محاولات المصريين - للنساء فقط - فنون التريكو

[zizetta]

السلام عليكم ورحمة الله وبركاته

إتأخرت عليكم .. سامحوني .. أصل الكمبيوتر عندي بيحب الحرية .. مجرد إني أضغط علي نقل الصفحة الا والاقيه فص ملح وداب .. وأدور عليه وأنادي عليه ولا حياة لمن تنادي .. أجيبه بقى مرة من عند الجيران ومرة من على القهوة .. وأقعد أحايله لحد فين وفين لما يرضي يحضر ..

المهم نبتدي بإسم الله نستعرض شوية مشغولات تريكو من صنع يدي أولاً وبعدين حنقل لكم من علي النت بعض الموديلات موديل 2007/2008 - ثم ننتقل إلي أنواع الخيوط والإبر والغرز بشكل سريع ونبتدي علي طول نشتغل في مشروع صغير وهو عمل كوفيه ( أو سكارف علشان البنات المودرن بيحبوا ينطقوا بالإنكليزية ) ..

حاولت أصور إبر التريكو اللي أنا مصمماها ( هي من الخشب تخانات مختلفة ) وأنزلها لكن الأسطي كوداك (بنتي اللي سي السيد بيقول ان اسمها رشا ) كانت طبعا معاها الكاميرا زي عوايدها .. أصلها بتسجل كل حياتها بالصور كأنها علم من أعلام الزمان ...

الصور التالية هي من صنع يدي والدرس القادم حنكمل ان شاء الله ..

تحياتي

محسوبتكم زيزيتا

بصوا بقى أنا بعد ما كتبت وجهزت الصور وحاولت أضيف صورة لقيت شباك اتفتح فيه http :// علشان أكتب اسم الموقع والحقيقة الصور عندي علي الكمبيوتر ومش عارفة أرفقها .. حاولت اضيف مرفق مثلاً أحطها علي الوورد أو الباور بوينت وأضيف الملف لكن ما لقيتش أيكون يقول ممكن أرفق ملف .. فلو ممكن حد يساعدني حنقدر نكمل ..

وشكرا

تم تعديل 5 نوفمبر 2007 بواسطة zizetta

[نانو]

بصي يا زيزيتا أنا إتحمست خلاص ومستنيه تطلعي بالتقيل

وطبعا الموضوع ده ما ينفعش خالص من غير صور وعلشان تنزلي الصور في الموقع لازم ترفعيها علي أحد مواقع الرفع

وده لينك لأحد مواقع الرفع سجلي فيه وهتلاقي الخطوات سهله بعد كده ومنه تأخدي اللينك اللي ينزلك الصوره هنا

إحنا مستنين أهو :happy:

[se_ Elsyed]

والله عال ... أغيب شويه عن المنتدى يادوب أروح اتغدا إلا والاقيكم عاملين مشغل تريكو وكل واحده جايبه ماكينة خياطة وإحتليتوا بير السلم بتاع المُنتدى

طب إيه رأيكو بقى فيها يا أخفيها ....

وبلطجة بقى وفرد دراع أول إنتاج من البروفرات أو الشيرزات التريكو دي لازم يكون من نصيبي ..

وحياتك يا طنط زيزي أنا عايز شيرز صوف على ذوقك كده حاكم الشتا داخل وعايز ادفي صدري حاكم العضما كبرت وما بقتش أستحمل البرد ...

مش هاتقل عليكي ... دي نماذج بروفرات عشان تعرفي ذوقي وتتصرفي

سيبك من الواد المقنفد ده وفرحان باكتافه وكإنه هو الوحيد اللي عريض المنكبين في الدنيا

أو عندك حاجه تانيه هاتعجبك برضيكي

ودي صورة إهداء من سين سينكو للتريكو وشك الإبر .. ولقطتها لمدام زيزي وهي قاعدة ساعة تجلي ونازلة عمايل بلوفران لكل اعضاء المنتدى والمنتديات المجاورة في بداية حملتها التي شعارها " شيرز لك مواطن "

[zizetta]

العزيزة نانو

أشكرك بعنف حتى تستغيثي .. استخدمت اللينك وحملت الصور لكن للأسف برضة مش عارفة أنزلها علي السايت هنا .. لكن عملت فولدر للصور وده عنوانه:

Scarves

حنكمل اليوم إن شاء الله بعد ما أصور الإبر ..

