القاموس الفريد .. للعربي الجديد..

[zizetta]

القاموس الفريد للعربي الجديد ..

هو بعض حصيلة التأملات التخريفية أثناء الخلوة المنزلية ..

وقد تم إستدعاء الكوبانية لإلقاء الضوء على المهزلة دية ..

مع توجيه القصد والنية لتعديل استخدامات اللغة العربية..

فشاركوني بالرأي إنت وهو.. وهو وهي ..

أثناء رحلتي في جمع مادة القاموس اللي وعدتكم بيه قلت لنفسي يا بت يا زيزيتا ما تشركي إخوانك وأخواتك في المنتدي في الموضوع قبل ما يطلع للنور يمكن برضة يشوروا عليكي بشورة كده والا كده ويكون ليهم الأجر والثواب ..

وحيث أنني من قدماء المصريين شوية فقد صادفنتي بعض الكلمات الغريبة التي سمعتها خلال حياتي إما من بعض الأشخاص أو من التليفزيون أو من الشارع ... ألخ . وقد إستوقفتني هذه الكلمات التي أعتقد أنها لا تنتمي للعربية في شيء لذلك قررت أعرض بعضها علي سيادتكم لعلي أجد لها معني علي أساس يعني لو مالهاش معني يبقي نحذفها من حياتنا ونشوف الصح ..

سألت بنتي في بعض الكلمات وسألتها عن معانيها .. فما كان منها الا أن فغرت فاها وحملقت في بعينيها وإنتفخت أوداجها وقالت لي ايه ده يامامي الكلام ده انتي جايباه منين .. قلت في بالي دنا باين علي ست متخلفة اوي .. الواحد بقي لازم يبقي عصري شوية ويتعلم الكلام الجديد بتاع اليومين دول.. زي نفضله وطنشه وإحلقله وإشطات وطحن وفحت وآخر حاجة ووهم.. وما الي ذلك من كلمات القاموس الجديد اللي حفضاله بعدين ..

فياريت بقي اللي عنده كلمة (يلمها) :blink: قصدي يعني يضيفها أو يطلعنا عليها أو يفسرلنا المقصود تحقيقاً للهدف المنشود..

والتالي بعض الكلمات وأمثلة للإستخدامات.. لتقريب المعني ولم شمل الجيل اللي آت مع الجيل اللي فات.. وهيهات هيهات.. (تصدقوا إني إكتشفت دلوقتي إني عندي ملكة نظم القوافي وأنفع شاعرة )..

مأرفص : قاعد مأرفص يعني حاطط ركبه عند ذقنه بس برضة يعني إيه مأرفص .

مسخسخ : الواد مسخسخ علي روحه من الضحك يعني مغمن عليه من الضحك.

مظأطط : فرحان وبيتنطط من الفرحة

مظألط : يعني قلبوظة ( ودي كلمة تانية برضة)

مبألل : الواحد خلاص بطنه بأللت من كتر شرب المية.

بظابيظ : أنا النهاردة تعبت اوي في الشغل وطلع بظابيظ أهلي.

مكعبر : انا أتجوز ده .. ده شكله مكعبر.

مدوحس : صباعى مدوحس أو أنا حخلي نهارك مدوحس.

سفلئة : إيه يابا إنت كل حاجة كده عايزها سفلئة.

مأنتخ : يعني بيستهبل أو مريح قيمة كام سنة كده (أنتخوا أنتخوا أنتخوا .. تتر يتربي في عزو)

برطمة : أغسلي المواعين وانتي ساكتة يا بنت وبلاش برطمة.

أرديحي : هو كل يوم الأكل أرديحي (يعني مفيش لحمة)

زرابين : هو كده لما زرابينه بتطلع امشي من قدامه

مفيص : الواحد خلاص فيص من الحر.

طفاسة : ايه يابني هو انت مش لسه واكل والا هي طفاسة.

متآلط : ماله كده ماشي وهو متآلط علينا كده ليه

مرنخ : أهو طول النهار كده قاعد مرنخ في البيت

أبة : مع تشديد الباء - إسم لفتحة الفستان مثلا أي الراديكو أي الديكولتيه أي فتحة الرقبة.

يحرب : الواد عمال يحرب من الصبح علي مفاتيح العربية.

مدندش : إيه الفستان المدندش ده يافوفو.

مطأطأ : الواد توحة ده واد مطأطأ وحكاية .

مفندق : إيه الفستان المفندق ده يا ياللا غيريه بواحد حشمة شوية.

محن : وتقرأ موحن – ودي قالها اسماعيل ياسين في الآنسة حنفي لما قال موحنو .. الحقيقة الكلمة دي انا نفسي اعرفها انا فاهمة المقصود بها يعني الدلع الممزوج بالإستهبال.. أو الهبل الممزوج بالدلع..

براوة : أما براوة براوة آخر براوة شباك حبيبي يا عيني آخر طراوة .. ناقص تسقف للشباك علي شطارته في الطراوة

عفارم : عفارم عليك ابراهيم افندي

عترة : الواد ده مجدع وعترة

أبهة : ياسلام ايه الشقة الأبهة دي

مكعبل : كعبل الشيء يعني لخبطه أو علقه ( أنا ناوية أكعبل الواد ده)

عفش :بكسر العين والفاء - الراجل ده شكله عفش أوي

مدهول : إنت جيت يا مدهول (واحدة بتفتح الباب لجوزها)

مأنتك : ومالك كده مأنتك وعلي سنجة عشرة ( ودي برضة كلمة )

حمش : إيه انت حتعملي فيها حمش روح اتشطر علي حد غيري يا عينيه...

