محاورات المصريين...

[بنت شعنونة]

بيني و بينكم انا غرت من قصة سي فوود فقلت اعمل حاجا شبهها

بس بطريقتي :roll:

يارب تعجبكم :D

استنى يا عم؟

انتى موديني على فين؟

تعالى بس ها اوديك محاورات المصريين...

السلاملك

اول ما تدخل من الباب

هتلاقي الأستاذ هشام عبد الوهاب..

اخ كبير وطيب وحباب

هايقابلك اول ما تدخل بالبسمة والترحاب ..:D

وبعده يقابلك اخونا شريف عبد الوهاب

لوعندك هم تحكيله..وهوا يساعدك بالأسباب

ولما يخلص الكلام.. تبقوا ا اقرب اصحاب... :lol:

تعالى بقى اعرفك على الناس الكبرة

اهو اللي قاعد هناك دا يبقى فري عمي

اهو دا بقى اللي ماسك الضبط والربط وشايل همك وهمي

بس ايييه على شوية "طورط" انت بس مد ايدك وسمي :D

ومين اللي هناك ده؟

دا الدكتور رجب.. فن وذوق وهندسة

كلامه موزون بالمنقلة

وتتعلم منه الأدب كل كلمة بسنة :lol:

اما دا بقى يا سيدي.. الأستاذ طفشان

مخ وعقل اييييييييه جنااااان

دين تلاقي.. سياسة تلاقي.. حتى الحركات كمان :lol:

ومين الي هناك دا يا حلاوة؟

شششش... بس احسن يسمعك؟ دا عمك ابو حلاوة

بسسس ايييه كلامه كله بالهداوة

تقولشي بغاشة على بقلاوة :lol:

ومين اللي داخل دا بدوشه و صولجان ؟

دا يا سيدي الأستاذ منمان

ساحر الكلمة والضحكة اييييه جنان

بس ابعد عنه.. احسن يطلع من جيبك تعبان :lol:

امال البيت الكبير دابتاع مين؟

دا يا سيدي بتاع مواطنين لا متفرجين

يعني مين؟

يعني استاذ الكل عادل ابو زيد الملامين

اهو دا بقى بيتعب ويشقى.. وكمان يلوموه اللايمين؟

ومين اللي قاعدهناك وبيدخن شيشة؟

ششش..دا سي السيد يا واد ما تجبلناش التهويشه

جدعنة وخفة دم و جد....من الأخر كدا....تحبيشة :lol:

ومين اللي بيزعق هناك

دا يا سيدي كتاماندو ملك العراك

هوا قلبه طيب بس اوعى تزعله..... لا يلففك التراك :)

ومين اللي قاعد هناك في الزاوية؟

دا عمك الأستاذ شرقية

اخلاق زمان.. ودين اسلام..حاجا كدا اللي هيا :)

ومين اللي مدينا ضهره؟

دا الأستاذ اسامة الكباريتي...اللي اتقطم ضهره

مين شيل هم القدس..االي بقت شوكة في ضهره

ادعيله ربنا يشد ازره..:D

بس يا عم بس؟؟انا اتسطلت؟

اوبا؟؟تبقىقعدت جنب الأستاذحشيش وسلمت..:)

ايه ياعم انت بتزقني كداليه؟

وسع لعمك كي دبليو اييه

هزاره سكر..ودمه شربااااات وحاضر الأفيه :)

امال مين اللي بيتفرج دا على الجزيرة؟

دايا سيدي المصري ابو حمول كتيرة..

فلسفة وعقل وسياسة كبيرة :)

اي اي....يه دا؟ دا انا تعورت؟ عندي واوا؟؟

اوبا... يبقى اتخبطت في قفشة من فقشات كوكوواوا :)

ومين دا كمان؟

دا الدكتور محبط ابو المحابيط

دابتاع الضحك واللعب والتنطيط

وفي الطب فنان في صنعته حويط..:)

الله؟ انتوا عندكوا هنا عرسان؟

عرسان ايه يا عم؟ انت باينك خرفان؟

امال مين اللي داخلين من الباب دول وماسكين ايدين بعض كمان؟

اااااااه

دايا سيدي كنارية المنتدى الولهان

ابن مصر وحرمة بنت مصر ست الحسان

دا يا سيدي مدمن للشعر خرمان

مين قده... مدام بنت مصر ملهمه الولهان :)

الا صحيح؟ هوا كله كدا شنبات ؟

ما فيش هنا ستات؟

صبرك بالله ادينا داخلين على الحرملك

اللي في الصالون هناك دي تبقى ست امينة

خفة دم وشقاوة و طيبة قلب من القديمة

وتاكل من ايديها احلى اكله متينة

وتسمع منها حكم ومواعظ امينة :)

ومين اللي بتتكلم هناك دية؟

دييا سيدي كليو .....الهدية

هدية؟

اه هدية المنتدى الشقية

ضيافة وشياكة ومعلومات متنقية

والكل هنا يشهدلها بالرقة المتناهية :)

ومين االي ماسكة كتاب؟

دي اختك مسلمة.. صديقة الكتاب

ادب ايه واخلاق ايه... ما شاء الله زي ما قال الكتاب

يقدر حد يجي ناحيتها بكلمة؟؟؟ كان يومه بقى هباب

وتلاقينا كلنا ماسكينة من الرقاب :)

ومين المكسوفة؟

دي الهام الطيوبة

تطل علينا كدا كل كام يوم.. طله حبوبة :)

الله الله؟ ايه الدوشة دي والصوت الهائل؟

ابدا

داعمك سيفود دخل هوا ومتسائل :? :D

وللحديث بقية ان شاء الله... :roll:

[freefreer]

رائعة يا شعنونة .. :D :D :D :lol:

[الطفشان]

طب خدي دي:

و مين اللي هناك دي الصغنونة؟

اللي هدومها طايرة في الهوا؟ اه، دي بنت شعنونة؟

مرح و خفة و تلقائية، و كمان حنونة

و فقدت خلاص، علمناها السياسة و الامور المكنونة

بس انت اوعى من سكتها لما تجيلها الجنونة

:lol: :lol: :lol:

و مين هناك الشايب دة؟ دة عم الطفشان

ساب مصر و طفش لما كان زهقان

و كل اما يشوف حالها بيبقى يا ياعيني طهقان

بس في المنتدى عمره ما بيبقى غضبان

و ربنا يوفقه و يكتب كمان و كمان

[بنت شعنونة]

عمي فري :lol:

ربنا يخليك يا رافع معنوياتي

الطفشان

اول مرة اشوفك بتكتب شعر :shock:

ومش عارفا ليه اول ما قريته رنت في ودني اغنية :roll:

والنبي لا نكيد العزااااال ونقول اللي ماعمره انقااااااال

:lol: :lol: :lol:

يمكن عشان اول مر اشوف حضرتك بتكتب شعر

بس اي الحلالالالالالالاوة دي

ربنا يخليك يارب

:lol:

ايواكدا

اصبروا عليه شوية وها اجيب رجل كل المنتدى هنا :wink: :lol:

[الطفشان]

انا مش متخصص شعر زي رجب

لكن استمتع به جدا، و اقرأ منه ما استطعت

و يؤلمني جدا ان ابنائي لا يفهمون الشعر العربي و خاصة القديم منه، بحكم نشأتهم هنا

و لكنها ضريبة الغربة

و مش قصدي اكيد حد، و الله، بس عجبني اسلوبك

ما شاء اللله عليكي طب و خضار و شعر :lol: :lol: :lol:

[بنت شعنونة]

 بس عجبني اسلوبك  

ما شاء اللله عليكي طب و خضار و شعر  

هههههههههههههه

وبعد العيد اتيليه خياطة ان شاء الله :roll: :lol: :roll: :roll: :lol:

[Katamando]

كتاماندو ملك العراك ؟؟؟؟ :? :?

كده برضة يا شنشن :lol: :lol:

طيب أنا مش ح أعمل اي حاجة :roll: :roll:

وأسكت خالص

:neutral: :neutral: :neutral:

لكن أنا بأسجل أعترضي

:mad: :mad: :mad: :mad:

[ragab2]

أختنا شعنونة

جوهرة مكنونة

وبالكتابة مفتونة

تقرأ لها أشعار

فى كل مضمار

تكتب فى الطب

وحتى فى الخضار

تلقائية وعفوية

ومواضيع متنقية

من الحياة وواقعية

شعنونة دى كشكول

فى كل مجال بتقول

كلام مفيد ومعقول

تحية لأختنا شعنونة

[إبن مصر]

:lol: :lol: :lol: :lol: :lol: :D :D :lol: :lol:

اه منك يا شعنونه الشعانين

ضحكتينا بعد يوم حزين

على وصفك لمحاورات المصريين

كلامك حلو موزون

وساعات يكون مجنون

بس الاكاده انه زيك شعنون

ربنا يحفظك يا دكتوره

ويخليك دايما مستوره

ويقويك ويخليك دايما منصوره

اما باقى المنتدى الكريم

الى فيه بتعلم كلام عظيم

يعنى ايه حب وانتماء

وازاى نرفض نكون مظاليم

رنا يخلينا لبعض .... حقيقى والله من قلبى

ابن مصر

[بنت شعنونة]

:D

ربنا يخليكم ليا ياااااااارب

ايوا كدا ادي اللمة والا بلاش :)

كتامندوا

انا اسفة والله :roll: :D

انا كان قصدي ان دمك حامي ومجدع :roll:

الله يخليك مش تزعل مني

انا اسفة :oops: :oops: :oops:

[بنت شعنونة]

:D

[mnman]

شعنونة كتبت:

ومين اللي داخل دا بدوشه و صولجان ؟ 

دا يا سيدي الأستاذ منمان 

ساحر الكلمة والضحكة اييييه جنان 

بس ابعد عنه.. احسن يطلع من جيبك تعبان 

متشكرين يا شعنونة ...بس أية رائيك هو مش تعبان هو حنشون

:D :oops: :oops: :oops:

بجد تحفة.... بس فين الباقي ....

:) :D :D

[KWA]

ايه ياعم انت بتزقني كداليه؟ 

وسع لعمك كي دبليو اييه 

هزاره سكر..ودمه شربااااات وحاضر الأفيه

:D :oops: :cool: :cool: :cool: :oops:

[بنت شعنونة]

:oops: :D :roll:

تعالى بقى ياعم عشان نصلي العصر في الجامع

مين امام الجامع؟

دا عمك الصاوي مذاكر كل المراجع

دين وادب واخلاق بدون مواجع

وصوت هادي وقلب نادي بيراجع :oops:

اما يا سيدي اول الصفوف

تلاقي ابن ابي شيبة بيرتب الصفوف

يمين وشمال استووا وان شاء الله الكل بالخير محفوف :oops:

واللي بعده على طول

براودمسلم ودا بقى الصول

يصالح دا على دا ويفهم دا من دا بالمعقول..:)

امااللي هناك دا

الدكتور عمرو ...تلاقيه في كل مشادة

لكن لجل الحق لما بيقتنع يبقى اخر هداوة :D

تقبل الله يا عم :D

امال مين اللي قاعدين في الجنينة هناك دول؟

دول يا سيدي محمد ابو زيد ومدامه يا زول

دول ناس كبرة... ادب حوار وكلام الكبار حاجا كدا مش معقول :)

ومين اللي قاعد جنبهم؟

دا عمك سيدمرزوق قاعد بيكتب جنبهم

شايلهم البلد وحتىهم اللي ما عندهم

قلب طيابة و جدعنه حبابة.. وشوية شعر من اللي هم...:)

وللحديث بقية...:)

[freefreer]

جميل أوى .. أوى .. أوى .. أوى ..

كل التعليقات جميلة و ظريفة و دمها خفيف ..

و لو ماكانشى الموضوع دمة خفيف و صاحبته دمها أخف ..

ماكانشى جه بالظرف دة كلة ..

شكرا يا شعانينو ..

[Elham]

ومين المكسوفة؟ 

دي الهام الطيوبة 

تطل علينا كدا كل كام يوم.. طله حبوبة

ده ايه الجمال ده :D :D :D

بس انا كده مكسوفه بجد :oops: :D :D :D

[Falcon Egypt]

الاخت شعنونة

من كام يوم مسكت ورقة و قلم وكتبت اسماء الاعضاء النشطين بالمنتدى وبنيت صورة تخيليه لشكل وهيئة

كل فردمن خلال اسلوبه او اسلوبها فى التحاور ثم وصفت كل عضو من الاعضاء بما تخيلته عنه او عنها

بجمله او اكتر وكنت اود ان اكتب عن هذا فى مداخلة ظريفة بعنوان تاْملاتى لاعضاء المنتدى. ولكن وقتى

لم يسعفنى . عموما ياشعنونة حسب روْيتى لكى كان نصيبك الاتى (ومن غير زعل طبعا( :

انتى يا شعنونة عبارة عن طبق السلاطة على المائدة .

فاذا ماكانت المائدة مليئة بكل ما لذ وطاب من الطعام

فان طبق السلاطة له معزه و اهميه خاصه وكذلك فعندما تاْخذ مواضيع المحاورات هيئة الجمود نجد سعاتك

تدخلين علينا بموضوع ظريف لطيف يرطب الجوو يكسر هذا الجمود . اما موضوع الزجل الذى تكتبيه فهذا

موضوع ثانى وبرافو لديكى قدرات رائعه

ويشترك معكى الدكتور رجب فانا ساعات اساْل نفسى هل الدكتور رجب طبيب ام شاعر ام فنان ام مهندس فهو

رجل متعدد المواهب وعلى فكره يوجد فى هذا المنتدى اعضاء اذا غاب احدهم ادركنا جميعا هذا الغياب

واحسسنا ان هناك شئ ما خطاْ, اما الاعضاء اللذين لهم دور فى نجاح هذا المنتدى يحضرنى الان

الاساتذه: اخناتون-الافوكاتو-هشام عبد الواحد- ابو حلاوه - ادفيزر

- شرقية- منمان- فريفرى- الطفشان- المحبط- سيفود -الصاوى- متسائل- مصرى- ابن البلد - اسامة الكباريتى-

سى السيد- محمد ابو زيد- محمود ابو زيد- KWA - متفائل- سبيدر- ايجيبت 5- كوكوواوا- بيت- الاتربى-

- شريف عبد الوهاب - براود مسلم- فارو- سيد مرزوق- حشيش- رجائى- الهام- فريده- مسلمه - كليو

وارجو المعذره عن كل من سقط اسمه او اسمها سهوا. لكل هوْلاء الاعضاء من اسره المنتدى نقول لهم

بمناسبة قرب حلول عيد الاضحى المبارك كل عام وانتم جميعا بخير مع التمنيات بدوام الصحة و السعاده.

[tiger1411]

الاخ فالكون ايجبت سبق الجميع بالتهنئه بعيد الاضحى المبارك

مع ان هذا حقه وحق المغتربين علينا ان نبادرهم بالتهنئه

فكل عام والجميع بخير

:inlove: :inlove: :inlove: :inlove: :inlove: :inlove:

:baaa: :baaa: :baaa:

[بنت شعنونة]

اخي فالكون

تسمحلي استاذنك انك تكتب رايك في الأعضاء

:lol: :lol: :lol: :roll: :roll:

بجد الفضول ياكلني شووقااااااا

:roll:

وبجد انامش عارفا اشكرحضرتك ازاي على كلامك في حقي

ربنا يخليك يارب :roll: :lol: :lol:

وللحديث بقية.... :roll:

[kokowawa1979]

بصراحة بقى انت مالكيش حل ولامثيل يادكتوره :lol: :lol: :lol: :lol: