سيادة اللواءالمذيع المعلق الأستاذ الكابتن \ مدحت شلبي

[kokomen]

تعليق ظريف على كثرة الألقاب والوظائف في مصر الحبيبة

كما ترى من العنوان أربع وظائف محترمة وكلها أكل عيش

ومعظم الشباب مش لاقي وظيفة واحدة مرتبها خمس ما يتقاضاه

هذا المحترم من وظيفة واحدة فقط ... اللهم لا حسد ...؟؟؟؟

مصر فيها العجايب ...؟؟؟ أقرأ هذه المقالة من المصري اليوم على أستاذ الكباتن..... !!؟؟

٤ مرتبات وكام أستك للسيد اللواء المذيع المعلق المتحدث الرسمي!!

٢٢/١١/٢٠٠٧الكابتن مدحت شلبي استنكر بشدة تصريحات رئيس نادي النجم الساحلي التونسي لإحدي الفضائيات وهو يجيب علي سؤال عن أسباب الحملة الإعلامية الشرسة التي يشنها الإعلام المصري للتشكيك في شرعية فوز النجم الساحلي بالبطولة الأفريقية وقال «إن المواطن المصري يعاني من مشاكل اقتصادية واجتماعية كبيرة وكان المسؤولون في مصر ينظرون إلي بطولة أفريقيا علي أنها السبيل الوحيد نحو إدخال الفرحة إلي قلب المواطن المصري، لكن لما عجز الفريق عن تحقيق الفوز أرادوا أن يختلقوا المبررات والأعذار لكي يقدموها لهذا المواطن المسكين، ومن هنا كانت تلك الحملة التي انطلقت للتشكيك في شرعيه فوز النجم بالبطولة».

تصريحات رئيس نادي النجم، أراها تمس الواقع بدرجة كبيرة جدا، لدرجة أنني شعرت أن الرجل يعيش بيننا، فهذا الكلام بالفعل ينطبق علي المواطن المصري المغلوب علي أمره. لكن الكابتن مدحت رفض تلك التصريحات، وقام بإلقاء خطبة عصماء ينفي من خلالها صحة هذا الكلام، ويؤكد أن المواطن المصري علي عكس ما ذكر رئيس النجم، يعيش حياة اقتصادية جيدة، ويحيا حياة اجتماعية رائعة.

ورغم أن كلام الكابتن مدحت علي العكس تماما من كلام رئيس نادي النجم، فإنني أيضا أتفق معه، لأنه وإن كان الكلام الأول ينطبق علي الغالبية العظمي من المواطنين، فإن كلام الكابتن مدحت ينطبق أيضا علي المواطن المصري من عينة الكابتن مدحت، الذي يتقاضي شهريا أربعة رواتب (اللهم لا حسد)، فهو يتقاضي راتباً من وزارة الداخلية لأنه لواء شرطة، ويتقاضي راتباً من قناة «مودرن» لأنه يقدم برامج فيها، ويتقاضي راتباً من اتحاد الكرة لأنه موظف فيه يقوم بدور المتحدث الإعلامي، وأخيرا فهو يتقاضي راتباً من التليفزيون نظير عمله كمعلق علي مباريات الكرة، وطبيعي أن أي شخص يتقاضي تلك الرواتب كل شهر، يعيش حياة اقتصادية أكثر من رائعة. ولهذا أعتقد أن كلام سيادة اللواء المذيع المعلق الأستاذ الكابتن مدحت شلبي سليم تماما.

حازم نخالة - بورسعيد

[miramar]

والله ما عارفة اقولك ايه بس محبتش المضوع يمشي كدة زيرو رد

كان معكم

الطالبة و الدكتورة والمهندسة وحضرة الظابط / مرمر

[Ahmad Farahat]

ليس فقط مدحت شلبي يا صديقي من يحصل على أربعة مرتبات وأستك

هناك الكثيرون من هم مثله

أصل مصر فيها ناس كتير بتوع كله

ربك يلطف بينا بس

[م.سامح المصرى]

تعليق ظريف على كثرة الألقاب والوظائف في مصر الحبيبة

كما ترى من العنوان أربع وظائف محترمة وكلها أكل عيش

ومعظم الشباب مش لاقي وظيفة واحدة مرتبها خمس ما يتقاضاه

هذا المحترم من وظيفة واحدة فقط ... اللهم لا حسد ...؟؟؟؟

مصر فيها العجايب ...؟؟؟ أقرأ هذه المقالة من المصري اليوم على أستاذ الكباتن..... !!؟؟

هوا مش الاستاذ الدكتور الكابتن الي مش عارف ايه تاني كدة لوحدة يا استاذkokomen

مهوا عند حضرتك الكابتن احمد شوبير

بيقدم برامج في دريم وبعد دريم موديرن دا غير منصب اتحاد الكورة علي ما اعتقد وغير منصب النادي الاهلي

وغير التعليق وحاجات تانية اخويا قالي عليها والله بستعجبلها

بس ساعات لما افكر بحس كدة ان الناس الي زي دي كفائااااااااااااااااااااات لازم تستغل سيبك بقي من الشباب الصاعد الواعد

الي بيكون حياته دول مش هايفيدوا بحاجة حتي لو اسلوبهم مميز وافضل

يلة وعمار يا مصر

[رمضان]

سؤال برئ

هل لو أتت احدكم فرصة مثل هذه سيرفضها مثلا

الراجل ربنا فاتحها عليه وبيشتغل افضل من اللي بياخدوا رواتب من غير شغل

الدنيا فرص

[se_ Elsyed]

مهوا عند حضرتك الكابتن احمد شوبير

بيقدم برامج في دريم وبعد دريم موديرن دا غير منصب اتحاد الكورة علي ما اعتقد وغير منصب النادي الاهلي

وغير التعليق وحاجات تانية اخويا قالي عليها والله بستعجبلها

منصب مين اللي في الأهلي ؟

شوبير مطرود من الاهلي شر طرده ولا يحلم يبقى بتاع شاي وقهوة هناك لإنه وصولي ولا يعمل شيء لوجه الله

لكن أضف على ذلك إنه ممثل الحزب الوطني في جمهورية طنطا ... وكمان عضو مجلس الشيعب .... ونائب رئيس اللجنة الرياضية بالمجلس .... وكاتب صحفي في العديد من الصحف والمجلات ...

وبيصلح ساعات بالليل وهو فاضي

يا راجل دي حاجه تقرف ... الناس دي بتقعد امتى مع عيالها أو حتى بيشوفوا بيوتهم إمتى ؟

لما الواحد فينا بيشتغل 8 ساعات وبيرجع مفرفر عشان ينقع رجلة في ميه بملح وياكل علية الزبادي وينام عشان يصحى تاني يوم ؟!!!

الاغرب بقى إنه فضل في مباراة منتخب مصر والسعودية يسخن ويأسفن في سمير زاهر ويستعجب إزاي هو مش قاعد في المقصورة الرئيسية بجوار احمد نظيف والأمير سلطان بن فهد و حسن صقر مع إنه رئيس إتحاد الكورة وموقعه المفروض يبقى هناك لكنهم زبلوه وكانوا مقعدينه في حته ناشفه على جنب ...

ونسي سي شوبير نفسه وإنه نائب رئيس الإتحاد والمفروض يبقى في الإستاد إن شالله يلم كور من ورا الجون لإن ده ختام بطولة .. ومع ذلك كان قاعد في التليفزيون بيحلل المباراة وولا في دماغه

خد دي كمان يا سولي عشان الحبايب ...

إنت عارف إن في نفس اليوم اللي هو أول إمبارح كان شوشو في جنوب أفريقيا بيحضر قُرعة تصفيات أفريقيا المؤهلة لكأس العالم ممثلاً لإتحاد الكورة ... وجه من المطار على الأستدويو على طول من غير ما يغير الهدمه اللي عليه عشان يحلل المباراة اللي كانت تحصيل حاصل وليس لها أي اهمية لإن مصر كانت كسبانة كسبانة

لكن طالما حاجه فيها سبوبة يبقى لازم تلاقي شوبير فيها

ولاحظ كده لو في سفرية للمنتخب في بلد تعبانه مستحيل تلاقيه موجود مع المنتخب

لكن اليابان ... شغال وحلى فيديوهات سوني وكاميرات تي في تي

فرنسا .. لما لاعبينا من كام شهر ساحل العاج هناك ... لازم تلاقيه شايل بؤجة هدومة وأول واحد يكون هناك

إذاً فهو سلوك عام في مصر وهو " التكويش على المناصب " وأي حاجه في رغيف بتجيب فلوس ما فيش مانع يزنقوا نفسهم فيها

بالمناسبة ده كله تحت رعاية السيد القائد المُفدى الرئيس حُسني مبارك وولده جمال

لإنهم إبتدعوا ذلك برضوا في مصر وهم رواد من رواد الفضاء في هذا المجال

فلو فتحت الدستور المصري صفحة الملوخية هاتلاقي إن الرئيس له ييجي 100 لقب وهو رئيس الجمهورية والقائد الاعلى للقوات المسلحة ورئيس السلطة التنفيذية والتشريعية و و و و وهو بابا وهو ماما وهو أنور وجدي

يبقى لما اللي فوق بيطبل ... اللي تحت ما يرقصش ليه ؟

دي حتى تبقى عيبه والناس تاكل وسطنا ... قصدي وشنا

[الطيار المصرى]

لا يوجد اكثر من الالقاب و المناصب و المديرين و الرؤساء في مصرنا العزيزة...

دي حاجة ببلاش كده....و احنا اجدع ناس نستغل المثل اللي بيقول...

ابو بلاش كتر منه

و ما خفي كان اعظم....

تحياتي...

الطيار المصري

[م.سامح المصرى]

سؤال برئ

هل لو أتت احدكم فرصة مثل هذه سيرفضها مثلا

الراجل ربنا فاتحها عليه وبيشتغل افضل من اللي بياخدوا رواتب من غير شغل

الدنيا فرص

ماشي استاذي العزيز رمضان ما اختلفناش ان شاء الله

بس في حاجة ان حضرتك تزود مناصبك في نفسك المجال (ودا اسمه اجتهاد وتفكير )

وفي فرق بين الطمع في الوظائف والمناصب بمعني انى انا مثلا بشتغل محاسب اوكي

انا اية الي يخليني مع شغل المحاسب

اشتغل متر دوتيل في مطعم ،مع المحاسب والمتر دوتيل اشتغل شغلانه تانيه

وكلهم مالهومش دعوة ببعض

بس وتقبل مني كل تحية وتقدير

[رمضان]

يبقى العيب برده مش فيه العيب في الشخص اللي بيعطي له المناصب دي

[شينكاوي]

السلام عليكم...

[رمضان رد اليوم, 09:10 AM

يبقى العيب برده مش فيه العيب في الشخص اللي بيعطي له المناصب دي

/quote]

اتفق معاك تماما يا رمضان تماما فالوضع العام في مصر يدعو الي ذلك ول انا مكانه طالما

ان الرجل لا يسرق ولا بيعمل حاجة غلط والناس هي اللي بتعرض عليه شغل يقول لأ ليه ؟

ما كلها سبوبة وكله بيعيش طالما ما بيسرقش فأيه وجه الاعتراض ؟

لو علي الالقاب ما كل الالقاب مضروبة في مصر وكلنا بشوات وبشمهندسين ... :lol:

سيبو الرااجل ياكل عيش وكلها سبوبة .

[amrhoras]

نـــــــــاس تأكل واحنا نقول الحمد لله

بس بجد ربنا يسهل لعباده وربنا يزيد ويبارك كلها ارزاق من عند الله هو اللى بيزعل فى الموضوع ان محدش واخد حقه اصبحت المناصب مقتصره على اشخاص معينه ومن بعدهم اولادهم واولاد اولادهم يعنى نظام ملكيه وظيفيه

واكبر مثال لما جيمي كمان يسمكها ياترى يولادى هسيبلكم ايه من بعدى لا كرسي ولا سلطه بس هسيبلكم الستر

كان معكم الطيار المحاسب السكرتير مندوب البيع مدير العلاقات العامه عمرو صبحي

[kokomen]

الأخوة الأعزاء الكرام

شكرا لكل من ساهم بالتعليق على هذا الموضوع  مع إحترامي لكل الآراء

أعتذر عن عدم مشاركتي على تعليقاتكم الفترة الماضية لما حدث ليى من ظروف خاصة

وكذلك إصابتي بنزلة برد شديدة لمدة اسبوع من جو الرياض المتقلب فأرجو قبول إعتذاري

الأخ العزيز : احمد فرحات

فعلا مصر فيها من هذه النوعيات الكثير في جميع المجالات وطبعا بيدخل فيها النفوذ والعلاقات

الشخصية بأصحاب النفوذ السياسي والبيزنس كما يقولون

الأخ العزيز : Solee

معك كل الحق في أن هناك أمثلة كثيرة تتمتع بالكثير من المناصب مثل شوبير وغيره

في المجال الرياضي والإجتماعي والإقتصادي والسياسي

الأخ الفاضل : رمضان

فعلا الدنيا فرص بس ياريت تكون فرص طبيعية وليست بالواسطة والعلاقات الشخصية المشبوهة

وهذا ما يحدث في هذه المجالات وخصوصا عندما تكون المرتبات والحوافز كبيرة جدا فوق تصورنا

الأخ العزيز : سي السيد

علق يقول

شوبير مطرود من الاهلي شر طرده ولا يحلم يبقى بتاع شاي وقهوة هناك لإنه وصولي ولا يعمل شيء لوجه الله

لكن أضف على ذلك إنه ممثل الحزب الوطني في جمهورية طنطا ... وكمان عضو مجلس الشيعب .... ونائب رئيس اللجنة الرياضية بالمجلس .... وكاتب صحفي في العديد من الصحف والمجلات ...

وبيصلح ساعات بالليل وهو فاضي

يا راجل دي حاجه تقرف ... الناس دي بتقعد امتى مع عيالها أو حتى بيشوفوا بيوتهم إمتى ؟

لما الواحد فينا بيشتغل 8 ساعات وبيرجع مفرفر عشان ينقع رجلة في ميه بملح وياكل علية الزبادي وينام عشان يصحى تاني يوم ؟!!!

كلامك كله واقعي وهذه المناصب توزع بطرق غريبة وملتوية وكأن مصر لا يوجد بها رجال أكفاء

يستطيعون آداء هذة الوظائف التي يجمعها شخص واحد محدد بعينه سواء في مختلف مناحي الحياة

 

الأخ العزيز : الطيار المصري

حلو المثل ده  " أبو بلاش كثر  منه " بس ياريت المناصب دي  تكون ببلاش

لا  يا عزيزي  دي كلها فلوس  وأيه  فلوس حلوة قوي ..؟؟ تقدر تنعنش أي شاب

وتفتح طريقه للزواج والحياة الكريمة

الأخ الفاضل : شنكاوي

الأستاذ رمضان يقول مش ذنبه طالما بيعمل في وظيفة ... ؟؟؟  

أقول له لا  ياصديقي فهذه ليست وظيفة وسبوبه كما يقال

ولكنها أخذت حق من حقوق الآخرين وتأتي له بالواسطة وتميزه عن غيره من أفراد المجتمع

وقد يكون هناك من أكفأ  منه للقيام بهذه الوظيفة التي لا تأتي إلا لمن له واسطة أوعلاقات خاصة

مع  خالص تحياتي

[م.سامح المصرى]

أعتذر عن عدم مشاركتي على تعليقاتكم الفترة الماضية لما حدث ليى من ظروف خاصة

وكذلك إصابتي بنزلة برد شديدة لمدة اسبوع من جو الرياض المتقلب فأرجو قبول إعتذاري

الف حمد لله علي سلامة حضرتك يا ريس

طمنا عليك وعلي صحتك

ورأيك عاجبني جدا

ولك جزيل الشكر

[kokomen]

أعتذر عن عدم مشاركتي على تعليقاتكم الفترة الماضية لما حدث ليى من ظروف خاصة

وكذلك إصابتي بنزلة برد شديدة لمدة اسبوع من جو الرياض المتقلب فأرجو قبول إعتذاري

الف حمد لله علي سلامة حضرتك يا ريس

طمنا عليك وعلي صحتك

ورأيك عاجبني جدا

ولك جزيل الشكر

الأخ العزيز : Solee

أشكرك أخي الكريم على سؤالك عن صحتي

الحمد لله بدأت في التعافي ولكن سفري للإسكندرية وتغيير الجو

سبب لي نزلة برد أخرى أقعدتني بالمنزل لفترة وحتى الآن

الحمد لله علي كل حال والشافي هو الله سبحانه وتعالى

أما بخصوص الألقاب الكثيرة فهي ظاهرة غير صحية إنتشرت

بشكل مستفز وكأن الكفاءات العلمية المختلفة إختفت من المجتمع المصري

حسبنا الله ونعم والوكيل