محاولات المصريين - للنساء فقط - فنون التريكو

[ام البنات]

زيزيتا

وفولانه هانم اغلو

الحقيقه مشفتش ردكم إلا دلوقت

وطبعا هارد عليكم..علشان محدش يكلمنى واسكت أبدا"

ولكنى الآن سقعانه مش عارفه ليه

ولما كانت الدنيا برد كنت عادى ومش بيهمنى

دلوقت والجو ربيع سقعانه

الحقيقه هى شخصيتى كده

زيزيتا عاجبنى قوووى رد بنوتك افحمك والله عيالنا معقدينا...لازم نكون اكثر حرص

والحمد لله انك قصرتى معاها بعد كده..الشاطر اللى يتعلم من المواقف المحرجه

فولانه يا حبيبتى انا صديقتك ام البنات اقر واعترف بانى لدى عده هوايات امارسها الآن تحت التربيزة علشان

معندش وقت لها واخاف اتمسك بالجرم المشهود

ممارسة هوايات وترك الناس بدون طعام...اكتر حاجه بكرها انى اطبخ علشان الناس اللى عندى ملهمش فى الأكل

طولت عليكم

هانزل الموضوع أو ...طيب اشوف بس ظروفى

طيب انا كده زهقت من الكتابه والرغى...هاقوم انام وبعدين ابقى ااقول انا عاوزة ايه

[zizetta]

قرنفل .. الإبر الخشب متعبة طبعاً لأنها كبيرة وتقيله .. لكن بتعمل نوعية معينة من الشغل وهي الشيلان أو الكوفيات بالخيط السميك أو المطلوب لها غرز واسعة .. وهم فعلاً مش موجودين في السوق وعملتهم عند النجار من الخشب الزان بس لازم يصنفرهم كويس وينعمهم علشان الصوف ينزلق عليهم بسهولة وليس عليهم أي مادة أخرى .. غالباً الأبر في مصر من البلاستيك .. وياما اتكسر معايا منهم لما آجي أشد النسيج أما الألومنيوم فموجود برضة بس نوعه غير جيد وبيكون في الإبر الرفبعة فقط ..

أنا بشتغل لبنوتي برضة وهي صغيرة أوي كنت عاملة لها تايير جميل جداً يمكن أكون محتفظة بيه لدلوقتي في المتحف بتاعي .. ومازلت بشتغل لها .. وهي بتفخر جدا بشغلي وكل ما حد يجيلها من أصحابها توريله الحاجة وتقوله دي مامي اللي عاملاها .. يقولولها اتعلمي من مامتك .. لكن هيهات .. هي بس تبقي تدخل طبقها المطبخ ..

الست أم البنات .. فعلاً في البرد أوي الواحد بيحصل له تجمد فمش بيحس بالبرد لكن أنا أكتشفت انك لو شربتي حاجة ساقعة أو أكلتي آيس كريم في البرد (مش في ديسمبر) حتدفي علي طول ..

تخيلي بقى اني أدمنت القربة .. عارفاها .. هي كيس كاوتشوك أملاه مياة مغلية وأقفله كويس وأحطها على أطراف أصابع رجلي المجمدة .. إن الدفا يا عزيزتي يبدأ من القدمين :sad:

وحاولي تختلسي شوية وقت تعبري فيه عن مطالبنا نحن النسوة في تنشيط الهوايات المكبوته..

تحياتي ..

زيزيتا

[إيزيس]

دي صاحبة بنتي واللا إيه واللا الأطباق فيها حاجة غلط؟؟ظ

[keke]

شكرا ليكى جدا جدا بجد بس ممكن سؤال ؟انا بعمل كوفية فعلا وعايزة اعمل فيها شراشيب من الطرفين اعملها ازاى؟ ياريت تردى عليا بسرعة

وشكرا ليكى

[إيزيس]

الورشة متشمعة بالشمع الأحمر

قبضوا على ستات سايبة العيال جعانين وماسكين إبر بدون ترخيص

[zizetta]

Keke .. شرفتي ورشتنا .. وياريت تبقي تفرجينا علي الكوفيه لما تخلص ..

بالنسبة لعمل الشراشيب فهناك عدة طرق :

خدي فتلة من الخيط اللي تحبي يكون شراشيب .. يعني ممكن لو الخيط ألوان تختاري لون معين وتعمليه شراشيب أو تعملي شرشوبة لون والشرشوبة الأخرى لون ثاني من نفس لون حيوط الكوفيه .

خدي فتلة طولها 35 أو 40 سم وبعدين قصي عليها شوية خيط بنفس المقاس

الشرشوبة الواحدة بتكون أحلى لما تكون طويلة إلى حد ما وكثيفة

الشرشوبة الواحدة إستخدمي لها 5 أو 6 فتلات لو الخيط رفيع .. وأنتي قدري كثافة الشراشيب اللي انتي عايزاها.

جمعي الستة فتلات مقاس واحد زي ما قلنا مثلا 35 سم وساويهم ببعض وبعدين إتنيهم برضة بالتساوي مع بعض

امسكي منتصف الخيط ودخليه في منتصف الغرزة علي الحرف لمسافة 2 سم مثلا بحيث تدخليه من فوق لتحت يعني من الناحية العدلة للشغل للخلف وحيعمل شكل عروة .

لمي الخيط كله ودخليه في العروة دي وشديه

حتلاقيه ربط في شكل عقدة

كرري العمل مع ملاحظة إنك تشبكيها علي أبعاد متساوية بحيث يكون عددها واحد في الطرفين وطولها برضه واحد.. ويفضل أنك تعملي واحدة في أول الحرف وواحدة في آخر الحرف ثم توزعي بالتساوي وغالبا ًبيطلع من 5-6 شرشوبة في الجانب الواحد.

افردي طرفي الكوفية بحيث تكون الشراشيب كلها علي صف واحد وظبطيها كأسنان المشط وذلك بقص الحروف معا علشان تكون كلها طول واحد

الطريقة اللي فاتت دي أسهل الطرق ..

هناك طريقة أخرى شكلها أحلى بس لازم تكوني بتعرفي كروشيه وهي أنك تشتغلي علي الحرفين في النهايات بالكروشية غرزة الفوستونة وهي عمودين ثم غرزتين سلسلة ثم عمودين علشان نعمل فراغ بين الأربعة أعمدة نشبك فيها الشراشيب بنفس الطريقة السابقة. مرفق فيديو لطريقة عمل الفوستونة لكن زودي عليه انك تعملي غرزتين سلسلة بين العمودين علشان دي اللي حندخل فيها الشراشيب.

الفوستونة

في حالة عدم استطاعتك عمل الفستونات بالكروشيه ممكن تدخلي الخيط في قلب الغرزة نفسها علي أبعاد متساوية وبرضة حيكون شكلها حلو.

قرنفل .. مش إحنا اللي تتشمع ورشتنا يا قمر .. إحنا مسددين الضرائب اللي علينا وكمان كشوف البركة ..والرخص شغالة والأشيا معدن والعيال مرضعينهم و مغيرينلهم ..وأبهاتهم مثبتينهم .. وكله ألسطة يا ريس .. خشي برجلك اليمين ومتخافيش ..وبلاش حركات سي السيد دي سيبونا بقي نعمل سبوبة .. :blink:

تحياتي

زيزيتا

[إيزيس]

السماح يا معلمة ما يعرفك إلا اللي يجهلك

[keke]

شكرا ليكى جدا وان شاء الله لما اخلصها اوريهالكم بس انا عندى مشكلة فى الغرزة المقلوبة مش بتطلع معايا دايما صح اعمل اية؟

[ندره رمد]

يا جماعه انا تعبت من كتر البحث عن الاى انا عايزه ومحدش راضى يسعدنى ليه لو محدش ساعدنى فى حل مشكلتى انا هبطل شغل التريكو خالص اولا انا بعمل بروفل تريكو لاخويه وهيكون هديت فرحه فلزم يكون بروفل محصلش ودورت كتير على غرز تكون شيك وجميله وبصراحه الاى لقتها معجبتنيش ياريت حد منكم يجبلى موديل ويشرحلى غرزه ويكون اجره وثوابه عند الله ويارب بعدها يكون عريس او تكون عروسه واعملها فستانها بايدى انا اصلا بطرز فساتين افراح والخطوبه

[ندره رمد]

يا جماعه الاى الاى كنت بدور على الغرز ادينى جبتلكم بروفل وياريت حد طريقه الغرز ويشرحهالى وياريت يبعتلى الطريقه على اميلى مباشرتنا شكرا

[Folana]

السلام عليكم ورحمة الله....

