الوسيط : جريدة كاملة الدسم

[se_ Elsyed]

بصراحة يا جماعة جريدة الوسيط أو الوسيلة حققت نجاحاً ملحوظاً في مختلف الدول لعربية التي تصدر فيها وهي تصدر بإسمين مختلفين إما الوسيلة او الوسيط ...

هنا في السعودية إسمها الوسيلة ... بس تحس إنها مملة والإعلانات بتتكرر فيها وبتصدر كل يوم جُمعة ..

اما في مصر فإسمها الوسيط ....

لفت نظري حاجه مهمه ... فأول إمبارح جالي من مصر 3 أعداد مختلفة ( أخبار بايته يعني ) فقلت أشوف الدنيا فيها إيه خصوصاً سوق السيارات المستعملة والعقارات سواء أراضي أو شقق ....

إيه ده ؟!!!!!

الجرنان حوالي 65 صفحة وتحس إنك بتقرأ دليل تليفونات مليان ..... ولو بتدور على لبن العصفور ممكن تلاقي لتر لبن حد عارضه للبيع ...

مش هاتكلم عن السيارات أو العقارات دلوقت .... لكن إمبارح كنتت مخصص جلسة القراءة لطلبات توظيف " شغالة منزلية " يعني سيدات أو فتيات باعتين عايزين عمل كشغالة ...

أنا بصراحة استغربت لإن من خلال تجربة فإن هذه العمالة نادرة في مصر ... ويوم ما تلاقي شغالة فبتطلب مرتب أكتر من مرتبك خصوصاً لو كانت مُقيمة ... يعني ممكن إنت اللي تشتغل عندها

لكن أُفاجأ بكمية إعلانات بيطلبوا رواتب لا تُصدق من حيث قلتها يعني ... يعني قرأت العديد من الإعلانات عن " شغالة ريفية .... متدينة ... امينة .... بكافة الإشتراطات القانونية - يعني ممكن تعمل لها عقد وتقوم بتسجيل بيانتها في أقرب قسم شرطة مثلاً على أساس تبقى معروفة وموثوق فيها ولو حصل منها حاجه يقدروا يجيبوها - وعندها إستعداد للإقامة الكاملة .. ورعاية الأطفال ورعاية المسنين والطبخ .........إلخ . وكل ده بمرتب من 250 جنيه إلى 500 شهرياً ... إعلانات مختلفة يعني

أنا مش فاهم إازي ؟!!!!

إذا كان الجماعة في مصر لما نقرب ننزل بيجيبوا حد ينظف بيتي لمدة ساعتين تلاتة وبتاخد لا يقل عن 100ج ... وإذا غسلت السجاد يبقى كله بحسابة وحسب عدد السجاد والسجادة مش أقل من 10 جنيهات

يبقى واحده عمالة تشتغل ليل نهار وتطبخ وتمسح وتربي العيال وأهل العيال بمرتب متوسط 350 ج .... تيجي إزاي دي ؟

بس بيني وبينكم في إعلانات تقطع القلب عن قتيات يتيمات من الريف وطالبين مثل هذه الأعمال وتطلب الإقامة الكاملة عند العائلة اللي هاتشتغل عندها

فهل الكلام ده صحيح يا جماعة ولا لما تيجي ساعة الإتفاق بيبقى في كلام تاني ومرتب زيادة ؟

[zizetta]

السيد سي السيد ..

جريدة الوسيط هذه جريدة لكل الأغراض ... ولأي حد يحب يبحث عن أي شيء أو يكتب أي شيء أو برضة يعمل أي شيء ...

أثناء تصفحي فيها ذات مرة .. قرأت إعلان عن شركة تطلب سكرتيرة تنفيذية وإشترطت أن يكون السن من 50 إلى 70 سنة .. فإستفذني الإعلان وإتصلت بالشركة المعلنة .. ورد علي المسئول (غالباً بيكون المعلن هو صاحب المكان هو اللي بيرد علي التليفون ويمكن برضة يكون هو اللي بيعمل الشاي والقهوة )... وسألته هل ما قرأته في الإعلان حقيقي فرد نعم نحن نطلب هذا السن .. فضحكت مستنكرة وسألته لماذا .. هل لا يوجد شباب أو حديثي التخرج للبحث في هذه الفئة العمرية والتي غالباً ما تكون صحتهم ليست علي ما يرام وخصوصاً النساء منهم .. فقال لي بالعكس .. أنا بكلمك وأنا أمامي الآن واحدة عندها سبعين سنة وبتشتغل زي النحلة .. إحنا بنبحث عن الإلتزام والوقار والأداء الجيد فضحكت متعجبة وقلت له شكرررررراً..

يلفت نظري أيضاً إعلانات عن رجل أعمال يبحث عن سكرتيرة خاصة حسناء بدون حجاب غير مرتبطة تقبل السفر معه في تنقلاته خارج البلاد !!!!...

وأخرى عن فنانة مشهورة .. أو مطرب معروف يبحث عن مربية أو مديرة منزل ...وده كل أسبوع يعني الفنانة المشهورة كل أسبوع بتغير الشغالة !!!!

أما بقى عن العقارات .. فيكتبوا مواصفات الشقة من دول كأنك حتسكن في الجنة ويقولك تشوف النيل وتشوف الأهرامات وتشوف القلعة وتشوف الساحل الشمالي ..ولما تروح يقولك شايف الحاجة السودا اللي هناك دي أهي دي الأهرامات .. أو شايف الحاجة اللي بتلمع اللي زي الإبرة اللي في الأرض هناك دي .. أهو ده نهر النيل ... حاجة مسخرة والله ...

الحقيقة جريدة الوسيط هذه توزع مجاناً وتعتمد في تمويلها علي الإعلانات بها ..ونظراً لإنخفاض سعر الإعلانات بها فإنها تعتبر أرض خصبة للنصابين ومعدومي الضمير ومعدومي الأخلاق .. لكن لو بيدفع في الإعلان زي ما بيدفع في الأهرام مثلاً .. مكانش الا الجادين فقط هم اللي أعلنوا ..

بالنسبة للشغالين اللي بأسعار بخس دي فالواحد جرب مكاتب التشغيل والنساء والرجال اللي بيوفروا الشغالين لما أستوينا .. الواحدة من دول تبقى عاملة زي الحمام الزاجل .. تقعد لها شهرين بالكتير وبعدين تروح إجازة وما ترجعش الا لما ترفع لها مرتبها ويكون المخدماتي قبض القرشينات ولو عايز واحدة تانية يقبض تاني .. وليهم ألف حجة علشان يخلوك انت السبب في أنها مشيت ...

مرة واحدة مخدماتية جابتلي بنت تشتغل مقيمة سنها تقريبا 13 أو 14 سنة لا بتعرف تقرأ ولا تكتب وتمسك الجرنال بالمقلوب وتعمل نفسها قال يعني بتعرف تقرأ ..وقالوا لي أنها حتقعد معايا علي طول .. قعدت 3 شهور وبعدين جه أبوها يا خدها علشان قال المدارس داخلة قلت له مدارس ايه مش هي مش بتعرف تقرأ ولا دخلت مدارس زي ما قلت لي .. قال لي لآ دي في الإعدادية خدي يا بنتي إقري .. كرت لي الجرنال حتة حتة .. وطول المدة دي وهي مستعبطاني علشان تشتغل في الإجازة الصيفية ..

أما عن حالتك .. فأقترح شغالة للمدام من نيجيريا أو الشرق الأقصي ولو إن كلهم اسخم من بعض .. (ما تنساش تضم أسخم دي للقاموس الفريد) ...

تحياتي

زيزيتا

[se_ Elsyed]

أما عن حالتك .. فأقترح شغالة للمدام من نيجيريا أو الشرق الأقصي ولو إن كلهم اسخم من بعض .. (ما تنساش تضم أسخم دي للقاموس الفريد) ...

تحياتي

زيزيتا

ما شاء الله عليكي يا مدام زيزي

سيكولوبيديا متحركة

بس الله يكرمك يا ستي ... لا نيجيريا ولا الشرق الأقصى .. أنا ما عنديش إستعداد اتجوز عرفي .. أو تفتحوا الجرنان في يوم تلاقوا موضوع في صفحة الحوادث عنوانه " رجل اعمال يُدعى سين سين يترك زوجته وأولاده بعد فترة زواج دامت أربعون سنة ونيف ويهرب مع الخادمة إلى ساحل العاج "

مش عارف أنا إنطباعي كده إني لو جبت شغالة وعاشت معانا في البيت يبقى هاتجوزها في يوم في شهر في سنة ...

وبعدين عُمر أفندي والله شغال لي اليومين في الأزرق وكل شويه يقولي " إنت ليه ما بتجبلناش شغالة زي صاحبي زياد ؟ " فبأقول له " وترضى باب يتجوز الشغالة وماما تزعل ؟ يقوم يرد عليه ويقولي : يا سلام ... يعني هو بابا زياد إتجوز الشغالة اللي عندهم ؟ فقلت له : وإيش عرفك يا لمض إنه مش متجوزها عُرفي ولا في الخباثة ؟

وبعدين الباب اللي يجيلك منه الريح سده وإستريح .. ويا شغالة لا تقرصيني ولا عايز عسل منك ...

بالرغم من إن عندي كارت بلانش من المدام وبتقولي : هات لنا شغالة وما عنديش مانع تتجوزها بس تقوم بشغل البيت كله وأنا أقعد متسسته وأتكلم في التليفون طول لايوم ( ماهو أنا اللي بتعك في الفواتير ) ... فطبعاً يا خوفي يا بدران إني أجيبها من هنا واتجوزها من هناك وإحنا بعد كده اللي نُسخر في خدمتها ...

إسكتي يا زيزي وإكفي عالخبر ماجور وإحكي لنا شويه عن الوسيط ... وبلاش الإقتراحات اللي تقطم الوسط دي

[أبو محمد]

الوسيط غير الوسيلة يا سى السيد .. دى جريدة ودى جريدة تانية خالص .. فعلا فيهما إعلانات عن كل حاجة .. عن تجربة .. هذه الجرائد تستخدم كمدخل فقط .. ولكن لابد من طالب الخدمة الحرص والتدقيق فيما هو مقدم على شرائه أو توظيفه

[أسد]

الوسيط غير الوسيلة يا سى السيد .. دى جريدة ودى جريدة تانية خالص

الوسيط هو الإسم الأصلي للجريدة ..

ولكن في السعودية كانت هناك جريدة للإعلانات قديماً إسمها الوسيط .. ولم يوافقوا على التنازل عن الإسم التجاري .. فبالتالي أصبح إسمها في السعودية فقط (الوسيلة)

للعلم .. هذا المشروع صاحبه أساساً سوري الجنسية ..

تم تعديل 14 نوفمبر 2007 بواسطة أسد

[zizetta]

تصدق يا سي السيد إنك بتضحكني أوي .. بعد ما قريت ردك ضحكت بصوت عالي .. لأ بجد عندك حس فكاهي جداً ..

إيه ده .. إستني إستني .. بفتح موضوع سين سين لقيت حفلة .. أنا رايحة بسرعة أقابلك هناك بقى وأكمل الموضوع ...بااااااااااااي

زيزيتا

[Sherief AbdelWahab]

بالتعبير الدارج- ولو إني ح ألقى انتقادات عنيفة بسببه- النوع دة من الجرايد مش "مغسل وضامن جنة".. هو وسيط اسماً على مسمى بياخد معلومات من ناس عايزة تعلن والجرنال بيوصلها لكل حتة بحكم إنه مجاني.. وبالتالي يصعب لأسباب كتيرة يدقق في المعلومات اللي جاياله..

خلص الكلام

[أبو محمد]

الوسيط غير الوسيلة يا سى السيد .. دى جريدة ودى جريدة تانية خالص

الوسيط هو الإسم الأصلي للجريدة ..

ولكن في السعودية كانت هناك جريدة للإعلانات قديماً إسمها الوسيط .. ولم يوافقوا على التنازل عن الإسم التجاري .. فبالتالي أصبح إسمها في السعودية فقط (الوسيلة)

للعلم .. هذا المشروع صاحبه أساساً سوري الجنسية ..

عزيزى أسد

فى الإسكندرية توزع الجريدتان .. واحدة باسم الوسيط والأخرى باسم الوسيلة ..

عزيزى شريف

معاك حق .. تلك الجرائد ليست مغسل وضامن جنة .. ومن هنا تأتى مسئولية من يستخدم الوسيط أو يتلمس الوسيلة للحصول على ما يريد .. لا بد أن يتأكد بنفسه من صحة المعلومات المذكورة فى الإعلانات

[أسد]

فى الإسكندرية توزع الجريدتان .. واحدة باسم الوسيط والأخرى باسم الوسيلة ..

إذن الوسيلة الموجودة في اسكندرية مختلفة .. أما الوسيط في مصر والوسيلة في السعودية هما نفس الشئ