فرح هاي ستايل

[Sherief AbdelWahab]

احنا في زمن العياقة..

العياقة الطبقية.. العياقة الثقافية .. العياقة السياسية .. وعشق المنظرة وعيش الدور..

طلعت في دماغي نلعب لعبة صغيرة..

ما تيجوا نعمل شوية اقتراحات مستوحاة من الثقافة دي وطريقة التفكير واستعراض الثقافة والثروة مناسبة لترتيبات فرح روش طحن.. كلي ثقة في قوة خيالكم .. :closedeyes:

خلص الكلام

[Sherief AbdelWahab]

مقترحات مبدئية :

1-على العكس من الناس اللي مش هاي أوي.. أنصح بإن الفرح يتعمل في توقيت مبتكر ما اتعملش قبل كدة.. الساعة سبعة ونص الصبح..

2-الأماكن كتييرر .. الناس اللي بيحبوا الحاجات التقليدية يحبوا يعملوا الفرح في الصحرا - ديزرت بارتي- جو ..ياااااي.. يجنن.. أما الناس اللي عندهم حس ابتكاري لوذعي يعملوه في قهوة بلدي.. حاجة تري تري أوريجيييينال طحن!

3-أحلى حاجة يبقى الفرح وايت داي.. كل اللي جايين لابسين أببض في أبيض.. تيشرتات بيضاء .. جينزات بيضة.. شورتات بيضة .. وضاربين شعرهم أي حاجة بيضاء..

4-نجيب وليد عوني يصمم الفرح.. ودة للي ميعرفهوش لسة دة اللي صمم حفل افتتاح كأس الأمم الأفريقية.. والعقل المفكر لمهرجان المسرح التجريبي.. حيخليهولنا تجريبي على الآخر.. a night to remember..

يا سلام بقا لما تشوف حاملات القرابين ومواكب الشمس وسلاحف النينجا الله يرحمها داخلين من كل حتة في الصحراء .. ولابسين shoes من اللي خلا أرضية الاستاد غيط شعير باير.. عموماً دة مش حيحوق في الصحراء!

5-إحنا عايزين نعمل فرح صديق للبيئة.. كل واحد يجيب معاه الآي بود الجديد بتاعه ويحطه في ودنه ويرقص.. وطبعاً العريس والعروسة حيعملوا نفس الشيء.. كدة حيبقى فرح هادي وكل واحد يعمل اللي هوة عايزه براحته..

6-والناس اللي مش عايزة تخلي الجو صحراوي طوبة .. أحسن حاجة نجيب معانا بيسين "فك وتركيب" نحطه في الصحراء ونشيله بعد الفرح.. إيه رأيكم؟

خلص الكلام