لنسأل أنفسنا بدون شعارات : هية مصر قد إضراب؟

[Sherief AbdelWahab]

اليوم شهدت فرنسا إضراباً شل الحياة في أكثر من مجال حيوي وهام .. صحيح أوروبا (متعودة دايماً) على الإضرابات لكن برضه بأحس إن الناس بتتضايق وبتقرف وبتشمئز من دة .. الناس غير المسيسين طبعاً زي حالاتنا وحالات ناس كتير في هذا العالم..

للي بيدافع عن لبانة الإضراب التي يلوكها البعض في ألسنتهم وهم يتم تحريكهم من جانب المال السياسي وقوى سياسية ودينية ما في البلاد في معاركهم ضد النظام.. تقدر تستحمل إضراب؟

إحنا في الأحوال العادية بنقاسي الأمرين والتلاتة علشان نركب مواصلة نروح بيها شغل أو نقضي بيها مصلحة.. فما بالك لو السواقين عملوا إضراب!

إحنا بـ"نتذنب" زي العيال الصغيرين علشان نقضي مصلحة في مصلحة حكومية .. فما بالك لو الموظفين عملوا إضراب!

هل مصر قد إضراب من عينة الإضرابات الأوروبية؟

خلص الكلام

[شينكاوي]

السلام عليكم ورحمة الله وبركاته.....

اعتقد لأ مصر مش قد اي اضراب عارف حضرتك ليه لأن لو الشعب كله عمل اضراب برده لا حسني ولا اللي

معاه هيحسوا علي دمهم ويسيبوا البلد بل اعتقد أن المواطن البسيط من هو مثلي ومثل غيري سوف

يتحمل النتيجة وسوف نعاني بسبب من هم مثلنا من ابناء الوطن والحكومة لن تهتم لانها لم ولن تهتم

لمعاناتنا بل بالعكس هييجي علي راسنا احنا المواطنيين العاديين اللي مش هنعمل حاجة وهنتكلم

شوية ونروح بيوتنا بدون ما نخلص مصالحنا وهيكون الاضراب بهذا الفعل منا نحن المواطنيين قد افرغ من مضمونه

اذ ان هدف اي مجموعة مضربه في العالم هو تعطيل مصالح المواطنيين لتحريض هؤلاء المواطنيين علي الحكومة

وبالتالي قد يلجأالمتضررونالي اسقاط الحكومة او تلبية مطالب المضربين وفي حالة مصر لن يحدث لا هذا ولا ذاك

وبعدين اسكت علشان انا في مصر ومغلول ومش عاوز اتكلم لاني مصر بامانه خربت وهي مش ناقصة خراب الاضرابات .

[حسام يوسف]

اليوم شهدت فرنسا إضراباً شل الحياة في أكثر من مجال حيوي وهام .. صحيح أوروبا (متعودة دايماً) على الإضرابات لكن برضه بأحس إن الناس بتتضايق وبتقرف وبتشمئز من دة .. الناس غير المسيسين طبعاً زي حالاتنا وحالات ناس كتير في هذا العالم..

للي بيدافع عن لبانة الإضراب التي يلوكها البعض في ألسنتهم وهم يتم تحريكهم من جانب المال السياسي وقوى سياسية ودينية ما في البلاد في معاركهم ضد النظام.. تقدر تستحمل إضراب؟

إحنا في الأحوال العادية بنقاسي الأمرين والتلاتة علشان نركب مواصلة نروح بيها شغل أو نقضي بيها مصلحة.. فما بالك لو السواقين عملوا إضراب!

إحنا بـ"نتذنب" زي العيال الصغيرين علشان نقضي مصلحة في مصلحة حكومية .. فما بالك لو الموظفين عملوا إضراب!

هل مصر قد إضراب من عينة الإضرابات الأوروبية؟

خلص الكلام

السلام عليكم

من تانى باختلف معاك يا ا0شريف

حق الاضراب السلمى للمطالبة بشيء ما حق مكفول لكل العمال والموظفين فى كل المواثيق والمعاهدات الدولية

وحتى الحكومة المصرية متقدرش تقول اللى انت قلته

فاما انك حكومى اكتر من الحكومة

واما محتاج تراجع حقوق العامل فى كل مواثيق العمل الدولية

وحتة اننا منستحملش الاضراب دى مقولة حق يراد بها باطل

ونبدأ الكلام

ومستنى ردك يا اخى العزيز

[Sherief AbdelWahab]

1-إيه الأولى إنك تعمل علشانه إضراب: إنك ما تاخدش مرتبك ولا إن ابنك ما يتعينش في الشركة حتى ولو كانت دراسته بعيدة كل البعد عن مجال الشركة أو المصنع؟

اللي عايز ياخد حقه ما يستناش عليه عشرين سنة ويفتكر .. آآآآآآآه .. أنا اتسرقت!

تهلل وتنافق عشرين سنة وبعد كدة تقول اتسرقت .. أو تفتكر إنك اتسرقت؟

2-ليه الإضراب دايماً هو أول حل؟ وليه بيبقى فيه ناس عايزاه بيبقى أول حل؟ سواء أكان الناس دول من فصائل المعارضة أو من الحزبوطني نفسه..

ليه الحركة العمالية عندنا كدة ممكن أي حد يحركها .. الإخوان يحركوها .. اليسار يحركها .. وكمان الحزبوطني .. ولا انت ناسي الأتوبيسات اللي بتودي آلاف العمال للتصويت في الانتخابات ومظاهرات التأييد والمبايعة لأي حد .. من المستر بريزيدنت لحد السيد رئيس اللجنة النقابية؟

أنا باتكلم كواحد من الناس العادية اللي بتخسر من فوضى الإضرابات وبتنجان الحزبوطني اللي عامل فيه آل إيه نصير العمال.. وانت الصادق .. نصير بقاء العزبة كما هي عليه ملكاً للحزبوطني البيروقراطي.. وعلى المتضرر أن يخبط رأسه في أقرب حيطة!

خلص الكلام

[Nina Hussien]

بصراحة انا نفسي نعمل اضراب مرة واحدة

على أي حاجة

على ارتفاع سعر الزيت للمرة العاشرة في خلال كم شهر

على سوء حال العيش

على ارتفاع سعر كل شيء حتى الهوا

على سوء الخدامات و السرقة الحكومية العلنية

على حقنا المهضوم و قضاء مصر الذي اصبح تحت عصى السلطة

على المناهج الدراسية العقيمة و النظام التعليمي الاشبه بمولد الشيخ كتكوت

على أي حاجة بجد بس نعترض مرة في حياتنا و ناخد موقف جماعي

يارب اشوف اليوم ده قبل ماموت :)

[amrhoras]

هل هو اضراب له معنى ام لا؟

عمال مصنع الغزل والنسيج قاموا بتنظيم اضرابين في مده صغيره ماذا جنوا منه؟ لم بحدث شيء جديدا سوى بعض من الوعود

الاضرا ليس اجرى ياجدع عوزين نعمل اضراب

تحديد الهدف فوق كل شيء

تحديد المطالب وفتره زمنيه معينهه للتنفيذ والا نجيب عاليها واطيها

التنظيم اهم شيء

ولكده يكون اضراب مفيد واعتقد اننا فى حاجه الى اضراب يرج كيان الدوله كلها نتوق ولو ساعه واحده لنقول نحن الشعب اقوى من بطشكم لكن لا حياة لمن تنادى

سلام عليكم

[mohmaher]

اضراب !!

يا عم هو احنا عندنا حق في أي حاجة أصلا في البلد ديه !؟؟

الي بيعملوا اضراب في مصر عمرهم ما فكروا فيه و خططوا له زي فرنسا ...

اللي بيضربوا في فرنسا بيضربوا لزيادة الرفاهية :blush2:

في مصر الناس بيضربوا مضطرين لانهم مش لاقيين لقمة العيش أصلا .... في فرق كبير ..

ومع ذلك أنا مع الاضراب اذا كان في وجه نظام ظالم متجبر لا يسمح بسماع صوت شكوى الناس ....

لذا وجب علينا اسماع النظام الفاسد أصوات الشعب المطحون قصرا

[بنت النيل]

وتفتكرو ان هو ده الحل اننا نعمل اضراب

اعتقد ان ساعتها هنكون بنعمل الاضراب ده على نفسنا واحنا اللى هنضر

هى كل المصالح اللى بتشتغل دى بتشتغل لمين مش كلها لتخليص مصالحنا احنا فى بعض

يعنى مصلحة الناس هى اللى هتضر وليس الحكومة

الحكومة لن تضر فى شىء

اكيد فى حل تانى حل يعرف الحكومة

اننا قادرين ولابد من ان يعمل لنا الف حساب واننا نسطيع اخذ حقوقنا

واننا مش النسر اللى عايش فى وسط الكتاكيت ومعتقد انه كتكوت ولا يسطيع الطيران

[darlengs]

المشكله اننا فعلا منعرفش نعمل اضراب منظم يوصل مطالب و يؤدي لنتائج متوقعه 00

اولا لاننا نفتقد للتنظيم و القياده 00 مثلا الصيف الماضي في محافظه بورسعيد قام الموظفين في شركه القناه للرباط باعتصام لزياده الرواتب و تعديل اوضاعهم في تجديدات العقود 00 مثلا بيكتبو في العقد انه مؤهل متوسط و هو مؤهل عالي 00 او لتثبيت الموظفين اللي بقالهم سنين بعقود و رواتب متدنيه و عمل تعيينات لهم برواتب اكبر 00 و اعتقد انها مطالب طبيعيه 00

و كانت النتيجه حسب مبدا فرق تسد ان الاداره استقطبت بعض المعتصمين و اللي تمسكو بالاعتصام مخدوش حاجه و الف مين يتمني يحل محلهم في ظل شح فرص العمل وبأي راتب 00

ثانيا اننا نحيا في ظل قانون الطوارئ و اللي بيخرس اي واحد عايز يتكلم مش يعمل اعتصام 00 و لم يا بني كل العيال دول ( علي فكره امن الدوله بتسميهم عيال و ممكن يكونو في الخمسينات)

ثالثا00لو الاضراب في اي قطاع بيتعامل مباشره مع المواطنين هيضر الناس اللي مش ناقصين اساسا00 لكن لو في قطاع حيوي بيتعامل مع جهات خارجيه و بيصب مباشره لخزينه الدوله هو دا اللي هيأثر لان الدوله لا تهتم بمعاملات المواطنين علي اد ما بتهتم بما يدخل خزينتهامثلا قطاع الطيران او السياحه او قناه السويس 0000

[ابو محمود]

أضراب اية ياعم طب أزاى هو أحنا نقدر على الحرية أحنا بقى عندنا مناعة الأضراب يعنى شعب يأكل مما زرع وصنع وأحنا ياعينى علينا لا بنزرع ولا بنصنع كتر خيرنا خلاص بقينا مستهلكين حتى الفول اللى هوا ماركةمسجلة(مصرية) بنستوردةمن الصين شوف بقى يا راجل أل أضراب أل انت عايزنا نضرب من الخارج كفاية علينا ضرب الداخل وبعدين هديك مثال بسيط انت دلوقتى لوقاعد فى البيت أو الشغل ارجوك انظر حولك ؟؟؟

بص على نفسكمن برة اللبس والشراب والحذاء انت ممكن تعرف مصنوعين فين ولو صنع فى مصر يبقى الخامات من برةوالألات من خارج مصر يبقى أزاى أحنا أحرار وممكن نعمل أضراب ولو بصيت حوليك هتلاقى السجادة من برةيعنى خامات ومكن ويمكن تصميم والستائر والبوية اللى على الحيطةوالخشب حتى ترابيزة الكمبيوتر من برة ألةدة أحنا كويس ان أحنا عايشين يادوب وياريت بقى قبل ما حضرتك تأكل تقلب الطبق والكبايةقبل ما تملاهم أكل هتلاقى صنع فى (........)اى ختة غير مصر ياريت اكون وصلت فكرتى لحضرتك مع تمنياتى لحضرتك بالصحةوالعافية

[محمد عبدالعزيز]

كما قال أخى د.حسام الإضراب السلمى للمطالبة بالحقوق حق مكفول لكل مواطن.

