تحذير للفتيات الراغبات في السفر إلى دول الخليج......

[The Professor]

لا أفضل الخوض في مثل هذه الموضوعات لكن عندما قرأت هذا الخبر على صفحات الجرائد وفي بعض المواقع على الإنترنت , رأيت انه من المهم وضعه في المحاورات كصرخة تحذير جدير بالمحاورات ان تطلقها لراغبات السفر من الفتيات المصريات ... وأليكم الموضوع...

تمكنت مباحث الآداب المصرية بمحافظة الفيوم بالاشتراك مع الإدارة العامة لحماية الآداب من ضبط شبكة تقوم بتسفير الفتيات للخارج بعد إيهامهن بالعمل مضيفات في كافيتريات ومطاعم وإجبارهن علي ممارسة البغاء والأعمال المنافية للآداب.

كانت معلومات قد وردت للإدارة عن قيام شخص من احدى مدن محافظة الدقهلية بتكوين شبكة دولية لأعمال البغاء بالاشتراك مع شريك له من محافظة الفيوم.

تم التنسيق مع مباحث الآداب بالفيوم وبتكثيف التحريات تبين أن المتهم الأول سبق اتهامه في ثلاث قضايا بغاء دولية وانه كون شبكة تضم أعضاء في عدد من المحافظات تضم عدد من النساء والرجال حيث يقومون باستقطاب الفتيات الراغبات في العمل بالخارج بعد إيهامهن بتسفيرهن للعمل كمضيفات في كافيتريات في دولة خليجية ويتم تجميع الفتيات في منزل أحدهم ويتولي المتهم الأول استخراج التأشيرات وهناك تلتقي الفتيات مع طليقة المتهم الأول والتي تنقلهن إلي بيوت لممارسة الدعارة والبغاء.

كما تمكنت الحملات التي قامت بها مباحث الآداب بالفيوم بالاشتراك مع الإدارة العامة لحماية الآداب من ضبط خمس فتيات من المحافظة سبق لهن السفر والعودة في إجازة واللاتي أدلين باعترافات تفصيلية عن كيفية سفرهن وان العصابة تستغل حالتهن الاقتصادية الصعبة وإيهامهن بالعمل وهناك يتم إجبارهن علي ممارسة البغاء، حسبما ذكرت جريدة الوفد.

وتمكنت الحملات كذلك من ضبط إحدى الفتيات رفضت العمل في البغاء وهربت من الوكر ولجأت إلي السفارة المصرية بالإمارات التي قامت بترحيلها إلي مصر.

وأدلت الفتاة بالتفاصيل الكاملة عن الشبكة وأمرت النيابة بإخلاء سبيلها. في حين أحيل المتهمون التسعة الذين القي القبض عليهم في الفيوم إلي النيابة التي تولت التحقيق في القضية.

تم تعديل 21 نوفمبر 2007 بواسطة The Professor

[احمد الديب]

يا جماعة خافو علي عرض بناتنا ولو الكلام ده صحيح تبقي كارثة عشان الناس دي مفترية بتبصلنا اننا عبيد عندهم او ملكة يمين وفعلا هم عندهم بغض شديد للمصررييين وبالاخص في السعودية بلاد الحرمين

[بنت النيل]

ممكن نعرف الخبر نشر على اى جرائد واذا امكن وضع الرابط لهذا الخبر

واذا كان الخبر صحيح يبقى مفيش غير اننا نقول " عليكى العوض فى ولادك يا مصر "

والله يجازى اللى كان السبب

[mohmaher]

http://www.masrawy.com/news/2007/egypt/pol...r/20/girls.aspx

[رمضان]

يا جماعة الخير صحيح دي مش مشكلتنا

بس طبعا الامور مش كده اطلاقا فيه بنات كتير بتيجي على شركات محترمة ومفيش حد بيبص لها بصة واحدة

لكن واحدة طالعة على كافتيرا هيه دي المشكلة ايه اللي يخليها تطلع على كافتيريا او فندق اكيد هيحصل معاها كده وده المعروف

[قاهرى]

حسبيى الله ونعم والكيل فى كل واحد يبيع بنات اهل بلدوا علشان الفلوس او يبيع اخوة علشان الفلوس اية يا جماعة الى حصل للناس .. بجد فى اية ؟؟

الناس بقت تاكل فى بعض لية؟ بجد انا حاسس احساس وحش اوى حاسس ان مبقاش فية حاجة اسمها احساس بالاخارين .. انا مستاء بجد من الى احنا فية

انا لسة انهردة بدون ذكر تفاصيل شايف واحد مصرى بيبيع اخوة (اخوة بجد) علشان فلوس .. وبيحقد علية وحاجة قرف

انا من يومين قبلت واحد هندى .فبيقولى انت مصرى بقولو اةةة مصرى .. قلى بس انت كويس مش زى المصرين .فنا بقلو لية كدة يعنى .. المصرين مش وحشين .. بس يمكن انت الى قبلتهم كدة . وكل بلد فيها الكويس وفيها الوحش ..

قلى لا انتوا المصرين مش بتحبو بعض وكل واحد مش بيحب غير نفسو والاخ بيحقد وبيحسد اخوة .. احنا مش كدة خالص ........ والله حسيت ان كلموا صح .. بقيت بدافع عن مصر والمصرين وانا مش مقتنع

عايز اوصل صوتى لكل الناس .ليةةةةةةةة . دة احنا المسلمين ... حرام والله هما الى مش مسلمين بيتعونوا مع بعض . بيجيبوا بعض ويكبروا بعض . ولو حتى مش هيعملو كدة مش هيبصوا على بعض فى رزقهم .. والله يا جماعة حرام على الى المصريين بيعملو فى بعض . ومحدش يقولو لا مش كتيررررر والله انا مشفتش حد مش بيعمل كدة

حسبى الله ونعم الوكيل بجد

انا تعبان بجد من الى احنا فية

[ابو محمود]

اخى قاهرى لاتزعل انها الحقيقة الؤلمة كثرت الأحقاد والفسادبقى للركب ياسيدى انت بتقول كدةانا لسة من سنة واخدواحد مقلب كبير دافعت عن مال تاجر وتحصلت لة على ثروة كانت هتضيع منة وكان السبب فى انهيار عملى وتكبدى خسائر فادحة ولازلت أعانى حتى الأن من رواسبها ولنا اللة لاتنزعج لقد حل بنا الفساد وأصبحنا فى الطريق للتخطف والأنهيار التام كلها بقت كدة اللى يقدر على حاجة يعملها خلاص وعجبى على شعب يريد الكسب السهل ولو من طريق الشيطان معدش يفرق ذمة أو دين اوانسانية

[The Professor]

يا جماعة الخير صحيح دي مش مشكلتنا

بس طبعا الامور مش كده اطلاقا فيه بنات كتير بتيجي على شركات محترمة ومفيش حد بيبص لها بصة واحدة

لكن واحدة طالعة على كافتيرا هيه دي المشكلة ايه اللي يخليها تطلع على كافتيريا او فندق اكيد هيحصل معاها كده وده المعروف

فيه مثل مصري شهير جدا بيقول إيه اللي رماك على المر , قال اللي أمّر منه. إلقاء الشباب بأنفسهم في المهالك وغرقهم في البحر والرضا بأي عمل حتى لوكان مضيفة او بائعة في كافيتيريا ( رغم انه عمل شريف ولا غبار عليه ) هو من قبيل الحاجة الى العمل الذي لا يتوفر في بلدنا - هناك اسر أخي الكريم يعيشون تحت خط الفقر يحسبهم الجاهل اغنياء من التعفف - وظاهرة سفر الفتيات للخليج للعمل كمضيفات في مطاعم وكافتيريات - هو بدافع الحاجة واعتقد انهم لو وجدوا العمل المحترم وفي المكاتب لما ترددوا في قبوله.. نحن فقط ننبه هؤلاء إلى تحري الأمور قبل أن يقع المحظور وربنا يسترها معانا جميعا

