هل ترغب فى الدراسه العليا فى امريكا - للمهندسين مدنى فقط.

[Horus]

قبل ما اخلص و امشى من هنا شمشمت و عرفت اخبار ان القسم عندنا - مدنى و انشاءات - عاوزين يزودوا عدد الطلبه اللى بيدرسوا الماجستير و الدكتوراه .. قلت فرصه .... اشوف الشباب اللى بيفكر و موش عارف يبدأ منيين .. على فكره الجامعه هنا فى - نورث داكوتا - من الجامعات القليله اللى بتدى منحه كامله يعنى موش بتدفع اى جزء فى المصروفات .. و كمان ممكن من خلال العمل فى القسم - زى انا مثلا - بادرس و اشرف على معمل المواد او التربه - ممكن يوفرلك دخل معقول يخلليك تعيش منه فتره دراستك.

[Horus]

آسف .. للأمانه .. لازم اذكر ان فيه رسوم بتدفع كل ترم حوالى 250 دولار و كمان لازم تدفع مبلغ 600 دولار كل سنه للتامين الصحى . اما مصروفات الجامعه نفسها و دى ممكن تعدى 3000 دولار كل ترم .. ف الجامعه هى اللى بتدفعهم.

[Proud Muslim]

طي و بتوع ميكانيكا ؟؟

ملهومش اي حاجة ؟؟

:) :cry: :)

طيب هل يشترط تقديرات و الحاجات الصعبة دي ؟؟

[Horus]

الاخ العزيز براود

الحقيقه انا معلوماتى تنحصر فقط عن قسم مدنى .. و ان كنت ممكن اسأل و ارد عليك قريبا ان شاء الله.

حكايه التقدير دى نسبيه - أخوك طالب عادى جدا :cry: - و مع ذلك انا ماشى كويس و الحمد لله :cool: - مش سر ان الدراسه هنا من ناحيه الكم و الكيف اسهل من جامعه القاهرة و عين شمس مثلا بمراحل - و ابشرك ان المصريين عاملين سمعه كويسه جدا فى امريكا و كندا على المستوى الاكاديمى ... مش هاقولك بس " احمد زويل " و "فاروق الباز" لكن كفايه تحاول تدور فى الاسماء - بتاعه الدكاتره الكبار- فى اى قسم فى اى جامعه و غالبا ما تلاقى روحك بتتكعبل فى اسم مصرى اصيل.

تانى انا برضه باتكلم عن الهندسه المدنيه خصوصا.

السبب اللى بيخللى الجامعه هنا فى نورث داكوتا بتدى لسه منح كامله ان الاقبال من الطلبه الامريكان قليل شويه و ده يمكن راجع لصعوبه احوال الطقس - برد جدا شتاء و حر فظيع صيفا - مناخ قارى زى ما بيقول الكتاب و لكن كله يهون عشان مصر. :cry:

و ان كان النصيب الاكبر للطلبه الاجانب هنا من الهند و كمان الصينيين بدؤا يغزوا الجامعه بأعداد كبيره عشان كده كنت عاوز ازود عدد المصريين هنا.

بالنسبه للمطلوب من طالب الهندسه عشان الجامعه تفتح كلام هو انك تعدى امتحان التوفل و من الافضل تعدى 600 عشان المنافسه ... ثم بعدها ممكن يطلبوا كمان انك تعدى امتحان ال GRE .

[Falcon Egypt]

السلام عليكم

الاخ العزيز براود مسلم

خلى بالك امتحان ال GRE امتحان صعب وغلس اوى , يعنى عشان تجيب فيه درجه جيده

اوعى تدخل على العميان بمعنى انك لازم تشترى الكتب المساعده لانها ستعرفك على شكل الامتحان

وتدربك عليه. وهناك الامتحان العام وايضا الامتحان المتخصص( يعنى فى صميم ماده التخصص(

واعتقد ان المطلوب منك النوع الاول وهو اسهل من المتخصص . لكن تاكد من الامتحان المطلوب من

الاخ حورس . وعلى فكره انا شخصيا تم اعفائى من الامتحان GRE فى مرحلة الماجستير,لكنى اخذته

بعد الماجستيرلانه مطلوب فى مرحله الدكتوراه , يعنى مش حا تنفد منه ياعزيزى الا اذا كانت سياسة

الجامعة تسمح بذلك . يالا ياوحش شد حيلك و.... Welcome to the gang :cry:

[Spider]

أمتحان التويفل أيضا صعب جدا جدا

وقد جربت أمتحان IELTS وهو الشهادة الأنجليزية وهو فى غاية الصعوبة ويحتاج تحضير سنة على الأقل قبل أجتيازه

[Proud Muslim]

مممم .. انا بعدي في الكلية بالعافية أصلا .. هي ناقصة . :?

على العموم ربنا يقدم اللي فيه الخير .

[وسام]

عندى برنامج عنGRE test عبارة عن تحضير للجزء general مع نموذجين للامتحان اللى عايزهم يبعتلى هوا حوالى 7 ميجا :cool:

[KWA]

أمتحان التويفل أيضا صعب جدا جدا

وقد جربت أمتحان IELTS وهو الشهادة الأنجليزية وهو فى غاية الصعوبة ويحتاج تحضير سنة على الأقل قبل أجتيازه

بسم الله الرحمن الرحيم

السلام عليكم ورحمة الله وبركاته

نصيحه بخصوص امتحان التويفل....خد الأمتحان من مصر افضل و علي ما أظن في المركز الثقافي او الأعلامي الأمريكي في جاردن سيتي...لأن اي جامعه في أمريكا سوف تطلبه مع الأوراق المقدمه و تختلف كل جامعه عن الأخري في نسبه التقدير للتويفل....اما امتحانك هنا للتويفل غير مضمون النجاح من المره الأولي

مممم .. انا بعدي في الكلية بالعافية أصلا .. هي ناقصة .  

أخي الفاضل براود ....الكلكعه و الصعوبه في نظام التعليم المصري شئ سوف تنساه بمجرد بدايه دراستك هنا ....هي مش سهله و لا صعبه زي التعليم المتخلف في مصر..و الدراسه هنا سلسه و كل من حولك في الجامعه من الدكتور الي موظف في اداره الجامعه سوف يمدوا يد المساعده لك داخل اطار الدراسه...فلاتقلق و توكل علي الله...