الأخ سي السيد ..

أنت دخلت هنا ازاي أصلا .. دنا كنت موقفة 2 ناضورجية علي الباب .. يللا زي بعضه أهو ينوبك من التريكو نايب ..ويمكن برضة تبقي تساعدنا في لف خيط التريكو .. بتاع البروفل الجديد بتاعك ..

الي لقاء إذا الله شاء..

محسوبتكم زيزيتا

[Folana]

السلام عليكم ورحمة الله....

انا بقالى كام يوم اشيل السنانير على كتفى وادخل الموضوع..مش بالاقى اى حاجة...واخيرا...عادت زيزيتا بالخبر اليقين..

ماشاء الله بجد حاجات هايلة..تسلم ايدك..بس تفتكرى ممكن نتعلم نعمل كده؟ اما لو قدرتى تعلمينا بجد يبقى براوة عليك ..

بس بالراحة علينا...وواحدة واحدة ...

يعنى نجهز الاول ايه علشان نبدا العلام؟...ومقاسات الابر...واسماء الغرز...وعدد بكرات الخيط....

ياسولالام لو اعرف اشتغل بروفل ولا شيرز لسى الفندى...كان يبقى سعيد منى قوى خالص........

صباحك جميل.........

[badroora]

ياسولالام لو اعرف اشتغل بروفل ولا شيرز لسى الفندى...كان يبقى سعيد منى قوى خالص........

صباحك جميل.........

طب الحقي بقي شيدي حيلك الشتا خلاص دخل ..... ولا هتعملى شيرز صيفي :unsure:

بس اعتقد ان دا متعب اوى افتكر وانا فى المدرسة كانوا بيطلبوا مننا نتعلم ها الاشياء انا حاولت كتير وفشلت لانها محتاجة صبر وحد غاوى وانا الحمدلله معدومة من الاتنين بس الحمدلله

ربنا عوضى بعمه فظيعة كانت بتعمل مفارش وحاجات جميلة وانا كنت باديها للآبلة بتاعتى واخد الدرجة على اساس انى اللى عملاها .

بصراحة عمتى بتصعب على كتير لما الاقيها ممقئئه عنيها عشان تعمل حاجة بس بصراحة لما باشوف الانتاج بتاعها فى الاخر باكون سعيدة جدا .

وعملت حاجات كتير حلوة جونلات وشرزات ومفارش وزعابيت للعيال وشيلان للكتف .

وهى بتشتغل بابر كبيرة وصغيرة وكمان بتعرف تشتغل على الماكينه الاوتوماتيكي دى .

ممكن ابقي اصورهم واجبهم هنا لابلة زيزيتا وهى تبقي تشرحلكم طريقتهم .

ويا ريت بقي تعملولى ملاية سرير صوف عشان تشيل الرزوماتيزم اللى بيجيلى فى الشتاء .

ربنا يوفقكم ونشوف اكبر مشغل ومعرض كبير لمدام زيزيتا واعوانها .

وليكم على اعمل الدعاية للمعرض بتاعكم وهتكون ببلاش لانى أحب اشجع بنات ومنتج بلدي

بالتوفيق ان شاء الله

تم تعديل 7 نوفمبر 2007 بواسطة Badria Mekkawy

[Folana]

السلام عليكم ورحمة الله...

بدورة الجميلة اصلك مش عارفة أنا متأخر على طلبية شيرزات من زمااان..اهو اتعلم ...واسدد الطلبية ..

انا طول عمرى اكره انى امسك ابرة اصلا..وكان لى اهتمامات اخرى فى شبابى...كل شوية اقولهم انا عايزة اتعلم الالة دى..الحقيقة كانوا خايفين جدا منى احسن الشيطان يغُزنى واسيب الدراسة والتفت للفن..:lol:

لكن لان لكل سن جماله واحتياجاته لقيت ان من كل بد انى اتعلم التريكو

وربنا استجاب وارسل لنا زيزيتا نستفيد من عبقريتها فى الاشغال اليدوية...

نداء اخير الى زيزيت.....عودى فنحن فى انتظارك... :happy:

مش معقول كده يعنى.. :unsure:

[zizetta]

السلام عليكم ورحمة الله

ندخل بقى في الموضوع علي طول علشان مفيش وقت كفاية لعبنا كتير وهرجنا كتير ودلوقتي ياللا يا بنات علي الفصل :unsure: - الست فلانة هانم والمزمزين بدرية يتفضلوا يشرفونا وينادوا لنا علي نانو وناش وإمبراطورية الحريم كلها .. ويشوفوا لو لسه فيه حد في سجن النسا مجاش يندهوله ..

ملحوظة : تابعوا ملف Scarves لأني أضفت إليه أشياء جديدة -

كمان فيه صور الصوف والإبر في ملفMaterials

معلومات أساسية عن التريكو

إبر التريكو :

مرفق صور لبعض إبر التريكو التي أشتغل بها .. طبعا هناك إبر أشكال وألوان حبقى أنقلها لكم من علي النت إن شاء الله وإحنا شغالين .

الإبر الخشبية الكبيرة : لا تباع بالأسواق إنما يتم تصنيعها لدي أي نجار وسعر زوج الإبر (2 إبرة يعني- علشان محدش يفتكر إنها مرتبطة ) حوالي 10 جنيه . ويتم تصنيعها من الخشب الزان وهو أفضل لضمان النعومة بعد الصنفرة حتى لا يعيق حركة الخيط الصوف أثناء الشغل.

الإبر الأخري موجودة بالأسواق وهي مصنوعة من البلاستيك أو الباغ أو الألومنيوم وهي مقاسات مختلفة - يكتب عليها مقاسها في الجزء العريض منها (الترمسة أو الكرة في طرف الأبرة الخلفي ) وهذا الجزء طبعا مش علشان يكتبوا المقاس عليه بس لكن لمنع الخيط من الإنزلاق من الناحية الأخرى من الإبرة .

معلومة : مقاس الإبرة يمثل قطرها بالملليمتر يعني مقاس (10) يكون قطرها 1سم (10 مملي ) ومقاس 5 قطرها نصف سنتيمتر وهكذا- وعلى فكرة المعلومة دي مش حتلاقوها في أي سايت لأنها من إفتكاساتي - وسعر الإبر يبدأ من 10 جنيه حتى 20 جنيه حسب النوع والمقاس وتباع في القاهرة بمصر الجديدة في محل كل شيء ونخال والنمرسي بميدان الجامع وطبعا في أي محل خردوات أو كلف وخيوط .

حجم الإبرة المستخدم يرتبط بالتالي:

نوع الخيط - سمكه - الغرض من إستخدامه ( عمل كوفيه / شال / بلوفر / آيس كاب .. ألخ) فالخيط الرفيع يستلزم إبرة رفيعة والعكس .. وكذلك تستخدم الإبر الرفيعة لعمل البليسيه في البلوفرات حتى ولو كان الخيط سيمك.

هناك مهارات ممكن إكتسابها من خلال الخبرة وهي مثلاً إستخدام فتلتين أو ثلاثة مع إبرة سميكة . علي فكرة أكبر مقاس في السوق هو مقاس 10 وأصغر مقاس هو مقاس 2 والفرق بين المقاس واللي بعده نصف درجة يعني مثلاً 2.5 - 3 - 3.5 - 4 .... ألخ – لكني رأيت علي النت إبر مكتوب عليها ¾ 3

الخيوط :

تباع بالمحلات المذكورة أعلاه وهي أنواع عديدة فمنها الصوف الخالص 100% ومنها الأكريللك ومنها الخليط ومنها القطن والشعر والموهير والوبر والحرير .. ألخ .. أنواع وألوان كثيرة جداً - يكون مكتوب علي غلاف شلة الصوف نوع الخيط ووزنه ونسب مكوناته وكذلك طول الخيط .. يعني مثلاً ممكن تشتري شلة خيط 100 جرام تعملي بيها مساحة أقل من نفس الوزن لكن لنوع آخر .. زي ما بيقولوا كده فيه خيط بيرمي معاكي ..

لو بدأنا مثلاً نعمل المشروع علي طول وهو عمل سكارف حتكون خطواتنا كالتالي :

الموديل بسيط جدا يمشي حريمي ورجالي وحنشوف الفرق عند التشطيب ازاي مرة نخليه حريمي ومرة رجالي - طبعا حيكون طويل وخلينا نبدأ بلون يمشي مع معظم ألوان الملابس مثل اللون البيج مثلاً أو الأوف وايت .. يعني الإختيار متروك لكم .. مش عايزة أقول أسود علشان لو غرزة فكت والا حاجة أثناء الشغل نعرف نشبكها بسهولة .

الأدوات :

الإبر : زوج إبر تريكو مقاس 4.5 أو 5 ( للموديل ده علشان حنعمله بليسيه وده بيخلي الشغل مدموج شوية مش مفتح أوي)

الخيط : 4 عدد 3 شلات صوف سمك وسط ممكن فتلتين ( فتلة الصوف بتكون مكونه من عدد معين من الفتلات المغزولة أو المبرومة ) - وزن الشلة 50 جرام صوف عادي أو أكريللك أو أي شيء بس نتعلم بيه الأول.

ملحوطة : الشغل بيكون أحلي لو علي إبر سميكة بإستخدام فتلتين وفي الحالة دي بتضاعفي كمية الخيط - لكن ما أفضلش برضة نبتدي بفتلتين علشان ممكن فتلة منهم تروح في الوبا وإحنا شغالين .

ياللا جهزوا حالكم والمرة الجاية نبتدي

تحياتي

زيزيتا

تم تعديل 7 نوفمبر 2007 بواسطة Folana

[Folana]

السلام عليكم ورحمة الله...

أخيرا عادت الى اراضى المحاورات العطرة الاخت زيزيتا...بجد موضوع شيق وجميل...

لكن عندى سؤال لو تسمحى أقدر أقولهولكِ (وش ليلى مراد)...تنصحينا نستخدم اى نوع من الابر والخيوط كمبتدئين

يعنى حاجة رخيصة كده علشان الخساير بس...

وفى انتظار باقى الدروس بشغف

صباحك جميل......... :unsure:

[nash]

ميس ميس .......ياااااااااا ميس.... :unsure:

أنا أهو والله مسجله متابعه ومش بعمل اي شقاوة....ومستنيه ألحصه تبدأ علشان أنا كمان أبدأ أسئله غلسه....زي التلاميذ الغلسين......مش بيعملوا كده برضه؟؟ :lol:

تسلم أيدك يارب ....حقيقي من المواضيع الجميله....وأعشق أي شغل يدوي... :sad:

أيضا كنت أتمني أن أعرف كيفيه تحميل صور من عندي لإطلعكم علي تصميماتي في فن شغل السراميك والأعمال التي أنتجتها....لكن الظاهر هافضل متفرجه فقط...مستوايا العلمي......أدبي بلا فخر :happy:

[badroora]

.

أيضا كنت أتمني أن أعرف كيفيه تحميل صور من عندي لإطلعكم علي تصميماتي في فن شغل السراميك والأعمال التي أنتجتها....لكن الظاهر هافضل متفرجه فقط...مستوايا العلمي......أدبي بلا فخر :rolleyes:

لا داعى للتمنى سيدتى فكل شيء ملك يديكى الان

بصي يا ستى الكل

الكام موقع دول كويسين لتحمل الصور كالاتى

اول حاجة افتحى الموقع وهتلاقي متكوب brows اضغطى عليها هيفتح معاكى نافذة من خلال النافذة حددى مكان الصورة فى الكمبيوتر عندك ودقي اوك او اوبن حسب متلاقيها

وبعد كدا دقي رفع او upload

الصورة هتتحمل وهتلاقي رابط اعملى cut وتعالى هنا فى الصفحة اللى عاوزة تضيفي فيها واعملى paste .

فى مربع الصورة بعد ما تتدقي عليه رقم 4 من الشمال

زى بالظبط اى صورة بتجبيها من عالنت وتضيفيها فى موضوع .

يا رب تكون الطريقة سهله ومدوختكيش

لو حسيتي انها صعبة هابقي احاول اشوف طريقة بالصور

ويلا بقي ورونا ابداعتكم .

المواقع

رفع الصور

رفع الصور والملفات

رفع الصور

زيارة موقعي

تم تعديل 7 نوفمبر 2007 بواسطة Badria Mekkawy

[Modest]

حملت الصور لكن للأسف برضة مش عارفة أنزلها علي السايت هنا .. لكن عملت فولدر للصور وده عنوانه:

Scarves

محسوبتكم زيزيتا

جبت لك الفولدر يا مدام زيزيتا كخدمة إنسانية يعني مش عايز من وراها لا بلوفر و لا شيرز و لا حتى لكلوك

صور الـ Scarves

يتبع..

[Modest]

.

:rolleyes:

.

[badroora]

انا رفعتلك الصور هنا عشان يبقي صوت وصورة

بوتشيك زيزيتا للحياكة والاعمال اليدوية

[Modest]

.

:rolleyes:

.

[badroora]

ايه دا يا استاذ موديست احنا هنقطع على بعض ولا ايه

يعنى داخلة اعمل سبوبة الاقيك دخلت تقسمنى فيها :rolleyes:

عموما طالما انت اخدت الطالعة من اولها هاسيبهالك

[Modest]

ايه دا يا استاذ موديست احنا هنقطع على بعض ولا ايه

يعنى داخلة اعمل سبوبة الاقيك دخلت تقسمنى فيها :rolleyes:

عموما طالما انت اخدت الطالعة من اولها هاسيبهالك

المصلحة واحدة يا بدرية .. اتفضلي انتي كمّلي هنا و انا هابقى أشوف لي أي سبوبة تانية غير التريكو .. طبيخ، غسيل، مكوة .. مش هانغلب يعني :happy:

[nash]

تسلمي يا بدريه يارب...

يعني دلوقتي أنا أصور حاجتي وأحطها علي الجهاز واعمل نفس الخطوات اللي قلتي عليها؟؟؟؟

مضبوط كده؟؟

[badroora]

تسلمي يا بدريه يارب...

يعني دلوقتي أنا أصور حاجتي وأحطها علي الجهاز واعمل نفس الخطوات اللي قلتي عليها؟؟؟؟

مضبوط كده؟؟

ايوة كدة الله ينور عليكيى

وكمان لاقيتك الموقع دا بيشرح بالصورة عشان ترجعى لاخر لحظة :rolleyes:

القي عليه نظرة عشان تطبقي عملى يبقي سهل .

طريقة رفع الصور

اى خدمة يا جميل !!

[nash]

أنا هالعب شويه في الموقع وأعمل محاولات وربنا يسهل قبل ماتيجي ميس زيزيتا وتطردني برة

تسلمي يا بدريه يارب ...ودمتي عونا لبتوع أدبي :rolleyes: