هل البنت الغير محجبة معناه انها غير محترمة؟؟؟

[miramar]

بسم الله الرحمن الرحيم

لايخفى على احد ان الحجاب فريضة مؤكدة

امر بها الله و الدلائل على ذلك وردت في سورة النور

و كذلك امر بها الرسول-صلى الله عليه وسلم- اهل بيته

ولكن هل البنت الغير محجبة معناها انها غير محترمة

على الرغم من كوني محجبة الا ان لي كثير من الصديقات غير المحجبات

و كثير من الناس يصدمونني عند رؤيتهم انسانة غير محجبة فيبدؤوا في تحليل شخصيتها وحياتها و يقولوا

دي اكيد مش محترمة

دي أكيد وأكيد ودي أكيد

كثير من الشباب رايهم كدة و اكثر

و الي زاد وغطى ان في وجهة نظر تانية ان البنت المحجبة اكيد وحشة

عشان كدة بتداري وحاشتها بحجابها؟؟؟؟

أرجو المناقشة

مرمر

تم تعديل 2 أكتوبر 2007 بواسطة miramar

[MZohairy]

ممكن نقول ان الغير محجبه هي قليلة التدين وليست قليلة الإحترام

التدين بيحث على الأدب والأخلاق

بس مش معنى كده ان كل الغير متدينين معندهمش اخلاق

[desert_eagle70]

انا من رأى أن هى حالة مرتبطة بالجو العام .. يعنى والدتى كانت بتقولى فى الستينات ان اللى كانت محجبة كانت بتعتبر شكلها غريب والأغرب ان هى فرضت على أخواتى الحجاب من سن صغير فى الثمانينات .. بس مش شرط أن كل واحدة مش محجبة مش محترمة بس ممكن تكون مش فاهمة او لسه فى حالة الشباب .

[Ahmad Farahat]

ممكن نقول ان الغير محجبه هي قليلة التدين وليست قليلة الإحترام

التدين بيحث على الأدب والأخلاق

بس مش معنى كده ان كل الغير متدينين معندهمش اخلاق

أعتقد أن هذا الرد هو أقرب الردود إلى الصواب

فكما يوجد التدين المصطنع الذي لا يمنع صاحبه الكذب والنفاق

كما يوجد غير المتدين الذي قد يكون على خلق رفيع

لكن هذا لا يمنع في كليهما السوء

فالتدين الصادق غير المصنوع

في الشكل والمضمون

في الظاهر والباطن

هو الأقرب إلى رحمة الله

ولا نعفي قليلي التدين على أخلاقهم الحسنة

ولا نعذر المتدينين على اخلاقهم السيئة

هذا هو رأيي

والله تعالى أعلى وأعلم

[رمضان]

احنا ليه بنحاول نسمي الاشياء بمسميات غير مسمياتها الاصلية ليه ما بنكون واقعيين واحنا بناقش مشكلة

ما معنى الاحترام من وجهة نظر الاخوة الافاضل ؟

ارد عليكي يا مرمر واقولك طبعا غير محترمة واهلها كمان ناس غير محترمين لانهم سمحوا ليها انها تخرج من البيت متبرجة والعياذ بالله .

هدانا الله واياكم الى ما فيه الخير وفيه رضاه عنا

[Salwa]

هو فيه ايه ياميرامار ؟؟

انتى بتتكلمى جد ؟؟

ايه علاقة الاحترام بالحجاب ؟؟

طبعا ده ملهوش دعوة بده .....اللى بترتدى الحجاب عن اقتناع وملتزمة فعلا هى بس اللى تستحق قولة دى انسانة محجبة ...

هل لانه فرض ...وترتديه بعضهن على اساس ان يكون اسلامها كامل ( ولا تتصرف تصرف المسلمة الحقيقية )

نقول عليها انسانة محترمة ؟؟.......ثم!!!

