دعوة للمشاركة فى أعباء الإشراف فى محاورات المصريين

[لماضة مصرية جدا]

السلام عليكم و رحمة الله و بركاته

جزاكم الله كل خير استاذة ضحي و استاذ احمد....بس ده تشريف لي لا استحقه

اسمحولي

اختلف مع حضراتكم في حاجة

انا شايفة ان نقطة البداية مش ان احنا نرشح اسم او نضع معايير...البداية ان كل اعضاء المحاورات....نطرح تساؤل....احنا عايزين ايه من المحاورات خلال فترة زمنية معينة مثلا

نشوف ايه رؤيتنا....ايه هدفنا....ايه احتياجاتنا....نحط خطوط واضحة و عريضة للتطوير...عشان الخريطة دي هي اللي هتبقي حتي لو الافراد او الاشخاص مش موجودين

لازم يبقي عندنا خريطة واضحة

و بعد ما نحطها...بس تتطلب فعلا مشاركة معظم الافراد....مش عارفة نعمل مثلا استفتاء...و اقتراحات علي بنود معينة....او حوار مفتوح و نخلص منه بالنتايج

بس لازم يبقي عندنا تارجت

و بعدها....وجهة نظري الخاصة نسال نفسنا السؤال الذي يليه....مين هيساعدنا ان احنا نوصل للخريطة دي اللي احنا كلنا حاطيناها و عايزين نمشي عليها

و إذا عايزين رأيي.....انا بحس ان كلنا مشرفين....و ليس شخص بعينه...و تواجد المشرفين الحالين هو تواجد يبعث علي الطمأنينة بلا شك انك في مكان له كل التقدير...لكن يظل كل فرد هو مسئول عن وجهة نظره اللي بتحملها كلماته...حتي عندما يحدث تجاوز في اي وجهة نظر....اجد ان هناك من يرد الرد الحسن علي هذا التجاوز...و ليس شرطا ان يكون من فريق الاشراف...

لكن لو من الناحية التنظيمية للموضوعات....فاقترح فريق متطوع....و لا توجد حاجة للافصاح عنه...لانه هيعمل بصمت.

اما إذا كان الطرح قائم...فاتمني ان احنا نحدد فقط نقطة البداية الصح....و كلنا هنتشارك فيها...لانها لينا اصلا في الاول و في الاخر

معذرة ع الاطالة

تحياتي

[أحمد سيف]

جزاكم الله كل خير استاذة ضحي و استاذ احمد....بس ده تشريف لي لا استحقه

لا حضرتك فاهمة الموضوع غلط خالص ... ده توريط مش تشريف

وجهة النظر اللي طرحتيها ممتازة وتثبت فعلا أن الترشيح كان في محلّه ... عندي بعض الإجابات على التساؤلات التي طرحت لكن أنا هنتظر لحد ما أسمع رأي الإدارة في هذه المسألة علشان الكلام يبقى له معنى

[doha]

لماضه مصرية .. جدا ..

ولا تقدري تقولي لي أي (فلتر) من اللي استخدمتيهم هو اللي ما عدّاش الاسم ده؟

استبعدت كمان الناس الي سبق واعتذرت عن الاشراف بشكل او آخر

الله يكرمك يااستاذي الفاضل ..

حضرتك من الناس الي اعتذرت عن الاشراف بشكل .. انا بقى الي اعتذرت بآخر ..

مبقولش ان حد عرض علي الاشراف لكن من زمان اخذت قرار اني مستحيل ابقى مشرفة تاني بعد ماجربت كل مكان اروح فيه انحط مشرفة وبتكون دي لعنة علي اني مبعرفش اشارك في المكان تاني .. بيضيع وقتي كله في تصفح المواضيع الي تهمني والي متهمنيش بل وعلى وجه الخصوص المواضيع الي باين من عنوانها انها كده ولا كده او متستحقش حد يدخلها من الاساس دي بالذات لا زم ادخلها عشان اشوف لو فيها حاجه غلط فالحق احذفها قبل ماحد يقراها .. طبعا حاجه مرهقة متعبه قاتلة .. الله يكون في عون اي مشرف بجد ..

القرار ده اخذته من زمان وناوية باذن الله اثبت عليه مهما كانت المغريات حتى لو الاشراف في موقع زي المحاورات الي اكيد يزيد اي حد شرف انه يكون مشرف فيه الكن خلاص هو قرار لارجعه فيه بالنسبة لي .. لا للاشراف ..

عشان كده قاعده وبختار وبقلب جامد .. الرفيق لماضه لسه ورور وماشاء الله صحتها مساعداها .. انما انا .. كح كح .. يلله .. حسن الختااام ..