شاعر العامية ؛؛ على سلامة ،،

[ابو محمود]

بقول لهم

مين اللى بيعيط بحرقة دة ؟

قالو ا لى

مواطن اتصور وهو بينضرب

قلت لهم

ومين الأمور اللى بيضحك دة ؟

قالو ا لى

دة واحد عمل شوية كوارث وهرب

قلت لهم

والدنيا عتمة هناك كدة لية

قالوا لى

دى حتة جديدة بتتخرب

قلت لهم

ومين الحاوى اللى بيتكلم دة ؟

قالو ا لى دة الوضع بيتقلب

واية الهيصة اللى فى الساحل الشمالى دي ؟

قالو ا لى

دى البقرة بتتحلب

قلت لهم وانتم قلقانين كة لية ؟

قالو الى اصل بنلاعب الكاميرون

وخايفين نتغلب

من أعمال شاعر العامية على سلامة

على فكرة دة شاعر لة مستقبل مشرق لانة بيتكلم من القلب

[se_ Elsyed]

هو بصراحة شاعر مش معروف الا للمهتمين بالشعر وخصوصاً الازجال والأشعار النارية الحامية زي بتاعت نجم وبيرم وفؤاد حداد ... ويمكن مش معروف لإنه قعد فترة كبيرة في الإمارات يشتغل مهندس ولما رجع لم تُسلط عليه الأضواء .. لكنه من رواد ساقية الصاوي ومن كُتاب الأشعار بجريدة الدستور والمصري اليوم ..

اشعارة وازجاله تستاهل تقرأها ...

عندي إحساس غريب إن مافيش حد في الدُنيا كلها يقدر يكتب حاجات زي دي إلا المصريين ... الواحد يقدر يقول إنه بيقرا شويه على قده أشعار من بلاد مختلفة ... لكن حاجات حراقه وبتوجع زي دي ..... لا اعتقد ... إعتبروه إنحياز أو مبالغة .. زي ما تعتبروه .. المهم إن بأحب البلد دي قوي قوي .. باحبها كلها على بعضها لا هي مفصصه ولا متفصلة .... ( ده لا شعر ولا دقن .. ده كلامي أنا ... كاتب الموضوع يعني .. مالوش دعوة بعلي سلامه )

عيشوا معايا شويه وقولوا رأيكم

-------------

خايف أصحى مالاقيش مصر

ساعات بقلق بالليل

يعني بالليل شوية كده

قبل الفجر

حسب الظروف كده

بعد العصر

خايف يوم أصحي..

وأفتح الشباك..

مالاقيش مصر

ألاقيها لمت هدومها ومشيت

لمت هدومها

علي نيلها

علي هرمها

وطفشت

وحلفت ميت يمين ماهي قاعدلنا

ماهي زهقت..

تعبت..

إتخنقت

أصلنا زودناها..

أكننا استعمرناها..

ورثناها

مصر البنوتة الحلوة

اللي زي القمر

بقت عجوزة وشايبة

وبان عليها الكبر

خايف يوم أصحي..

وأفتح الشباك..

مالاقيش مصر

=================================

مش أنا امبارح

رحت من بيتنا في السيدة

للشغل في حلون

في سبع دقايق

لا شوفت حد زعلان

ولا حد متضايق

والورد إنسان

والنخل متعايق

والناس جميلة مؤدبة

والجو رايق

والدنيا ماشية لوحدها

ولا حد سايق

ومش انا

امبارح برضه

رجعت من الشغل في حلوان

لبيتنا في السيدة

في خمس دقايق

لا حاسس بغربة

ولا شايف غريب

وقلبي ابيض حليب

عندليب

كروان فرحان

شايل ف قلبي وف جيوبي

الفرح أشكال وألوان

وزعت ع الشوارع

والبيوت والجيران

وطلعت البيت

ضربت الجرس

فتحت مراتي وبالأحضان

والعيال كمان فرحانين

ناجحين وجايبين

الدرجات النهائية

من غير دروس خصوصية

قمنا رقصنا وغنينا

واحتفلنا واتغدينا

فضلة خيرك

سمك واستاكوزا

وجمبري م الكبير

وحلينا ب مهلبية

وشربنا الشاي كمان

وفجأة

لقيتني بردان بردان

بصيت لقيت

الشباك مفتوح

ومفيش بطانية

ومراتي جنبي وزي ما هيه

لسة بتعاني من آلام المفاصل

وده اللي حاصل

والحمد لله

على كل شيء

================================

بص .. حا أقولك ...

م الأخر ...

أنا عندي عربيه ...

مركبتهاش …

ومعايا فلوس ...

مكسبتهاش ….

وجوزوني بنت حلوة ...

محبتهاش ….

وإشتريت بدلة جديدة ...

ملبستهاش ….

كسرت الحمام وغيرتة

محستش بأي إنتعاش ..

خدت بعضي علي جنب ...

وكان يوم حر ... رطوبة ...

وقولت لروحي ....

إيه ياعم ...

إنت طوبة .....

قاللي لأ ....

يا صحبي دي حسبة ...

ومحسوبة …

أنا أصلي زمان .....

لمست قلبي ..

غنوة حب جميلة ... جميلة

لكن يا خسارة ...

محضنتهاش

===============================

الشعر عيرة والكحل عيرة

والورد فوق الخد

ولحد الضفيرة عيرة

الصبر عيرة والضحك عيرة

والفرح والأحزان كمان وحاجات كتيرة

حتى الحنان جوه البيوت

حتى الكلام...حتي السكوت

حتى الهتاف جوه المسيرة برضه عيرة

حيرني حيرة

بقينا ليه حبة حاجات

قمصان بدل على بالونات

ما بقيتش شايف إيه اللي جاي وإيه اللي فات

ما بقيتش افرق

ده أزرق ده ولا أحمر رمادي

ودي كارثة ولا ده وضع عادي

وده طفل ولا راجل عجوز

وده إيه ده راخر

جايز يجوز

نعسان ده ولا ساكت وساير

بردان ده ولا ده دور وداير

وده إحنا ولا الكل حاير

===============================

مــــــــــــــــــرايا

قلت أبص ف المرايا ..

يمكن أكون إحلويت ..

فضلت داير أبص ..

مخلتش ولا مرايا ف البيت ..

في الحمام ف الأودة ف دولاب ..

أو متعلقة ع الحيط ..

شوفت ..

سكت شويه ..

وبعدين إتخضيت ..

معقول أنا قضيت العمر ده كله ..

وزي ما روحت زي ما جيت ..

معقول أنا عمري مافكرت ولا إتغيرت ولا حبيت ..

وإزاي ساكت علي روحي ده كله ..

وليه إستنيت ... !

يا ريتني ما كان عندي مرايا ..

وياريتني ما بصيت

================================

ابنى ابو لسان طويل

قالى

يعنى سافرت يا بابا واتغربت

مشوار طويل

وف الاخر راجع..

ف شارع متفرع من شارع

وشقه فى الدور الرابع..

ودولار نزل طالع...

وشويا حاجات..

دكان مستنى التراخيص..

ومكنسه على خلاط

وكمبيوتر مش نافع...

من الاخر معرفتش تتصرف..

مقدرتش تقول

لاء

مش مسافر...

.....

منين الكحه دى يا بابا...

دى عمر..!!

ولابرد...

ولا سجاير..!

.....

انت عارف يا بابا انا بقالى اد ايه بستناك؟؟

ايه يا بابا

انت هاتعيط ....

ده انا كنت بهزر معاك...

كنت بهزر معاك

============================

مش دى .. بطاقتى

وده .. رقمى القومى

ودى .. الحقيقة ..

وده الخيال ....

ومش دي الخريطة ..

ودي المدينة ..

وده المحور ..

وده المترو ..

وكده يمين .. وكده شمال ..

مش ده ظابط .. وده عسكرى ..

وده طبيب .. وده كمسرى ..

وده منجد .. وده بقال ..

مش ده جامع .. ودى مدرسة

وده بيت دعارة ..

وده سمسار ..

وده شيال .....

مش ده فستان .. ودى جلابيه

وده شورت .. وده مفيش ..

وده شال ....

مش ده اتوبيس .. ودى عجلة

ودول حمير ....

ودولا جمال .....

مش ده عمى .. ودى أختى

و دول صحابى ..

وده كمال ....

مش ده شارعنا .. وده بيتنا ..

ودى مراتى ..

ودولا العيال ...

مش ده الوطن .. وده المواطن ...

وده التاريخ .. اللى إتقال ...

أمال ليه .. كل ما اروح فى حته

و أسأل سوأل ....

يقولولي .. جايز ... يمكن .... إحتمال

============================

بمنتهي البراءة ...

سأليتني …

بنتي نور ....

ف أربع خمس ..

أمور …

مش ف كتاب القراءة ....

قالتلي .. بابا بابا ..

مش إنت .. يا بابا ..

بتكتب أغاني ..

وتقول أشعار ..

أنا سمعت ..

الشيخ يا بابا ...

بيقول إنك يا بابا …

ها تروح النار ...

زي الوحشين يا بابا ...

الحراميين الكفار ....

قوللي يا بابا ....

يعني إيه إستعمار ....

يعني إيه نيل ...

يعني إيه هرم ..

ومين اللي حط ...

النسر فوق العلم ...

يعني إيه يا بابا ...

إستفتاء ….

و يعني إيه إنتخاب ...

ويعني إيه حر ...

ويعني إيه نصاب….

يعني إيه إختلاس ..

ويعني إيه هجاص ..

ويعني إيه خصخصة ..

يعني إيه يا بابا ....

دستور ….

يعني إيه معارضة ..

ويعني إيه مظاهرة ..

وليه النهاردة ...

خدنا أجازة ...

م المدرسة .....

قوللي يا بابا ....

يعني إيه قهر ..

وفين …

خط الفقر ...

ويعني إيه حظ ..

ويعني إيه زهر ...

يعني إيه يا بابا ...

حريه …..

يعني إيه إنسان ..

ويعني إيه سرطان ...

يعني إيه يا بابا ...

خربوها ….

ومين دول يا بابا ..

ولاد القطقوطة ...

ومين دي ...

سمارة يا بابا ....

وإزاي يا بابا ...

ضاعت من قلبك ...

يا بابا .....

إنت معايا ....

فيه يا بابا ناس ...

بتقول كفايه ...

وفيه كمان عساكر ...

مسكين عصايا ...

وبنات متعورين ...

وتانين …

ماشين بيضحكوا ...

هما دول إسرائلين ..

يا بابا .....

ويعني إيه ...

ويعني إيه ...

قولتلها ….

نور …..

