نصيحة لكل الشباب قبل الزواج

[~Heba~]

السلام عليكم

استاذ تامر شئ رائع انك بتفكر فى العمل الحر و لا تعتمد على الغربة لانها مسيرها تنتهى و احييك فعلا على قرارك ده و بالنسبة لزوجتك لا اوصيك امن لها مستقبلها المادى طالما انت مانع عنها العمل و هى مستجيبة لرغبتك محدش عارف الايام الجاية بيحصل فيها ايه

نرجع لموضوع الشعر و احب اطمنكم كلكم ان البنات عارفين كثرة غسل الشعر بالشامبو بيضره عشان كده شركات الشامبوهات عملت العبوة الصغيرة الاكياس و كمان غسل الشعر بميه سخنة بيضره و كل خبيرات الشعر بيقولوا كدة فمتخافوش على ميه السخان و اللى ربنا كرمه بزوجه محجبة ميشيلشى هم الكوافيرات خاااالص شفتوا بقى الشعر الطويل مش بيكلف اى تكلفة زايدة عن الحد

و على فكرة حرام الخاطب يشوف شعر خطيبته الا بعد كتب الكتاب لانها ساعتها فقط صارت زوجته انما ممكن امه او اخته تقوله شعرها عامل ازاى و بشكل عام محدش يشغل باله بالحاجات دى لانه المثل بيقول لبس البوصة تبقى عروسة يعنى الواحدة حتى لو كانت شيخ غفر بالزواق و المكياج و التوضيب فى اللبس بييجى منها و تبقى حلوة

على فكرة انا لاحظت ان الموضوع مكتوب بلهجة سعودية يعنى صاحب الموضوع الاصلى سعودى و انتوا عارفين عندهم الستات مهووسات بالجمال والتباهى بين بعضهم عشان مفيش اختلاط فى الافراح والمدارس والكليات وكدة فكل واحدة بتعمل اللى تقدر عليه عشان تبقى اجمل من غيرها و خصوصا السلفات و اخوات الزوج و مننساش الضرات

و طبعا بتروح احسن كوافير و تعمل احسن تسريحة مهما كانت التكلفة و الزوج المسكين بيدفع الا اذا كانت موظفة فدى براحتها .

[ياسرمحمد]

طبعا معاكو حق ان البنت ما توريش شعرها قبل الجواز

معلش جل من لا يسهو

انتو نسيتوا موضوعى اللى كنت باكلكم عليه

لازم نجوز الشباب والبنات اللى لسه ما اتجوزوش

ويا بخت من وفق راسين فى الحلال

وهنيالك يا فاعل الخير

[~Heba~]

ايه يا استاذ ياسر انت عايز تخلى محاورات المصريين تبقى زواجات المصريين!!!!!!!!

متخفشى بنت الحلال بتيجى لوحدها و الظروف تجمعك بيها و اذا كنت من الطراز القديم زواج الصالونات احسن حاجة

[ياسرمحمد]

يا سيادة الباشمهندسة انا مش عايز الموقع كله يتحول لموقع زواج

كان كل قصدى ان حد من اسكندرية يشوف مشاركتى ويتصل بيا ويعرف ظروفى وامكانياتى واذا كان يعرف انسانة كويسة يقوللى

يا ريت كلنا يمشى فى الموضوع ده اذا كان يعرف حد

[vipwithyou]

يا أستاذ ياسر

انا ارفض اسلوبك فى البحث عن شريكة الحياة

اذا كنت فعلا بتدور يبقى اللى هيساعدك فعلا هما اصحابك او اهلك اللى هما يعرفوا شخصيتك

ويقدروا يختاروا المناسبة ليك

لكنى طبعا ارفض الطريقة دى ( الخاطبه )

وارفض ايضاً ان يرشح لك احد المحاورين اى عروسة لك لأن مينفعش حد يتحمل مصير حد تانى كدة

لأن محدش فينا يعرف شخصية التانى ويستاهل مين ومين تستاهله

شكرا وياريت تفهمنى

واذا حضرتك جاهز فعلا مادياً للجواز فأكيد مصر واسكندرية بالذات مليانه بنات ماشاء الله عليهم

تدين وادب وجمال ( آه نسيت مش عارف شعرهم طويل ولا لا )

ابقى اسأل العروسة شعرها طويل ولا لا فى اول مقابلة وعليه حدد مصيرها ؟!!!

شكرا

[ياسرمحمد]

ما اعتقدش ان فيه راجل على سطح الكرة الأرضية ما يحبش أن شعر زوجته يبقى سايح وناعم وطوله مترين.