وبعدين ماحنا مصالحنا بتتعطل نتيجة أسباب تانية كتير غير الإضراب, بتتعطل بسبب المرور ومواكب المسئولين وبسبب الفساد وبسبب الروتين والبيروقراطية وبسبب الكسل والإهمال ... إلخ

معلش يعنى ماجتش على الإضراب هو اللى بيوقف مصالحنا وهو اللى بيعطلنا.

ولنفرض إن مصلحتنا اتعطلت مرة ووقفنا جنب أى مظلوم لغاية ماياخد حقه, حسنة يا إخوانا وثواب يوم القيامة, وفى الدنيا يبقى إنت ساهمت -ولو بوقفتك بس جنب المظلوم- فى إصلاح بلدك.

إذا كان فى سلوكيات غلط أو ثقافة خاطئة عن الإضراب فليس الحل هو النفور والمنع ولكن الحل هو التثقيف والمساعدة والتعاون.

تثقيف العمال اللى فاهمين الإضراب غلط.

مساعدة وتعاون مع العمال للحصول على حقوقهم.

امتى بقى نبطل نقول إن مصر لها ظروف خاصة لما نطالب بشئ يكون فى صالح المواطنين؟!!!

[Sherief AbdelWahab]

أكون ساهمت بالوقوف جنب المظلوم ، لو كان مظلوم..

أغرب ما في مصر إن فيه ناس كتيرة مبتاخدش مرتباتها بالسنتين وتنكسف تطالب بيها ، وناس تقوم الدنيا عندها ولا تقعد علشان الأرباح والامتيازات وتعيين الولاد والأقارب والحبايب في المصانع والشركات..

وبمناسبة الإضراب.. كان عمال السكك الحديدية أضربوا في أواخر أيام وزير القتل والإرهاب إبراهيم الدميري وتجاهلت الصحافة مطالبهم .. دلوقت افتكروا .. (آآآه.. زمان الناس دي عملت إضراب وكانت مطالبها مشروعة)!

لا يا شيييييييييييييييييييييييييييييييخ! :sad:

أتمنى إني أشوف قبل ما أموت الحركة العمالية في مصر مستقلة وتناضل من أجل العيش مش الهمبرجر ، من غير ما تبقى لعبة في إيد إخوان أو حزبوطني أو يسار أو يمين..

وباينني مش حأشوف اليوم دة .. ويمكن الجيل اللي بعدنا حيقدر يلحقه لما يبقى أكبر مننا بعشر سنوات..وحسبي الله ونعم الوكيل..

خلص الكلام

[red_stone]

تعايش - تململ - ثورة

إذا كنا تعلمنا العمل الجماعي في مدارسنا و كان اَباؤنا لا يقولوا لنا "متديش مسطرتك لحد" و عندما نشاهد مشاكل الاَخرين نقول "اللي يشوف بلوة غيره ......" - لماذا لا نستطيع حاليا الإضراب لأنه ببساطه ليس لدينا ثقافة الإعتراض و العمل الجماعي المشترك فنحن 80 مليون شخص منفرد مختلف تخيلوا لو أننا عبارة عن 3 مجموعات فقط كل مجموعة قوامها 25 مليون شخص متفقون على شيء واحد و تجمعهم أهداف واحدة - إن مليون بل 100 ألف فقط يمكنهم تغيير كل شيء في مصر بدءاً من الإضراب و الإعتصام إلى الثورة و التغيير - من أين أتى هذا الخنوع من حكم العسكر بالطبع و يوجد شيء مذهل اَخر حتى الكلام و الحكم المزعومة في بعض الأفلام و المسلسلات تأخذها الناس و تطبقها بدون أدنى تفكير بإعتبار أن تليفزيون الحكومة يعرف و يدرك كل شيء و كل ما يقوله صحيح - إذن المشكلة هي مشكلة وعي - هل أنت واع لما يحدث - هل أنت واع للإنهيار الرهيب الذي حدث في مصر بعد إنقلاب 52 - ماذا تتوقع عندما يحكمك الجهلة لأكثر من 50 عاما متصلة؟