ممكن أسألك سؤال

قالتلي ….

إتفضل يا بابا ...

قلتلها ….

هيه قناة Space toon ...

رقم كام …..

وخدتها .....

عشان تنام

============================

أنا المواطن نقط نقط نقط

ولا بتهان وأسكت زى زمان

أنا بصرخ وأكتب وأبعت وأتكلم ...

وأسمع بقى يا معلم ...

أنا المواطن نقط نقط نقط....

رقم قومى نقط نقط نقط...

محل الأقامة نقط نقط نقط بجوار البنزينة

بصراحة حرام تعملوا فينا نقط نقط نقط...

وتطلعوا نقط ونقط أهالينا ...

عملتوا انتخابات وكلها نقط نقط نقط ...

وشيلتوا وحطيتوا حاجات نقط نقط نقط ...

بصراحة ...

أنا بقيت قدام مراتى حاسس انى مش نقط خالص ...

وأقولها نفسى أبقلى نقط بجد ..

تقولى يا اخويا ماتحرقش دمك

محدش بينفع حد...

حسك ف الدنيا ..

بكرة تبقى نقط نقط نقط ....!!!

===========================

وإحنا لسه في إبتدائي ..

وسط اوراقى القديمة ....

اللى لسه منها باقى ...

شوفت صورتى بين زميلى ...

و احنا لسه فى إبتدائي ...

الوشوش كانت بسيطة ...

طاهرة لكن مش عبيطة ..

نرسم الأحلام خريطة ....

فى قلبها نقطة تلاقي ....

هو صاحبى

لما كان فى الدنيا صاحب

اما دول كانوم جيرانى .....

كل واحد فينا حقق ...

جزء من بعض الأمانى ...

ا ما دى الشاطرة البليدة ....

العنيدة أم الضفاير ….

تبقى حبى الأولانى .....

أد ايه حزنت عليها ...

لما راحت فصل تانى ....

ما احنا كنا تخته واحده ...

فى تانيه تالت ...

مره قلت ...

و هى قالت ..

لما مدت ايدها شالت ..

دمعة وقعت غصب عنى ....

جوه كراسة الحساب ..

كنا لسه صفحه بيضه فى الكتاب ...

الوشوش كانت بسيطه ....

طاهرة لكن مش عبيطه ...

نرسم الأحلام خريطة ...

فى قلبها نقطة تلاقى ...

واحنا لسه فى أبتدائي

==========================

ميدان الجيزه

ضيعت شوية سنين كده ..

بحب من بعيد لبعيد ..

والحكاية مقضياني ..

ومبسوط وراضي وسعيد ..

أفرح بأي حاجة ..

وأستني هدوم العيد ..

و بعدين ضيعت شوية سنين ...

نفسي أبقي أشطر واحد في الكيميا ..

مع إني مش فاهم ميدان الجيزة ..

والحياة رغم قسوتها ..

شايفها لذيذة ..

وضيعت شوية سنين بقي ..

نفسي أعدي أحتبارات الكورة ..

في النادي الأهلي ..

وأشتغل في وكالة ناسا ..

وأبقي واحد م العلماء المهمين ..

و بعدين ضيعت شوية سنين ..

منتهي أملي كرسي فاضي ..

في أتوبيس تلات خمسات ..

عين الصيرة أم المصرين ..

وضيعت شوية سنين ..

عايز أفهم الفرق ..

بين النكسة والهزيمة ..

والأحترام وقلة القيمة ..

و أبقي نجم سيما ..

م المشهورين ..

وبعدين ضيعت شوية سنين ...

واقف عند نظرية المؤامرة ..

لا عارف أعيش ف الزمالك ..

ولا راضي أعيش ف غمرة ..

ومش عارف ليه ..

الحشيش ممنوع ..

مدام مصرحين بالخمرة ..

وياتري بقي أتجوز ..

واحدة بيضة ولا سمرة ..

ولا أسأل فيها ..

رجال الفتوي والدين ..

وضيعت شوية سنين ..

مركز ف السيراميك

والبيبان والشبابيك ..

وألوان الحيطان ..

وده بيج وده سن فيل ..

والمودة الأصفر ..

قشر الموزة ..

وضيعت شوية سنين ..

لا انا بحر ولا نيل ..

حاجة كده بعيد عنك ..

ملهاش عوزة ..

ولما بقيت كام وخمسين ...

لقيتني لسه ..

بحب من بعيد لبعيد ..

وبرضة مش فاهم ..

ميدان الجيزة

=========================

يا عم قول كلام منطقى

تخبط صباع رجلك ..

ف رجل الترابيزة

وتبكى وتشتكى ..

وتحط مراهم

يفش الورم ..

ويروح شوية الألم

وترجع تتخبط

وترجع تبكى تانى وتشتكى ..

ياعم شوف قلبك ولا ده مش بتاعك

يا عم شوفلك حل

يا تبيع الترابيزة ..

يا تقطع صباعك

==========================

بايظة بايظة ..

هي بايظة ...

والنهاردة معدش حد…

بيدي جايزة ..

يبقي أحسن .. خللي بالك ..

انسي همك .. ضغط دمك ..

سيبها ماشية .. بدعوة امك ..

مستحيل يقدر يضمك

حضن خايف ...

وأنت شايف ...

ده اللي لاهي ...

واللي ضايع ف الملاهي…

واللي ساكت بس ساهي ...

واللي حاله زي حالك ..

يعني إيه ..

يعني بايظة

هي بايظة ... بايظة .. بايظة

مرة حرة وبت جدعة..

ومرة يعني ..

ومرة وقعة ..

وبمزاجها ..

يعنى لما بتبقي عايزة ..

تبقي بايظة ..

بتبقي بايظة

=====================

بقول لهم

مين اللي بيعيط بحرقة دة؟

قالوا لي

مواطن اتصور وهو بينضرب

قلت لهم

ومين الأمور اللي بيضحك دة؟

قالوا لي

دة واحد عمل شوية كوارث وهرب

قلت لهم

والدنيا عتمة هناك كدة ليه؟

قالوا لي

دي حتة جديدة بتتخرب

قلت لهم

ومين الحاوي اللي بيتكلم دة؟

قالوا لي دة الوضع بيتقلب

وايه الهيصة اللي في الساحل الشمالي دي؟

قالوا لي

دي البقرة بتتحلب

قلت لهم وانتوا قلقلين كدة ليه؟

قالوا لي اصل بنلاعب الكاميرون

وخايفين نتغلب

====================

بقول لها ..

ما تيجي نهزر ..

نجري ونلعب ..

ونكسر كل الحاجات ..

ونجيب م اللي فات ..

يومين حلوين ....

قالتلي والنبي إنت فايق ورايق ..

قولتلها ...

طب وليه نتضايق ..

إحنا لسه صغيرين ..

وأكبر عيالنا ..

يا دوب تسع سنين ..

يعني لو بنحكم مصر ..

تبقي يا دوب لفة ونص ..

مش عشرين ..

- وطي صوتك البت بتذاكر ..

والواد مصدقت إنه نام ...

إنما إيه اللي صحي ف قلبك ..

من تاني الغرام ..

قولتلها جوايا كلمتين غزل ..

قالتلي والنبي إنت عسل ..

بس الظروف ..

- مالها الظروف ..

فاكرة لما كنتي ..

بتحوشي م المصروف ..

جبتيلي ورد ف عيد ميلادي ..

- وجبتلك بلوفر صوف ..

- وجبتيلي بلوفر صوف ..

- فاكر لما بوستني ..

وإحنا لسه مخطوبين وأبويا لاحظ ..

يالهوي كنت هموت م الكسوف

- فاكرةأول مرة قلت لك بحبك ..

وشك إحمر ..

- إنت اللي وشك كان مخطوف ..

- مش إنتي كنتي بترسمي زمان ..

- وإنت كمان كنت بتكتب شعر ..

- هو احنا بطلنا نحس ..

- إحنا بطلنا نشوف ...

وطلعنا اللب والسوداني ..

وفتحنا التليفزيون ..

وسكتنا تاني ..

ولا زال السبب ..

غير معروف ..

غير معروف

==========================

استراحه ع الصحراوي

الجو نار

سايق ومحدش معايا

غيري انا والذكريات

وحبه حاجات

ازازه الميه

ونظره عينيا

اللي شايفها في المرايا

بتبص لي من وقت للتاني بغباء

كانها عارفه الحكايه

او واخده بالها من الطريق

مر السفر من غير صديق

اول شمال احود ولف

الغنوه سكتت

والشريط عمال يسف

وازاي تخف

ياالم من غير جراحه

ادي استراحه

دماغي محتاجه الصراحه

وقلبي محتاج الحنان

ازكن هنا

اشرب ياعم قهوتك

ويالاا علشان

نلحق مكان قبل الغروب

واوعي الردار يسحب

ف لحظه غنوتك

معش فاضل في الطريق

ولا استراحه

=========================

على باب سفارة كندا

..لمحت ابليس و ف ايده استماره

..بقول له على فين

..قاللي بص

..يا هجره يا اعاره

..يا عم زهقت كفرت

..الاقيش معاك سيجاره

..انا انتهيت خلاص

..لا نافع وسواس ولا خناس

..ولا ليا عيش وسط الناس

دي عالم مجرمين

..عندكوا فائض ف الفساد

..في كل البلاد

..ومش محتاجين شياطين

..مليش عيش ف البلد دي

....بقالي سنين عاطل

...و انتوا بتعرفوا

..تقلبوا الحق باطل

..و تسلكوا القاتل

..و تمشوا ف جنازة المقتول

..ومفيش مشاكل

..يا عم ده انا بقيت أوسوس بالمقلوب

...و أقول للحرامي كفايه بقى توب

..انت هاتعمل كل الذنوب لوحدك

...و أنا ابليس

أشتغل واعظ

..ولا كمساري ف اتوبيس

..يا عم ده انا زمان

..كنت استنى حد ينسى

يسمي

..وهو بياكل لقمته

..دلوقتي كل اكلكم ملوث

..و بصراحه الواحد خايف على صحته

...ده مفيش ضمير اساسا

..عشان اموته

..و كل واحد بمزاجه

..خربانه ذمته

...يا عم ده كل حاجه اتسرقت

..وكده الاجيال الجديده

..م الحراميه اتظلمت

..يا راجل ده من كتر ما لطشت معايا

..خرجت ف مظاهره

..مع الناس اللي بتقول كفايه

...و برضه مفيش فايده

==========================

احب العسل

واموت فى الكسل

ووقت الازمه اقول فى العشق حكمه ومثل

وبس خلاص

اهجص الاقى ميت مليون هجاص

افكر...... هس.... ولا صوت ولا ناس

لانى كده ثقافه وعلم يادوب فى الفيلم فى الكراس

وراسى زى اكبر راس

مفيش احلام مفيش احساس

=========================

حكومة رقيقة أوي وشيك..

بتقفل كل البيبان والشبابيك..

عشان بتخاف علينا م البرد..

لأ إحساس مرهف بجد..

الأسمنت والحديد يغلي..

تقوم تبيع الأرض..

هو ده الفكر الجديد..

اللي بيبني المجد...

وشوف الحنان والطيبة والإنسانية..

سعر تصدير الغاز..

أقل من سعر الفول والطعمية..

ده علي اعتبار إن الناس لبعضيها..

والدنيا منفاتة..

وإحنا والحمد لله..

مش محتاجين أنابيب..

والمشتري مش غريب..

جربت الشاي بالحليب

ساعة الصبحية..

قراقيش بقي وسقي يا معلم

وانسي القضية..

ده تقريباً ماحدش شايف حد

=======================

آلو آلو..

أيوه يا فندم..

أنا بكلم سعادتك من دمياط..

نفسي هفتني ع المشبك سعادتك..

وبالمرة نشوف جهاز البت جمالات..

عقبال أولادك..

دخلتها اتفشكلت يجي سبع مرات..

لأ يا فندم سوء تفاهم بسيط..

مين يا فندم..

أنا؟!

عروسة جديدة..

تاني..

ونرجع إيه سعادتك..

اللي فات..

هو ينفع يرجع؟!

شربات..

ورحمة أمي شربات..

طب ياريت سعادتك..

توطي صوتك شوية..

الحكومة جنبي سعادتك..

لأ يا فندم..

أنا قصدي مراتي..

أصل هي اللي معاها الميزانية..

والميه والسندوتشات..

إيه يا فندم..

مصانع إيه..

أسمدة..

غازات؟!

لامؤاخذة مش واخد بالي سعادتك..

بس عموماً..

إحنا طول عمرنا..

جدعان أوي مع الخواجات..

طب يا فندم..

عشان جمالات بتضرب العريس..

بسيطة ورحمة أمي..

يا نهار أسود..

ده الواد تقريباً مات..

=================

بقول لها..

بحبك بحبك بحبك..

قالتلي..

كل ده كذب..

قولتلها صدقيني..

لا أنا في المعارضة..

ولا ف الحزب..

قالتلي..

بس السكوت خيبة..ولولا العيبة..

كنت أقول..

وأقول كمان..

الله يرحمك بقي يابا..

ويا ميت خسارة ع الجدعان..

قولتلها وطي صوتك..

بلاش جنان..

كل الحكاية..

أنا حاسس بشوية سخونة..

وبردان..

اديني بس إنتي شوية حنان..

وربنا يسهل

===============

آلو آلو..

هل تسمعني..

أيوه يا فندم..

أنا بتكلم من وزارة البيئة..

ياريت سعادتك..

ندخل ف الموضوع..

ماعدش في الكارت..

ولا دقيقة..

إيه يا فندم..

الهوا..ماله الهوا..ما هو زي الفل..

والميه..

ورحمة أمي بريئة..

إيه سعادتك..

المواطن..

قدامي أهو زي القمر..

وارد سعادتك..

يقع من طوله..

قضاء بقي وقدر..

إيه يا فندم..

الدنيا مخنوقة..

ما جايز سعادتك فيه حريقة..

طب يا فندم..

بعد إذن سعادتك..

عشان تقريباً عندي إسهال..

ولو إستنيت شوية..

إحتمال..

تبان الحقيقة

====================

ساعات كده بعيد عنك

يجيلي كرشة نفس

وألم ف المعدة

ودربكة ومغص

وساعات أحس

إني شوية أمراض

محطوطة ف قفص

بس ماشي الحال

وساعات من غير سبب

أجري ع الحمام

ويجيلي برد وزكام

وساعات أسهر

وساعات م العصر أنام

وساعات ألاقي

صعوبة ف الكلام

وده تقريباً طول السنة

وساعات أحس

إني مش أنا

بس زي الجن

فاكر اسمي واسم مراتي

وأسامي العيال

وعلي طول بقي

جسمي مكسر ومهدود

صحيح باكل وأشرب

واضحك والعب

بس مش موجود

ومعرفش ليه عيني بترف

عمال علي بطال

هو أنا عندي إيه يا دكتور

========================

[se_ Elsyed]

وفضلت أسَِتنى أستّنى..

لَحدّ ما عََدّى اخر قطر وفَات.....

حَزنت قَعّدت أعيط أعيّط ........

قلت أتمشى أتسلّى......

أتفرج عَ الشّوارع والنّاس والعربيّات.....

زهقت.......

قُلت أرتاح....

سنَدت عَلَى روُح.....

تلخبَطتّ جُوّايا كلّ الحَاجَات.......

مدّيت إيدى ف جيوُبُى.....

لقيت شُوّية وَرَق قديم.....

وصَوُر وكرُوت تليفونات.....

قُلت أكلم مرَاتى......

افتكرت إنها خدت الدّوا....

ونَاَمت من تلات ساعات......

قُلت أكلم أخُويا......

افتكرت إنه طلعِ مَعَاش مُبكّر....

وكَاَره تاريخُه.....

ومركّز ف التّأمينات.....

أكلم أُختى.....

هاتعيد وتقول نفس الحكَايات.....

أكلم خَالىِ......

افتكرت إنه غتت غَتَاتَة......

ومعايا أنَا بالذّات......

أكلَم خالتَى.......

قُلت يا وَاد......

دى كانت خالتى وخالتك......

واتفرقّت الخالات....

أكّلم صاحبى صلاح....

افتكرت إنة سافر العراقُ......

وفى إحتمال يكون مات........

قُلت أنا أصطاد مُزة.......

واعمل دماغ......

بسّ معرَفش حد بتاع مُخدَّرات......

قُلت أمشى ف مظَاهرة........

لقيت العساكر راجعين......

مشَطبين علَى كل الُمظاهرات......

قُلت اتصل بالسّادة المسئُولين.....

هايتّهمونى بإزعاج السُّلطات......

قُلت ياربّ.......

هُو أنا إيه.....

وليه..........

ونسيت إيه.......

وقطر إيه اللّى فات.......

اَلَلًه يرحَمَك بقَى يَابَا......

والفاتحة عَلَى كُل الأموات

=======================

ناقص حته

....وكل ما أوزن

......ألاقي لسه

ناقص لي حته

أحط حته

تقل حته

وأجيب قميص

تضيع جاكته

وأعيش لي ساعة

يفوتني سته

وكل ما أوزن

ألاقي ناقص

أقول بناقص

لو هي حته

أتاري لسه

ولسه تاخد

سنين وحته

وحاجات تسيبني

وحاجات تاخدني

لحاجات تخبط

في كل حته

....وأقول ها نفرح

..ف يوم

..ها نفرح

ويوم مانفرح

علي الله

...يفضل في القلب حته

=====================

ساعات

أنا وروحي نتخانق

ونعلق لبعض المشانق

وضرب وشد

حاجة بجد

تزعل قوي وتضايق

لحد ما ننزف

ونضعف

ونفهم

ونعرف

ونحس بنعمة الحب

ونشكر الخالق

يارب ...

يا خالق القلب طاهر بريء

ارزقني نور الطريق

واكفيني شر اللف والدوران

والحيرة عند المفارق

نفسي قوي ف ساعة رضا

تعبنا يا قلبي م الجري

كفاية كده

سهل السؤال

لكنه صعب وتقيل

صحيح مفيش حل

لكن كمان

مفيش بديل

عايز أشتري دماغي

وزي ما تميل أميل

أقول للحلاق

خف الجناب

وخلي قدام طويل

وأطلّع البنطلون الجينز

والقميص المقلم

وأشرب بدل الشاي

قرفة بالجنزبيل

وأتمشى ع الكورنيش

يمكن عيوني

تقدر تشوف النيل

كان عندي أصحاب

ف المدرسة

والجيش

صلاح ويوسف

مصطفى ونبيل

لكن لما أتصلت بصلاح

وقالولي عقبال أملتك

ده راح وعايش ومتجوز

ومبسوط في إسرائيل

ساعتها بس حسيت

إن الحمل لسة تقيل

رميت البنطلون الجينز

والقميص المقلم

ورجعت من تاني

أنا وروحي نتخانق

=============================

البت بنتي

ما شاء الله

أدب وجمال وثقافة

جريئة بنت اللذينا

معرفش أزايمش طالعة خواف

ة قالتلي يا بابا

مش إنت يا باب

ا بتكتب في الصحافة

يعني ممكن يفسحوك

أو يجلدوك

أو يودوك عند جدو في القراف

ة إيه يا بابا

ساكت ليه

أعملك عصير جوافة

=====================

فيه ناس لما تضايق

تملا البانيو وشوية بخور

وشمع ومزيكا واغاني

أو تروح تحكي

وتاخد وتدي

مع طبيب نفساني

أو تطلع شرم الشيخ تاني

ودي ثقافة ..

وفيه ناس لما تتخنق

ترجع تقلب ف اللي فات

وتجيب الصور والذكريات

وتاخد جوافة وبلح أمهات

وتروح تزور الميتين

ف القرافة

ودي ثقافة ..

وناس تلم العيال

وربع لب ونص سوداني

وفيلم قديم لإسماعيل ياسين

أو نجيب الريحاني

أو تعدي ع الحلواني

وكيلو مشكل

وتكتر الكنافة

ودي برضه ثقافة ..

والكل مجروح

ونفسه يبوح

بس مش عارف

==========================

بحب البرد ..

ويا سلام

لو حد هرب م الدوشة ..

وراح جابلي ورد ..

وأموت م الفرحة والدهشة ..

لو كتبت قصيدة ..

وقولتلي حلوة ..

قولها تاني ..

اتنطط زي العيال الصغيرين ..

وأقولك أحلف ..

والله العظيم بتتكلم جد ..

يمكن عشان أيام الفرح قليلة ..

سهل تتعد ..

عارف ..

رغم إن المخازن ..

كل يوم بتتحرق ..

ومفيش حساب ولا جرد ..

ورغم وجود السيرك

والأراجوز ..

والتلات ورقات ..

وجوز وفرد ..

عمري ما أتمنيت أكون أمير ..

أو ولي عهد ..

لكني بحلم بوطن ..

مفيهوش ولا حارة سد ..

وطن بيفرح بحاجة ..

غير وصول الأهلي لليابان ..

وحزنه أنبل

م الدموع البلاستيك ..