إتزرزر : هو انت كده مش طايق كلمة مني وعلي طول تتزرزر

هلفطة : هلفط بالكلام لأ بقولك ايه اقعد عوج واتكلم عدل

سح : أهئ .. أهو انت كل يوم كده تخليني أسح من عينية لما أقول يا بس .

مرمط : (في سرها ) والله لأخلي أبويا يمرمط بيك الأرض

ياريت الأستاذ/ خفيف الظل اللي فسر لنا معني اللبن واللحمة في موضوع الفطار التونسي البحت الفحت (الشحط المحط) يفسر لنا الكلمات أعلاه بس مش علي طريقته اللي خليتني أنا وبنتي (نفطس) من الضحك.

ملحوظة: لم يتم ترتيب الكلمات أبجدياً حيث أنه ولابد حتماً أن ترد الكلمة للمصدر.. لكن لما نلاقي المصدر أكيد حنرد له الكلمة ونبقي نعمل لهم حفلة صلح صغيرة كده ع الضيق بمناسبة إنه حيردها.. :)

كفاية كدة النهاردة علشان تعبت شوية .. المشروع الجديد هو: "التحفة السنية في هبل الأمثال الشعبية"

محسوبتكم زيزيتا

تم تعديل 18 أكتوبر 2007 بواسطة Folana

[miramar]

ايه ده يا مدام زيزيتا انت ناويالنا على ايه

انا سخسخت على روحي من الضحك

انا خايفة يحصلي حاجة بعد ما قريت موضوعك انت كنت فين من زمان

انت جاية هنا اعملي ايه ؟؟؟؟؟

بجد حضرتك بتشتغلي ايه ؟؟؟؟

عفارم : عفارم عليك ابراهيم افندي

عفارم دي كلمة تركي اصلا

والي هييجيبلك اصل الكلام دهه ارسي و الأستاذ سين سين

و ناس كتير هتلاقيهم مأنتخين على النت اليومين دول

النسر المصري بقه هو الي هيحيي الليلة قصدي هو الي هيجيب من الآخر

بجد ربنا يخليكي و صباحك إشطات

مرمر

[nash]

تصدقي يا زيزيتا كتبت رد طويل وطااااار واتقهرت.... :) :blink:

شوفي ياستي بالإضافه لهذا القاموس الجامع الوافي...فيه كام كلمه ...طرأوا علي بالي...

مهيس...الباشا شكله مهيس وعايز ينام....يعني بيقول ولا حاجه

مشحط... وسبق ذكرها من قبل....يابني لم بنطلونك اللي عماله يشحط في الارض أي جامع لكل كوناسه الشارع...

معتوة...وفي روايه أنها مشتقه من كلمه عته...اي ابله...أي ليس عليه حرج...شوفوا والنبي المعتوة ده بيقول أيه؟؟

مصرقع...الولد دماغه مصرقعه يا جماعه ...اي ضاربه...

منفض...أنت يابني منفضلنا كده ليه....يعني شايفهم وبيستهبل وعامل نفسه مش واخد باله....

...............................................................................

بجد شويه ووردز وديفينيشنز روعه ...وسينتينز أخر ألاجه...

كفايه كده لحسن تعبت وأنا بكتب ...وفي الأخر أتمسح.... :) :)

[رمضان]

الله يفتح عليكم اهو بكده اقدر اتكلم مع ولاد اختي

ولو ممكن كمان لغة الكارتون لان بصراحة كل الولاد في البيت عندنا بيتكلموا زي الكارتون

اين لغتنا الجميلة

[Folana]

السلام عليكم ورحمة الله...

ربنا يسعد قلبك يا مدام زيزيت...ضحكتينا ع الصبح...فعلا الكلمات دى بنسمعها دايما فى الافلام القديمة على لسان مارى منيب ودفعتها...وعمرنا مافكرنا فى معناها ولا اصلها....

بس ممكن نساهم مع حضرتك برضه فى البحث والتنقيب فى كلمات الماضى العجيب..

كلمة سخسخ :فى الزمخشرى يقال اننا لو اخدنا نصف الكلمة سخ..دى معناها أمعن فى الشىء..يعنى سخ المطر..يعنى انهمر بشدة..وبمضاعفة الحروف يبقى سخسخ من الضحك..يعنى أمعن فى الضحك وتمادى فيه..

عفارم دى تطلق على الاستحسان بفعل الشىء

أضيف كمان ..

بزرميط : ده انت خليت الموضوع بزرميط...ودى كلمة فرنساوى PIZZAR يعنى حاجة ملخبطة ومش متناسقة...وفى قول اخر (على لسان المدعوة لوسى فى أخيب كليباتها ) خلتها خل خالص..

أزعرينة:..المفروض انها مشتقة من كلمة أزعر..واعتقد انها بتطلق على خفيف الدم..واللى بيعمل هيصة كده فى وجوده..

ألسطة :كله ألسطة يازيزيت هانم ..يعنى كله تمام ودى كلمة انجليزية الاصل

متوغوش: دى اصلها متوجس خيفة...لكن عوامل الزمن والتعرية حولتها لمتوغوش

خرونج :معناها انه لا قيمة له..واصلها كان خارج المنافسة بس برضه عملت نيو لوك وبقت خرونج

كانى ومانى :لا تقولى كانى ولا مانى ولا دكان الزلابانى...( كده صح ؟) :)

فى الزمخشرى برضه بس واحد تانى غيراللى فوق...كانى يعنى السمن ومانى يعنى العسل بلغة الفرعونية القديمة

سبهللة :يمشى الرجل سبهللا يعنى يفضل رايح جاى بدون هدف ...

