سين سؤال : خطك حلو ولا ... نكش فراخ ؟

[se_ Elsyed]

بسم الله الرحمن الرحيم

الإجابة : نكش فراخ ....

بس هو مش نكش فراخ أوي لإن اللي يشوف بلاوي الناس تهون عليه بلوته ... يعني نقدر نقول نكش فراخ بداره مزقلطه وحلوه .. ييجي منها .... والواحد بيشوف خط ناس تانيه ... خط دكاترة صحيح

إلا ليه صحيح الدكاترة كلهم خطهم بوهيمي سيرالي تجريدي لا يُصد ولا يُرد ولا يرى بالعين المُجردة ؟

يمكن عشان ما بيبقاش عندهم وقت يحسنوا خطهم ؟

بس ده ماله ومال جمال الخط ؟

والحمد لله إن ربنا رزقنا بنعمة الكمبيوتر وإلا كان الواحد بقى شكله رخم في حياته ... يعني قليل دلوقت لما الواحد بيستخد القلم في حياته العملية في كتابة خطابات مطولة مثلاً ....

لكن السؤال اللي محيرني : هو جمال الخط له دخل بالجينات الوراثية ؟

يعني ممكن تلاقي عيلة مثلاً أفرداها مشهورين بالخط الكويس ... وناس تاني خطهم نكش فراخ ؟

أصل ده حصل لي .... فانا وإخواتي سننا مقارب لسن أولاد خالتي ... لكن كلنا خطنا نكش فرخ ..

وولاد خالتي ما شاء الله ولا خط الخطاطين .... الغريبة بقى إن أولادهم طالعين زيهم .....

وأتذكر ولد زميلي في فصلي في المرحلة الإبتدائية كان خطه والله وبدون مبالغة اجمل من خط الكمبيوتر أو الورق المطبوع ... لكنه كان بطيء جداً وله مذاج يحنتف ويجمل الكلام بطريقة تُثير الأعصاب .. لكن كل ما كان يكتبه كان يُثير دهشة الجميع من تلك الروعة والجمال ...

وللاسف الشديد خلال المراحل الدراسية المختلفة كنا بنستلم كراسة خط عربي مع المُقرر في أول السنة .. لكن عمري في حياتي ما لقيت مدرس دخل وقلنا تلت التلاتة كام .. وغالباً كانت الكراسة دي الكل بيرميها أويعملها قرطاس طعمية من غير أي إستفادة .. زيها زي مقرر الموسيقى أو الألعاب ...

ولا أخفي تحيزي الشديد للخط العربي اللي به مرونه وقابلية للتشكيل تضاهي جمال اللوحات الفنية التي بها رسومات كائنات حيه او مناظر طيبعية ...

واتمنى من كل قلبي أن يُعيد القائمون على المناهج الدراسية نظرهم في تلك المناهدج العقيمة ويشيلوا منها الحشو ويضعوا مواد مفيدة بدلاً منهم ومنها مادة الخط العربي اللي تُحبب الطلبة في لغة القرآن .. لغتهم العربية

ومن الأخر بقى : خطك حلو ولا تبع حزب الفراخ ؟

[se_ Elsyed]

نماذج خطوط عربية أكثر من رائعة

[قديم]

اهلا بيك عزيزي سي سيد ونا مش عارف تنكش المواضيع ازاي ..

ممنوع التنكيش ....

والله وجيت على الجرح يا سي سيد .

مووضع الخطوط . اعتبره من المواضيع الحساسه في حياتي زي الحديث عن السياسه في بعض الدول العربيــه . اهرب من اكلام فيه .

لان خطي والله الحمد يقرا مره واحده . ولو راجعته مره اخري ممكن تقراه بمعني اخر .

المهم كعربي لا يصعب عليه وجود البديل والحجه . فاستعنت بالله وبالامثال الشعبيه ووصلت حكمه جعلتني افخر بخطي وتقلل من الملامه . ولو موقتا

(( الخط ما قرئ , والباقي صنعــه))

ومن يومها صرت اهزء بالناس الصناعيه الي يكتوب ويرسمو اجمل الخطوط

حاولت سرا البحث عن حل للعقده . فكان التلقيت بزميل خطه منتهي الروعــه والاتقان . والرسم الجميل . وكانني وجدت ضالتي . فسالته وهو يكتب . ولا تزال ريشه قلمه على الورقه . هذا خطك.. قال انت شايف ايه ..!!!!