وعمليات التجميل ..

والشفط والشد ..

عارف ....

رغم إنها بتقع ..

بتغرق ..

بتتنيل بستين نيلة ..

لكن جميلة ..

وعمرها ما هتتهد ..

عشان كده ..

أنا لسة بحب حاجة ..

ولسة في قلبي حد

==========================

[badroora]

س س حرام عليك واحدة واحدة

الشاعر دا انت وقعت عليه منين دا شكله كان مكتوم ومصدق يا عينى

بجد بجد كلماته خفيفة ظريفة مؤلمة

اكتر حاجة عجبتنى اوى الحتة دي

ألاقيها لمت هدومها ومشيت

لمت هدومها

علي نيلها

علي هرمها

وطفشت

وحلفت ميت يمين ماهي قاعدلنا

ماهي زهقت..

تعبت..

إتخنقت

وفجأة

لقيتني بردان بردان

بصيت لقيت

الشباك مفتوح

ومفيش بطانية

ومراتي جنبي وزي ما هيه

لسة بتعاني من آلام المفاصل

وده اللي حاصل

والحمد لله

على كل شيء

أحباط

اكمل الباقى وارجعلك

شكرا على الاشعار الجميلة

[Salwa]

شكراااا...الف شكر ياسى السيد ....هدية رائعة .

اختيار موفق ..وفعلا..

اللى يكتب الكلام ده لازم يكون مصرى .

الاحاسيس دى متلاقيهاش عند مخلوقات تانية ...تقدر تقوللى مين حايخاف يصحى ميلاقيش بلده...!!

المصرى ..

بس المصرى ..

بتفضل بلده معاه وجواه لآخر ثوانى عمره ..

.وحتى ان غضب عليها فى يوم بيرجع ويحاسب نفسه ...ويقول مكانتش ظالمة انا اللى ظلمتها لما افتكرت انها ظلمتنى ...

شكرا مرة تانية وتالتة و...عاشرة ..

[se_ Elsyed]

بَقيِتْ أخَافْ...

من طَبيِب الـأسْناَنْ...

ومِن كُل الطُيور...

حتَى الكَرَوانْ...

وم الشَّاى اللى ف الدكَّاَنْ...

وم السُكر...

وم الحَادقْ وم الحراَّق...

وم الحَلاقْ...

منْ العسكرى وم الأُتوبيسْ...

ومِن إبليس...

من الشَّارع والرَّصيفْ والرََّغيفْ...

وأخويا الضعيف...

وقَطر السَكَة الحَديدْ...

مِش هو القمح برضه...

زَمَان كان لُه عيد...

وكَان لهُ غنوةْ حَلْوةْ...

وف كِتاَب الأناشيدْ...

بَحبِكْ يا بَلَدْنا...

بَس من بِعيِد لبِعيِد...

====================

حَظّك اليُومْ...

زَىّ إمْبارحْ...

زَىّ كُل يُومْ...

ومَفيشْ حَاجةَ متْغيّرةْ...

الْبت الطّويلَة عَايزَاكْ...

بَسَ إنت عَيَنكْ ع الْقُصيرةْ...

يَا لَئيمْ...

بَسّ إبن حَلاَل وطيّب...

وتِستاهل كُل خير...

وحِتّة سُكّرة...

شُوف...

الزَّهْرة مع الْمرّيخْ وعَطَاردْ...

وشْويّة كَوَاكب كَدهْ...

عامَلين معاك شُغل...

آخرْ مسْخَرَةْ...

تطْلَعْ منْ إنتخَاباتْ...

عَلَى استفْتَاءاتْ...

وَحَاجَاتْ ومحْتاجَات...

وبيعْ وسَمسَرةَْ...

وإنتَ ماَشَاء الله عليِك...

غَزَالْ يا رَبّى...

لاَ هَمّك إشاراتْ...

ولاَ مْطّباتْ...

ولا شَوَارعْ مِكسّرة...

شُوفْ...

التّعْليمْ...

زَىّ الْقَديم...

والصحّة رَبّنا

=======================

إيه يَعْنِى مَاسُورَة مَكْسُورة...

والميه طَعْمهَا اتغَيّر حَبتّيِن...

مَتِبْقاش حَسَّاسِ أوى سِى...

نحَلل ونشوف فَيْروس كَده...

ولو فيه...

الأعْمَار بِيدَ الله...

واهى ماشَيهَ ومستورة...

وبقالنا سنين بنسدد ف الدين...

إن قصر البنطلون...

هَنْفُكّ التنية...

وإن كان ع الزَكَّة اللى ف رِجلْيِك...

مَانت عَنْدَك رِجْل تانية...

مَتقُولّيش عِينَك بَايظة...

ماهى باينة...

مَتْبقَاش حَسَّاس أوى كَده...

=======================

مَحَدَّشْ فيِْنا قَامْ الصُبْحْ يتمطَّعْ...

وقالْ نِفسىِ أطْلعْ القَمَر...

ولا حَدْ فيِنْاَ بيْغيِرْ...

منْ العَصَافيرْ الحُرةَّ ع الشَّجَرْ...

ولا حَدْ فِينَاَ إنْدَهَشْ م السُؤالْ والخَبرْ...

عايِشينْ بَسْ كدهْ...

عَاَلة ع البَشَرْ...

هىَّ الَمراكِبْ للْهُرُوبْ ولاَّ السَّفَرْ...

لو عِشْنا نَسْتَنى المَطَرْ...

هَنْمُوتْ أَكيْدْ عَطشانينْ...

هوَ إحْنا مِينْ...

==================

ييميِنْ حاضِر...

شِمال حاضَرِ...

ما هُو السِواقَ جَدعْ شاطِر...

يسُوقْ دُوِغْرى...

وعند نَزَلِة الكوبْرِى...

لقيْنا رُوْحَنا مِش فاهْميِن...

مَفَيش ميهْ ولاَ بنْزيِنَْ...

قلعنا الصبر والفَساَتينْ...

والدنْيا هيصَه والزَحمة وَرَطةْ...

ومَعَدْشْ يَنَفعْ تِتْصَلّحْ الغَلطَة...

وأنَا كُلْ خوِفى...

يفُوتنى مَتَش الأهْلى وطَنطَا...

فِى كاس مَصَر...

================

كَأننا فِى حَالة حصِارْ...

شَكُلنا الصُبحْ...

زَى شَكُلنا آخرِ النهارْ...

والدُنيِا بَرَدْ...

زَى الدُنيا حَرْ ناَر...

عِرفَتْ معَنى اسْتِعمارْ...

مِن غيِر مَدْفَعْ ولا عَسَكَرى...

كُنَت فِيِنْ يا علىِ..

===================

مِش معْقُولْ...

بِيِنى وبِينكْ خِتْمْ دخِوُلْ...

ودول ظُباَطْ وعَسَاكَرْ...

ولا حَبَايب...

أنا مِش فَاكِرْ...

أنا مِش غايِبْ...

أنا مِش سَاَيبْ ولاَ فتْفُوتَةْ...

إيهْ اَلحدُوتَةْ...

لِسّهْ جَمارِكْ...

لِسّهْ هانُدُخلْ تانى معارِكْ...

ده أنا مِش مالِكْ...

غَيِرْ أشواقْ...

الَله يِلعَن أى فُراقْ...

بيْنِى وِبينكْ...

خِتمْ دُخوَلْ...

مِش معْقُولْ...

===================

قَالتْلى اخْتَلافْناَ...

قولتْلها مِن زْمَان...

قالتِلىِ...

يا رَاَجِل دِماَغَكْ ولا يهِمَكْ...

قُلتلْها مِش جَعانْ...

قالتلى دِه مَحْشى...

قُلتِلها وَرَقْ عِنبْ...

قْالتِلىِ بِتِنْجانَْ...

قُْلتِلها إخْتلافنَا...

قَلِتلىِ منْ زمَااااااااااااانْ

======================

يكُونْ ف عِلْمَكْ...

أنا مُتواضَعْ جِداً....

وِمشْ طالبْ كتيرْ....

يَعنى شَقَة صُغيِرةْ...

ف الكيِِِِِِِِِِِِِِِلُو تِسعينْ...

مَا هى الحَياة مَشَاوِيرْ....

مِشِ شرْط بَقى بتطلْ...

عَلَى جَناين وهَوا وعَصافيرْ...

وبنت حَلالْ ومِش شَرطْ....

زَى اللى ف الكلَيب الأخيِر...

وحِتة مدرسةَ صُغيّرةَ...

أهَى أِلعيال تُفكْ الخَطْ....

ومِش شَرْط لُغات وحرَكاتْ...

وجَغرافيا وتعبيِرْ...

وأدْخلْ القسْم...

========================

ساَعَاتْ الَمطَرْ.....

وساَعَاتْ....

أوَقاتْ بِييجى ضَعيفْ....

تبِل وِش الرَصيفْ...

وتَُنقش ع الإِزاَزْ خَيالاتْ...

وساَعَاتْ يِهز الأَرضْ....

ياخُدْنا نُحضنْ بَعض....

نِفتَحْ شبابِيكْنا إزِازْ وِشيِشْ...

تَقولِيِلىِ مَتخَفْشىِ...

وأَقوِلَكْ مَتخَفْيِش....

يا هَل تَرَى هَنْموتْ مِ البَرْدْ....

وَلا ابتَديِنا نِعيِشْ.....

==================

[se_ Elsyed]

ده تعليق س س عشان الدنيا ما تدخلش في بعضيها

---

أحسن حاجه الواحد يحمد عليها ربنا إننا خُلقنا مختلفين ... تخيلوا لو جينا الدنيا لقينا نفسنا بنفهم في الطب والهندسة والجبر والشعر والدقن وكل ده ....

بالله عليكم كنا هنتذوق شوية اشعار زي دي ؟

وأحسن حاجه إن المواهب بتبقى قليلة ... عشان لما تشوف موهبة تقول الله .. إيه الحلاوة دي ؟ والله كان نفسي اعمل كده واقول كده .. لكن ما بأعرفش فالحمد لله إن في ناس موهبين عشان يعبروا عن اللي جوانا ..

وأعتقد الكلام بتاع الراجل ده بيعبر عن كل واحد جوانا ... عن فرحه وحزنه وأملة وثورته وجده وهزله وهزاره

أشكر لكم المرور وأشكر لكم حاسة التذوق العالية ...

[se_ Elsyed]

جتك القرف

على حد علمي ..احنا واسرائيل حبايب..

فيه سلام ومفيش حرب ...

طب الظباط والعساكر دول بيعملوا ايه في ميدان طلعت حرب ...!!

ده بنت وولد نازلين يشوفوا بلوزة تليق على ايشارب ..!!

بيحلموا وبيغنوا ..اجمل ما في غناهم انه طالع من القلب ..

من امتى العشق كان بيموت من الخوف ..

ومن امتى الحلم كان بيخاف من الضرب ..

يا كابتن يا باشا خليك ابن بلد ..

هوه انت معندكشي اخوات .. صبيان ولا بنات ؟؟!!

يعني انتو كل عليتكو ظباط ..يعني انتم أصحاب اكاديمية الشرطة ؟؟!!

واصحاب الشوارع.. والميادين و المحلات ..واصحاب البلد ؟؟!!

طيب .. طب انا هاخرم من التحرير لدار القضاء العالي ..

هاكل كشري واخش السيما .. مالك بقى ومالي ..؟؟!!

معايا بطاقة وخلصت الجيش .. بتسمي ده اكل عيش ؟؟!

يبقى عرفتك ..

طب عريني .. فتشني .. قطعلي هدومي وافحصني وخلصني ..!!

لا انت اول ولا اخر واحد ...

عارف ..؟؟

انا مرة القطر عدى وداسني وما موتش ...!!!!

عشق الحياة مهوش ترف ..!!

عرفت ايه معنى الشرف ..؟؟!!

جتك القرف..!!

جتك القرف..!!

======================

تيجى نحسبها نلاقيها...

إحنا فيها...

لفّ واتفرج معايا...

ع اللى نايم...

واللى صاحى...

واللى طافى النور وصاحى...

واللى بتسليه جراحى...

واللى قال فات الكتير...

واللى طاير...

بس مكسور الضمير...

ع اللى مشغول بالدولار...

واللى ضيّع نص عمره...

فى كام بهيمة وكام حمار...

واللى قال الأرض باقية

واللى طُور مربوط فى ساقية...

واللى لسه قميُصه ناقص فيه زُرار...

وفى ثوانى...

مات كيلانى...

كل واحد فينا قام يحسبها تانى...

اللى نايم واللى صاحى...

واللى بيفكر ينام...

كله قام...

أد إيه ف العمر باقى...

يسوى كام...

أما شاعر بايخ...

جىّ ليه تشعللها نار...

يلّلا نهرب من قساوة الجَدَّ...

ونضيع ف الهزار...

ف العصير والفطير...

واللى لسه قميصُه...

ناقص فيه زُرار...

================

ألو ألو..

هل تسمعني؟!

بكلم حضرتك من قدام..

فرن الحاج أبو صلاح..

كله سعادتك تمام..

والشعب مستمر ف الكفاح..

لا يا فندم مفيش قلق..

شوية كسور وكدمات..

واللي مات مات..

واللي راح راح..

الحمد لله زي الفل..

ويا رب ديماً..

من نجاح لنجاح..

معايا يا فندم..

ورحمة أمي مبسوط ومرتاح..

كله من خير سعادتك..

إحنا بس محتاجين خميرة بيرة..

لأ يا فندم.. بيرة إيه..

أستغفر الله..

هو أنا بتاع كده..

أكلم حضرتك بعدين بقي..

عشان تقريباً الكارت خلص..

2-

ألو ألو..

هل تسمعني..

بكلم معاليك..

من محطة أبو غريب..

هو يا فندم القطر..

اللي لا بيودي ولا بيجيب..

العتمة الكتمة..

الزحمة الكئيب..

الشعب..

ماله الشعب..

فرحان وإحساسه عالي..

وكل الحالات بتستجيب..

معانا يا فندم..

أجزخانة لكل مواطن وطبيب..

مرهم للحروق..

ورحمة أمي بعت أجيب..

طب يا فندم عشان القطر اتحرك..

الموت علينا حق يا فندم..

واللقا نصيب..

3-

ألو ألو

هل تسمعني

بكلم جنابك

من عزبة شحات العريان

دي حتة كده يا فندم

بعيدة عن العين

لكن قريبة من حلوان

مفيش ميه يا فندم..

لكن مفيش حد عطشان

نور

ملوش لزوم النور يا فندم

كفاية الإحساس بالأمان

أنا

ورحمة أمي زي الفل

مناخيري

لأ.. ده دور برد من زمان

الشعب

مبسوط وبيغني وفرحان

ما هي مصر حضرتك

إمبارح كسبت السودان

طب يا فندم

عشان تقريباً البيت بيقع

لا إله إلا الله

4-

ألو ألو..

هل تسمعني..

بكلم معاليك م المستشفي..

آه والله العظيم..

تصور..

كبد البلد سليم..

ووشها منور..

قطن وشاش..

لأ يا فندم ما يلزمناش..

ده الشعب كله متعور..

دكاترة..

أشعة..

تحاليل..

ده ترف يا فندم..

أوامر سعادتك..

ورحمة أمي هادور..

رسم قلب..

عارفة يا فندم..

بتاع طويل كده ومدور..

بعد إذن حضرتك يا فندم..

جالي كرشة نفس..

تقريبًا بموت..

الدوام لله يا فندم..

5-

ألو ألو..

أوطي صوت التليفزيون إزاي يا فندم..

ده أنا بتكلم من سوق الخضار..

طول عمرها القوطة مجنونة سعادتك..

بس الجديد بقي الخيار..

والبطاطس..

هايصة خالص..

عشان الزيت أسعاره نار..

والكوسة شكلها يفرح..

ماشفتهاش أبدا كده..

والشمس طالعة..

وف عز النهار..

المواطن..

نفس الابتسامة العريضة حضرتك..

هيموت م الفرح..

خصوصا بعد ما سمع..

عن علاج البواسير بدون جراحة..

إمبارح ف نشرة الأخبار..

المشكلة أنا يا فندم..

من يومين كده..

ابتدي يلعب ف عبي..

ييجي مليون فار..

6-

إيوه يا فندم..

بكلم سعادتك م الاستاد..

عارف يا فندم إن المباراة مذاعة..

بس قلت أشيل علم..

وأفسح الولاد والجماعة..

أنا..

أهلاوي يا فندم..

ورحمة أمي عن قناعة..

الأهلي حضرتك..

مش إجوان بحرفنة وشجاعة..

الأهلي رغيف العيش..

أنبوبة البوتاجاز..

والسد العالي..

اللي بيحمي مصر من المجاعة..

هو البطل..

هو عم توفيق التمرجي..

اللي بيدي حقنة ف العضل..

ينام الألم كام ساعة..

مصدر الفرح الوحيد للشعب..

والزمالك أكيد..

مقدر الظرف الصعب..

تصور الموقف يا فندم..

لو الأهلي ماعندوش قلب..

أو بعد الشر بعد الشر..

اللاعيبة عضهم ف رجليهم كلب..

وراح الدوري والكاس..

قوللي بقي سعادتك..

هاتفرح بإيه الناس..

طبعًا الزمالك..

هايعمل م القصيدة دي شماعة..

وكل مرة يتغلب ستة..

وهات م الشبكة يا معلم..

طب يا فندم

أكلمك بعد الماتش

[se_ Elsyed]

لحم الحمير

صـا حـبى شـا فـنـى فى و ســط ا لــز حمـــــــــــــة

قـــا لــى مــــــــــا لــك

قــلـت نـفـسـى فى حـتـتـة لحمـــــــة

قـا ل يــا عــم شـا يـفـك لـية مـحـتـا ر

قـو لـت ز هـقـت كــــلا م فـى ا لا سعـــــــــا ر

أ يـة بـس ا للى جـــر ى لـلـد نـيــــــــــــــا

قـا لـى صـا حبـــى د ى قـصــة تـا نيـــــــــة

ا لحميـــــــــــر ر ا حـــو ا و جـــا بــو هــا

و عينــى عينـك بـيـد بحـــــــــــــــــو هـا

قـا لى صـا حبى أ ية ر أ يك فى أ كلت حميـــــر

قـو لــت ليــة ر ا ح بــس ا لـــضميـــــــــــر

قا لى يـا عـم بــــلا ضـمـيـر بـــلا د يـا و لــــــــــو

دة ا لـضـمـيــــر ا لـكـــل شــــــا يــلــو

قـو لـت طيــب أ ز ا ى ا لحميـــــــــر بـتـتــا كـل

قـا لـى مـفـهـا ش أ ى مشــــا كــل

طـيـب أ يـــة طــعـم ا لحـمــيـــــــــــــــر

قا لى صا حبـى

كـفتـة و كـبـا ب و كـمـــا ن تـحـمـيــــــر

و بتتبــــا ع على عينــك يــا تـــــــــا جـــر

مــا هــو أ صــل بيعــــهـا ر ا جــــل فـــا جـــر

و عــر فـت نــا س كـتـيـــــــــــر

من الغـو لـب أ د مـنـت أ كــل ا لحميـــــــــــر

مــا هــى بـقــت أ كــل ا لـفـقـــيــر

و ا لـنبـى مش حــــر ا م د بــــــح ا لــحـميـــــــر

ر ا ح فيـــــــــــــــــــــن بس ا لـضميـــــــــــــــر

و لا عشا ن الحميـــــــــــــــــــــر

مـلـهـا ش كـبـــــــــــــــــــير

========================

أنا عيني دمعت وأنا أقرأ هذه القصيدة ... بجد

[ابو محمود]

Advanced Member

المجموعة: Members

المشاركات: 641

التسجيل: 16-February 06

رقم العضوية: 6009

إنذار: (40%)

[وسط][/وسط]

بقول لهم

مين اللى بيعيط بحرقة دة ؟

قالو ا لى

مواطن اتصور وهو بينضرب

قلت لهم

ومين الأمور اللى بيضحك دة ؟

قالو ا لى

دة واحد عمل شوية كوارث وهرب

قلت لهم

والدنيا عتمة هناك كدة لية

قالوا لى

دى حتة جديدة بتتخرب

قلت لهم

ومين الحاوى اللى بيتكلم دة ؟

قالو ا لى دة الوضع بيتقلب

واية الهيصة اللى فى الساحل الشمالى دي ؟

قالو ا لى

دى البقرة بتتحلب

قلت لهم وانتم قلقانين كة لية ؟

قالو الى اصل بنلاعب الكاميرون

وخايفين نتغلب

من أعمال شاعر العامية على سلامة

على فكرة دة شاعر لة مستقبل مشرق لانة بيتكلم من القلب

موضوع جد عجيب أظاهر ان الشعر الأعجاب بية بيكون فى الصيف

الموضوع دة انا نهوت الية فى أكتوبر الماضى ولا حس ولا خبر ومحدش علق اية يعنى لازم نكون مشرفين وأهلوية كمان ههههههههههههههههههههههههههههههههههههههههههههههههههه بلد شهادات صحيح

[حسام يوسف]

انا من محبى الشاعر على سلامة

لأنى من المواظبين على قراءة الدستور

والف الف الف شكر يا س س على تنويهك واشارتك لهذا الشاعر العظيم

دايما يا س س سباق

تحياتى

[se_ Elsyed]

الله الله الله ... قول كمان يابو اشرف الله يكرمك

----------------

غسيل قلوب

هي القلوب بتتغسل

زي الهدوم

وإزاي بتغرق ف الغرام

وإزاي تعوم

وإزاي بتبقي طوق نجاه

وبتبقي شط

وإزاي بتنخل الكلام

وإزاي بتعرف أي خط

وإزاي بترقص م الفرح

وإزاي بتقتلها الهموم

وإزاي بتبكي وتبتسم

واشمعنا يعني بتترسم

فوق الشجر

ساعات بتدبل ف الربيع

وساعات بتعشق المطر

ليه لما بتبطل غُنا

بنحس فعلا

الخطر

===========================

زغزغنى

يمكن أضَحَك

يمكن أفرح

يمْكَن أطلَع

مِ الَلى أنا فيِه

زغزغنىِ

يمكِن أحلَم

يمكَن أقَول اِللى مخَبيه

مِش جَايز

لسه الدُنيا جَميلَة بِجَد

ولسه النَاس

فِى الصيِف والبَرد

مِش يِمكن

يطلَع فيا العيِب مِش فِيه

زَغْزَغْنِىِ

=====================

بوابة تفتيش على بابك

كل ما احَاول أعدى تزمر

وبتتشرط

وبتتأمر

أرَجَع أدَور تاني وأدور

وكل ما أعدي برضه تزمر

دب أدي الساعة

وأدي حزامي

وآدى بطاقتي

والنضارة

وآدى عنواني

وكل حَكَايَتي

وآدى أمارة

حتى الفكة الباقية في جيبي

والأشعار

والمحفظة مفيهاش غير صورتك

ليل ونهار

كل هدومي

زي ما نازل من بطن أمي

من غير حتى ورقة توت

وكل ما أفوت

البوابة برضك تزمر

ولما لمحني

واحد طَيب م الحراَس

وقَاللي اسْمَعني يا ابن اَلَناس

إرمي الحته الحلوة في قلبك

وعَدى

والبَوابَة عمرهَا

ما تزمر

=========================

بيوتنا واسعة وضيقة

عصَافير كِتير

ولا يُوم صَحيت م الزقزقة

بحلم بعيشة محندقة

وسط البرَاح

لو كان صَحيح

الحُزن رَاح

طَب ليه الجراَح

لسه فَ عيونَا مخندقة

بيوتنا أسمنت

وزلط وحيطان

وزي الأسى

مترصصة

مرصوصة رص

دَار النهار

من دار لدار

طبل وزَمر

قال وسار

ولا حد حَس

=====================

جمهورية إمبابة

قالت لي

أنبوبة البوتجاز بتنفس

قولتلها

الحمد لله إن لسه

فيه غاز

ولسه قادرين نتنفس

قالتلي النور قطع

قولتها

يا ستي نحسس

قالتلي

الرغيف اتسخط

قولتلها

فرصة بقي نخسس

قالتلي

مش هاينفع كده

قولتلها ده كده كويس

وطي صوتك

يقولوا علينا عملاء

وخونة وبنتجسس

لصالح جمهورية إمبابة

=========================

إِحْنا

يَا دُوبْ رَقَمْ

والماتش شَغَّالْ

فاوِلْ مفِيشْ

آوِتْ مفِيش

ومَفِيش ضَربِة جَزاءْ

وكل يومْ مُوضَة

وكل دقيقَةْ عرَض أزْياءْ

وكل شئ للبِيعْ

ومفِيشْ أكتر مِن الأسواق

إيهْ يعمل الأدبْ

وإيه تَعمل الأخلاق

فِى ماتشْ

مِن غير حَكَمْ

====================

تحس إن البلد بتصحي م النوم

بتقول آه يا ضهري

شعرها منكوش

وصوتها مبحوح

كأنها كانت نايمة

ف عشة الفراخ

اللي فوق السطوح

وتسند علي مين

ده الكل مدبوح

لا ضل راجل

ولا ضل حيطة

مفيش غير شوية زيطة

تيجي شوية

وبعدين تروح

=============================

أحْلامْنا سَلَطَةْ

وكَلامْنا سَلَطَةْ

والعشق وَرطَةْ

غِلط غلْطَةْ

كأَنَى ماشى من غيرْ دِماغى

كأْنى أقف أدَّن فَ مالَطةْ

سَلَطَة

وتَملىِ خَسْ وجَزَرْ

ناديتُه لَكن راح واعتذَرْ

أَلاقيش مَعاك سنةْ أمل

ألاقيش مَعاك حَبةْ نْظر

اليُوم وفاتْ

وبُكرَه فَاتْ

مَفْضلِشْ غير

حَبةَ سُكاتْ

وتقولِلى هات

أحَلامنا ليهْ

سلطة

=====================

أقولك حكاية

يمِكن متصدقهاش

النور قاطع ف شارعنا

من سنين ولسه مجاش

عارف ليه

آه والعيش والملح

زى ما بقولك كده

ودوَّرنا كتير مخلَّيناش

وملقيناش

غير سلك عريان مكشوف

واقف ف العتمة مكسوف

ساكت آه

لكنَّه مبينساش

لمَّا الماسورة اتخرمت

وربطناها بحتة قماش

ولكل جرح بينزف

شوية بُن

ولو البن غالى بلاش

إيه ياعم

إحنا كل ده ف ميدان التحرير

لسَّه متحركناش

آه والعيش والملح

================

عايز تشوف الدنيا خضرة

يبقي حديقة الأزهر

أو الفسطاط

عايز تشوف الدنيا حلوة

وتبقي واد رومانسي

وتعيش ف الخيال

عليك بقي وعلي أمانة السياسات

قرفان لا مؤاخذة من رجولتك

عملية بسيطة وتبقي ست الستات

نفسك تبقي حر ومش عارف

اشتم الشاعر اللي بيكتب سلامات

يا عم الناس لبعضيها

فيه إيه

ده احنا كلنا فــ الهم إخوات

ومتقلقش خالص

لا فيها تعويض

ولا تهمة تحريض

ولا قانون طوارئ

ولا جنايات

إنما لو كان بجد

إحساسك مات

مش هاقدر أعمل حاجة

======================

صباح الخير

مين ده اللي مصر

عملت له توكيل

بالبيع لنفسه وللغير

وكمان بنقل الملكية

مين ده اللي مصر

وقعت أوي كده في هواه

وكل ما يتكلم تقول الله

وكل دقيقة تغنيله أغنية

ومين ده بقي اللي معاه

مفاتيح الشاي والسكر

والهوا والنور والحرية

طب إيه رأيك

التوكيل ده مضروب

بص كده معايا يا عم عطية

ماعرفش يا ابني

تعالي نسأل في الشهر العقاري

=====================

[se_ Elsyed]

قولي يا عبد الجواد

مش إحنا الشعب

وده مثبوت في البطاقة

ومكتوب ف شهادة الميلاد

ولا مصر خلفت ولاد غير الولاد

طيب ليه

كل ما اتكلم واستخدم حقي

يقولولي اسكت ياض

سنين ساكنين

في نفس الحتة الضيقة

نفس الهوا

ونفس الدوا

ونفس الأمراض

على فكرة

مفيش جبنة في التلاجة

ولا خيار

ولا أعياد

مفيش غير فيلم قديم

كل شوية بيتعاد

========================

لما وشي باة أصفر لمونة

مخدتش ولا أديت

ولما أترميت ف قلب الطاحونة

مخدتش ولا أديت

ولما شميت ريحة شياط

ووقعت فوق دماغي كل الحاجات

مخدتش ولا أديت ..

ولما قالولي من أيه الدم اللي ف وشك

فين روحك

حاسب قلبك بيغشك

مخدتش ولا أديت

ولما حسيت بألم ف راسي

ولقيتني ناسي ..

اسم ابني الوحيد ..

ولما شوفتك رايحة لحتة بعيد

مخدتش ولا أديت..

لحد ما لقيتني مربوط في جبس

وشاش ..

وشايف كل شيء طشاش ..

وحواليا ناس كتير معرفهاش

بيقولولي مين اللي رماك م القطر

يا صابر ....

==================

ايه ده ..؟!!

بالصلاة ع النبي

احنا عندنا اسمه ايه ده

أحسن واحد يحلل مباريات

يحط التشكيل

الأساسي والبديل

ويقولك إمتى تلعب براسين حربة

وإمتى تلعب من غير راس

ولو ضميرك مش مرتاح

وعندك إحساس

بلاش تشوط ع التلات خشبات

وعندنا اسمه ايه ده

أحسن مهندس خبير

بيرمش بس للبير

طلع غاز وبترول

وينزل دهب م الحنفيات

وعندنا اسمه ايه ده

أحسن سمكري ف التلاتين سنة

الأخيرة

تخش من مجرى العيون

على عين الصيرة

هتعرفه من مناخيره

ومن شكل العربيات

وعندنا اسمه ايه ده

مجرم قانون دولي ودستور

وإيده خفيفة أوي

في التعديلات

يشيل من هنا

ويحط هنا

جواهرجي يا ربي

مُلقاط

وعندنا اسمه ايه ده

أحسن واحد يحط الفول عالطعمية

ويعمل سندوتشات

وعندنا اسمه ايه ده

أحسن دكتور

مسالك وعظام وقلب وغرام

من نظرة عينك يعرف

كل الحاجات

ولا روشتة ولا إبرة ولا تحليل

ولا إشاعات

وعندنا اسمه ايه ده

أحسن حانوتي آثار

والله لو جاله برد

أبو الهول يموت

وتنتحر الأهرامات

وعندنا اسمه ايه ده

أحسن كاتب

وأحسن مخرج رقص

وأحسن جزار كوارع وعكاوي

وحلويات

وعندنا اسمه ايه ده

ملوش حل ف الزراعة

فواكه وحبوب وخضروات

يقول للأرض قمح

تقوله حاضر

ونخبز ونعمل بسكويت

وفينو بسمسم وبقصمات

وعندنا اسمه ايه ده

صاحب القهوة

كلنا نتيتم ونتشرد

لو بعد الشر

زي الناس ما بتموت

مات

يا أخي انا مش عارف ..

لما أحنا عندنا

اسمه ايه ده

واسمه ايه ده

أمال اسمها ايه دي

مصر ..

مبتتقدمش ليه

وتعبت ..

وزهقت ..

وداخت ..

ولفت السبع لفات

[se_ Elsyed]

ولا تزعل يا محمود بك مصطفى .. اهو بقى موضوعك يا عم .. ومش محتاج تبقى مشرف .. لكن محتاجينك تبقى أهلاوي عشان نتشرف ...

[se_ Elsyed]

الطريق الدائري

جميل منظر النيل..

من ع الدائري..

والنسمة اللي بتقدر تفوت..

سرقة كده من وسط البيوت..

بس يا ريت بقي..

حد يلحق الشجرة الكبيرة..

قبل ما تدبل وتقع وتموت..

أسند علي سور الكوبري الحديد..

وأحلم وأسرح بعيد..

يصحيني صوت عربيات شايلة كراتين..

أغني هلت بشاير الدعم..

يا حلاوة بطاقة التموين..

بس من إمتي السكر والسمن..

بيمشوا ف حراسة الأمن..

وتحت عيون المخبرين..

قلت يا واد

اقطع الشك باليقين..

سألت واحد م السواقين..

سكر ده يا حاج..

قاللي ده مر متعبي ف شوية قوانين..

قلت خير برضه..

يمكن عشان نحارب الفقر والجهل..

ويرجع تاني يطلع الفرح سهل..

م القلب الحزين..

أم يمكن عشان الاحتكار..

وحدوتة الأسعار..

والتجار الطماعين..

أو يمكن عشان الصحة والتعليم..

والطفل اليتيم..

وحقوق المعاق قبل السليم..

أخيراً بقينا بني آدمين..

لكن لما سمعت صوت بيقول..

إنت ياض يا اللي هناك..

يا زفت الطين..

عرفت إن ده كله عشان نخاف..

ونخاف ونخاف..

أكتر ما إحنا خايفين.

[se_ Elsyed]

أول يمين

ساعات أحس إني أخرس..

بتكلم مع حد..

مش فاهم لغة الإشارة..

أقوله قلبي تعبان..

يا عم بلاش دخان..

يعزم علي بسيجارة..

أقوله ما تعرفش مصر فين..

يقولي فيه فطاطري كويس..

أول يمين بعد الإشارة..

أقوله أنا فرحان أوي..

يقولي بس لو قربت شوية..

ده لسه القطر طالع..

يا خسارة..

تصدق..

سنين بدور علي صاحبي..

وهو ساكن جنبي..

ف الشقة اللي قصادي..

ف نفس الدور..

ف نفس العمارة..

[ابو محمود]

ولا تزعل يا محمود بك مصطفى .. اهو بقى موضوعك يا عم .. ومش محتاج تبقى مشرف .. لكن محتاجينك تبقى أهلاوي عشان نتشرف ...

أزعل يا خبر دة كلام

ياعمنا الموضوع والشاعر تحت أمرك بس ياريت بقى تكمل اللى باقى من أزجال الشاعر وانا مستنى على فكرة هذا الشاعر الجميل الخلوق المتواضع يخرج منة الكلام وكأنة سلوك من حرير وكل كلمة بيقولها بيكون أحساسها عالى عندة يعنى حاسس بيها والغريب انة ما بيعملش زى باقى الشعراء اللى مشهور عنهم انهم بيكونو اثناء نظم الشعر او الزجل تحت تأثير الدخان الأزرق ولمؤخذة .... الهبو ... ههههههههههههههه

مسائك عسل يا أهلاوى يا سكر ومتنساش تبوسلى عبد الرحمن وتسلملى علية ربنا يحرسهم لك

[se_ Elsyed]

بيض بالبسطرمة

حبيتها أيام ما كان..

شارع القصر العيني اتجاهين..

كان أياميها ممكن جدًا..

نتعشي بيض بالبسطرمة..

ونشرب شاي بنعناع ف الحسين..

كان لسه رمسيس ف الميدان..

والدنيا أمان ولذيذة..

وكان فيه أهرامات ف الجيزة..

اللي بعد كده اسم الله عليك..

اتبني مطرحها سيرك أبوعزيزة..

ماكنش لسه مترو الأنفاق..

وكنا بنرفض..

أي معني للفراق..

وكان فيه حب من نظرة عين..

تصدق بقي..

كانت البيوت فيها بركة..

رغم المساحات الضيقة..

وكان فيه شوية حاجات جميلة..

ما تعرفش راحت فين..

======================

تانية إعدادي

بقيت عامل زي الترس ..

اللي بيلف ع الفاضي ..

وآخر الليل لما آجي أنام ..

كل طموحي ..

تزورني ف المنام ..

البت اللي كنت بحبها ..

وأنا ف تانية إعدادي ..

مابقتش عارف ..

آخد بالي من صحتي ..

ولا من جيبي ..

ولا من ولادي ..

بس ساعات بحس ..

إني مكبر الموضوع ..

و إن كل ده عادي ..

لما اكتشفت أخيرًا ..

إن ف العتمة ..

عزبة خيرالله.. ما تفرقش ..

عن مصر الجديدة ..

والزمالك ..

والمعادي ..

====================

تحت الشجرة

إنت يا عم..

يا أخ..

يا اللي هناك ف الصورة..

ماينفعش تسلم قفاك لحد..

وبعدين تطلب منه فاتورة..

خليك منطقي وحنين..

أنا مثلا..

من وأنا آد كده..

بحلق تحت الشجرة..

عند عم زكريا المزين..

راجل مذاكر دماغي كويس..

وأنا أصل دماغي..

مفتوحة م الناحيتين زي الماسورة..

حاسب بس من الكرسي..

أحسن رجليه مكسورة..

سلامتك يا راجل يا طيب..

=================

تقريباً

ولسه هاتشوف وتتفرج..

يا ابن آدم..

طول ما انت عايش..

مش عارف عندي إحساس..

إن مصر حد شّمْمها حاجة ف المولد..

وسرق منها الغوايش..

واداها صرة مربوطة..

لما فاقت وفتحتها..

لاقتنا..

بجد بجد..

يا حلاوتنا..

نُصنا بيدّور

علي علاج للحموضة..

والنُص التاني..

شوية حاجات..

مش موجودة..

عموما أنا عملت محضر ف القسم..

تاخد رقمه..

======================

حبيبتي .. زي القرش الأبيض

حبيبتي

زي القرش الأبيض

في اليوم الطين

زي آخر رغيف عيش

وآخر إسطوانة أوكسجين

وحبيبتي

حبة فرح

من زمان باقين

وحبيبتي

رغم عيونها الطيبين

مش عبيطة

لأ .. دي عارفة

ومذاكرة الخريطة

من فوق لتحت

وم الشمال لليمين

وحبيبتي

ما أتلقيتش جنب جامع

يعني معاها شهادة ميلاد

معروف أبوها

وأمها مين

وحبيبتي

عقبال السامعين

موعداني .. بكره

تلاته العصر

في مظاهرة بتحلم لمصر

وناسها المظلومين

========================

زمارة الخطر

فاكر ..

زمارة الخطر ..

وطفي النور ..

وأكياس الرمل ..

وقدام كل بيت ساتر ..

فاكر ..

أيام السهر ..

والامتحانات ..

وكوباية شاي من إيد أمك ..

وانت بتذاكر ..

كنت بتفرح لما بتنجح ..

أو حد يقول عليك شاطر ..

فاكر الأمان ..

ننام وفاتحين البيبان ..

دلوقتي ف كل شارع لجنة ..

وف كل بيت عساكر ..

وعشش عشوائيات ..

زي سوبر لوكس فاخر ..

مابنشوفش حاجة ..

وبرضة بنقطع تذاكر ..

معقول عشان تعيش ..

لازم تتاطي وتقضيها ..

طيب وحاضر ..

مين اللي قال ..

البحر غادر ..

مين اللي قال ..

إنك خلاص تعبان ..

ومش قادر ..

ومين العبقري ..

اللي سماك

شحات وعريان وصابر ..

هو أحنا ..

توهنا من بعض ..

هو أحنا ليه ..

ماشيين وباصين في الأرض ..

هو احنا لسة بنحلم ..

وبنحاول ..

وبنعافر ..

سؤال لا كان عالبال ولا ع الخاطر ..

أسأل عليك ..

يقولوا نايم ..

وتسأل علية ..

يقولولك سافر ..

واخد بالك ..

دلوقتي ف كل ثانية ..

بنسمع الزمارة ..

وبدال الغارة ألف غارة ..

لكن لا بيصحى شارع ..

ولا حارة ..

وكل واحد فينا محتاج ..

مليون أمارة ..

عشان يحس بالخطر ..

يا ساتر .....

========================

طبق اليوم

ربع كوباية مية م الحنفية..

ده لو تيسر..

نص كيلو بصل..

ومش شرط يتقشر..

وسنة ملح وفلفل أسمر..

ولو مفيش أسمر..

أي لون يعجبك..

يا عم إكتب ورايا..

إحنا من أولها هانكشر..

شعار البرنامج إيه..

الطبيخ نفس..

مش أكتر..

وتشهد علينا الحلل والبوابير..

إننا طبخنا لحم الكلاب..

والحمير..

لا حد مات..

ولا حد قال آي..

ولا حد وقع وإتكسر..

والجدع بقي اللي يعرف ليه..

أو يقدر يفسر..

معادنا الأسبوع الجاي..

مع حلقة جديدة م البرنامج..

لو كان لنا عمر..

وفينا روح..

نضحك..

ونبكي..

ونهزر..

=====================

طبق اليوم 2

الطاجن ده زمان..

كان بيتعمل باللحمة الضاني..

والنهارده يا جدعان..

بقي فيه فكر تاني..

أولاً الطاجن ملوش لزوم..

ومش محتاجين لحوم..

كل الحكاية..

اكتب ورايا..

ربع لمونة..

وفصين توم..

وشعار البرنامج..

الجوع صحة..

وعلي الله تصحي..

يا وطن م النوم..

أي استفسار..

حد عايز يتخانق..

يتنفس..

يتكلم..

يبرطم..

أنا علي قهوة سعد رزة..

بجوار حسن كاوتش..

أمام مستشفي المقطم..

أشوفكم الحلقة الجاية..

===========================

طوابير وفواتير

طوابير وفواتير..

وحاجات تانية كتير..

ده المشهد..

وده المسرح..

ودول بقي الجماهير..

المهم..

كل يوم وأنا راجع م الشغل..

أعدي ع الست العجوزة

بتاعة الجرجير..

أميل آخد حزمتين..

لعل وعسي..

أعرف أنا مين وفين..

وربنا يكرمني ويتحسن الأداء..

ويتظبط التفكير..

الحقيقة البعد الإنساني ف الموضوع..

كبير كبير..

بس مكسوف أقول للست العجوزة..

فين الدفاتر..

ولا انت رأيك إيه يا معلم..

بقولك إيه..

هو الربيع ما بيعديش علي بلدنا..

معقول السنة كلها أمشير..

سلامتك يا طيب..

========================

عصير فراولة

يا عم أبوس إيدك..

فيه أمل..

ولا حتي احتمالات ضعيفة..

أنا مش بقولك..

ترجع البيضة تاني بتعريفة..

ولا الانتخابات الجاية..

تبقي مية المية نضيفة..

ولا أتقابل أنا والوزير..

ف نفس الطابور..

بدون حرس وأمن وتشريفة..

ولا لما أدخل القسم..

يقولولي ف خدمتك يا مواطن..

ويجيبولي عصير فراولة..

مع ابتسامة لطيفة..

عارف..

هموت وأعرف مين..

بيسرق مني الغطا..

وأنا نايم بالليل..

بجد حركة مش ظريفة..

بس بيني وبينك..

دي غلطتي..

حد يسيب الشباك مفتوح..

ف عز الشتا..

وينام كده بهدوم خفيفة..

حصل خير..

======================

على باب المطار

علي باب المطار ..

لمحت إبليس وف عيونه شرار ..

بقوله مالك ..

قاللي بفكر ف الانتحار ..

بتتكلم بجد ..

قاللي ودي فيها هزار ..

قلتله وإيه اللي جابك ..

قاللي هو أنا كنت عايز ..

بس تقريبا ..

جهاز الوسوسة عندي بايظ ..

محتاج دروس تقوية ف الفساد ..

متعرفش مدرس كويس وحياة أبوك ..

أنا ورايا بيت ومصاريف وولاد ..

تصور بقولهم هناك زوروا الانتخابات ..

وهيصوا وبيعوا كل الحاجات ..

قالولي دي بلدنا ..

إنت أهبل ياض ..

دول حافظين نشيد بلادي بلادي ..

أكتر منكم ..

يخرب بيتكم ..

مابقيتش نافع شيطان ..

يا راجل ده أنا بفكر أتوب ..

وأعمل تواشيح ف رمضان ..

حرام عليكم

=====================

قول كمان

معاك ومعايا

مش فارقة

لا الشعر أصفر

ولا حتي العيون زرقة

وبنهاتي وبنطاطي

ولا لسانه عارف ينطق خواجاتي

وإحباطك .. وإحباطي

مدام جينا وعلي كتفنا تلال الهم والأحزان

نقول كمان

يا طالع الشجرة

هاتلي معاك إنسان

هاتلي معاك إسم

تاريخ ميلاد

عنوان

هاتلي معاك وطن حر

ومواطن مش جبان

وبعدين نبقي ندور

ع اللي ضايع

من زمان

========================

حالة وفـــــــاة

البيت كبير..

لكنه فاضي..

وبارد أوي من جواه..

والشكل بني آدمين..

بس مين روحه معاه..

وعلي أد كبر الألم..

علي أد ما بننساه..

ياه..

مش ممكن يكون..

هو ده شكل الحياة..

ولا دي معاناة..

ولا إحباط..

خايف يكون فيه شيء..

جوانا مات..

ودي حالة وفاة..

======================

للأسف

لما الحمول تزيد

ونرجع ونسأل من جديد

ومانلقيش غير الأسف

ناديت علي القمر أنا

عطشان ونس

بص بخجل ليه واتكسف

ومشيت كتير

وداريت الحزن ف ألف بير

بس اتكشف

مشيت أمل

ومشيت فرح

ومشيت زهق

ومشيت كده من غير هدف

وقلت من قلبي كلام

معرفش ليه كله اتحذف

كان نفسي أغني للسلام

لكن حبيبتي

للأسف

========================

كارت حرية

بُص يَا عَم ..

قبل الماتش ما يبتدي ..

من حقك تختار ..

ملك ولا كتابة ..

ولو ف نص الليل ..

حد جرك من قفاك ..

قول له بقلب جامد ..

فين إذن النيابة ..

وطالما كده كده مسروق ..

يبقى ع الأقل تعرف ..

مين هما أفراد العصابة ..

إنت بس ..

إشحن حرية ..

كارت من أبو عشرة ..

أو عشرين ..

أو خمسين أو مية ..

تلاقي قلبك بقى زي الحديد ..

وقادر تفوت من أي بوابة ..

وتغني للصبح ..

وتقول ع الربابة ..

بس خلي بالك ..

لو رصيدك خلص ..

أو أنتهت الصلاحية ..

هاتتغير العيشة ..

وهاتعرف إن الدنيا كدابة ..

بنت كدابة ..

وهاتفتكر كل اللي راح ..

وتقول الله يرحمك يا أمه ..

ويرحمك بقى يابا ..

لا هتلاقي عيش وملح ..

ولا أصحاب ..

ولا أهل ..

ولا قانون ..

ولا نقابة ..

ساعتها بس هتعرف تفرق ..

بين العصافير والديابة ..

وإن الكلام الحلو ..

والغنا الجميل ..

كان مجرد سحابة ..

وإنك لسة الواد ..

ابن الناس الغلابة ..

وإن لسة فيه خوف ..

ورصاص ..

وعسكر ..

ودبابة ..

على فكرة مش دايماً

الأسد الجدع النبيل ..

بيبقى هو ملك الغابة ..

يا حاج .....

هو أنا ممكن ..

يبقى عندي خط حرية ..

على مهلك ..

وفكر كويس في السؤال ..

قبل ما تقول الإجابة

======================

كفاح الفخفخينا

بيني وبينك ..

مفيش أحسن م المرتبة القطن ..

تعبت أوي م السفنج ..

يظهر إننا محتاجين جراحة ..

بس من غير بنج ..

يمكن الألم يداوينا ..

علي فكرة ..

إحنا تقريبا ماحدش داري بينا ..

يعني كل اللي بنعمله ..

بناخد وندي بس مع بعضينا ..

وأهو ناس تكافح بالصبر ..

وناس تكافح بالفخفخينا ..

والفخفخينا ..

هي اسم الدلع للكحول ..

إزاي نبقي عايشين ف العتمة ..

وتقولي صباح القشطة ..

صباح الفل ..

مش تفتح بقى يا اخينا..

=================

كيس بلاستيك

من كتر ما الحزن رطرط..

مبقاش خلاص يتحس..

فضلت الأحلام..

تتقص تتقص تتقص..

لحد ما بقت ف النهاية..

رغيف..

وكيس بلاستيك.

وبس..

عارف..

بصحي قلبي..

عشان يحب..

قام بقرف..

واتلفتلي وبص..

ورجع نام تاني..

========================

لما أنا مش بتاع كده..

ولا بتاع كده ولا كده..

أمال أنا بقي..

أبقي بتاع إيه..

لما أنا مش شيخ..

ولا فلتان..

لما أنا مش فايق..

ولا سكران..

وساعات يتهيألي..

إن أنا فرحان..

أتنطط وأصرخ..

وأقول هيه..

لما أنا مش أفندي..

ولا فلاح..

ولا شجرة جميز..

ولا تفاح..

لا أنا بتألم ولا مرتاح..

لا عندي شيء استناه..

ولا عندي شيء أبكي عليه..

ولما أنا شايف الحال بقي كده..

طب ساكت ليه..

يا عم أنا مش بتاع كده..

فيه إيه!

=====================

البنت بنتي..

كل يوم تكبر سنين..

حلوين عينيها..

بس ليه..

مش فرحانين..

في السن ده..

وبتقول كلام..

ليه لما تصحي..

بكون بنام..

حاولت أقرب منها..

لاقتني مش عارف أنا..

أبقي مين..

وفتحت قلبي يقولها..

ملقيتش غير..

مصاريف المدرسة..

وفلوس المدرسين..

======================

مطلوب عروسة طيبة

ومتعلمة ومؤدبة

ومؤمنة بالقضاء والقدر

سنها من سني

أصغر أو أكبر مني

مش هنختلف

المهم مبتعرفش تطبخ

عشان مش هقدر أجيب

أي حاجة تنفع للطبيخ

وتكون بتحب القراءة

وتهوى الرحلات

وتعشق السفر

مش عضو في أي حزب

وطبعاً عارفة ان الكدب حرام

بتحب الكورة ..

مهمومة بالدوري العام ..

وملفوفة القوام ..

حلوة وزي القمر ..

شعرها ناعم حرير ..

ملهاش أي مصلحة

فـــ شارع القصر العيني ..

أو مجمع التحرير ..

وفاهمة كويس ميدان الجيزة ..

مش متابعة جلسات مجلس الشعب

ولا بتسمع البيان الختامي

لأي مؤتمر ..

وتكون من عيلة بتشتري راجل

لا عايزة شبكة ولا مهر ..

وأنا بقى .....

خبرة في المرمطة ..

وجميع أشكال القهر ..

مواطن من إنتاج مناهج

وزارة التربية والتعليم ..

ثانوية عامة ...

النظام القديم ..

أيام الأرنب الغضبان ..

والخس والجزر ..

وزي النسمة والله ..

يعني تعتبرني من دلوقتي

مش موجود ..

لا حس ولا خبر ..

بس مخي نضيف ..

وعاقل ورزين ..

وعندي شوية نظر ..

ورغم إني ياما أتزحلقت ..

لكن لسة بفرح بالمطر ..

على فكرة .......

أنا حاجز شقة بحري

أربعين متر ..

أخر طريق الواحات ..

بس لسة محطوش الأساس ..

عشان تقريباً ..

مش لاقيين الحجر

[مغتربة]

بصراحه ملف رائع لشاعر انا عن نفسى اول مره اكتشفه

شكرا جزيلا لكل من ساهم فى تعريفنا بهذا الشاعر الرائع

تم حفظ الملف

[م.سامح المصرى]

فعلا مشكور جدا جدا جدا يا استاذنا س س

جميل جدا

هوا على سلامة بيروح لساقية عبد المنعم الصاوى

بس اخر فترة دى ما بقاش يجي

تعرف يا ريس ان انا لما لقيت شركة فى الزمالك جنب الساقية

رجعت اشتغلت فيها :)

خربوها ….

ومين دول يا بابا ..

وحضرتك كنت فين لما خربوها

كل الناس بتنسى الحتة دى

مع انها كانت اكبر كلمة تعتبر ضحكت الحاضرين فى الساقية ساعتها