ستة ملايين مصرى يشاركون فى قرعة البطاقة الخضراء

[se_ Elsyed]

بإختصار .. المصريين عايزين يطفشوا ويسيبوها مخضرة لمبارك وشلته .....

هذه هي الحقيقة المفزعة يا سادة وبالأرقام

ففي القرعة الأخيرة العبيطة اللي أمريكا بتعملها وتطلب فيها 50 ألف مهاجر من مختلف أنحاء العالم عشان يعيشوا في الجنة الموعودة حيث وجبات الكومبو الكنتاكية .. وقزايز البيبسي الغازية ... كان نصيب مصر 4000 حاج .. قصدي 4000 مصري ....

لحد هنا وعادي .. أصل دول العالم كتير ولو فرقنا الخمسين ألف دول عليهم هايطلع نصيب كل بلد فتفوته صغيرة ...

سمعونا صلاة النبي وعايز 10 يكتفوني وأسمع كلمة هييييييييييييييييييييييييه

إتقدم كام مصري بقى يا رجالة ؟

6 مليون مصري !!!!!!!!!!!!!!!!!!

يا نهار أسود مش باين له ملامح

6 مليون مصري عشان يختاروا منهم 4000 مهاجر ...

يعني أكثر من ثلاثة أرباع الشعب المصري !!!!!!!!!!!

إيه يا عم سين سين إنت شارب مية طُرشي عالصبح ... ثلاثة أرباع الشيعب إيه ؟ ده الشيعب عندنا 70 مليون وزيادة ؟

عارف يا سيدي وأنا فايق ولسه ماشربتش بالقرش كله ... وخمسة في ستة بتلاتين تحب اخليهم لك 40 ؟

بالراحة وبالورقة والقلم تعالوا نفصص الرقم مع بعض

فصص يابا فصص ماهي أيام مباركية سودا بعيد عنك .... ربنا يريحنا ونخلص بقى

بالصلاتو عالحبيب عندنا 70 مليون مصراوي ... تماما ياخوي ؟

تمام

شيل منهم 20 مليون تلميذ وطالب بيدرسوا ما بين كي جي ون وصولاً إلى سنة الامتياز في كليه الطب ... ونزنق معاهم العيال الصغيرة اللي بترضع سواء طبيعي أو لبن صناعي .....

قشطة ... يبقى فاضل 50 ...لسه بدري ...

شيل كمان 7 مليون طفشان زي حالاتي كده ويهيم على خشمه في بلاد الله لخلق الله

حلاوة ,,,, كده معانا في الصندوق 43 مليون ...

طب شيل قد 20 كمان ما بين قوات مسلحة وشُرطة ومباحث وأمناء شرطة وعساكر درك على موظفين حكومة مربوطين على الدرجة التالتة والناس درجات ومعاهم كبشة ملايين من كبارات البلد اللي عالمعاش والناس البركة بتوعنا اللي إحنا عايشين بنفسهم ...

لانشون .... كده معانا 23 مليون

نشيل كمان قد 15 ما بين ناس بسطاء ما يعرفوش أمريكا دي فين ولا عمرهم سمعوا عن لوتاري بيتعمل وعندك كمان كبشة الفلاحين اللي عندنا في محافظة الشرقية اللي كل همه إن الدودة ما تاكلش القطن السنة دي ومحصول البرسيم يصح ويزهزه عشان يجوز مبروك إبنه لمسعدة بنت عم عوضين اللي في طرف البلد من الناحية الجبلية وبالتالي لو البلد ولعت مش في دماغه ولا له دعوة بتعديلات دستورية ولا تزويرات إنتخابية ولا مبارك في لشبونة بياكل فينو وحلاوة طحينية .. يعني ناس عايشة اليوم بيومها وطالبة الستر من ربنا ... ناهيك بقى عن ملايين من عينات عم عبدو البقال بتاع الجبنة الأسطمبولي اللي مش في دماغه أمريكا ولا مزيكا وما بعرفش هي أبعد ولا السنبلاوين .....

هــــا صدقتوني دلوقيتي لما جلت لكم إن المصريين كلهم عايزين يهربوا من جلدهم من جحيم مبارك ؟... يعني تقريباً كل مصري بيعرف يقرا ويكتب وعنده وصلة نت من أم 25 ج في الشهر وقرا إعلان اللوتاري ده قدم فيه أملاً في الفوز وحياة ليس فيها مبارك ....

صباحكو عسل

[ahmedarab]

يا نهار اسوح ومش طلعاله شمس ؟؟؟!!!!!

ستة مليون ...انت متاكد من الرقم دة ؟؟؟؟؟

يعنى تقريبا حوالى 8 % من الشعب المصرى ؟؟؟؟؟ :ninja: دة قبل ما تشفى يا عم الحج

وبعد ماتشفى وتشيل الجلد والسمين والكبد والكلاوى يبقى حوالى 50 او 60 %

يبقى فعلا حلاوة ولانشون ومربى وبسطرمة كمان ؟؟؟؟؟ wst::

ربنا يستر ولما نرجع نلاقى لسة فيها ناس :blush2:

[amrhoras]

وعندك كمان كبشة الفلاحين اللي عندنا في محافظة الشرقية اللي كل همه إن الدودة ما تاكلش القطن السنة دي ومحصول البرسيم يصح ويزهزه عشان يجوز مبروك إبنه لمسعدة بنت عم عوضين اللي في طرف البلد من الناحية الجبلية وبالتالي لو البلد ولعت مش في دماغه ولا له دعوة بتعديلات دستورية ولا تزويرات إنتخابية ولا مبارك في لشبونة بياكل فينو وحلاوة طحينية .. يعني ناس عايشة اليوم بيومها وطالبة الستر من ربنا ... ناهيك بقى عن ملايين من عينات عم عبدو البقال بتاع الجبنة الأسطمبولي اللي مش في دماغه أمريكا ولا مزيكا وما بعرفش هي أبعد ولا السنبلاوين .....

ابويا حورس بيبعتلك سلامات يا عم الحاج سين سين وبيكولك انت نسيت الرز كمان والترعه نشفوها علينا ياعم الحاج حتى الدود بدأ يهج من الارض خليص رايح على فين رايح على القاهره ماهو اصل منعريفش بلد ابعد من القاهره برديك

الا يا سين سين ايه ارويكا ديه مش هى جمب اوطاليه ؟ حاكم اصل دوار العمده بتاع بلدنه ابنه محمد طاهروه امبارح ورحت لكيت عنديه صندوق اكديه فيه واحده حلوه كوى كوى كوى بتكول انهم مسكوا الواد ابن ابويا الشيخ محمود وهو بينط فى المالح رايح اطاليه سمعت انه فيها نسوان حلوه كوى يابووووووي

ماعلينا نرجع لمرجوعنا ونكولك عم مبارك من يومه وحالته طين ومغملقه بالسواد فى سواد انى بتكلم عن نفسي انى طفشت رحت احج عند النبي الغالى عليه الصلاة والسلام وهربت مع كل الناس اللى بتهرب اهى جت معاي اكدى حاكم السعوديه سمعت عنها انهم يحجوا بس انما لما جيت انبهرت بيها وقولت لازم اجعمز اهنيه

احسن من الدوده و الطين والبلهارسيا اللى ماليا جتتي وهاريه كبدتى

اعذرنى ياخويا سين سين انا يادوبك بفك الخط وبعرف استقرى اصلى بملى الواد اين اخويا متعلم ومتنور ومعاه ابتدائيه ههههه

المشكله سيدى الفاضل ليست فى الشعب المشكله فى ناس اهدرت حق الشعب على مدى القرون واحنا برده ساكتين كلنا بنهرب اه بس لازم فى يوم من الايام نرجع ان كان السفر لامريكا حلم فانا اقولك انا واحد من ابناء الشرقيه الفلاحين والغلابه بس ايدي عمرها ما لمست ارض واحب منظر الخضره جدا بس اعتقد ان مصر كلها فلاحين مش ابناء الشرقيه بس !!!

للاسف برده بنسخر من بعض وباسلوب جميل كان نفسي تذور الشرقيه اللى انا هربان منها تعرف ليه لانى مش عارف اعيش فيها تعرف ليه الشقه وصلت 150 مش جنيه ياريت الف 75متر ب 150000 واقل ايجار 800 جنييه بس مش فى الزراعيه زى مانتوا فاكرين لا فى عمار ....!

حكايه الفلاحين انتهت دلوقتى الفلاح اصبح باشا ومع ذلك بفتخر ان اصولى فلاحين عزقوا الارض وتعبوا وربوا اباهتنا وامهتنا بعرقهم ومجهودهم !

صباحك ورد :blush2:

[Nile Bird]

الحاج سين سين عمدة المصريين والمفرج عن هموم المغتربين

تحيه طيبه

إيه يا عم اللى انت بتقوله ده وبعدين انت مستغرب إن 6 مليون يقدموا للسفر إلى أمريكا دى أمريكا يابا عارف يعنى إيه أمريكا

يا جماعة حد يعرفه أمريكا يعنى عدد 6 مليون قليل عليها

يا عمى الشعب زهقان جدا وعاوز يطفش واللى عاوز يشوف ده يتابع برامج 90 دقيقة والعاشرة مساءً والحقيقة والطبعة الأولى وهو ييعرف العيشة فى مصر عامله إزاى فى الأيام المباركية الجميلة والنظيفة دى

أقولك على حاجة يا عم سين سين تبين ان الشعب زهقان طبعاً إحنا عارفين ان أى تأشيرة فى مصر صعبه جداً إن المصرى يحصل عليها

ناخد مثلاً بلد زى تركيا المعروف إن إقتصاد تركيا ضعيف والبطالة بها عالية

إعمل إعلان وقول فيه شركة سين سين للسياحة تعلن عن توفر عقود عمل لتركيا مع تحمل الشركة الحصول على الفيزا وشوف كام واحد هيقدم عندك؟

بلاش تركيا

نزل إعلان وقول بمناسبة عيد ميلاد ملكة إنجلترا فإن السفارة تفتح أبوابها غدا لكافة الشعب اللى عاوز فيز بدون تعقيد أو إجراءات فقط تقدم الطلب وتدفع الرسوم تاخد الفيزا وتدعى للملكة وبالله عليك شوف كام واحد هيروح أظن فى هذا اليوم ممكن موظفين السفارة يروحوا يعملوا مكتب فى الصحراء الغربية علشان تكون المساحة كافية لإستقبال الناس ولا إيه رأيك

بلاش كدة

نزل إعلان وقول إن الرئيس بوش عندة وعكة صحية وعمل ندر ان أى حد من الشعب المصرى هيسمى إبنه بوش أو يدعى له بالشفاء هياخد فيزا لأمريكا وتانى يوم إركب السيارة الفيات 128 بتاعتك ومر على السجلات المدنية وشوف كام واحد مقدم طلب تغيير إسم

وبعدين إمشى فى الشارع وشوف كام واحد ماشى يدعى لبوش؟

يا عمى البلد دى خلاص مش للمصريين وإنما للشله اللى حضرتك طبعا عارفها

وكل ما نستطيع أن نقوله هو حسبى الله ونعم الوكيل فى كل ظالم

[deemuck]

بدون تزيين،،،

القرعة الأمريكية للهجرة يتقدم إليها ملايين من بلدان العالم بأكمله بما فيها الدول الأوربية سنويا آملين على الحصول على البطاقة الخضراء لدخول ارض الولايات المتحدة. يجب أن نسأل أنفسنا بدون تزيين هل أمريكا أفضل من مصر؟ هل أمريكا أفضل من بريطانيا؟ . العديد من البريطانيين يتقدمون سنويا لطلب الهجرة إلي كندا فهل هذا هروبا من بريطانيا؟ نعم. قلة فرص العمل وارتفاع المعيشة وارتفاع مصاريف التعليم أدى إلي هروب كثيرين للبحث عن مكان آخر. أحب أن أشير قبل النظر إلي مصر يجب أيضا النظر إلي الطرف الأخر. أمريكا دولة عظمى في جميع المجالات فرص العمل بها أكثر وفي أزياد أكثر منها في مصر. بالإضافة إلي ، التعليم والرعاية الصحية المتطلبات الرئيسية التي يحتاج إليها العنصر البشري. حكومة أميركا لا تطارد الأمريكان في حياتهم اليومية يكفي أن عضو البرلمان أو عمدة الولاية إذا قاد سيارته مخمورا أو بدون ربط حزام الأمان يغرم ويقاد إلي مركز الشرطة. فلماذا لا نقول أن أمريكا في الأصل إغراء.

[شينكاوي]

السلام عليكم

6 مليون مصري !!!!!!!!!!!!!!!!!!

يا نهار أسود مش باين له ملامح

6 مليون مصري عشان يختاروا منهم 4000 مهاجر ...

يعني أكثر من ثلاثة أرباع الشعب المصري !!!!!!!!!!!

اولا اعتقد انه لو تم عمل احصائية لشعوب العالم جمعاء فيمن يرغب بترك دولته للعمل في الخارج لحاز الشعب المصري

المركز الأول بين تلكم الشعوب والسبب معروف ويتعلق بشقين الأول وهو عدم الاحساس بالأمان الاقتصادي والأمني في مصر

والثاني هو حينما يري الموظف البسيط في مصر ابن بلدته القادم من الخارج وهو يلبس افخر الملابس ويتعطر باطيب العطور

ويصرفف ببذخ غير معتاد عليه ويقابله بسخريةواستهزاء ويتكلم امامه انه لا يجد المشروع المناسب مع توفر المال ما الذي سيفكر فيه

الموظف غير الهجرة للخارج حتي ولو كانت للاردن وليبيا مع احساسه بأنه افضل من ذلك القادم من الخارج وان الدنيا هتبقي ورد وياسمين

الشعب المصري الموجود في مصر وخارجها هو شعب مظلوم لان من يتحكم في مصيره هم مجموعة من المرتزقة الذين لا تهمهم مصلحة

مصر بل هدفهم المال فقط وليس اي مال بل يريدون خراب مصر وغناء انفسهم.

الوجهة التي قدم لها الاخوة- الذين نسخر نحن منهم- هي الولايات المتحدة الامريكية افضل بلد في العالم بلد الديموقراطية

بلد الحرية- لغير المسلمين- فتقديمهم لتلك الطلبات هو منطقي ولا استبعد ان من يسخرون من هؤلاء الشباب لو اتيحت لهم

الفرصة للتقديم مع نفس المعاناة التي يعيشها هؤلاء الشباب لتقدموا بطلبات الهجرة هم ايضا.

انا لا اريد ان اهاجم احدا ولن اهاجم احدا لقناعات شخصية بأن الجميع يهدف الي مصلحة مصر ولكن لنكن رحماء بأخواننا

انا شخصيا لو كنت مكانهم لتقدمت بطلب هجرة الي الولايات المتحدة وزيدوا علي الستة مليون واحد .

ahmedarab رد اليوم

يعنى تقريبا حوالى 8 % من الشعب المصرى ؟؟؟؟؟ دة قبل ما تشفى يا عم الحج

وبعد ماتشفى وتشيل الجلد والسمين والكبد والكلاوى يبقى حوالى 50 او 60 %

يبقى فعلا حلاوة ولانشون ومربى وبسطرمة كمان

استاذنا الفاضل احمد خليت الشعب المصري كبد وكلاوي وشفيته كمان .......... لا تعليق ليس علي شخصك الكريم ولكن

علي نظرية تبهيم وحيونة الشعب المصري وهحكيلك موقف انا اول ما سجلت في المحاورات هنا تكلمت عن ان هناك من يصفنا

نحن المصريين من اهل الخليج بان ريحتنا مش ولابد وتعرضت وقتها لسيل جارف من الاتهامات وانا لا انكر

انني اخطأت حتي حينما اردت ان اذكر تلكم السلبيات للاصلاح ولكن ما كان يجب ان افعل وانا امتكلت الجراة لأن اعتذر وانا اعتذر

مرة اخري لكل بني بلدي عما صدر مني سابقا ... اخ احمد قد يكون الكبدة والكلاوي افضل مني تعليميا وثقافة ولكنه لا يمكلك المال

فليس عيبا ولا عارا ان يبحث عن السفر لتوفير مصدر رزق له ولاهله واعلم ان هؤلاء الكبد والكلاوي مهما عاشوا خارج مصر ومهما وصلوا

الي مراكز ومناصب يظل حبه لمصر في قلبه ويحلم باليوم الذي يستطيع فيه العيش في بلده وسط اهله ليكن من المتشفيين علي رأيك

انا لا اهاجمك ولا انتقد رأيك ولكن لي الحق ان ارفض ان اكون كبده او كلوية مع اني لم اقدم لامريكا التي لو واتتني الفرصة لاسافر

لها لن اتاخر ليس حبا فيها ولكن رغبة في توفير مصدر رزق لي ولأهلي.

الاخ الفاضل عمرو حورس علي قدر ما اضحكني اسلوبك الساخر اسمح لي بأن افخر معك بأن اهلي

ليسوا من الاقطاعيين بل نحن من الطبقة الوسطي التي ستظل دوما هي قلب مصر النابض بحبها .

وعذرا انا لا اهاجم احدا ولكني حزنت لما قرأت وحاولت الا اكتب ولكن هذا ما اراد الله ان يكون .

اخوكم الراغب في الفرار من جحيم حسني مبارك وعصابته .............شينكاوي...............

[ahmedarab]

ahmedarab رد اليوم

يعنى تقريبا حوالى 8 % من الشعب المصرى ؟؟؟؟؟ دة قبل ما تشفى يا عم الحج

وبعد ماتشفى وتشيل الجلد والسمين والكبد والكلاوى يبقى حوالى 50 او 60 %

يبقى فعلا حلاوة ولانشون ومربى وبسطرمة كمان

استاذنا الفاضل احمد خليت الشعب المصري كبد وكلاوي وشفيته كمان .......... لا تعليق ليس علي شخصك الكريم ولكن

علي نظرية تبهيم وحيونة الشعب المصري وهحكيلك موقف انا اول ما سجلت في المحاورات هنا تكلمت عن ان هناك من يصفنا

نحن المصريين من اهل الخليج بان ريحتنا مش ولابد وتعرضت وقتها لسيل جارف من الاتهامات وانا لا انكر

انني اخطأت حتي حينما اردت ان اذكر تلكم السلبيات للاصلاح ولكن ما كان يجب ان افعل وانا امتكلت الجراة لأن اعتذر وانا اعتذر

مرة اخري لكل بني بلدي عما صدر مني سابقا ... اخ احمد قد يكون الكبدة والكلاوي افضل مني تعليميا وثقافة ولكنه لا يمكلك المال

فليس عيبا ولا عارا ان يبحث عن السفر لتوفير مصدر رزق له ولاهله واعلم ان هؤلاء الكبد والكلاوي مهما عاشوا خارج مصر ومهما وصلوا

الي مراكز ومناصب يظل حبه لمصر في قلبه ويحلم باليوم الذي يستطيع فيه العيش في بلده وسط اهله ليكن من المتشفيين علي رأيك

انا لا اهاجمك ولا انتقد رأيك ولكن لي الحق ان ارفض ان اكون كبده او كلوية مع اني لم اقدم لامريكا التي لو واتتني الفرصة لاسافر

لها لن اتاخر ليس حبا فيها ولكن رغبة في توفير مصدر رزق لي ولأهلي.

الاخ الفاضل عمرو حورس علي قدر ما اضحكني اسلوبك الساخر اسمح لي بأن افخر معك بأن اهلي

ليسوا من الاقطاعيين بل نحن من الطبقة الوسطي التي ستظل دوما هي قلب مصر النابض بحبها .

وعذرا انا لا اهاجم احدا ولكني حزنت لما قرأت وحاولت الا اكتب ولكن هذا ما اراد الله ان يكون .

اخوكم الراغب في الفرار من جحيم حسني مبارك وعصابته .............شينكاوي...............

عزيزى شينكاوى متبقاش اجرسيف عليا كدة :yes: :blink:

انا كنت بهزر مستعين باسلوب الزعيم سين سين

وانا ولا بهمت ولا حيونة ولا اى حاجة من الكلام دة :old: :P

وعلي فكرة انت ممكن من خلال مداخلاتى تعرفى انى من اشد المشتاقين لمصر وترابها ومن اشد اللى بيتمنوا العودة لها

وطز فى الامارات وطز فى امريكا وطز فى الدنيا كلها جنب بلدى واهلى وناسى .

وصدقنى تشبيهى للكبد والكلاوى ..دة مكنش قصدى بية الشعب المصرى خالص اللى انا فخور بجد انى واحدة منة ...اطلاقاً

دة كان تعقيب على اسلوب سين سين فى طرح الموضوع وتنقية النسبة الكبيرة من الشعب المصرى

واسمحلى اقول كمان لو ان الشعب المصرى فية كبد وكلاوى ...يبقى انا حتة ممبار :baby:

سلام يا عزيزى وارجو ان تكون الصورة وضحت :blink: bv:-

تم تعديل 9 ديسمبر 2007 بواسطة ahmedarab

[amrhoras]

بعتذر للرد مره اخرى

هى بس مجرد توضيح مش اكتر على سؤال هقوله فى الاخر

بالنسبه ليا لو الهجره فى المريخ او زحل ليه لا ؟ بدال انا شايف احلامى وعلشان كدى انا وانتو وهم اللى اتغربوا هربنا عارفين ليه لان كل واحد فينا قال ياعم انا مالى يارب نفسي ! اشوف مصلحتى !

السته مليون مواطن اللى قدموا على الهجره الى امريكا برده لهم احلامهم عوزين يهربوا ان كانوا فلاحين صنيعيه او حتى دكاتره عندهم احلام من حقهم يحلموا اكيد اه كفاية احلامهم اللى ضاعت فى ارض الواقع بسبب مجموعه من البشر مسكوا زمام البلد بالقوه وكلنا بلا استثناء قبلنا الوضع ده وهربنا . علشان نأمن مستقبل عيالنا او نسعد الاشخاص اللى تركناهم فى الوطن .

مش عوزين نكون القاضى والجلاد كفايه الزمان علينا ده مبيرحمش نرحم انفسنا احسن وندع الخلق للخالق

ولا حد شايف ان حلم الفلاح الغلابان حرام انه يروح امريكا؟ انا مقولتش امريكا دى فرصه بس تعتبر فرصه كبيره اه صحيح كل مكان فيه الناس حلمها تهاجر الى امريكا وهواجس الديمقراطيه والحريه والدولار الاخضر فى كل مكان بلا استثناء

عارفين سعد قالها من زمان مفيش فايده عارفين ليه؟ هو ده السؤال عارفين ليه عمر ما احوالنا هتنصلح ؟ اقروا كويس وبتعمق اكتر وانتو تعرفو الاجابه هى موجوده امام انظاركم بس لن يراها احد الا اذا تعمق اكثر فاكثر ؟ منتظر اجابتكم كل واحد كده وقفه مع نفسه . يقول ليه يسأل نفسه وياريت الاقى الجواب .

نفسي حد يقولى انت غلطان ياعمرو ! بتمني ذلك انى اكون فعلا غلطان .

تحياتى

عمرو

تم تعديل 9 ديسمبر 2007 بواسطة amrhoras

[miramar]

وعندك كمان كبشة الفلاحين اللي عندنا في محافظة الشرقية اللي كل همه إن الدودة ما تاكلش القطن السنة دي ومحصول البرسيم يصح ويزهزه عشان يجوز مبروك إبنه لمسعدة بنت عم عوضين اللي في طرف البلد من الناحية الجبلية وبالتالي لو البلد ولعت مش في دماغه ولا له دعوة بتعديلات دستورية ولا تزويرات إنتخابية ولا مبارك في لشبونة بياكل فينو وحلاوة طحينية .. يعني ناس عايشة اليوم بيومها وطالبة الستر من ربنا ...

بداية استاذ سين سين انا احترم جدا واقدر اسلوبك الساخر

لكن الكلام عن اهل الريف في الشرقية صراحة غير الواقع الحالي الريف حاليا غير الريف الذي تتكلم عنه

الريف دلوقتي بقى مليان مثقفين مبقاش في جهلة زي زمان والبركة في الدش والتليفزيون والنت الي وصل لابعد مكان نتخيله

صح في المزارعين والفلاحين الي بيزرعوا الارض لكن حتى دول بقى عندهم قدر من العلم والوعي.

عارفين سعد قالها من زمان مفيش فايده عارفين ليه؟ هو ده السؤال عارفين ليه عمر ما احوالنا هتنصلح ؟ اقروا كويس وبتعمق اكتر وانتو تعرفو الاجابه هى موجوده امام انظاركم بس لن يراها احد الا اذا تعمق اكثر فاكثر ؟ منتظر اجابتكم كل واحد كده وقفه مع نفسه . يقول ليه يسأل نفسه وياريت الاقى الجواب .

استاذ عمرو اعتقد ان جوابي على سؤالك هيكون ممكن عشان كل واحد بيقول وانا مالي متولع ,أنا ومن بعدي الطوفان, لكن للأسف بتولع وتولع وتيجي في الأخر تلسعنا ونقول يا ريت كنا عملنا حاجة.

مرمر

[se_ Elsyed]

صلوا عالنبي يا جدعان

ايه حالة التربص اللي بقت موجودة بيننا دي ؟

هل انا هنا بأسخر من الفلاحين ؟

اذا كنت انا اساساً اصولي واصول اجدادي مازالوا هناك .. يبقى ازاي هاسخر منهم

انا بعد كده هاجيب قاموس واضعه على جنب كل مداخلة عشان نفسر الكلام ولا نُسيء الظن ببعض

انا قصدي يا اخواننا اننا لو نزلنا الارياف وعملنا احصائيات مستحيل نلاقي الفلاح البسيط اللي بيزرع ارضه ومرتبط بها يفكر او يسمع عن الهجرة لأمريكا وبالتالي دول مش معانا في الـ 6 مليون

اخوكم سي السيد قشطة

قصدي سي السيد بيه قشطه عشان ماحدش يزعل

[عادل أبوزيد]

السائد الآن فى مصر تصور أن الخروج من مصر هو الحل الأول أو الأمثل من أجل التغيير إلى الأفضل ، و الخروج من مصر له عدة صور ... عقد فى الخليج ... هجرة لأمريكا ... التسلل لدولة أوروبية .... التسلل لدولة عربية ..إلخ حسب موقع الشخص الجغرافى و الثقافى.

ما سبق كان إستهلالا لابد منه

يمكننا القول أن الموضوع هو قراءة إحصائية إقبال المصريين على التقدم لقرعة الحصول على البطاقة الخضراء للهجرة إلى أمريكا و قد توصل الفاضل إلى أن تقريبا نصف المصريين شاركوا فى هذه القرعة !!! قد يكون ذلك صحيحا أو قريبا من الصحة رقميا و تعلمون أننا يمكننا دائما إستنتاج نتائج قد تكون متضادة من أى أرقام إحصائية

بحثت و لم أجد رقم المصريين المتقدمين للقرعة و لكنى وجدت رقم الذين فازوا بالقرعة و هو 7229 الرابط http://www.usagcls.com/Res.asp

و هذه الأرقام خاصة بسنة 2007 و أعلنت فى يوليو 2006 لم أتوصل لإجمالى عدد المتقدمين.

يتم فتح باب القرعة لمدة شهرين من 5 أكتوبر إلى 4 ديسمبر من كل سنة و يكون ذلك على الإنترنت و التقديم لا يستغرق أكثر من خمس دقائق أمام الكومبيوتر و أستطيع التخمين أن ليس كل من ملأ طلبا فى تلك القرعة يعنى أنه يفكر فى الهجرة.

السؤال المهم الذى أثاره هذا الموضوع هو هل فعلا لا توجد إمكانية للتحسين داخل مصر هنا ؟ هل الهجرة أو الإغتراب هو الحل ؟

ليتنا نثير هذا السؤال فى باب التعليم و العمل و لا أقصد بأى شكل تشتيت الحوار هنا و لا أحسب أحدا يستطيع أو يريد ذلك

[مصري أصيل]

أقتباس

يتم فتح باب القرعة لمدة شهرين من 5 أكتوبر إلى 4 ديسمبر من كل سنة و يكون ذلك على الإنترنت و التقديم لا يستغرق أكثر من خمس دقائق أمام الكومبيوتر و أستطيع التخمين أن ليس كل من ملأ طلبا فى تلك القرعة يعنى أنه يفكر فى الهجرة.

عندك حق يا أستاذ عادل أنا لم يكن عندي أدني فكره عن الموضوع ولقيته في أحدي المواقع ودخلت وسجلت مش عارف ليه مع أني ما عنديش أي نيه للهجره لأمريكا وبعدها نسيت الموضوع تماماً وبعدها بشهر تقريباً لقيت تليفون دولي مش عارف مصدره . لقيت واحده بتتكلم أنجليزي أكيد وبتسألني أنت عايز تهاجر لوحدك ولا معاك أسرتك وأنت خريج أيه وبتشتغل أيه وأسئلة أستمرت حوالي 15 دقيقه وبعدها طلبت مني طريقة دفع رسوم التسجيل هل هتكوون بالفيزا كارت ولا أيه ولما لقيت الموضوع فيه دفع و أنا ما عنديش نية هجره

أنهيت المكالمة بحجة أني هأستكمل التسجيل علي النت وطريقة الدفع . يعني بالتأكيد مش كل اللي سجل كان ناوي يهاجر.

أما من ناحية أن المصريين عايزين يطفشوا من حكم مبارك فدي كمان حقيقه مؤكده . وأنا واحد من الناس مسافر بقالي 14 سنه ومش عارف ممكن أفكر في اني أرجع تاني . لأن بصراحة كان تفكير الواحد أنه هيقعد كام سنه في الغربه يكون قرشين يعمل بيهم مشروع لكن بالتأكيد التفكير أتغير دلوقتي وأصبح التفكير في العوده درب من الجنون للحالة الأقتصادية السيئة للبلد والظروف المعيشيه الصعبة.

تم تعديل 10 ديسمبر 2007 بواسطة مصري أصيل

[se_ Elsyed]

الرقم أُعلن عنه من خلال مستندات رسمية في برنامج العاشرة مساءً أول أمس وفي عدة برامج أخرى ...

[أبو محمد]

عندما كنت فى الكويت ، كان زملائى فى العمل من جنسيات عديدة ومختلفة .. كنا نسمى مجتمع العمل "أمم متحدة" لكثرة الجنسيات فيه .. ونشطت فكرة الهجرة إلى أمريكا وكندا بين الزملاء بشكل خاص بعد غزو الكويت وتحريرها .. وكانت هناك مكاتب منتشرة فى دول الخليج لتسهيل الهجرة مقابل مبالغ مالية (كانت حوالى ستة آلاف دولار) .. وكان كل من يفكر فى الهجرة عنده أكثر من دافع وراء ذلك .. ولكن كان الدافع المشترك عند معظم من فكروا فى الهجرة هو الحصول على "جنسية محترمة" لهم ولأولادهم من بعدهم .. وكل من هاجر ممن أعرفهم لم يترك مكانه للعيش فى الولايات المتحدة أو كندا أو استراليا أو نيوزيلاندا (الدول القابلة للمهاجرين) .. أغلبهم ما زال يعمل فى الخليج والمصريون منهم يقضون إجازاتهم فى مصر وإن كانوا يزورون بلد المهجر بالقدر الكافى للاحتفاظ بالإقامة الدائمة تمهيدا للحصول على الجنسية ..

لقد مررنا بتجربة كان العالم كله يشاهدها ويتابعها .. وهى تجربة تناول كل دولة لمشكلة مواطنيها فى الكويت أثناء الغزو والاحتلال .. فى بداية الغزو شاهدت بعينى تجمع الأمريكان والبريطانيين فى بيت أحدهم للاستعداد لحملهم بحرا أو جوا إلى أقرب حاملة طائرات .. شاهدنا وشاهد العالم أجمع كيف خرجت الجنسيات المختلفة من الكويت .. شاهدنا وشاهد العالم قضية "الدروع البشرية" التى تفتق عنها فكر صدام حسين حين قام بتوزيع أسراه من المدنيين من جنسيات أوروبية وأمريكية على منشآت العراق الحيوية لحمايتها .. وتابعنا جهود تلك الدول فى مفاوضات مضنية لتحرير هؤلاء البشر وإبعادهم عن ويلات الحرب المحتملة .. وفى مقابل ذلك استدعت كل جنسية كيفية خروجها من الكويت كما استدعت رحلة الآلام فى الطريق إلى الوطن

كان الدافع المشترك - كما قلت - هو الحصول على "جنسية محترمة" لدولة من الدول المستعدة لتحريك أساطيلها لإنقاذ مواطنيها من دافعى الضرائب ..

الدول الديموقراطية تسمى مواطنيها "مواطنين Citizens" ولا تسميهم رعايا .. ليست عندهم هذه الكلمة ، وإن كانت موجودة فإنهم لا يستعملونها فى وصف "المواطنين" .. مع احترامى لكل ما تحتويه كلمة "رعايا" من معنى ..

[شينكاوي]

السلام عليكم

se_ Elsyed رد أمس, 10:42 PM

صلوا عالنبي يا جدعان

ايه حالة التربص اللي بقت موجودة بيننا دي ؟

الاخ سي سيد الموضوع لا تربص ولا حاجة احنا هنا كلنا اخوة مهما اختلفنا في الرأي ولكنك تعلم ما تعتبره عادي قد يثير حفيظة البعض

فيتم الرد باسلوب قد تعتبره انت قاس.

عادل أبوزيد رد أمس, 11:23

السؤال المهم الذى أثاره هذا الموضوع هو هل فعلا لا توجد إمكانية للتحسين داخل مصر هنا ؟ هل الهجرة أو الإغتراب هو الحل ؟

الجواب من وجهة نظري توجد امكانية للعيش عيشة كريمة ولكن معظمنا لا يريد ان يعيش فقط عيشة كريمة اي مكتفيا بالحد العادي

من الرفاهية ولكنه يريد ان يعيش عيشة كلها رفاهية ويشتري شاليه ويشتري ارض للاستثمار وغير ذلك مما لا يفعله الا الاغنياء

ولا ننكر ان هناك هم من معدومي الدخل الذين هناك واجب اجتماعي للحكومة تجاههم يجب ان تؤديه.

بالنسبة لاخويا احمد عرب طبعا انا مصدقك انك بتحب مصر وصدقني انا لم افهم كلامك خطأ وواثق انك كنت تحاول ان تسخر من الوضع

ولكن يا عزيزي صدقني كلماتك كانت جدا قاسية كما هي كلمات سين سين وهذا ما دفعني وغيري للاعتراض فقط واكرر للاعتراض

ويا عزيزي احسبك علي خير ولا ازكيك علي الله واحسب انك لن تسئ الظن بي

هذا التوضيح فقط لتهدئة النفوس .

واخيرا اود انا قول ان هناك فرق بين نقد الذات الذي يؤدي الي اصلاحها وبين جلد الذات الذي يؤدي الي هدمها ودمارها.

[amrhoras]

اخى العزيز سين سين

اردت فقط ان ابرىء نفسي من التربص لكن هى بتيجي معاك كدى ماذا افعل كل مافى الامر اختلافات فى الاراء لكن المكانه محفوظه واليك منى كل التحيه.

ولا انت مش ديمقراطي ياباشا اكيد لازم يكون فى معارضه ومعتقلات بقى ولا ايه ياريس

لكن صدقنى انا لما كتبت مداخلاتى كتبتها عن اشياء معينه وكما قال اخى الكريم أ/شينكاوى اثارت حفيظة بعضنا البعض فى تتوقع ان يتفق معك جميع الاراء. نحن فى الاول والاخر اخوه فى الله وفى الوطن

شكرا حفظك الله من كل شر وسوء

اخوك عمرو حروس