ممكن طريقة طبيخ الكوسة

[بنت الشاطئ1]

السلام عليكم

محتاجة طريقة عمل طبيخ الكوسة

بس افضل بدون صلصة ينفع واللا الصلصة ضرورية

انا بحثت فى مواقع البحث عن طبيخ الكوسة النتيجة..

كل ما وجدت..الكوسة فى بلدى..والكوسة فى وطنى..والنظام الجمهورى والكوسة

ملهاش علاقة بالطبيخ خالص :blush2:

[somebody]

الطريقة :

أول حاجة تسلقي اللحمة مع الحبهان وتشيلي الشوائب يعني تعملي شوربة عادية

تجيبي الكوسة وتقشريها خفيف خفيف بالسكينه بحيث تخلي طبقة خضرا وبعدين تغسليها وتقطعيها مربعات

التقلية:<تبشري البصل وتحمريه مع الفلفل الاسود والكسبرة المطحونة

وبعد ما يصفر البصل تحطي الطماطم أو( الصلصة مع المية) فوق البصل المحمر>

وبعد شوية تحطي الكوسة فوق التقلية دي

وبعد كده حطي جزء من الشوربة فوق الكوسة

وبالهنا والشفا

تم تعديل 8 أكتوبر 2007 بواسطة somebody

[زهرة الجبل]

أختى الكريمه بنت الشاطئ

الكوسه إذا عاوزه طريقه لطبخها وحدها فلا بد من الصلصه

إلا إذا عملتيها صينيه بالباشاميل

وطريقة الصينيه بالباشاميل أنا لا أعرفها وحتى لا أحبها أيضاً

عموماً أستطيع تذويدك بطريقه لإستخدام الكوسه في صينية خضروات مشكله هي بدون صلصه لكن لا تصلح للكوسه وحدها

المكونات

كوسه و بطاطس وجزر و بصل وفلفل أخضر وفاصولاياء خضراء وبسله

طبعاً الكميه تكون بصلتين كبار وفلفله رومي خضراء واحده وباقي المكونات البسله والفاصوليا والبطاطس متساويه والجزر اقل بقليل منهم والكوسا هي اكثر الكميات

ولك تحديد الكميه كما ترغبين

وتكوني سالقه اللحم او الدجاج وعندك مرق السلق((الشوربه )) جاهز

الطريقه

يقطع البصل شرائح والفلفل الأخضر شرائح وتضعي ملعقة سمن في الصينيه وتتركيها لتسخن

تضيفي البصل والفلفل الأخضر معاً حتى يذبل البصل ولكن لا يتغير لونه

تضيفي بعدها البسله والجزر فقط وتتركيهم على نار هادئه قليلا مع التقليب لمدة خمس دقائق مثلا((الجزر مقطع شرائح رقيقه جدا حتى لا تأخذ وقت في النضج))

ثم تضيفي الفاصولياء و الكوسه وتحركيهم معاً على النار الهادئه لمدة خمس دقائق أخرى (( الفاصولياء مقطعه عادي والكوسا شرائح متوسطة السماكه ليست رقيقه حتى لا تنضج أكثر من اللازم)) وفائدة الكوسه بالقشره فيستحسن غسلها جيدا وتقطيعها بدون تقشير

ثم تضيفي آخر شي البطاطس مقطعه شرائح متوسطة السماكه وتحركي وتضيفي مقدار مناسب من المرق (( الشوربه ))

والتحريك يكون برفق حتى لا تكسري شرائح البطاطس لتحافظي على شكل نهائي جيد للصينيه

والبهارات تكون كمون وفلفل اسود و حبهان مطحون و أحياناً أضيف القليل جداً من القرفه وكمية البهارات طبعا حسب الرغبه

وبالنسبه لترتيب البهارات ففي أى وقت عادي

لكن أنا استحسن وضع الكمون وحده في البدايه مع البصل والفلفل الأخضر ومعهم رشة ملح

وهكذا افعل حتى تأخذ كل الخضروات طعم الكمون

ملحوظه

كل الخطوات السابقه اقوم بها في قدر (( حلَه )) غويطه حتى يسهل التحريك ثم في النهايه أقوم بنقله لصينيه بايركس

ووضعها في الفرن وقبل وضعها بالفرن تضعي معهم اللحم أو الدجاج داخل نفس الصينيه وسط الخضار

و تترك بالفرن بالرف الأوسط بحراره متوسطه حتى تمام النضج ثم تفتحي الشوايه لتحمير الوجه

وبالهناء والشفاء والعافيه

تم تعديل 8 أكتوبر 2007 بواسطة زهرة الجبل

[Folana]

السلام عليكم ورحمة الله....

نحن لا نحب الكوسة

ده اول هام...

لكن فى المأكولات..طبعا بنحبها...والكوسة دى بتتعمل بطرق كتير...تعالِ نشوف كده ..(بس من غير صور لانى ماعنديش صور ولا باعرف اضيفها اصلا )

الكوسة المطبوخة طبعا لازم طماطم..وانا بأفضل اعملها باللحمة المفرومة او قطع اللحم تكون صغيرة..

مش حاعرف اقول مقادير..لكن حاولى انت تظبطيها ...

كحتى الكوسة (طبعا ماتتقشر وفيه ناس بتعملها بقشرها عادى بدون تكحيت )..ممكن تكحتيها كمان بالناحية المشرشرة اللى فى المقوار..بيكون شكلها ظريف..