الاخت الفاضلة ندره رمد..ارجو ان اكون كتبت الاسم صحيحيا...

أنا مش عارفة ايه هو (الاى الاى) اللى حضرتك بتسألى عنه

لكن كل اللى أقدر افيدك فيه..أن الاخت زيزيتا صاحبة الموضوع...مشغولة شوية وهذا مايمنعها عن متابعة الموضوع...

وهى الحقيقة اللى بتفهم فى موضوع التريكو ده....من جانبى حأبلغها بسؤالك وان شاء الله تجد الوقت للرد على حضرتك...

واهلا بك اختا عزيزة بيننا

[ندره رمد]

اولا اهلا بكم جميعا مره اخرى وخصوصا Folana شكرا لردك واهتمامك بموضوعى انا الاى عايزه حد يدينى غرز جديده فى التريكو وجبت صوره لبروفل عايزه اعمل واحد زيه ولما بعت الرساله مشفتش الكلام كويس عشان كده اتكتب كلام مكرر زى (الاى الاى) كان قصدى اقول انا الاى كنت بدور على الغرز ادينى جبتلكم بروفل وياريت حد طريقه الغرز ويشرحهالى وياريت يبعتلى الطريقه على اميلى مباشرتنا شكرا بس ده قصدى وكنت منزله مع الرساله صوره للبروفل وشكرا للجميع

[fatfouta]

يا جماعة انا بعرف اعمل تريكو وبشتغل حاجات جميلة جدا بشهادة الجميع وكمان بفصل لنفسى حاجات كتير ومعايا شهادات بالتفصيل بس مش عارفة ابدأ منين ممكن حد يفيدنى هنا اعمل ايه؟

[zizetta]

الأخت فتفوته..

كل سنة وانت طيبة بمناسبة عيد الأضحي المبارك .. وكل سنة وجميع المحاورتية بخير وسعادة ..

ان شاء الله نستأنف نشاطنا في هذا الباب بعد العيد مباشرة .. وانا عندي أفكار حلوة كتير ونفذتها بالفعل ولاقت إعجاب الجميع .. ياريت يا فتفوتة تصوري بعض من منتجاتك وتعرضي الصور هنا وبعدين نتكلم .. أنا فهمت انك عايزة تستفيدي من خبراتك في التريكو والتفصيل .. بس يا ريت تعرضي صور منتجاتك أو تبعتيهالي علي الخاص او على ايميلي واظن المنتدي فيه خاصية الإرسال علي البريد الشخصي .. وان شاء الله نستفيد من خبراتك ويكون لينا عظيم الشرف لو كان فيه دور لينا معاكي ..

الأخت ندرة .. البلوفر عبارة عن ضفائر مركبة .. وإن شاء الله حنزل طريقة عمل الضفائر ثم طريقة عمل البلوفر ..

تحياتي للجميع

زيزيتا

تم تعديل 8 ديسمبر 2008 بواسطة zizetta

[fatfouta]

الاخت زيزيتا

كل عام وانتى بخير

متشكرة جدااااااا لاهتمامك بس انا دلوقتى كل اللى انا عملته للاسف سبته فى مصر فى بيتى بس ممكن اعملك حاجة انا سريعة جدا والبلوفر مش بياخد معايا وقت والحمد لله وعندى افكار جميله

بس كمان عندى اكتئاب عشان الدكتور قاللى انى لازم اطلع كل اللى جوايا فى شغل لكن انا مش قادرة اشتغل عشان ولادى صغيرين

وكمان الاكتئاب بيزيد لدرجة انى ببقى عاوزة ماشوفش حدلكن لما لقيتكم هنا فكرت علطول انى اطلع من الحالة دى بالشغل اللى كنت بعمله زمان وكل الناس كانت بتجنن عليه ساعديتى اوصلك اذاى وانا ممكن اعلم معاكى ناس كمان اتفقنا؟

معلش شيلتك همى بقى

متشكرة اوى اوى

فتفوتة