[أختكم المصرية]

أه يابلد

ليه بيتعمل فينا كدة ليه وصلنا للمرحلة دى بنبيع عرضنا

حسبى الله و نعم الوكيل

[احمد الديب]

اخواني الاعزاء الخبر بالفعل صحيح تم نشره علي جريدة المصري اليوم بتاريخ 23/11/2007 وهذ هو نص الخبر كما كتب

ضحية شبكة البغاء الدولية في الفيوم تروي تفاصيل تجنيد الفتيات

كتب محمد فرغلي ٢٣/١١/٢٠٠٧

روت الفتاة التي كشفت عصابة البغاء الدولية تفاصيل الجريمة لـ«المصري اليوم»، منذ أن بدأ تجنيدها في الفيوم ضمن أعضاء الشبكة بدعوي تسفيرها للعمل في دولة عربية في وظيفة «مضيفة» مقابل ٥ آلاف جنيه شهرياً، وهناك اكتشفت الكارثة، تبين أن مطلقة زعيم العصابة تستقبلهن هناك وتلحقهن لممارسة الفجور وملاطفة رواد صالات الديسكو، فهربت إلي الشرطة ومنها إلي السفارة المصرية التي أعادتها إلي البلاد، حتي ألقي القبض علي أعضاء الشبكة، وجار البحث عن المتهم الأول.

قالت آية أحمد حسن: لم يكن لنا مورد رزق فاضطررت لمساعدة أسرتي ونزلت إلي العمل وعمري ١٠ سنوات، حتي التقيت مع عم «يحيي» بواب إحدي العمارات، وأراد أن يساعدني في العثور علي فرصة عمل في الخارج، وعرض علي فكرة السفر فوافقت دون تردد.

واستكملت: عشت في سعادة عندما وجدت فرصة عمل في دولة خليجية براتب كبير، وأوصلني عم «يحيي» إلي سيدة تدعي «أم هاشم»، شهرتها «أم ندي» التي وعدتني بمساعدتي علي السفر، وبعد يومين قابلتها وبصحبتها حمدي القفاص وعادل الفيومي، واتفقنا علي السفر إلي الإمارات للعمل في كافتيريا براتب شهري ٥ آلاف جنيه، علي أن أسدد لكل منهم ٢٠٠٠ جنيه بعد وصولي، وجهزت الأوراق واصطحبتني أم ندي إلي قسم الجوازات واستخرجنا جواز السفر، أخذته مني للحصول علي التأشيرة، وفي ٣٠ يوليو الماضي كان موعد السفر، وقتها أخبرتني بأن أجب إذا سألني أحد في المطار عن سبب السفر بأنني ذاهبة لزيارة خالتي هناك، وأن امرأة في الإمارات تدعي «هالة» تنتظرني للمساعدة وتوفير المسكن.

وبالفعل سافرت وهناك قابلت «هالة» وشهرتها «ليالي» وعرفت فيما بعد أنها طليقة حمدي القفاص، اصطحبتني إلي منزلها في شارع المطار بجوار بنك أبوظبي التجاري، وهناك وجدت ٦ فتيات هن: وفاء وهند وإيمان ورشا ونهي ومها.

بعد ساعة طلبت مني النزول مع سيدة تدعي «هند» للكوافير، ثم عدت إلي الشقة مرة أخري بعد منتصف الليل، وسيطرت علي حالة من القلق ولم أنم حتي وصول الفتيات في السادسة صباحاً من اليوم التالي، وبعد أذان العصر لبسنا جميعاً استعداداً للخروج، وعندما سألت عن وجهتنا أبلغتني «هالة» بأننا ذاهبون إلي الكوافير وبعدها للديسكو، وعندما فاتحتها في موضوع الشغل نهرتني وسبتني وقالت: انتي أتيت إلي هنا للسهر في الديسكو وممارسة الأعمال المنافية.

واستكملت آية: عندما رفضت ضربتني، فطلبت منها العودة إلي مصر، لكنها رفضت وأخذت مني جواز السفر، وعندما وصلنا إلي صالة الديسكو قدموا لنا الخمور، وحاولت معي هالة أن أشرب فاستأذنت منها لدخول الحمام وخرجت جرياً إلي الشارع، ووصلت إلي قسم شرطة وهناك قابلت أحد الضباط ورويت له ما حدث معي وأعطيته عنوان الشقة واحتجزوني في القسم لليوم التالي، ثم اصطحبوني إلي الشقة وهناك أخذ رجال الشرطة بواب العمارة للوصول إلي مسكنها، ووجدنا البنات وبسؤالهن قالوا لرجال الشرطة إنهن يبحثن عن عمل، وحضرت مدام هالة بعد لحظات وأنكرت معرفتها بي، إلا أنني طلبت من رجال الشرطة تفتيش حقيبتها، وبالفعل استخرجوا منها جواز سفري فاصطحبونا جميعاً إلي قسم الشرطة، وتم تسليمي إلي السفارة المصرية وقابلت المسؤولين فيها وحكيت لهم ما حدث.

:ninja:

[se_ Elsyed]

الموضوع لا يتعلق بكافيتريا أو فندق فقط ..

لإن ممكن يكون العقد في شركة وتكون الشركة دي مجرد ستارة لممارسة مثل تلك الأعمال القذرة ..

ولكن إذا أقتضى الأمر سفر البنت للعمل بالخارج فأعتقد إن لازم تكون هناك شروط قاسية وتأمينات لها سواء داخل مصر عن طريق وزارة القوى العاملة أو خارجها عن طريق السفارات والقنصليات لضمان عدم حدوث مكروه لها حتى لو كانت شغالة في شركة محترمة ...

ولو إن أنا ضد سفر البنت للعمل في الخارج تحت أي ظروف ... بلا مُر بقى بلا يحزنون ... لإن مرارة الفقر أحلى مليون مره من مرارة فقد الشرف والعِرض أو على الأقل البهدلة ، وأديكوا شفتوا حالات إتنصب عليها في مرتب وفي ظروف عمل وكانوا رجالة بشنبات ... بالله عليكو لو البنت بقى حصل لها مشكلة مع شركتها في مرتب أو سكن أو ما إلى ذلك .. تعمل إيه وتروح فين ؟ ..

إذا كان الواحد بيخاف على البنت أو الست داخل بلده ما بالك وهي مسافرة بره في ظروف لا نعلم عنها شيئاً ...

وياريت ما نعيدش نفس النغمة اللي يحلو للبعض سماعها في الهجرة غير الشرعية ومراكب الموت اللي بيروحوا ما بيرجعوش .. فالموت جوعاً وبشرف وسط الأهل ... أفضل ملايين المرات من الموت في عرض البحر أو الموت المعنوي بعيداً عن الوطن .

[مصري أصيل]

الأخ قاهري

الاخ محمود مصطفي

لما نزلت موضوع كره المصريين لبعض في الغربة تعرضت لهجوم شديد من أعضاء المنتدي وكأني ألصق التهم بالمصريين وبس لدرجة أن ناس في المنتدي أتهمتني أني ممكن مش مصري ومندس في المنتدي عشان أشوه صورة المصريين وكان أي عضو في المنتدي يتبني وجهة نظري كان يتعرض لهجوم مماثل حتي طلبت أنا نفسي غلق الموضوع ولم تكتفي الأدارة بغلقه بل قامت بحزفة.

علي العموم موضوع جلب الفتيات للعمل في أعمال منافية للأداب ليس موجود في المصريين فقط بل هناك جنسيات عربية تقوم بهذا بشكل أكبر من المصريين ولا أعرف أن كان مسموح زكر هذه الجنسيات في المنتدي أم لا . وبالنسبة للكويت فقد قام المسئولون هنا بتشديد الرقابة علي أستخراج تأشيرات الزيارة للفتيات بسبب هذا الموضوع ولكن للأسف يقوم مديري هذه الشبكات بالتحايل علي القانون حتي يقوم بجلب هؤلاء الفتيات الي الخليج وسمعت أن من أساليب التحايل في أحدي الجنسيات المشكوك في أمرها بصورة كبيرة والتي لا تأتي ألا لهذا الشأن والتي تقوم السلطات بتصعيب حضورهم للكويت بصورة كبيرة مما يضطر عندها من يجلبهم للزواج بهم علي الورق طبعاً لكي يتم دخول الفتاه بزيارة عائلية لعدم تمكنها الدخول بزيارة سياحية أو تجارية.

[The Professor]

ولو إن أنا ضد سفر البنت للعمل في الخارج تحت أي ظروف ... بلا مُر بقى بلا يحزنون ... لإن مرارة الفقر أحلى مليون مره من مرارة فقد الشرف والعِرض أو على الأقل البهدلة ، وأديكوا شفتوا حالات إتنصب عليها في مرتب وفي ظروف عمل وكانوا رجالة بشنبات ... بالله عليكو لو البنت بقى حصل لها مشكلة مع شركتها في مرتب أو سكن أو ما إلى ذلك .. تعمل إيه وتروح فين ؟ ..

أولا نحن جميعا وأي انسان لديه ابسط درجات النخوة والشهامة والرجولة بلاش نقول مسلم ومؤمن , يرفض تماما مبدأ سفر الفتيات بمفردهن للخارج ... لكن يا عزيزي نحن هنا نتحدث عن واقع وهذا لا يعني اننا نبرره بل نحلله ونلقى الضوء عليه و نحاول ان نجد مبرراته واللي بالتأكيد تكمن في ضيق الحال وانعدام السبل لعمل مجز. وبالتالي نطلق تحذيرنا وهذا واجبنا لمثل هؤلاء الفتيات واهاليهن لأخذ الحيطة والحذر.

[The Professor]

وياريت ما نعيدش نفس النغمة اللي يحلو للبعض سماعها في الهجرة غير الشرعية ومراكب الموت اللي بيروحوا ما بيرجعوش .. فالموت جوعاً وبشرف وسط الأهل ... أفضل ملايين المرات من الموت في عرض البحر أو الموت المعنوي بعيداً عن الوطن .

معلهش دي مش فاهمها .. ياريت حضرتك توضح لنا وجهة نظرك .. فأنا أرى الموضوعين تقريبا يؤدوا إلى نفس النتائج وموضوع الهجرة غير الشرعية موضوع الساعة فعلا ويستحق ان نتوقف عنده كثيرا ويستحق حملة كبيرة أولى بمحاورات المصريين ومنتسبيها ان يطلقوها ... و ليس معنى اننا نطرح موضوع اننا نوافق عليه ...

هذا رأيي الشخصي مع احترامي لبقية الآراء

تم تعديل 24 نوفمبر 2007 بواسطة The Professor

[se_ Elsyed]

وياريت ما نعيدش نفس النغمة اللي يحلو للبعض سماعها في الهجرة غير الشرعية ومراكب الموت اللي بيروحوا ما بيرجعوش .. فالموت جوعاً وبشرف وسط الأهل ... أفضل ملايين المرات من الموت في عرض البحر أو الموت المعنوي بعيداً عن الوطن .

معلهش دي مش فاهمها .. ياريت حضرتك توضح لنا وجهة نظرك .. فأنا أرى الموضوعين تقريبا يؤدوا إلى نفس النتائج وموضوع الهجرة غير الشرعية موضوع الساعة فعلا ويستحق ان نتوقف عنده كثيرا ويستحق حملة كبيرة أولى بمحاورات المصريين ومنتسبيها ان يطلقوها ... و ليس معنى اننا نطرح موضوع اننا نوافق عليه ...

هذا رأيي الشخصي مع احترامي لبقية الآراء

هي نفس وجهة نظري في الهجرة غير الشرعية ... فكلنا بنبقى متأكدين إن البني أدم اللي مهاجر في مركب لصيد البساريا هايموت هايموت .. إن ما كانش في عرض البحر .. يبقى في أوروبا اللي ما بتحرمش حتى أهلها .. يعني لا لغة ولا صنعة ولا نيله ومع ذلك طالع يمني نفسه بالملايين اللي هايعبيها في شوله والبيت اللي هايبنيه في 6 شهور والعربية اللي هايرجع شاحنها على المركب ...

ونسمع أصوات تقول " إيه اللي رماك عالمر " " يا عم سيبه يجرب حظه " " وهو كان لقى شغل وما أشتغلش "

نفس الشيء ينطبق على الفتيات المسافرات لمثل هذه الغعمال .. هانسمع برضوا تبريرات تقول " ومين قالك إن هايحصل لها كده ؟ " " يا عم سيبها تجرب حظها " " وبرضوا نفس الجمله بتاعت الإسطوانة المشروخة إيه اللي رماك عالمر "

وبتبقى النتيجة عشرات الصناديق للمحظوظين اللي لقوا جثثهم ... وطبعاً هناك مئات لا يُعرف مصيرهم ويا ترى هما في بطن أنهي سمكه دلوقت لإن أول حاجه بيعملها قبل ما يطلع المركب إنه بيقطع جواز سفره يعني بيبقى مجهول الهوية ...

أو بنات يُجبروا على العمل في شبكات الدعارة وبرضوا نرجع نقول اللي رماك عالمُر ..

وبرضوا الموضوع ده يا بروف متشابه مع موضوع عيوشه المخدماتيه ... تصدق إن في ناس كتير كانت مأيداه تحت مبدأ إيه اللي رماك عالمُر ؟!!!! .. ودعونا نجلس على المائدة المستديرة لوضع معايير وقوانين مُنظمة لذلك عشان نضمن إن الخدامة هاتخدم في ظروف صحية للغاية .. !!!!!!!!

مرة أخرى والله العظيم أنا لا اتحدث من فوق البُرج العاجي ... ولكن للأسف ناس كتير من اللي بترمي نفسها في التهلكة دي في منتهى الكسل وحاطط إيده على خده ويقول ما فيش شغل مافيش شغل ....

[إيزيس]

فعلا يا جماعة أنا شفت قصة مشابهة بنت مصرية كانت تعمل في صالون نسائي

وحكت لي عن ظروفها وإن اللي ساعدتها علشان تعمل فيزة وهي للأسف مصرية أخدت منها مبلغ كبير

وهي فكرت إن ببساطة هتقدر تسدد المبلغ اللي كانت أصلا مستلفاه من الناس في مصر

والواقع اللي شافته مختلف الراتب أقل من المتفق عليه و الأحوال المعيشية صعبة للغاية

وحرصا عليها لما عرفت إنها بتسأل عن عمل ساعتين في اليوم في أي بيت علشان تكفي مصاريفها و تسديد ديونها

استعنا بيها أنا و بعض صديقاتي كمساعدة لنا في الأعمال المنزلية و كانت بنت محترمة جدا و شاطرة ومش وش بهدلة

و أول ما سددت اللي عليها و جمعت مصاريف السفر سافرت

النقطة المهمة في الموضوع إنها حكت لي إن صاحب العمل حاول معاها محاولات سخيفة لكن البنت اسكندرانية جدعة

وقفت ضده بحزم لكن للأسف واحدة من زميلاتها اللي بدأوا الشغل معاها بنفس الوقت مشت حالها زي ما بيقولوا بحجة العوز و الفقر

أدري أن الحاجة تذل لكن الجوع أكرم من التفريط في بناتنا و أخواتنا

تم تعديل 12 أبريل 2008 بواسطة قرنفلة