المنتوف!!!

[freefreer]

تم حذف التعليق الذى لم يعجبك :roll:

[Excellence]

إقتباس:

وما أن أغلق باب الشقه وحتى قبل أن أتحدث إلى والدتى الملهوفه لقيت قلم بيطرقع على وشى

إقتباس:

كون أنك غير مصدق لما كتبته هنا فهذا لك فيه مطلق الحريه...

عزيزي حشيش

أنا واثق من كل ما كتبته لأني كنت مجند زيك

بس إللي مش مصدقه إنه كان قلم واحد بس..حاسس كدة إنهم أكتر ...

[Spider]

بالأحضان..بالأحضان..بالأحضان

بالأحضان يابلدنا ياحلوه بالأحضان

بالأحضان ياحبيبتى ياأمى

يابلادى ياغنيوه فى دمى

على سدرك أرتاح من همى

وبأمرك أشعلها نيران

ياما لفيت سواح متغرب

وانا قلبى بحبك متشرب

أبعد عنك..قلبى يقرب

ويرفرف عالنيل عطشان

ياما شفتك عالبعد عظيمة

يابلادى ياحرة ياكريمة

وزعيمك خلاكى زعيمة

فى طريق الخير والعمران

اتقويت ورفعت الراس

وبكيت فرحه وشوق وحماس

وبقيت ماشى فى وسط الناس

متباهى بوطنى فرحان

بالأحضان..بالأحضان

                 

كلام حماسى فارغ لا يمت للواقع بصلة... مع أحترامى لكل من يحب الأغنية ...

وفين الزعامة دى

الله يخرب بيتك يللى فى بالى

مت وسبتها خراب

[أسامة الكباريتي]

بسم الله الرحمن الرحيم

حشيش .. الرسالة وصلت .. والغرض من هذا السرد الممتع بالتأكيد قد تحقق .. أقصد هنا في هذا المنتدى ..

فما واجهته ليس تجربة فردية فريدة .. بل هي حياة الملايين ممن كتب عليهم أن يكونوا "أفرادا" في جيوش كهذه ..

جيوش المحترفين من المتطوعين فكرة أكثر من جيدة ..

ولكن دعونا نتخيل .. تخيل فقط :

- في الحكم قيادة تعمل بما يرضي الله.

- تنتدب لجيشها نخبة منتقاة أعدت بشكل يرضي الله.

- تحدد القيادات السياسية والعسكرية الغرض من هذا الجيش.

- الخدمة في الجيش تطوعا ووفق نظام الاحتراف.

- المتطوعون يمرون بمراحل إعداد معنوي وبدني يحقق الأهداف المتوخاة من هذه الخدمة.

- كل في مجاله ..

سوف نرى ان جيشا يسعى إلى مرضاة الله ويعمل بما أنزل .. ويستقي قواعده من الأثر والتراث العظيم الذي خلفه لنا الرعيل الأول المؤسس لأكبر الدول والتي لم تكن لتكون إلا بما ملكوا من إيمان ودستور قوامه القرآن والسنة .. مثل هذا الجيش .. لا يمكن إلا أن يكون في القمة.

غرضي هنا أننا لا يمكن لنا أن نأخذ جزءا من كل .. بل هو الكل ..

فلا جيش محترفين وحده يصلح في ظل فساد وانعدام للقيم وهدم وسلب ونهب وتهليب ..

الجيش جزء .. الشرطة جزء .. المالية جزء .. ال .. ال ..

الكل بحاجة إلى التغيير

فهل يأتي هذا بقرار فردي أو حتى من قيادة جماعية؟!!

[Set_Amina]

للأسف لم اتصفح موضوع منتوف الا اليوم ومن جمال روح حشيش وقدرته الفائقة على السرد الممتع الشيق لم اترك الموضوع الا بعد تكملته الى نهايته،، وطبعا لكم ان تتخيلوا مدى الضحك الذي لم أضحك مثله منذ وقت طويل جدا وبعدها دموعي التي سالت على موت الجندي المريض المسكين.