ده شىء طبيعى طبعا ، طول الشعر واحد من أجمل نقاط الجمال فى الانثى

الزواج عبر الانترنت ممكن جدا لكن خوفنا الدائم والشديد وتواصل التقاليد الصحراوية من آلاف السنين هو اللى مخلينا محلك سر وبنرفض دايما أى أفكار جديدة

فيه مواقع على الانترنت للزواج وبيحصل توافق بين الطرفين ، والله التوفيق من الله ، والحمد لله ان فيه ناس طيبين بيدلوا على الخير وبيمشوا فيه

والزواج من خلال المواقع ، ليه لا وبين أعضاء الموقع ليه لا ، التعارف على الموقع فقط مقدمة ، واذا ما كانش من بين الاصحاب والاهل معارف لهم بنات او عندهم وما حصلش قبول بين الطرفين او مش عاجب الامكانيات المادية والى غير ذلك من الاسباب ، ده فقط مقدمة للتعارف وبيجى بعد كده السؤال عن الاهل والمتقدم للخطبة

والله احنا بنبقى زملاء عمل فى مكان واحد وبيحصل زواج ممكن ينجح وممكن يحصل مشاكل ويفشل مش شرط عشان اصحاب واهل يبقى لازم الطرفين يبقوا آخر أدب وهدوء وحب وود

هو لو الاقى مثلا بنت حلال داخل الموقع ليه لا ... بس انا يكون فيا القبول ويوافقوا

العبرة بالجدية ، إذا الشاب اتعرف على بنت من الموقع و راح لأهل البنت مثلا وعرفهم بنفسه وقال والله امكانياتى كذا ، ايه المشكلة

[vipwithyou]

يا استاذ ياسر تقاليدنا الشرقية ( التقاليد الصحراوية ) مش عيب ولا غلط

وبعدين ولاد الحلال اللى بيدلوا على الخير واللى ممكن يدلوك على عروسة بنت حلال لازم على الأقل يكونوا عارفينك انت شخصياً

علشان يرشحولك بنت الحلال المناسبة

شكرا

[~Heba~]

شوف يا استاذ يا ياسر فكرتك صعب انها تتحقق و لسبب بسيط لانه ناس كتير على النت شايفينه مرتع للكذب و الخداع و الناس الطيبه مش بتقدر تميز يعنى الطريقة من الاخر مش معروف نسب فشلها من نجاحها و الزواج آخر حاجة نجرب فيه لانه مستقبل بيت و اسرة :wub:

و انت يا تامر بدل ما انت شغال زق فى الراجل كده شوفله عروسة و الا انت حاطط يدك فى المية الباردة اكمنى انت كاتب كتابك حس بغيرك و الله العزوبية حاجة صعبه :P و اسأل عمرو ابو حورس و الى زيه بيقضوا نهارهم ازاى :wub: :blink: :blink:

[vipwithyou]

يا أخت ENG.Heba أنا ما بأزقش فى الراجل ولا حاجة

بس بأقوله الواقع واللى لازم يفكر فيه فعلا

اذا كان ناوى يتجوز ان شاء الله ربنا هييسر له واذا معندوش حد فى دماغة ودا واضح

واذا ناوى يلجأ للجواز التقليدى وهو انه يتقدم لواحدة لا يعرفها ويكون هناك فترة خطوبة قصيرة ليتعرفا على بعضهما

دا وضع كويس وانا مش ضدة ولا حاجة وربنا بيبارك فيه ويكون زواج ناجح ان شاء الله

غير انك ممكن زميلاتك فى العمل يكون أقرب الاحتمالات لك لأنك بتحتك بيهم ويحتكوا بيك بالتالى هتختار حد ويختارك حد .. فاهمنى

يبقى اذا مفيش زملاء عمل يبقى الأهل والأصدقاء المقربين ليك هما افضل وسيلة للبحث عن عروسة

لكن على النت لا أعتقد انها فكرة جيدة مش لعدم توفر الصدق على الانترنت ، لا بالعكس لكن بتحتاج وقت علشان تحكم على حد كويس

وتقرر انك ترتبط بيه وصعب برضوا حد من المحاورين يرشح لك حد وهو لسة معرفكش

طيب ما انت شايف عمورة دايخ على عروسة والأخت ناش كانت هترشح له حد وغيرت رأيها

بس أنا هأدور لك يا عمورة على بنت الحلال اللى تكون مامتها داعية عليها طبعاً ( داعيالها داعيالها .. ) متضربش يا عمورة

بس ياريت تكون فهمتنى يا ياسر

شكرا