عربية الفول

[ragab2]

نزلت

الصبح بدرى من غير فطار

حودت

على عربية الفول أم حمار

لقيت عم حسان

بتاع الفول بيفكر ومحتار

أصل

الحمار عيان هو وابنه مختار

من

كتر التعب والمشورة

عم حسان

راجل فى الفول فنان

طعميته تهوس

وطعمها جنان

وياسلام

على الطرشى ومعاه البتنجان

تاكل وتشبع

وتبقى آخر روقان

ملموم عليه

ناس أمم زى الدَدَبان

طوابير واقفة

زى الجمعية

والأخير يقف ورا

أكلت ساندوتش

فول بالزيت الحار

لو قلت

زبدة مش فشار

صحيح يامصر عمار

والا الطعمية

أما تطشطش ع. النار

فى الزيت المغلى

تفرش وتطلع بخار

ريحتها

تجيب لسابع جار

أحسن م. الكفتة

والكباب منها يغار

كل واشبع ولا تحتار

دة

العمر واحد مهما جرى

عم حسان

على قد حاله

راجل أمى وفى حاله

يبصم ويقول وماله

حساباته فى مخه وفى باله

لا

يعرف منظرة ولا فشخرة

موظفين الوزارة

قاطعين عنده أبونيه

أول الشهر يدفعوله كذا جنيه

من أول الفراش لغاية البيه

اللى بياكل عنده

واللى

يمشى بعد ما اشترى

فى مرة هجم عليه

الصحة والتموين

سألوه عن الرخصة

واللى صرح له مين

وبيغسل الأطباق ازاى وفين

وطبعا

كل اللى كان واقف ياكل جرى

أما المرافق

ملهاش كبير

تصادر البضاعة وتلم الحمير

تقلبها ضلمة من غير تبرير

عم حسان كان زبونها الأخير

شالوا العربية من غير تأخير

وآدى

كل اللى جرى

[Hassan]

جميلة جدا يا اخ رجب :)

[بنت شعنونة]

: :)

جميييييييييييلة جداااااااااا

وبصراحا

جوعتنيييييييي :roll: oops: :) :)

[Katamando]

هو انا بس معترض على حاجة واحدة بس

الناس ملمومة عليه زي الدبان

ماينفعش الكلام ده مع الأكل

يعني ممكن تسد النفس شويه

مش كده ولا ايه؟؟

[ragab2]

أولا

شكرا للأخت شعنونة والأخ حسن

والأخ كاتماندو

ثانيا

أنا فعلا أتفق مع الأخ كتاماندو وقد كتبتها وأنا غير مستريح لها ورأيك صح

ولذا أستأذنك فى تغييرها الى الددبان

تحياتى للجميع

[إبن مصر]

مش قلتلك يا استاذنا ...

استاذنا رجب لما كتب خلى الكلام من قلمى احتجب ...

ليه ما تفكرش تعمل كراسه شعريه ( تطلق على ديوان الشعر او الغزل اقل من 50 صفحه ) ولا تحرم الاخرين من هذا الفن ..

ابن مصر

[ragab2]

شكرا ياابن مصر يا أصيل

ياللى بتفكرنى بالنيل

وهوا مصر العليل

وكلامك الجميل

.................

شكرا جزيلا أخى الفاضل ابن مصر

على تشجيعك وكلماتك الرقيقة لنا

والتى تنم عن أخ فاضل وانسان نكن له كل الحب والاحترام

وتجرى

مفاوضات حاليا لعمل كتيب صغير أجمع فيه بعض الأزجال المتواضعة

تحياتى

[mnman]

حرام يا دكتور رجب... فول وطعمية كمان.... دة انا نفسي فيهم من سنة و تمن شهور .... يا بختكم اهو انا لو شفت عم حسان حكلة هو و الفول و الطعمية..... :oops: :D

بس طعم و لذيذ و رحتة حلوة الموضوع دة.... :D :D

بجد 10 علي 10 ......

[إبن مصر]

العفو يا استاذنا .. المهم لو بجد النيه موجوده انا يسعدنى ويشرفنى انى اساعد فى خروج هذا الكتيب سواء كان فى الطباعه او اى شىء بس انت تأمر وبجد مش كلام منتديات :lol:

طبعا انت عارف انى فى مصر وكل شىء هنا تحت امرك من اول الموافقات وتصريح المصنفات وتسجيل حقوق ملكيه فكريه الى طباعه الكتيب نفسه وحقوق النشر ....

فكر وأمر أخوك

ابن مصر