كشف حساب الحياة (لايف استيتمنت)

[mogly]

صباح الخير

اشكركم جميعا على هذا المنتدى الجميل اللى ممكن قوى الواحد يلاقى فيه الأصدقاء اللى بقو عملة نادرة فى حياتنا

أو اللى تفرقوا بسبب ظروف الحياة اللى احنا بنعيشها و العولمة و الذى منه

اسمحوا لى ان أبدأ هذا الموضوع اللى مش عارف اذا كان اسمه معبر عنه و ألا لأ

على اى حال الواحد مننا عند سن معين بيلاقى نفسه غصب عنه لازم يقف وقفة و يسعرض شريط حياته ويبتدى يعمل زى كشف حساب

يارى هوه قدر يحقق ايه و هل هو مشى فى الطريق اللى اختاره لنفسه و الا لأ و اذا لأ لأ ليه ل كان هوه السبب و ألا كانت ظروف أقوى منه

ياترى هوه راضى عن اللى عمله و ان كان هوه فى الحالتين سواء راضى او غير راضى عقرب الساعة مش بيرجع للخلف و عند نقطة معينة

بتبقى فرصة التغيير تكاد تكون مستحيلة

ياترى الواحد حقق النجاح اللى كان بيتمناه و ده شؤال تانى مهم هل النجاح ده قرار شخصى و ألا نتيجة حزمة من العوامل و الظروف المحيطة بالأنسان

على فكرة انا من تجربتى و انا اعتبر فى اوسط العمر (اوائل الأربغينات) كشف الحساب من اصعب ما يمكن ان يواجهه الواحد لأنه بيبقى ماشى فى حياته

و باصص قدامه و كل حاجة بتشده لقدام و السرعة بتزيد و المسافة عن الماضى بتتباعد و فجأة اذا كان عنده الفرصة بيقف و يبص ورا و يبتدى يحسب

حاجة زى الفاينانشال ستيتمنت بتاعة الشركات لكن مختلفة لأنها بتبقى للعمر كله مش لسنة واحدة

اخوانى ياريتكم تشاركونى الخواطر فى هذا الموضوع و ياريت اعرف رايكم اذا كانت الحسبة دى مفيدة و الا مالهاش لزوم من منطلق

يا ايها اللذين امنوا لا تسئلوا عن اشياء ان تبد لكم تسؤكم و خلينا فيما يخص محاسبة النفس من جانب دينى و بس

ارجو المعذرة من جفاف الأسلوب لكن انا مهنتى ليست الكتابة و يبدو ان الواحد بعد ماراثون الحياة و عدم وجود الوقت الكافى

بيعانى من ضمور فى التعبير عن افكاره

للحديث بقية

م م

[miramar]

سم الله الرحمن الرحيم

بجد يا استاذ mogly موضوعك شدني جدا لدرجة اني من اول ما اتنشر بادور على رد وكلام مش لاقية باحاول اعمل كشف حساب بجد

الانسان كل فترة بيحتاج وقفة مع النفس يفكر في القرارات الي اتخذها في الناس الي استبعدهم من حياته او الي دخلهم حياته

يفكر ايه الي عملته غلط وممكن اصلحه وايه الي عملته صح وعايز استمر فيه

عن نفسي احب احتفظ بكشف حسابي لنفسي

مرمر