يعنى ايه ان طالما واحدة مش محجبة تبقى مش محترمة ؟؟

طيب ايه رايك بقى ان نصف المحجبات ......................محجبات بالاسم (( يعنى مجرد غطاء على الرأس واكمام طويلة وجلباب يزحف وراءها ...او بنطلون ...وممكن تكون حتى مش بتصلى !!!...وممكن تكون شغالة فى بنك وبتاخد رشاوى !!!وممكن تكون مع زميلاتها بتغتاب زملاء آخرين !!!))

الحجاب الحقيقى ...( اخلاق ) ...تحجب نفسها وعقلها عن اى تصرف سئ ..

وفى الحقيقة انا احترم اكثر البنت الملتزمة التى تعترف انها ( غير مقتنعة بغطاء الرأس فى الوقت الحالى ) ..

وتتصرف بمنتهى العقل والاحترام ...

لانى فى هذه الحالة اكون واثقة انها سوف تتحجب عن اقتناع ..

لفت نظرى شئ طريف جدا وانا فى مصر ........وتعجبت .....وحدث لى موقف طريف جدا جدا ...

.وضحكت اختى جدا جدا على ذهولى ..

اصطحبت اختى فى زيارة للطبيبة ...

فوجئت عندما رايت الممرضة ..(( او السكرتيرة التى التى تقبض ثمن الفيزيتا ))..

والله العظيم فوجئت ...ولم استطع مداراة ...( المفاجأة ) ..

فتاة محجبة ....(( اعتقد انها جميلة ))....تضع مساحيق تجميل صارخة ...صارخة بمعنى صارخة ...بمعنى انى اصبت بصدمة وكأن امامى بلياتشو ...(( والله العظيم كانت كما البلياتشو )) ..

يعنى تضع كريم اساس غاميق او فاتح ( الله اعلم )) ..بس واخدة طبقة معجون غريبة الشكل !!!

رسم العين بتحديد كبير بالآى لاينر ....(( وكأنها خرجت لتوها من احدى الصور الفرعونية القديمة المعلقة على جدران المعابد )) ..وكأن المرضى (( سياح )) حايتفرجوا بقى على كليوباترا والا حتشبسوت ...

اما الروج فهو قاتم ..(( كأن عندها تصوير تلفزيونى وتخشى ان تخفى الاضواء بعضا من بهجة جمالها ))..

وتضع (( حسنة .....والافضل نقول سيئة ...على جانب الخد ))...

والمهم ........

بما انى معروفة خصوصا (( وسط اهلى )) ....انى لا اصمت امام ..مالايرضينى ..وعندى طولة بال ..

اقتربت منها وقلت لها ...

انتى بتدرسى ؟؟...قالت لى ..ايوة انا طالبة فى كلية العلوم سنة ثالثة ...بس بشتغل بعد الظهر عند الدكتورة ....

قلت لها ...اسمك ايه ؟؟....قالت لى ..اسمى ساجى ....قلت لها ...الله ..اسمك جميل قوى قوى ..انا اول مرة اسمع الاسم ده ..على فكرة ؟؟ اعتقد ان عقلك جميل بدليل انك طالبة فى ثالثة علوم ...ممكن اسألك سؤال ياساجى ؟؟...انتى مخطوبة ؟؟ قالت لى ...لا...قلت لها طيب ممكن اسألك سؤال كمان ؟؟

قالت لى ..اتفضلى ...قلت لها ...هى ماما بتشوفك الصبح وانتى نازلة رايحة الكلية او وانتى جاية هنا تشتغلى ؟؟

قالت لى ...ساعات وساعات ...ليه ياطنط ؟؟ قلت لها اصلك ياساجى باللى انتى عاملاه فى وشك ده يابنتى حاتخوفى اى عريس يفكر يتقدم لك ؟؟....منظرك ياساجى مش بيدل على جوهرك ؟؟ انا بكلمك وبتدخل فى اللى مليش فيه لان اختى الحاجة قالت لى انك بنت لطيفة جدا وهادية جدا ومؤدبة جدا ....طيب ليه عاملة فى نفسك كدة ؟؟...وهل اللى انتى لابساه ده ...حجاب ؟؟ ....يابنتى ده نصف شعرك باين ؟؟ وودانك باينة ؟؟

قالت لى ياطنط دى موضة فى الجامعة والله ...انا مأخدتش بالى ان المكياج ( تقيل كدة ؟) ..

والمهم...

ضحكت معها ...ووعدتنى انها ستغير من طريقة مكياجها وتغير طريقة الحجاب ...

واكدت لى اختى ...بعد شهور ..ونحن نتذكر ماحدث (( وتصفنى بسلوى المتسرعة الحشرية ))...ان ساجى اصبحت الآن تضع مكياج خفيف و...( لغت ) اللآى لاينر !!!...لكنها مازالت تظهر شعرها قليلا ...

فهمتى بقى ياميرامار ؟؟

على فكرة ...

انا محجبة ...

[amrhoras]

مع احترامى للجميع بس انا رايي من رأى ا/رمضان

ولكن ليس كل من خلعت الحجاب غير محترمة او من لبسته تكون قمة الاحترام

بس البنت كونها تنزل من بيتها وشعرها باين ويله بالمره جسدها كمان يبقى العيب على الكابتن ابوها او اخوها او جوزها

لانهم معندهمش دم معرفوش يربوها كويس هم نفسهم معندهمش كرامة او نخوه

واعتقد مفيش مبرر يقول ان الحجاب ده مجر تستر لافعال اخر (انما الافعال بالنيات ) احنا ملناش الا الظاهر وربنا اعلم مننا بما فى الانفس سواء محجبة او لا ربنا مطلع على افعالها

اللهم انك الستار الرحيم الطف بنا

شكرا

لاتعليق

تم تعديل 2 أكتوبر 2007 بواسطة amrhoras

[النسر المصري]

انا بقى هارد على السؤال بسؤال تاني....

ماهو تعريف الاحترام ؟!

ولما تجاوبي عالسؤال ده....هتعرفي الحل

[knajah]

السلام عليكم ورحمة الله وبركاته

الحجاب أمر إلاهى وحسن الأخلاق أيضاً أمر إلاهى ولا يجوز التفريض فى أحد الأمرين .

لكن سؤال بسأله لنفسى كشاب رفضت أن أتزوج من فتاة غير محجبة :

هل الفتاة التى تخرج من بيتها ولابسة بنطلون رش على الجلد وأعضاء جسمها كلها متقسمة بما فى ذلك الأعضاء الحساسة هل هذه محترمة ؟؟؟؟؟؟؟؟؟؟

هل الفتاة التى تذهب إلى الجامعة وكأنها رايحة كباريه هل هذه محترمة ؟؟؟؟؟؟؟؟؟؟؟؟

هل الفتاة التى ترتدى البدى وتظهر جزء من ثدييها هل هذه محترمة ؟؟؟؟؟؟؟؟؟؟؟؟؟؟؟

هل الفتاة التى ترتدى جيبة مقسمة وسطها وماشية تتمخطر هل هذه محترمة ؟؟؟؟؟؟؟؟؟؟؟؟

وأيضاً هل الإنسان الذى يقبل الرشوة محترم ؟؟؟؟؟؟

هل الإنسان الذى يقبل الحرام أيا كان نوعه محترم ؟؟؟؟؟؟؟

بالتأكيد إن الإسلام الذى حرم الرشوة هو هو الإسلام الذى حرم التبرج وكيلهما شر ولكن شر التبرج أخطر من شر الرشوة . لأن البنت المتبرجة تفتن كل من يراها وتوثر على أخلاق المجتمع أما المرتشى فهو بطبيعة الحال يأخذها فى السر وتظل محرمة فى أذهان الناس .

وفى النهاية نرجو الخير والصلاح لكل الناس

[nash]

الحجاب ليس فقط تغطيه الشعر أو الجسم ..الحجاب معناه أشمل وأعمق من ذلك بكثير...هو أحتجاب عن المعاصي ..وكل ما يغضب رب العالمين...

النميمه ...الغيبه... السب ..الحسد... كل الصفات السيئه يجب أن يحتجب عنها الرجل أو المرأة...

أكرة ماعلي أن يذكر أسم الأب أو الزوج أو الأخ في أي موضوع يناقش فيه شيء يخص المرأة...لإن ببساطه هلي المذكورين ..قاموا بالواجب اللي عليهم؟؟ هل حجبوا

نفسهم عن المعاصي؟؟ أن يخرج الشاب ليغازل هذه ويقابل تلك ويتبسط مع أخري ثم يأتي ليقول مواعظ وحكم هي قمة السخف...طبعا كلامي هذا عام...لا أقصد به أحد

معين...أوأن تأتي فتاة لتقول قال الله وقال الرسول..وهي أبعد الناس عن الخلق الإسلامي الصحيح...

أنا لا أقدر أن أقول رأيي في الحجاب..لإنه أمر إلهي..لكن أتكلم عن جزئيه أتخاذ الحجاب مقياس للإحترام من عدمه...فمن نحن لنحكم علي الأخرين؟؟

من نكون في ملكوت رب العالمين لنعطي أنفسنا هذا الحق؟؟

ثم يا ميرامار...إذا كنتي مقتنعه سلفا برأيك فلماذا تسألينا عن أراءنا...أفهم ان أتناقش في شيء لست مقتنعه به..أو شيء غامض علي..لكن ان أقتنع سلفا بفكرة ثم آتي

لأفرضها علي الأخرين ...تكون غير مفهومه قليلا....

......................................................................................

يا عمرو حورس....

بلاش نسب الأب أو الأخ أو الزوج ونقول معندهمش دم...أو أنهم معرفوش يربوا كويس...خلوا النقاش منطقي يا ساده...

وبعدين رأيك متناقض أو هو قمه في التناقض صدقني...أرجع أقرا أنت كاتب أيه...

.......................................................................................

ياريت الحقيقه نتناقش بعيدا عن سب الأهل وإدخالهم في الموضوع....

ويراجع كل واحد فينا تصرفاته وسلوكه قبل أن يأتي وينظَر علي الأخرين..ويجعل نفسه رقيب عليهم

تم تعديل 2 أكتوبر 2007 بواسطة nash

[رمضان]

أكرة ماعلي أن يذكر أسم الأب أو الزوج أو الأخ في أي موضوع يناقش فيه شيء يخص المرأة...لإن ببساطه هلي المذكورين ..قاموا بالواجب اللي عليهم؟؟

الاخت الفاضلة ناش انا لا اتفق معك في هذه النقطة فالمسؤولية الاكبر تقع على هؤلاء في المقام الاول لان هم المعني الاول بالتربية

أن يخرج الشاب ليغازل هذه ويقابل تلك ويتبسط مع أخري ثم يأتي ليقول مواعظ وحكم هي قمة السخف...طبعا كلامي هذا عام...لا أقصد به أحد

طبعا لا تقصدين به احد فالحمد لله جميع الاخوة افاضل ولا شك في ذلك ولكن ما موقع هذه الجملة من الاعراب في هذا الحديث

[nash]

الاخ الفاضل رمضان...

﴿ وَكُلَّ إِنسَانٍ أَلْزَمْنَاهُ طَآئِرَهُ فِي عُنُقِهِ وَنُخْرِجُ لَهُ يَوْمَ الْقِيَامَةِ كِتَابًا يَلْقَاهُ مَنشُورًا ﴾

هذه قناعتي..كما أن لك قناعه لي أنا الأخري قناعه...هناك من يتقبل الأوامر من الزوج أو الأخ...لاحظ إنني لم أذكر الاب...فالأب له قدسيه عندي...لا أود الأقتراب منها...وأخريات لا لها مطلق الحريه برفض أو قبول أوامر الأخ أو الزوج...هي علي حسب ثقافه كل إنسان وما نشأ عليه...جزأيه الخضوع لإمر ما...من المذكورين في مداخلتي...هي ثقافه ونشأة من الأول ...

...........................................................................................

ما الذي فهمته أنت من أقتباسك الثاني لجملتي؟؟؟

وجهه نظري واضحه...ان يأتي شاب ما أو رجل ليعطي نفسه الحق بالكلام علي فتاة غير محجبه...فليراجع سلوكه أولا....

قبل أن يأتي ليدلي بدلوة في الموضوع...أو يظهر نفسه بمظهر المثقف المتدين ..وهو أبعد مايكون عن ذلك...

ثم يأتي أيضا ليسب الأهل والزوج والأخ والاب...ماهذا؟ألا نستطيع ان نعرض وجهه نظرنا بدون التعرض للأخرين وسبهم؟؟

تم تعديل 2 أكتوبر 2007 بواسطة nash

[badroora]

العزيزة ماريمار اعتقد انتى تقدرى تدلى برايك من خلال واقعك كمحجبة وواقع صديقاتك كغير محجبات

على الرغم من كوني محجبة الا ان لي كثير من الصديقات غير المحجبات

انتى تعاملتى مع صديقاتك هل وجدتهن غير محترمات اينعم صديقاتك لن يمثلوا كل المجتمع بل هم يعتبروا نموذج ولو انتى تعرفين

اصدقائك جيدا اكيد انتى محترمة واخترى اصحابك مثلك يبقي هنا اصحابك غير محجبين ومحترمين يبقي مش المفروض نأخذ بالظاهر

ولكن هل البنت الغير محجبة معناها انها غير محترمة

من خلال صداقتك للغير محجبات هتقدرى تحدد انا بالنسبة لى مش قاعدة والامثال السيئة كتيرة جدا للمنقبات والمجحبات المشينه التى لا

تعتبر قدوة ولا مثل مثالى للمسلمة المحجبة

الاحترام يا ماريمار مالوش علاقة لا بديانه ولا بجنسية ولا بحجاب ولا بلبس ممكن طريقة اللبس توحى بالشبهات اوك بس لا تجزم بكون

الشخص محترم ام لا

.

و كثير من الناس يصدمونني عند رؤيتهم انسانة غير محجبة فيبدؤوا في تحليل شخصيتها وحياتها و يقولوا

دي اكيد مش محترمة

اين رايك انتى من خلال تعاملك مع صديقاتك ؟

و الي زاد وغطى ان في وجهة نظر تانية ان البنت المحجبة اكيد وحشة

عشان كدة بتداري وحاشتها بحجابها؟

؟؟؟

انتى بردوا تقدرى تجاوبي على هذه النقطة

على الرغم انك استشهدتى باية قرانية تحث على الحجاب وفرضة فلماذا تصغي الى اراء الاخرين وتجعليها مجال شك وانتى تعلمين الصح

من خلال القران الكريم

وهل انتى محجبة للحجاب نفسة ام لتخفي عيوبك ؟

جاوبي على السؤال دا لنفسك بينك وبينها ولو كانت الاجابة انك لبساه عن اقتناع وكفرض يبقي تجاهلى الاراء السطحية عن الحجاب

كغطاء للعيوب

ولا علاقة بالحجاب بالاحترام والتدين

ومعلومة بقي عندى اصحابي غير مسلمات ومتحجبين

يقولون تحشم

تم تعديل 2 أكتوبر 2007 بواسطة Badria Mekkawy

[amrhoras]

مدام ناش اعتذر عن اسلوبي فى الكلام

بس مش متناقض ولا حاجة

قوليلي انتى اسلامنا امرنا ايه؟

جسم المرأة عوره ولا لآ؟؟؟؟ اه اللى ميربيش بنته او ابنه على تعاليم اسلامنا يكون فشل بغض النظر عن محترمين او لا

ازاى قوليلي بالله عليكي تكون البنت محترمة فى حين انها مش محترمة جسدها ( شعرها عوره - جسدها عوره)

انا مش متناقض بالعكس انتى مفهمتنيش عاوز اقول ايه

انا مبتكلمش يساده على الاخلاق ياما فى بنات محجبات وربنا يكفينا الشر وياما فى بنات مش محجبات وماشا الله مؤدبات

دى معناها ايه ان ربنا اعلم بما تخفى الانفس ودى ملناش دخل فيها

انا بتكلم عن قضية ازاى البنت تفرض فى جمالها كدى وتخالف ربنا ورسوله لمجرد الحرية

اسلامنا عف جسد المرأة واعتقد انه اللى يخالف الدين بتاعنا معتدقتش انه محترم سواء اللى رضيوا فى البيت واللى ربوا على كدى انك حره والحكاية مش حكاية ولد او بنت يا مدام ناش

اعتقد القضية منتهيه جدا واحده مخالفه اصول دينها وماشية تتمنظر بتسريحة شعرها اه هى محترمة اه بس انتى ايه رأيك لما كل واحد ييبصلها كدى سورى يعنى بشهوه خصوصا انه مفيش واحده ماشية بشعرها حتلبش فضفاض او لبس ميجسدهاش ؟ ارجو الرد؟

ما الذي فهمته أنت من أقتباسك الثاني لجملتي؟؟؟

وجهه نظري واضحه...ان يأتي شاب ما أو رجل ليعطي نفسه الحق بالكلام علي فتاة غير محجبه...فليراجع سلوكه أولا....

قبل أن يأتي ليدلي بدلوة في الموضوع...أو يظهر نفسه بمظهر المثقف المتدين ..وهو أبعد مايكون عن ذلك...

ثم يأتي أيضا ليسب الأهل والزوج والأخ والاب...ماهذا؟ألا نستطيع ان نعرض وجهه نظرنا بدون التعرض للأخرين وسبهم؟؟

أعتقد انه مفيش داعى للكلام ده احنا هنا نحترم اراء بعضض وليش مجالا للسخريه من بعض محدش بيظهر نفسه متدين ياستي ولا مثقف بدليل انى بتكلم بالعامية

كل اللى اقدر اجاوبك عليه بما انى انا اللى جيبت سيرة الاب و الاخ والزوج انى الحمد لله راجل شرقى بغض النظر عن اخلاقى او تديني وطبعى قديم كمان يعنى عاوز الحجاب يرجع زى الاول وارضى غرورى الرجولى كمان اخرج واعمل اللى انا عوزه فى بنات الناس فىحين اختى وزوجتى وبنتى قمة فى الاخلاق والتدين المسئلة انتو بعدوا عنها خالص ورحتوا فى حاجات ملهاش اى لزمه مفيش ابو او ام يفرحوا لما يكون ابنهم مقطع السمكة الا ضعاف النفس و شكرا لكى اختى الفاضلة

تم تعديل 2 أكتوبر 2007 بواسطة amrhoras

[رمضان]

الاخت ناش بالنسبة للنقطة الاولى عادي ده من حقك ومش هنختلف

بس النقطة الثانية مش واضحة خالص بالنسبة لي انا الحمد لله واثق انها لا تخصني لا من قريب ولا من بعيد بس دراء للفتنة وسوء الفهم ارجو توضحيها للجميع

الاختلاف في الرأي لا يفسد للود قضية

تقبلي تحياتي وشكرا

[miramar]

بسم الله الرحمن الرحيم

لم اكتب هذا الموضوع إلا رغبة في معرفة آرائكم و عقلياتكم و الاطمئنان ان لسة فيه ناس بيفكروا كويس

لمست في بعض الردود هجوم عليا رغم اني ارفض هذا الراي تماما ولم احكم يوما على انسان من حيث مظهره

و لن انقص احترام اي احد حتى وان لم يكن يستحق الاحترام لأن احترامي للأخرين ينبع من احترامي لنفسي

ولا أدري لماذا ولكن جزء مني يشعر بالندم على نشر الموضوع

و فكرة نشره لم تأتي على بالي الا بعد ان جائتني رسالة يوم امس محتواها هو ان كنت تريدين عمل خير في رمضان

حاولي جعل المجتمع يستعيد الاحترام و تحته صورة لفتاة غير محجبة تتعذب في النار و محجبة سعيدة هانئة

و المشكلة ان الرسالة جائئتني من شخص اعتقدت انه ذو عقلية متفتحة

و اكثر الردود التي اعجبتني رد النسر المصري ما هو الاحترام؟؟؟

ارجو ان يتقدم احدهم و يجيب عن هذا السؤال

انا احترم صديقاتي الغير محجبات و اعتقد انهن قدوة في أخلاقهن

الحجاب ليس قماشة توضع على الراس الحجاب أخلاق و آداب

مرمر

تم تعديل 2 أكتوبر 2007 بواسطة miramar

[nash]

يارمضان...كل سنه وأنت طيب

يا أخي الكريم أنا قلت من نحن ومن نكون حتي نقذف الأخرين ونسبهم أو نحكم علي نيات البشر....

الحجاب فرض إلهي...لا ينكرة إلا مكابر...

أنا ناقشت جزأيه الإحترام من عدمه....حسنا أنتم أخدتم بالمظاهر...يعني البنت الغير محجبه هي كذا وكذا وكذا..وأهلها كذا وكذا وكذا...

هل حاسبتم أنفسكم قبل ان تلقوا التهم جزافا؟؟ هلأديتم فروضكم كامله..وأمتنعتم عن مايغضب رب العالمين...الكلام لكل من دخل وسب اسرة الفتاة علي فكرة....أنتم تعرفونني...لا أستطيع أن أجامل في بعض الأحيان....

وبعدين أنا لي مداخلات استنكر فيها مظهر الفتيات الأن...وما وصل له الحال في المحروسه ...يعني لا أوافق علي المظهر الخليع سواء للفتاة أو الفتي....

لكن لا أوافق علي السب أو الشتم أو إلقاء تهم معلبة سلفا...لإن من تسبونها أو تسبون أهلها قد تكون ببساطه أفضل منكم ألف مرة عند رب العالمين....

.............................................................................

الواجب علينا أن نكون مثال لكل ما ننادي به لا أن نكون متناقضين مع أنفسنا...

هذا الكلام لك ولي ولكل الإخوة والأخوات الكرام....

[muslim4ever]

كلام الاخوة الافاضل لا تعليق علية ولكن استوقفى كلام الاخت سلوى

اختى سلوى اولاً موضوع الاقتناع او عدم الاقتناع بالحجاب فهذا كلام يودى بصاحبة الى امور لا يحمد عقباها

الحجاب فرض من الله لا نقاش فية رضى من رضى وابا من ابا (وَمَا كَانَ لِمُؤْمِنٍ وَلا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ وَمَنْ يَعْصِ اللَّهَ وَرَسُولَهُ فَقَدْ ضَلَّ ضَلالا مُبِينًا ) الأحزاب

اذا القضية ليست اقتناع بل امر على من امنت بالله ربنا وليس على غير المسلمين

فقضية الاحترام اولاً هى احترام اوامر الله واوامر ورسوله

والنبى صلى الله علية وسلم اوضح فى حديثة من هن هولاء المتبرجات (صنفان من أهل النار لم أرهما، قوم معهم سياط كأذناب البقر يضربون بها الناس، ونساء كاسيات عاريات، مميلات مائلات رؤوسهن كأسنمة البخت المائلة، لا يدخلن الجنة ولا يجدن ريحها وإن ريحها لتوجد من مسيرة كذا وكذا . صحيح)

اذا اى احترام نبتغى من هؤلاء , وعلى الجانب الاخر من قال لك ان كل من تضع ايشرب ولا فوطة على راسها اصبح هذا حجاب !!!! الحجاب يااخت سلوى له شروط وضوابط وضعها الله تعالى فى كتابة واوضحها النبى صلى الله علية وسلم فى سنته واى شىء بخلاف هذة الضوابط فليس بحجاب.

[amrhoras]

برده انا مصر ان الاب الاخ الزوج والام هم الاساس

التربية على التدين هو مايزرع نبته مسلمة ملمة بأمور دينها وليس متدينه تجمع مابين الدين والموضه

ساعة الصلاه نتحجب والخروج لا بلاش حجاب اولد فاشون

نسيب حكاية النية والبنت محترمة جدا جدا جدا بس للاسف بتلبس بادى وبنطلون برموده وشعرها كانيش بابا انا خارجة اعمل شوبنك

اوك حبيبيتى متتأخريش وخلى بالك من نفسك

والبنت نزلت .

الله شوفت الصاروخ الجاى ده ياض . ايه الجمال ده ايه العشر الجميل ده ياوعدى على العود ولا الرجلين ( هل هذا يرضيكم)

لوسمحت احترم نفسك

ايه يا قمر انتى ليه جامده معانا كدى احنا حلوين اوى برده

والمظهر يفتح ابواب كتيير للشيطان وتنتهي بمأساة ونجرى على المحاكم ونقول نريد حلا فى قصة اغتصاب كذا

بالله عليكي اختى الفاضلة ناش غلطة مين من البداية؟ انا مش قذفت او سبيت الا الناس اللى تستاهل كدى فى امثلة كتير اوى وانتى نفسك قولتى انا رافضة مناظر الشباب الايام دى بالله عليكي هل خلفهم اب او ام ينصحوهم او حتى زوج؟

هو ده التناقض البنت مؤدبة وفى حالها بس مظهرها هو اللى فتح ابواب للشيطان

عرفتى كلنا ليه بندعو للحجاب لانه بيسد باب واسع من ابواب الشيطان حتى ان مكنتوش خايفين على بناتكم خافو على ولادكم

لما الولد لا حول له ولا قوه ميكنش قادر يفتح بيت

واكيد كل شاب عاوز يتجور

ولما يشوف المناظر دى فى الشارع عرى x عرى بغض النظر عن الكلمة بس انا بعتبرها كدى

بالله عليكم ده مش ممكن يخخلق وحش مريض؟ وحش مفترس؟

بالنسبة للبنت المحجبة

الحجاب عفه وجمال فى نفس الوقت يطفى على البنت جاذبية غير محدوده يكون الكل عاوز يرتبطك بالبنت الجميلة المهذبه دى ( وبرده كل شيء بيبان)

بمعنى انها لو كانت محجبه ومتدينه قلبا وقالبا حتبان

لو كان الحجاب ده مجرد قطعة قماش تغطي به الوجه السيء

ولكن من باب العادات الشرقية عشان متقولوش انى بحاول اظهر بمظهر المتدين او صاحب الاخلاق انا بتكلم عامة

ان العفة والحجاب افضل بغض النظر عن الانسانة المتغطية تحته لان ربنا اعلم بما تخفى الصدور والاسرة والمتمثلة فى الاب والام كتربية دينا وخلقا

الزوج واخلاقها هو اللى يعود زوجته على طباعه وليس العكس وهذه طبيعة ولا اقول الغاء لعقل المرأة بالعكس الاتنين ممكن يتطبعوا ببعض بس الغالب الزوجة هى اللى تتبع زوجها ودينا برده قال كدى

نقول ف الاخر ان الظاهر بيحكم وله الانطباع الاول واعتقد رأيي فى الفتاه المحجبة والغير محجبة وصلكم جمبعا دون اى تناقضات

الاخ طبعا له كامل الحرية لانه راجل وده برده تبعا لتدينه وثقافته واخلاقة وتربيته

هى كلمه واحده المفروض كل ولد يحطها امامه او لازم كل اب يزرعها فى ابنه منذ الصغر

الدنيا يوم لك ويوم عليك فكما تدين تدان وبالبلدى اللى حتعمله انهاردة فى بنات الناس حيعمل بكره فى اقرب الناس ليك ( اختك - مراتك - بنتك )

ورمضان كريم والف شكرا على الاسلوب الجميل اللى هوجمت بيه من الاخوه

ولا ادعى اننى شيخ او على خلق او متدين حتى وعمرى ماحبيت انى اتظاهر باى شيء شكرا لكم

تم تعديل 2 أكتوبر 2007 بواسطة amrhoras

[MZohairy]

إذا كان الحجاب لا يستطيع ان يمنح الإحترام لكل المحجبات

فهو لا يستطيع ايضا ان يمنع الإحترام عن بعض الغير محجبات