انتبهت . فقلت له اصل انا بصراحه خطي اجمل منك.!!!!!.؟؟؟؟

فابتسم لي وعرف عقدتي فقال :_

انا كان خطي اجمل من كدا بكثير . وبعدين روحت معهد تحسين الخطوط وتعلمت فيه لمده ستت اشهر . والان زي ما نت شايف ..

كان حديثه جميل وحمسني كثير للالتحاق بالمعهد ولكنني لم اجد نفسي مهتما

فالعلم في الصغر كالنقش في الحجر .!!!

ويبقي سؤالي .

للاخوه الكرام . هل بالامكان تحسين خط من سنه يقارب الاربعين .؟؟؟ وهل يفيد ؟!

وشكرا للجميع

[se_ Elsyed]

فالعلم في الصغر كالنقش في الحجر .!!!

ويبقي سؤالي .

للاخوه الكرام . هل بالامكان تحسين خط من سنه يقارب الاربعين .؟؟؟ وهل يفيد ؟!

إسمح لي يا جديم ياخويا أصحح لك حاجه بسيطة

التعليم في الصغر كالنقش عالحجر .. هو مثل يُطلق على قدرة الأطفال الصغار على التعلم بشكل أسرع وأوسع من الكبار لإن ذاكرتهم بتبقى أنقى وما فيش في دماغهم مشاغل كتيرة ... يعني أعرف أطفال في أوروبا بيبقى في المرحلة الإعدادية أو الثانوية ويتحدث 4 لغات بطلاقة لإنه بدأ من صغره يتعلمها ...

ولكن ليس معنى ذلك إن التعلم في الكبر صعب

أبداً كل حاجه بالتعود والصبر والمثابرة يُمكنك أن تتعلمها إن شالله لو اللغة الصينية ...

أنا عن نفسي في الأوقات العادية ممكن أكتب خط دكاترة ... سريع وغير واضح إلى حد ما ..

لكن في الدراسة وخصوصاً الدراسة الجامعية كنت في الإختبارات بأبقى ولا " خضر البورسعيدي " ده على فكرة أشهر خطاط في مصر ... لإن الدكاترة بتوع الجامعة ما بيهزروش وكمان صبرهم قليل وبالتالي .. لو كتبت خط وحش مش هايتعب نفسه ويقرأ وهايروح مشيلني المادة من سُكات ...

ومش عارف حتة المعهد بتاع الخط دي هاتبقى صعبه شوية ...

لكن الأسهل منها هو الكتابة بتأني ومحاولة تحسين الخط على قدر المستطاع وتوضيح الحروف ... زي أبويا الله يرحمه لما كان كل شويه يجي من ورايا وأنا بأذاكر ويروح مديني بالبوكس على ضهري ويقولي : حسن خطك .... حسن خطك ..... لحد ما ضهري إتحنى من كتر الضرب .... العجيب بقى إن خطي ما اتحسنش

[Diab]

بصراحة كنت زمان بتحنتف واقعد اجمل في الخط بتاعي وكان لله الحمد من اجمل الخطوط بس بعد واحدة زميلتي في اعدادي عقدتني 3 سنين في حياتي

في ثانوي نسيت الموضوع

في الجماعة في ناس كان خطها حلو بنصور منها المحاضرات رجعولي العقدة القديمة

بعد كدة حطيت لنفسي مبدا حلو ماشي عليه

ايه فايدة الخط الجميل طالما مش بتستفيد منه

يعني لو عندك امتحان بعد اسبوع مثلا وعندك مادة عاوز تخلصها وتحل ملازم وامتحانات

بالله عليك

هتقعد تقول ياتري اكتب في الأمتحان خط نسخ ولا رقعة

بصراحة يبقي تهريج

المهم هو ان خطك يتقرا وميبقاش وحش يعني بس يكون واضح والفونت مناسب

والحمد لله كفاية علي كدة

والكمبيوتر مسهل الحكاية خالص دلوقت

لانا احمد شوقي ولا محتاج الخط الجميل في شيء

بس كدة

تم تعديل 3 نوفمبر 2007 بواسطة Diab

[semsema]

خطي طبعا يعني طبعا وبدون كذب ولا مبالغة ولا تفاخر B)

نكش فراخ.....

ومش اي نوع ...لأ...... انا اقصد الفراخ اللي بتبأى ع السطح في مصر او في الحوش.... :P

المعلمات يقولولي انتِ ازاي متفوقة angl::

وخطك عامل كدا.... :blink:

دا بالنسبه للعربي

اما الانجليش فخطي ولا احسن خطاط انجليزي angl::

الغريب بأى ان اولاد اعمامي كلهم خطهم يجنن...................اشمعنى انا يعني؟؟ :cry1:

[النسر المصري]

نكش فراخ... :cry1: ...انا طول عمري بسمعها نقش فراخ...مش نكش....اتعلموها بقى الله هدكوا :blink:

انا والحمدالله.....فنان من صغري...احب الرسم والتلوين والخط والقص والنحت والتطريز وححتى تزويق الطعام ...

بشكل عام....بحب الجمال

وعشان كده

آي دوووو angl::

عموما الخط والكتابه الجميله لها علاقه مباشره بالتدريب....للاسف يهمل الكثير من الآباء والامهات في تدريب اولادهم على الخط الجميل....

واذكر ان اخي الصغير كان وما زال يكتب بالمقلبو...يعني يخلي الكراسه ملفوفه ميه وتمانين درجه بحيث لو قعدت انت قدامه تقرا اللي بيكتبه معدول(يعي بيكتب السطر مقلوب)...مش عارف وضحت ولا لسه

المهم ان خطه كان وحش....وقعدت على قفاه شهر واحد بس.....وعنها ياسيسو.......من يومها وهو فنان...النهارده هو احسن خط صيدلي في الدنيا.....

وعشان كده.....آيي دوووووو angl::

[amrhoras]

الحمد لله الحمد الله خطى حلو مش بطال :blink:

بس مشكلة بتضايقنى ساعات

وخصوصا من الناس

بيقعدوا يبصولى كتير ويتعجبوا

ليه بقى

عشان انا بكتب :cry1: عكسهم

فيها ايه لما اكتب بالايد الشمال يعنى؟

ههه لدرجة الناس هنا بيقولولى استغفر الله العظيم زى مايكون ارتكبت معصيه عموما الخط مش بطال بس كبير حبتين

والسبب فى كدى بابا بصراحة له الفضل الكبير وهو اللى علمنى الكتابة والاملاء قبل ما ادخل المدرسة angl:: واحسن حاجة النقط دى اجمل طريقة لتعليم الخطوط

بس اللى مزهقنى هنا نظره الناس للانسان الفضائي اللى بيكتب بايده الشمال عجيبه دى ولا ايه وخصوصا هنا فى السعودية لدرجة واحد بيقولى استغفر الله العظيم angl::

لا اله الا الله اخوكم عمرو حوووورس

[semsema]

نكش فراخ... angl:: ...انا طول عمري بسمعها نقش فراخ...مش نكش....اتعلموها بقى الله هدكوا :blink:

:

اعتقد والله اعلم ان نكش هنا تعني (مبعثر وغير مرتب)

نكش ينكش نكشا..............بعثر يبعثر بعثرة

ولما نقول فلان او فلانه شعره او شعرها منكوش .....يعني مبعثر وغير مرتب angl::

ومن هنا جاءت كلمة نكش

اتمنى اكون اوضحت واوجزت .......

بس اللى مزهقنى هنا نظره الناس للانسان الفضائي اللى بيكتب بايده الشمال عجيبه دى ولا ايه وخصوصا هنا فى السعودية لدرجة واحد بيقولى استغفر الله العظيم

ليه بأى؟؟؟؟ :cry1:

انا اكتر اصحابي السعوديين بيكتبوا بالشمال.....وعادي خالص

سبحان الله ......حاجه غريبه B)

تم تعديل 3 نوفمبر 2007 بواسطة semsema

[miramar]

إلا ليه صحيح الدكاترة كلهم خطهم بوهيمي سيرالي تجريدي لا يُصد ولا يُرد ولا يرى بالعين المُجردة ؟

ده

كلوا الا خط الدكاترة انا بابايا دكنور وخطه اجمل من اجمل خطاط

و كل روشتة بيكتبها بايده بتبقى ولا لوحة من الي انت جايبهم يا سي السيد

و الحمد لله مفيش غيري ورث حكاية الخط دي

و انا خطي حلو بس مش زي بابا قوي

و على فكرة هي زي ما قال النسر نبش فراخ مش نكش فراخ

و على فكرة يا عمرو باشا الكتابة بالايد اليسرى من علامات العبقرية

بيل كلينتون كان بيكتب بايده الشمال

بص على الرابط ده

تم تعديل 3 نوفمبر 2007 بواسطة miramar

[badroora]

انا بقي خطى مش نقش فراخ وبس لا والله كأنك رابط القلم فى رجل فرخه وفرخة عصبية كمان .

بس انا لى اسباب اولا دادى من صغرنا كان بيجبلنا الكترونك بنزسلز فكنا بس نضع الالكترونك بنسل على السطر ونقوله اكتب كذا يكتب لوحدة :blink:

لا صحيح موضوع الخط بيتوقف عليه عدة عوامل

الاول كما قال الفاضل س س

وراثه يعنى تلاقي عيلة باكملها خطها وحش وعائلة اخرى خطها حلو

انا بقي العكس والدى واخواتى خطهم غيري خالص

اما انا عشان المدرس منه لله كان يدينا صفحة ووقولنا اكتبوها 10 مرات اقوم انا اكتب بسرعة العشر مرات عشان الحق العب واليوم ميضعف فى كتابه الهوم ورك angl::

والاهم من كدا ان كل العباقرة خطهم وحش ونقش فراخ .

فلذلك اى دديدنت بوظر مى سيلف تو امبروف مى هاند ريتنج حتى لا اتجرد من عبقريتى angl::

تم تعديل 3 نوفمبر 2007 بواسطة Badria Mekkawy

[Folana]

السلام عليكم ورحمة الله...

:blink: الله..!

هى سين سين يعنى سين سؤال؟....

الحمدلله خطى جميل..فعلا مش مجاملة angl::...مش بأجامل نفسى يعنى...وأحب الخطوط الجميلة...احيانا بأنسى فحوى الموضوع وأبدى اعجابى بالخط ..

أعتقد ان جزء منه وراثة وجزء اجتهاد...ابويا رحمة الله عليه كان خطه رائع...ويكتب جميع انواع الخط العربى...(تعليم أزهرى من بتاع زمااااان )..انا واختى بس اللى ورثنا منه جمال الخط وتنسيقه.....وللاسف ماحدش من بناتى ورث جمال الخط..كله نبش الفراخ العصبية بتاعة بدرية دى......

ولو انى اعتقد ان هدف اخونا سين سؤال هو شرح انواع الخط العربى..مش كده ولا انا السهر أثر على تحصيلى؟

حاكمل فى الصباح لانى سامعة الديك صاح...

[zizetta]

[quote

للاخوه الكرام . هل بالامكان تحسين خط من سنه يقارب الاربعين .؟؟؟ وهل يفيد ؟!

لسلام عليكم ورحمة الله

قال عز وجل ( ن والقلم ومايسطرون ) وقال تعالى (إقرأ وربك الأكرم الذي علم بالقلم علم الإنسان مالم يعلم) وقال علي بن أبي طالب رضي الله عنه : ( عليكم بحسن الخط فإنه مفاتيح الرزق- وقال أيضا : الخط الحسن يزيد الحق وضوحا)

وقيل في الخط الجميل :

"إذا كان الرسمُ ضرباً من الشعر الذي يُرى و لا يُسمع،

و الشعرُ ضرباً من الرسم الذي يُسمع و لا يُرى،

فإنّ الخط وسيلتهُ اليدُ الشاعرة التي تَسمع و تَرى."

