القاموس الفريد .. للعربي الجديد..

[Lembic]

ياريت لو فى حد متخصص فى علوم اللغة أو تطور اللغة ويشرح مصادر هذه التعبيرات - بس ياريت نترك الكلام الناتج عن الافلام والمسلسلات زى مفيص ومتنح واهطل وماشابه. على حد علمى بعض الكلمات أصلها عبرى ويعض من أصل تركى والحديث من أصل فرنسى أو إنجليزى.

عفارم - شاويش - تمغة- تركى

كازوزه - عبرى

كابالم (couples)

ماكانه - ماكينة (Machine)

باكابورت - backport و احتمال backup port

ولو حد ممكن يساعد ياريت

[Folana]

السلام عليكم ورحمة الله...

ليمبك كتب:

بالمناسبة فى حد عارف مسطلح (حشبرقك) أصله منين؟

شبرقة :فى الوسيط بمعنى قطعه ومزقه...يقال شبرق الثوب او شبرق اللحم.....ولحم شبارق بمعنى مطبوخ الوانا...

وشبرقه فى العامية بمعنى التنزه وانفاق النقود والتمتع بالحياة بشكل عام.

زيطة وزمبليطة : زاط بمعنى صاح..وزاط الناس اى اختلطت اصواتهم...والزياط هو الجرس الصغير (الجلجل)...يبقى نستنتج من كده ان الزيطة هلى الجلبة واختلاط الاصوات ...- ده فى الوسيط

والمعنى فى العامية بتستخدم بمعنى اختلاط الاصوات والفوضى

زمبليطة :..كلمة تركية بمعنى ضجة وهيصة وفى العامية بيقصد بها الاصوات الناتجة عن المرح والابتهاج

بيقابلهم بنفس المعنى ..

كلمة باللو : بنقول ايه انت جاى تعمل باللو ..(مش بيقولوا كده؟)

هى كلمة ايطالية بمعنى سهرة او رقص او مرقص...

وفى العامية يوصف بها مكان كله ضجيج وصوت عالى او وصف شخص مزعج

فيه كمان غاغة :

الغوغاء هى الجراد حين يخف للطيران...وايضا الصوت والجلبة...لغط الناس وصياحهم..

وفى العامية هى احداث ضوضاء وفوضى وخروج عن النظام ...

حاوديك طوكر..او حيروح فى طوكر..:

طوكر : ميناء جنوب بور سودان...وكان مكان لنقل الموظفين المشاغبين لما كانت مصر تحت الاحتلال البريطانى...

يبقى المعنى يفيد بانها عبارة تهديد بمعنى النفى الى اقصى الارض ...وطبعا وقتها كان صعب الانتقال والسفر...

بلطجى :...بلطة فى التركية يعنى فأس والبلطجى هو حامل الفأس او حامل البلطة...لان (جى) فى التركية تفيد اسم الفاعل زى مثلا بوهيجى..عصبجى...

والبلطجية كانوا بيمشيوا قدام العساكر يقطعوا الاشجار ويسهلوا الطريق باستخدام البلطة ..وكانوا عساكر ايضا

وفى العامية البلطجى يعنى الفتوة اللى بيعتمد على قوته ودراعه فى الحصول على المال ....

برطع:..فى المعجم الحديث ذكر لفظ سرطع سرطعة..اى عدا عدوا شديدا من فزع...ومن الممكن ان يكون برطع محرفة عن سرطع

وفى العامية برطع هى صفة للاندفاع الطائش او الاهوج..

برطم:..برطم فلان يعنى انتفخ وادلى بشفتيه من الغضب...وفى العامية بمعنى غضب وفضل يكلم نفسه بصوت غير مسموع

الهىء والمىء:..تعبير شعبى بمعنى الاستهتار والخلاعة...كان بيستخدم فى اوائل القرن العشرين وكانوا بيغنوا به فى بعض الاغنيات الفاضحة واللى كانت منتشرة فى ذلك الوقت...

زى اغنية لمطربة اسمها رتيبة أحمد بتقول فى مقدمتها

الهىء والمىء فى الدهبية...حبيبى جانى الليلة دى...الى اخره

وتعبير الهىء المىء له شبيه فى اللغة التركية بمعنى التهرب من العمل بحجج واهية او الاجابة عن اسئلة باجوبة ملتوية وغير واضحة hic mic etmek

الكلام ده ياجماعة قرأته فى كتاب بعنوان (معجم فرج) للعامية المصرية ..

وان شاء الله اجيب لكم قرار كلمات تانية...واولهم كلمة قرار نفسها.. :blink:

صباحكم جميل............. :blush2:

[MZohairy]

حد يعرف يا جماعه ايه اصل كلمة كويس؟

ازيك يا فلان؟

الحمد لله كويس

جت منين دي بقى؟ :blush2:

[Folana]

حد يعرف يا جماعه ايه اصل كلمة كويس؟

ازيك يا فلان؟

الحمد لله كويس

جت منين دي بقى؟ :blush2:

السلام عليكم ورحمة الله..

أصل كلمة كويس..وبالرجوع الى قاموس رد العامى الى الفصيح..نجد ان كويس تصغير لكلمة "كَيْس"...وهى تقال لكل شىء حسن وظريف

كويس كده؟؟

[مسالم]

السلام عليكم ورحمة الله وبركاته

تُعتبرُ كلمة (مَبْـروك) من التهاني المتداولة الشائعة بيننا، ونقصد بها الدعاء ..

بالبركة والنّماء عند المناسبات السارّة .والسعيدة ..

لكنّ الصحيـحَ من جهة اللّغة أن نقول (مُبـارك) أو (بالبَـرَكة) أو (بارك الله لك أو فيك أو عليك) ..

ونحوها من صيغ التبريكات الصحيحة لغةً وشرعاً، والتي تعني الدعاء بالنّماء والزّيادة .

أما (مَبـْروك) فإنها مشتقّة من بَرَكَ البعير يَبْرُكُ بُروكاً أي : استناخَ البعير وأقامَ وثبَتَ .

فقولنا لشخص (مَبـْروك) يعني : بَرَك عليك البعير واستقرّ وثَبَتَ ، لأنه اسم مفعول من بَرَكَ .

فهذه العبارة في الحقيقة دعاءٌ على الشخص لا دعاءٌ لـه،

فالاختلاف في المعنى واضح للعيان وضوح الشمس

فهذه دعوة للجميع لتصحيح المفردات التي ننطق بها

وان نعود الى لغتنا الجميلة التي كرمها الله على باقي اللغات

منـــــــــــقــــــــــوووووووووووووووووووووول

تم تعديل 11 ديسمبر 2007 بواسطة مسالم

[zizetta]

كويس خالص اللي بيحصل من ورايا في الموضوع بتاعي ده...

لقيتي فين عم فرج ده يا مدام فولانة ؟..

طيب وحياتك تسأليهولنا عن بعض العبارات اللي مضيأني شوية لأني مش عارفة يعني ايه ..

فعلي سبيل المثال أشعر كأن فيه حديقة حيوانات جوانا والأمثلة التالية تدل علي ذلك :

الواحد عصافير بطنه بتصوصو

مالك قاعد مقنفد كده ليه

لو حد كلمني حبخ فيه

مش عارفة تنشر الغسيل أصلها مأسدة ..

ده طير برج من نافوخي

انا عقلي زقزق وحرجع في كلامي

سيبك منه ده عقله كله دبابير

ده عامل زي أبو قردان ( هو ماله أبو قردان يا جماعة؟)

إتبطي واقعدي في البيت مفيش خروج النهاردة

الشيطان وز له

الكتكوتة دي اسمها ايه

وأخرى مثل:

ده ما بيردش علي حد باين عليه بالع له كوزين نشا

عمال يور من الصبح ما إستريحش ولا دقيقة

أنا داخل أكوع شوية

أشكركم

زيزيتا

[zizetta]

فهذه دعوة للجميع ان لتصحيح المفردات التي ننطق بها

وان نعود الى لغتنا الجميلة التي كرمها الله على باقي اللغات

الله يبارك فيك وعليك يا أستاذ مسالم .. هذا ما كنت أعنيه من الموضوع بالفعل .. فإذا تأملنا أصل الكلمات من خلال ذلك الموضوع سنجد أن معظمها تركي أو ايطالي أو حتى تايواني .. المهم انها مش عربي .. أنا بيتهيألي لو تحدثنا بالعربية الأصلية سنتحدث وقتها باللغة العربية الفصحي .. ياريت فعلا نرجع لغتنا الأصلية .. لغتنا اللي نفسي ترجع تاني جميلة.