وقطعيها حلق بسمك معقول ..ولو الكوسة كبيرة اقسميها نصفين بالطول وبعدين قطعيها حلق ..واغسليها وسيبها على جنب

عصجى اللحمة المفرومة ...وبعد كده ضيفى عليها عصير الطماطم وتبليها بالملح والفلفل لحد ماتتسبك

او لو لحمة عادية سويها الاول عادى....وبتضيفى حمص طبيخ مع اللحمة علشان يستوى هو كمان..

وبعد ماالحمص يستوى والطماطم تتسبك حتضيفى الكوسة ..ووطى النار ..ولو احتجتى تضيفى ماء ابقى ضيفى شوية لكن بعد ما الكوسة تتخلص من ماءها علشان بس ماتبقاش شوربة..

اما الكوسة تستوى بقى ..اطفى على النار..وممكن تضيفى شوية نعناع ناشف وده اخنيارى

وتولعى فحمة على النار ..وتطفيها فى حلى الكوسة فى قشرة بصل بها نقطتين سمن ..وتغطى الحلة كويس جدا..

وبعد شوية تشيلى الفحمة وقشرة البصل..

تعرفى..ايه رايك لو تجربى الطريقة دى من غير طماطم؟؟يعنى تعصجى الحمة وتضيفى الكوسة وتكملى التسوية بالشوربة؟...انا عمرى ماجربتها بس ايه رأيك تقومى انت بالمهمة دى وتقولنا النتيجة؟

وممكن تعملى الكوسة فى الفرن برضه اما بالبشمايل او باللحمة المفرومة بس او تقسميها نصفين بالطول وتفضى القلب وتحشيه لحمه مفرومة وتدخليها الفرن زى القارب كده

وممكن حاجات كتير جدا الحقيقة..

ممكن كمان تحشيها لحمة مفرومة او خلطة..او الاتنين ...وترصيها فى صينية وتغطيها بالبشاميل الخفيف وتدخليها الفرن...تبقى زى الكانيلونى..

كفاية كده احسن حافضل اخترع طول اليوم..

شوفى انت عايزة اى طريقة ونكتبها لك...

صباحك جميل.......

[Salwa]

صباح الخير ..

ياجماعة سبق لى وكتبت طريقة عمل الكوسة ....هنا.

وهى بتكون لذيذة جدا فعلا ..

المكونات ...

1 - كوسة حوالى كيلو .

2- واحد فلفل احمر ..(( ممكن اضافة فلفل اخضر ايضا حسب الرغبة ))

3-.بصلة ..

4- عدد اتنين طماطم .

5 - ثلاث فصوص ثوم ..

6- ملح وفلفل ...زيت زيتون .

نقطع الكوسة بعد تقشيرها بالمقشط ..دوائر او مكعبات (( حسب حجم الكوسة ))...ونخرط البصل صغير جدا ونقطع الفلفل شرلئح ونقطع الطماطم بعد تقشيرها مكعبات ..

نحمر البصل فى زيت الزيتون ثم نضيف الفلفل ونقلبه حتى يتجانس مع البصل ثم نضيف الطماطم والكوسة ...وعندما تبدأ فى النضج نضيف الثوم المدقوق مع الملح والفلفل ..

وبالهنا والشفا..

[بنت الشاطئ1]

شكرا شكرا على كل هذه الوصفات

ان شاء الله اجرب هذه الوصفات

مدام سلوى وصفتك سهله جدا

اما عزيزتى فولانه انا اعمل نفس الطريقة اللى ذكرتيها لكن بدون نعناع ناشف وبدون فحمة كمان اكيد هجربها

شكرا ايضا لزهرة الجبل

على فكرة بسمع ان الكوسة مفيدة جدا جدا

اما عزيزتى فولانه كنت طلبتى منى صورة للشوربة فى الملف الخاص بالشوربة انا مشكلتى مش عارفة انزل الصور على الموقع ان شاء الله احاول

[بندق أفندى]

ده كوسة مشوية .. ببساطة نتبلها بخل وملح وفلفل أسود وزيت زيتون ونحطها على الجرل شوية وبعد ما تتشوى نعيد تتبيلها تانى

[se_ Elsyed]

إيه اللي فكرك بالكوسه يا شيف ؟

بصراحة الكوسة دي بتفكرني بيوم الثلاثاء ..

يوم الثلاثاء حاجه كده في وسط الإسبوع ومالهاش لازمه ..

كذلك الكوسة .. اكله غريبة وبأكلها بالعافية محشي وبأعصر على نفسي لمونه ..

.. إدخل عالسمك يا شيف عشان الفسوفور وكدهوت

[بندق أفندى]

إيه اللي فكرك بالكوسه يا شيف ؟

بصراحة الكوسة دي بتفكرني بيوم الثلاثاء ..

يوم الثلاثاء حاجه كده في وسط الإسبوع ومالهاش لازمه ..

كذلك الكوسة .. اكله غريبة وبأكلها بالعافية محشي وبأعصر على نفسي لمونه ..

.. إدخل عالسمك يا شيف عشان الفسوفور وكدهوت

طب شوف الموضوع الكوساوى الجبار اللى حطيته اليوم .. وهتغير رأيك .. هأهريك سمك ومأكولات بحرية ما تستعجلش