وشعرت بأنك ياحشيش قد انهيت القصة بسرعة متعمدا وزعلت لأني تركت كل مواعيدي وكل ما هو ورائي لأكمل القصة ولكني فوجئت بنهاية مقتضبة.

بس هاقولك بصراحة انا كنت طول الوقت خايفة على خالك من الانتقام، قلت بيني وبين نفسي يظهر الراجل كتب نهايته على يد الدفعة حشيش لكن الحمد لله انك طلعت عاقل ومعملتهاش :) :)

[Elham]

قصه جميله فعلا و انا زى الست امينه لم اقرأ الموضوع الا انهارده و ما سبتوش الا لما كملته كله و كنت اتمنى انك تتابع الكتابه, و الله يرحم زميلك الجندى اللى مات بجد زعلت عليه اوى.

[حشيش]

شكر واجب

أتقدم بالشكر لجميع الأخوة والأخوات الذين شاركوا فى ملحمة (المنتوف) بالتعليق والمناقشة أو بالنقد والتشكيك وأخص بالشكر السيد رئيس الجمهورية والسادة رئيسى مجلسى الشعب والشورى والسادة الوزراء والسيد مدير إستاد القاهرة سائلاً الله تبارك وتعالى ألا يريهم مصاباً فى عزيزٍ لديهم…المنتوف

تعليق

للأسف الشديد كانت أحداث هذه المداخلة حقيقية وليست درباً من الخيال كما شكك فيها وسخر منها ومنى البعض…ما أردت أن أقوله فى هذه المداخلة يتلخص فى النقاط الأتية:

1-الواسطة تشكل حجر الزاوية بالنسبة للمجند…معاك واسطة مش حتحس بالجيش …ممعاكش واسطة حتشوف أيام أسود من قرن الخروب.

2-رأيت بعينى ولمست بنفسى كيف تمتهن كرامة الأنسان وتسحق أدميته فى الجيش تحت مسمى الظبط والربط وهو منها براء.

3-رأيت بعينى جنوداً تسب أمهاتهم وأبائهم وتلطم وجوههم بقسوة كل يوم دونما سبب مفهوم من ضباط وصف وشاويشيه إلخ يحملوا فى صدورهم عقد وأحقاد شخصية ولا يستطيعون أن يقوموا بإخراجها إلا على من هم أقل منهم رتبة خاصةً المجندين وعلى وجه الخصوص العساكر العادة.

4-رأيت بعينى جندى يلطم على وجهه بقسوة أمام الجميع…وفى أى مكان…داخل قسم الأستقبال بمستشفى القوات المسلحة…هل رأيتم من قبل ياسادة مريضاً يضربه طبيب!!!!؟؟؟.

5-رأيت جندى يموت أمام عينى…ليس فى الحرب!!!…لا…بل فى مركز التدريب… ببساطة لأن أحداً لم يكلف نفسه بالكشف عليه قبل التجنيد…لم يكتشف أحد أنه يعانى من ضيق شديد بأحد صمامات القلب إلا قبيل موته بدقائق!!!!.

6-فاقد الشئ لا يعطيه…فلا يمكن أن يخرج مقاتل يعتد بنفسه ويثق فى قيادته إذا أذقناه من الهوان والذل ما ينوء بحمله أى إنسان سوى.

7-كما ذكر الأخ أسامة الكباريتى فإن العمود الفقرى لجيش قوى هو أن يكون هناك هدف راسخ فى أذهان الجموع من المجندين…هذا الهدف هو أن أجد إجابة على سؤال مهم جداً ألا وهو…لماذا أنا فى الجيش؟؟؟…ما هى القضية التى أدافع عنها؟؟؟…هل سأحارب إسرائيل؟؟؟…بالطبع لا…إذاً لماذا أنا هنا؟؟؟…لحماية مصر…من مين؟؟؟…هل أنا هنا لرفعة شأن الإسلام؟؟؟…بالطبع لا…إذاً لماذا أنا هنا؟؟؟…والأن إليك الإجابة المؤسفة…أنت موجود هنا كما ذكر الأخوة واحد مصرى ومصرى لأن هذه هى القاعدة…مش مهم ليه…المهم إنك موجود…أهو تعمل أى حاجة…تشتغل مراسلة..تبقى عسكرى طلبة…الشاويشيه يتمرنوا فيك الضرب…يفرغوا شحنة الغل بداخلهم فيك…أى حاجة…ولعل فى هذا إجابة على الأخ إبن البلد الذى سخر منى قائلآً ياأخى مش مكسوف تدور على واسطة علشان تزوغ من الجيش…أمال مين اللى حيحرر فلسطين!!!!!!!!؟؟؟…عزيزى إبن اليلد نحن لا يزج بنا فى الجيش من أجل تحرير فلسطين....لأنه لو كان الأمر كذلك لاختفى التهافت على الواسطة!!!!!!!!!.

