حدث في جمهورية انتيكـــــــــــا !!!!!!!!!!

[The Professor]

د. تامر أحمد

مكتب وزير الثقافة: كان وزير ثقافة انتيكا جالسا فى مكتبه يقرأ الجريدة حين استوقفه خبر غريب.. (استقالة وزير المواصلات الياباني). فاستدعى مدير مكتبه على الفور: حسين.. تعالى.. قريت الخبر ده؟ قريته يا فندم. وماله؟ هى ايه الاستقالة دى؟ والله يا فندم علمى علمك. يبقى تدور لنا عليها عشان لو حاجة حلوة نعملها.. اشمعنى اليابانيين يعني.. عندك فكرة فيه وزير هنا فى انتيكا عمل الاستقالة دى قبل كده؟ لا يا فندم. دى اول مرة اسمع عنها. طيب اتصل باليابان كده واستفسر، واعرف القصة بالتفصيل.

بعد يومين، حسين يدخل على الوزير متهللا: لسة قافل مع اليابان دلوقتى. ها.. وقالولك ايه؟ هما قالوا كلام كتير اوي.. بس انا مافهمتش اي حاجة.. مانت عارف سعادتك انهم بيتكلموا يابانى. امال جاى مبسوط ليه كده يا حيوان؟ مانا يا فندم عندى رأى. قول! انا برجح ان الاستقالة دى تكون مثلا ترقية للوزير. ترقية؟.. والله كلام معقول! يبقى نقدم طلب لرئيس الوزراء من بكرة. بس دى حاجة جديدة ويمكن ما يوافقش. لا ماعتقدش.. احنا لسه واقفين معاه وقفة جدعان في الانتخابات، مش معقول هايستخسر فيا حتة استقالة، من بكرة تقدم الطلب، باقولك ايه.. اوعى حد من الوزراء اللى فى المجلس ياخد خبر.. لحسن حد يسبقنا.. عايز اكون اول وزير يبقى معاه استقالة.

رئاسة وزراء جمهورية انتيكا: رئيس الوزراء يتناول دواء الضغط ويحدث كبير الياوران: وبعدين بقى فى حركة هوينا دي.. مش يتلموا شوية بدل ماسود عيشتهم؟ ماهى سودا اساسا يا فندم. بتقول حاجة؟ قصدي هما متحامين فى جمعية حقوق الانسان. يبتلع دواء السكر ويردف: حقوق ايه بس.. هما مش بياكلوا فول كل يوم وعايشين؟.. اعملهم ايه تانى؟ ماهم بيطالبوا بحاجة تانية غير الفول! يتناول منظم ضربات القلب ويتابع: خلاص.. نزلوا لهم الطعمية خليهم يعيشوا عيشة الملوك.. بس بالسعر السياحى.. آه.. احنا مش هاندعم كل حاجة.. اجيب منين؟ لا يا فندم هما بيطالبوا بحاجة غريبة كده اسمها.. اسمها.. (يخرج ورقة صغيرة يقرأ ما بها) اسمها ديموقراطية! يستنشق موسع الشعب الهوائية ويهتف: مين؟ ديمو.. ايه.. الله يخرب بيت الدش اللى بوّظ اخلاق الشعب.. طيب شوفولهم الهبابة دى وهاتولهم منها شوية.. بدل ما كل شوية يقولوا هوينا هوينا.. بس برضه بالسعر السياحي.. احنا هاندعم الكماليات كمان؟.. اجيب منين؟ حاضر يا فندم.. فيه كمان طلب غريب قوى من وزير الثقافة.. يتناول مذيب الجلطة صارخا : خير.. عايز ايه هو كمان؟ لو عايز دعم قوله مافيش. مافيش. اجيب منين؟ لا ده عايز حاجة غريبة اوى عايز اسـ.. اسـ.. السلامو عليكوا.. انت هاتغني؟.. ماتخلص! استقالة! ده يوم ايه المهبب ده!.. ديموقراطية واسقالة.. انا اصطبحت بوش مين بس.. انا قولت البلد دى ماينفعلهاش دش.. تطلع ايه الاستقالة دى؟ والله يا فندم مش عارف. انما نسأل يا فندم. نسأل. تسأل بسرعة يا زفت. حاضر يا فندم.. أى اوامر تانية؟ يجلس على الكرسى المتحرك ويجيب: شغل الدش على قناة ميلوتى وغور فى داهية.

وزارة الداخلية: مساعد الوزير يهتف فى اذن الوزير: مقدم طلب للريس عشان يوافق له على استقالة، ومين عارف الاستقالة دى بتعمل ايه. مش يمكن تخليه يمسك الداخلية كمان؟ يانهار ابوه اسود.. لا ده بعده، الأمن هايفضل مستتب طول مانا فى موقعي. تسألنا على الاستقالة دي فى اسرع وقت. اتصل ببلاد بره اسألهم عنها. معاك رنّــات؟ لا سعادتك.. انا فى السماح. طيب خد موبايلي. احم.. ماهو مسروق يافندم ولسة مالاقيناهوش! والحل؟ فيه حل واحد. اتغدى بيه قبل ما يتعشى بيك، وقدم انت كمان على استقالة. والله فكـــــرة!

رئاسة وزراء الجمهورية: رئيس الوزراء يتمايل طربا على انغام الاغنية ويردد معها (بوص عليا بوص.. انا دانا.. انا دندن.. فتح عينك..تا..) حين يدخل عليه كبير الياوران فيبادره: سألتلنا على الاستقالة؟ ماحدش فاهم حاجة خالص يا ريس.. مافيش حد فى الدول العربية أو الافريقية يعرف عنها حاجة.. حتى فى كل القواميس السياسية العربية مالهاش اثر! امال جابها منين ابن القروبة ده؟ انا سمعت طشاش كده ان فى بلاد بره الرئيس بيوافق بس على الاستقالة للوزير لما يكون عمل حاجة كبيرة اوي. كبيرة ايه.. دول بهايم.. هو حد منهم بيعمل حاجة من نفسه.. كله بتوجيهاتى، طب والعمل يا زفت؟ انا رأيي سعادتك ان كده ولا كده احنا نرفض الطلب، والباب اللى يجيلك منه الريح سده واستريح، اصلها لو طلعت كويسة مش بعيد تلاقى كل الوزراء مقدمين على استقالة! على رأيك.. وهى يعنى من كتر الاستقالات... انا اجيب منين بس؟

وزارة الثقافة: هتف حسين مدير المكتب: الوفد الاجنبى وصل يا فندم. خليهم يدخلوا فورا. استقبل الوزير اعضاء الوفد واخذ يستعرض معهم انجازات الوزارة خلال عشرين عاما قضاها في موقعه. بس ليه كده يا معالي الوزير.. انتوا ليه مش مهتمين بالثقافة؟ ماحنا عشان كده هاناخد خطوة جبارة على طريق التنمية الثقافية. ايه يا ترى؟ هاقولك رغم انه سر.. انا.. مقدم على استقالة. استقالة! ومين هايمسك الوزارة من بعدك؟ انا برضه.. يعنى لما اكون وزير حاف امسكها ولما اخد الاستقالة اسيبها؟ ايوة ماهي الاستقالة كده! يا سلام.. ومابقاش وزير؟ لأ! ايه ده؟ يعنى العز والهايلمان والمرسيدس والستات وكشك الحراسة وكارنيه نادى الشمس.. كل ده هايروح! ايوة وتبقى مواطن عادي جدا. لا يا عم يفتح الله، حسين.. حسييييييييييين... ايوة يا فندم؟ شوفت شورتك المهببة.. هايسحبوا مني الوزارة! ليه يا فندم؟.. هو انت كنت ركنتها فى الممنوع؟ انت بتهزر ياحيوان؟.. بكرة الصبح تروح تسحب الطلب المهبب ده. ما ينفعش.. لازم سيادتك اللى تروح تسحبه بنفسك. اروح.. طبعا اروح.. قال يسحبوا الوزارة قال!!

رئاسة وزراء الجمهورية: رئيس الوزراء يحدث وزير الثقافة: يعنى انت مقدملي على استقالة؟ يا فندم دى غلطة مطبعية.. انا قصدى اصطباحة مش استقالة. ايوة كده يا أخى! قل لنا حاجة نفهمها.. فين الاصطباحة دي؟ يخرج سيجارة ملغمة ويناولها له: صباح العطر ياريّس. صباح التنفّس.. ده صنف عالى اوى.. ابقى سيب منه بره عشان الكل يتكيف. يدخل وزير الداخلية: صباح الخير يا فندم.. انا عايز استقالة. تعالى تعالى.. شد واحبس واتكيف. يا سلاااااااااام.. دى حاجة فوق المزاج. عجبتك؟ دى حاجة فلة.. هي دي الاستقالة؟ ايوة يا سيدى.. مبسوط.. ياللا ياد منك ليه كل واحد على وزارته.. مش اصطبحتوا، شوفوا شغلكوا. الوزيرين فى نفس الوقت: اوامرك.. مساء الخييييييييييييييييييييييير