ليه أعضاء في المحاورات بيستعملوا أسماء أجنبية؟!

[المدهش]

ليه بعض أعضاء المحاورات بيستعملوا اسماء اجنبية..أو بيكتبوا أسماءهم بحروف انجليزية..هيه ثقافتهم أجنبي..ولا العربي بتاعهم بعافية شوية,,وليه بشكل عام بنحب نستعمل كلمات انجليزي وفرنساوي في كلامنا..وليه مثلا بنقول مرسي وليس شكرا..ايه السر في ان العرب من دون خلق الله جميعا همه اللي بيحبوا يستعرضوا على بعض ياستخدام كلمات أجنبية..سوري يا جماعة أصلي ديبريسد شوية ومودي مش لذيذ!!!!!!!!!!

[miramar]

سؤال حضرتك مدهش يا استاذ مدهش

انت عارف انا ليه اسمي انجليزي

لأني ايام ما سجلت مكانش الكمبيوتر بتاعي بيدعم العربي وده مش تبرير ولكن ده السبب انه مكتوب انجليزي

و ميرامار لو متعرفش رواية معروفة جدا لنجيب محفوظ الله يرحمه واتعمل فيلم بطولة شادية

سوري يا جماعة أصلي ديبريسد شوية ومودي مش لذيذ!!!!!!!!!!

صراحة حضرتك احسن واحد تعلمنا الانتماء للغتنا العربية

:blush2:

بس

مرمر

تم تعديل 16 أكتوبر 2007 بواسطة miramar

[إبن مصر]

وما هى المشكله فى اختيار الاسم باى لغه كانت المهم فى صاحب هذا الاسم ولغته وافكاره .

السؤال فيه تعميم فى مواضيع غير مترابطه .. ما بين اختيار الاسم الى استعمالات اللغه فى التعبير وكأن هذا هو السائد .

على الاقل فى محاورات المصريين كل يختار من الاسم ما يناسبه ويكتب كتابات راقيه حتى فى هزلها قبل جدها .

وتلك حريه شخصيه لا ارى اى داعى ان تعمم على كل العرب بان هذا اسلوبهم وما الى ذلك من تعمد تحقير اللغه العربيه .

اختيار الاسم هو تفضيل شخصى ولغه الكتابه هى العربيه وغالبا تأتى التعبيرات الانجليزيه فى معرض رد من خلال موضوع خفيف او هزلى .. او مهما كان وليس فى ذلك تقصير من احد .

اللغه العربيه جميله وتحوى كل المعانى ولكن اعود واقول انها ليست ظاهره سيئه تستدعى التعميم من منطلق استخدام اسماء اجنبيه الى ان هذا هو حال العرب...

[المدهش]

شكرا يا احمد على اهتمامك وردك..وان كنت توقعت ان تقول لي حمد الله على السلامة بعد عودتي للمشاركة في المنتدى بعد غياب طويل..وبعدين لماذا هذه اللهجة العدائية في ردك على موضوعي..شكلنا كده كان فيه بيننا مناوشات ايام ما كنت باشارك في انتظام في المحاورات..عموما سامحني لو كنت لسه زعلان مني على حاجة انا مش فاكرها بصراحة وكل سنة وانت طيب ..

[zizetta]

بصراحة انتوا إستفزتوني بموضوع اللغة العربية ده .. وعشان كده أنا حطلعكوا علي السر بتاعي ..

أنا كنت بعمل قاموس لغوي خاص وسميته (القاموس الفريد للعربي الجديد ).. ترقبوا إصداره ..لكن علي كل حال أنا عن نفسي إسمي زيزيتا مشتق من إسمي الحقيقي .. وزيزيتا ده اسم بيندهلي بيه بعض القريبين مني ..ياريت كل واحد يقول يعني ايه اسمه اللي اختاره في المنتدي ..

وما تنسوش تحجزوا نسختكم من الآن من (القاموس الفريد للعربي الجديد)

محسوبتكم زيزيتا

[إبن مصر]

طبعا الحمد لله على سلامه الجميع يا استاذ مدهش لكن اعذرنى انا لا اتذكر انه كانت هناك مناوشات وانت من يرى ان لهجتى عدائيه بل بالعكس. هى لغه منطقيه .

ولا داعى لاعتذار على شىء لم تفعله وليس لا تتذكره لانى لا اريد ان تفهمنى خطأ حين اقول انى لا اتذكر ان هناك حوار بيننا أصلا وان كان يشرفنى ذلك بالطبع.

وازيدك من الحب بيتا ... لا احمل ضغينه لاحد لانتظر عودته كى ارد عليه بعدائيه والحمد لله .. خانك التعبير فى هذه الجمله يا أخى الفاضل فبها اسقاطا ان قلبى اسود..

عموما الحمد لله على سلامتك .. بعيدا عن المناوشات ورأى مازال كما هو...

شكرا لتواصلك.

[النسر المصري]

مدهش حبيبي........ياسلاااااااااااام....انت فين ياراجل!!.......والله وليك وحشه ...خد دي الأول :blush2:

طبعا انا مش معترض على اللي عاوز يسمي نفسه اسم انجليش ... عشان انا شايف ان ده نورمال يعني......بس ذات امبورتانت اننا ندي شوية أهميه لل Arabic واللا انتو شايفيين ايه

بص من الآخر اهم حاجة في الموضوع هي رجعتك بالسلامه..... ولو تفتكر آخر موضوع اتكلمنا فيه مع بعض.....كان كله روقان ...وبتنجان.....وبطاطس

[nash]

حضرتك ممكن تعتبرها لقافه من صاحب الأسم الأجنبي...

أو عقده الخواجه...

أو علمنه زايده....

لكنها أبدا ليست حريه شخصيه في أختيار مايحلو لمن يختار الأسم الأجنبي

[المدهش]

احمد محمود..

طبعا انا متأكد ان قلبك ابيض (وايت هارت)..لكن انا مش عارف ليه حاسس انه كان فيه بيننا حوار قبل كده..عموما نتحاور ويشرفني ذلك

النسر المصري..

شكرا على كلامك الرقيق..لكن يا ريت تفكرني بالموضوع بتاع الروقان والباتنجان

ناش..

يعني ايه لقافة..وبعدين اسمحي لي..انتي كمان كاتبة اسمك بحروف لاتيني

[semsema]

ناش..

يعني ايه لقافة..............

مدام ناش......اسمحيلي اجاوب عنك...عشان انا بستخدم الكلمة دي كتير اوي

اللقافه يعني الفضول والتدخل فيما لا يعنيك( طبعا مش انت )بس بشكل وحش اوي....

وبتتنطق كدا: (لجافه)

[nash]

ناش..

يعني ايه لقافة..وبعدين اسمحي لي..انتي كمان كاتبة اسمك بحروف لاتيني

والله يا سمسمه لسه هاكتب الرد لقيت ردك...

بالضبط استاذ مدهش تعريف سمسمه صح

[نانو]

ليه أعضاء في المحاورات بيستعملوا أسماء أجنبية؟

وليه لأ

شئ طبيعي جدا ان التعامل مع الكومبيوتر ومعظم برامجه بيكون بالانجليزي و طبيعي برضه ان كلنا عندنا اسماء علي كل البرامج و برضه معظمها انجليزي

يمكن يكون تعود :blink:

[ابو محمود]

السلام عليكم

انا هرد على حضرتك وعارف ان كلامى ممكن ميعجبش حد !!!

هانت علينا لغتنا العربية زى ماهانت علينا حجات كتير ومصر خير دليل ؟؟؟

يعنى بص حواليك هتلاقى كل واحد بيعمل اللى على مزاجة فى الشارع فى العمل حتى فى دور العبادة من الجهتين !!! وتقولى لية بنتكلم أو بنكتب بلغة تانية غير العربى ؟؟؟

دحنا بقينا غرباء فى مصر مش غريبة أوى انك تدخل مطعم فى مصر وتلاقى المكونات مصرى ولاكن اسم الأطعمة او بمعنى أخر الوجبات اجنبى والنبى شوف أزاى ياعم حتى الناس دلوقت اصبحت تتأفف من اللغة العربية يعنى كل واحد عايز يثبت أنة متعلم يقوم يبرطم بكام كلمة أجنبى آل الواد كدة بقى مطلع او ثقافتة هآى وبعدين ياسادة مهو الأنجليزى لغة الكمبيوتر طب الألمان لية مش بيرضو يتكلمو أنجليزى ؟؟؟؟

الموضوع بصراحة أن من هانت علية لغتة هان علية اى حاجة تانى تخص قوميتة ودة مش من عندى دة كلام اتعلمتة من وانا لسة فى الكتاب يعنى ولا بلاش لحسن تذعلو منى وانا بحبكم وربنا يهدينا جميعا ألى الصواب

آمين

[geny]

ممكن نقول انها حرية شخصية من الدرجة الاولى

ولكن مش معنى ان الواحد بيكتب اسماء او بيستخدم اسماء انجليزية يبقى ده وسيلة لتحقير اللغة العربية...مثلما ينادى بعض اعضاء المنتديات الاسلامية منع الاسامى الاعجمية ولتكون كلها دينية صرف ...

انا فى رأيى ان الانسان مش باسمه ...الانسان بمواضيعه وردوده اللى بتبان فيه اذا كان فعلا بيؤدى الى تحقير لغتنا العربية ولا لاء...هوا ده الفيصل ...

لكن من الاسم..ممممممممم معتقدش

وممكن هتقولى طب ماهو لو ابتدينا من الاسم ...هنكمل المشوار...هقول مش هتفرق برضه...:blink:

[badroora]

الاخ العزيز محمود مصطفي

طول عمرى اخى العزيز اعتز برايك جدا ولا عمرى اختلف معك فى راى لانى ارى ارائك دائما صائبة وصحيحة ولكنى هذه المرة الاولى التى اختلف معك فيها (مسامحة خيي)(

انا ضد ربط كل شيء بالدين وبالوطنية

بمعنى هل تعلمى وايجادى للغة الانجليزية اة اى لغة معناها انى باستعر من لغتى العربية طبعا لاء

هل كوننا نبقي فى مصر بلد عربي ونتحدث اللغة الانجليزية دا عيب او يقلل من وطنيتنا او احترامنا للغتنا بالطبع لاء

هل تعميم الشركات وتغير كل طرق التعامل للغة الانجليزية ضد قواعد البلد والوطنية بالطبع لاء

اذن كل شيء يقاس على هذه المبدأ سواء اسم او طريقة كتابة

بالعكس انا حصل وطلبت من الاب الفاضل استاذ عادل ان يتيح لنا الفرصة للكتابه بالغة الانجليزية منها تقوية اللغة والتعود على التحدث بها وبصراحة اسهل بكتر من اللغة العربية يعنى الانجليزية لغة واحدة اما العربية ايشي مذكر ومؤنث وعامية وفصحا وهالوما جارة

خلينا نتكلم بموضعية اكثر بعيدا عن الاسامى فقط احنا كمصريين مقارنة لغتنا الانجليزية بالخليجين هما متفوقين عننا يعتبر معظمهم بيتحدث اللغة بطلاقة لانهم اعتادوا على وجود الاجانب فى بلدهم وبذلك اعتادوا على التحدث باللغة الانجليزية

احنا بقي فى مصر كل العمالة منا فينا فتلاقينا كل كلامنا عربي ومش بنستخدم اللغة الا قليل جدا فى اوقات معينه ودا طبعا بياثر علينا تاثير سلبي فى ضعفنا فى ممارسة اللغة .

ايه المشكلة لو انا عربية مسلمة اجيد اللغة العربية والانجليزية ايضا بالعكس انا اشعر انها تشريف كبير .

ومما لا شك ولا جدال فيه ان اللغة الإنجليزية أصبحت اليوم هي لغة التخاطب بين الشعوب، يجب أن لا نكابر فهذه هي الحقيقة التي لا يمكن تجاهلها.

قال رسول الله صلى الله عليه وسلم : تعلموا لغة قومٍ تأمنوا مكرهم.

اخيرا اخى العزيز المدهش ومحمود مصطفي

بلاش نربط كل شيء بالدين والوطنية

وسورى عالاطالة لان من راى الموضوع اهم واعمق من انه يتكلم على مجرد اسماء مستعارة عالنت .

تحياتى للجميع ولصاحب الموضوع لطرحة لمناقشة قد تكون اعمق من العنوان نفسه :blink:

تم تعديل 20 أكتوبر 2007 بواسطة Badria Mekkawy

[ابو محمود]

صباح الخير

عزيزتى وأختى بدرية انتى منورة وبعدين انا هدخل فى الموضوع ضغرىىىىىىىىىىىى

بصى ياست البنات انا مليش دعوةبالدين علشان اللغة العربية اصلآ للجميع يعنى انا بقول اننا لابد ان نتثقف ودة رآيى ولن اتنازل عنة ولاكنى أجد انة من الخطر ان نجعل الكتابة او ندخل مصطلحات فى لغتنا من اسبابها أضعاف نطقنا وطلاقة لساننا بلغتنا وبعدين ياست البنات انا عارف ان الأخوة العرب فاتحين على الأخر فى معاملاتهم بالأجانب ودة انا اشجعة ولاكن تصورى انهم يتكلمون مع أجنبى ألمانى هل سيكلمونة انجلش ولا ألمانى دة المانى والحكاية دى مألمانى أويىهههههههههههه وبعدين مش معنى انى اتعلم لغة ان انطق معها فى بلدها لغة أخرى يعنى انا ممكن ودة أكيد اعلم اولادى لغة أجنبية وأثنين ولاكنى اعمل على أجادتهم لغتهم الأم وبعدين يبقى يتعلمو اجنبى براحتهم وبعدين انا بقول ان اللغة تعبر عن متكلميها أو من ينطق بها يعنى حفاظنا على لغتنا يجعل من يتعامل معنا يحترمنا ويساعدنا على التشبث بقوميتنا التى اصبحت فى خبر كان وبقينا ملطشة لكل العالم يعنى انا اتكلم من باب القومية مش من باب الدين ولاكنى اتكلم من باب الهوية وكدة اعتقد انى وصلت ليكى يابدر البدور رأيى وكدة ممكن نتناقش ان كنتى شايفة ان الكلام لسة موصلش

مع تحياتى وأحترماتى أخيك محمود مصطفى

[DARWEEN]

ولماذا نرغب دائما أن يفعل الأخرون ما نريده من أسماء وتعريفات ؟

وما هو العجيب في أن يختار أي من ما يرغب فيه ؟

وأليس من المفروض أن أعضاء المحاورات هم ممن يتمتعون بالثقافة والعلم ؟

وهل نسي كاتب الموضوع أن كل من يشترك في المحاورات يجد صفحة التسجيل باللغة الأنجليزية ؟

فعلا موضوع أدهشني ..... لغرابته

[ابو محمود]

************

اسلوب السخريه غير مسموح به فى نقاشات الاخوه بالمحاورات

رجاء الانتباه الى ذلك مستقبلا ومراجعه قواعد الكتابه بمحاورات المصريين.

الاداره

أحمد محمود

[أبو محمد]

أول مشاركة لى فى "محاورات المصريين" كانت فى موضوع من موضوعات سى السيد اللى فى الجون (الموضوعات هى اللى فى الجون) :blink: ... كان الموضوع بعنوان الأرض بتتكلم إنجليش .. الأرض .. الأرض

وكانت هذه هى مشاركتى الأولى .. التى عبرت فيها عن فكرة أن اللغة تقوى بأهلها .. فإن أبدعوا شيئا وسموه إسما بلغتهم فإن العالم سيستخدم المفردات التى استخدموها لإعطاء معنى لإسم الشئ الذى أبدعوه .. وركزت في تلك المشاركة على سخافة محاولة ترجمة الأسماء بالذات ..

أرجو لكم قراءة ممتعة لموضوع سى السيد الجميل (قصدى على سى السيد) :lol:

[المدهش]

الأديب الروائي السوداني الطيب صالح له مقولة ذكية يقول فيها..(يعلموننا لغتهم لنفكر بطريقتهم)..فاللغة ليست فقط وسيلة للتواصل والحوار ولكنها ثقافة وطريقة تفكير..وأنا لست من معارضي تعليم أو تعلم اللغات الأجنبية ، لكني ضد مسخ لغتنا باستخدام لغة أخرى فيها أو بكتابة العربية بحروف لاتينية ، وضد ترديد بعض الألفاظ الأجنبية في الجوار من باب الاستعراض أو التعود..فالأمم المتحضرة لاتفعل ذلك..الألمان والفرنسيون وغيرهم من الشعوب العريقة يعتزون بلغتهم..ولا تجد هذه الظاهرة الا لدى شعوب متأخرة مثل الهنود والفليبين..لغتهم سمك لبن تمرهندي وخليط من لغات ولهجات متعددة..وقد أثرت الموضوع لنعود أنفسنا على استخدام العربية ونتوقف عن استخدام مصطلحات أجنبية ما دمنا نتكلم مع بعض وليس مع أجانب..فما دامت المسألة مجرد عادة فنستطيع بقليل من التدريب أن نقلع عنها..