يا زمان...

[بنت شعنونة]

يا زمان الزمان ....

يا شيء اعمى بدون وجدان...

يا كان وكنا وكان يا مكان ...

يا قلب جف من الحب والحنان..

يا دمعه تنزل من عين العشقان..

تحرق خد وحيد ولهان...

يا فرحة تعلى تصحى تموت...كل دا في نفس المكان!

يااااااااه كل دا يا زمن الغدر والحرمان!!

يا ترى مين فينا الغلط!! انت والا بني الأنسان!

ليه دايما نجيب اللوم عليك

واحنا اللي ابتدينا..

ليه دايما نصرخ ااااااااه يا زمان

وانت يا عيني شيء اصم اخرص اعمى

وحتى من غير ودان!

تفتكر يا زمن احنا التمن!!!

والا احنا جرح الزمان!!

ويا ترى دمعي هوا دمعي

والا دا دم جرحي القديم كمان!!

عجايب عليك يا زمن

تجرح ..

تداوي..

تقتل..

تنسي...

بس في الأخر الغنوة دايما حزينة؟

مشيت في الحواري والسكك اصرخ بعلو صوتي

يا ناس انا سعيدة

ضحكوا علي

و شاوروا عليّ

وقالوا هيا دي المجنونة الأكيدة!!

قلت اضحك على نفسي وعليهم

اوهمهم بالسعادة البعيدة

لقيت الكل متفقين ان السعادة مجرد اوهام بعيدة!!

حتى ياربي لما بنضحك.

بنغمض عنينا ونخبي عشان العين الحسيدة!!

يا زمان...

ياناس...

لا يا انسااان

حد يجاوبني ويقولوا هانفرح امتى بجد!!

لما الموت يشتد!!

والا لما يفوت الزمان ونبقى في خبر كان!!

وماحدش يقولي انها حزينة ............ :roll: :oops:

[Katamando]

محاولة جبارة لأخفاء الشجن ولكنها باءت بالفشل ياشانا

يعنى حاولتي تهربي من الحزن بوضع قناع من التهريج

مما يسمى في لغة السينما بالكوميديا السوداء

بس مش مهم

ممكن بعد كام مرة غسيل..... الأسود يبقى رمادي وبعدين يتحسّن :) :) :) :oops: :cry:

[Cleo]

يا زمان الزمان ....

يا صباح الصباح.....

:oops: :cry: :D :) :) :)

دعااابااااااااااااا.........

[بنت شعنونة]

:) :)

طييييييييب يا كليو

استلمي بقى :)

يا صباح الصباح والجاي احسن من اللي راح

يا عيني على البال لما يبقى مرتاح

والا الواحد لما يبطل لف وسواح

ونسمعه الضحكة والكركرة بدل النواح

وفي كل بيت نلاقي بلسم يداوي الجراح

ولامرضى ولا امراض ولاحتى طبيب جراح

والناس قلبهم على قلب بعض

مهندس ومحامي اوحتى فلاح

والبنات من كل لون ملاح

والواحد بين الناس ضحوك ملاّح

وفي الحر بين الأمواج سبّاح

وعلى العيد للخرفان دبّاح

وفي رمضان صايم مرتاح

ياحلاوتك وانت مع درييييييييييييييم :oops:

[Katamando]

قريت ما قالت ريما لمشكاح

ولم تنته حتى الصباح

من غسيل اليوم اللي راح

وما ان رأها مشكاح

حتى أكفهر وصاح

أأتوني بالدبّاح

الأعور بن مفتاح

وأطردو السيّاح

فلم يعد هناك مباح

وريما سهرت حتى الصباح

لا تكتم النواح

تحاول أن تفلت من يد الدبّاح

الذي ينتظرها عند الصباح

حتى ظهر فشنكاح (ابن عم مشكاح الطيب)

وأتى لها بصابون برائحة التفاح

فغسلت كل غسيلها وفشنكاح ارتاح

والهم أنزاح

وصبح الصباح

وغادر الدبّاح

وتوقفت ريما عن النواح

بسبب الصابون أبو ريحة تفاح

[بنت شعنونة]

:) :) :)

تفاح اييييييييه ومين شنكاح؟

هوا حضرتك من عصر المصباح؟

مش قالوا انه انقرض وراح؟

يااستاذ حضرتك دلوقتي في الفية الملاح

يعني مافيش جحا وبح مشكاح

نصيحة يا ابني

بطل فرجه على التلفزيون المتاح

واتفرج على الفضائيات وارتاح :oops:

[Katamando]

والله أنا ممكن أخد بنصيحتك

بس الخوف أن كلامي يجيله وقت ويتشفر

وتقعدوا تدوروا على ديكودر وكرت وشغلانة

و أعتقد أن

الأحلام لا تشفر

مش كده ولا ايه؟

[Cleo]

أيوة كدة يا شنشن... ورينا كدة الإمكانيات اللوذعية فى الكوميديا......

[Katamando]

كليو واخده توكيل مجلس الشعب هنا

وعمّاله تسقف و تقول أيوه خش عليه أيوه يالعيب

ورينا الهمة يا كليوباترا

[إبن مصر]

ياصلااااه النبى ...

ماشى يا شعنعن..

يالى بتقسى عالزمان وافعاله

وتقول ظلمنى بقسوه احواله

تبكى الليالى والصبح من جرحك

ولا حد شايفك من الناس ولا لمحك

تكفكف الدمع والضحكه على خدك

يقولوا نصيبك كده تقول وماله

ماتقولش ان الزمان مجرحنى

وتمشى مكسور النفس ومحنى

الى جرح قلبك ده كان منك

لا هو خالك ولا كانش يوم عمك

ده الى هويته وخبيته فى قلبك

دبحك وجاى يقول لك سامحنى

ظالمين زمانا بينا يا اخوانا

والى فينا ده حصد افعالنا

ماله الزمان ومال غدر الحبايب

والى عاش بينا والى غايب

والى مسك فى الود وقام سايب

قلب الحبيب محتار وحيرنا

اه يا زمن

ابن مصر