سُخام :..كل حاجة رديئة..وفى المعجم الوسيط يقولون سخم الله وجهه اى سوده

كفاية كده انا كمان..

صباحك جميل... :blink:

[nash]

ايه دكان الزلاباني دي ........لا يافولانه لازم توضحي.....ده يعني دكان بيبع زلابيه؟؟؟ :blink:

ياسلام يا ولاد....ده أحنا اللغه العاميه بتاعتنا دي جامده طحن ... :)

عايزين شويه كمان ... ها....نقول أستبينا؟؟

:)

[Folana]

السلام عليكم ورحمة الله ...

ننوشة العسولة...دكان الزلابانى دى اتفق عليها مفسرين اللغة فى الزمخشرى والمعجم الوسيط وكتاب القراءة الرشيدة بانها بالفعل دكان بتاع الزلابية ...ومادام فيه عسل وسمن يبقى ضرورى ومن كل بد يكون المقصود دكان بتاع الزلابية...

بس مش عارفة ايه اللى مجمعهم مع بعض...

وبالمناسبة أستبينا دى كلمة ايطالى بمعنى اتفقنا...

سح : أهئ .. أهو انت كل يوم كده تخليني أسح من عينية لما أقول يا بس

سح ؛العين السحاحة هى كثيرة الصب للدموع ..يعمى لغة عربية سليمة...يعنى تقدروا تقولوها فى الاماكن العامة عادى...:)

اعتقد ان كلمة سفلئة دى ممكن تكون تطور لكلمة سفل بمعنى دنىء وخسيس..يعنى عايش كده وش ...:) :blink:

:)

[نانو]

زيزيتا هاضيف القليل من المصطلحات الجديده و القليل من مصطلحاتك المذكوره اعلاه بوجهه نظر جديده :blink:

مبرشط :يعني هابط علينا بالبراشوط ...يعني يبقي الواحد قاعد في حاله لا بيه ولا عليه ويلاقي شخص غير مرغوب فيه جه وقعد معاه

وبرشط عليه

كبر : بتشديد الباء ....طبعا كلنا عارفنها وطول النهار بنكبر دماغنا مع عيالنا و جوزنا و شغلنا و حياتنا كلها

خنيق : يعني دمه تقيل ورخم

مسحلل : واضح انها مشتقه من سحليه إنما مقصود بيها انه رفيع وغلبان كده

مأنتخ : لما يبقي الواحد قاعد ممدد رجليه علي الكنبه وبيقرأ كتاب ظريف كده و فوق نافوخه أباجوره

مأرفص : بيتهيئلي مقرفص : يعني الواحد وهو قاعد يبقي شبهه القفص

استني يا فولانه يا اواختي بقي ....أنا تخصص أسباني وكلمه إستبينا أصلها اسباني ومعناها كله تمام

وبالمناسبه بقي كلمه عربيه كارو ...هيا برضه اصلها اسباني ومعناها العربيه اللي بيجرها حصان او حمار

[عصام أبوالفتح]

طب خدوا عندكم ( الشوية ) ( دولم )

افتكاس و مفتكس : يعنى اختراع ومخترع

هارش : يعنى فاهم اللعبة او فاهم ( الكوفت )

آرش ملحتى : بكسر الراء يعنى حاطننى فى دماغه

سبهللة : يعنى ( بزرميط ) يعنى فوضى

ممسمر : يعنى رفيع زى المسمار وزيها زى ( مسلوع )

موووووز : قالتها ياسمين عبد العزيز فى فيلم تمن دستة اشرار و هى تقابل موزة عند الرجال تقريبا

محفلط : يعنى كله مضبوط ومخلى كل شئ تمام ومية مية بحرص شديد

قشطه : تعنى اوكيه او اتفقنا

موحوح : يعنى قرب يعيط ويشحت من الغلب اللى هو فيه

مجنط : بتعطيش الجيم يعنى مفلس زى العربية اذا نزلت على الجنوط بدون هواء فى العجل مش هاتمشى

سأسأه : ودى فطست على روحى من الضحك لما اتعمل عليه حلقة فى طاش ومعناها ترطيب الجرح بالماء والقطن وهى مشتقة من سقى سقى بياء المد

مشعوف : يعنى ( مخضوض ) يعنى خائف من شئ

دوهل : يعنى أهبل وعبيط وبطئ الحركة و مدهول على عينه ده اسم المفعول منها

يسيأ : يعنى يسمح او يغسل

مقريف : يعنى قرفان و محنوق من اللى حواليه

مدأدأ : يعنى عارف كل حاجة وهى من الدق دقة فيه بمعنى كتر الخبطات والدق فيه علمه الكثير

منفسن : يعنى حقود على غيره وميحبش الخير لحد

مينبة يا معلمى مينبة : يعنى مربة يا معلمى مربة :blink:

الحقيقة الواحد ممكن يستحمل انه يسمع كلمتين ثلاثة من القاموس ده فى اليوم .. بس تكون كلها كده فى يوم واحد .. ابداعات العامية كلها على طول .. صعبة اوى

ينطبق على القاموس ده مقولة

عرفت الشر لا لاتباعه ولكن لتوخيه .... ومن لا يعرف الشر جهلاً منه يقع فيه

وهى بكل تاكيد مفردات مبتذلة اى بذل جهد فيها للفت الانتباه لها فقط بعيدا عن الموقف الفعلى

اخذا بنصيحة الواد الحدق اللى قال خدوهم بالصوت ليغلبوكم (((( ولم يقل بالحجة ))))

واحنا شعب مغناطيس للعادات ..... والكلمات

وبما انه مرت علينا شعوب الارض كلها فنلاقى كلام كتير جدا بالعامية

اصله لغة اجنبية

ومفرداتنا اليومية

هى خليط من لغات كل شعوب الكرة الارضية

[nash]

ياتري زيزيتا سايبانا نجيبلها باقي القاموس ليه.....أوعي يكون كمين ....ربنا يستر :blink:

علي العموم احنا مأنتخين هنا ومبسوطين علي الاخر وبناكل :)

أتصلت بإبنه صديقتي...والبنت ما أخدتش ثانيه كانت جايبالي ربع القاموس.......ومليتني دول...

سيكا... وقت قصير...اي برهه من الزمن...نروح نقعد سيكا سوي >>>ماليش دعوة هي اللي قالت... :)

فسل...بكسر الياء....يعني صغير سواء كائن أو شيء...مثلا الواد ده فسل.....مش عارفه كلمه (الواد ) معلقه ليه في دماغي...

أخوت... مشتقه من خوته....يخوت وهي عليها فتحتين....يعني متهور ___سيبك منه ده اخوت...

حظاظه...بيتهيألي دي بأة سهله موت...مشتقه من الحظ...فتله بتتلبس في المعصم علشان قال تجيب الحظ...جبتليش ليه حظاظتي؟؟

بيشتغلني او بتشتغليني ...ودي طبعا برضه سهله ميه....مشتقه من إشتغاله...علي وزن إستبانه....خير يا بابا أنت هاتشتغلني؟؟؟

........................................................................................

علي موعد باللقاء مع قاموس زيزيتا الناطق... :)

فوفو بيتهيألي سفلئه جايه من يتسفلأ يعني يعيش طفيلي علي شخص طيب جدا لدرجه ....ربنا بأة يعينه... :blink:

تم تعديل 18 أكتوبر 2007 بواسطة nash

[miramar]

في كلمة بقى عايزة اعرف اصلها

مزة ؟؟؟؟؟

اصلها ايه الكلمة دي منين جت يعني

و اليومين دول زي ما قال الأستاذ عصام طلعت لنا كلمت مز

ايه اصل الكلام ده بقى ؟؟؟؟

مرمر

[nash]

أخي الكريم عصام....مقال رائع...

ممكن حضرتك فضلا تظلل الكلمات الجديدة باي لون...حتي لا تتوة في قلب المقال؟؟

....................................................................

علي فكرة وأظن أغلبنا يعرف هذه المعلومه....ايضا بأمريكا يوميا تظهر من حوالي 20 إلي 40 كلمه جديده....وكلها لغه لا يفهمها حتي الأمريكيين نفسهم...

القاموس شكله هايكبر جدا...انا كنت فاكرة كبيرة 50 كلمه ولا حاجه.... md2:

[إبن مصر]

فى محاوله منا لاثراء مفردات اللغه الحلمنتيشى فى الافاظ الى مبتجيشى ..

هاحاول اديف ادافه للقاموس الجديد لاكسبرشنز العقد الفريد..

ونبدأ بحرف الألف.. نوالى الحروف تباعا اذا كان هناك مقاومه منكم تسمح بتحمل باقى الحروف......

استعنا على الشقا بالله:

من الالف الى الياء

(أ)

(1) أستمورننج

لفظ يقال في الصباح بغرض تناول الطعام أو التدخين ، أو شرب الشاى حتى يفيق الشاب من نعاسه ، مثل " هاروح اعمل أستمورننج علي القهوة وجاى "

(2) الأبلتين لدع في دهاليز الحياة

عبارة تدل علي الخواء أو الفوضى في الحياة ، وغالباً ما تأتى بقصد الفلس

(3) أعمل دماغ

عبارة مشهورة لدى المدخنين ويقصد بها ضبط الحاله المزاجية عند المدخن

(4) أديها جاز

عبارة تقال في مواقف المشاحنات بين الأصدقاء لزيادة حدة المشاجرة ، مثل " أدى الخناقة جاز علشان تولع أو شعللها " سواء بالكلمات أو توجية اللوم لأحد المتشاجرين لكى يثور علي الاخر

(5) أختفى شوية

أى لا تجعل أحد يراك هنا أو أبعد الآن أو أمشى من هنا ، مثل " عاوزك تختفى شوية لحد ما الحياة تعدى " أى لا تظهر نفسك حتى تنتهى المشاكل . أو " أختفى من أمامى الأن .. أى أمشى وأترك المكان لأنى لا أريد رؤيتك

(6) أيه النظام

عبارة بمعنى أيه الموضوع ، ولقد أستغلت الكلمة في أحد إعلانات الموبيل فى نظام كروت الشحن و العبارة تدخل في العديد من الأحداث التى يتسائل فيه الشاب عن الأحداث الجديدة ، مثل " أيه النظام .. النظام في العظام " والعبارة الاخيرة تفيد الأعتراض علي الإجابة بإسلوب فيه عبط وإستهبال

-7- أليط

لفظ بمعنى المتكبر ، الذى يتعامل مع الأخرين بأسلوب فيه تعالى او ينظر الى الاخرين نظره دونية متعجرفة

