آمان يا لالالي .. دي كنافة عثمانلي

[se_ Elsyed]

النهاردة الشيف سين سين ده >>>>>>

ياختشي إسم الله على جماله

هايقدم لكم طبق رمضاني ظريف من عائلة الحلويات

وهو

الكنافة العثمانلي دي <<<<<<<<<<<

وتعود شُهرة هذا الطيق إلى سنوات عددددديدة ... وتحديداً في صيف 2007 .. حيث إن في وكر من اوكار الشيطان إسمه " تسيباس " في ميدان الإسماعيلية بمصر الجديدة ويقع في طريقي في الرايحة والجايه .. وحيث ان المدام عندي مدمنة حلويات .. واخويا الكبير كمان مدمن هو راخر فكانوا بيستقطعوني كل ما نعدي من قدامه ... وما بيدخلوس الإتنين إلا على الحاجات اللي تقطم الوسط ... المهم لفت نظري نوع كنافة شكلها زي اللي فوق دي وتفتح النفس ....سألت الحلواني سؤال بريء : مين دي يا عم ؟ قالي دي كنافة عثمانلي بالقشطة والكيلو بـ 48 ج يا بيه ... هاتشتري ولا هاتتنيل ؟ قلت له لأ طبعاً هاتتنيل ده أساسي يعني

المهم كام مره جبناها وجربناها وبصراحة حاجة في منتهى الإبداع وطعم لذيييييييييييييييييييييييييذ

بيني وبينكم العملية كبرت في دماغي وقلت يا واد يا سين سين إيه التكنولوجيا المعقدة في الإختراع ده ؟ فلا هو جاتوه ولا تورته ممكن نقول صعبة فليه ما تجربش وتحاول وتثخطيء حتى تصل إلى سر تلك التوليفة البديعة ..

وعليها وحياتكو إستنيت أول ما رمضان بدا وبقى لي إسبوعين عمال أجرب في البتاعة دي واكلها للعيال كل مره ... في الأول فشلت فشل زريع وما بقتش أدوقها أنا وأكلها للعيال ولمراتي بس وأستنى الأعراض لما تظهر عليهم – آه والله – وهما بيتآلموا وبياكلوا تحت تهديد السلاح ومش قادرين يقولوا رأيهم لكن أنا شايف تعبيرات وشهم ..

لكن ربنا عوض صبري خير لإني غلبان ومجتهد وبعد محاولات مستميته لمدة إسبوعين توصلت للتوليفة السحرية وعملت إمبارح أحلى صينيه عثمانلي خرسيس أدب يوك

مش هاطول عليكو .. وإليكم المقادير وسر الصنعة ولا الحوجه لتسيباس والـ 48 ج

1- نصف كيلو كنافة من بتاعت رمضان .

2- نصف كيلو قشدة بلدي ( في ناس بتستخسر انا عارفهم وبيعملوا كريمة في البيت مكونة من دقيق ونشا وسكر وإقلب يا جدع ما حدش شايف حاجه )

3- ربع كيلو زبدة طبيعي ( إوعى إيدك وأي مكونات تانية )

4- مكسرات وحركات

5- شرائح خوخ سواء طازة أو اللي في علب الكمبوت اللي كنا بنهربها من بورسعيد زمان

سر صنعة الكنافة وده المهم :

1- لازم نقلب الكنافة كلها في 4 ملاعق زبدة سايحة ونفركهم جيداً بالكنافة عشان تتشبع بالزبدة لإن الزبدة اللي في قاع الصينية لا تصل إلى فوق .

2- الفرن لازم يكون ساخن .. لو مش ساخن يبقى الكنافة بتنشف مننا .

3- درجة حرارة الفرن تكون 300 درجة ونسوي الكنافة لمدة ثلث ساعة وبعدين نولع الفرن من الشُعلة اللي فوق عشان تحمير الوش .

4- عزيزتي ربة البيت .. يُستحسن عمل الشربات أو الشيرة أو القطر اللي بيسقوا به الحلويات على حسب ما بيسموه مره واحده في أول رمضان وبعدين تحفظية في الثلاجة .. بكده قوامه بيبقى سميك وبيقترب من الشربات اللي بيستخدموا الحلوانية وهو سكر الجلوكوز .. لإن الشراب الخفيف بيعجن الحلويات وبعدين بيرسى في قاع الصينية .

- نجيب بقى نصف كمية الكنافة ونفرشها في قاع صينية مدورة مدهونة 4 أو 5 ملاعق زبدة .... وبعدين نجيب القشدة ونفردها على طبقة الكنافة ... ونضع شرائح الخوج وبعض المكسرات حسب الرغبة .. ثم نضع فوقيها النصف الأخر من الكنافة ونكبس بإيدنا جامد عشان الخليط يبقى متماسك ...

- ونترك العملية لمدة تلت ساعه في الفرن وبعدين نولع الشعلة الفوقانية بتاعت البوتاجاز لمدة 3 دقائق فقط حتى يحمر الوش ..

ثم نخرجها من الفرن ونرش عليها بعد القرفة المطحونة مع مبشور جوز الهند ونسقيها شربات ونقطعها قطع متسوية طولها 5 سنتيمترات ( سنتي زيادة ولا ناقص الموضوع كله هايبوظ ) ... وإدعي للحج سين سين واللي بنى مصر كان في الأصل حلواني .

[محمد عبدالعزيز]

ياريت الوصفة بتاعتك دى تجيب فايدة يا س س أحسن أنا من أول رمضان مش عارف آكل حتة كنافة عليها القيمة.

بس أموت وأعرف إزاى قدرت تعمل reverse engineering للطريقة بتاعة الكنافة :rolleyes: , ولا أنت سألت وحد دلك عليها :happy: ؟

[badroora]

معلش يا عم الشيفات ممكن بس كام تفسير كدا على ماقسم

طول عمرى احب الكنافة بس عمرى ماعرف اعملها ولما لاقيت طريقتك اينعم شوفتها فى اخر رمضان بس ملحوقة

نصف كيلو قشدة بلدي ( في ناس بتستخسر انا عارفهم وبيعملوا كريمة في البيت مكونة من دقيق ونشا وسكر وإقلب يا جدع ما حدش شايف حاجه )

مش دى اللى بيضحكوا علينا بيها ويقولوا كستر يعنى كونافة محشية بالقسطر وانا كنت باقول عليها دى شبه البالوظة الناس كانت بتضححك على والحمدلله جه اليوم وظهر الحق

ربع كيلو زبدة طبيعي ( إوعى إيدك وأي مكونات تانية )

مينفعش زيت او سمن نباتى ولا لازم زيدة هو اساسا ايه الفرق بين السمن والزيدة هو مش مكله مدهنن :rolleyes:

شرائح خوخ سواء طازة أو اللي في علب الكمبوت اللي كنا بنهربها من بورسعيد زمان

الا يطلع ايه الخوخ دا او الكبوت دا

شكرا و يعطيك العافية

تم تعديل 9 أكتوبر 2007 بواسطة Badria Mekkawy

[بنت الشاطئ1]

شكرا استاذ سى السيد على هذه الوصفة

بس حضرتك ذكرت من ضمن المكونات ربع كيلو زبدة ..طيب استخدمت الربع ده فى ايه اذا كان الكنافة قلبتها فى اربع ملاعق فقط

ايه احسن المكسرات للكنافة

شكرا