ما هو أجمل توقيع اوقفك من شدة اعجابك به !!!

[badroora]

اجمل توقيع بصراحة الموضوع دا لاح فى خاطرى منذ فترة ولا ادرى هل هذا موضوع مقرر ام جديد !!

ولكن الفكرة نبعت حين اوقفنى توقيع الاخ العزيز شينكاوى

جعلنى اقرأ توقيعه عدة مرات لاتامله لانه بالفعل جميل جدا

يلا بقي كل واحد فينا يقول ايه اكثر توقيع لعضو اعجبه

وانا هبدا بتوقيع شينكاوى كما قولت

أنا مصري

ولو كمموا صوتي يوم واتخرست

أو زادوا العقارب فيكي واتقرصت

بحبك يام البلاد والكون

لا عمري زعلت منك ولا حتي اتقمصت

....

وأنا مصري

حبيت الطمي في نيلك

ومهما الغربة خادتني

حلمي إني آجيلك

ولو ف يوم ماقدرتش

قلبي وعمري أهديلك

....

وانا مصري ويحلالي

أقولها ف النهار والليل

وحبك مش مقياس ولا كيل

ده زرع جذوره في قلبي

وشايلك جوه عيني شيل

.....

أنا مصري

ونفسي يا مصر

أكحل عيني بترابك

ولما آجي

ما يحوشني العس علي بابك

وأحكيلك

وأشكي الهم

وأقولك أنا درويش

مضموم لزمرة أحبابك

.............

وف نيلك أغسل رجس الترحال

وغربة عمر

وهجرة ما كانت ع البال

وأبوس إيدك

ولا اسيبك

فعلا توقيع رائع جدا واحييك :closedeyes: يا شينكاوى على اختيار التوقيع دا بجد رائع كتير ادخل ادور على اى موضوع لك عشان اقرا توقيعك مرارا وتكرار

يلا بقي مين تانى توقيعه اوقفك من شدة اعجابك به

تم تعديل 3 أكتوبر 2007 بواسطة Badria Mekkawy

[Folana]

السلام عليكم ورحمة الله...

أمنت بك يارب.....تصورى انى من قبل رمضان وانا بافكر فى نفس الموضوع...بس من جانب أخر..وهو أطرف توقيع للاعضاء....

لكن موضوعك أجمل وأشمل وأعم و..و..و..

وطبعا أنا مش باحب أحرم نفسى من حاجة خاااالص...ولذا حأكتب توقيع لاحد الاعضاء للاسف مش قادرة اتذكر اسمه...بس اول ما افتكر حاكتبه على طول..

كان كاتب فى توقيعه :

" فاقد الشىء ....يدور عليه"

والله عنده حق...

كمان توقيع ناش ..

صن ضحكة الأطفال يارب

فإن هي غردت في ظمأ الرمال أعشوشبت

لكن إن زودوها وبكيوا ..ونكدوا ..هايتلطشوا

لكن التوقيع اللى بأتوقف أمامه وأتأمله ...هو توقيع disappointed

إن أخشى ما أخشاه هو :

أن تصبح الخيانة يوما ما.....مجرّد.....وجهة نظر

أعتقد أن معظم المبادىء والقيم دلوقت أصبحت وجهة نظر...

الوردة دى لك يا بدرية :closedeyes:

[nash]

الحقيقه فيه شويه تواقيع بجد بتعجبني.وبأرجع أعيد قراءتها كذا مرة منهم

..توقيع الكريم أسد...

أتعرف مامعنى الكلمة

مفتاح الجنة في كلمة

دخول النار على كلمه

وقضاء الله هو كلمه

الكلمة لو تعرف حرمه زاد مزخور

الكلمة نور ..

وبعض الكلمات قبور

وبعض الكلمات قلاع شامخه يعتصم بها النبل البشري

الكلمة فرقان بين نبى وبغي

بالكلمة تنكشف الغمة

الكلمة نور

ودليل تتبعه الأمة .

عيسى ماكان سوى كلمة

أضاء الدنيا بالكلمات وعلمها للصيادين

فساروا يهدون العالم ..

الكلمة زلزلت الظالم

الكلمة حصن الحرية

إن الكلمة مسؤولية

إن الرجل هو كلمة

شرف الله هو الكلمة

................................................................

كمان توقيع الكريم الطيار المصري...

السيد نام.....

السيد نام.....

السيد نام كنوم السيف العائد من أحدي الغزوات

السيد يرقد مثل الطفل الغافي في حضن الغابات

السيد نام

وكيف أصدق ان الهرم الرابع مات...

................................................................................

كمان توقيعك يا فولانه ..والله مش مجامله....حقيقي تفاجئت أنه من تأليفك...كذا مرة يستوقفني...

أنا لا أريد تكرار وصورا..أريد الجديـد

أنا لا أريد بعض شىء..أريد المزيـد

أريد مقعدا خاليا فى عربــة

ولاأريد الزحام

أن تشرق الشمس فى نفســى

وينقشع الغمام

أريد جنى ملاك ولا أريـــد أحدهــما

أريد وردا وخبزاولا فاصل بينهــــــــما

أريد نور ونار..أريد الليـــــــــــل والنهــــــــار

أن تبصر عينى النجوم ويعبر قلبى البحــار

أن تملأ الريح ضلوعى أن تعصف بى الأمطــار

أن أبنى فى القمم قلاعى وأحطم كل الأسوار

أنا أريد.. ولا أريد.....................

................................................................................توقيع الكريم قديم....فلسفي جميل

تستغرق مناقشة المسائل التافهة ةقتا طويلا لإن بعضنا يعرف عنها أكثر مما يعرف عن المسائل الهامة

..............................................................................

فيه توقيع بينرفزني...والله نفسي أعرف ليه...وهو توقيع داروين ( محدش يقوله ) :closedeyes:

دنيا وفيها من كل شي..وكل من جاها مشي

تم تعديل 4 أكتوبر 2007 بواسطة nash

[badroora]

الاخت العزيزة الغالية مدام فولانه ميرسي عالوردة

ممكن الموضوع يمشي بوجهتين نظر اجمل توقيع واظرف توقيع كله واحد

وانا قولت انام شوية واصحى اتكلم عن توقيع ناش والطيار المصري وس س

لاقيتكم بس الله ماشاء الله سبقنى :closedeyes:

توقيع ناش دا بقي ظريف جدا وجميل ودمه خفيف اوى

فكرنى بفيلم اللييمبي لما قال لمامته وهى معلقة الولد ليه بس كدا يا ماما دا طفل حد يعمل فى الاطفال كدا وبعدين شال الواد باسه وراح راميه فى الارض

توقيع الطيار بردوا دمة خفيف وكويس كان نفسي اسئلة مين السيد ؟

توقيع س س

ومـا مــِن كاتبٍ إلا سيبلى ....... ويُبقي الدهر مــا كتبت يـداهُ

فلا تكتُب بخطِك غير شيءٍ ....... يسُــرك في القيامةٍ أن تـراهُ

جميل اوى ويا ريت فعلا الانسان يستطيع ان ينقي ويختار كتاباته !!

ناش بخصوص توقيع استاذ داروين

اذا بصيتى عالصورة هتفهمي

واحد لابس لبس معندوش هدوم تقريبا كان مليونير وفلس وبيقول الدنيا فيها كل شيء يعنى يقصد بيها المال اللى

كان عندة

وكل من جاها مشي يعنى المال اللى كان عنده زال wst::

:lol: wst:: او يقصد ان الحياه فانية والاخرة خيرا وابقي واننا كلنا ضيوف عالدنيا بس مش حابب يخلينا نتشائم

تم تعديل 4 أكتوبر 2007 بواسطة Badria Mekkawy

[nash]

بدريه.... بدريه......يااااااااااااابدريه...

راجعالك بعدين...أصلي مش قادرة أمسك نفسي من الضحك.....

ده أنتي شربات وربي

قال الليمبي قال :closedeyes:

[Ahmad Farahat]

بصراحة أنا عاجبني توقيع سي السيد قوي

ومـا مــِن كاتبٍ إلا سيبلى ....... ويُبقي الدهر مــا كتبت يـداهُ

فلا تكتُب بخطِك غير شيءٍ ....... يسُــرك في القيامةٍ أن تـراهُ

برضه توقيع بدرية مكاوي السابق كان مجموعة أبيات من قصيدة لأحمد فؤاد نجم اسمها يا عرب بتقول

اللي خانوا العهد بينا ......واسباحوا كل حاجة

واستهانوا بالعروبة .......واستكانوا للخواجة

مستحيل هيكونوا منا.....

إحنا حاجة وهما حاجة.......

يا سلام لما تسمعوا الكلمات دي بغناء الشيخ إمام عيسى

توقيع آخر عبقري لا يمكن تجاهله إطلاقا

نحن السراب الخادع في كل صحراء

والقاعدة الرخامية لكل قبر

نحن الصندوق الأسود في كل طائرة وكارثة

والمفقودون الذين لا يعثر لهم على أثر في كل حطام

ده توقيع كبير مشجعي الزمالك كوكواوا الجميل

طبعا أنا عارف إن توقيعي مش معجز ة بس هوا يمثل ذكرى معينة في نفسي

وفكرت أكتر من مرة أغيره

بس المشكلة إنها الحاجة الوحيدة الباقية من قصة جميلة في حياتي

عشتها لوحدي مع خيالي

أعتذر عن ضعف التوقيع

لكنه لمن لا يعلم

بيت شعر للبحتري

برضه يا بدرية السيد في توقيع الطيار هو جمال عبد الناصر ودي قصيدة لنزار قباني

برضه بيعجبني توقيع البنت المصرية

وتوقيع شينكاوي

أما توقيع الأستاذ عادل أبو زيد

فهو يمثل شعارا للمحاورات

تسلموا

تم تعديل 4 أكتوبر 2007 بواسطة Ahmad Farahat

[badroora]

توقيع ماريمار

كل مابص عليه بامسك قلبي بايدي خايفة عليها لتوقع وهى على قمة الجبل وعاوزة تصيد الكواكب زى ما بتقول

خالى بالك يا ماريمار لا توقعى على جدور رقبتك :lol:

[semsema]

فيه توقيع بينرفزني...والله نفسي أعرف ليه...وهو توقيع داروين ( محدش يقوله ) :lol:

دنيا وفيها من كل شي..وكل من جاها مشي

هقوله :lol:

بس اعرف الاول هوا فين..........

[Folana]

السلام عليكم ورحمة الله ....

من أجمل التوقيعات واللى باعتبرها من فنيات التعامل مع الاخر توقيع استاذ احمد محمود

صمت الملوك صمت حكيم.. وصمت العبيد صمت مهان

فاختر ما شئت ان كنت عليم..واقبل بالهون ان كنت جبان

وتوقيع الحاضر الغائب هشام الجندى:

وعلمتنى الحياه اضحك لأحبابى

واضحك كمان للعدو علشان يشوف نابى

واخده كمان بالحضن لو خبط على بابى

فيحس انى قوى وميشفش يوم ضعفى.............

ولا ننسى طبعا توقيع الحاضر الغائب سقراط المصرى ..واللى دخل المحكمة بسببه عندما اختصمه س.س

حابقى ادور لكم عليها واضيفها ..

زوجتي الحبيبه ، امي الغاليه ، حماتي الطيبه

برجاء تجهيز مايلي يوم وصولي لأرض المحروسه :

باميه باللحم الضاني ، محشي ورق عنب ، كباب حله ، قلقاس باللحمه ،نص دستة زغاليل محشيه ، بطه راقده على صينية بطاطس ، وزه متشوحه كفتح شهيه ، صينيه رقاق ، موزه مشويه على الفحم ، سلطة طحينه بالليمون ، مية "دقه" ، ملوخيه بالارانب ، شربة فرخه بلدي بالحبهان والمستكه، برميل تمرهندي............... وكفايه كده عشان انام خفيف.

سقراط المصري

ياترى اتحقق حلمه؟؟

[DARWEEN]

فيه توقيع بينرفزني...والله نفسي أعرف ليه...وهو توقيع داروين ( محدش يقوله )

دنيا وفيها من كل شي..وكل من جاها مشي

هقوله wst::

بس اعرف الاول هوا فين..........

يعني أغيب شويه أرجع الاقيكم ماسكين في سيرتي وتوقيعي ؟؟؟

معلش يا سمسمه كل واحد وله يوم

بس أنا عاوز أعرف هو توقيعي بينرفزك ليه يا ناش ؟؟

بالمناسبه توقيعي هو أخر جمله في فيلم الزوجة الثانية ... وأنا أرى فيه منتهى الحكمه ... فالدنيا فيها كل شيء غريب وعجيب ... ومهما حاول الأنسان أن ينال منها ففي النهاية سيرحل عنها تاركا كل شيء

أتمنى أن أكون قد أوضحت وجهة نظري في التوقيع

العزيزة بدرية ( نجفة سابقا ) .. معك حق فلا المال يدوم .. ولا الجاه يدوم ... وحتى الأسماء تتغير ... فنمسي نكلم نجفة ونصبح نجدها بدرية :blink:

بالنسبة لي .. من أجمل التوقيعات في المحاورات هو توقيع أخي العزيز أحمد محمود

صمت الملوك صمت حكيم.. وصمت العبيد صمت مهان

فاختر ما شئت ان كنت عليم..واقبل بالهون ان كنت جبان

حقا توقيع فارس

[عادل أبوزيد]

تعجبنى الكثير من التوقيعات و كل منها حقيقة رسالة طويلة دسمة و مختصرة فى التوقيع.

لفت نظرى توقيع nash و إنتويت أو ربما كتبت لها فعلا من مدة طويلة أطرى توقيعها الذى يجعلنى أشعر بالشجن و الفرحة و يعطينى الضحكة الظريفة " حيتلطشوا "

صن ضحكة الأطفال يارب

فإن هي غردت في ظمأ الرمال أعشوشبت

لكن إن زودوها وبكيوا ..ونكدوا ..هايتلطشوا

[زهرة الجبل]

السلام عليكم

الغاليه بدريه

موضوعك جميل جداً و أنا أكثر ما أثار إعجابي و ضحكي توقيع الأخت الكريمه ناش

رااائع ومضحك وسليم ميه الميه

و أذكر أنني علقت مره عليه وقلت لها إنه عجبني جداً و ده فعلا اللي بيحصل

يا يضحكوا ونقلبها لعب وفرفشه ... يا نكدوا ونقلبها...!!!! ملطشه

صن ضحكة الأطفال يارب

فإن هي غردت في ظمأ الرمال أعشوشبت

لكن إن زودوها وبكيوا ..ونكدوا ..هايتلطشوا

[nash]

أستاذي القدير عادل...

شرفا لي أن ينال توقيعي أعجاب حضرتك...

وحقيقي سعدت كثيرا حينما نوهت عنه في المرة الأولي..والان أنا أكثر سعاده...

كل عام وأنت بألف الف خير وصحه وسعاده

ورمضان كريم

..................................................................

أختي الحبيبه زهرة.... wst::

والله انا سعيده بجد أن توقيعي عجبك...

ماهو يا عزيزتي كل اللي عنده أطفال هايفهموا التوقيع علي طول

كل سنه وانتي طيبه ورمضان كريم

[badroora]

يا أحمد جبتلك التوقيع بتاعى القديم مسموع

اى خدمة احنا فى ايام مفترجة وحبتش يكون نفسك فى حاجة

اينعم انت اول واحد سمعتنى توقيعيى وانا بردوا جبتهالك هنا عشان انت تمنيت ان باقي الاخوة يسمعوها

اى خدمة

يا عرب

تم تعديل 7 أكتوبر 2007 بواسطة Badria Mekkawy

[kokomen]

يا أحمد جبتلك التوقيع بتاعى القديم مسموع

اى خدمة احنا فى ايام مفترجة وحبتش يكون نفسك فى حاجة

اينعم انت اول واحد سمعتنى توقيعيى وانا بردوا جبتهالك هنا عشان انت تمنيت ان باقي الاخوة يسمعوها

اى خدمة

يا عرب

والله يا بدرية هانم توقيعك القديم جميل ومعبر

خصوصا الكاريكاتير لمجموع قوى الشعب العامل

وكل منهم يؤيد وبشدة

[شينكاوي]

السلام عليكم

كل الشكر لكم جميعا وخصوصا نجفة المحاورات- وذلك ليس لانها اختارت توقيعي- بل لانها من طرحت الموضوع

وان كنت ايضا اشكرها لانها اختارت توقيعي ومش هنساكي في اللحمة

وانا حاسس ان جميع التواقيع الموجودة تعبر عن افكار معينة في بعضها قد لا يفهمها صاحبها اما بخصوص توقيعي

فكل الشكر لمن كتب تلكم الكلمات وان كنت لا اعرفه وقد جمعتها من مداخلة شعرية له مع احد الاخوة في منتدي

لا اذكر اسمه وكانت بينهم مساجلة وهو كتب كلماته علي هيئة مقاطع واعجبتني بشدة فقمت بتجميعها في شكل قصيدة

لكن هناك توقيع واحد فقط كلما قراته واحاول ان اقراه مرارا لكي افهم ماذا يقصد صاحبه وللاسف في كل مرة تكون

الكلمات واضحة تعبر عن نفسها التوقيع هو (((( هل الرئيس مسؤول عن كل شئ .........لا)))

مع احترامي الشديد لصاحب التوقيع لكنه يناقض قول سيدنا عمر لو بغلت عثرت بالعراق لسال الله عنها عمر لما لم تصلح

لها الطريق يا عمر .

ولكن اشهد باني منذ دخلت الي هذا المنتدي وانا اشعر بان هناك من يحب هذا الوطن حبا عظيما فكل الشكر لمن اسس

وساهم واشرف وشارك في هذا المنتدي الذي اتمني ان يكون صوت ابناء مصر الشرفاء

[Ahmad Farahat]

يا أحمد جبتلك التوقيع بتاعى القديم مسموع

اى خدمة احنا فى ايام مفترجة وحبتش يكون نفسك فى حاجة

اينعم انت اول واحد سمعتنى توقيعيى وانا بردوا جبتهالك هنا عشان انت تمنيت ان باقي الاخوة يسمعوها

اى خدمة

يا عرب

في الواقع

ورغم فصاحة توقيعك الأحمر الفصيح

إلا أن هذا التوقيع يمثل صرخة أمة بقلم مواطن مصري

وحنجرة شيخ ضرير

أرجو للأصدقاء ألا يكتفوا بهذه الأغنية فقط وأن يبحثوا عن المزيد

[miramar]

توقيع ماريمار

كل مابص عليه بامسك قلبي بايدي خايفة عليها لتوقع وهى على قمة الجبل وعاوزة تصيد الكواكب زى ما بتقول

خالى بالك يا ماريمار لا توقعى على جدور رقبتك

متخافيش عليا مش هقع و اصلا بفكر اغيره لحاجة اكتر واقعية

و التوقيعات الي بتعجبني بجد توقيع الاستاذ الكبير عادل ابو زيد بيخليني نفسي اطلع مظاهرة

و كمان توقيع بدردر(ينفع ادلعك؟؟) ببقى نفسي اعيط على حال البلد

في توقيع شفته (الي بيته من ازاز ......يلمعه كل يوم)

قعدت اضحك عليه كتير قوي

مرمر

تم تعديل 8 أكتوبر 2007 بواسطة miramar

[badroora]

التوقيع دا بيوجع قلبي قوى كل ماقراه واتمنى من اختى نبض الابداع ياتى عليها يوم وتغيره بجد وخصوصا الجزء الاول من التوقيع

اشتقتلك يا امي وتعبت من اليتم

الله يرحمك و يغمد روحك الجنه وجميع موتى المسلمين

ربنا يرحم مامتك يا رب ويغمرها برحمته وبجعل مسواها الجنه ويبارك فى عمرك ويعوض عليكي ويصبرك

توقيع استاذ عادل ابوزيد كل واحد بيشوفه من وجهة نظره

انا عن نفسي لما بقراه

باحس انه بيحثنا على المسئوليه تجاه الوطن

بيقولنا مش كفاية اننا تصعب على الاحوال السيئه فى البلد وناخذ دور المتفرجين

لا بيقولنا انتوا اصحاب القضية فين دوركم اخرجوا من صمتكم

وتكلموا عن مشاكلم عن قضياكم

واعتقد هو دا الشعار اللى اختاره للمنتدى لليناقش القضايا ويجعلنا فى ادوار فعاله وليست

,,, مجرد فرجه من بعيد

تم تعديل 9 أكتوبر 2007 بواسطة Badria Mekkawy

[Ahmad Farahat]

تستغرق مناقشة المسائل التافهة وقتاً طويلاً لأن بعضنا يعرف عنها أكثر مما يعرف عن المسائل الهامة

هذا التوقيع للسيد قديم

لست أدري إلى أي حد كان الرجل مصيبا في هذا التصور

لكنني أعتقد أن هذا السبب منطقي ووجيه في مناقشة كثير من سفاسف الأمور بلا ملل

أحمد