هو الهرم مقلوب ليه؟

[moody00x]

المقصود الهرم الاجتماعى ..ألعقل والمنطق فى أى مكان فى العالم بيقول إن فيه درجات للهرم الاجتماعى لأى مجتمع والبداية من قمة الهرم والمفروض من كل النواحى إن القمة دى تكون لصفوة المجتمع والصفوة يعنى تخصص فى إفادة المجتمع...الشريحة دى المفروض يمثلها الطبيب والمهندس والمدرس والمحامى..ثم شريحة الموظفين عمومآ ثم الحرفيين ...لكن فين قاعدة الهرم وفين القمة ألآن....1-اللاعبين والفنانيين..والله فعلآ حاجة غريبة صحيح الدنيا بتطور كل يوم عن الماضى لكن أنا متخيل لو واحد من أجدادنا حتى مش القدامى منهم لو سمع إن فيه واحد دخله فى الشهر عشرة ألاف جنيه أكيدهايغمى عليه لكن هايفوق بعد شوية هايسأل بيشتغل إيه بالعشرة آلاف جنيه ..على ما أظن هايغمى عليه تانى بس مش هايفوق المرة دى لما يعرف إن المهنة العظيمةدى لاعب كرة أو ممثل....

مع إحترامى الكامل لكل مهنة وكل مجال لكن أى مجهود جبار وخارق يقوم به لاعب الكرة أو الممثل حتى يحصل على هذه ألأرقام؟أى إبداع و إبهار يساوى هذه ألأرقام؟وفى المقابل كم يحصل المهندس والطبيب بعد جهد وتعب ومذاكرة وسهر وقلق؟

فى الخمسينات والستينات أعتقد كان الفن والكرة فى وضع متقدم أيضآ لكن

كنا نسمع أيضآ عن وضع المدرس ومكانته ووضع الطبيب وكلية الحقوق تخرج الوزراء بل كان أمل كل شاب أن يعمل موظف فى أى مصلحة حكومية

مع إلانفتاح فى السبعينات الصورة إتغيرت وظهر السباك والسمكرى ورجال أعمال الشيبسى واللبان

أنا لا أتهم ولا أدافع عن مرحلة أو عن فترة معينة من فترات المجتمع...لكن ده التطور المرحلى اللى حصل فعلآ...

وإذا كنا هنقول إن دى ظاهرة عالمية..كل الرياضيين والفنانين فى العالم كله هما أصحاب الدخل ألأعلى ..كلام صحيح ولو إنه ما وزنش المعادلة برضه..لكن على سبيل المثال فى أمريكا وغيرها دخل الطبيب والمحامى والمهندس بأنواعه والمبرمج ماشاء الله

تقريبآ المعادلة عندهم متوازنة.... الفن والرياضة دخلهم مهول لكن مهن الصفوة مرضيين ماديآ واجتماعيآ...إذآ المشكلة قائمة عندنا...

فيه رأى بيقول إن اللاعب عمره قصير فى الملعب وبعد مايعتزل لازم يكون مأمن نفسه..طب إزاى ماهو بيعمل فى سنة واحدة اللى بيعمله اى شاب فى أى مجال عمره كله!!!!صحيح الموهبة والتميز ليهم تمن لكن برضه كتير وفيه مواهب وتميز فى الطب والهندسة والمحاسبة ومش واخدة ولا ربع التميز فى الفن والكورة...

والله يا جماعة أنا مش باحسد ولا باحقد على حد لكن فعلآ الفارق شاسع وحاجة تدعو للأحباط لما الطبيب الشاب ولا المهندس(على فكرة أنا باكرر دول كتير مش للتميز لكن لأنهم أكتر ناس بيتعبو وبيعانوا فعلآ فى دراسة ومذاكرة وأعصاب وحاجات كتير)..وفى ألآخر فلوس قليلة أنا مش متابع الحقيقة المرتبات كام لكنها لاتقارن بالمطرب فلان اللى بياخد ماشاء الله فى حفل واحد أو اللاعب اللى بياخد ماشاء الله فى ماتش واحد...مش حاجة غريبة وهرم مقلوب فعلآ..ولا ايه؟

_________________