و قيل أيضا :

الخط هندسة روحانية ظهرت بآلة جسمانية

الخط نزهة العيون وريحانة القلوب

الخط للأمير كمال وللغني جمال وللفقير مال

وقال الشاعر:

تعلم قوام الخـط يا ذا التأدب فما الخـط إلا زيــنة المتأدب

فإن كنت ذا مال فخطك زينــة وإن كنت محتاجا فأفضل مكسب

و قيل أيضا :

الخـط يبـقى زمانا بـعد كاتبه وكاتب الخط تحت الأرض مدفون

ما أعلاه منقول وما تلاه مسطور.. ( لأ دي من عندي أنا مش تبع اللي فوق) :blink:

أحب أن أرد علي هذا السؤال بنعم ممكن تتعلم وأنت في أي سن .. وقد مررت بتلك التجربة عملياً ( بغض النظر بقى عن موضوع السن علشان ما نزعلش مع بعضيتنا ) angl:: ...

يجي من يا سيدي .. قد كده ... تقريباً يعني ... قول مثلاً ... كام سنة كده .. كانت إبنتي في نهاية المرحلة الإبتدائية وكنت أنا أحب الخط الجميل (علي فكرة هو وراثة برضة) وكنت أتفنن في كتابة إسمها علي الكراسات وأعمل شوية حركات كده في الكراسة علشان تكون جميلة وكنت بعمل لها لوحات المدرسة .. وكنت أريد أن يكون خطها جميل حتى اني طلبت من أحد الخطاطين ذات مرة أن يعطيها دروساً في الخط الا انها رفضت .. وذات يوم كنت في أحد المساجد الكبيرة وكنت أستفسر عن الأنشطة (أصل أنا هاريتها في كل صيفية أنشطة ولحد دلوقتي وهي في الجامعة الآن ) ليه بقي لأن مبدأي أن العلم لا يضر أبداً وإن لم تستفيد منه الآن حيجي يوم تستفيد منه ..

المهم يا سيدي ما أطولش عليك عشان ما تنامشي مني (قوللي طولي) .. angl:: ألحقتها بدورة تدريبية لتحسين الخط العربي .. وطبعا هي كانت حتفطس مني وبتعيط وكلام من ده فما كان علي الا أن التحقت معها بنفس الدورة .. وده شجعها جداً وأسعدها كثيراً .. وكان الدرس كله اطفال صغيرين الا محسوبتكم طنط زيزيتا ( ما كنتش تيتة أوي ساعتها ).. وكان المدرس شاب صغير كان يقوللي يا طنط .. وكان خطه جميل جدا وكنا نتسابق أنا وابنتي في جمال الخطوط وهو يشجعنا فيكتب في الكراسة عبارات تشجيعية للخط الأفضل وكنا نستخدم القلم البسط هو نوع من أنواع الأقلام الحبر له ميل في السن شوية .. ولكل نوع من أنواع الخطوط قلم بسن معين يعني الرقعة نوع والنسخ نوع والديواني نوع .. وهكذا .. وإشتريت الطقم كاملاً بكل أنواعه لإبنتي .. وبرعت في الخط .. وأتت السنة الدراسية الجديدة وأوقفنا الدروس .. و... ورجعت ريما لعادتها القديمة .. وحجتها أنها تكتب الإنجليزي أكثر من العربي لذلك فلم تتمرن كفاية .. إلى أن أتي اليوم الذي تكتب فيه حتى طلباتها لي بالإنجليزي وأنا بقي أنزل السوق بالقاموس في إيدي :cry1:

بالمناسبة يحضرني انني كنت أعمل في شركة كان من ضمن شروط التعيين فيها جمال الخط وكان رئيس مجلس إدارتها ييقابل المتقدمين للوظيفة بنفسه ليطلب من المتقدم ان يكتب أمامه مرة بالنسخ ومرة بالرقعة ويحكم علي شخصيته من خلال خطه ..

وانا شايفة انها برضة نظرية يعني الخط الجميل يبعث الراحة في النفس ..

في النهاية أقول أن الله جميل يبحب الجمال .. فلنبحث دائماً عن الجمال في كل شيء..

محسوبتكم زيزيتا

[نانو]

إلا ليه صحيح الدكاترة كلهم خطهم بوهيمي سيرالي تجريدي لا يُصد ولا يُرد ولا يرى بالعين المُجردة ؟

يمكن عشان ما بيبقاش عندهم وقت يحسنوا خطهم ؟

بس ده ماله ومال جمال الخط ؟

يا سينو سينو ده سيم بين الدكاتره والصيادله وإلا الصيادله مش هايلاقو يأكلوا عيش :blink:

شوفي يا سيدي موضوع الخط ده مرتبط طبعا بجينات معينه ....فيه حاجه إسمها القبضه القويه ديه صفه وراثيه

بتبقي ملازمه لكف الأيد اللي فيه الصفه ديه بيكون خطه حلو :cry1: و رسمه حلو وعنده ميول فنيه كتير جدا وممكن يكون عزفه علي الالات الموسيقيه angl:: برضه حلو و بالتالي لو الإب فيه الصفه ديه يبقي الإولاد أو أحدهم فيه نفس الصفه

وأكيد طبعا التدريب ممكن يزيد الصفه ديه أو حتي يخلق جزء منها في إنسان عادي

لكن اللي عنده الصفه ديه بيلاقي خطه جميل جدا بدون ما يبذل مجهود

أما خطي فمش محتاجه أتكلم وأحكي عنه ....ما انت شايفه أدامك أهوه angl::

[se_ Elsyed]

ميرسي يا طنط زيزيزنيا

( عقلي الباطل بيقولي : بنتها رشا كانت في إيتدائي ودلوقت في جامعة .. يعني نقول كان عندها 12 سنة - رشا طبعاً - ودلوقت 22 .. يبقى طنط زيزينيا عندها ... ما علينا ... نرجع مرجوعنا لموضوعنا )

بالتأكيد أنا لا أقصد إن الشخص العادي يبقى فنان خطوط ويعرف الفرق بين النسخ والرقعة والثُلث والكوفي ... إلخ ..

لكن على الأقل يبقى خطه عادي وواضح ويبذل فيه الجهد المطلوب عشان على الأقل هو نفسه يعرف يقرأ اللي بيكتيه ... والله يا جماعة شفت ناس ما بيعرفوش يقرأوا خطهم بعد فترة لو وقع في إيده حاجه هو كان كاتبها قبل كده ...

وطبعاً أبله فُلانه عايزة تورطني وبتقول : سين سين فاتح المحل ده عشان يعلمنا الخط العربي !!!!

منين يا فلانه يا أختشي والله ما كانت اعزه عنك .. ففاقد الشيء لا يعطيه .. ويابخت من بات مظلوم ولا باتش ظالم ...

لكن عايز أقول حاجه مهمه برضوا .. وهو إن خط اليد على أي ورقة يعطيك إحساس بالحياة والحيوية - الخط الحلو المعقول يعني مش اللي تبع الفراخ - لو رجعتوا معايا بالزمن لورا كده - إحترس السيارة ترجع إلى الخلف - من حوالي 45 سنة .. ايام الواحد ما كان حبيب وأيام الخطوبة والعصافير والدباديب والورد الاحمر ... هل كان حد يستجري يكتب جواب حب لحبوبته على برنامج الإم إس وورد 2003 ؟

دي كانت فيها قطع رقاب ... أو على الأقل كانت هاتبقى حاجه بارده قوي وتقضية واجب ... لإن خط اليد يحسسك إنك عبد الحميد حافظ وجايلك جواب من لبني عبد العزيز وبتقعد تتخيل بقى حاجات غريبة وقلوب بتطير وورود تتفتح وعصافير تغرد ( واك واك واك عوووووو ) وحركات من دي ... لكن جوابات الـ Template ما بيبقاش فيها أي روح والواحد لو استلم جواب من حبيبته أو حبيبه بهذا الشكل كإنه مثلاً مستلم خطاب من مكتب التنسيق او من مصلحة المعاشات والتأمينات الإجتماعية ...

وسمعني يا سيدي طقطوقة الست شفقية أحمد " البوسطجية إشتكوا من كتر مراسيلي ... ودموعي لما بكوا .. دابت مناديلي ( يا راجل ؟ ) )

[se_ Elsyed]

أتفق مع بنتنا الدكتورة نانو إن الموضوع ممكن يكون سين ما بين الدكاترة والصيادلة عشان يقرطسوا العيان ...

لكن أختلف مع نفس الدكتورة بنتنا نانو إننا نلزق الموضوع بالجينات الوراثية والكروموزومات الخلقية ، يعني اللي خطه زي حالاتي وإنت نازلة كده يروح يولع في نفسه ويقول " هذا ما جناه عليه بابا " لكن أنا شايف إنه موضوع سهل وبالتعود والمثابرة ممكن يتظبط وييجي منه ... بس فعلاً تخيلي الناس اللي خطها حلو بيبقى رسمهم برضوا حلو ، لإني اعتقد إنه طالما بيتحكم في القلم كويس وعنده حس جمالي يبقى هايقدر يرسم ويعبر عن مكنونات نفسيته من جوه ... ...

تخيلي بقى إن موضوع الرسم ده أنا كنت فاشل فيه تماماً - يعني هو الرسم بس ؟!!! - والغريب بقى إن درجة الرسم كانت من 20 وفيها سقوط ونجوح ... والدين الإسلامي كان من 20 برضوا وما فيهوش سقوط ولا نجوح وتذاكرية او ما تذكرهوش ما تفرقش عند الحكومة !!!!!

بس برضوا مش ذنبي يا طنط .... يعني أنا ما كانش مطلوب مني أبقى بيكاسو أو فان جوخ مني لنفسي من غير ما حد ياخد بإيدي ويعديني الشارع او يعلمني الفرق بين الفن التكحيتي والفن التجعيري .... ما حنا لا كان عندنا رسم ولا خط ولا مزيكا ولا ألعاب وكنا بنسمع عنهم سمع طشاش كده او بنشوف المدرسين بتوعهم أول كل شهر وهما جايين يقبضوا بس .... ويجعلوا عامر ...

[seeem]

زمان............ وان صغير كان خطي جميل وكنت احب حصة الخط وكراسة الخط العريضة

الله يرحم ايام زمان ....

وبعدين كل ما الواحد كبر فى السن ودخل فى مراحل تعليمية جديدة كانت الكتابة تكتر وتبقى محتاج انك تكتب اسرع علشان تلحق تلعب او تخلص الواجب قبل ما تنام ((والا تاني يوم تاخد حبة عصيان من اللي قلبكم يحبهم)).....

اتطور الموضوع معايا خصوصا فى الامتحانات كنت وصلت لأرتكاريا فى الكتابة . هي مش وحشه قوي انما سريعة جدا بس ممكن تميز الحروف والكلمات وتفهم اللى انا كاتبه من السياق.

اوقات انا نفسي احتاج وقت علشان افهم اللى انا كاتبه .. الموضوع وصل لدرجة اني باحلم لإن الامتحان خلص وانا لسه ماخلصتش كتابه واوقات يكون الحلم مرعب... زي اخلص فى الميعاد ويكون انا مجاوب في مادة تانية خالص. او اخلص قبل الميعاد وابدأ اراجع المركتوب الاقيه غلط ومحتاج اني امسحه كله واجاوب من جديد................. ده غير الاحلام اللى بأكون فيه شخص تاني وبتفرج على نفسي وانا قال ايه مش عايز اجاوب بدري وبسرعة علشان عارف اجابة الاسئلة ومش حتحتاج وقت علشان اكتبها .......................... وطبعا يخلص الامتحان قبل ما اخلص الكتابة ...

و اوقات قبل ما أبدأها ....

كل ده طبعا القى بظلاله على خطي ((اللي مابقاش جميل خالص)) لغاية ماربنا كرمنا وهدى العبقري بيل جيتس وإخواته في تفاحة وبدأنا نستعمل الكمبيوتر فى كل كتابتنا.

ساعات لما اضطر لكتابة حاجة يدوي........ باتردد فيها وباحوال افتكر اكتب ازاي... :happy:

وساعات تانيه بحن للتخطيط وابدأ اكتب جواب غرامي لزوجتي او جواب لأمي وارسله بالبريد ......... ليه طعم غريب جميل.