا بعد طول تجارب واقصد نفسى

واؤكد كلامك على انه يجب الاعتقاد الدائم بان الرزق موصول سواء فى مصر او غيرها وعليه فلايجب ان نحمل الامور اكثر مما تحتمل ولكن فى بعض الاحيان يكون الموضوع غير متصل بالرزق كمدارس الاولاد فانهاء خدمات موظف تعنى وجوب خروجه من البلد فى ظرف شهر على الاكثر مما يعنى نقل الاولاد من مدارسهم فى منتصف العام الدراسى وهو فى منتهى الصعوبة فمجرد النقل بين انظمة التعليم بين بلدين خطير فما بالك فى منتصف العام او اذا كان صاحب العمل رحيما تركك مما يعنى جلوسك فتره بدون دخل وانت اعلم بالمصاريف فى دول الخليج مما تستحيل معه الحياة

هذا بخلاف ان اغلب العاملين بدول الخليج عادة مايربط نفسه فى اقساط شقة او سيارة او خلافه مما يعنى فى حالة تركة العمل خسارة جزء كبير ان لم يكن كل الاقساط السابقة فى حالة عدم تحوطه لذلك والجميع يعتقد انه جالس هنا الى ان يرغب فى الرحيل فلا يحتاط

لذلك فان الظلم من مدير مصرى على ارض مصرية وان كان يصعب على النفس الا ان الحياة تستمر وحولك اهلك يساندوك ولو بالكلام اما الظلم على ارض اجنبيه من مدير عادة مايكون اقل من مستواك العلمى او الثقافى وعلى ارض لن يعطيك احد بها شربة ماء فصعب للغاية

الغريب فى الامر هو اشتغالك 12 شغلانه فى 3 سنوات وانت تعلم جيدا ان مصر تعمل لفتره قبل ان يعلوا مرتبك وتصبح ذو اهميه فى مكانك ولكن يبدوا ان هناكظروف لذلك والاغرب ان يفكروا فى تعيينك مدير مالى بخبرة 4 او 6 سنوات ويبدوا انها شركة صغيرة ويبدوا انك خارج القاهرة فبداية تععين المحاسب فى القاهرة 600 جنية فى الشركات الصغيرة التى لاتطلب خبرات معينة فقط لغة او كمبيوتر

عموما اؤيدك فيما قلته بان الانسان يجب ان يحترم نفسه فوق كل الظروف والرازق هو الله ولكن بتقدمك فى السن ستفاجأ باشياء لم تكن لتسمح بها قبل ذلك وستسمح بها عن طيب خاطر وتعتبرها عادية بعد فتره فهون عليك نفسك

[amrhoras]

بالنسبة للشركة لم تكن صغيرة البته ولكنهم كانو يستغلون احتياج الشباب للعمل

بالنسبة لموضوع انى تركت 12 شغلانة فده لانى كنت غير مستقر او الشغل لم يعجبني فقد اشتغلت من اول مندوب مبيعات فى مشروع حاسب لكل بيت عن طريق شكرة الاتصالات و شكرة ARTوشركات الشاى ومصانع الشكولاته كلاجسي ومصانع بلاستيك ( دى كانت اقل شغلانه داومت فيها وكانت ست ساعات ) مسئول خط انتاج وكانت بسبب مشاده بيني وبين صاحب المصنع لانه كان معترض على انى مدخن اعتقد انها حريه شخصية وبدال محترم العمل ومبدخنش فى العمل خلاص انما البيه قالى بالحرف انا مش اديك فلوس وانت تصرفها على السجاير انا عاوز واحد محتاج تخيل دى؟؟؟

واشتغلت بمقاهى النت كافيه واشتغلت فى فنادق بالغردقة كاشير واكوانتنت اسيستاند وكنت مرشح انى امسك خزينه احد الفنادق ولكن ربنا لم يرد بسبب عصبيتي على احد العاملين بالفندق وقدمت استقالتى فيها

صدقنى خارج البلد او داخلها كله محصل بعضه .

بس اتفق معاك لو كان فى اسره فعلا الانسان لازم يسايس اموره انما ممكن اكون لسه عاذب فدى سهله معايا.

بس اتفق معاك فعلا فى اللى قلته .

ربنا يهونها علينا جميعا انشا الله ونرجع بلدنا اقوى ونبدأ حياتنا كما نري ان شاء الله بس اهم حاجة انى اشتغل فى حلالى واكون الامر الناهى محدش يتحكم فيا ولا اتحكم فى الناس زى ماحصلى وياريت الكل يخلى دى قاعدته ان اللى اتظلم عمره ماحيظلم.

أرجو ان رسالتى وصلت للجميع.

متفكرش كتير فى بكره وسلمها للابنا بالله عليك مش تتعب نفسك.

وراك اولادك وزوجتك عوزينك .

اخوك عمرو حورس

[قاهرى]

اخواتى عمور وعفريت

والله فعلا اهم حاجة ان الواحد ميفكرش فى بكرة اية الى هيحصل فية سبحان الله ممكن يكون الواحد متمسك يابشغل الى هو فية بس ربنا كتبلوا حاجة افضل عيزوا يكون فيها

بس هى المشكلة بتكون اكتر لما تحس بعدم استقرار فى الشغل وقتها بيجيلك حالة نفسية سيئة وبيظهر الموضوع دة اكتر لو معاك اسرتك فاكيد هيلحظوا انك ديما سرحان انك مش طبيعى فى اغلب الاوقات ودة بسبب انك شايل هم بكرة .. ويا ترا اية الى هيحصل لو اترفد .. ويا ترا هيكون مصيرى زى ....... الى مش لاقى ياكل اولادة الله يكون فى عونوا ..... لكن فعلا الواحد لازم يعيش حياتوا طبيعى ويعيش اليوم بيوموا لان ربنا بيقسم الارزاق لكل عبادة سواء مسلم او اى كافر او طير او .........

من الصعب اوى ان الواحد يتحمل فوق طقتوا مش كفاية الغربة والبعد عن الاهل .....

انا والله حصل موقف مع اخويا كان بيشتغل فى شركة فى ابوظبى لمدة 4 سنين قلهم انا هنزل اتجوز وارجع تانى شهر واحد بس ... بس هما كانوا نيتهم شر .. الله اعلم اية السبب

المهم نزل اتجوز وبعد 3 اسابيع من سفروا اتصلو بية فى مصر بيسلموا علية ويقلولو ها يا عريس اية الاخبار قلهم انشاء الله اسبوع واجى قلولو لا خليك كمان اسبوعين ... هو افتكر انها يعنى زى مكافئة او هدية من المدير

قلهم شكرا والله وفضل فى مصر كمان اسبوعين لا وعمل فيزا لمراتوا علشان ميسبهاش فى مصر وتيجى معاة على طول .. المهم رجع بعدها لقى الشغل بيقولوا معلش احنا جبنا واحد تانى مكانك فى فترة عدم وجودك بس اثبت كفائة اكبر منك بكتير .. واحنا للاسف متنازلين عن خدماتك وحضرتك تقدر تروح للحسابات تاخد مستحقاتك ... مع عدم مراعة انوا معاة مراتوا ولسة جية البلد ومفيش مكان حتى يباتوا فية

انا مش عارف لية بيكون فى ناس ظالمة كدة ... طيب لو انت من الاول مش عيزنى قولى حتى انا ارتب اوضاعى بحيث اسيب مراتى فى مصر وانزل ادور على شغل جديد ....

بس للاسف صاحب العمل المهم عندوا اقل راتب ونفس كفائة العامل ذات الراتب الاكبر مع تجاهل عدد سنين الى قضاها حتى يصل الى الراتب دة وتجاهل التعود على الشخص دة فى العمل .. انا بعتبر النوع دة اسموا خيانة الموظف .....

تحياتى ......... اخوكم قاهرى :rolleyes:

[kokomen]

سؤال هو في حد بيشعر بالأمان خارج بلده .....؟؟؟؟؟؟؟؟؟؟

لا أمان في الغربه .... أسمها غربه لأنك غريب مهما كسبت من أموال ومهما طال بك الزمان

فستشعر بالحنين لبلدك .... أما في الغربه فأنت تنتظر أي لحظه يقولولك مع السلامة ياحبيبي على بلدك ؟؟؟

أظن أن غالبية المغتربين حاسين بكده ... ولا أعرف شعور من يعيش في بلاد الفرنجة .. مثل أوروبا وأمريكا

مع أن لي بعض أقاربي يحملون الجنسية الأمريكية .. مع ذلك عندهم نفس الحنين للوطن .. رغم مشاكل بلدنا الحبيب

تحية لكل المغتربين ومسيرك ترجع لبلدك مهما طال الزمن ....؟؟؟؟

:rolleyes:

[مونتى]

كيف تشعر بالامان وانت وكل احلامك بيد فرد واحد حتى ولو كان شخص اعتبارى كان تكون كفالتك شركه مثلا فهذه الشركه يملكها شخص وهو المتحكم فيها وفيك حتى ولو فى بلدك الامان يا صديقى هو ان تملك نفسك ومقدراتك فى الحياه ان تتحرك بهواك ولاتحتاج اذن افراج من كفيل او من الشركه ان تكون حر فالكفاله كما اظنها نوع من انواع العبوديه مطور بعض الشىء مهما تذكرنا ماذا كانت مصر وماذا قدمت للعرب عامه وللخليجيين خاصه فكل يكرهنا لالسبب بس لاننا مصريون ودائما نحن كمصريين ننظر لهم نظره دونيه لاحساسنا انهم بدوننا لم ولن يتقدموا وكل النعمه والخير اللى هم كان السبب الرئيسى فيه احنا المصريين

عاشق بلدى :rolleyes: