عرض وظيفة فى ابو ظبى

[م.سامح المصرى]

السلام عليكم ورحمة الله وبركاتة

أخوانى الكرام كيفكم

ان شاء الله تكونو بخير

انا كنت عايز استشيركم فى عرض جالى من شركة فى ابو ظبى للدعاية والاعلان بعت السى في بتاعى

وتواصلنا على النت وقالى اعمل تست لشركة سيارات

فقمت عملة دول

فراح قالى انتا بتاخد كام فى الشركة الى انتا فيها قلت اقولة الحقيقة بقي

فقلتلة 500 جنية

قام الراجل ما كدبش خبر ورد عليا فى ساعتها وقالى خلاص انا هاديلك 1500

ابعتلى صورتك وصورة من بسبورك

فقلتلة طيب انا موافق بس استنا عليا علشان اعمل بسبور من جديد

بس البسبور مكتوب فية طالب

هوا باين والله اعلم ان المرتب دا قليل شوية علشان سالت واحد معرفة يعنى قالى يعنى نسبيا كويس بس لو تعرف تخلية يعلى المرتب يبقي كويس بالنسبة ليك

هوا علشان ما اكدبش عليكم انا وافقت على طول علشان الى شايفة فى الشركات هنا وبالزات فى المجال دا اغلبة مش كلة

سيء بس الحمد لله

فهل المرتب دا كدا كويس

ولا هوا دا كدا على اد خبرتى دى

يعنى دا على اد شغلى الى فوق دا

واتكلم معاه فى اية تانى غير المرتب وكدة

وجزاكم الله عنى خيراً

تم تعديل 23 أكتوبر 2007 بواسطة Solee

[muslim4ever]

شوف يا اخى سولى

المرتب ده ولا اضاعفة ينفع فى الامارات وراجع مداخلات الاخوة الاعضاء فى هذة النقطة

وبما انى ليس لى خبرة فى مجالك لكن من الواضح انك محترف ماشاء الله يعنى مترخص نفسك

وبعدين الموضوع مش مرتب وبس فيه اشياء اخرى يجب ان تناقشها مثل السكن والعلاج الطبى وتذاكر السفر والاجازة والانتقالات

اتكلم بقلب جامد وخليك واثق من نفسك واستعن بالله

نصحتى لك 500 جنية فى مصر احسن كتير من العرض ده لانه باختصار حتشتغل بالمجان

والله الموفق

[مصرية والنعم]

الاخ الكريم Solee

اولا 1500 ج يعنى تقريبا 1000 درهم بالنسبة للامارات ولا حاجة دة مبلغ يا دوب تاكل بية مش اكتر

حسبى اللة ونعم الوكيل فى الشركة وهى عارفة ان المبلغ دة ما يعملش حاجة فى ابو ظبى

لازم يكون عندك علم ان الحياة فى ابو ظبى غالية جدا جدا وبعدين حتعمل اة فى السكن دة كمان بند لوحدة غير المواصلات ولو حبيت تخرج فى يوم اجازتك

وكمان التامين الصحى لازم يكون متوفر من الشركة

نصيحة من اخت لك عايشة فى ابو ظبى من فترة كبيرة لا تقبل بالراتب دة حتى لو مش حيوافق على شروطك

مبدئيا لازم يكون العقد يتضمن

سكن ودة مهم جدا لان السكن غالى جدا حتى لو حاتاخد غرفة مع شباب مش ممكن حتكون اقل 1800 الى 2000 درهم فى الشهر خالى بالك من النقطة دة ( لازم يكون على حساب الشركة )

2- بالنسبة لتدكرة السفر لازم تعرف كل سنة ولا كل سنتتين

3- الراتب لايقل 4000 0 درهم فى الشهر لو كنت بوفيشينال فى شغلك

4- لو الشركة ماوفرتش السكن لازم يكون بدل السكن مش اقل من 1500 درهم + 4000 درهم راتبك الاساسى

مرة تانية دة نصيحة لوجة اللة من اخت لك فى اللة

وبالتوفيق ان شاء الرحمن

اى سؤال تانى انا تحت امرك

تم تعديل 23 أكتوبر 2007 بواسطة مصرية والنعم

[م.سامح المصرى]

مشكووووووووووووووور جدا اخى

Muslim4ever

يعنى على كلامك كدة ان المرتب دا ضعيف جدا كمان

طب لو كدة اطلب منة كام

هوا شكلة استعيلنى ولا اية

اصل نا كاتب فى السى فى طبعا تاريخ ميلادى :ninja:

[م.سامح المصرى]

مشكورة جدا جدا جدا اخت مصرية والنعم

دا انا كنت هاروح بلاش بس طبعا الى لية اخوات زيكم ما يضيعش

انا هاتفق معاه طبعا بقي من اول وجديد واسالة على الحاجات الى انتوا قلتوها دى

السكن والاجازة وهاتفق معاه على المرتب وهاشوف الحكاية دى بس الباسبور بتاعى مكتوب فية طالب

هل دا فية مشكلة وجزاكى الله خيراً اختى الغالية

[مصرية والنعم]

مشكورة جدا جدا جدا اخت مصرية والنعم

دا انا كنت هاروح بلاش بس طبعا الى لية اخوات زيكم ما يضيعش

انا هاتفق معاه طبعا بقي من اول وجديد واسالة على الحاجات الى انتوا قلتوها دى

السكن والاجازة وهاتفق معاه على المرتب وهاشوف الحكاية دى بس الباسبور بتاعى مكتوب فية طالب

هل دا فية مشكلة وجزاكى الله خيراً اختى الغالية

العفو اخى الكريم واياك

اكيد لازم تغير المهنة فى جواز السفر خالى بالك من كل النقط اللى كتبتها انا والخ الكريم Muslim4ever

ربنا يوفقك للخير

[م.سامح المصرى]

لا اغير المهنة اية

دا انا اساسا طالب

بدرس حاسب الى

وبشتغل فى المجال دا بقالى 3 سنين

انا اساسا عندى 20 سنة

بس فهل دا ينفع انى اسافر

[se_ Elsyed]

واضح يا سولي إنك لسه صغير في السن يعني بتلعب في 20 أو 22 سنة

يا حبيب قلبي لما تدور على شُغل في الخليج أو حتى في مصر لا داعي لذكر أخر راتب لك لإن غالباً ده ما بيطمع فيك صاحب العمل ويقولك ده واقع أو نديله بريزة زيادة وهو يوافق ...

لا مؤخذه الاخ الكفتجي صاحب العمل اللي قالك نديلك 1500 ج هو فعلاً كُفتجي لإن ده مرتب عامل نظافة في الإمارات وكمان شركته لازم تكون موفره له سكن ووسيلة إنتقال ..

إسمع يا سولي

من الواضح إنك موهوب وتُحب عملك .. لذلك ثق في قدراتك ... وما تديش كلمة لحد عن المرتب إلا لما تسأل ذوي الخبرة ، وهنا في منتدى المحاورات لو حتى عايز تسألن عن العيشة في جزر الواق واق هاتلاقي إخواتك الكبار اللي يفيدوك وزي ما قلت لك في أي أبلكيش عمل ما تذكرش أخر راتب لك على قدر ما تذكر إنت عايز كام .. وفي النهاية ده نصيب والموضوع عرض وطلب .

وربنا يوفقك

[se_ Elsyed]

لا اغير المهنة اية

دا انا اساسا طالب

بدرس حاسب الى

وبشتغل فى المجال دا بقالى 3 سنين

انا اساسا عندى 20 سنة

بس فهل دا ينفع انى اسافر

لأ طبعاً لإنك على الأقل لم تقضي فترة تجنيدك الإجبارية أو على الأقل المعافاة ومش هاتنفع تغير المهنة إلا بالشهادة الجامعية اللي معاك وإلا بقى تطلع بمهنة عامل او حاجه من دي .. لو فضلت على مستواك ده وطورت من نفسك مش هاتحتاج تسافر بره وهاتجيب اللي بتكسبه في بلدك بشرط تجتهد وتاخد شهادتك الجامعية مع مهاراتك بكده تعمل شغال عالي قوي وربنا هايكرمك

[م.سامح المصرى]

لو فضلت على مستواك ده وطورت من نفسك مش هاتحتاج تسافر بره وهاتجيب اللي بتكسبه في بلدك

مشكور جدا اخى se_elsayed

بس حضرتك لو تعرف الى بيحصل اساسا فى بلدى هاتقولى روح بأى مرتب

انا الشركة الى انا فيها العم بعد ما علمنى وكل حاجة حس انى بدأت اطلع شغل وكدة غار وبقى ما يدينش شغل اعملة مع ان دا بيزيد من خبرتى بس قلت عادى ابقى اعمل تصميماتى ليا انا فى البيت بقى عاملنى زى ارشيف لية فى المكتب علشان اقدم واحد

فقلتة اسيبة واروح لشركة تانية

روحت اعمل تست على جهاز مش عايز اقولك إمكانياتة عاملة ازاى زى امكانيات اى جهاز فى نت كافية وعملت التست المفروض اساسا كنت بعدل تصميمات عندهم علشان تطبع

وبعد اليوم دا اعدت كمان يومين على جاهز اضعف منه اساسا كنت بعمل بوستر لعميل اعدت اعتذرلة كتير علشان الجهاز كان بيرستر ما كانش بيستحمل الشغل قالى دا مش زنبك دا زنب الراجل الى مش عايز يجيب حاجة كويسة

وبعد اليومين دول بقي الى اعدتهم على الاجهزة دى خرجنى الراجل انزل المطابع واتابع الشغل

تخيل

من بعد ما كنت رايحلة علشان اشتغل مصمم جرافيك نزلنى فى الانتاج ويعتبر نصب عليا فى مرتبى

راح التانى بقي الى علمنى لما لقى ان انا سايب فراغ عندة شوية (بحيث انى اقدم واحد فى الشركة عندة وعارف اغلب الشغل )

كلمنى وقالى انتا كويس ومش كويس وارجع واعد يقولى كلام ورجعنى للشركة مع انى اساسا مش كويس ولا نيلة

ولو تعرف دا بيدينى اد اية من حوالى تلت سنين لغاية من حوالى شهرين كدة بعد ما هوا علانى لوحد مش هاتقول دا مرتب مصمم جرافيك خالص تعرف والله الناس الى كانو بيجو يشتغلو فى البوفية كانو بياخدو مرتب اكتر من مرتبى مع انى كنت ببات فى الشركة بخلص شغل

وبيشغلنى اساسا 11 ساعة او اكتر دا بعد ما زبط المواعيد الى كنت بقضى حوالى من 12 لـ 16 ساعة فى الشركة

ولغاية دلوقتى بعانى معاة العم صاحب الشركة دا بس هوا على ما اعتقد احسن من غيرة هما دول بقى البلد الى انا فيها ودا القطاع الخاص

بس حضرتك افدتنى فى حكاية الباسبور دى

هوا العرض دا اساسا لقيتة على النت وكدة وتواصلت مع الراجل قلت اجرب حظى

وعلى ما اعتقد ان الراجل عجبة شغلى وكدة بس انا ما اعرفش اساسا الحياة برة مصر عاملة ازاى

كل الى كنت عايزة اساسا اروح امريكا او كندا علشان اتعلم الجرافيك (3d) بس ما حصلش نصيب

بس كدة بقي مش هاينفع اسافر ولا اى حاجة

دا الى فهمتة من كلامك

انا اساسا مشكلتى حاجتين السن والدراسة

مش بيقولك

لو كان الفقر رجل لقتلتة

اهو انا بقي لو كان السن والدراسة رجلاً لكنت ولعت فيهم

بس الحمد لله

جزاك الله خيراً على إفادتى

[النسر المصري]

سولي حبيبي

انا هاكلمك من حكم خبرتي اكمني انا بشتغل creative director هن في الكويت.

شوف ياسولي...تصميماتك دي وعلى المستوى ده....وبعد ماتكون عارف فوتوشوب وانديزاين واليستريتور ..... يبقى مرتبك بالميت عشرتلاف درهم غير السكن والسياره........ده راتب الجرافيك ديزاينر العادي ياضنايا....

ولو انت عاوز تبدأ حياتك ....يبقى مش اقل من ستلاف درهم ياعنيا...ماشي

واي حد يكلمك يقولك تاخد كام...تقوله اربعتلاف

وعلى كده وبس...

سلام ياسولي

[م.سامح المصرى]

مشكور جدا اخى النسر المصرى

هوا انا اعرف البرامج دية

والفرى هاند دا بالنسبة للماكنتوش وهما هما البرامج للبى سى العادى بالاضافة للكوريل درو

يعنى انتا رايك ان دا مرتبى طب كويس

بس لو حد سالنى انتا بتاخد كام بقى هاديلة باللوكامية واقولة ما تسالش يا ضنايا علشان هاكدب عليك لو سالت

بس كويس انك افدتنى لانك فى مجالى وحددتلى مرتب على شغلى دا

جزاك الله خيرا

وشكرا لمرورك

تم تعديل 23 أكتوبر 2007 بواسطة Solee

[م.سامح المصرى]

اة اخ النسر المصرى على فكرة

البوستر رقم 5 دى مش فكرتى دى كانت فكرة اختى اساسا كانت اعدة جنبى وانا بعمل البوستر دا

علشان حضرتك طبعا فى المجال واكيد علقت علية ويعتبر مش اد كدة

[النسر المصري]

البوسترات كلها حلوه يا سولي.....وبعدين مش عاوزك تبقى كده طيب وحنين كده....عاوزك تانم تحت الرصيف وتاكل رغيفين سجق بالانلوانزا وتقول بع في اللي يخضك

ما بقولكش تبقى واد شمام ومخدرات وبلطجي....بس لازم تبقى صايع....صايع بأدب

شغلانتنا بالذات عاوزه الصياعه

وإسإل سي السيد وهو يقولك

سلام عشان انا رايح آكل ستيك مونيه استريانو بالسوتيه فورميلو

سلامتوه :ninja:

[م.سامح المصرى]

اة ما انا هاتعلم ان شاء الله ابقى صايع

بس مش عارف اخدها فى اى مركز

اعرف مركز اللمبى فى خلال سنتين اتعلم الصياعة

وانام مش على الرصيف انام فى السجن

[قاهرى]

حرام عليك النسر المصرى بجد .. انت كدة بتعقد الواد فية اية يا عم ....

رناب معاك يا سولو بس هو فعلا راتب مش كبير

بس الموضوع مش موضوع راتب وبس اهم حاجة تكون ضامن السكن والتنقلات وبعدين موضوع الراتب دة يزيد عن كدة طبعا لانك مش جى تصرف اكل وشرب وشكرا ..

اما موضوع انك لسة بتدرس اوعى تسافر وانت مش مكمل تعليمك حتى لو كان اية . هنا حتى لو مش بتشتغل بدارستك الجامعية لازم تكون معاك شهادة علشان حتى تعرف تجيب مراتك لما تفكر تتجوز لكن لو معاك ثانوية وكدة انسى يا معلم ... ربنا معاك

كمل دراستك وبعد كدة هتلاقى الفرص جتلك تانى وبراتب احسن من كدة

[م.سامح المصرى]

اة ما انا هاعمل كدة بأمر الله يا قاهرى

انا بس قلت اجرب حظى لقيت الموضوع مشى بس الى خلانى متمسك بيها شوية

الى بشوفة من الشركات هنا

وانتا طبعا اكيد عارف المصريين والقطاع الخاص بالتحديد

بس جزاك الله خيرا على افادتى

[mesryforever]

الأخ / Solee

أرجو منك شئ واحد هو إنك مترخص نفسك ولو حتى مش هتيجي الشغلانه دي

بإذن الله هتيجي أحسن منها بس أصبر وإتعلم

تصاميمك رائعه - لأني عندي خلفيه مش بطاله بهذا المجال لأني كنت واخدها هوايه أعرف الكثير من برامج التصميم

وأرجو منك أن تتكلم مع هذا الشخص بكل ثقه وثق في خبراتك ومهاراتك ولامتكونش متردد لازم تكون حازم معاه لأنه ده إنسان باين عليه مستغل وحتى لو رضيت بهذا المبلغ إللي مش هيقضيك عيش حاف - هتيجي وهيتعبك جداً

رجاء خاص لأنك زي أخويه الصغير - 20 سنه مش كبير بالإضافه إلى أن عندك مواهب بسم الله ما شاء الله رائعة في مجال التصميم

أولاً : إنك تخلص دراساتك ده أولاً

ثانيا: خلص جيشك

ثالثاً : في خلال دراستك ومن خلال شغلك حاول تطور من نفسك أكثر وأكثر وحاول تتطلع على مجلات أجنبيه ومواقع أجنبيه لأنك بالفعل هتستفيد كتير في مجال التصميم

رابعاً إستعين بالصبر والصلاه وبالدعاء لله إنك تلاقي أحسن مليون مرة من هذا العرض الذي أقل ما يقال عليه إنه عرض مخجل من إنسان أقل ما يقال عليه إنه مستغل

وأخيراً ثق في نفسك وفي قدراتك وإجتهد وخد خبره في بلدك ولو ببلاش وبعدين بإذن الله هتنفتح لك أبواب كتيره أحسن من دي بمليون مرة وأبقى إفتكر الكلام ده .

ونصحية أخرى لا تستغل عمل إلا فيما يرضي الله

وتوكل على الله

وربنا يرزقك رزق حلال طيب

[م.سامح المصرى]

اخى الكريم / mesryforever

هيا الحكاية مش انى مرخص نفسى ولا حاجة الحكاية كلها جهل بالحياة برة عاملة ازاى

ودى اول مرة يجيلى عرض انا لقيتة على فى موقع اميركى كمان فقدمت وعملت التست دا

وتواصلنا وقالى هاديك كذا

فانا من جهلى بالحاجات دى قلتلة طيب وجيت سألتكم

فلقيت انة باين كان عايزنى عامل بوفية ولا اية من الى انتو وصفتوة دا كلة

بس اخى مصرى للأبد انتا عارف بقي صغير واول عرض بس ان شاء الله هالغية اساسا

علشان الدراسة والسن الصغير بقي

بس جزاك الله خيرا على مرورك على موضوعى المتواضع

وافادتى

زاك الله كل خير

[مسالم]

اخي العزيز سولي..

بعد كل ما قيل .. وبعد ما تنهي كافة الاجراءات التي يمكنها ان تعيق سفرك .. مثل الموقف من التجنيد والباسبور وخلافه .. اريد ان ااخبرك بقصة اول عقد تلقيته بالخارج..

قال خير الله ما اجعله خير .. في اوائل التسعينات انا كنت باشتغل في شركة بترول قطاع عام مشترك .. محترمه جدا .. في مصر الجديده.. تحديدا عند تمثال رمسيس .. وحصلت ازمة ثقه بيني وبين مديري آنذاك .. جعلتني اقبل اول عرض اتلاقاه من الخارج .. وكان 2200ريال شامله المواصلات + قيمة 3 شهور بدل سكن .. (لاتنسى ان الجنيه المصري كان اعلى من الريال) .. المهم .. لا خاب من استشار .. سألت .. ايه رأيكم يا جماعه .. قالو بلاش .. انت في شركة محترمه وسعرك (خبرتك) لا تقل عن 4000ريال .. النهايه ماسمعتش الكلام وسافرت .. لأن مصانع الحداد كانت قد اشتغلت بيني وبين المدير .. طيش شباب بقى ..

عندما وصلت الى بلاد ابناء العم .. وجدت ان الشركه وقد استأجرت عماره مكونه من دورين .. الاول ..مقر الشركه .. الثاني .. سكن الموظفين .. يعني بحسبة برما .. تلاقي ان بدل السكن و بدل المواصلات .. في خبر كان ..

الخلاصه اني عانيت كثيرا لمدة 13 شهر مدة عملي مع هذا الكفيل ثم استقلت .. وما صبرني على هذه الشهور هو يقيني بالله وبأن ما أصابني لم يكن ليخطأني .. وبسبب الصحبه المصريه الجميله ممن انخدعوا لنفس الكمين ..

ولكن للحق اقول بأن هذه التجربه افادتني بأنها أعطت لى الفرصه في البحث عن عمل اخر في هدوء وفي قلب الاحداث حيث كنت في موقف احسن لعرض خبراتي بشكل افضل.. بعيدا عن البحث عنها في الجرايد والمجلات .. ومنها انطلقت الى عمل ثاني وثالث وانا في الرابع الان .. ولكن بمفهوم جديد ..

وحتى لا اطيل .. لا اضيف جديدا عندما اقول.. ان الراتب المعروض عليك .. دون المستوى في يومنا هذا .. ولكن ان استطعت ان تضيف اليه بدلات اخرى كالمواصلات والسكن ومكافئه سنويه على الانتاج بالاضافه الى شهر اجازه كل عام شامله التذاكر ذهاب واياب .. والاهم ان يكون العقد قابل للتجديد سنويا .. حتى يمكنك ان تتحرك في صالح مصلحتك إن كان صاحب العمل من ذوي الضمير البالي .. واحسبه كذلك .. وكما يقال.. رب ضارة نافعه ..