لك تحياتي دائماً

زيزيتا

[قاهرى]

من يومين بكلم واحد صحبى فى مصر لقيتو بيقولى (مناطر ريسه)

انا مفهمتوش فى الاول بصراحة بس بعد كدة عرفت معناها وحبيت اضيف الكلمة فى القاموس بتاعكم علشان لو حد سمع الكلمة دى

والمقصود بيها هى ( انظر لنفسك باء يا ريس) او بمعنى اخر ( نفض باء لنفسك يا معلم)

مناطر باء

قاهــــــــــــرى

[Folana]

السلام عليكم ورحمة الله....

مدام زيزيتا...انت بتحطى لى العقدة فى المنشار

استنى بس حاقولك حاجة حلوة ..(غيربسبوسة)..

العقدة فى المنشار...العقدة فى الخشب هى مكان تفرع الغصن من جسم الشجرة....وعند قطع الشجرة بتكون العقدة دى زى الزلطة ...والمنشار لا يقطع فيها بسهولة....وممكن تنفلت وتقع من مكانها تاركة خلفها فراغ يعمل مشكلة للنجار ....وبالتالى فهو يتجنب قطع الخشب من عند العقدة

وحط العقدة فى المنشار تعبير شعبى ويعنى وضع العراقيل او خلق المشاكل والرغبة فى عدم التفاهم ...

مطيباتى:...كان هناك بائعو لب يسمون المطيباتية ..وكل وظيفتهم انهم يقولوا للمغنى الله ياسيدى..أعد كمان وحياة والدك..وحاجات كده...وممكن ان يكون لهم دور اخر فى ان يكونوا رسلا بين الالاتية والسميّعة فى طلب ادوار خاصة..او لتوصيل رسائل من نوع خاص...

وفى التعبير الشائع مطيباتى يعنى انسان سلبى يكتفى بابداء الاعجاب والاستحسان فقط....تبقى كده صفة سيئة جدا اذا اطلقت على احد...

معلش:...كلمة عامية اختصار جملة (ماعلى...من شىء) ومعناها لا تؤاخذنى اذا إخطأت"..او "دع الامور تمر"...

بتقابلها كلمة لا مؤاخذة ..مؤاخذة بمعنى عاقبة ...

سوخة:...فى الوسيط السخت :الشديد ..ويقال حر سخت وبرد سخت....وسخا فى السير اى امعن ...والسخاخ اى الارض اللينة الحرة لا رمل فيها ..

وساخت الارض بهم يعنى انخسفت ..والسواخ هو الوحل الشديد الذى تسوخ فيه الاقدام ...

فى العامية يقال : داهية سوخة بمعنى مصيبة شديدة

بينى وبينكم انا كنت فاكرة سوخة دى تحوير لكلمة سوداء...يعنى بدل ما يقولوا نهار اسود يقولوا نهار اسوخ :lol:

والى اللقاء ..مع معجم فرج للعامية المصرية

صباحكم جميل............

[zizetta]

الأخت الغالية فولانة هانم ..

بما أنك بقي لاقيتي عم فرج .. ياريت بالمرة تقولي لنا يعني ايه :

أنا في قلبي منك دودة أد كده

الموضوع ده خيش في دماغي

وليه لما الطفل الصغير ينادي علي مامته ويقولها ماما ماما .. تقوم مامته الحنينه تقوله جاك ماو عايز ايه .

الرك عليكي بقى في الموضوع ده

وأنا برضك عندي أمل

مستنية ردك ولو كلشي إن كان

تحياتي

زيزيتا

[Folana]

السلام عليكم ورحمة الله....

ربنا مايجيب دود فى القلوب يامدام زيزيت....

خلينا ندخل على الخيش على طول ايه رأيك؟....

خييش:..فى الوسيط بيقولك (مش عارفة مين اللى بيقولك بس ماعلينا )...خاش فلان يعنى دخل فى غمار النار

وخاش فلانا بالرمح يعنى طعنه ..وخاش ما فى الوعاء يعنى أخرجه

الخيش فى العامية :نسيج من الكتان تصنع منه الاجولة

التخييش: عزل السقف والارضيات فى المبانى بطبقة من الخيش المغطى بالقار

نرجع بقى للجملة اللى بتقول

الموضوع خييش فى دماغى

ده تعبير شعبى زى ماكلنا عارفين يعنى ان الفكرة قد أثرت كثيرا فى ذهنى او انى اعجبت بها

ولو قلنا (اللهم احفظنا جميعا )

العربيتين خييشوا فى بعض يعنى حدث اصطدام مع احتكاك قوى ..ولعلها من المصدر (خاش) بمعنى دخل فيه

وليه لما الطفل الصغير ينادي علي مامته ويقولها ماما ماما .. تقوم مامته الحنينه تقوله جاك ماو عايز ايه

جميلة انت يامدام زييز والله... :lol:

الام بتقول هذه العبارة بعد ان يكون قد فاض الكيل بها من ابنها من كتر ماهو عمال يزن ..ماما..ماما...

الحقيقة انا عمرى ماقلتها لولادى..كل اللى باقوله انى حاروح اغير اسمى بدل مامى يبقى بابى او عم عبده الخفير اى حاجة تانية لحد ملينسونى..

أصل كلمة "ماو" هو قبطى بمعنى "الاسد"...وهى من الكلمة المصرية "ماى"....هى مكتوبة قدامى باللغة القبطية والهيروغلوفية بس طبعا مش حاعرف اكتبهم ...

واصل الجملة ان الام العصبية دى بتقول " جاك ماو لما يلهفك"..

وكلمة يلهف ترادف يأخذ فى الفصحى واصلها مصرى قديم " حوتف"...ثم تحولت فى القبطية الى "هف"...بمعنى سرق واضيفت لام للتحسين فاصبحت لهف..

وحكاية الماو دى ...من كتاب اللهجة العامية وجذورها المصرية - سامح مقار..

الرك عليكي بقى في الموضوع ده

نرجع لفرج....

الرك : فى الوسيط...ركا بالمكان :اقام

وركا فلان :حفر حوضا

ركا الارض : حفرها

ركا الحوض: سواه

ركا الامر : أصلحه واحكمه

(هف هف هف )

الرك فى العامية أول طبقة فى الاساس..

يبقى الرك على كذا اى ان الاساس هو كذا ..زى الرك على الصنعة ..يبقى اساس العمل هو الصنعة...الرك عليك يعنى انت الاساس فى الموضوع ده

كليشنكان:..تعبير شعبى مشتق من جملة ( كل شىء كان )

عمل الشغل كلشنكان : تعنى انه انجز العمل كيفما اتفق او بدون عناية او بلا مبالاة ...

عدى كلمة برضك دى...وحاقولك حاجة حلوة تانية..

خليكوا معانا ...سنعود بعد الفاصل.............

[شينكاوي]

السلام عليكم

انا ممكن اضيف كام كلمة للقاموس بس دول جداد طحن بوصفي ابن جيل الثمانينات .

* مترمد : تقال للشخص السرحان او اللي بيتكلم في حاجة مش مفهومة او بيبص كأنه تايه

ومعناها انت شارب ترامادول وده برشام مخدر.

* في التمام : وبيتقال لما حد يعزم عليك تأكل او تشرب حاجة فبتقول له لأ شكرا انا في التمام يعني مش محتاج.

*دي ونش : ودي تطلق علي البنت او الست المتينة قوي . :sofa:

*دي سلعوة : يطلق علي البنت النحيفة جدا .

*مظبط : لفظ يقوله الشاب لو رايح يقابل بنت وحد سأله انت رايح فين.

* بيهيس :تطلق علي واد بيكدب علي الناس ويقول كلام غير منطقي.

طبعا ده جزء بسيط من لغة الشباب دلوقتي بس مش عارف الناس بتجيب الكلام ده منين. :D

بس بالنسبة لمترمد دي كلمة جديدة جديدة جديدة واي مصلحة. :lol:

:sad: :lol: : :winner: :lol: