صرخة من الغربه

[بنت النيل]

مش عارفه هقول ايه ولا اكتب اذاى ؟يمكن يكون الكلام مش مرتب وبالعميه وده لانه كلام من القلب .. كلام نفسى اصرخ به نفسى الاقى اللى يسمع الامى بغربتى

انا بكتب دلوقت وانا طريحه الفراش بعد ماعملت العملية صدقونى وانا فى المستشفى ومقفول عليا الباب لقيت نفسى بعيط مش من الالم لاء بعيط من الام الغربه ووحدتى

التى لم اجد فيها لا القريب ولا الصديق عرفت اننا هنا فى الغربه فعلا بنعرف بعض وبنسأل على بعض بس عشان المظهر الكويس او المصلحة غير كدا مفيش حد بيسأل عن حد

صرخت فى نفسى وقلت ملعونه يا غربه ثمنك غالى .... وحسيت انى فى اللحظات دى لو كنت اقدر اقف على رجلايا لكنت ركبت اول طيارة تودينى على بلدى

كنت مستعدة لاى حاجة فى سبيل انى ارتمى فى حضنك يا أمى لتخففى الامى ومسحة ايدك على راسى

كنت بحلم وتخيل خبطة اخويا على بابى لمواستى فى الامى

كنت بتمنى وجود صديقتى الحقيقية صديقة عمرى لاشكى لها واقولها اللى مش بقدر اقوله مع حد

اكيد دلوقت كتيير هيقول طب مترجعى بلدك ايه اللى مقعدك فى الغربه هقوله صح عندك حق ... لكن هقوله قال ايه اللى رماك على المر .

انا بس حبيت افضفض واطلع احزانى فى بيتنا الكبير اللى بيرحب بينا فى اى وقت افرحنا احزنا مشاكلنا

حبيت اقول واعرف اللى بيحسدو المغتربين اديه احنا بندفع تمنها اغلى م اللى بنخده منها

لكن انا برده بسأل احنا ليه كدا فى الغربه ؟؟ وياترى ده بيحصل فى الغربه بس ولا بقى بيحصل فى بلدنا كمان

معقول الناس اتغيرت للدرجة دى

لكن برده لسه عندى امل ان الخير لسه موجود فى بعض الناس

مره تانية اعذرونى يمكن يكون الموضوع ملوش اهمية لكن صدقونى ملقتش غيركم افضفض شوية معاهم

[Salwa]

الاخت الفاضلة بنت النيل ..

سلامتك الف الف سلامة عليكى ..

ربنا يكمل شفاك على خير ..

غلط تكون نفسيتك وحشة كدة وانتى فى المستشفى غلط غلط غلط ...

مش وقت التفكير فى الغربة ولا فى الاصحاب ولا فى الاصدقاء ولا فى مين جه ومين سأل ؟؟

بس فكرى فى الله وفى قدرته العظيمة وحبه لك وفى شفاك ...وفكرى فى اولادك وزوجك ..فكرى فى كل اللى حواليكى ..

وثقى ان والدتك بالتأكيد بتدعى لك ..وثقى انها بكل وجدانها معاك ...

مفروض نفسيتك تكون احسن ..

لاانتى اول واحدة (( دخلت مستشفى فى الغربة !!!!!!!!)) ......ولا آخر واحدة !!!

امال بقى لو كنتى ولدتى كذا مرة وعملتى كذا عملية قيصرية وانتى (( لوحدك )) ...والا بس (( مرة واحدة اللى كانت والدتك معاكى ؟؟ )) كنتى عملتى ايه ؟؟

روقى دمك ...

اقرئى ما تيسر من القرآن الكريم حتى تهدأ نفسك واستمعى الى الدعاء ...

انظرى الى اولادك واشكرى الله كثيراعلى نعمه التى لاتحصى ..

ان شاء الله حنكتب لك وقت تانى ويارب تكونى افضل ..

طبعاااااا.......

كلنا هنا بندعى لك وفى انتظار رؤية البسمة من خلال كلماتك ..

كل التمنيات بالشفاء ...

[nash]

ألف ألف حمدلله علي السلامه...والله ليكي وحشه كبيرة...

حبيبتي أكيد أحنا بندفع ثمن غربتنا من عمرنا..من أعصابنا ...حتي من أحساسنا بالأمان...علي الرغم من كل المشاكل في المحروسه...لكن والله ماتيجي جنب قعده مع الأهل والأخوات والأصحاب...وتبادل الضحك والقفشات...

صدقيني كل واحد له تجربه مريرة بالتأكيد كلنا مرت عليه هذه التجربه بشكل ما...ولكن الشيء الجميل أن الغربه جعلتنا أقوياء..وأكثر رهافه لإي شيء يمر بنا...والغريب أنها جعلتنا نحب مصر أكثر ونقترب منها أكثر واكثر...

المهم بأة ...ترجعي يا بنت النيل وحتي في (خضم ) >>>المشاغل ماتنسيش أن ليكي اصحاب وقت ماهاتحتاجيهم هاتلاقيهم بجد مش كلام ...

وصدقيني لو أعرف رقمك كنت عملتلك فرح....

ألف حمدلله علي السلامه مرة تانيه...وإن شاء الله ماتشوفيش شر ابدا

وبحول الله وقوته تنزلي مصر وتشوفي كل حبايبك وتتمتعي فيهم...وتقضي احلي الاوقات معاهم

[mesryforever]

الأخت العزيزة / بنت النيل

الف حمد لله على السلامه وربنا يكمل شفاك على خير وتنوري لينا المنتدى عن قريب بإذن الله

[processor]

الف حمدا لله على السلامة يا بنت النيل

وياريت تهوني على نفسك وما تفكريش في أي حاجة ممكن تزيد من تعبك واحنا اخوات في الغربة

وملناش غير بعض وإن شاء الله نسمع عنك كل خير

[badroora]

الف الف سلامة عليكي ويا رب تقومى بالسلامة وتبقي كويسه .

حبيبتي متفكريش كتير انا مقدرة وحسه باحساسك دا للاسف احنا فى الحياه العادية اليومية بنكون ناسيين كل حاجة او بنتناساها لكن وقت منكون فى لحظة ضعف

او محتاجين حد ياخد بادينا ومش نلاقي بتكون اصعب لحظة علينا .

هونى على نفسك يا اختاه وربنا يهون عليكي وعلينا ان شاء الله .

والف الف حمدالله على سلامتك واحنا هنا اخواتك معاكى وجنبك ولو احتجتى اى حاجى فى اى وقت هتلاقينا حواليكى .

والف لا باس عليكي

خد بالك من نفسي

[seeem]

الف الف الف مليون حمدلله على سلامة حضرتك واتمنى الشفاء العاجل والصحة الوافرة

وهوني على نفسك .... بلاش التفكير الكتير فى الغربة ...... عيشي كل لحظة ببسمة وفرح وسعادة ......

افتكري ايامك الحلوة واللحظات الجميلة...... افتكري احلي نكتة قلتيها وابوخ نكتة سمعتيها.......

اتمنى رجوعك بالسلامة .....

[se_ Elsyed]

أظن مالكيش حِجة ترقدي دلوقت .. الزمالك بقى يكسب اهو ووقف على رجليه تاني

بنت النيل يا جدعان بورسعيدية أصيلة ... وزملكاوية جامدة قوي ( بتعصب )

هاقولك على حاجه يا ست الكل ...

- كل نعمة في الدنيا دي ولها مُنغص أو لها ثمن ..

الاولاد ... ممكن يغلبوا الواحد ويطلعوا عينه

المال ... ممكن يبقى نقمه على صاحبة ويتشوي به يوم القيامة

الزوجة .. ممكن تبقى نكدية وتخلي حياة الإنسان جحيم

الزوج ..... نفس الشيء

وهكذا

وكذلك الغُربة ... ممكن الإنسان يحقق ذاته خارج بلده .. سواء أدبياً أو مادياً ... لكن ليس بدون ثمن يدفعه ... وما أنت فيه الإنسان يعتبر شيء بسيط وثمن لا يُذكر .. فبكرة تتعافي بإذن الله وتتذكري تلك الأيام ...

وإنتي بتتمنى تبقى في وسط أهلك في هذا الوقت ... ربنا يستجيب لنا ويجمعنا بهم على خير ..

لكن خلي بالك برضوا ليس كل من يعيش وسط أهله مبسوط ومرتاح ويشعر بالدفء العائلي وما إلى ذلك ...

لي صديق تعرفت عليه في الغربة وهو صديق عمر ... نزل نهائي وأختار الإستقرار في مصر في أوخر التسعينات بعد 4 سنوات لقيته بيقولي أنا مسافر الإمارات أشتغل .. أستغربت مع إنه أول ما نزل إشتغل في شغلانه مرموقه يتمناها أي محاسب فينا وكان دخله ما شاء الله حوالي 3000 ج شهرياً ... فسألته بإستغراب ليه ؟

قالي ما تتخيلش إن السفر تاني كان شيء مُستبعد بالنسبة لي تماماً .. لكن من فترة زوجتي تعبت ودخلت المستشفى وحسيت بالعجز والحزن عندما لم أجد مع مبلغ أتسند عليه وأصرف منه عليها ... فقررت أسافر لي 3 أو 4 سنين وأهو هاكون عامل حفظ وظيفة وأرجع تاني ...

فتخيلي ربنا يعافينا جميعاً حد منا يحصل له ظرف زي ده ويلاقي ضهره للحيط .. وبالتأكيد مع تعاطف الأهل والأحباب لكن العجز المادي إحساس مُر ربنا ما يحكم به على احد ....

ربنا يعافيكي عشان خاطر اولادك ... ولو إنتي مش شغاله ممكن تنزلي مصر إسبوعين تلاتة في اجازة نصف السنة وتغيري جو وترجعي مرة ثانية زي الفُل .

[Folana]

السلام عليكم ورحمة الله...

مش عارفه هقول ايه ولا اكتب اذاى ؟يمكن يكون الكلام مش مرتب وبالعميه وده لانه كلام من القلب ..

اسمحى لى اقتبس منك الجملة دى علشان ابدأ بها كلامى....

حمدلله على سلامتك..أنا قرأت كلامك صباحا ولم أتمكن من الرد لشعورى بألم وحزن يعتصر قلبى..فلم اجد الكلمات التى اسطرها لك....

واكيد مش أنا لوحدى..أكيد الالاف غيرى من اللى قرأوا موضوعك..سواء كتبوا لك ام لا..سواء تعرفيهم ولا لأ...أكيد كلهم شاركوكى لحظات ألمك..واكيد كلهم دعوا لك بظهر الغيب..

ألا يكفيك هذا الشعور ليدخل السرور الى قلبك ونفسك...أن تعلمى بأن هناك ولو فرد واحد فى الدنيا الكبيرة قوى والصغيرة قوى برضه..بيفكر فيك ..ويتألم لالمك ويدعو لك بظهر الغيب..

مش حأقولك لك حق ايوه..ولازم ولابد..ومن حبنا حبناه والكلام اللى لا يودى ولا يجيب ده...لكن حأطلب منك انك تلتمسى العذر لكل من منعته ظروف لا يعلم بها سوى الله ان يتصل بك...ويسأل عنك..

تعرفى يا بنت النيل..جميعنا قد مررنا بمحن..وابتلاءات...كان كل موقف يمر بى مثلا..يلين قلبى ..واشعر قد ايه الانسان لما يكون تعبان او فى شدة بيكون محتاج ناس حواليه تحسسه انها بتحبه ومهتمة لامره...وعمرى مافكرت مين عمل ايه ومين ما عملش..

اتعلمت من الشدائد انى لازم اتواجد بجانب اى شخص محتاج ولو انى اشد على ايده علشان يقوى ويشعر بالمشاركة وبان هناك من يهتم لامره..حتى لو عدوى..وحتى لو كان أذانى...

صدقينى احساس بيضيف سعادة لك وراحة بال.....لكن الضيق والحزن لا يجلبوا على النفس الا اضعاف هذا الاحساس السىء...

انظرى الى نعمة ربنا سبحانه وتعالى وفضله عليك..انك قادرة تكتبى لنا وتعيشى معانا لحظات دفء واخلاص...

انظرى لاولادك وزوجك..ربنا يخليك لهم ويخليهم لك....طيب تصدقى بالله..قولى لا اله الا الله...انا عاملة زى جحا بالظبط لما سألوه بلدك فين ..قال اللى فيها مراتى..

يعنى احنا الاربعة نكون مع بعض فى اى مكان يارب نروح المريخ..مش مهم مادام مع بعض...اللى يسأل اهلا وسهلا..واللى مايسألش حياه الله...

وبعدين ياجميلة انت فى فترة نقاهة ...ابسطى نفسك بقى وعوضى اولادك عن فترة قلقهم عليك ...وتأكدى ان كل من حولك فلى غربتك..وبعيد عنك بيحبوكى ويتمنوا لك الخير ويدعون لك بالصحة والستر والاهم راحة البال والرضا.....فالتمسى لهم الاعذار..لانك مش عارفة ظروف غيرك ايه.....

ويارب تفضلى معانا ..ومنورنا..لانك وحشتينا..من غير مانعرف انك كنت تعبانة ....

وصباحك جميل........

[بنت النيل]

السلام عليكم

بجد مش عارفه اوصف لكم سعادتى دلوقت اللى كنت متأكدة انى مش هلاقيها غير هنا بين الاحباب والصحبه

وبشكر كل الشكر اللى قاموا برد عليا كل شخص باسمه ومن كلامه اللى فعلا وسانى فى الامى ومعلش بتأخر فى الرد لكنى كل ما بشوف نفسى اقدر اكتب بدخل على طول

كمان احب اقول الحمدلله على كل شىء والحمدلله كمان ربنا رزقنى بزوج ربنا يكرمه ويعطيه العافيه هو وكل أمثاله من الناس مش مقصر معايا بأى شىء

صدقونى انا جانى الاحساس ده لما لقيت مقفول عليا باب الغرفه ولوحدى واكيد كتيييييييير مننا مر عليه هذه الظروف ويمكن اصعب منها لكن برده الواحد بيصعب عليه نفسه لما مش بيلاقى حد حتى بيسأل عليه فى حاجه ذى كدا وطبعا مش بلوم اللى مكنش يعرف

لكن انا قلت ايه فى كلامى (( لسه عندى امل ان الخير لسه موجود فى بعض الناس )) لان فعلا فى ناس اول ما عرفت لم تتأخر عنى

انا بجد سعيدة بوجودكم معايا وسعيدة بوجودى معاكم وربنا ما يحرمنى منكم ويعطيكم الف عافيه

ويارب يهون على كل مغترب و كل انسان بعيد عن اهله وبلده

ويجعل ايامك خير وبركه

[Handicraft]

بسم الله الرحمن الرحيم

"وإذا مرضت فهو يشفين"

الأخت العزيزة بنت النيل ادعو الله ان يمن عليك بنعمة الشفاء العاجل ومتعك الله بالصحة والزوج الصالح والأبناء البررة

اخوك هاندى

[Diab]

جميلة جدا هي تلك المشاعر التي تتدفق

ما أقلها هي تلك المواقف التي تولد فينا التفكير بالقلب لا العقل

الغربة اختي الكريمة مثل اي شي جميل في الدنيا

يوجد به مايعكر صفوه ولكن

الأجمل هو ان تحيي تلك الحياة بآلمها وآمالها

"لَا أُقْسِمُ بِهَذَا الْبَلَدِ (1) وَأَنتَ حِلٌّ بِهَذَا الْبَلَدِ (2) وَوَالِدٍ وَمَا وَلَدَ (3) لَقَدْ خَلَقْنَا الْإِنسَانَ فِي كَبَدٍ " البلد آية 3

أسأل الله العلي العظيم ان يمن عليكي بالصحة والعافية

تحياتي

[النسر المصري]

ايه ده ...امتى وازاي وفين..... ده انا لسه كنت معاكم من اسبوعين...اقوم اعرف فجأه كده من النت!!

الف الف مليون سلامه عليكي يابنت النيل ياغاليه...والف حمدالله على سلامتك!!

ربنا وحده يعلم قد ايه الكلام ده دخل ف قلبي زي السكاكين....لكني مع كلام مدام سلوى

مش وقت تفكير في الحزن ده... اهم شيء ربنا وبس

سيزتي العظيمه ..انا هادعيلك دعوتين

ان ربنا يقومك بالسلامه ويسعدك في حياتك ويريحلك بالك ياقادر ياكريم

وان الزمالك ياخد الدوري السنه دي عشان تحسي بنشوة النصر زي ماحسيناها احنا (بقولها من تحت ضرسي )

أم محمود ياغالية.... سلاماتي لك ولزوجك الكريم وللأولاد

أخوك عمرو

[amrhoras]

مين بس مزعلك حمد الله على السلارمة يابنت بلدى والله اول مره اشوف الموضوع

اخوكى عمرو بيمسي عليكي الان من الغربه برده

بصى الغربه دى تمن وبندفعه بعد عن اهلنا وارضنا واصحابنا وانتى اعتقد اعتقد مفيش حد حوليكي بس لو بصيتي هنا حتلاقي مصر كلها بتقولك الف سلامة وكلنا نتمنالك الشفاء العجل

لو سمحتى نظره بسيطة كدى وابتسامه عريضة عشان الدنيا ترجع تضحك تانى بقى بنت بلدى قاعده ونفسيتها كدى واحنا موجودين

ان كان زى ما سي السيد قال انك بورسعيديه فاحنا نتصل علطول بابو العربي ونخليه يلم ولاد البلد ونيجي نزورك اه صح نسيت معلش معنديش طياره طيب حاخدلى سفينة صحراء واجيلك جرى بس انتى توقعى وصولى على 2010 يكون المونديال بتاع كاس العالم بدأ اتفرجي عليه وسلي نفسك عقبال ما اشوفلى جمل كده صحته حلوه