(8) another stone

وتعنى بالروشنة " حجر أخر لشاربى الشيشة على المقاهى "

(9) أتشبح

مصطلح بمعنى الضرب لدرجة التعذيب ، وتقال "شبحته " أى أعتديت علية بالضرب المبرح

(10) إتم

والأتامه حسب تعريف الروشنه تعنى الغلاسه والرخامه والتناحه ، وجميع الصفات السيئة التى قد يتصف بها شاب معين .. ويقولون " الإتم جه " أى استعدو لتحمل السماجه التى سوف تظهر من هذا الشاب

(11) أزبهل

لفظ يدل علي الزهول الشديد ويقال " انت مزبهل كده ليه " أى مندهش لدرجة العبط

(12) إحلق

وهو لفظ لا يعنى الذهاب الى الحلاق لقص الشعر ولكنه يفيد تجاهل الغير مثل " أحلق له " أى لا تفكر فيما يقول فهو لا يستحق

(13) أتوبيس راجع بضهره

عبارة يقولها الشباب علي الفتاه الغير جميلة ولها لدى الشباب اسماء اخرى ، مثل " زى الكره الكفر " أو " صب حته واحده "

(14) أعلمه

وهذا مصطلح يعنى التشوية في جزء من الوجه بآله حاده ، مثلما أراد الفنان محمد سعد في فيلم الناظر مع النجم علاء ولى الدين " أعلمك بمطوه يا ابو صلاح ده ختم الصياعه "

(15) أنش

لفظ مختصر لاسم " انشراح الخباثة " وهى شخصية خيالية تعنى الشخصية الساذجة الى درجه الهبل

(16) أملئ التنك

عبارة بمعنى اريد ان اكل لان معدتى خاوية والتنك هنا بمعنى المعده ، أما البنزين او السولار الذى يملأ التنك هنا فهو الطعام

(17) أمبلايز

مصطلح بمعنى " في القشوش " اى ان الموضوع الذى سعيت من أجله لم يتم ، او تعبت علي الفاضى ، وتقال " الحياة في الامبلايز " اى ان الحياة خربانة وفاشلة

(18) أشاعاتى

الشخص القادر علي اصدار الشائعات بمعدل 50 أشاعه / ثانية ، رغبة في التشهير بالاخرين وايهام الغير بالسوء

(19) أبجنى تجدنى

عبارة تعنى " انا يمكن شرائى بالمال " او اعطنى المال لكى انفذ كل ما تطلبة ، وغالباً ما يقولها الموظفين المرتشين او الشاب الذى لا يهمه إلا مصلحته دون الأخرين

(20) أنجز بالونجز

كل المشاكل التى تقابلها لها حل سريع وحاسم ما دمت تدفع المقابل ، والونجز يقولون انها كانت نوع من انواع السجائر قديماً ، لكنها تطلق هنا علي النقود لانها حلالة العقد وسريعة التأثير في انهاء المصالح المتوقفه

(21) أستك

مصطلح يعرفه التجار ويعنى الألف جنية

(22) أرنب

مصطلح شعبى بمعنى مليون جنية .... ويقسمه التجار ورجال الاعمال مثل " نصف أرنب " أى نصف مليون جنية والربع أرنب يعنى الربع مليون جنية اما الورك ارنب فهو المائة الف جنية

(23) أخلع دلوقتى

عبارة تقال كأعلان لرغبتك في رحيل شخصاً ما ، أنهيت الحديث معه ، مثل " أخلع دلوقتى ورايا شغل " أى امشى الان ونتكلم مره اخرى فلدى ما اهتم به غيرك

(24) أتزرع هنا

بمعنى أنتظر هنا ولا تتحرك مثل أى جماد أو شجره وتقال " إتزرع هنا لحد ماجى تانى " أى لا تترك مكانك أو موقعك حتى أعود إليك مهما كانت الأسباب

(25) أعلن فرارى

عبارة بمعنى انوى الإنسحاب من الجلسه او الموقف الذى اعاصره ، وتقال " اسف " انا هأعلن فرارى اى انا ماشى او لن انضم اليكم في الحديث

(26) أتارى

مصطلح يطلق علي السيارات الخفيفة ، لانها تشبه السيارات في العاب الفيديو جيم او الاتارى ، مثل " سياره الشرطه " ويقولوها المدمنين " اجرى يالا عربية الاتارى جاية "

(27) أيه الحياة ؟

سؤال بمعنى ماذا حدث اليوم ، ما هو الجديد في الدنيا .. ما هى اخر الاخبار وكل الاسئلة علي الوضع الحالى

(28) أخلع فرد

عباره مأخوذه من لسان شاب جزمجى ، وتفيد معنى ان من نتكلم عنه قادم

(29) أحنا اللى بهيظنا الفهايص

عباره يطلقها قائد شله الفساد افتخارا بنفسه ومعناها " انا اللى جعلت الجميع يغيب عن الوعى "

(30) أبو الغضب

اسم يفيد معنى الشر او ان هناك نية مبيته بالايذاء ، ويقال اسم ابو الغضب في وشه اى ناوى علي الشر ، اما " ابو الغضب " نفسه فهو شخصية كارتونية شريرة ظهرت في حلقات ( مازنجر ) وعلي غرار المعنى يقال شبية أبو لهب او شبية أبرهه الاشرم وكلها شخصيات شريره

(31) أوزى

لفظ يطلق علي الفتيات الصغيرات الجميلات في المدارس الثانوية والإعدادية وشابه ذلك

(32) أنتر

مصطلح مشتق من الكلمه الانجليزية Enter وهو زر إدخال البيانات في الكمبيوتر ولكنه يأتى بمعنى " لا يعيش له سر او فاضح لاسرار الاخرين " او لديه استعداد للاستدراج في الحديث

(33) أيه البواخه ديه

عبارة بمعنى " ليه الرزاله " والعباره غالباً ما تصدر من الفتيات عندما يعاكسهن الشباب في الشوارع او في محطات المترو

(34) أدعك الفانوس

عبارة بمعنى أختفى الان ، انصرف ، لقد اتممت مهمتك او قلت ما تريد .. مثال " ادعك الفانوس دلوقتى " اى احل بدون ان يراك احد

(35) أنزل من ع المسرح يا نجم

عبارة تقال لشخص يتدخل فيما لا يعنية ويقصد بها " ده مش دورك " اى ليس لك دخل بالموضوع

(36) إنسانى وخد عنوانى

عبارة تفيد عدم المشاركة في اى احداث قادمة او معاصره لموقف معين ، مثل " تحب تروح السيما ؟ لا .. انسانى وخد عنوانى ،،، اى لا اريد الذهاب لاى مكان او جاء ميعاد انصرافى وسوف تجدونى وقت الحاجه مره اخرى

(37) أنف

الشخص المتكبر المغرور الذى لا يتعامل ببساطه مع الاخرين ، بل ينظر اليهم نظره دونية

(38) أهرش

لفظ يفيد " طلع اللى في جيبك " او ادفع لى حتى اقوم بما تريد من خدمه وتقال ايضاً " اهرشنى " اى اعطنى نقوداً في السر او في العلانية

(39) أنزل من علي ودنى

عبارة بمعنى " ابتعد عنى " او انك انسان ثرثار كثير الكلام او " ارحم دماغى " صدعتنى

(40) أوكشه

وهى الفتاه الباهره الجمال او التى تستحق ان يطلق عليها كله " أنثى "

(41) أنتخ

لفظ بمعنى جلس بدون هدف ينتظر الفرج حتى يأتى له ، مثال " انت ها تقعد مأنتخ من غير شغل كتير " والمقوله يردد مثلها الاباء كثيرا للابناء الجالسين بلا عمل بعد التخرج ومعناها ابحث لك عن عمل بدلا من الجلوس الممل لانى لا انوى الاستمرار في منحك مصروف

(42) أشتغله

اى اكله البلوظه او اكذب عليه او اخدعه او استهبل عليه وتقال " انت بتشتغلنى "

(43) أينح

لفظ يدل علي الشخص الذى يجلس في استرخاء وهدوء بدون عمل ويقال " انت مأينح ليه " اى ما هو الشئ الذى تنتظره حتى تحقق ذاتك وتبحث لك عن هدف

(44) أوجو

مصطلح يطلق علي الفتاه التى تخضع لتأثير الشباب بسهوله ، او ذات العلاقات المتعدده مع الجنس الاخر

(45) أدرجى

لفظ يطلق علي محترف الصياعه او " لافف " ويقال انت شاب أدرجى في السوق ، اى بارع في التجارة وتفهم الكثير من خبايا الامور واحيانا تقال للشاب ذات العلاقات النسائية المتعددة

(46) أيحه

لفظ يطلق علي شخصاً ما هو التركيبة السرية لماده البخل او الذى لا يهون عليه صرف مليم

(47) أشايك

مصطلح يفيد التهديد والوعيد بزياده صعوبه العمل والتعب فيه وتقال في حاله غضب الرؤساء من الموظفين الصغر

(48) أرحلك

إنظار صريح بالطرد او النفى ، وسوف اعيدك من حيث اتيت وتقال حينما يخطئ الشاب في من هو اقوى منه مهنياً او قائد المعسكر لشباب في الرحلات

(49) أنت هركليز

عبارة استخفاف تقال للشاب الذى يرى نفسه بطل او المتظاهر بالقوه

(50) أرقدلك

تهديد صريح بالشر ، والترقيد هى النية المبيتة بالشر او الإيذاء

(51) اقعدلى في حته ناشفه

جملة سخرية توجه للشاب الاهبل او الذى يخطئ في الكلام كالأطفال حين يتبولون علي انفسهم علي اعتبار ان الشباب والرجال لا يخطئون ولديهم تحكم ذاتى بالنفس ( الحمام يعنى )

(52) أحط عليك

عبارة لها العديد من الاستخدامات ، فأحياناً تفيد الاستقصاء او نية الايذاء احط عليك في الشغل اى سوف اتصيد اخطاءك حتى اعاقبك واحياناً تقال بمعنى الزياره مثال " هحط عليك بكره " اى سوف ازورك غداً

(53) انت من الكفار

عبارة بمعنى " انت من الاعداء " أى الذى كفر بمبادئ الشله وعهودها والتزاماتها الوشنية ، مثال " مش جاى الديسكو النهارده ؟ فيقول لا .. فيردوا عليه ويقولوا - انت بقيت من الكفار اى المنشقين عنا

(54) أفتكس

كلمه تعنى القدرة علي الاختراع او التأليف في مجالات الحياه المتعدده التى تتسم بطابع العبط والاستظراف مثل " ايه اخر افتكاساتك يا عم ،، اى ما هى اخر اختراعاتك في الحياه

(55) إستوك .. بيتوك

مصطلح يطلق علي الفتاه الجميلة ، وهذا اللفظ يتشابة مع اللفظ الذى ورد في الاغنية الشهيره التى تقول " أيه الأستوك ده ... اللى مش بيتوك ده " اى التى تسير بدلع ودلال أنثوى ليس له مثيل

(56) أستكانيس

لفظ يدل علي الراحه والرفاهيه والمتعه وتقال " انا مستكانيس كده " اى انا مرتاح جداً بهذه الطريقه

__________________

منقول

[إبن مصر]

والان الى حرف الباء...

1) بيرمى ودن

عبارة بمعنى انه يتصنت علي شئون غيره بتوجيه الردار بالأذن ، لاثنين يتحدثون سراً لكى يفسر الكلام الهامس

(2) بكابورت

صفة تطلق علي الروائح الكريهه الصادرة من اسلوب كلام شخص ما وهى دليل دامغ علي ان هذا الشخص مقزز لدرجة خيالية مثل " بكابورت وانفتح "

(3) بخ

تأتى بمعنى أن شئ ما أنتهى وغالباً ما تأتى في جمله " بخ خلاص كان موجود وخلص " اى ان ما ترغب فيه لم يعد متاح الان

(4) بعته

لفظ بمعنى " اخدعة " او اكذب عليه حتى تضحك من تصرفاته مثل " روح يا شيخ .... وتعالى بسرعه "

(5) ببخظه وعرانيسة

عبارة تدل علي جوده النبات ( المخدرات )

(6) بشلة

علامة على الوجه ، ناتجة عن المشاجرات واحياناً تدل علي ان الشخص الذى تشوه وجهه " بلطجى أرارى " اى معتاد علي اعمال البلطجه

-7- بونتى

نداء يوجه لشخص ، يقصد منه " فرد العضلات " او الاستهزاء بقدراته واحياناً يقال لصديق او رفيق حديث العهد بالشلة

(8) باكس

مصطلح بمعنى الخايب ... العبيط .... الذى يمكن خداعه بسهوله " يا باكس " نداء بغرض الاستهزاء بالشخص الموجه اليه النداء ويجهله الجميع

(9) باشكا

مصطلح بمعنى ألعب بأوراق مكشوفه ، او بطريقه واضحه وغالباً ما يستخدم اللفظ في الكوتشينه ويقال العب باشكا اى العب ع المكشوف

(10) باترينا

لفظ يطلق علي الشاب او الفتاة التى ترتدى نضاره

(11) بلبع

لفظ يطلق علي الشخص الساهى والغير ثابت وموزون في تصرفاته فيقال انت مبلبع ايه ، ويقصد انه مدمن مخدرات لعدم اتزانه

(12) بروبجندا

مصطلح بمعنى التشهير ويقال " عاملى بروبجندا " اى جامع الناس حولك وتفضح اسرارى ، والكلمه انجليزية في الاساس بمعنى دعاية ( تشريد )

(13) بتهوبص

لفظ بمعنى " يستعبط " اى تتظاهر بالغباء وانت اعلم الناس وتقال " انت بتهوبص علينا " اى بتكذب او عامل فيها عبيط

(14) بيظيط

لفظ بمعنى النطق بكلام فارغ .. والشخص الظايط هو المعتوه الذى يردد كلام لا يفهمه او يفهمه غيره مثل عبيط القريه وتقال " ما تظيطش يا عم علينا " او " كفاية تظريط " اى لا تدوش دماغنا بكلام فارغ . وتأتى كلمه " ظيطه " ايضاً بمعنى دوشه او همجية في التعامل

(15) بتخبط في الحلل

عبارة بمعنى " انك تفضح سرى وذلك يسبب لى اهانه " وتقال العباره عندما يسب شاب صديقه فيرد عليه ويقول له " لاء متلعبش معايا الدنيئة ومنخبطش في الحلل مع بعض "

(16) بنت في الزيف

عبارة تطلق علي الفتاة الجميلة وفى الزيف تعنى في الجون اى ذات جمال خارق تستحق عليه كلمات الثناء والاعجاب

(17) برطعه

لفظ بمعنى " أكل ومرعى وقله صنعه " اى يسير في الحياه بدون هدف او غايه وتقال " ماشى في الحياة بيبرطع " اى بلا افكرا محددة بشكل منظم او يعيش بعشوائية او يعيش عاله علي الاخرين

(18) بأف

وهو الشخص قليل الفهم او الاستيعاب والذى يتصرف بعفويه نادره لا تخرج حتى من حيوان اليف

(19) بيجيب لورا

عبارة يقولها شاب لصديقه عندما يتراجع شاب في شلته عن موقفه الذى ايده ، والتراجع نتيجه ضغط او اعاده تفكير في الوضع الحالى

(20) بلط

وهو الشاب الذى يحتوى علي المادة السحرية التى تصنع منها الرخامه " الغتاته " والشاب البلط هو المركز الرئيسي او التوكيل الرسمى لهذه الماده السحريه

(21) بونو

لفظ بمعنى حلو او جميل في اللغه الايطالية

(22) بلدى

لفظ يطلقة المجندين في الجيش علي اصدقائهم في نفس القريه مثل لفظ " بلدياتى "

(23) بستف

وهى الاهانه لدرجة المسخره " مسخر بكرامته الارض " او بستف فلان ، اى وجهت اليه كلام لوم شديد اللهجه على غلطته

(24) بؤله

لفظ بمعنى الموضوع وتقال " البؤلة دي بتاعتى " اى ان هذا الموضوع اهتم به فهو شخصى

__________________

منقول من أكثر من موقع محترم

[DARWEEN]

حنجله : لما يكون الواحد(ه) مش عارف هو عاوز أيه

تهييس : لما يكون الواحد(ه) فارغ من الداخل ويدعي غير هذا

داركره : لما يكون الواحد (ه) عايش في الظلام .. ظلام العقل وظلام القلب

هنكره : لما يكون الواحد(ه) بيلعب على كله

سنكحه : لما يكون الواحد(ه) ملقح جتته على غيره

تمحيك : لما يكون الواحد(ه) بيتلزق في غيره

[إبن مصر]

تم نقل المداخلات لهذا الموضوع مناقاشات جاده حول لغه الشباب حيث أنها مناقشات راقيه تستحق أن تورد فى موضوع مستقل فى باب الموضوعات الجاده ليكون لكل مقام مقال .ونستفيد من اراء اخواننا الافاضل فى هذا الموضوع.

شكرا لتعاونكمز

الاداره

احمد محمود

[se_ Elsyed]

الفاضلة زيزيتا ..

من الواضح إنك كنتي مسافرة بره وبالتالي ماعرفتيش إن المصطلحات دي إتلغت من سنة 92

وهي مقارنة بالمصطلحات الحالية تعتبر لغة فُصحى من بتاعت الزمخشري والبُحتري كمان ...

إستني عليه بس ألين من فترة الركود اللي كنت فيها وأتحفك بكام حاجه أطرى من طراطير الطراوه ...

[Lembic]

متنفخ - مضروب لحد الورم

مزمزء - متردد وممتعض

متنك - (شدة فوق التاء و النون) مشدود وفاكر نفسه شيك أوى - مالو ماشى متنك كده ليه!؟

منفوخ - (المرادف القديم لمخنوق ) ويمكن أن تحل محلها مفقوع

مسنتح - رفيع وهزيل جدا - واد مسنتح ميستحملش نفخة

بالمناسبة فى حد عارف مسطلح (حشبرقك) أصله منين؟

تم تعديل 21 أكتوبر 2007 بواسطة Lembic

[Ahmad Farahat]

الفاضلة زيزيتا ..

من الواضح إنك كنتي مسافرة بره وبالتالي ماعرفتيش إن المصطلحات دي إتلغت من سنة 92 :blink:

وهي مقارنة بالمصطلحات الحالية تعتبر لغة فُصحى من بتاعت الزمخشري والبُحتري كمان ...

إستني عليه بس ألين من فترة الركود اللي كنت فيها وأتحفك بكام حاجه أطرى من طراطير الطراوه ...

مش كده والنبي يا ريس

دي لغة فصحى اللي بيتكلموها دي

يلا ربنا يوفقكم

ده منير البعلبكي هيشحت السنة الجاية كده

[المصرى اوى]

مساكم هنا وسعادة

على فكرة يمكن احب اوضح رأى ولكم حق نقضة

المصطلحات اللى انتو مندهشين منها هى دورة حياة

نجيب الريحانى فى افلامة ومسرحياتة من 60 سنة اخترع معانى وجمل رددها الناس فى الوقت دة

ما بالكم بالثورة الرهيبة فى الاتصالات00اللى تخلى الكلمة تنتشر فى فيمتو ثانية

بعض الاخوة راى ان التعرض للكلام الجديد لشباب اليوم (ما يصحش)!!!عشان عيب وولادنا مايسمعهوش!!!

وطبعا دة راى متحجر غريب فانا اكبر اولادى قارب العشرين وانا مقتنع تماما انة لا حيلبس زيى ولا حيتكلم زيي ولا حيفكر زيي

نفس اللى اللى كان مع والدى رحمة الله علية!!

رجع مرجوعنا وندعبس تانى فى العربية المصرية المتخفية

اللى بنقولها ونرردها كل يوم

فلاتى---من المنفلت الذى لا يتحكم يغرائزة ومشاعرة والاصل فلت اى فر فهو منفلت انفلاتا ويوصف بها من يجرى وراء غريزتة

زيطة---اى هرج ومرج وبولييكة وتأتى من زاط اى سر وانشرح

زمبليطة--تكملة لزيطة وقيلت من اربعون سنة فى فيلم لقريد الاطرش (الزمبليطة فى الصالون)

منسون---مشتقة من نساء وهو الرجل المتشبة بالنساء

مهفهف---لانتشار الروائح الطيبة فقط

عقدة--- الواد دة عقدة بمعنى حلال العقد الذى لاتقف امامة معضلة

جدع---لفظ مصرى قديم صفة للرجل الشهم القوى الكريم و يقال ان اصلها عبرى

لايص---اى متشتت تائة لا يستطيع التصرف

أروب-أروبة---الانسان الحاذق الماهرواصلها أريب وهو الحكيم من يؤخذ برأيه ونصيحته

بق---وهو الفم بالعربية وتطلق على الشخص كثير الكلام قليل الافعال

معبى منة---اى يضمر له شرا فى نفسة حتى امتلأت

حدق--- وهى من الحذاقة والاتقان وتطلق على الانسان الذكى الاريب

مزجنجى---من المزاج وهو الانسان صاحب الميل للكيوف وخلافه

كييف--- وليس لها علاقة بالكيف ما شابة انما تطلق بمعنى يحب حبا شديدا كما يقال كييف سماع أغانى

نحياتى واحتراماتى

تم تعديل 21 أكتوبر 2007 بواسطة المصرى اوى