إن أكثر ما يخشاه أي ديكتاتور هو أن يقف الشعب لمدة دقيقة واحدة و يفكر "إيه الحياة اللي أنا عايشها دي - مفيش كده في الدنيا" و حتى الاَن لم تأت هذه اللحظة و النظام يحاول بكل جهده إلهاء الناس عن هذه الدقيقة - لقد نجح شخص واحد في المكوث 26 سنة على الكرسي و لم يستطع أكثر من 100 مليون ( الأموات السابقين و الأحياء الحاليين) الوقوف دقيقة واحدة للتفكير.

الديمقراطية و العدل و الحرية قادمة لا محالة و لكن كم سنخسر حتى نحصل عليها - و كم سنقضي سنينا أخرى لكي نصلح ما أفسدوه.

و أخيرا أقول ليس علينا أن نحكم على بلد عاشت اَلاف السنين لمجرد عدة عقود عاشتها في ديكتاتورية و ظلم و إن كنا من المتضررين.

[المصـــــــرى]

العنوان شدنى "الشعارات الغبية"، ليه الواحد بيستهين و يهين الرأى الأخر لو مش على هواه، لا مانع من الإعتراض والإنتقاد، وشيئ طبيعى وصحى أن تختلف الأراء ولكنى لا أجد تبرير لوصف الفكر المقابل بالغباء.

تحقير أراء الغير ليست من سمات الفكر الذكى.

تم تعديل 1 ديسمبر 2007 بواسطة المصـــــــرى

[Sherief AbdelWahab]

تلك الشعارات فقط هي بعيدة عن الواقع ، لا موقع لها من الإعراب في أي سياق..وأصحابها يحتقرون كل من يعرضها على عقلهم ويصمونه بأنه الذي والذين..

وترديد هذه الشعارات بدون فهم معناها هو جزء لا يتجزأ من الثقافة السياسية المصرية .. بكل أسف..

فعندما كانت -على سبيل المثال -ممتلكات آخرين لا دخل لهم بالصراع بين فئة ما والنظام تدمر في بعض المظاهرات ، كان الجميع يرفع شعار "الحرية" ،والحرية ليست في ذاتها شعاراً غبياً ، لكن من يردده يبحث عن أي مبرر ، ولو كان ملفقاً ، للتحنجر به دون أدنى وعي لمعناه..

قس على ذلك كثيراً مما نسمع أو نرى..

عموماً ..قد أكون قد أخطأت في وصف هذه الشعارات بالغباء وقد حذفت الوصف من الموضوع منذ قليل.. لكني مصر على وجهة نظري خاصة في طريقة استخدامها وما يرتكب باسمها.. وحرية بحرية بقى..

خلص الكلام

[أبو محمد]

يا سلام عليك يا شريف .. دائما تصل إلى ما تريد من أقصر طريق ..

الشعارات فى حد ذاتها ليست غبية .. ولكن يرددها الكثيرون بغباء .. والأمثلة كثيرة غرقنا فيها وبسببها

لسه .. الكلام ما خلصشى :blink:

[عماد سيف النصر]

السلام عليكم

أسمحوا لى جميعا أن أختلف فى الرأى

أننا جميعا نعيش حالة أضراب على أنفسنا منذ أكثر من 27 عاما

نعم لقد أضربنا على أن لانعترض أو نضرب أو نعتصم أصابنا الاحباط ولله الامر من قبل ومن بعد

ولكم جزيل الشكر

عماد سيف النصر