روقى كدى والف مليون حمد الله على السلامة واسف على التأخير الجمل كان متعطل اصل الديزل فى السنم بتاعه خلص واضطريت انزل ازوق عارفه بقى الموديلات القديمة

عزيزتى بنت النيل مليون حمد الله على سلامتك ويارب تقومى كدى بالسلامة ومنتظر خبر انك خرجتي بالسلامة وكلنا حوليكي بقلوبنا انشا الله

اخوكى عمرو حورس غير النسر المصرى خالص ولا ايه ياعم نسر يارب الاهلاويه يتغلبو 10 صفر والزمالك يغلبو 20 صفر بس مين مش عارف :D أصلى محبش الكوره بعيد عنكم بس اهوه عشان خاطر بنت النيل

بقولك ايه ياعم نسر احنا كدى حنعمل قفله يا انت يا انا اللى نغير الاسم :D :D

تم تعديل 3 نوفمبر 2007 بواسطة amrhoras

[hooba]

قال رسول الله صلى الله عليه وسلم : (ما يصيب المسلم، من نصب ولا وصب، ولا هم ولا حَزَن ولا أذى ولا غم، حتى الشوكة يُشاكها، إلا كفَّر الله بها من

خطاياه).

وقال عليه الصلاة والسلام: "ما من مسلم يشاك شوكة فما فوقها، إلا كتبت له بها درجة، ومحيت عنه خطيئة"

ربنا يشفيكي و يعافيكي .....و يقومك بالسلامة ان شاء الله ....و يقصر علينا الايام بعيداً عن الاهل.

ايهاب

[أسد]

الأخت الفاضلة .. بنت النيل ..

بلدياتي ...

ألف حمد لله على سلامتك ..

معلش .. دي من مشاكل الغربة ... إن الواحد بيكون لوحده لما بيكون عايز حد من أهله وأحبابه معاه ...

وبيكون أحياناً بعيد .. لما بيكونوا الأحباب محتاجين له ....

لكننا خلقنا في هذه الدنيا لنشقى .. وهذه سنة الحياة ..

وتذكري أن ما تمرين به الآن .. هو أهون بكثير جداً مما يمر به بعض الناس .. والحمد لله ..

الحمد لله الذي لا يحمد على مكروه سواه ..

وألف حمد لله على السلامة مرة تانية

[darlengs]

اختي الحبيبه بنت النيل والله انا لسا دخلا حالا و شيفا الموضوع 00 الف سلامه عليكي 00 ربنا يتم شفاكي علخير00والله بكيت لاني حسيت بيكي جدا لاني مريت بنفس الموقف تماما السنه اللي فاتت و كانت اول سنه غربه ليا 00صدقينيي التجارب اللي زي دي بعد ما بتنتهي بتقوي الواحد اوي و بتقربه من ربنا 00 و انا في المستشفي حسيت اد اي ربنا كريم معايا و مع ولادي التلاته اللي كنت سيباهم في البيت لوحدهم 00 كنت بهونها علي نفسي و اقول الحمد لله انها جت علي اد كده 00انا معرفش انت فين بالضبط انا بالكويت لو كنتي في نفس بلد غربتي عرفيني انتي فين و انا اجيلك والله انا مش بجامل 00احنا اخوات 00 و اصلي اكتشفت في اخر المداخلات انك بلدياتي 00 ربنا يوفقك و ييسر امورك 00 و يصلح احوال الجميع 00

[أفندينا]

1000 مليون سلامة عليكى يا بنت بلدى

الغربة مرار

[حسام يوسف]

السلام عليكم اختى العزيزة

انا عضوجديد فى المنتدى

ومتشرفتش بمعرفة حضرتك قبل كدة

لكن كلامك كان صعب اوى

الف سلامة عليكى

ودى كلها ابتلاءات من الله سبحانه وتعالى

ربنا يديكى الصحة

والحمد لله من قبل ومن بعد

[نانو]

يا حبيبتي ألف ألف سلامه عليكي angl::

إن شاء الله ربنا يتم شفاكي علي خير

وتقومي بالسلامه و أنتي عارفه إن الموضوع كله شكه دبوس angl:: زي ما قال اللي كان السبب :blink:

المهم والأهم إني عايزاكي تستغلي الأسبوع ده كل يوم علي الأقل 20 مداخله علشان وحشتينا :cry1: