في بيتنا فأر

[se_ Elsyed]

ده غير فيلم في بيتنا رِجل

والفأر لا يعني الفقر مش فقري يعني

لأ أقصد الفار داهوت

أقسم بالله كانت تجربة يشيب لها شعر الكتكوت

ومش عايز بقى تنكيت وتبكيت وكل واحد يعمل فيها أبو زيت الهلالي ويقولي " مش عيب الحاج سي السيد بجلالة قدره واللي شنبه يقف عليها الصقر ويبني عش كمان يخاف من فار "

ولا واحد متأثر بفيلم العار ويقولي " مش عيب إبن الحاج عبتواب ما يعرفش أصول التخزين "

لإن أساساً التخزين يا حبيبي كان من إختصاص الدفاس وأبو دأشوم ودول ماتوا مع عبد البديع العربي في أول الفيلم ..

وبعدين سي السيد رجولته الحقيقية بتبان في المواقف الرجولية مش الفأرية ..

المهم .. ترجع أحداث تلك القصة الحقيقية إلى إسبوع او 10 أيام وتحديداً يوم الأربعاء قبل الماضي وكان في مباراة للأهلي الساعة 8 فقلت أروح من الشغل المغربية أضرب لي ساعة نوم من نوعية نوم العصاري عشان أقوم وألعب الماتش وأنا فايق .. فزوجتي قالت لي طيب جارتنا اللي جنبي زوجها في رحلة عمل خارج الرياض وقاعدة لوحدها فأنا هاروح نص ساعة أنا والعيال نسليها وكمان عشان العيال ما يعملوش دوشة حاكم انا عارفه إنك لما بتنام ما بتحبش تسمع صوت نملة جنبك - ربنا يحرسك يا سبعي -

المهم قومت قبل الماتش بنص ساعة وقلت أدخل أوضة الكرار - المطبخ يعني - أجيب شوية لب على كوباية مية وكوباية شاي والذي منه عشان لما الدنيا تطربق والماتش شغال مش هأقوم ... دي بطولة يا ناس حرام عليكو ..

وبعيد عن السامعين لسه داخل إلا

يُتبع

[nash]

wst::

طيب يعني احنا عايزين قلب الحدث...اللي جاي هوة الأهم ...أتصرفت حضرتك إزاي وكدهوت.... :lol:

[قاهرى]

سى السيد باشا ... موضوع شيق بجد وفى انتظار باقى الحتوتة :lol:

[se_ Elsyed]

إلا والأقي صاحبنا المقرف عمال يبرطع على الرخامه بتاعت المطبخ أنا أذبهللت لإن عمرها ما حصلت ... طب ليه وفين وعشان إيه ومنين جه فين ؟

المهم إستجمعت قواي العقلية والعصبية وقلت لازم أثبت وأخد موقف ... روحت جاري على الموبيل ومكلم الولا نسيبي وقلت له تعالى حالاً دلوقت ... الراجل إتخض وقالي : إيه العيال جرى لهم حاجه ؟ قلت له لأ ...لكن هايجرى لهم ... تعالى يا بني ادم في فار في المطبخ .. قالي لي : يا شيخ ده أنا بأحسبه أسد .. فقلت له ما تهرجش أنا واقف ماسك إيد المقشة وحارس المطبخ عشان الزفت ده لو خرج ودخل أي أوضة من الأوض يبقى عليه العوض ومنه العوض وهاولع في الشقة واللي فيها ..

بصراحة ما كدبش خبر وأخد عربيته و5 دقايق لقيته عندي .. فقالي تتوقع يكون فين ؟.. قلت له أنا أخر مره شفته كان بيلعب في الركن داهووت ... أتاري الفران هنا عبيطه ولا إيه ... بيبص ورا أحد الصواني لقى صاحبنا مجعمز ولابد في الدره لا حس ولا خبر فقالي ناولني العصايا اللي في إيدك دي بسرعه ... وما شاء الله عليه ولا اجدعها لاعب بلياردو .. راح منشن وزنقه بالعصايا في الحيطه وسمعت صرخه فرفورية مكتومة وبيشيل الصينية إلا وصاحبنا ديله مزنوق ومش قادر يفلفص ... لحد هنا والموضوع مانتهاش ولو خبطوا بحاجه هايبهدل الدنيا ... فقالي إسمع إجري بسرعه هاتلي كماشة من شنطة العدة بتاعتك .... روحت جيبت له الكماشة راح خانق رقبته مموته بإسفكسيا الخنق .. ورميناه في صندوق الزبالة خارج الشقة

المهم كل ده عمال يذل فيه وأنا واقف مرابط على باب المطبخ وخايف - من الأخر يعني عشان مش عايز كلام كتير - وحتماً ولابد أجيب كاميرة الفيديو وأصور العملية تقولش يعني بيصور فيلم ليوسف شاهين ..

المهم كنا طلعنا شويه حاجات من الطبخ وحطناها في الصالة ... إلا واخته داخله الشقة وشافت الكركبة فقلت لها على اللي حصل ، ودي نزلت صويت من هنا عالريحة يعني – اومال لو كانت شافت العركة – وعمر نزل عياط – آه والله – ويقولي حرام عليك كنت سيبوا أتفرج عليه ده أنا عمري ما شفت فار ...

الموضوع لحد كده وممكن يتقال عليه فار وراح

لكن إزاي ... إزاي اعصابي ما تبوظش اكتر وأكتر

[se_ Elsyed]

خلص الماتش . فقلت مكافأة للولد العكروت ده تعالى مش خسارة فيك أعزمك على العشا تقديراً لمجهوداتك .. المعلم سين سين ما بينساش رجالته ... بس قول لأختك كالمعتاد إحنا رايحين مشوار قوام قوام ... وإتحركنا ويادوب ما بعدناش عن البيت 500 متر إلا والمدام بتتصل بتقولي إرجع بسرعة أحسن جارتنا اللي تحتنا إتصلت بيه وتعبانه قوي وهاروح معاها المستشفى أسندها وعلى الأقل أخلي بالي من العيال لإن زوجها محتار مش عارف يعمل إيه يخلي باله من زوجته ولا يشوف العيال العفاريت وإنت خليك في الشقة أحسن عيالنا نايمين ... قلت إيه العكننة دي ؟ .. رجعنا البيت وصاحبنا راح بيتهم

قلت حلو ... أقعد أتفرج على مودرن سبورت عشان بيجيبوا ملخص عن ماتشات الإسبوع وحلو قوي البيت وهو هادي كده

إلا وبعيد عن السامعين أسمع خرفشة وخبط ورزع تاني ... قلت يمكن بره الشقة وخلينا في حالنا مالناش دعوة بالناس ... بس لكي يطمئن قلبي قلت أبص بصه عالمطبخ مش هاتخسر ... وحدث ما ليكن يخطر لي على بال ولا عمري فكرت فيه ..

إلا وألاقي فارين عجالي نازلين جري ورا بعض وكإنهم في حديق المريلاند أو في مدينة الإنتاج الإعلامي وبيقضوا يوم مشمس جميل تحت سفح الهرم ...

بجد ربنا ما يحكم على حد ... والله العظيم كابوس

وقعدت أقول : ياربي ده أنا لو ساكن في خرابه ما كانش جرى اللي جرى ...

طب فار وقلنا اهو ممكن يتسحب من تحت عقب أي باب او من أي مصيبة ... لكن 3 ؟ ليه ؟... ليه ؟ ليه ؟؟؟ ثلاث ليهات

فوقت من الصدنه – على رأي اللمبي – وأتصلت بمكتب مكافحة الفيران العمومي ... حبيبي أبو نسب .. مانا متجوز اخته والفيران كمان ... فقالي ما تقرفش اهلي بقى كل شويه رايح جاي إيه إنت أشتريتني ؟ إن كان عالنسب يا اخي إبعت اختي وعيالها يعيشوا عندي وما تقرفنيش ... وحاول يابني تتعايش مع الوضع وتتوصل لتسوية سلمية مع الفيران وعيشوا مع بعض في سلام وإتنازل لهم عن المطبخ وإنت هايفضل لك باقي الشقة ... وعمال يبوظ في أعصاب اللي جابوني وأنا أساساً ما بقتش عارف أمسك اعصابي ولو كان قدامي كنت خنقته بدل الفيران ... فقلت له مش وقت أستظراف إلبس هدوم الشغل وتعالى ..

برضوا هما الخمس دقايق ولقيته جاي وأقسم بالله أول ما فتحت باب الشقة موت على نفسي من الضحك بالرغم إن الموقف كان زبالة ... فلقيت صاحبنا شايل كرتونتين كبار .... وساحب وراه قطه ضخمة ... فقلت له الكرتونتين وعرفناهم إحتمال تكون جاي من البلد وجايب فطير وعسل وجبنه قديمة معاك .. زيارة من النجع يعني ... ... لكن القطة جبتها إزاي ؟ .. فقالي : لقيتها تحت العمارة ففضلت أحنسها وأقولها بس بس وأفتكرت معايا أكل في الكراتين الفاضية وطلعت ورايا ... وأساساً ما فيش في الكراتين إلا علبه بيف باف ومعجون كده زي الغرا بيتلزق عليه الفيران لو عدوا من عليه

فقلت له طب الاخت اللي واقفه عالباب هانسحبها إزاي للمطبخ ؟ فقالي : عندك إيه في الثلاجة يتاكل ؟... فقلت له عندي سوسيس بتاع الواد عمر إستنى اجيب لها سوسيساية وأفضل أقطع لها حتت وأرميها على مسافات لحد ما تدخل المطبخ .. بنت الذين خطفت أول حته ودورت الجري برا باب الشقة وهربت بجلدها ..

فقلت له احسن بدل ما كانت تكسر الدنيا في المطبخ

المهم قالي تعالى برضوا نتوقع يكون الاندال دول مستخبيين فين ؟

فلسه بنبص ورا المايكرويف إلا ونلاقي واحد مستخبي في الركن بين المايكرويف والحيطة ... راح صاحبنا متناول إيد المقشة – ما هي خلاص بقت مفرفرة من الفار السابق – و هي خابطه بلياردو واحدة بس وسمعنا صرخة الموت ... فقالي طب أنا مش شايف .. إتشجع وادخل المطبخ وبطل بقي ..... ما علينا ما علينا وبص على الوضع خلف خطوط العدو شوفه عامل إزاي ... بابص كده لقيت صاحبنا مزنوق بعصاية البلياردو .. لكن لقيت التاني إبن الذين عايز يهرب من تحت .. فقالي إمسك أم علبة البيف باف وساعدني عشان أنا زانق التاني وإيدي مش فاضية ... فقلت له بيف باف إيه يابني إحنا هانموت نملة ؟... فقالي إسمع الكلام يا بني أدم بدل ما أسيب لك العملية كلها – يعمل أبورت للميشن يعني – قلت له حاضر يابو كمال أنا هانزل الملاحة .... فقالي البيف باف هايعمي عين أهله ويعطله شوية تكون مجهز لي عصايا تانية وأروح خابطه بها نخلص عالتنين ... وفعلاً روحت مديله بخه صاحبنا أتجمد في مكانه راح التاني عاجله بخبطة كومه مكانه .....

وشال الجثتين وتواهم ..

وانا كل ده وبأقنع نفسي إني في كابوس فزززيع فزززيع

قلت له لأ يا حبيبي أنا هاسيبك في المطبخ تنكته كله وتطلع كل شيء فيه وأي حاجه كانت مكشوفة نرميها في الزبالة وأمرنا لله مهما كانت – يا خراب بيتك يا سين سين – وتشوف هل في فلول فأرانيه أخرى ولا دول كانوا قوات الطليعة فقط ؟

والحمد لله مالقيناش أي حاجه

نص ساعة ووصلت حرمنا المصون وكالعادة تماسكت وبمنتهى برود الاعصاب فضلت تصوت وتقول نزلني نوهائي نوهائي نوهائي ... فقلت لها خلاص يا ماما إحنا خلصنا الموضوع بس عايزين نعرف إيه السبب ؟

المهم أعترفت تحت الضغط وبالتعذيب الكهربائي إنها كانت سايبة شباك المطبخ مفتوح بالرغم إنه متحوط كله بسلك لكن في فراغ بسيط جداً بين الشفاط وبين السلك فراحوا الجبانات متسحبين ونازلين عالمطبخ ...

طبعاً هي اللي شالت الليلة وقعدت يومين تنضف بالكلور والمنظفات والحركات كل شبر في المطبخ وطبعاً قضيناها مطاعم يا معلم وأدفع يا زكي قدره .. يدفع زكي قدره

وانا قعدت لا يقل عن اسبوع عندي قرف من كل شيء في الحياة واعصابي بايظه من العدوان الثلاثي ده وفكرت أروح لدكتور نفساوي بس قلت أحسن يضحك عليه ويقول " يالله يالا امشي إنجر من هنا "

ربنا لا يوريكو يا ولاد اللي اخوكو شافه

[seeem]

روحت جاري على الموبيل ومكلم الولا نسيبي وقلت له تعالى حالاً دلوقت

للدرجة دي......

على فكرة الفار ده مدسوس عليك علشان تخلص على الكارت

بس الموضوع ده مش سهل ابدا زي مابتحكيه......

الموضوع فيه إن......

[قاهرى]

انت مشكلةةةةةةةةةةةةةةةةةةةةةة اي سين سين بجدددددددد

انت موت على نفسى من الضحك والله العظيم وخصوصا موضوع القطة الضخمة هههههههههههههههههههههههههههههههههههههههههههههههههههههه

تسلم ايدك يا جميل على الموضوع الجامددددددددد اوى دة وزود المعجبين بواضيعك واحد كمان me :lol:

بجد موضوع زى العسل

قاهــــــــــــــــــرى

[قاهرى]

سين سين .. اخر طلب باء معلش

ممكن رقم ابو كمال ؟؟؟ :lol:

الواحد يا خويا ميضمنش الظروف اية الى هيحصلو بكرة

[Folana]

السلام عليكم ورحمة الله....

قلبت علينا المواجع يا سين سؤال يا اخويا...إإإإإإإإإإإإإإإإييييه..رجعتنى لورا عشغين سنة....

بجد انا حاسة باللى تقوله جدا..دى تجربة مخيفة مريبة..يشيب لها شعر الولدان...وكله بيجى من تحت راس الشفاطات..هى دى البوابة الرئيسية لهم للدخول الى النملية..قصدى العالمية...

نونكن اقول تجربتى يادكتور ابو الاسيان سن الفار؟؟

بقى محسبوتكم عندها فوبيا من الحشرات بجميع انواعها..من اول النملة وانت طالع....لدرجة انى لا يمكن اقعد فى مكان الا وزجاجة المبيد الحشرى جنبى تحسبا لاى هجوم مفاجىء..

افتكر مرة ياحرام كان عندى أخت فى الله كده بتزورنى ولابسة عباية سودا...وانا باكلمها بقى واسألها عن احوالها وعن اولادها..الا ولقيت ناموستين بيحوموا حوالين راسها..فضلت مركزة جدا عليهم وتسللت ومديت ايدى على زجاجة المبيد...وقلت لها ثانية واحدة ماتتحركيش من مكانك...وفضلت ارش فوق راسها المبيد..والرذاذ ياحرام نازل عليها زى المطرة..وهى تقولى.."رشى ياحبيبتى..رشى..موتيهم"...انتبهت فجاءة انى بارش عليها هى.....والله بازعل كل ما افتكر ..لا حول ولا قوة الا بالله...صحيح العاقلين فى نعيم...

نرجع بقى للفأر..ايام ماكنت ساكنة فى بيت العيلة (قبل ما اطلع افراج يعنى )...دخلت المطبخ بمنتهى سلامة النية..وبأفتح الدرج لقيت حتة فأر..معمول له تعدد كروموسومى....بص لى حتة دين بصة...وضربنى قلم واتوصى.....انا طبعا صرخت وقفلت الدرج بسرعة...واتصلت بزوجى العزيز قلت له اجمع هنا فورا...

ووصل زوجى بسرعة البرق..انا اطمأنيت بقى..وقلت له الحق..الحق...ده فيه فأر كبير جدا قد كده..فى درج المطبخ...أومأ برأسه ايماءة الواثق من قدراته..ودخل المطبخ...رحت انا قافلة الباب بسرعة جدا عليه..

وعنها بقى ياحضرات ..وسمعت طاخ ..طووخ..طررررررررراخ...خبط ورزع..وانا اقوله برافو..اديله كمان...موته...فرتكه....وبعد نصف ساعة..قالى افتحى الباب..فتحت ودخلت...لقيت المطبخ مخلع كله والزيت والارز والسكر على الارض واطباق مكسرة والبوتاجاز فى وسط المطبخ..قلت له فين الجثة؟؟

قالى ما اعرفش..مالقتهوش... :lol:

فضلت على الحال ده ثلاث ايام..لا انام...وخرجت كل اللى فضل من المطبخ بره ورميت كل المأكولات ..وقاعدة حاطة ايدى على خدى ادعى ربنا على الظالم المفترى اللى استولى على مطبخى....

واخيرا..اختى قالت لى على الحل...قالت لى الفار بيخرج من مكان مادخل....اطفى نور المطبخ بالليل ..وافتحيه فجاءة حتعرفى الفأر مستخبى فين..

نفذت النصيحة...ولقيته فعلا ماشى على ماسورة الغاز الطبيعى ومنها جرى على فتحة الشفاط...

اظرف ما فى الموضوع...انى كنت كل يوم اسيب حاجة فى المطبخ..كمين يعنى علشان اعرف خرج ولا لأ...يعنى اسيب طماطماية صغيرة مثلا..واصحى الصبح الاقيها متاكل منها حتة....اعيط واقول لزوجى الفار لسه هنا..

لحد ما اكتشفت ان زوجى العزيز هو اللى بيعمل فىّ المقلب ده...يقوم بالليل يتسلل للمطبخ ويقطع الطماطم..علشان افتكر ان الفأرلسه موجود...

لانى صحيت مرة ودخلت المطبخ لقيته شابك ورقة فى عود كبريت وغرزها فى الطماطم وكاتب عليها " ها ها ها ها..انا عايز جبنة رومى النهاردة ".........

wst::

[se_ Elsyed]

لانى صحيت مرة ودخلت المطبخ لقيته شابك ورقة فى عود كبريت وغرزها فى الطماطم وكاتب عليها " ها ها ها ها..انا عايز جبنة رومى النهاردة ".........

:lol:

وحطيتي له جمنه رومي على أساس طبق اليوم يعني ؟

ماشي يا قاهري إنت و سيم .. زمانكو شمتانين فيه ؟

الأخت فلانه .. رفيقة الجهاد الفأراني ...

إنتي حالتك متأخرة قوي يابنتي

بقى بتخافي من الدبانه وإنتي طالعه ؟!!!

لأ بصراحة الستات بيركزوا قوي على الأبراص - جمع بُرص - والفيران ده أساسي وممكن الصراصير ، وممكن الست يجيلها إنهيار نفساوي لو شافت حاجه من دول في الشقة

بس عارفه بقى لما يكون الواحد قاعد في بيته ملكه لوحده مونكن يعمل شغل حلو قوي ويتخذ تدابير امنيه جامدة ضد المخلوقات دي

لكن لما تكون عمارة وفيها سكان كتير ومناور مشتركة ... فمش معقول يتكفل لوحده بالموضوع ده

وربنا يكفينا شر المستخبي .. ويستر طريقك يابنتي .. ولا يقرب منك فار ولا برص .. أم باقى الحشرات فمقدور عليها وبضربة شبشب واحده ينتهي الموضوع

[kokowawa1979]

فولانة كتبت :

بجد انا حاسة باللى تقوله جدا..دى تجربة مخيفة مريبة..يشيب لها شعر الولدان...وكله بيجى من تحت راس الشفاطات..هى دى البوابة الرئيسية لهم للدخول الى النملية..قصدى العالمية...

الشفاطات أحد الأسباب لكن السبب الرئيسي هو دخول الفئران عبر أنابيب الصرف الصحي - خاصة وأن لها القدرة على السباحة عبر الماء في جميع أحواله . ولهذا أنصح العائلات التي تسافر إلى الخارج أو قضاء وقت بالمصيف بان تقوم بإغلاق أغطية البلاعات وكذلك قواعد الحمامات ووضع أوزان ثقيلة فوقها .

وأحسن طريقة للتعامل مع الفئران هي وضع كمية من الزبد أو السمن البلدي على قطعة من الخبز ثم خلط الزبد بمبيد يسمى التميك - ولحسة واحدة للفأر من هذا الطعم يقف في مكانه ولايتحرك قيد أنمله !! - كذلك يمكن خلط التميك بالماء ووضعه في الأماكن التي يختبأ بها أو يحتمل اختباء الفأر بها - فلحسة واحدة أيضا يتحنط الفأر في مكانه - ولكن يراعى أن يكون كل ذلك بعيدا عن متناول الأطفال .

ده أنا كنت مغشوش فيك قوي يازعيم - تستدعى قوات الطوارئ الدولية والحكومية علشان فأر - أهلوية صحيح :lol:

تم تعديل 2 ديسمبر 2007 بواسطة kokowawa1979

[Folana]

وربنا يكفينا شر المستخبي .. ويستر طريقك يابنتي .. ولا يقرب منك فار ولا برص .. أم باقى الحشرات فمقدور عليها وبضربة شبشب واحده ينتهي الموضوع

السلام عليكم ورحمة الله...

يسمع من بقك ربنا يا سين سن الفار يابنى....

مشكلة انت تسكن فى بيت لوحدك وتحاوطك الغيطان والزرع الاخضر من كل جانب..برضيكى شىء موش موريح بوتاتن...لانك بتشوف حشرات غريبة الشكل ...وممكن تلاقى برص ماشى على الحيطة...وياسولام بقى لو قدامك ترعة صغننة كده...تصحى الصبح تلاقى ايشى ناموس وهاموش ونمل عايم على وش المية...

بس انا متهيألى الحاجات دى عندنا بس ولالا ايه؟؟...انا لما باسافر مش باشوف ولا ناموسة صراحة حتى فى وسط الخضرة...

والله يا ابو الاسيان انا باقول للفاموليا بتاعتى ..انا حاسة انى اخرتى حتكون فى العباسية باجرى ورا الدبان....

استاذ كوكو واوا...باشكرك على نصحيتك...ولو فيه حاجة لابعاد الابراص برضه يبقى كتر خيرك....

فيه برجولا قدامى عايش فيها عائلة ابراص..وباسمع كبير البرايصة بيطقطق على طول...واخشى ما اخشاه انهم يتسللوا الى داخل المنزل...زى افلام الرعب كده....هل هناك حل؟

المعذبة

فلانة

[إبن مصر]

أه يا سى السيد يا أخويا.

ذكرتنى بالذى مضى.

من حوالى 25 سنه وانا فى مدرسه الصاعقه فى انشاص كنت انا وزمايلى بعد ما نخلص نقعد كده نشرب شاى ونخمش كلنا فى سيجاره ( تقريبا 7 انفار) المهم يا اخويا فى انشاص هناك نوع من الفئران الى هو بعد الجرذ بحوالى حلقتين تطور .

ففى الانجليزيه هناك ( ماوس ) والكبير منه بيقولوا عليه ( رات) انما الى كان هناك يا بنى شىء لا يسدكه عقل.

يتراوح طول الذكر منهم من اول انفه الى نهايه الذيل حوالى 45 سم .. بجد وكنا مسميين الفصيله دى اسم مخصوص .

كنا بنقول عليهم فيراب ( خليط من الفيران على الكلاب ) وكانت القطط الى فى انشاص مش قطط.. والنييعمه ما كانت قطط كانت فى حجم المعزه الصغيره كده.

المهم فى هاتوكا الليله شوفنا فرب كبير وقلنا عيب علينا بقى احنا صاعقه ويا ما أكلونا الفيراب دى.. نمسك واحد بقى .

وطلعنا نجرى وراه فى العنبر .. اصلى نسيت اقولك هما كانوا مستوطنين عنابر النوم .. ومكن حد فيهم يزقك من على السرير يوقعك وهو بيجرى .

كنت تحس لهم كده سخمه وتواجد ملحوظ فى المنطقه.

المهم جرينا وراه وهو بيوقع كل حاجه بالظبط زى ما تكون بتجرى ورا كلب.. كلب ايه.. عيل صغير.

وكان فيه علب معدن كبيره ليها باب منزلق بيسموها العياشه. وكنا بنحط العيش فيها .( طبعا ده ادانا صوره ليه دايما العيش كان بيبقى متاكل واحنا بنفطر ) المهم وهو فى احد مناوراته نط جوه العياشه قمنا قافلين عليه الباب وحابسينه جوه.

و لاننا كنا سوداويين ونميل الى النزعه السيكوباتيه قررنا الانتقام منه بصوره متوحشه.

وجيبنا صنديد( صنديد اسم قط كان موجود هناك ) وشيلته انا وزميلى ربنا يخليه دلوقتى بقى الملحق العسكرى بتاعنا فى احد الدول وكل ما حب اتريق عليه افكره باليوم ده.

شيلنا صنديد ورحنا فاتحين باب العياشه ورميناه جوه وقلنا بس هايفرتكه.

المهم مطولش عليك سمعنا اصوات لا يمكن تخطر لك على بال ولا فيلم جوراسيك بارك.

والعلبه تتنطط.

وتتخبط واحنا من بره بنهيص زى الفايكنج او قبيله من اكلى لحوم البشر .. وصاحبى قالهالى بمنتهى الثقه..

أكله عررررروه...

وفجأه كل حاجه سكتت.

صمت تام

سكون القبور.

قلنا نفتح نشوف فى ايه .

اول ما فتحنا باب العياشه نط الفرب فى وشك صاحبى وجرى ...وصاحبى وقع على الارض من الخضه ووسعنا السكه علشان صنديد ينط وراه بقى .

ونستنى فى صنديد انه يخرج مخرجش..

انه يخرج مخرجش..

فقربنا كلنا بالراحه نبص جوه العياشه..

ويا لهول ما رأينا..

مات صنديد.

الفرب اكل رقبته..

مات وهو بيدافع عننا.

ويوميها عرفنا الحقيقه.

ان ربنا بيحبنا والفيران مكنتش عايزه تاكل كل مره تعدى فيها علينا .

ولحد النهارده.

مش ممكن نسى فصيله الفيراب.

اييييييييييييييييييييييه دنيا..

[MZohairy]

الفئران لا تهرب الا من السفينه الغارقه wst::

و وجود 3 فيران في مطبخك في ليلة واحده .....يدل على ان سفينتك عايمه يا سي السيد :lol:

و يجعلو عامر بحسك دايما

[zizetta]

إقتباس(Folana @ Dec 2 2007, 11:44 AM)

لانى صحيت مرة ودخلت المطبخ لقيته شابك ورقة فى عود كبريت وغرزها فى الطماطم وكاتب عليها " ها ها ها ها..انا عايز جبنة رومى النهاردة ".........

عجبتني أوي الفكرة دي .. تصدقي يا مدام فلانة أنها ضحكتني أوي .. وخصوصاً لما ربطتها بمنظر المطبخ وطاخ طيخ طوخ فتوقعت إنك ممكن لما تفتحي الباب تلاقي الفأر بيقولك مين الشخص ده وايه اللي جابه هنا .. :lol:

سي السيد .. بجد إنت فظيع .. أسلوبك جميل جداً في سرد الأحداث .. إنت ممكن تشتغل منوم مغناطيسي لأن لك قدره علي تثبيت العقل علي صور معينة ... أو مثلاً راوي .. يعني بتحكي حكايات مش راوي يعني بتسقي الناس مية wst::

بجانب طلب مدام فلانة لموضوع الأبراص ..ياريت حد يقولنا كيف نتخلص من النمل غير أني أخبط النملة بفتفونة سكر كبيرة علي رأسها فتدوخ وتقع ويغمن عليها وبعدين أشيلها علي نقالة فيتبعها الطابور كله للمكان اللي حرميها فيه ..

بجد .. النمل عندي حكاية علي كل لون من أول العيال الصغيرين الوحشين اللي ما بيتشافوش بالعين المجردة لغاية النمل الفارسي والإيراني والهندي اللي الواحدة فيه تعرف تحدد ملامحها كويس وتميزها عن أختها ..

جربت كل شيء العجينة .. بايجون ... فليت .. الأقراص .. الجاز .. سد الثقوب .. ألخ .. تقولش جيش ما بينتهيش ...

ياريت حد يقولي كيف أقضي عليه أحسن -عجبتني كلمة سي السيد - أولع في البيت بس وإحنا مش فيه ... bv:-

تحياتي

زيزيتا

[Diab]

امال انا اعمل يا باشا

اول شقة اخدتها في جدة

بالليل رحت عشان احضر العشا حكم انا من النوع اللي لما بيجوع بياكل ولما باعطش بشرب

المهم مطولش عليك الاقي واحد من البعدا واقف اخر الرخام -عاملي فيها ميكي ماوس بسلامته -وعاوز يفتح علبة لافاش كري

شوفت الألاطة يعني مش حتي ياكل اي حاجة لا لازم جبنة فرنساوي

حمدت ربنا اني كنت حاطط نص جبنة رومي قديمة في التلاجة والا كان زمانها في الزبالة دلوقت

تم التعامل مع الهدف B)

خلص اول يوم

تاني يوم الاقي واحد تاني من نفس القطيع في نفس المكان بس اكبر شوية - انا قلت ده باين عليه من شرطة الفيران جاي يدور علي المرحوم

تم التعامل مع الهدف B)

واضح انهم مكتفوش بالمباحث فاعلنوا حالة الطواريء فقرروا يعلنوا التعبئة العامة mf_p: ويبنزلو بالجيش الفيراني كله mc: :happy:

لاقيت كل يوم اتنين تلاتة jdw::

مكملتش الاسبوع ha) رحت رايح بيت تاني وكان هذا اخر عهدي بالفيران في الغربة حتي حين

[إبن مصر]

اختنا العزيزه زيزيتا .

بالنسبه للنمل هناك العديد من الوسائل العلميه للقضاء عليه ولكن تكمن الحقيقه فى شىء..

نوع النمل ..

والموسم الى بيظهر فيه.,

فلو كان النمل هو من الحجم الكبير ( الاحمر ) الى بعض انواعه مجنحه فهذا يظهر عاده فى فصل الصيف واشتداد الحراره وعاده ما يسكن الشقوق العميقه فى الجدران والارضيات السيراميك .

ويكون القضاء عليه ( بصعوبه ) هو رش الجيل الخاص بالزواحف على الفتحات التى يخرج منها .

اما لو كان من الحجم الصغير ( الاسود المنمنم) فده مشكله لان ساعتها بيبقى ليه اكتر من خليه فى المكان ( زمان كانوا بيقولوا الى انه علامه حسد ) المهم ده بيبقى القضاء عليه عن طريق استعمال البودره على اماكن الخلايا ودى بتبان من اثار التراب حول حواف الناطق الخشبيه فى المطبخ او شقوق السيراميك الصغيره .

الاخت الغاليه فولانه .

مشكله الابراص ابسط مما تتخيلى .

وهانقولها فى الحلقه القادمه ان شاء الله

كان معكم

د. أحمد محمود

دكتوراه مقاومه النمل المقارن

جامعه ميتشجان بروض الفرج

[kokowawa1979]

أختنا الفاضلة فولانه :

حتى الآن لا يوجد طريقة معينة في مكافحة الأبراص أو كما يسمى أبو البريص سوى المكافحة الميكانيكية وهي الضرب ولا مؤاخذة بالشبشب أو بأي أداة أخرى - فالثعابين على سبيل المثال تهرب من رائحة الشيح أو البابونج - ولم يتم تجربة ذلك على الأبراص - والبرص اسمه الانجليزي هو gecko وستجدين بلادا كثيرة تهتم بتربيته .

لكن يقال أنه في حالة جرح أبو البريص وهروبه فإنه يبحث عن أفرب مكان به ملح حيث يقال أن الملح يساعده على التئام جرحه . لذا يجب تغطية أواني الملح دائما .

الأخت الفاضلة زيزيتا :

بالنسبة للنمل كما ذكر أخونا الفاضل أحمد محمود يوجد الجل وعمل الجل يتلخص في أنه يحتوي على الطعم الذي يحتوى داخله على المادة الفعالة السامة بتركيز خفيف وهيمادة الريجنت في أغلب الأحوال - وتعتمد ميكانيكية الجل على أن شغالات النمل تخرج للبحث عن الغذاء وبالمناسبة لايمكن للشغالات أو الذكور أن تتغذى من أي طعام إلا بعد أن تتغذى الملكة أولا من هذا الطعام - وحينما تأخذ الشغالات جزء من الجل إلى الملكة تموت الملكة فور تناوله ثم تبدأ حالة الانتحار الجماعي لباقى النمل لأن الملكة تعتبر هي العقل المدبر للعش - لهذا لاتجد أثرا للنمل بعد أخذه للجل وتوجهه بها إلى العش .

وهناك طريفة أخرى أكفأ وأفضل من الجل وهو مركب يسمى ant kill قد يكون موجودا في كارفور عبارة عن علبتين من البلاستيك الصغير تحتوى كل منها على طعم به مبيد مخفف وهو على شكل حبيبات مثل السكر بنية الشكل -يتم وضع قليل منها بجوار أعشاش أو في طريق النمل وبنفس طريقة الجل سيختفى النمل نهائيا . وهو يصلح لجميع أنواع النمل بلا استثناء .

نقطة أخرى يجب ملاحظتها في موضوع وضع طعم الفئران فيجب أن يستخدم قفاز مطاطي أو بلاستيك عند إعداد الطعم حتى لاتظهر رائحة الإنسان في الطعم فيبتعد عنها الفئران .

على فكرة يازعيم الأهلوية أنا شفت برنامج في التليفزيون وفيه قبائل أفريقية بتقوم بالبحث عن الفيران لذبحها وطبخها بحجة إنها مقوية مثل الفياجرا - والله دي بجد مش بهزار :happy:

[zizetta]

الأخوة الأعزاء / أ. أحمد محمود وأ. كوكو واوا

أشكركم علي وصفاتكم الجميلة اللي ححاول أطبقها .. بالنسبة يا أستاذ كوكو واوا للعلب اللي بتتباع في كارفور أنا أشتريتها بالفعل من هايبر وعملت لهم أكمنة منها في مناطق عدة في الشقة .. واختفى الصغير وما زال هناك الكبير لكن قليل جداً وغالباً يكون اتنين ثلاثة لكن بلاقي كتير لاقى حتفه في الأرض ..

يا مين ينولني الملكة دي علشان أقطم زمارة رقبتها وأخلي الفريق كله ينتحر ..

مش ملاحظين أن أنشط مملكتين في الحشرات هما النحل والنمل .. بتكون الملكة بتاعتهم واحدة ست .. أنثي يعني .. تفتكروا ده سببه ايه ؟؟؟

الحقيقة المعلومات التي ذكرتها عن النمل مشوقة جداً..

وقد قرأت في بعض تفاسير الإعجاز العلمي للقرآن الكريم ما يلي :

تمكن احد اساتذة الجامعة الهاشمية في مدينة الزرقاء قرب عمان من ربط جدول العناصر الكيميائية الـ 114 بترتيب سور القرآن الكريم البالغ عددها 114 سورة ايضا.

وقال الدكتور زيد الغزاوي رئيس قسم الهندسة الطبية في الجامعة الهاشمية انه بتدبره وتفكره في آيات وسور القرآن الكريم تمكن من اشتقاق حقائق علمية تبين مدى الاعجاز المعرفي والعلمي للقرآن الكريم بعد ان اجرى تجارب مخبرية عدة في الاردن وبريطانيا. واضاف في تصريحات صحفية انه من ضمن هذه الحقائق ما جاء في سورة النمل «يا ايها النمل ادخلوا مساكنكم لا يحطمنكم سليمان وجنوده وهم لا يشعرون»، حيث ذكر في هذه الآية ان النمل يتحطم.. واكتشف العلماء مؤخرا ان جسم النمل مكون من السليكا. وهي المادة الرئيسية المكونة للزجاج وترتيبها في جدول العناصر 27، وسورة النمل هي السورة 27، وكذلك فإن سورة الحديد رقمها في القرآن الكريم 57 وهو العنصر 57 في الجدول الكيميائي.

فعلاً سبحان الله ...

تحياتي زيزيتا

[Folana]

السلام عليكم ورحمة الله...

ياه ه ه ..دى المشكلة طلعت كبيرة وتمس حياة جانب كبير من ابناء الشعب ...فعلا.......وما الحياة الا فأر كبيررر....(ده مثل غير بتاع المحور )...

باشكرك اخى الفاضل كوكوواوا..الله يطمنك......ومين يجى له قلب يضرب هذا البريص ولا ابوه حتى....انا أخرى اموت ناموسة ولا سبايدر ..

معنى كده ان شركات مكافحة الحشرات دى بتكون مجرد وسيلة للكسب وخلاص؟...

انا عن نفسى جربت جهاز طارد الفئران ده ومش عمل حاجة...تفتكروا الموضوع مرتبط باكوام الزبالة المنتشرة ...ولا ايه سر انتشار الحشرات كده؟

الاخت الفاضلة زيزيتا....اقرأى هذا الموضوع..الاخوة اتناقشوا فيه كتير عن الاعجازالعلمى للقراءن الكريم فى هذه الاية:

الموضـــــــــــــــــــــوع

وابقى قولى اسم التركيبة بتاعة النمل اللى فى هايبر على الخاص...اصل انا أحب اقتنى اخر فيرجين فى عالم المبيدات الحشرية ...