لازم نزرع قمح .........

[miramar]

بسم الله الرحمن الرحيم

الأيام دي كل المنتديات مطلعه الموضوع الي في سؤال(ماذا تفعل لو كنت الرئيس؟؟)

النهاردة أنا هاقولكوا اهم و اكتر حاجة نفسي اعملها

لازم نزرع قمح

لازم لازم لازم لازم لازم

زي ما حضراتكوا شايفين وعارفين مصر مبتزرعش قمح كفاية يكفي احتياجات كل المصريين

و أمريكا لاوية دراعنا بالقمح بتاعها الي بنستورده منها

تخيل في يوم أمريكا تغضب علينا و نصحى منلقيش عيش ناكله

ليه؟ مفيش دقيق

ليه؟ مفيش قمح

عشان نتقدم ونتخلى عن سيطرة أمريكا لازم على الأقل نكون عندنا عيشنا مش نستورده

يا شعرائنا يا آرسي (احمد فرحات)

فينك اكتب قصيدة اسمها لازم نزرع قمح لازم

يا علمائنا وأدبائنا وتجارنا ومهندسينا و أطبائنا

لازم نزرع قمح

فين المهندسين الزراعيين فينكم

مش لازم نزرع فلفل وبتنجان مش لازم قرنبيط

لازم نزرع قمح

بس خلاص

مرمر

[amrhoras]

القمح مهم اهم من عش الغراب بس امريكانا ربك والحق منعنشانا طب والقطن ؟ حاجات كتير اوى يامرمر لازم نهتم بيها مش القمح بس

شكرا نحن شعب لا يزع القمح ولكننا نزرع الشوك لانفسنا

[kokomen]

نداء من العزيزة مرمر

زراعة القمح مهم جدا جدا كسلعة إستراتيجية غذائية

من لا يملك غذائه ... لا يملك حريته

أين أنت يا أخي الحبيب ... كوكواوا كبير المهندسين الزراعيين في المحاورات

معلش يا مرمر هو زملكاوي صحيح لكن حيقدر يفيدك في زراعة القمح

وكمان الأخت بدرية هانم .. نجفة ... مسؤولة سوق العبور للمواد الغذائية

لازم نزرع قمح

فين المهندسين الزراعيين فينكم

مش لازم نزرع فلفل وبتنجان مش لازم قرنبيط

لازم نزرع قمح

بس خلاص

مرمر

:) :) :blush2:

[مخمخه]

فكرتيني ببيتين شعر قرأتهم فى منتدى آخر

بيقولو

يا بلدى يا حبيبتي .... فيكي حاجه محيرانى

نزرع القمح فى سنين .... تطرح الكوسه فى ثوانى

:sad:

[se_ Elsyed]

دايماً نقول إن لو الحُكام اللي حكموا بعد الثورة سواء عبد الناصر أو السادات او مبارك لو كانوا يهود صهاينة سفاكي دماء ما كانوش عملوا في مصر كده

- حتى الأن بنستورد اكثر من نصف إحتايجاتنا من القمح

- المخزون الإستراتيجي لا يكفي إلا 3 شهور فقط وبعدها عشانا عليك يارب وناكل جاتوه وتوست بدل العيش

- أكثر من 30 % .. اكرر 30 % من مخزون القمح يُهدر ما بين سوء تخزين بالصوامع اللي مش مكفيه فبيرموا القمح في العراء وتيجي العصافير والغربان تاكل وتبطرخ على قفانا .. او يفقد في وسائل النقل العتيقة أو في المطاحن أو المخابز عن طريق السرقة .

- يُمكن لأي مواطن مصري شريف أن يُشاهد بأم عينه شولة الدقيق المُدعم وهي بتتسرق عيني عينك من مخابز العيش البلدي في وضح النهار وده عشان تتباع لمخابز العيش الفينو ومشتقاته ولإننا في غابة يأكل الكبير فيها الصغير فصاحب الفرن البلدي بيدورها في دماغه ويقول : إني بادفع مرتبات وضرايب وميه ونور وحركات وتكاليف متلتلة نتيجة خبيز العيش .. طب مانا أسلك لي 5 شولة دقيق كل يوم أطلع منهم بمكسب نضيف ولا من شاف ولا من دري ولا وجع دماغ .. كل هذا ووزارة التموين شايفه وعارفه وبدل ما تراقب وتجازي وتعاقب .. لأ دول بيقبضوا وبيعملوا ملايين من الرشاوي عشان يطرمخوا ويسيبوهم يسلكوا الدقيق .

- في الثلاثة شهور الأخير أرتفعت أسعار القمح عالمياً بشكل كبير وبالتالي كل ده ديون على مصر اللي بتشتري القمح بقروض ذات فائدة عاليه وعيالنا هما اللي هايسددوا القروض اللي بتوحلنا فيها الحكومة .

- مصر بجلالة قدرها وبملايين المهندسين الزراعيين وملايين لافلاحين اللي خبرة الواحد فيهم أكتر من خبرة أي مهندس محترف مش عارفه ومش قادرة لحد دلوقت إنها تتوصل إلى عنصر مُكمل للقمح فر رغيف العيش وليكن دقي قالذُرة أو الشعير مثلاً !!!!!!!!!!! وفالحين بس يصرفوا ملايين ومليارات على مراكز البحوث وكل ده بيروح في سرقة ونهب ورشاوي بدون اي فائدة .

- لو هما بيتحججوا إن الرقعة الزراعية والإجمالية التي تبلغ 8 مليون فدان فقط في مصر لا تكفي لزراعة القمح إلى جانب المحاصيل الاخرى ومحتاجين ييجي مليونين تلاتة فدان تانيين عشان نكتفي ذاتياً من القمح .... طب ده مُبرر فاشل من حكومة فاشلة عاجزة ... ده عندك السودان بها ملايين من الأفدنة الصالحة للزراعة ومتوفر فيها المياة وبتقول يا ناس يا هو إزرعوني وممكن نزرع ونصدر كمان وشعب لاسودان الطيب كله هايرحب وسنوفر فرص عمل لملايين المصريين والسودانيين معاً .... وعندك الأراضي التي خلف السد العالي واللي كلها طمي من اللي حجزوا السد من الستينات وخرب بيوت الفلاحين وخرب الأراضي الزراعية المصرية كل ده بدل ما تروح ترمي في مزبلة توشكى مليارات الدولارات عشان تطلع شوك في الأخر ؟ حسبنا الله ونعم الوكيل

أقسم بالله لو عندنا ناس بتعرف ربنا وتتيقن إن في يوم إسمه يوم القيامة سيقفون عرايا أمام الله بدون حرس ولا حشم ولا خدم ولا سيارات مُصفحة عشان يتسألوا عن اللي عملوه في الناس ... كانت كل مشكلاتنا إتحلت في سنة

لكن اللي عاش 50 سنة فاككر نفسه هايعيش 80 ... واللي عاش 80 زي مبارك وبقى عبارة عن إنسان آلي كل أعضاءه صناعية فاكر نفسه سيُخلد أبد الضهر .. حتى لو مات فالبركة في ريري يكمل تخريب ما لم يستطع أن يخربه في أكثر من ربع قرن

ولكن هيهات لو دامت لفرعون والنمرود وابو جهل وهتلر وعبد الناصر .. ما كانت وصلت إليكم .

وحسبنا الله ونعم الوكيل