8-كما ذكر الأخوة واحد مصرى وسبايدر ومصرى…إما أن يتم إلغاء العمل بنظام التجنيد الإجبارى كلياً أو أن يتساوى الجميع…إبن رئيس الجمهورية زى إبن العامل البسيط…مفيش حاجه إسمها واسطة.

9- ختاماً للأخوة الذين تهكموا على وقالو أنى بكتب كلام من الخيال والمداخلة عبارة عن تحشيش…أقول لمن دخل الجيش منهم (وأتحداه أن يكذبنى) ولمن لم يدخل الجيش منهم (الواسطة فى الجيش علنية…يعنى لو حد من حضراتكم راح التجنيد حيلاقى بجوار إسم المجند مكتوب بالقلم الرصاص إسم الرتبة اللى موصية عليه)!!!!!!!.........

10_سؤال أخير هل تم تجنيد السيدين علاء وجمال مبارك؟؟؟....وإذا كان الرد بنعم...ففى أى سلاح؟؟؟....أكيد مش المدفعية :cry: :cry: :cry:

[Arabisc]

10 _سؤال أخير هل تم تجنيد السيدين علاء وجمال مبارك؟؟؟....وإذا كان الرد بنعم...ففى أى سلاح؟؟؟....أكيد مش المدفعية :cry:  :cry:  :cry:

سؤال و جيه جدا !!

هوه مش برضه من شروط الترشيح للمناصب القيادية أداء الخدمة العسكرية أو الاعفاء منها ? طب و الله ما بهزر

تحية للزميل حشيش على اسلوب العرض المتميز و الاسلوب الشيق في السرد

يللا يللا . كمل إيه اللى حصل بعد خروجك من الجيش :lol: اصل انا مؤمن ان فيه ناس ليهم بخت و ناس ليهم 'ترتر' على رأي عبد السلام النابلسي , و من النادر ان تحدث مثل تلك الأزمات مرة واحدة بس ' صح ? ;) '

[Mohammad Abouzied]

ختاماً للأخوة الذين تهكموا على وقالو أنى بكتب كلام من الخيال والمداخلة عبارة عن تحشيش…أقول لمن دخل الجيش منهم (وأتحداه أن يكذبنى) ولمن لم يدخل الجيش منهم (الواسطة فى الجيش علنية…يعنى لو حد من حضراتكم راح التجنيد حيلاقى بجوار إسم المجند مكتوب بالقلم الرصاص إسم الرتبة اللى موصية عليه)!!!!!!!.........  

فترة الجيش التي قضتها ممكن تكون كدا واسوء من كدا

ولكن ايام الحرب الموضوع مختلف تماما يأخ حشيش

وعموما اذا بليتم فأستترو

[ashraf1000]

الله يا جماعة الموضوع مش موضوع تجنيد و مجندين و معاملتهم بس ده جزء بسيط من المشكلة و خلوا الواحد ساكت احسن لان مش ده مش المكان المناسب لمناقشة موضوع حساس زى ده ____ده رايي الشخصى طبعا_____ و علي فكرة علشان ماحدش يفتكر انى باقول اى كلام انا لاكنت مجند ولا ضابط احتياط انا خريج كلية عسكرية وقضيت فى الجيش فترة مش بسيطة

حشيش : انا ما كنتش مدفعية ____

[شيكو المصري]

امتعتنا و ابكيتنا بحكايتك يا استاذ حشيش

بس فية سؤال مهم لابد من الاجابة علية انت لسة بتشرب حشيش و لا بطلتة :?: :?: اسمك بيشجع الاختيار الاول و اتمنى اكون غلطان :neutral:

[elbana]

بعد التأكيد على رأي الأخوة في سردك الممتع ، وبعد التأكيد على إني مصدق كل كلمة قلتها ، أنا حاسس يا حشيش إنك برضه خرجت من التجربة دي بخبرة مهمة قوي رغم كل القسوة اللي فيها ، وأنا متفق معاك على السلبيات الخطيرة في الجيش ، واللي أنا شخصياً عايشت منها حاجات كتير جداً مافيش داعي لذكرها لكن المختصر المفيد هو إن النظام اللي ماشية بيه الأمور محتاج إعادة نظر ، فالخبرة العسكرية التي يحصلها الجندي في الجيش قليلة جداً ولاتقيم الإود أو تسد الرمق ، والأعمال التي يكلف بها الجنود كما نعرف جميعاً لاتمت للجندية بصلة بل ولاتمت للحياة الكريمة بصلة .

المهم ياحشيش ، أتمنى تكون التجربة عملت على تقوية عودك ، وأهنئك على السرد الرائع جداً .

[Masrawy Abroad]

عزيزي حشيش

بما إن قصتك مع الجيش انتهت، وحسب ما أعرف فأنت مقيم في البحرين حالياُ...فلماذا لا تمتعنا باسلوبك الشيق وتبدأ في باب المغتربين بموضوع "السلام عليكم من البحرين" حتى تكتمل المنظومة (طبعا انت عارف مين صاحب كلمة المنظومة.. :cry: ) ونسمع عن هذه المملكة الجديدة...وعن تقدمها الرائع..حتى أنها تسبق دبي في بعض معدلات النمو...وكيف أنها مقر أكبر الشركات العالمية في الشرق الأوسط زي أميركان اكسبرس ودي اتش ال..وللأسف الأسيف مقر الأسطول الخامس الأمريكي.. :( :(

أكيد عندك حكاوي عن هذه البلد التي لا يزيد حجمها عن جزيرة الزمالك على ما أعتقد.. :cry: وكلام عن بلد سلك شوط كبير في التنمية بنموذج جديد غير بترولي خلاف مثيلاتها من الدول المجاورة.

مجرد اقتراح

[se_ Elsyed]

عايز أقول وجهة نظري الشخصية فى موضوع التجنيد ، فبصراحة يا جماعة الموضوع ده لازم لشبابنا على أساس أن الواحد بيبقى أثناء فترة الدراسة فى الجامعة وبعد التخرج حاسس إن الدنيا ربيع والجو بديع فلازم حاجة تفوقة على الواقع وتخلية ينشف شوية علشان يقدر يواجه الحياه بواقعية أكثر وبعقل رجل مكتمل النمو مش شاب روش بيعتمد على بابا وماما.

مع رفضي التام والمطلق لما قد يحدث فى الجيش من إمتهان لكرامة أى أنسان سواء متعلم أو غير متعلم لما لذلك من تأثير عكسي على الشباب ، ومع إن حظي أني مادخلتش الجيش إلا أنني شوفت ذلك فى اخواتي وأصدقائي وفعلاً الجيش علمهم الرجولة بجد ، على سبيل المثال أخويا الأكبر مني ب 3 سنين قبل الجيش وأثناء الدراسة كان إنف وقليط قوي - خاصة فى موضوع الأكل - وجه حظه أنه دخل سلاح الصاعقة بعدها بقى شخص تاني وبالنسبة للأكل بقى يأكل الأخضر واليابس من غير تكلف .

[أسامة الكباريتي]

"علموا أولادكم السباحة والرماية وركوب الخيل" الفاروق عمر ..

علموا

هذه كانت مختصرات لكل ما تريده يا حاج .. وعلموا هنا جزء امن التربية ..

ولو نظرنا إلى تاريخ القادة العظماء لوجدنا أنه دوما يبدأ بالتربية والتعليم المنزلي قبل المدرسي الذي نلقي على عاتقه كل شئ.

هل لنا في خالد بن الوليد - وهو سيف من سيوف الله - أسوة حسنة.

أظن أنه واحد من أفضل من استفادوا من تربية والدهم وتعليمه ..

[1_Nadim]

العنوان لم يجذبني من قبل لقراءة الموضوع وبعد ان بدأت في القراءة لم استطع التوقف حشيش انت فعلا عندك قدره جميله علي السرد ولديك روح المصري الجميل في الفكاهه التي تنتزع الضحكه من القلب

اما عن زميلك الذي توفي لانهم لم يكشفوا عليه قبل دخوله الجيش فلقد ذكرتني يوم ذهبت لمنطقة التجنيد رايتهم يضربون شاب فلاح اخرس لانهم كانو متصورين انه يدعي الخرس ولما يضربوه ح ينطق

الجميل في قدرتك القصصيه هي انها تستدعي احيانا تعليقات شبيهة بتعليقات مطاوع عن الجطه فاحيانا تصبح النكته مش نكته في الزمن الحزين كما قالت كليو عن نكتة عمر دياب

انا راي تسيب البحرين وترجع مصر تكتب عن المنظومه الجطية وتجعلها شيئ مثل سيرة ابن حشيش في زمن الناس اللي ماتختشيش

مع خالص تحياتي

[Asat]

الأخ حشيش,

أنت تملك موهبة جميلة جدا محتاجينها أشد الأحتياج أيامنا دي.

و انا قصدي بالموهبة هنا مش فقط القدرة على إضحاك الناس, و لكن القدرة على رؤية الحياة من حولنا بنظرة مختلفة و إنتقادك لها بطريقة تٌضحكنا. هذا يدل على إنك لست شخص سلبي التفكير, بالعكس هذا يدل على شخص عنده القدرة على إستيعاب و فهم ما يجري حوله, و تحليله ثم التعليق عليه.

الأخ حشيش, أرجو أن تستمر في تنمية هذه الموهبة و إمتاعنا بما يدور في خواطرك. و أتمنى أن تتحول هذه الموهبة من هواية إلى إحتراف.

fty::

[yasovinas]

اسات احييك لانك احييت هذا الموضوع لمن لم يقراه من قبل

بس على فكرة 90% مما مر به حشيش في مركز التدريب كل شاب مصري اتجند وما كنش عنده واسطه مر بيه

انا شخصيا مريت بيه (سلاح مشاه اللي بيقيفي الجبال) وقبل تجنيد حشيش بحوالي عشر سنوات يعني المهازل دي مستمرة من زماااااان

تحياتي يا حشيش

[محمد شلبى]

معلش يا جماعة اعذرونى :blink:

......فى هذه البلد اللى بتقتل شبابها وتهين كرامتهم بدعوى الحفاظ على الامن,انا الآن معنديش استعداد اخسر نقطة دم واحدة عشان بلد تعاملنى بالطريقة دى,والحمد لله الذى اعفانى من هذا العذاب الذى يدعونه بالجيش,وان شاء الله اول فرصة الى الخارج مش هأسيبها وسلامات يا بلد cr((:

تم تعديل 11 ديسمبر 2004 بواسطة se_ Elsyed

[مصر عشقى]

الزمان: يوليو 1996

المكان: شقة خالى(رتبة كبيرة فى الجيش) الدقى/القاهرة.

الغرض من الزيارة فى هذا اليوم: التأكيد على خالى بأنه وصى زملاءه عليه تمام التمام قبل موعد التجنيد بتاعى.

أحداث القصة:

ذهبت مع والدتى لزيارة خالى لزوم (الواسطة) قبل ميعاد التجنيد...قال خالى لوالدتى أنا مش فاهم إنتى قلقانه ليه؟؟؟...أنا وإتنين لواءات موصيين عليه...ماتخافيش ياستى حيقعد فى القاهرة مش حيطلع بره...حيروح (إدارة الشئون المعنوية)...يعنى باختصار مش حيشوف الجيش غير يومين...وهوه بيستلم وبيسلم المخله.

إنصرفت والسعادة والطمائنينة تملئ قلبى ولكن أمى لا تزال قلقة!!!

اليوم الموعود:

ذهبت بدرى جداً فى اليوم المحدد إلى إدارة التجنيد بحلمية الزيتون وأنا مفعم بالثقة فى أن أستلم مخلتى وأروح قبل الحر مايشتد...إصطففنا تحت وهج الشمس لنستمع إلى صوت الباش شاويش وهو يقول (اللى يسمع إسمه يقول أفندم ويجى هنا جنبى)...إنتظرت طويلاً حتى نادى على إسمى أخيراً...كان ينادى الإسم وعلى أى فرع من أفرع القوات المسلحة تم توزيع المجند عليه...نادى على إسمى وقال (مدفعية)!!!...

شمال شرق!!!...الكيلو 000 طريق000!!!...لم أكد أستوعب الصدمة حتى أخذنا باش شاويش تانى سليط اللسان وأمرنا أن نقعد عالرمل فى عز الحر على شكل دايرة وسابنا على الحالة دى أكتر من ساعة وياويله ياسواد ليله اللى يفتح بقه بحرف...عليه شوية شتايم لا تقولى بقه إبن الغسالة ولا إبن الرقاصة...ده حاجة تانية خالص!!!...المهم جاء بعض الجنود وبدأوا يرموا لكل واحد فينا مشمع وبعديه فانلات وملابس داخلية واللبس الميرى والبيادة (أنا أخدت فردتين شمال مقاس يجى تقريباً 36 بالرغم من إن مقاس رجلى حوالى 44) :shock:  :shock:  :shock:...ليس لك الحق فى الإعتراض على المقاس... بعد حوالى ساعتين جاءت سيارة جيش لورى شحنونا فيها زى المعيز إلى مركز التدريب!!!...فى مركز التدريب حلقوا لنا بمكنة بنت كلب تلمة وبقيت عامل زى الكتكوت المنتوف ريشه... شفت ليالى أسود من قرن الخروب...لا عارف أكل ولا أنام ولا أدخل الحمام...جالى إمساك...الناموس هرى جسمى...بعد حوالى أسبوع بدأ تقسيم المجندين على مجموعات للتدريب على الرماية...كانت مجموعتى على مدفع عيار000 العملاق...أعطونى عصا طويلة جداً فى أخرها قطعة كبيرة من القماش وجردل فيه حاجة كده عاملة زى الجاز...إعتقدت أن هذه العصا نوع جديد من مضادات الدروع زى (ال أربيجيه) وشعرت بالفخر يملأنى وتذكرت أغنية عبد الحليم حافظ (على صدرك أرتاح من همى وبأمرك أشعلها نيران...بالأحضان بالأحضان) :shock:  :shock:  :shock: ...لم ألبث طويلاً فى هذا الشعور الوطنى حتى أفقت على صوت الشاويش وهو يقول بعد الرماية حتطلع على السلم ده وتستنى لما الماسورة تبرد وبعدين تغطس القماشه فى الجاز وتنضف الماسورة من جوه :mad:  :mad:  :mad:...سألته ماسورة إيه اللى تبرد...رد عليه بكلمة لا داعى لذكرها...نسيت أن أضع قطن فى أذنى...مع بداية الرماية حسيت إن ودانى وقعت...مش سامع حاجة...يظهر أننى أصبت بالصمم...تذكرت أغنية عبد الحليم (وبلدنا عالترعة واقفة بتغسل شعرها...جالها نهار إسود مقدرش يدفع مهرها) :shock:  :shock:  :shock: ...أنا لا أسمع

...shock:  :shock:  :shock: ...................يتبع

فى مركز التدريب حلقوا لنا بمكنة بنت كلب تلمة وبقيت عامل زى الكتكوت المنتوف ريشه

طيب ياعمنا حشيش انت حلقولك

انما الدور على العبد لله انا اتجندت قبل حرب 73 وحظى ان تجنيدى كان صاعقة واترحلت على مركز التدريب فى ـــــــ والدفعة كانت حوالى 600 فى عين العدو غير طلبة الحربية والضباط والاخوة الوافدين والحلاق هيحلق لمين ولا لمين ؟ تقعد تحد ايدة ومعاة مكنة اتلم من اللى جربتها وخط طولى وخط عرضى بس زى زمان ماكانوا بيعملوا فى شعبة الاداب للشباب الى بتعاكس البنات فى الشارع واستلمنا المخلة والمهات ونزلونا اجازة واحنا كدة علشان نقيف الافرولات يعنى اربعة وعشرين ساعة بس وماصدقت اوصل العمارة وحظى الهباب واول ما ادخل من الباب خلعت الطقية لانى كنت مش متعود عليها وكان فى العمارة راجل متخلف بيترعب من العسكرى وانا طالع السلم الاقى عم سوسو فى وشىوانا لابس ميرى وراح مصرخ ومصوت والعمارة كلها طلعت تشوف اية وانا واقف فى وصطهم وناسى انى مش لابس الطاقية وهما يضحكوا وانا فاهم انهم بيضحكوا على سوسو مش على شكلى ولحسن الحظ الحلاق تحت العمارة كان فاتح كمل الباقى وبقيت شبة البططسايةورجعت مركز التدريب وكان فى انتظارنا عمنا برعومى دة اسمة كان 55 سنة جمع الفرقة فى طابور ومعاة المعلمين وجرى على برة مدرسة الصاعقة لغاية ما وصلنا مصرف خاص بالمجارى يعنى مجارة صافى وبعدها عرفنا ان القدام مسمينها الشبراويشى علشان ريحتها وكلة ينزل واللى عاوز يطلع يجيب سمكة ويصادف ان لامؤاخذة كلب ماشى يقوم المعلم ينادى على شمال الكلب اجمع كلة يطلع ويجرى ورا الكلب وبعدين نسمع كما كنت نرجع على الترعة وكلة كوم وعلقة الجنينة دى كوم معلش هحكيلكم عليها

دى جناين مانجة المطلوب منك انك تعديها للجنب التانى وانت متعرفش اية اللى هيحصلك اولا بينك وبين اول الجنينة حوالى 200 متر تاخدهم سقطة امامية يعنى شقلبة وعلى يمينك معلم والتانى على شمالك وكل واحد من الفراودة دول ماسك فى ايدة عصاية كاوتش مضغوطوتاخد السقطة من دول وتلاقى زوووو العصاية على المؤخرة واول ما توصل حدود الجنينة يقولك اجرى اللى هيقابلك يا تضربة يا هيضربك واوعى يمسكوك والا هتبقى اسير وتتلغى الفرقة وكنا طبعا مجربينهم دول بقى اخوانا بتوع جناح العدو يعنى بيمثلوا الاعداء وتدخل تجرى تلاقى اللى مقابلك وبيضرب المهم تعدى منهم ومسموح لك انك تضربة ولو مسكوك تبقى وقعة سودة ضرب بجد ومين ومين ومين يعنى يسأل عن اى معلومة مع الضرب لو قلت هتتلغى الفرقة لو استحملت تتحسب مرة اسر وتالت مرة تتلغى الفرقة وتاخد حبس وترجع تعيدها من اول وجديد دى كانت فرقة الصاعقة المعلمى واكيد كنا مع اللى بنشوفة كارهين عيشتنا ولكن بعد فترة عرفنا انها لسبب وجية وهو تنمية روح المجموعة واتذكر فى اخر اسبوع الفرقة وكان دوريات جبلى اتنين اصيبوا بكسر واتجبسوا والفرقة رفضت انهم يلغوا علشان ميرجعوش يعيدوها من تانى والاسبوع الفاضل فى الفرقة كان كل فرد بيمشى شايل واحد منهم وبالدور لغاية ما انتهينا واتخرجنا وبقينا افراد صاعقة معترف بينا ومن حقنا نعلق شارة الصاعقة وعلى فكرة كان مدة الفرقة 3 شهور كاملة

تم تعديل 11 ديسمبر 2004 بواسطة مصر عشقى