إحمرار شديد فى عين إبنى الرضيع .. و اليوم الخميس !

[نانا]

السلام عليكم ورحمة الله وبركاته

حمد الله على سلامة ياسين ما شاء الله اسم جميل وبحبه جدا ربنا يخليهولك وتفرحي بيه دايما

لازم تطمنينا عليه أول بأول بإذن الله

وبتأسف على تأخيري عن الكتابة لكن ده والله لظروف الدراسة عندي لكن والله ما شغلتنيش عن الدعاء لياسين وكمان مشكلة النت لسة ما أتحلتش ولسة بدخل عن طريق التليفون

المهم بجد أنا فرحانة ومنتطرة إن شاء الله تقوليلنا مش محتاجين الدكتور تاني خلاص أنا اطمنت على ابني وبقى كويس واحسن من الأول بإذن الله نسمع كدة قريب

اختك ندى

[أختكم المصرية]

اهلا يا اخت نانا

ربنا يزيد الصداقة و الحب بين جميع اعضاء المنتدى

انا فعلا حاسة ان المكان دة بيخلى الانسان من جواه حاسس ان الناس لسة جواها حلو اوى

لانه حب نابع من القلب غير مزيفة وربنا يديم هذة الصداقة و الاخوة على طول

الحمد لله ياسين بخير و بقى احسن كتير بفضل الله وربنا يكرم و لا اذهب للدكتور مرة تانى

اتمنى ان اسمع عنك اخبار حلوة دائما و اتمنى لك التوفيق

و اخبار الدراسة و المزاكرة ايه؟

استاذ قاهرى انا بدعى لك و انا بصلى بالصحة و الذرية الصالحة

[nash]

ألف حمدلله علي سلامه ياسين....

وإن شاء الله ربي يكرمك فيه وتشوفيه عريس جميل مع عروسه أجمل....

والحمدلله علي أن أطمأننا عليه...

كل وعام وأنتي بألف خير أختنا الكريمه مصريه

[قاهرى]

اة الجمال دة كلو .. ربنا يخليكى بجد والله العظيم انا مبسوط اوى اوى اوى اوى ... يسمع منك ربنا انشاء الله

انتى اخت عزيزة وتستهلى كل خير واحنا هنا اخواتك جنبك وقت الفرح والشدائد والحياة مرة كدة ومرة كدة بس يا رب تبقى حياتك كلها سعادة وفرح وحب جوة اسرتك الصغيرة

انا والدى و ولادتى راحو الحج السنة دى وحكتلهم موضوع سينا (دلع يس) حبيبى وقولتلهم ادعولو دة طفل صغنون وميقدرش يتحمل التعب ولا ممتو قدرة تشوفو تعبان كدة

والحمد الله تعالى بجد .... وحمد الله على سلامة ياسين القمر

صحيح قوليلى بتدلعية تقوليلو اية .. علشان لما ربنا يكرمنى بنونو ولد واسمية ياسين اعرف ادلعو :D

اما اسمى الحقيقى علشان الدعوة بتاعتك ليا بالذرية الصالحة والصحة تكون باذن الله مستجابة (اخوكى احمد)

وبجد ربنا يخليكى ويفرحك بابنك وتشوفية احلى انسان فى الدنيا

اخوكى : قاهـــــــــــــــــــــــــــــــرى

[vipwithyou]

ألف حمدلله علي سلامه ياسين....

وإن شاء الله ربي يكرمك فيه وتشوفيه عريس جميل مع عروسه أجمل....

والحمدلله علي أن أطمأننا عليه...

كل وعام وأنتي بألف خير أختنا الكريمه مصريه

لالالالا انا احتج على كلام nash انا حاجز ابننا ياسين لبنتى اللى نفسى اخلفها اول لما اتجوز وهأسميها مريم ان شاء الله انا دلوقتى كاتب كتابى وهأتجوز السنة اللى جاية وبأحجز ياسين يا أختنا المصرية علشان المثل بيقول اخطب لبنتك صح ولا ايه

عموما اخبار ابننا ايه يارب يكون بخير

قولى له خالو تامر بيسلم عليك وبيقولك ان شاء الله تبقى تلعب مع ابن الأستاذ أحمد ( ياسين ) باذن الله ربنا يارب يرزقه بما يتمنى

[nash]

أخي العزيز المهم جدا ..

ألف مبروك وإن شاء الله ربي يرزقك بالذريه الصالحه..وتقر عينك بهم...

[vipwithyou]

ربنا يكرمك يا NASH شكرا

[حسام يوسف]

السلام عليكم يا أختنا

الف سلامة على الامور ياسين

وربنا يشفى كل مريض

[أختكم المصرية]

استاذ قاهرى

ربنا يكرمك على كلامك الجميل دة انا عاجزة عن الشكر ويارب يديم الاخوة و الصداقة

على فكرة اسم دلع ياسين فعلا سينا لان اخته الى عندهها3 سنين هى الى اخترعته فمن ساعتها و كله بيقوله يا سينا

بالنسبة لوالدك و ووالدتك ربنا يتقبل منهم و حج مبرور ان شاء الله

ارجو منك ربنا يكرمك تخليهم يدعولنا اوى احنا فى حاجة الى الدعاء

انا و زوجى و ابنى و بنتى (امانة)

و ربنا يتقبل دعواتهم

استاذ تامر انا خلاص حجزت ياسين لمريم و هبتدى احوش من دلوقتى

استاذ ناش شكرا على سؤالك و فعلا دى احسن دعوة و ربنا يستجيب لدعائك

د. حسام

شكرا جدا لاهتمامك و سؤالك و دعائك لياسين

[نانا]

السلام عليكم ورحمة الله وبركاته

الحمد لله على سلامة ياسين والحمد لله اطمنا عليه ودعواتنا جابت نتيجة بجد انا فرحانة اوي اوي

وكل سنة وحضرتك وياسين طيبين دايما وبخير وبصحة وسعادة آمين يا رب

بجد أنا آسفه والله لسة فاتحة النهاردة أول مرة من آخر مرة فتحت فيها

وشكرا على سؤالك عن مذاكرتي المذاكرة كويسة وتمام إن شاء الله

[vipwithyou]

كل عام وكل الأعضاء بخير ، أعادة الله عليكم جميعاً بالخير والبركاته

معايدة خاصة لياسين وأختنا المصرية ( أم ياسين ) ويارب تطمنينا عليه واوعى تتقلى عليه فى اللحمة فى العيد علشان احنا عايزينه رشيق كدة

أخوكم

تامر السيد

[أختكم المصرية]

السلام عليكم

كل سنة وحضرتك طيب ياستاذ تامر و الله الحمد لله و لادى مش بيحبوا اللحمة و انا كمان

الحمد لله ياسين بقى بخير هما بس عندهم شوية برد و كحة و الحمد لله من تغيير الفصول

المهم طمنى ايه اخبار الشقة وصلت لحد فين ربنا يوفقك

[vipwithyou]

اختنا المصرية

السلام عليكم

أولا متخافي على الأولاد لأن تغيير الجو بيؤثر على الكبار كمان واسبوع التغيير دة بيكون دايماً الكل عنده برد وبيعدى ان شاء الله

وأخبار سينا ايه ؟

وبخصوص الشقة شكرا على سؤالك عنها ، انا توقفت فى التشطيب بعد الكهرباء لأن الفلوس اللى معايا كلها اتسحبت والحمد لله فى فيزا جديدة ومقدم ارض قرعة وكدة ، فكل اللى معايا خلص والحمد لله

وشكرا على اهتمامك مرة اخرى

أخوكى

تامر السيد

تم تعديل 27 ديسمبر 2007 بواسطة vipwithyou

[نانا]

السلام عليكم ورحمة الله وبركاته

كل سنة وكل الأعضاء بخير وعيد سعيد عليكم كلكم عارفة جات متأخرة أوي ورخمة كمان لكن والله أعمل إيه ماعرفتش ادخل في العيد أكيد الكل عارف العيد والزحمة والقرايب ودي أجمل حاجة في العيد طبعا كلهم بيتجمعوا والواحد بيكون ناسي نفسه لمدة أسبوع كمان بعد العيد وكمان مع دخول البرد فالواحد أتبهدل أوي في الأسبوع اللي فات ده لكن بجد أجمل أسبوع في السنة كان ناقصه بس إني ما عيدتش على ياسين ودي أوحش حاجة وعلى والدة ياسين طبعا وبقدم إعتذاري دلوقتي وكل سنة وحضرتك طيبة يا أختنا الجميلة وياسين دايما بصحة وسعادة وحكاية انكم مش بتحبوا اللحمة دي حاجة غريبة أوي لكن خير لأن الناس كلها بتحب اللحمة وكمان ناس كتير بيجيلها النقرص من كتر أكل اللحمة لكن أهم حاجة بردو ماتنسوهاس خالص يعني اللحمة فيها كل البروتينات اللي بيحتاجها الجسم والبروتينات عبارة عن سلسلة من 20 نوع من الأحماض الأمينية اللي بيحتاجها الجسم وكلها موجودة في اللحمة بخلاف حاجات تانية فيها بروتين بس مش شاملة زي اللحمة كل الأحماض الأمينية لكن االي بيقابلها في النبات الفول يعني كلي وأكلي ياسين فول كتير لأنه فيه نسبة كبيرة من البروتين تعوضي بيها إن شاء الله النقص في اللحمة وبردو زودي من البقوليات وطبعا اللبن ده حاجة أساسية أوعي تنسيه أبدا لحد ما ياسين ما ييجي يتجوز لازم بردو يشرب لبن غصب عنه اللبن ده أهم حاجة للجسم وفيه نسبة كبيرة من البروتين أنا لحد دلوقتي بيتغصب عليا أشرب لبن حتى اللي يسمعني وأنا بقول كدة يتريق عليا ويقول لسة صغيرة بتشرب لبن لكن اللي يقول كدة يبقى مايعرقش فعلا أهمية اللبن في كل مراحل الحياة ومافيهوش كبير وصغير بوصيكي بجد على ياسين ربنا يخليهولنا يا رب وكل سنة وحضرتك وهو طيبين مرة تانية وكل الأعضاء

[vipwithyou]

اخبار سينا ايه يا أم ياسين

يارب يكون بخير

متهيألى الجو اتظبط شوية لكن برضوا خلى بالك منه

وتأييدا لكلام أختنا نانا اللحمة مهمه جدا للجسم لكن اللبن فعلا أهم جدا

يا سلام بقى لو تمسكى ياسين وتديله ( تمر ولبن ) ( تمر ولبن ) ( تمر ولبن ) لغاية لما يزعق فيكى ( سورى ) ويقولك

كفاية يا ماما شحنتينى باللى وصى عليهم رسول الله صلى الله عليه وسلم

وكمان يا ستى اديله فول بس ما تكتريش عليه احسن ممكن فى يوم الصبح تلاقيه بيقولك انت مين يا ماما هههههه بأهزر طبعا ً

شكرا ويارب تطمنينا عليه

أخوكم

تامر السيد

[أختكم المصرية]

السلام عليكم و رحمة الله و بركاته

اهلا ياخت نانا اتمنى انك تكونى قضيتى عيد سعيد انتى و جميع الاسرة و عاملة ايه فى البرد الجميل دة انا مش عارفة لمل هاروح كندا هعمل ايه دى درجة الحرارة باليل بتبقى عشرة ومش مستحملينها امال 30 تحت الصفر هعمل ايه

اخبار المذاكرة ايه؟ بالتوفيق ان شاء الله

بالمناسبة انتى فى كلية ايه؟

بالنسبة بقى لموضوع اللحمة و الله انا بحاول مع الولد و البنت بس مش عارفة يمكن بيفضلوا اللحوم البيضاء بس انتى عارفة موضوع انفلوانزا الطيور و بيزيد فى الشتاء و اللبن بحاول عن طريق الزبادى لانهم بيرفضوه تماما

فعلا الاطفال اكلهم صعب و عشان تربيهم اصعب و اصعب انا عشان اكتب الكام كلمة دول بكتبهم بالعافية لانى بمسك الكى بورد بالعافية منهم

المهم ابقى طمنينا عليكى و ربنا معاكى

استاذ تامر سينا بخير الحمد لله

وحضرتك اخبارك ايه ان شاء الله تكون بخير

بالنسبة لموضوع التمر و اللبن انا عارفة انه طبع مفيد جدا و ياريت ياخدوه بس والله هما متعبين جدا فى موضوع الاكل اناحاولت كتيير بس فعلا فشلت و ربنا يهديهم احسن انا بقيت اكلم نفسى و موضوع الفول دة اخته كانت بتاكله وهى صغيرة و دلوقتى طبعا مرفوض و ربنا يستر

الحمد لله على كل شىء

[نانا]

السلام عليكم ورحمة الله وبركاته

أهلا بحضرتك يا أختنا الجميلة أخبار ياسين الجميل إيه ضروري تعرفينا أخباره أول بأول

أنا يا ست الكل المذاكرة الحمد لله تمام إدعيلي بس السنة دي تعدي على خير

والجو والله برد جدا وكان تعبني أوي في الأول لكن دلوقتي أتعودت يعني من كتر البرد والأدوية أخدت مناعة ممكن تقعد معايا لحد آخر الشتاء إن شاء الله بس تصدقي إني فعلا دلوقتي بكتب بالعافية من كتر الساقعة

وربنا مع حضرتك إن شاء الله تروحي كندا وترجعيلنا بألف سلامة إتكلي بس على الله واتحملي البرد واتدفي كويس أوي وخلي بالك من صحتك

وبالنسبة لموضوع اللبن والتمر فعلا والله مفيد جدا والرسول عليه الصلاة والسلام وصانا بيهم عشان أهميتهم يعني لو الواحد عاش بس على تمر ولبن صحته هتبقى زي الفل

وإحنا لما نسأل نفسنا إشمعنا في رمضان بنفطر (معظمنا يعني) على التمر واللبن ده ليه بقى

لأن التمر زي مطهر بالظبط بيطهر وينظف معدتنا قبل ما نبتدي الأكل لأن المعدة بتكون فاضية لازم نبتدي الأكل بحاجة كويسة وطبعا إذا ما فيش تمر يبقى مية لأن المية بردو مطهر للمعدة وزي ما قال حبيبنا صلى الله عليه وسلم

(إذا كان أحدكم صائما ، فليفطر على التمر ، فإن لم يجد التمر فعلى الماء ، فإن الماء طهور )

زطبعا مش معنى كدة إننا ما نأكلوش غير في رمضان لكن طبعا لازم نأكله في رمضان وغير رمضان

آسفة أنا طولت أوي

على العموم ضروري تطمنينا على ياسين وأخبار حضرتك وطبعا أكيد إن شاء الله تكوني على إتصال بينا حتى بعد ما تسافري إن شاء الله